Blog

Ihuriro ry'abaganga b'abakristu gatolika muri Kenya ryasohoye itangazo riburira abantu ku nkingo za Covid-19, rivuga ko urwo rukingo rudakenewe.

Catholic Doctors Association of Kenya isaba abafite ibimenyetso bya Covid gukoresha uburyo bwo kwiyuka (steam) cyangwa imiti nka hydroxychloroquine na ivermectin — imiti itaremejwe na WHO/OMS ko ivura abarwaye Covid-19.

Iryo tsinda ryavuze ibi mu gihe Kenya imaze kwakira doze zirenga miliyoni imwe z'urukingo rwa Oxford-AstraZeneca

Uhagarariye OMS muri Kenya yabwiye abanyamakuru ko ibyatangajwe n'itsinda ry'aba baganga nta shingiro bifite kuko urukingo rwagenzuwe n'abahanga mbere yo kwemezwa.

Iri tsinda ry'abaganga ryo rivuga ko uru rukingo n'izindi zikiri 'mu igerageza'.

BBC dukesha iyi nkuru yatangaje ko Kiliziya gatolika muri Kenya yahakanye ibivugwa n'iryo tsinda ry'abaganga, ivuga ko ishyigikiye urwo rukingo.

Arkepiskopi Anthony Muheria yagize ati: 'Papa Francis niwe ukuriye Kiliziya, kandi yavuze mu buryo bweruye ku rukingo. Biremewe ko tuzifata…Birakwiye ko zigenzurwa nk'izindi nkingo zisanzwe kandi ibyo minisiteri y'ubuzima niyo igomba kubikora'.
Mu 2019 Kiliziya gatorika muri Kenya yanze ko abakobwa baterwa urukingo rurinda kanseri y'inkondo y'umura (HPV), no mu 2014 yamaganye gahunda yo gukingira tetanus.

Muri iki cyumweru Kenya yakiriye inkingo zo muri gahunda ya Covax

Source : https://impanuro.rw/2021/03/05/itsinda-ry-abaganga-muri-kenya-ryamaganye-urukingo-rwa-covid-19/

Rutahizamu w’ikipe y’iguhugu Amavubi na AS Kigali, Hakizimana Muhadjiri avuga ko umukinnyi bahuye akamugora ari myugariro uherutse gusezera umupira w’amaguru, Rusheshangoga Michel.

Ubwo yaganiriga n’ikinyamakuru ISIMBI, uyu mukinnyi umaze gukina imyaka myinshi muri shampiyona yo mu Rwanda, yavuze ko nta mukinnyi ukina yugarira bahuye bahanganye(ikipe zabo zahuye) ngo amubangamire.

Avuga ko umukinnyi wamugoye ari Rusheshangoga Michel uherutse gusezera umupira w’amaguru n’ubwo atigeze ahura na we bahanganye ahubwo bakinnye mu ikipe imwe.

Ati“nta myugariro wigeze umbangamira ngo ambuze gukina uko mbishaka. Buriya n’ubwo Michel Rusheshangoga yasezeye tukaba twarakinnye mu makipe amwe ntiduhure duhanganye, ariko yarangoye. Urumva hari ukuntu nko mu myitozo umutoza yatoraga amakipe abiri, yarangoraga cyane ariko abandi bose barasanzwe.”

Hakizimana Muhadjiri na Rusheshangoga Michel, uretse kuba barahuriye mu ikipe y’igihugu, ni abakinnyi bakinanye mu makipe abiri ari yo APR FC na AS Kigali ari yo Rusheshangoga yasorejemo gukina ubwo yasezeraga umupira muri Mutarama 2021.

Muhadjiri ngo nta mukinnyi uramubuza gukina uko ashaka

Mu makipe yose yakiniye ngo myugariro bigeze bahura wamuteye ubwoba

Michel Rusheshangoga wasezeye umupira ni we wagoye Hakizimana Muhadjiri

Source : http://isimbi.rw/siporo/article/myugariro-wagoye-hakizimana-muhadjiri-ntabwo-bigeze-bakina-bahanganye

Urwego Ngenzuramikorere (RURA) rwashyizeho ibiciro bishya by'ibikomoka kuri Peteroli, ihita inatangaza ko bigomba guhita bitangira gukurikizwa guhera kuri uyu wa Gatanu tariki ya 5 Werurwe 2021.

