Blog

Umuvugizi wa RIB w'umusigire, Dr Murangira B. Thierry yavuze ko Jean Claude Shabani yakoze iyi mpanuka ku wa 10 Gashyantare 2021 aho yagonze Hakorimana Justin w'imyaka 18 biza no kumuviramo urupfu.

Dr Murangira yakomeje avuga ko ku wa 11 Gashyantare Shabani yahise atabwa muri yombi, aho akurikiranyweho icyaha cy'ubwicanyi budaturutse ku bushake.

Iyi mpanuka yabereye mu Karere ka Rulindo, Umurenge wa Ntarabana, Akagari ka Kiyanza. Kugeza ubu haracyakorwa iperereza na dosiye kugira ngo Shabani ashyikirizwe ubushinjacyaha mu gihe cyagenwe.

Shabani Jean Claude, aramutse ahamwe n'iki cyaha yahanwa n'ingingo ya 111 mu Gitabo cy'amategeko ahana y'u Rwanda, iteganya ko ahabwa igihano cy'igifungo kitari munsi y'amezi atandatu ariko kitarenze imyaka ibiri n'ihazabu iri hagati y'ibihumbi 500Frw na miliyoni 2 Frw cyangwa kimwe muri ibi bihano.

Polisi yabitangaje mu ijoro ryo kuri uyu wa Mbere tariki 15 Gashyantare ubwo Urwego rw’Igihugu rw’Ubugenzacyaha rwarirumaze gutangaza ko rwataye muri yombi uyu mugore wari umaze iminsi atambutsa ibiganiro kuri Youtube.

Muri iri tangazo rya Polisi y’u Rwanda, ivuga ko uru rwego rwafatanyije na RIB kujya gufata uyu mugore aho atuye ahagana saa kumi z’umugoroba.

Iri tangazo rigira riti 'Ukekwaho icyaha yakoresheje icupa mu gukomeretsa mu mutwe umwe mu bakozi wahise ajyanwa ku Bitaro by’Akarere ku Kacyiru kugira ngo yitabweho.'

Muri iri tangazo rya Polisi, hagaragaramo ko Idamange akurikiranyweho ibyaha birimo kiriya cyo guteza imvururu n’imidugararo muri rubanda ariko hakazamo n’icyaha cyo kunaniza iyubahirizwa ry’amategeko.

Bishoboka ko azaakurikiranwaho iki cyo kurwanya inzego kubera kwanga gufatwa ahubwo agakubita icupa mu mutwe uriya mupolisi akamukomeretsa.

Idamange yakunze kumvikana mu biganiro yatambutsaga kuri Youtube bigaruka cyane kuri Politiki ndetse n’ibijyanye na Jenoside yakorewe Abatutsi.

Ni ibiganiro atahwemye kubwirwa n’abakoresha imbuga nkoranyambaga ko imvugo akoresha muri biriya biganiro zipfobya Jenoside yakorewe Abatutsi ndetse zikaba ziteza n’imidugararo mu baturage.

We yakunze kuvuga ko adashobora gupfobya Jenoside yakorewe Abatutsi kuko na we yamugizeho ingaruka mu gihe bamwe mu bayirokotse bamaze iminsi bavuga ko kabone n’ubwo waba uri umwe muri ariko udakwiye kuyihakana cyangwa kuyipfobya bityo ko uzabikora agomba kuzabiryozwa.

UKWEZI.RW

Nyuma y’uko ihagaritse amasezerano y’abakozi, ikipe ya Kiyovu Sports iherutse gutanga ubufasha ku bakinnyi aho bagenewe ibihumbi 30, ibintu bitabashimishije na gato.

Tariki ya 11 Ukuboza 2020, Minisiteri ya Siporo yasohoye itangazo rihagarika shampiyona umwaka w’imikino wa 2020-2021 bitewe n’uko amwe mu makipe yari yarenze ku mabwiriza yo kwirinda icyorezo cya Corobavirus.

Tariki ya 15 Mutarama 2021, Kiyovu Sports yahise ihagarika amasezerano y’abakinnyi aho babwiwe ko bazagaruka mu kazi shampiyona itangiye, ariko bizeje abakinnyi ko bazagumya kubafasha.

Mu ntangiriro z’uku kwezi kwa Gashyantare, Kiyovu Sports yahaye abakinnyi bayo icyiciro cya mbere cy’ubufasha, bakaba baragenewe amafaranga angana n’ibihumbi 30 by’amafaranga y’u Rwanda.

Bamwe mu bakinnyi bakaba batarashimishijwe n’aya mafaranga bahawe kuko nta kintu yabafasha dore atanakwishyura inzu babamo byibuze n’ukwezi.

Umwe yabwiye ISIMBI ati“ngo baradufashije? Ibihumbi 30 se wowe yakumarira iki? Hari uba mu nzu yayo mafaranga byibuze se ngo tuvuge ko ari yo bishyuye? Hari abafite imiryango icyo nacyo bakwiye kukimenya.”

