Webrwanda Backend

Blog

  • Uko Gen Maj Paul Kagame yemereye Bagosora ubufasha bwo guhagarika Jenoside, akamwima amatwi –

    Raporo nshya ya Guverinoma y’u Rwanda igaragaza uruhare rw’u Bufaransa muri Jenoside yakorewe Abatutsi [Muse Report], irimo ubuhamya bwa Perezida Paul Kagame wari Umugaba Mukuru w’Ingabo za FPR Inkotanyi watumye kuri Colonel Théoneste Bagosora ngo akoreshe ububasha bwe ahagarike abasirikare ba Leta n’Interahamwe bareke kwica abatutsi n’abatavuga rumwe na Leta, undi akamwima amatwi.

    Colonel Bagosora yari Umuyobozi Mukuru muri Minisiteri y’Ingabo, akaba umwe mu bari abayobozi b’agatsiko k’intagondwa kitwaga Hutu Power kenyegeje ishyirwa mu bikorwa rya Jenoside.

    Indege ya Perezida Habyarimana ikimara guhanurwa ku mugoroba wa tariki 6 Mata 1994, bwakeye abatutsi n’abandi batavugaga rumwa na Leta bicwa muri Kigali barimo na Minisitiri w’Intebe Agathe Uwilingiyimana.

    Raporo Muse igaragaza ko uwo munsi hishwe abatutsi 17 muri Centre Christus i Remera, abasaga 20 bicirwa ku musigiti i Kibagabaga. Muri Paruwasi ya Busogo mu Ruhengeri hiciwe abatutsi basaga 300.

    Hari ubuhamya bwatanzwe mu rukiko mpanabyaha rwashyiriweho u Rwanda, ko nibura kugeza saa kumi z’umugoroba tariki 7 Mata, abantu bari hagati ya 1000 na 1500 bari bamaze kwicwa mu gihugu.

    Ahagana saa yine n’iminota 50 z’ijoro ubwo hari hashize amasaha abiri indege ya Habyarimana ihanuwe, Lieutenant-General Roméo Dallaire wari Umuyobozi w’ingabo za Loni zari zishinzwe kubungabunga amahoro mu Rwanda (MINUAR), yagiye ku Kimihurura ku cyicaro gikuru cy’ingabo kureba Théoneste Bagosora.

    Dallaire avuga ko ubwo yahageraga, yasanze Bagosora ari mu nama yari ‘igamije gusubiza ibintu ku murongo’. Ni inama yari yitabiriwe n’abandi basirikare bakuru barimo Lieutenant Colonel Cyprien Kayumba, Lieutenant Colonel Ephrem Rwabalinda, na General Augustin Ndindiliyimana wayoboraga Gendarmerie (nka Polisi).

    Dallaire yahawe ikaze mu nama, aza gutanga igitekerezo ko Bagosora na bagenzi be bareka Minisitiri w’Intebe Uwilingiyimana Agathe akaba ari we uyobora gahunda zo gusubiza ibintu ku murongo.

    Dallaire yarababwiye ati “Nubwo Perezida yapfuye, haracyari Guverinoma iyobowe na Minisitiri w’Intebe Agathe”. Ngo Bagosora yahise ahaguruka mu ntebe “yegama areba Dallaire, intoki azishinze ku meza. Yashimangiye ashikamye ko Agathe nta buyobozi na buke afite.”

    Bagosora yongeyeho ko “We [Agathe] n’agatsiko ke ntabwo aribo Guverinoma.”

    Ingabo za FPR ziraswa, Kagame agatanga gasopo

    Hejuru y’ubwicanyi bwari buri gukorerwa abaturage b’abasivili bigizwemo uruhare n’abasirikare, mu rukerera ingabo zarindaga umukuru w’igihugu zari ziri mu kigo cyazo ku Kimihurura, zatangiye kurasa ku basirikare 600 ba FPR bari bari muri CND [Ingoro y’Inteko Ishinga Amategeko kuri ubu].

    Abo basirikare bari barageze muri iyo nyubako bivuye mu masezerano ya Arusha, barinze abanyapolitiki ba FPR bari baraje gukurikirana ishyirwa mu bikorwa ry’ayo masezerano.

    Raporo ‘Muse’ ivuga ko Tito Rutaremara wari Umunyamabanga Mukuru wa FPR Inkotanyi ari umwe mu banyapolitiki bari bari muri CND. Mu gitondo cya tariki 7 Mata yahamagaye Gen Dallaire kuri telefone aramubwira ati “Ni ibiki biri kuba. Byagenze bite ko tubona ibintu birushaho kuba bibi?”

    Dallaire yabwiye Rutaremara ko Bagosora n’abandi basirikare ba FAR bashyizeho Komite yihariye yo gushyira ibintu ku murongo. Rutaremara yaratunguwe kuko ibyo Bagosora na bagenzi be bari bakoze ntaho byari biri mu masezerano y’Amahoro ya Arusha.

    Raporo ivuga ko Rutaremara yahise ahagamara Ndindiliyimana wari umuyobozi wa Gendarmerie, amubaza niba byashoboka bagahagarika ubwicanyi. Ndindiliyimana ngo yamubwiye ko Bagosora ari we ufite ubwo bushobozi, amugira inama yo kuba ari we ahamagara.

    Tito Rutaremara yahise ahamagara Bagosora, aramubwira ati “Nimudahagarika ubwicanyi, turasohoka muri CND, turwane.” Bagosora yamusubije agira ati “Ntimubikore. Tugiye kugerageza kubihagarika.”

    Kuko ibintu byarushagaho kuba bibi, Rutaremara hashize akanya yongera kugerageza guhamagara Bagosora kuri telefone, ariko asanga imiyoboro ya telefone zo muri CND yahagaritswe.

    Mu buhamya bwa Perezida Kagame muri iyo raporo, avuga ko yabwiye Dallaire wari uyoboye ingabo za Loni mu Rwanda, ko nihatagira igikorwa barakora ibishoboka byose ubwicanyi bugahagarara.