RURA yatangaje ko igiciro cya Lisansi i Kigali kitagomba kurenga Amafaranga y'u Rwanda 1,088 kuri Litiro, naho igiciro cya Mazutu i Kigali kitagomba kurenga Amafaranga y'u Rwanda 1,054 kuri Litiro.

Ibi biciro byiyongereyeho 10% bitewe ahanini n'uko ibiciro by'ibikomoka kuri peteroli ku isoko mpuzamahaga na byo byiyongereye ku buryo bukabije. Igiciro cya Lisansi cyiyongereyeho 30% naho icya Mazutu cyo cyiyongeraho 26% ku isoko mpuzamahanga.

RURA yaherukaga gutangaza ibiciro bishya by'ibikomoka kuri peteroli muri Mutarama 2021, aho igiciro cya lisansi cyari ku mafaranga 987 naho icya Mazutu ari 962 Frw.

ITANGAZO: Igiciro gishya cy’ibikomoka kuri peteroli.

Iki giciro kizatangira kubahirizwa guhera tariki ya 5 Werurwe 2021.#RwOT pic.twitter.com/ClWZa1NafH

— Rwanda Utilities Regulatory Authority — RURA (@RURA_RWANDA) March 4, 2021

Itangazo RURA yashyize ahagaragara imenyesha ibiciro bishya

Source : https://impanuro.rw/2021/03/05/rura-yashyizeho-ibiciro-bishya-byibikomoka-kuri-peteroli/

Ahagana ku I saa sita n'iminota 54 zo kuri uyu wa 04 Werurwe 2021 nibwo imodoka y'ibitaro bya Remera-Rukoma yari yinjiye mu mbuga y'ibiro by'Akarere ka Kamonyi izanye inkingo za Covd -19 zisaga 5,000 . Abayobozi b'Akarere, Ibigo Nderabuzima, Imirenge n'izindi nzego nibo bakiriye izi nkingo zigiye gutangwa ku nshuro ya Mbere mu Rwanda.

Dr Jaribu Theogene, Umuyobozi w'Ibitaro bya Remera-Rukoma yabwiye intyoza.com ko inkingo bakiriye ari ibihumbi 5 birenga, zigomba guhabwa abazigenewe babarirwa mu bihumbi 5 bafite aho bahurira n'ibyago byinshi byo kuba bakwandura Covid-19.

Avuga ko iyi ari intangiriro, ko abari busigare badakingiwe nabo bazagerwaho. Abari buherweho bakingirwa ni Abaganga nk'abantu bahura n'abantu benshi kandi baba barimo abarwaye, hakurikireho bamwe mu barwaye indwara zidakira n'abandi.

Dr Jaribu, avuga ko buri wese ukingirwa agenewe Doze ebyiri, ko uri bukingirwe none nta mpungenge z'indi Doze kuko Leta byose yabiteganije kandi ku buntu. Ukingirwa bwa mbere, indi Doze azayihabwa nyuma y'iminsi 28.

Asaba buri wese kudatinya uru rukingo kuko rwizewe. Ukingirwa amara iminota 30 nyuma y'uko ahawe urukingo hanyuma yaba nta kibazo agize akarekurwa agataha. Avuga kandi ko abagomba gukingira bose babihuguriwe cyane ko ngo n'ubundi ari abasanzwe bakora imirimo y'ubuvuzi.

Tuyizere Thaddee, Umuyobozi w'Agateganyo w'Akarere ka Kamonyi ashimira Leta kubw'iki gikorwa cyo gushakira Inkingo Abanyarwanda mu rwego rwo guhangana n'icyorezo cya Coronavirus. Asaba buri wese kwirinda abakwiza impuha kuri uru rukingo, yibutsa ko n'ubusanzwe benshi ntawe utarakingiwe kuva mu bwana, kandi ko Leta itakorera abaturage ibyo itizeye, bityo rero ko ntawe ukwiye gutinya.