Undi mu baganiriye na ISIMBI yavuze ko yanze ko byafatwa nk’agasuzuguro n’aho ntayo yari kwemera.

Kugeza ubu ntabwo bizwi igihe shampiyona izagarukira, ku munsi w’ejo Minisiteri ya Siporo yagiranye inama n’amafederasiyo arimo na FERWAFA baganira ku buryo ibikorwa by’imikino byakongera gusubukurwa.

Sinjye wavuze ko umufana ari umukinnyi wa 12! Niko twakuze tubisanga ariko iyo urebye usanga ari byo, ahanini biterwa n’umurindi wabo muri Stade bashyigikiye ikipe bihebeye, bigashyira igitutu n’igihunga ku wo bahanganye, ese bafite uburenganzira bwo kwirukana umutoza? Ese hari aho ubundi byabaye? None se ubundi ubushobozi bwabo ku ikipe buhera he bukagarukira he?'

Iyo ikipe idatsinda byose abafana bazabiryoza umutoza kabone n’iyo haba hari ibitagenda neza bimubangamira mu kazi ke, kimwe n’uko mu gihe itsinda asingizwa.

Ni kenshi abafana iyo ikipe yabo idatsinda batangiza ubukurangamba bwo kwirukana umutoza bavuga ko adashoboye rimwe na rimwe bigashyira igitutu ku buyobozi bukamusezerera bashingiye ku byifuzo by’abafana kandi nyamara bo bari bakinamufitiye icyizere, hari n’igihe yisezerera kubera abafana, icyo gihe nibo baba bamwirukanye.

Muri iyi nkuru ISIMBI iragaruka ku bushobozi abafana bafite mu makipe bihebeye, aho turi bwiyambaze bamwe mu nararibonye muri ruhago mu Rwanda bakadufasha kumva akamaro nyako k’umufana mu ikipe, turifashisha kandi ingero zimwe na zimwe zo mu Rwanda no hanze yarwo.

Si amakipe yose ajyaho igitutu cy’abafana, biterwa n’ikipe iyo ari yo n’abafana ifite uko bangana, dufashe urugero mu Rwanda, ikipe nka Police FC cyangwa AS Kigali biragoye kuvuga ko umutoza yirukanwe kubera abafana, ahubwo usanga ubuyobozi ari bwo bufata umwanzuro bitewe n’umusaruro we yatanze bukaba bwamusezerera, aha bitandukanye nko ku ikipe nka Rayon Sports.

Ese hari aho umutoza yirukanywe n’abafana?

Ntabwo umufana azasinya ku rwandiko rwirukana umutoza, ariko ubukangurambaga bakora bagaragaza ko badakeneye umutoza akenshi bishyira igitutu kuri we no ku buyobozi bukaba bwamusezerera n’iyo bwo bukimufitiye icyizere.

Dufashe urugero nko kuri campaign[ubukangurambaga] bwiswe 'WENGER OUT’ kwanga kugura amatike y’umwaka(seasonal ticket) muri Arsenal, iki ni kimwe mu byatumye uyu mutoza atandukana n’iyi kipe kandi ubuyobozi bwa Arsenal bwo bwari bukimufitiye icyizere.

Arsene Wenger yagizwe umutoza wa Arsenal kuva mu 1996 asezera muri 2018 ahanini byatewe n’igitutu cy’abafana batabonaga ibikombe, ni nyuma y’ibikombe 3 bya Premier League na 7 bya FA Cup yabahesheje hagati ya 1998 na 2017.

Ubukangurambaga bwo bwa #WENGEROUT ni kimwe mu byatumye ava muri Arsenal

Byageze aho abafana batangiza ubukangurambaga 'WENGER OUT’, bwakwirakwiye ahantu hose, bakinjira muri Stade bafite ibyapa, ku mbuga nkoranyambaga hari Hash Tag ya #wengerout, byavuye mu Bwongereza bikwirakwira Isi yose ibi byashyize igitutu kuri uyu mutoza wari umaze imyaka 22 atoza Arsenal ndetse agifitiwe icyizere n’ubuyobozi, yahise afata umwnazuro wo gutangaza ko nyuma y’umwaka w’imikino 2017-2018(yarimo atoza) ko azahita atandukana na Arsenal, icyemezo cyishimiwe n’abakunzi ba Arsenal.

Tugarutse mu Rwanda muri 2010 abafana ba Rayon Sports biyirukaniye umutoza Kayiranga Jean Baptiste ubwo bamuteraga inkari kubera kubura umusaruro, uyu mutoza akaba yarahise asezera akazi nyuma yo kunanirwa kwihanganira ibyo yakorewe n’abafana.