    Ati “Namenye ko inzu z’abadushyigikiye zazengurutswe n’abasirikare ba [FAR]. Ikigamijwe kirumvikana. Turakumenyesha ko ingabo zacu ziraza kurwana ku bantu bacu.”

    Kagame yahaye Dallaire kuba ubwicanyi bwahagaritswe kuwa 7 Mata cyangwa se ingabo ze zikimanukira zigana i Kigali. Icyakora, Raporo ivuga ko Kagame yabwiye Dallaire ko FPR Inkotanyi yiteguye gutanga umusanzu umutekano n’amahoro bikagaruka mu gihugu hatabayeho imirwano.

    Yemeye gutanga batayo ebyiri z’ingabo za FPR Inkotanyi ngo zifashe ingabo za Leta gusubiza ibintu mu murongo, by’umwihariko abasirikare barindaga umukuru w’igihugu bari batangiye ubwicanyi.

    Amaze kuganira na Kagame, Dallaire yashyiriye ubwo butumwa Bagosora. Ngo Bagosora yararakaye cyane, yongera guhagaruka mu ntebe yuka inabi Dallaire.

    Dallaire agira ati “Yarambwiye ngo ngende mbwire FPR ngo ‘Mwakoze’, ariko ko adashobora kwemera ubwo bufasha. Ngo ikibazo niwe cyarebaga, yagombaga kukikemurira.”

    Nubwo Bagosora yemeye ko agiye gushyira ku murongo igisirikare n’Interahamwe, siko byagenze kuko Jenoside yahise ikwirakwira hirya no hino.

    FPR yasabye iperereza ku ihanurwa ry’indege ya Habyarimana, ifata n’ingamba

    Charles Kayonga wari uyoboye ingabo 600 za FPR zari ziri muri CND, yavuze ko indege ya Habyarimana imaze guhanurwa batangiye gushakisha amakuru ariko birinda guta umutwe, nubwo inzu bari barimo yari yari yatangiye kuraswaho n’ingabo zarindaga Habyarimana.

    Ibinyamakuru mpuzamahanga bimaze gutangaza ko indege ya Habyarimana yarashwe, Kayonga yahamagaye James Kabarebe wari mu birindiro bikuru by’ingabo za FPR ku Mulindi (Gicumbi).

    Kabarebe yabwiye Kayonga gukora iperereza bakamenya uwahanuye indege ya Perezida. Icyakora, raporo igaragaza ko nta bushobozi buhagije Kayonga n’ingabo ze bari bafite bwo gukora iperereza ku buryo bamenya uwahanuye indege ya Habyarimana.

    Maj Gen Kagame mu kiganiro yagiranye na Dallaire uwo munsi, yamusabye gukoresha ingabo ze bakarinda umutekano w’abanyarwanda kandi bakamenya neza ‘uwishe Habyarimana n’impamvu’.

    Raporo igaragaza ko abasirikare ba FPR muri Kigali batangiye guhamagarwa cyane n’abaturage babasaba ubutabazi, kuko inzu zabo zari zazengurutswe n’abicanyi.

    Ibintu bikomeje kuba bibi, Gen Maj Paul Kagame wari Umugaba Mukuru w’Ingabo za FPR-Inkotanyi, yatumije inama y’abakuru b’Imitwe y’ingabo za FPR ku Mulindi. Mu ma saa cyenda z’uwo munsi wa tariki 7 Mata, yabategetse kujya guhagarika Jenoside barwanya abayikoraga bose ari na ko barokora abicwaga.

    Kuri uwo munsi yahuye n’ingabo zari mu Miyove zigizwe na Batayo eshatu azitegeka kwihutira gutabara Abanyapolitiki ba FPR n’Ingabo 600 zabarindaga i Kigali [CND] no gufatanya nazo mu rugamba rwo guhagarika Jenoside i Kigali.

    Izo batayo zabanjirije izindi kuva mu majyaruguru zerekeza i Kigali zihagera ku munsi wa kane [11 Mata 1994]. Izindi batayo ebyiri nazo zitegekwa kunyura iyo nzira iva mu majyaruguru ya Byumba igana i Kigali, zikagenda zihashya ingabo za Leta zari zihafite ibirindiro bikomeye ari na ko zikora ibikorwa by’ubutabazi.

    Kuri iyo tariki ya 7 Mata 1994, Gen Maj Paul Kagame yatangarije abanyamakuru ko FPR yafashe icyemezo cyo guhagarika jenoside yakorerwaga Abatutsi, kugira ngo abihishe bagire icyizere cyo kuba barokoka, abicaga bagire igihunga cy’uko hari ubarwanya n’abashaka gufasha muri urwo rugamba rwo guhagarika jenoside bamenye uko babigenza.

    Colonel Bagosora wari Umuyobozi Mukuru muri Minisiteri y’Ingabo, akaba umwe mu bari abayobozi b’agatsiko k’intagondwa kitwaga Hutu Power, ni umwe mu bahamwe n’ibyaha bya Jenoside

  • Davis D yavuze uko yahuye n'umukobwa w'uburanga uri mu mashusho y'indirimbo ye nshya – YEGOB #rwanda #RwOT

    Umuhanzi Ikishaka David waryubatse ku izina rya Davis D yashyize hanze indirimbo ye nshya yise Pose akaba ari indirimbo ifite amashusho agaragaramo umukobwa mwiza cyane ukomoka mu gihugu cya Espanye. Nkuko bisanzwe bimenyerewe, Davis D ni umuhanzi wita cyane mu gutegura amshusho y'indirimbo ye cyane dore ko nkuko bigaragara mu ndirimbo Pose, uyu musore yayitakajeho agatubutse kugirango ize isa nkuko imeze dore ko yanakoreshejemo imodoka yo ku bwoko bwa Lamborghini atavogerwa na buri wese.

    Davis D yakoresheje Lamborgini mu mashusho y'indirimbo Pose

    Mu kiganiro Davis D yagiranye na Inyarwanda dukesha iyi nkuru yavuze ko ko iyi ndirimbo ye nshya 'Pose' ariyo yakoreye abantu bishimanye, akomoza ku buryo yahuye n'umukobwa wo muri Espanye ugaragara mu mashusho, avuga ku gitaramo no ku muziki we aho yifuza ko ugera.