Uru rukingo ruratangwa iminsi ibiri ku barugenewe, none kuwa Gatanu no kuri uyu wa Gatandatu. Inkingo zose uko zaje, zaraye ku bigo nderabuzima aho zasinyiwe n'Abayobozi b'Ibigo nderabuzima na ba Gitifu b'Imirenge ubundi ziherekezwa na Polisi igomba kuba aho ziri kugeza igikorwa kirangiye.

Munyaneza Theogene / intyoza.com

Source : https://www.intyoza.com/kamonyi-ku-ikubitiro-abasaga-5000-barakingirwa-covid-19/

Bwana Nguyen Ngoc Manh,yagiye muri aka gace iwabo w'uyu mwana batuyemo ahamagawe n'umukiriya washakaga ko amufasha kwimura ibikoresho bye.

Ubwo yari atwaye imodoka ye itwara imizigo,yageze aha hantu yari yasezeranye n'umukiriya ko bari buhurira araparika aratuza.

Ubwo yari agitegereje, yumvise urusaku rw'abantu babonaga aka kana k'agakobwa gafashe ku byuma by'uruzitiro ruba ku mazu ya etaje kari kunagana, bafite ubwoba ko gashobora guhanuka kakikubita hasi.

Uyu mugabo yahise afungura umuryango areba hejuru abona koko aka kana kagiye guhanuka,nk'umugabo ufite umuryango ahita ashakisha uburyo yagatabara.

Uyu mugabo yahise ava mu modoka ye ya Van vuba,areba aho uyu mwana ashobora kugwa niko guhita atangira kurira iyi nyubako ndende kugira ngo azi gufata uyu mwana.

Uyu mugabo yabwiye VN Express ati 'Nuriye ku gikuta mbona ashobora kugwa hejuru y'icyuma kibamo moteri niko kucyurira ndakirenga.Narambuye amaboko ku bw'amahirwe ndamufata ariko twahise duhanuka tugwa kuri cya cyuma.

Ntabwo yigeze arira ariko amaraso yahise atangira kuva mu kanwa ke.Yari ameze nk'umwana wanjye mu rugo.Nabaye nk'uvangiwe ndamubwira nti 'ntugire ikibazo,ndi hano.'

Uyu mwana yahise yihushwa kwa muganga we n'uyu mugabo wamutabaye.Uyu mukobwa yavunitse ikibero mu gihe uyu Manh we ukuboko kwe kwahindukiye
Uyu mugabo wakoze ibi bitangaza muri iki cyumweru yibukije benshi umunyamali wabaye intwari witwa Mamoudou Gassama watabaye akana I Paris bikamugira igitangaza ku isi yose kugeza ubwo perezida Macron amuha ubwenegihugu,akazi n'ibihembo bitandukanye.

Source : http://umuryango.rw/ubuzima-115/udushya/article/umushoferi-w-ikamyo-yarokoye-mu-buryo-butangaje-umwana-wahanutse-kuri-etaje-ya

Ni mu kiganiro yagiranye na IGIHE aho uyu mukobwa yavuze byinshi ku rugendo rwe mbere yo kujya mu irushanwa rya Miss Rwanda 2021 aho yanavuze ko yitabiriye Miss Rwanda 2018 gusa ntaze guhirwa no kwegukana ikamba,akaba yaragarutse muri Miss Rwanda 2021 kongera kugerageza amahirwe kuko avuga ko ubu yabaye mukuru.

Kayirebwa yakomeje avuga ko ajya kwiyandikisha muri Miss Rwanda 2021 atari yifitiye icyizere bitewe nuko yumvaga amakuru amubwira ko abategura Miss Rwanda 2021 batakwakira umukobwa wagaragaye mu mashusho y'indirimbo gusa Kayirebwa we yahisemo kwiyandikisha kugirango arebe niba bamufata cyangwa se bamwihorera nyuma aza kubona abona baramufashe.

Kayirebwa yakomeje avuga umuntu afata nk'ikitegererezo mu buzima bwe aho yavuze ko ari mukuru we kuko ariwe wabashije kumuba hafi mu buzima bwe, akora ibintu byose ku murongo, ni umujyanama mwiza kandi aharanira gukora kugirango abeho.

Uyu mukobwa wahishuye ko atigeze acibwa intege no kutegukana ikamba ubwo yitabiraga irushanwa rya Miss Rwanda mu 2018, yavuze ko muri uyu mwaka yafashe icyemezo cyo gusubirayo akongera kugerageza amahirwe.