Muri 2019, APR FC yatandukanye n’umutoza Zlatko Krmpotic wari wasinye umwaka ariko akahamara amezi 6 gusa, ni nyuma yo kutitwara neza abafana bagatangira gusaba ko yirukanwa, na we yaje kumvikana mu itangazamakuru avuga ko na we adakunda abafana b’iyii kipe we icyo areba ari akazi ke. Nyuma ubuyobozi bwa APR FC bwaje kumwirukana.

Kayiranga Jean Baptiste yigeze gusezera muri Rayon Sports kubera abafana

Paul Muvunyi wabaye perezida wa Rayon Sports ahamya ko ibibazo nk’ibyo bagiye bahura nabyo ariko abona bidakwiye ko umufana yivanga mu mikorere y’ikipe cyangwa yirukana umutoza kuko burya n’abafana bagira aho baba bagomba kugarukira.

Yagize ati'komite igira ibyo isabwa n’abafana bakagira ibyo basabwa, niyo mpamvu umutoza abazwa komite, niyo yicara ikareba uwukenewe, no kugenda rero hari abagenda kuko badashoboye, hari abagenda kubera kudahembwa, hari abagenda kubera ko abo bafana babatesheje umutwe.'

Akomeza avuga ko aho uburenganzira bwabo bugarukira ari ukuba bativanga mu mikorere ya komite n’ubuzima bwa buri munsi bw’ikipe.

'Ni nabyo twakoze, abantu barakubwiraga ngo dufite abafana benshi mu gihugu, ese benshi bangahe, turavuga ngo bajye mu matsinda(Fan Clubs), intego yazo kwari ukugira ngo agenzurwe yaba mu gutanga umusanzu, mu kuganira ku bibazo by’ikipe(…) zarakoze ariko mu gukora kwazo ntaho zivanga mu mibereho y’ikipe umunsi ku munsi yaba mu bakinnyi no mu batoza, ku buryo hagize n’ukosa umuntu amenya aho amubariza.' Paul Muvunyi

Yakomeje avuga ko bibaho ariko na none ko bitagakwiye ko umutoza yirukanwa n’abafana kuko hari igihe hangirika byinshi.

Ati'bibaho rwose ko umutoza na komite iba ikimufitiye icyizere ariko akirukanwa n’abafana, ariko ntabwo byagakwiye ko abafana bamwirukana, kuko rimwe na rimwe bigora ubuyobozi bitewe n’amasezerano ye kuko hari ibyo baba bamugomba.Ni nayo mpamvu polisi iza ku kibuga, ibintu birimo amarangamutima hari igihe hangirika byinshi.'

Umutoza akaba n’umusesenguzi wa B&B FM, Muhire Hassan avuga ko kuba umufana yagira uruhare mu kwirukana umutoza ahanini bishingira ku musaruro we kandi abantu bakwiye kumenya ko umufana ari umuntu ukomeye mu ikipe ari nayo mpamvu ibyifuzo bye bihabwa agaciro harimo no kuba bakwirukana umutoza mu gihe ikipe ititwara neza.

Ati'Ibyo wakora mu buryo bumwe cyangwa ubundi, imbaraga z’abafana ni ikintu gikomeye, akenshi ibyo ikipe ikora ibikorera abafana. Niba abafana bavuze ngo ntabwo umutoza tumushaka ntabwo tumushaka, bashobora gukomeza guhuma amaso abafana ariko iyo bikomeje kuba bibi birangira umutoza batandukanye, icyo mugomba kumenya abafana ntabwo bazirikana niyo waba warakoze byiza bingana gute, baba bakeneye ibyishimo byako kanya.'

'Ikipe ishobora gukora kugira ngo idatakaza ubucuruzi bwayo. Nka Wenger kugira ngo agende byatewe n’abantu bagera kuri 30% banze kugura amatike biriya byapa byo nta gihe batabimanitse. Babonye harimo igihombo baramurekura, izo rero ni za mbaraga za wa mufana.'

Muhire Hassan kandi ahamya ko igihe cyose umutoza yahawe ibikenewe ariko ntiyitware neza, iyo abafana batangiye gusaba ngo yirukanwe ubuyobozi budatekereza kabiri, ni mu gihe iyo ubuyobozi buzi ko hari icyo butamuhaye ari bwo bugumya kumuryamaho birengagije ubusabe bw’abafana, ariko nabwo hari igihe kigera bakarushwa imbaraga.

Yasobanuye kandi ko hari n’igihe umutoza atandukana n’ikipe kubera ibihe abantu bagakeka ko ari abafana kandi bitandukanye, nk’aho yatanze urugero kuri Klopp ajya kuva muri Dortmund byatewe n’uko hafi y’abakinnyi 11 babanzaga mu kibuga yari afite batandukanye n’ikipe, bataniye undi mushinga bazana abandi bashya, aragerageza biranga ari nabwo yasabye gutandukana na Dortmund.

Paul Muvunyi avuga ko hari imirongo abafana baba batagomba kurenga

Yemeza ko ibyo ikipe ikora byose iba ibikorera abafana ari nayo mpamvu bagomba kugira ijambo rikomeye