    Yagize ati ” Iyi ndirimbo ni amagambo ashimishije ajyanye n'ikirori bitewe n'umuntu muri kumwe mwishimanye, nari nkeneye umukobwa uzi kubyina usanzwe ubikora ari n'umubyinnyi ndetse azi n'uburyo abikora muri video mbona birahuye sinashakaga umukobwa mwiza ariko utazi kubyina. Nk'uko nabivuze umuziki wanjye ugomba kugera muri Africa harimo Album ya kabiri ndi gutegura hazagaragaramo n'abahanzi bo muri Africa “.

    Uyu muhanzi yavuze ukuntu yahuye n'uyu mukobwa anahishura ko nawe ubwe ari indirimbo yakunze ati ” Nanjye ni indirimbo nakunze iri mu ndirimbo zanshimishije cyane nakoze ubwo nasubiraga Dubai bwa kabiri duhuriyeyo mbona ajyanye n'indirimbo ngiye gukora ndamuganiriza dukora indirimbo “.

    Mu mashusho y'indirimbo Pose hagaragaramo umukobwa ukomoka muri Espanye


    POSE ni indirimbo isoza Album Afro igomba gukurikirana n'indi ndirimbo izajya kuri Album Davis D ari gutegura. Ni indirimbo yakozwe na Producer Element itunganywa na BOB Pro, Bagenzi Bernard akora amashusho yayo.

    Leave your vote

    Comments

    0 comments

    Source : https://yegob.rw/davis-d-yavuze-uko-yahuye-numukobwa-wuburanga-uri-mu-mashusho-yindirimbo-ye-nshya/

  • Abanyeshuri bishwe barashwe n ' ababashimuse muri leta ya Kaduna #rwanda #RwOT

    Abanyeshuri batatu, bari mu bashimuswe ku wa kabiri kuri kaminuza iri muri leta ya Kaduna mu majyaruguru ya Nigeria, babonetse bishwe barashwe, nkuko abategetsi babivuga. Imirambo yabo yabonetse ku wa gatanu mu cyaro cya Kwanan Bature, hafi y'iyo kaminuza. Ubu bajyanwe mu buruhukiro bw'imirambo (morgue).

    Umubare utaramenyekana w'abanyeshuri bashimutiwe kuri Kaminuza yigenga ya Greenfield iri mu karere ka Chikun ko muri iyo leta. Muri Nigeria, ubusanzwe ni gacye cyane abashimuse abanyeshuri babica.

    Bitandukanye n'izindi leta bihana imbibi, leta ya Kaduna ifite imikorere yo kutagirana ibiganiro n'abashimuse abantu cyangwa kuriha ingwate.

    Ahubwo Guverineri Nasir Ahmad el-Rufai w'iyo leta ashaka ko abashimuse abantu bafatwa bacibwa imanza.

    Bwana Nasir yavuze ko iyicwa ry'abo banyeshuri ari 'ubunyamaswa bwuzuye, kutagira ubumuntu no kubahuka ubuzima bw'abantu bikozwe n'abagome'.

    Mu itangazo yasohoye, yagize ati: 'Ibi bisambo byitwaje intwaro ni urugero rw'ububi bwa mbere bushoboka bw'inyokomuntu kandi bigomba kurwanywa uko byagenda kose kubera ubunyamaswa bigaragaza'.

    Kuva mu kwezi kwa cumi na kabiri mu 2020, abanyeshuri barenga 800 bamaze gushimutwa mu majyaruguru ashyira uburengerazuba bwa Nigeria. Ariko 29 bashimuswe mu kwezi kwa gatatu ku ishuri rikuru ryo muri leta ya Kaduna ntabwo bararekurwa.

    Ababyeyi babo bamaganye icyemezo cya Guverineri cyo kutagirana ibiganiro n'ababashimutiye abana, ndetse bagaragaje ko bafite ubushake bwo kuriha ingwate ngo abana babo barekurwe.

    Gushimuta abantu mu kivunge hagamijwe kwaka ingurane bikomeje kwiyongera muri Nigeria, mu gihe abategetsi barimo kugorwa n'ibikorwa-remezo bimeze nabi byo mu rwego rw'umutekano. Nyinshi muri leta zo mu majyaruguru ashyira uburengerazuba zafunze amashuri ngo zihe akanya abategetsi ko gushaka umuti w'iki kibazo nk' uko BBc gahuza dukesha iyi nkuru ibitangaza.

    Source : https://impanuro.rw/2021/04/24/abanyeshuri-bishwe-barashwe-n-ababashimuse-muri-leta-ya-kaduna/

  • Wari uziko umukunzi wawe wa kera (ex) mwatandukanye ushobora kwisanga yakugarukiye?menya impamvu zibitera. – YEGOB #rwanda #RwOT

    Bijya bibaho ko uwo mwahoze mukundana(ex) mukaza gushwana ashobora kukugarukira muburyo utari witeze.Ushobora kwibaza uti'ese byaterwa n'iki?'

    Muri iyi nkuru reka turebe impamvu zishobora kubitera.

    1.Kudafata umwanzuro (guhubuka)

    Kudafata umwanzuro bibaho ku bantu kuko hari igihe baba batazi neza icyo bashaka mu buzima bwabo, bigatuma bisanga basubiranye nuwo bahoze bakunda kandi we atakibishaka cg yarabonye undi.

    2.Ishyari riteye ubwoba

    Hari abantu bagira ishyari rikabije ku buryo badashobora kukubona uri kumwe n'undi muntu nubwo muba mwarashwanye bwose, bityo bakagaruka ndetse bakagerageza kukwigarurira ukaba utabava mu nzara. Aha itonde kuko si urukundo ahubwo ni icyavuye mu kukubonana n'undi muntu cyangwa umukunzi mushya. Nanone hariho igihe abo mwakundanaga bagaruka kugira ngo basenye ibyo umaze kugeraho, nk'igihe babonye wishimanye n'uwo mukundana, kuri bo iyo batishimye nawe ntibashaka ko wishima.