Kayirebwa witabiriye Miss Rwanda 2018 ahagarariye Umujyi wa Kigali ntiyabashije kurenga ijonjora ry'ibanze [Pre-Selection] ngo ajye mu mwiherero.

Kudakabya inzozi ngo yegukane ikamba rya Miss Rwanda, byatumye uyu mukobwa atabasha kugera ku ntego yari yihaye zo gufasha abana bafite ubumuga nkuko byari mu mushinga we.

Icyakora ngo nubwo intego ze atazigezeho, aherutse kuvuga ko yiteguye kuzazikomezanya muri Miss Rwanda 2021.

Yagize ati “Kuri ubu kuko maze kwisobanukirwa, njya mbitekereza nkavuga nti uwasubiramo. Njya numva uyu mwaka nasubiramo.'

Uyu mukobwa avuga ko impamvu atasubiye kurushanwa nyuma ya 2018, byatewe nuko yabanje kugorwa no kwakira gusezererwa kwe.

Muri uyu mwaka avuga ko azagenda yitwaje intwaro eshatu yizeye ko zizamugeza kure ndetse zikaba zanamuhesha ikamba; zirimo Kutagira ubwoba, kumenya icyo ashaka no guhagarara ku byo avuga.

Kayirebwa yatangaje ko yiteguye guhatana mu irushanwa rya Miss Rwanda nyuma y'iminsi mike agaragaye mu mashusho y'indirimbo zitandukanye. Uyu mukobwa yifashishijwe mu ndirimbo zigezweho nka 'We Don't Care' ya Rj The Dj na Meddy & Rayvanny na 'Ikinyafu' ya Bruce Melodie na Kenny Sol n'izindi.

Source : http://umuryango.rw/imyidagaduro/article/missrwanda2021-kayirebwa-marie-paul-yavuze-uburyo-kujya-mu-mashusho-y-ikinyafu

Butera Knowless iyo atanga ubuhamya bw'uko zubakwa ahamya ko ibyo yabonye bihabanye n'uko yajyaga abibwira. Ahamagara kenshi umugabo we amubaza amakuru ku buryo niyo yaba ari ku rubyiniro bishoboka yahamagara umugabo we.

Kugirango umuziki we utere imbere, Butera Knowless avuga ko ibanga ari ugukora adacika intege. Ati:''Habaho kwihangana no kwiyambaza Imana''.

Kuri benshi bibaza uko afatanya urugo n'ubuhanzi, Knowless yagize Ati:''Nakuze nshinzwe ubuzima bwanjye rero ubu mfite umfasha mu buzima bwanjye kuko umugabo wanjye aramfasha nyamara mbere nari mfite abo nshinzwe ni byo byari bigoye kandi nagize amahirwe umugabo wanjye turafatanya, abana banjye baritonda ntibandushya, muri make kubaka no gukora umuziki ntibyangoye''.

Atangira kubaka urugo avuga ko ntacyamugoye kuko uko bari bameze n'ubu niko bakimeze. Ati:''Urugo si paradizo kandi ntituri abamalayika icya mbere ni uko mukemura ibiba mu mahoro n'umuvandimwe mugira icyo mupfa kandi birasanzwe kuba hari utuntu duto mutahuza mba mbona akiri wa mujama wari umujama wanjye''. Aganira na ''Rose Tv Show'' yanagarutse ku buryo iyo ari mu rugo akunda kwikorera ibintu bitandukanye ndetse ahamya ko azi guteka.

Mu ijoro ryo ku wa 01 Kanama 2017, nibwo Knowlesss yashyize hanze indirimbo yise 'Winning Team' agitangira umushinga wo kuyikoraho yakomeje kuyamamaza binyuze ku mbuga nkoranyambaga nka Facebook na Instagram anabishwamo bikomeye n'inzu itunganyamuzika ya Kina Music.

Yaba Knowless ndetse n'umugabo we Clement, icyo bandikaga cyose bongeragaho ijambo 'Winning Team' bisobanuye ikipe itsinda. Kuva amashusho atunganyijwe kugeza ku majwi yayo asohotse Knowless yirinze kugira byinshi avuga ku gisobanura cy'iyi ndirimbo.