    3.Ubwigunge

    Bivugwa ko ubwigunge butuma abantu bagera aho batifuzaga, kuba abo mwakundanaga bashobora kugaruka bitewe nuko bari bonyine kandi bacyeneye uwo bagendana cg baganira .birumvikana ko utaba ugiye kuba uwo gutemberana ahubwo bakumva wagaruka nanone mubuzima bwabo mukongera gukundana.

    4.Gukunda imibonano mpuzabitsina cyane

    Abarenga kimwe cya kabiri cy'abantu bagaruka gukundana nabo bakundanaga, bakuruwe no kwikundira imibonano mpuzabitsina ku rwego rwo hejuru. Iyo bibutse uburyo abakunzi babo ukuntu bari beza mu gitanda cyangwa uburyo bahoraga babakemurira ibyifuzo byabo bijyanye no guhuza ibitsina igihe cyose babishatse, bityo bagahita bagaruka bihuta bizeye ko ibintu bizajya bigenda neza nk'uko byahoze, icyo mwamenya ni uko ikiba kibagaruye atari urukundo ahubwo ni ukuba imbata y'imibonano mpuzabitsina.

    5.Kurya umutungo wawe

    Muba mwarashwanye bakagusiga wenyine maze ukaba warabaye umuherwe wifashije kubijyanye n'amafaranga, hanyuma bitunguranye bakaza bitwaje urukundo ndetse bagashaka kugaruka mu buzima bwawe.Urukundo ntacyo rukora ku kugaruka kwabo ahubwo nukuza kunyunyuza ibyiza ugezeho ndetse ni ngufu wakoresheje ngo ubigereho.si abagabo bahura nicyo kibazo gusa kuko hari na bagore bahura nacyo.

    Leave your vote

    Comments

    0 comments

    Source : https://yegob.rw/wari-uziko-umukunzi-wawe-wa-kera-ex-mwatandukanye-ushobora-kwisanga-yakugarukiyemenya-impamvu-zibitera/

  • Ubumwe Grande Hotel na Mackenzie ibarizwamo M… – #rwanda #RwOT

    Ubumwe Grande Hotel bafatanyije na Mackenzie batekereje ku bakozi n'abandi bantu batandukanye babategurira 'Brunch' yari imaze umwaka itaba kubera icyorezo cya Covid-19. Kuri iyi nshuro ikaba igiye kuba hongewemo agashya ko kuba wanakwigurira imyambaro yakorewe muri ZOI Design ya Miss Rwanda 2020 Nishimwe Naomie.

    Teta Gwiza Ushinzwe Iyamamazabikorwa n’Itumanaho(‘Marketing & Communications) mu Ubumwe Grande Hotel yabwiye InyaRwanda.com ko iyi Brunch yari isanzwe iba ariko yari imaze igihe itaba kubera icyorezo cya Covid-19 ariko kuri iyi nshuro ni bwo bwa mbere igiye kuba harimo no kugura imyenda yakorewe imbere mu gihugu. 

    Yagize ati “Ntabwo ari igikorwa kimeze nka Concert, ni brunch isanzwe, ni uko twashatse korohereza abakiriya bacu noneho na Mackenzie bagashaka korohereza abakiriya babo ku buryo barya banagura imyenda ya Made in Rwanda kandi ku giciro cyiza.''

    Teta Gwiza ashinzwe Marketing na Communications mu Ubumnwe Grand Hotel

    Yakomeje avuga ko ari Brunch zari zisanzwe ziba ariko abantu bakaza bakarya bakiyakira ari bwo bwa mbere igiye kuba ifatanye no guhaha (shopping).  Ku bijyanye n'abahanzi, Teta yavuze ko nta muhanzi uzaririmba cyane ko atari igitaramo ahubwo ari Resitora isanzwe ariko akomoza ko resitora nk'ibisanzwe haba hari umuziki mucye ucurangwa muri resitora n'ubundi iyo abantu bari kurya no kunywa bisanzwe.

    Mu gushaka kumenya uko abagize Mackenzie biteguye twabasuye ku iduka ryabo rya ZOI Design dusanga imyiteguro ni yose buri umwe ahugiye mu gutegura imyenda izambarwa muri icyo gikorwa, gusa amahirwe ni uko bose twahabasanze uko ari batanu barimo Miss Rwanda 2020 Nishimwe Naomie, Uwineza Kelly, Uwase Katie, Iradukunda Brenda na Uwase Pamella.

    Uwineza Kelly umwe mu bagize Mackenzie waganiriye na INYARWANDA atangira abwira abantu ko bari kubategurira ibintu byinshi cyane kandi ko amatike abaze. Yagize ati “Icya mbere ni Brunch isanzwe yateguwe na Ubumwe icyo tuzakora ni nk'imurikagurisha (Exbishion) tuzaba twagabanyije ibiciro kandi hazaza New collection y’abahungu n’abakobwa”.

    “Muri rusange ni Zoi ariko dufatanyije n’Ubumwe kuko bashaka kuzana udusha. Nka Zoi tuzazana imyenda mishya, amakanzu n'amashati, ibizaba bihari ni byo gusa bizaba biboneka ntabwo bizaba ari byinshi. Imyenda nayo izaba ifite umubare runaka urumva kuyibona ni amahirwe kandi n’abazaba bayambaye azaba ari bo ba mbere.''

    Miss Rwanda 2020 Nishimwe Naomie mu mwambaro wa ZOI Design

    Ku bijyanuye n'uko abantu batandukanye bazinjira muri iyo Brunch, Uwineza Kelly yagize ati ''Amatike nayo arabaze bisaba kugura itike hakiri kare kugira ngo utazasanga yashize kubera icyorezo cya Covid-19 ntabwo hatumiwe abantu benshi ariyo mpamvu bisaba kugura ticket.''

    Iyi Brunch izaba ku itariki 01 Gicurasi 2021 izabera ku Ubumwe Grande Hotel mu nyubako ndende iri mu mujyi wa Kigali. Kuri ubu birasaba kugura itike yawe hakiri kare. Ni Brunch izaba hakurikijwe amabwiriza yo kwirinda icyorezo cya Covid-19 ari nayo mpamvu hari umubare ntarengwa wo kwinjira. 