Knowless yatandukanye mu buryo bweruye na Safi. Bamwe bati yisangiye King James nawe wari ukiri muri Kina Music. Abandi bati: 'Clement aramutwaye'.

Bidatinze, Safi yahise asohora indirimbo igira iti: 'Wampoye iki'. Umuntu wese wari uzi iby'urukundo rw'aba bombi byamworohera guhuza iyi ndirimbo no kubyara amahari hagati yabo, akaba aribyo byatumye Safi abaza Knowless ati: 'Wampoye iki?'

Iyi ndirimbo yasohotse muri Kamena 2012, igaragaramo bimwe mu bimenyetso by'umubano wa Safi na Knowless wo mu bihe bya mbere.

Iyi ndirimbo yaje gusubizwa mu marenga, aho Knowless nawe yasohoraga indi ivuga ngo 'Warurihe?' isa nk'iyihenura kuri Safi, igasingiza urukundo yari arimo na Producer Clement. Ibi byaje kujya i Rudubi mu nteruro ivuga ngo 'Iyo ntaza kubona umukara sinari kumenya ko umweru ubaho'. Inkundarubyino ziti: 'Safi yiswe Umukara naho Clement ni Umweru.'

Butera wagaragaye muri aya mashusho y'indirimbo Winning Team nk'umuntu mushya mu myambaro igezweho n'imbyino atamenyereweho, aterura avuga ko iyo yacitse intege yumva ijambo ryiza rituruka ku mugabo we umwibutsa gukomeza gukora.

Muri iyi ndirimbo Knowless, anumvikanisha neza ko atakwifata ahari ho hose yasabwa kwitangira umukunzi we. Ibi abenshi babihuza n'inkuru z'urudaca zasohotse ubwo Knowless na Clement bakoraga ubukwe muri Nyakanga 2016.

Hari abavuga ko uyu muryango ukomeye ndetse uzi kurinda ijambo kenshi bashingiye kubivugwa muri rubanda. Ubukwe bwa Knowless na Clement bwatyaje ikaramu y'itangamakuru abandi bavumira ku gahera ngo ntibatumiwe, nyamara birengagiza ko ari uburenganzira bw'abo kubatumira cyane ko atari Concert nk'uko Knowless yakomeje kubyumvikanisha.

Bongera kuvugwa cyane, ubwo babyaraga umwana w'umukobwa bise 'Or'. Knowless na Clement bakiva kwa muganga bakirijwe inkuru ivuga ko umwana wavutse atari uwa Clement ngo Knowless yamubyaye ku muherwe wo muri Uganda.

Ibinyamakuru byo muri Uganda byavugaga ko bifite amakuru yizewe ahamya ko umwana atari uwa Clemet. Ishimwe Clement yaje mu ruganda rw'imyidagaduro azi ibyo arimo, ni umuhanga mu gusubiza itangazamakuru no kuvugana n'abantu bashobora kuvuga ibye.

Abatabyumva neza, bibuke ubwo Christopher yari mu kiganiro ku Isango Star akabazwa ibyerekeye umubano wa Knowless na Clement.Icyo gihe Christopher yavuze ko bakundana, agisohoka muri studio yahuye na Clement ampuha gasopo yo kutongera kuvugana ku mubano we na Knowless.

Clement yirinze kugira icyo avuga ku mwana we wari uvutse ndetse na Knowless yanumvikanye mu itangazamakuru avuga ko adashaka ko umwana we azavuka yisanga mu itangazamakuru mu nkuru z'urudaca ari nayo mpamvu bari bakoze uko bashoboye bakarinda ko amafoto ye yajya hanze.

Igihe cyarageze bashyira hanze amafoto ye ariko birinda gushyira hanze isura ye. Uretse ibyo kandi hiyongeraho no kuba barasezeranyijwe na Pasiteri wigenga, byazamuye iyandikwa ry'inkuru yewe Knowless na Clement babaye inkuru ibanza ku rupapuro rw'ikinyamakuru.