    Uzagura itike n'ibyo kurya no kunywa bizaba biri muri iyo Tike azaba yaguze. Aho wasanga ayo matike ni kuri Hoteli Ubumwe ndetse no kuri ZOI Design.

    Uhereye (ibumoso) Iradukunda Brenda, (Hagati) Uwase Katie agakurikirwa na Miss Naomie

    Umunsi mpuzamahanga w'abakozi ufite inkomoko ku cyiswe 'Haymarket affair', iyi ikaba ari imyigaragambyo yabereye i Chicago mu 1886 aho abakozi baharaniraga ko amasaha y'akazi yagabanywa akava kuri 12 akagirwa umunani ku munsi. Umunsi mpuzamhanga w'abakozi wizihizwa byemewe n'amategeko tariki ya mbere Gicurasi buri mwaka mu bihugu birenga 80 harimo n'u Rwanda.

    Uwase Katie mu mwambaro wa ZOI Design

    David yambaye ishati yakorewe muri ZOI

    Source : https://inyarwanda.com/inkuru/105014/ubumwe-grande-hotel-na-mackenzie-ibarizwamo-miss-naomie-na-pamela-bateguye-brunch-izamurik-105014.html

  • MTN na INKOMOKO bagiye guha akayabo urubyiruk… – #rwanda #RwOT

    Uyu muhango wabereye ku cyicaro cya MTN Rwanda i Nyarutarama

    Kuri uyu wa Gatanu tariki 23 Mata 2021, ni bwo MTN Rwanda sosiyete ya mbere y'itumanaho mu Rwanda na INKOMOKO batangaje ku mugaragaro ko bagiye gutera inkunga urubyiruko rukora ubucuruzi hifashishijwe ikoranabuhanga. Uyu muhango wabereye ku cyicaro gikuru cya MTN Rwanda i Nyarutarama. 

    Ritah Umurungi usanzwe ari umukozi wa MTN Rwanda muri uyu muhango yahawe umwanya wo gusobanura icyatumye iyi sosiyete yihuza n'ikigo INKOMOKO maze atangira agira ati 'Impamvu y'ubu bufatanye ni uko dushaka gufasha urubyiruko mu bucuruzi bwabo twibanda ku babukora bifashishije ikoranabuhanga”. 

    Ritah Umurungi yasobanuye byinshi kuri iki gikorwa cyayo na INKOMOKO

    Umurungi yakomeje avuga ko muri ibi bihe by’icyorezo cya COVID-19 ibintu byose ahanini usanga bikorwa hifashishijwe ikoranabuhanga ari nayo mpamvu bahisemo gukorana na INKOMOKO mu rwego rwo gufasha urubyiruko rukora ubucuruzi rwifashishije ikoranabuhanga. 

    Sarah umuyobozi wa INKOMOKO igiye gufatanya na MTN Rwanda yavuze ko basanzwe bafite ubunararibonye mu bijyanye no gukora ubucuruzi bunoze hifashishgijwe ikoranabuhanga ndetse no kubihuguramo.

    Sarah Umuyobozi Mukuru wa INKOMOKO

    Yongeyeho ko ubufanye bwabo na MTN buzatanga umusaruro mwiza ashingiye kuri serivise zinoze iki kigo cy'itumanaho kinafite izina rikomeye gisanzwe gitanga zijyane n'ikoranabuhanga. Urubyiruko rwemerewe kwiyandikisha ni urufite ubucuruzi [Business] bukomeye ndetse n'ubworoheje ariko bukorwa hifashishijwe ikoranabuhanga mu buryo butandukanye bwaba ubwa ‘Online’, bwaba ubukorwa kuri Instagram n'ibindi. Hari program yakozwe na INKOMOKA izajya yifashishwa muri iki gikorwa cya MTN Rwanda na INKOMOKA.

    Urubyiruko rubyifuza rurashishikarizwa kwiyandikisha, icyakora na none hari iby’ingenzi bizagenderwaho birimo kuba ubucuruzi ukora bwanditse muri RDB nk’uko Jisere umukozi wa MTN nawe yabishimangiye. 

    Hanyuma ku bijyane n'abazashobora kwegukana akayabo ka miliyoni hazakorwa amajonjora mu bamaze kwiyandikisha havanwemo batandatu bafite ubucuruzi bigaragara ko bukorwa neza bahabwe amahugurwa y'amezi atanu biga ibijyanye no kunoza ubucuruzi bukorwa hifashishijwe ikoranabuhanga. Cyane cyane ku bijyane n’uko barushaho kwiteza imbere n'ibindi. Nyuma y’ibyo hazatoranwamo batatu ba mbere ari nabo bazahabwa akayabo ka miliyoni ndetse bagakomeza no gukurikiranwa na MTN Rwanda ndetse na INKOMOKA.

    Yaw Agyampong wa MTN yishimiye ubufatanye na Inkomoko

    Urubyiruko rwemerewe ni ukuva ku myaka 18 kugeza kuri 30, ikindi cy’ingenzi ni uko ugomba kuba ufite ubucuruzi watangiye gukora ntabwo ari kuba ufite igitekerezo cyangwa se imbanziriza mushinga. Aha Ritah Umurungi yavuze ko nta bucuruzi buhejwe ati 'Ashobora kuba ari business yo gucuruza imyenda, guteka iyo ariyo yose nk'iyo watanzeho urugero nk'umuziki ariko yaratangiye'.

    Ritah yavuze ko nta bucuruzi buhejwe anagaruka no ku bujyanye n’umuziki

    Kwiyandikisha byatangiye uyu munsi tariki 23 Mata 2021, wakwiyandikisha unyuze kuri website ya MTN Rwanda, cyangwa ugaca ku zindi mbunga zabo nka Facebook n'izindi zitandkanye kuko hose uhasanga ‘Link’ igufasha kugera kuri program yo kwiyandikisha. Cyo kimwe n'uko wasura urubuga rwa Inkomoko ariko ukibuka ko kwiyandikisha bizarangira tariki 7 Gicurasi 2021. Rubyiruko amahirwe ni ayanyu!

    Hele nawe akora muri Inkomoko yitabiriye uyu muhango

    Inkomoko bafite ubunararibonye mu gukora ubucuruzi bwifashisha ikoranabuhanga no kubihuguramo

    Progaramu Inkomoko yakoze izifashishwa muri iki gikorwa yitwa ‘Level Up Your Biz’

    Source : https://inyarwanda.com/inkuru/105030/mtn-rwanda-na-inkomoko-bagiye-guha-akayabo-urubyiruko-rukora-ubucuruzi-rwifashishije-ikora-105030.html

  • Maradona, Pele na Messi bayoboye urutonde rw… – #rwanda #RwOT

    Ibihe abakinnyi batandukanye babayeho nabyo bigira uruhare rukomeye mu gukomeza izo mpaka mu bakunzi ba ruhago, kuko usanga bamwe bavuga bati iyo bariya baba bari mu kibuga muri iki gihe ntabwo ibyo bakoze babikora, gusa ntibikuraho amateka n'ibigwi abakinnyi bari nyakwigendera Diego Maradona na Pele bakoze mu gihe bari mu kibuga.

    Benshi bakunda kujya impaka cyane hagati y'abakinnyi barimo Maradona na Pele, hibazwa umukinnyi w'ibihe byose muri ruhago, ndetse hakongera kwibazwa ninde uyoboye ruhago y'iki gihe hagati ya Cristiano Ronaldo na Lionel Messi.

    Ikinyamakuru 90Min.Com gikunda gukora inkuru zicukumbuye muri siporo, ariko hibandwa cyane kuri ruhago, cyasohoye urutonde rw'abakinnyi 50 b'ibihe byose mu mupira w'amaguru bayobowe na nyakwigendera Diego Armando Maradona ukomoka muri Argentina.

    Icyatunguye abakurikira umupira w'amaguru, ni uko Cristiano Ronaldo agaragara ku mwanya wa karindwi kuri uru rutonde Messi yashyizwe ku mwanya wa gatatu inyuma ya Maradona na Pele.

    Reka turebe bimwe mu bigwig bya bamwe mu bakinnyi bagaragara kuri uru rutonde.

    Diego Armando Maradona

    Uyu mugabo witabye Imana mu mpera za 2020, yafashije Argentine kwegukana igikombe cy'Isi, akaba ariwe washyizwe ku mwanya wa mbere mu bakinnyi babayeho b'abahanga kuva umupira w'amaguru watangira gukinwa.

    Maradona yari azwiho gutsinda ibitego byinshi byuzuye ubuhanga buhanitse kandi yanahesheje Argentine igikombe cy'isi iheruka. Maradona yakiniye amakipe menshi akomeye iburayi nka Barcelona, Napoli, Sevilla ndetse n’ay’iwabo nka Boca Juniors na Old boys ari nako atwaramo ibikombe bikomeye kuko nka Napoli yahatwariye shampiyona ebyiri na Champios league imwe. Kubera ubuhanga bwe budasanzwe uyu mugabo yagiye yegukana ibihembo byinshi birimo Ballon d'or, Guerin d'or n'ibindi.

    Pele

    Umunya-Brazil Edson Arantes do Nascimento wamenyekanye nka Pele mu ruhando rw'umupira w'amaguru, yarabiciye biracika mu gihe cye, ubuhanga butangaje bwo gutwara umupira ndetse no gutsinda ibitego byatumye bamwe bamwitirira Umwami wa ruhago.

    Igitangaje kuri Pele ni uko nta kipe yo ku mugabane w'i Burayi yigeze akinira kuko yakiniye Santos y’iwabo yafashije gutwara ibikombe makumyabiri na bitandatu mu marushanwa yose bakinnye. Kandi yakiniye na New York Cosmos yo muri Amerika. Yafashije ikipe y'igihugu ya Brazil gutwara ibikombe by'Isi bitatu harimo bibiri byikurikiranya icyo mu 1958 no mu 1962. Kubera ubuhanga mu guconga ruhago yari afite yegukanye ibihembo byinshi nko kuba we na Maradona baratowe na FIFA nk'abakinnyi b’ikinyejana cya 19, kandi afite agahigo ko kuba ari we mukinnyi umaze gutsinda ibitego byinshi 1281.

    Lionel Messi

    Uyu munya-Argentine ufatwa nk'uyoboye ruhago y'iki gihe, kugeza magingo aya yakiniye ikipe imwe gusa mu buzima bwe, ya FC Barcelona ayifasha gutwara ibikombe bitandukanye birimo Champions league enye, La liga icumi, FIFA club world cup eshatu, Copa del rey esheshatu n'ibindi.

    Kubera ubuhanga budasanzwe mu gucenga no gutsinda umunzenze w'ibitego ubudasiba byatumye yegukana amagana y'ibihembo nka Ballon d'or esheshatu, FIFA the best imwe kandi yatowe nk'umukinyi wa La liga inshuro icyenda.

    Johan Cruyff

    Uyu munyabigwi ukomoka mu Buholandi uzwiho kuba hari icenga ryamwitiriwe ndetse anazwiho kuba ari we wazanye uburyo bw'imikinire bwamamaye nka 'Total football'. Yakiniye amakipe nka Ajax yatwariyemo ibikombe bya shampiyona umunani na European cup, Champions league eshatu ndetse na Barcelona batwaranye La liga 4 na Champions league 1. Yafashije kandi ikipe y'igihugu ye kwegukana ibikombe binyuranye birimo igikombe cy'Isi mu 1974 na UEFA European championship mu 1976. Ku giti cye yatwaye Ballon d'or eshatu, yabaye umukinnyi mwiza w'umuholandi inshuro eshatu, igihembo cyatangwaga buri mwaka.

    Zinedine Zidane

    Uyumufaransa wakanyujijeho mu mupira w’amaguru, yakiniye amakipe atandukanye arimo Cannes, Bordeaux, Juventusna Real Madrid ubu abereye umutoza. Yatowe nk’umukinnyi mwiza ku mugabane w’uburayi naUEFA Golden Jubilee Pollmu myaka mirongo itanu ishize.