Source : http://umuryango.rw/imyidagaduro/article/urugo-si-paradizo-kandi-ntituri-abamalayika-butera-knowless-avuga-ku-mibanire

Abaturage bo mu gihugu cya Repubulika Iharanira Demokarasi ya Kongo bavumbuye umusozi wuzuyeho zahabu barwanira kuzicukura ngo bagire nyinshi cyane basezere ku bukene.

Mu mashusho yakwirakwijwe ku mbuga nkoranyambaga,abaturage benshi bo muri iki gihugu gikungahaye ku mabuye y'agaciro baguye kuri izi zahabu zuzuye umusozi buri wese arwanira kujya gucukura no kugwiza nyinshi kurusha abandi.

BBC yatangaje ko Leta y'iki gihugu yahise yohereza abasirikare bo kurinda aka gace kuzuyemo zahabu cyane ko benshi bari kuhasiga ubuzima bapfa ubu bukungu.

Umunyamakuru wa BBC muri RDC yavuze ko izi zahabu zavumbuwe mu giturage kitwa Birava, gaherereye kuri 35km mu majyaruguru ya Bukavu.

Nubwo RDC iri mu bihugu bya mbere ku isi mu kugira amabuye y'agaciro menshi cyane,iri no mu bihugu bya mbere ku isi bikennye nubwo hari abantu ku giti cyabo bigwijeho umutungo.

Icyakora muri iki gihugu mu ntara ya Kwango mu Burengerazuba,haravugwa indwara y'amayobera imaze guhitana abantu 15 guhera mu mpera z'ukwezi gushize.

Guverineri w'iyi ntara yavuze ko iyi ndwara itangira umuntu aribwa umutwe,uburibwe bugakwira hose bwivanze n'umuriro hanyuma umuntu akananirwa guhumeka.

Source : http://umuryango.rw/ubuzima-115/udushya/article/rdc-abaturage-bavumbuye-umusozi-wuzuye-zahabu-barwanira-kuzicukura-karahava

Abahanzi bamaze igihe muri uyu muziki barimo: Neg-G, P Fla na Rafiki bafatanyije n'abo mu kiragano gishya barimo: B-Threy, Racine na Chris Eazy bakora indirimbo ‘Ese warubizi’ yatunganyijwe na Enobeatza afatanyije na Trackslayer mu buryo bw'amajwi, amashusho yayo ayoborwa anatunganywa na Eliel Sando (Eliel Filmz).

Eliel Sando nyiri igitekerezo cyo gusubiramo indirimbo ‘Nta muntu wari uzi ibi bintu’ yabwiye InyaRwanda ko ari umusanzu yifuza gutanga. Ati:”Ni umusanzu kuri Hiphop no ku bakunzi bayo, byose bigamije kuyiteza imbere''. Akomeza avuga ko gusubiramo iyi ndirimbo byavuye ku bakunzi ba muzika ndetse na we ubwe kuko yarabishyigikiye.

Gukorana na Rafiki, P Fla n'abahanzi bashya avuga ko ari uguhuza imbaraga kandi abo bahanzi bafite urukundo rwa muzika. Harimo umuhanzi witwa Chris Eazy, Eliel avuga ko hari icyo bamushakagaho kirimo ubuhanga bwo kuvanga injyana yo hambere (Old School) n'injyana nshya (new school) kandi ahamya ko uwo musanzu bamushakagaho yawutanze bitewe n'ubuhanga afite. 

Rafiki muri iyi ndirimbo agendera mu njyana abandi baririmbiramo. Ati: “Umuhanzi w’umuhanga aririmba injyana zitandukanye kandi Rafiki ni umuhanga yarabyerekanye''. Hari agace gasoza iyi ndirimbo aho Eliel ashimira The Cat umaze kubaka izina ku mbuga nkoranyambaga hano mu Rwanda ni ubwo benshi batamuvugaho rumwe. 

Elieli ati: “Thecatbabalao yagaragaje gushyigikira uyu mushinga kuva ku ndirimbo ya mbere kugeza kuri iyi isubiyemo urumva rero turi mu bihe bitoroshye ariko we yakomeje gushyigikira uyu mushinga''.

Enobeatz wagize uruhare muri iyi ndirimbo ni umuhanga mu gucura injyana (Beats) ari na wo musanzu we muri iyi ndirimbo naho Trackslayer yafashe amajwi yayo aranayayungurura (Recording, mastering and mixing)

Eliel Sando asaba abantu gukomeza gushyigikira Hip Hop no kuyiteza imbere. ‘Ese Warubizi’ ifite iminota 4 n’amasegonda 24. Ni indirimbo Neg-G aririmbamo asa nk'ubwira abanyamakuru bo muri iki kiragano ko badakunda gukina Hip Hop mu bitangazamakuru.

P Fla we asa nk’ucyurira bamwe mu batwaye Primus Guma guma Super Star none bakaba barasubiye inyuma muri muzika. Anagaruka ku mubano wahoze hagati ya Safi Madiba na Nizzo Kabosi. Ntasoreza aho kuko anibutsa abantu amwe mu matsinda yahozeho akaba yarabaye amateka (UTP Solidiers). B-Threy we yumvikana yishongora ko agiye gufata Kinyatrap akayihindura mpuzamahanga.

REBA HANO INDIRIMBO ‘ESE WARUBIZI’ IRIMO ABAHANZI B’AMAZINA AKOMEYE

Source : https://inyarwanda.com/inkuru/103559/benshi-bari-bayitegerezanyije-amatsiko-indirimbo-ese-warubizi-ihuriyemo-abahanzi-bakuru-na-103559.html

Mu marushanwa burya ni ngombwa ko haboneka uwa mbere n’uwa nyuma, gusa abakobwa 10 ba mbere barahabwa amahirwe yo kwinjira BootCamp, kuko hazashingirwa mu manota babonye mu buryo bwo kohereza ubutumwa bugufi no kuri interineti.

Harabura iminsi 2 abakobwa 20 bakamenyekana, muri iyi minsi isigaye, aba bakobwa bose uko ari 37, bafite akazi katoroshye ko kwiyamamaza hifashishijwe imbuga nkoranyambaga basaba inshuti n'abavandimwe kubaha amajwi.

Uyu mwaka wa 2021 ibintu byahinduye umuvuno muri Miss Rwanda, babikora mu nzira z’iyakure hifashishwa interineti. Abakobwa 20 ba mbere bazagira amajwi menshi kurusha abandi (SMS na Online), bazahita babona PASS ibajyana mu mwiherero (Boot Camp), 17 basigaye batahe.

Gutora kuri SMS, ni ukujya ahandikirwa ubutumwa bugufi, ukandika ijambo MISS ugasiga akanya, ugashyiraho nimero y’umukobwa utoye hanyuma ukohereza kuri 1525. Amarushanwa ya ba Nyampinga usanga hajyamo abakobwa biyizeye ku bwenge, uburanga n'imishinga yabo baba bamuritse.

Ttariki 06 Werurwe 2021 ni bwo hazamenyekana abakobwa 20 bakomeje muri iri rushanwa, mu muhango uzaba kuva saa kumi kumi n’ebyiri z’umugoroba (6pm) LIVE kuri Televiziyo KC2 na shene ya Youtube ya Miss Rwanda Official.

Reka turebe uburanga bw'abakobwa 10 bayoboye abandi.

1.Kabagema Laila: Amajwi ;180,080 (SMS) na 25,905 (Online)

2.Ishimwe Sonia: Amajwi 153,822 (SMS) na 27,057(Online)

3.Musango Natalia: Amajwi;130,454 (SMS) na 28,072 (Online)

4.Uwase Kagame Sonia: Amajwi 73,215 (SMS) na 9,343 (Online)

5.Umutesi Lea: Amajwi 62,473 (SMS) na 15,979 (Online)

6.Akaliza Amanda:Amajwi 58,308 (SMS) na 7,581 (Online)

7.Akaliza Hope:Amajwi 52,559 (SMS) na 7,242 (Online)

8.Ingabire Grace: Amajwi 50,092 (SMS) na 9,074 (Online)

9.Mutesi Doreen: Amajwi 31,391(SMS) na 13,735 (Online)

10.Ingabire Esther: Amajwi 32,290 (SMS) na 6,011(Online)

Source : https://inyarwanda.com/inkuru/103546/missrwanda2021-uburanga-bwabakobwa-10-bayoboye-abandi-mu-majwi-103546.html