    Yakinnye umukino wa mbere mu ikipe y’igihugu tariki ya 17 Kanama 1994, mu mukino wa gicuti wahuzaga u Bufaransa na Czech Republicaho yinjiye mu kibuga asimbura agafasha ikipe ye kunganya ibitego 2-2 nyuma yo gutsinda ibitego bibiri wenyine. Mu makipe yose yanyuzemo yayafashije kwitwara neza yegukana ibikombe atibagiwe n'ikipe y'igihugu yafashije gutwara igikombe cy'Isi mu 1998. Ku giti cye yegukanye ibihembo byinshi birimo Ballon d'or ebyiri, Onze d'or eshatu na FIFA world player w'umwaka inshuro eshatu.

    Cristiano Ronaldo

    Uyu rutahizamu w'umunya Portugal ufatwa nka nimero ya mbere mu bakinnyi bakiri mu kibuga magingo aya, yakiniye amakipe atandukanye arimo Sporting Lisbone, Manchester United, Real Madrid na Juventus akinira kuri ubu.

    Uwavuga ibigwi bya Cristiano byafata igihe kirekire, ariko icy'ingenzi ni igikombe cya Euro 2016 yafashije Portugal kwegukana ndetse na UEFA Nations League mu 2018-19.

    Ronaldo yafashije amakipe yakiniye kwegukana ibikombe bitandukanye birimo Champions League eshanu, Ibikombe by'Isi by'amakipe bine, ibikombe bya shampiyona birindwi ndetse n'ibindi.

    Ku giti cye nk'umukinnyi Ronaldo yegukanye igihmbo cy'umukinnyi w'indashyikirwa w'ikinyejana ndetse akaba amaze kwegukana umupira wa zahabu 'Ballon d'Or' inshuro eshanu.

    Alfredo di Stéfano

    Uyumunya Argentine uzwiho kuba yarakoze ikintu gitangaje cyo gukinira amakipe y'ibihugu bitatu mu gihe abandi bakinira kimwe (Argentina, Colombia, Spain). Yakiniye amakipe menshi ariko iyo yakoreyemo ibitangaza ni Real de Madrid aho yatwaranye nayo La liga umunani na Champions league eshanu. Ku giti cye nk'umukinnyi yatwaye Ballon d'or ebyiri n'ibindi bitandukanye.

    Ronaldinho

    Umunya Brazil Ronaldo de Assis Moreira wamenyekanye nka Ronaldinho ni umwe mu bakinnyi babayeho batanze ibyishimo kuri benshi, ndetse agira nicyo afasha abakinnyi bakiri bato barimo bazamura urwego kuko yabasigiye amacenga menshi kugeza magingo aya bakigana.

    Ronaldinho yakiniye amakipe menshi akomeye arimo Paris Saint Germain, Milan AC, FC Barcelona hamwe n’andi y'iwabo nka Flamengo, akaba yaranakiniye ikipe y'igihugu ya Brazil. Yatwaye ibikombe bitandunye birimo La liga 3' super cup 2 na Champions league1 ari kumwe na Barcelona kandi yanatwaye Serie A ari kumwe na AC Milan ndetse hamwe na Brazil batwaye igikombe cy’Isi mu 2002 na Copa America mu 1999. Ku giti cye yatwaye Ballon d'or ebyiri n'ibindi bihembo byinshi bitandukanye.

    Urutonde rw'abakinnyi 50 b'ibihe byose mu mateka y'umupira w'amaguru ku Isi:

    50. Luka Modric

    49. John Charles

    48. Robert Lewandowski

    47. Jairzinho

    46. Omar Sivori

    45. Paulo Rossi

    44. Paul Breitner

    43. George Weah

    42. Kaka

    41. Lev Yashin

    40. Gunnar Nordahl

    39. Sandor Kocsis

    38. Kevin Keegan

    37. Hristo Stoichcov

    36. Gianluigi Buffon

    35. Johan Neeksens

    34. Xavi

    33. Luis Suarez [midfielder born in 1935]

    32. Karl-Heinz Rummenigge

    31. Andres Iniesta

    30. Rivelino

    29. Bobby Moore

    28. Socrates

    27. Lothar Mattheus

    26. Ronaldinho

    25. Ruud Gullit

    24. Bobby Charlton

    23. Guiseppe Meazza

    22. Raymond Kopa

    21. Romario

    20. Eusebio

    19. Marco van Basten

    18. George Best

    17. Zico

    16. Franco Baresi

    15. Ferenc Puskas

    14. Paolo Maldini

    13. Gerd Muller

    12. Mane Garrincha

    11. Alfred

    10. Roberto Baggio

    9. Michel Platini

    8. Zinedine Zidane

    7. Cristiano Ronaldo

    6. Ronaldo Nazario

    5. Johan Cruyff

    4. Franz Beckenbauer

    3. Lionel Messi

    2. Pele

    1. Diego Maradona

    Source : https://inyarwanda.com/inkuru/105029/maradona-pele-na-messi-bayoboye-urutonde-rwabakinnyi-50-bibihe-byose-mu-mupira-wamguru-ku–105029.html

  • Sobanukirwa impamvu itangaje ituma abagabo bose bahita bagwa agacuho bagasinzira iyo bamaze gutera akabariro. – YEGOB #rwanda #RwOT

    Ubushakashatsi bwerekana ko iyo abagabo bamaze gutera akabariro, bahita bagwa agacuho bagasinzira cyane mu gihe abagore bo baba bashaka kuganira n'uwo baryamanye cyangwa gukomeza iyo mibonano,ibintu bafata nko kubasuzugura.

    Ikipe y'abashakashatsi b'Abafaransa iyobowe na Dr Serge Stoléru yagaragaje ko nyuma y'imibonano mpuzabitsina, ubwonko bw'abagabo buhita buhindura gahunda bugakenera kuruhuka vuba bityo bigatuma umubiri w'umugabo wose uhita ukenera kuruhuka.

    Couple In Bed With Relationship Difficulties

    Ibi bikaba biterwa n'uko iyo umugabo agiye kuranginza(gusohora), umubiri ukoresha imbara zidasanzwe,aha ninaho umugabo yumva uburyohe buhebuje bita 'Orgasm'mu rurimi rw'icyongereza.

    Ibi aba bashakashatsi babigezeho nyuma yo gusuzuma ubwonko bw'abantu batandukanye mbere na nyuma yo gukora imibonano mpuzabitsina bagasanga mu miterere y'umugabo, ibice bigize ubwonko ndetse n'ibibufasha gukora neza bihita bikenera kuruhuka iyo umugabo arangije(gusohora).

    Dr Stoléru avuga ko ubu bushakashatsi ari inzira yo kugaragariza abagore ko ugucika intege kw'abagabo ari ibya bose nyuma y'imibonano mpuzabitsina, kandi abibwiraga ko ari agasuzuguro cyangwa kudakundwa nuwo bakorana imibonano mpuzabitsina ntaho bihuriye.

     

    Niba ushaka umukunzi kanda kuri iyi link ukurikize ibisabwa :http://yegob.rw/dating

    Leave your vote

    Comments

    0 comments

    Source : https://yegob.rw/sobanukirwa-impamvu-itangaje-ituma-abagabo-bose-bahita-bagwa-agacuho-bagasinzira-iyo-bamaze-gutera-akabariro/

  • Ntibisanzwe:Indaya zarwanye inkundura zipfa umugabo, abantu bashungereye bafata amafoto. – YEGOB #rwanda #RwOT

    Amafoto y'abakobwa b'indaya yakwirakwijwe Ku mbuga nkoranyambaga,yerekana imirwano idasanwze hagati y'aba bakobwa b'ibizungerezi barwanye bakambikana ubusa, igitangaje hari huzuye abantu bafata amashusho aza gukwirakwizwa ku mbuga nkoranyambaga.

    Ikinyamakuru Atinkanews, kivuga ko aba bakobwa b'ibizungerezi baba barwanye bapfa umugabo, ingumi n'inshyi n'imigeri ni zo zavuzaga ubuhuha, amakuru y'ibinyamakuru bitandukanye ntabwo yereka aho iyi mirwano yabereye gusa bivuga ko hari muri Parikingi (Parking) y'imodoka.

    Batangiye imirwano ari abakobwa 2, nyuma gato hazamo uwa gatatu imirwano irarimbanya abantu nabo batangira gufotora bibashimishije.

    Leave your vote

    Comments

    0 comments

    Source : https://yegob.rw/ntibisanzweindaya-zarwanye-inkundura-zipfa-umugabo-abantu-bashungereye-bafata-amafoto/

  • Nyarugenge: Urikiko rwategetse ko Col Tom Byabagamba azaburanishwa nk'umusiviri #rwanda #RwOT


    Ku gicamunsi cyo kuri uyu wa kane ku rukiko rwisumbuye rya Nyarugenge umucamanza yategetse ko Col Tom Byabagamba azaburanishwa nk'umusivili n'urwo rukiko mu mizi kuko rubifitiye ububasha.

    Iki cyemezo cyafashwe nyuma y'aho Col Tom Byabagamba n'abamwunganira mu mategeko basabye ko ataburanishwa n'urukiko rwisumbuye rwa Nyarugenge ko kandi atashinjwa n'ubushinjacyaha bwo ku rwego rwisumbuye bwa Nyarugenge kuko izo nzego ari inzego za gisiviri kandi akaba yaravugaga ko ari umusilikali.

    Tom Byabagamba yahoze ari Col. Mugisirikare cy'u Rwanda RDF akaza kwamburwa impeta zose za gisirikare akanakatirwa imyaka 15 y'igifungo n'urukiko rukuru kubera ibyaha yahamijwe n'urukiko birimo gushaka kugirira nabi Umukuru w'Igihugu no gusuzugura ibendera ubwo yari mu butumwa bw'akazi muri Sudan yepfo.

    Muri Mata 2020 yongeye kuregwa ikindi cyaha cy'ubujura bwa Telephone yakoze ubwo yari akiburanira mu rukiko rukuru, icyaha yaburanye ahakana mu rukiko rw'ibanze rwa Kicukiro ariko rukakimuhamya ndetse rukamukatira imyaka itatu y'igifungo.

    Col Tom Byabagamba ndetse na Me Gakunzi Gasore Varelie umwunganira bahise bajuririra mu rukiko rwisumbuye rwa Nyarugenge, aho yageze akavuga ko yaba ari ubushinjacyaha ndetse n'urukiko ubwarwo badafite ubushobozi bwo kumuburanisha kuko ari abasivili we akaba umusilikali.

    Muri uru rubanza kandi, Col Tom Byabagamba yabwiye umucamanza ko kuva yafatwa muri 2014 yafunzwe mu buryo bunyuranyije n'amategeko kuko ngo yafungiwe mu kigo cya gisirikare aho gufungirwa muri gereza yemewe n'amategeko.

    Ubwo kuri uyu wa kane inteko y'umucamanza umwe n'umwanditsi w'urukiko yasomaga icyemezo cy'urukiko, Umucamanza yavuze ko inzitizi zatanzwe na Col Tom Byabagamba ziburabubasha bw'urukiko nta shingiro zifite.

    Umucamanza akaba yategetse ko urubanza rwa Col Tom Byabagamba ruzakomeza kuburanishwa mu mizi kuwa 28 Mata 2021 Saa tatu za mu gitondo ku rukiko rwisumbuye rwa Nyarugenge.

    Col Tom Byabagamba yahoze akuriye umutwe urinda umukuru w'igihugu Paul Kagame akaba amaze imyaka irindwi afungiye muri gereza ya gisirikare I Kanombe kuko yatawe muri yombi bwa mbere muri Kanama 2014

    Jean Paul NKUNDINEZA
    UMURYANGO.RW

    Source : http://umuryango.rw/amakuru/mu-rwanda/ubutabera/article/nyarugenge-urikiko-rwategetse-ko-col-tom-byabagamba-azaburanishwa-nk-umusiviri