Blog

Ireney Mercy hamwe n’umugore we Julie ku munsi w’ubukwe bwabo

Safari Irene Merci (Ireney Mercy) wakunzwe mu ndirimbo ‘Uri imbabazi zanjye’, mu rugendo rwe rw’umuziki yakoze indirimbo zinyuranye yaba ize ku giti cye, izo yakoranye n’abandi bahanzi barimo The Ben, Gaby Kamanzi, n’abandi n’izo yahurijemo abahanzi benshi aho twavugamo ‘Dufatanye’ yahurijemo Aime Uwimana, Queen Gaga, Tonzi, Liliane Kabaganza, Barnabas, Jules Sentore, Asiimwe Dorcus, Aline Gahongayire, Alpha Rwirangira, MK, Steven BoB, Brian Blessed, Fanny, Pastor P,  Patrick Nyamitari, Gaby Irene Kamanzi, Producer Nicolas, Alex Dusabe, Producer Mugisha, Theo Bosebabireba, Nelson Mucyo, Fils Jean Luck, Shukuru na Bahati Grace.

Ireney Mercy ari mu bahanzi baririmbye mu gitaramo gikomeye kandi cyari gihenze cya Julius Kalimba wamamaye mu ndirimbo ‘Ntabeshya’ cyabaye mu 2008 akagitumiramo Judith Babirye wo muri Uganda wari ukunzwe bikomeye muri icyo gihe na nyuma yaho. Abandi bahanzi baririmbye muri icyo gitaramo cy’amateka harimo; Theo Bosebabireba, Nelson Mucyo wari ukunzwe mu ndirimbo ‘Ndaje mu bwiza bwawe’, Emile Nzeyimana wari ukunzwe mu ndirimbo ‘Mbayeho’, Diana Kamugisha wari ukunzwe mu ndirimbo ‘Haguruka’, n’abandi. Kwinjira byari 1000Frw ku banyeshuri, 2000Frw mu myanya isanzwe na 5,000 Frw muri VIP. 

Si aho gusa yatumiwe nk’umuhanzi ukunzwe, kuko Ireney Mercy yatumirwaga mu bitaramo n’ibiterane bikomeye kuko yari mu bahanzi ba Gospel batekerezwagaho bwa mbere n’umuntu wese wateguye igitaramo cyangwa igiterane, urugero ni igiterane gikomeye cyateguwe na Ev. Sandrali Sebakara abinyujije muri RNDP kibera i Gikondo kuri Expo Ground tariki 12-14 Ukuboza 2009 – Irene Mercy akaba ari mu bahanzi b’imena bagitumiwemo hamwe na bagenzi be barimo Aline Gahongayire, Gaby Kamanzi, Phanny Wibabara, Naboth, The Blessed Sisters n’abandi.

Ireney Mercy mu bahanzi biyambajwe na Kalimba Julius mu gitaramo yatumiyemo Judith Babirye

Nyuma yaje kuburirwa irengero mu muziki kugeza n’uyu munsi dore ko atagisohora indirimbo ndetse nta n’ibitaramo agitegura. Mu myaka 5 ishize abajijwe n’umunyamakuru wa InyaRwanda.com ibyo yari ahugiyemo, Ireney Mercy yavuze ko yafashe igihe cyo kuganira n’Imana ari nabwo yatangaje ko yamaze iminsi 7 ari mu butayu atarya ndetse nta kintu anywa. Ni mu nkuru twahaye umutwe ugira uti; Umuhanzi Ireney Mercy ahamya ko yamaze iminsi 7 atunzwe n'amasengesho gusa atagira icyo arya cyangwa anywa. Izina rye ntiryongeye kumvikana mu muziki, gusa nyuma yaho yagarutse mu isura nshya nk’umuvugabutumwa (Evangelist).

Na n’uyu munsi iyo muganira akubwira ko umwanya we munini w’ubuzima bwe ari ivugabutumwa nk’umwanzuro yafashe muri ya minsi 7 yamaze yihereranye n’Imana mu masengesho. Kuri ubu buri munsi akaba agira icyigisho/inyigisho asangiza abamukurikira ku mbuga nkoranyambaga akoresha. Uyu mugabo turi kuvuga, kuri ubu ari mu byishimo byo kurushinga n’umukobwa yakunze kurusha abandi, uwo akaba ari Julie Igiraneza basezeranye kubana akaramata mu muhango wabaye tariki 12 Kamena 2021 ukabera muri CLA Nyarutarama mu mujyi wa Kigali. Tariki 04 Mata 2021 ni bwo basezeranye imbere y’amategeko mu muhango wabereye i Kigali.

Ireney Mercy na Julie bari bagaragiwe n’ibyamamare

Ev. Ireney Mercy watubwiye ko yasigiye inkoni (igifunguzo) Cyusa Ibrahim, yambikanye impeta y’urudashira n’umukunzi we Julie Igiraneza mu muhango wabaye nyuma y’amasaha macye bakoze uwo gusaba no gukwa (Ni imihango yabereye umunsi umwe kuwa 12 Kamena) wabereye i Kanombe saa Tatu za mu gitondo, hanyuma Saa Saba berekeza i Nyarutarama kuri Christian Life Assembly (CLA) bahamya isezerano ryabo ryo kubana ubuzima bwabo bwose. Mu bukwe bwabo, bambariwe n’ibyamamare mu myidagaduro yo mu Rwanda.

Abasore bari bagaragiye Ireney Mercy ni; Umuramyi Patient Bizimana, umuhanzi Cyusa Ibrahim wiyeguriye injyana Gakondo, Willy Ndahiro ufite izina rikomeye muri sinema nyarwanda ndetse n’umuhanzi Gakumba Patrick waryubatse nka Super Manager. Mu bakobwa bambariye Irene mu gusaba no gukwa harimo Umuratwa Anitha wabaye Miss Supranational Rwanda 2021. Ubukwe bwa Irene na Julie bwari ibirori bikomeye dore ko habayeho umwanya utari muto wo kubyina. Mu ndirimbo zakoreshejwe cyane harimo ‘Jerusalema’ ya Master KG Ft Nomcebo, ‘Merci’ ya Alpha Rwirangira n’izindi.

Ireney Mercy na Julie ku munsi w’amateka y’urukundo rwabo

Mu kiganiro na InyaRwanda.com, Ireney Mercy yadutangarije ko Julie Igiraneza bambikanye impeta, yamukundiye ibintu byinshi birimo no kuba ari umukristo. Ati “Ibyo namukundiye, ni umukristo akaba n’umuririmbyi muri korali yo mu rusengero rwa CLA. Afite umutima mwiza kandi arankunda. Yuzuye muri we imico y’umuntu wubaha Imana. Ni umunyabwenge cyane akaba akunda no gukorana umurava. Nk’umuhanzi wa Gospel, nawe urabyumva sinahuza n’umuntu udakijijwe”.

Yavuze ko umugore we Julie Igiraneza yaminuje muri Kaminuza iri muri 5 zikomeye muri Koreya y’Epfo ndetse akaba ari Kaminuza yizeho na Perezida w’icyo gihugu Moon Jae-in. Ati “Madame yize mu ishuri Perezida wa Koreya yizemo. Yize muri Kyung hee university iherereye mu mujyi wa Seoul, yiga ibijyanye na MICE (Meetings, Incentives, Conferences & Exhibitions) mu ishami ry’ubukerarugendo no kwakira neza abakiriya (Tourism and Hospitality Management)”. Kaminuza ya Kyung hee iri muri kaminuza eshanu (5) zubashywe cyane muri Koreya y’Epfo.

IGIRANEZA Julie yize muri Kaminuza ikomeye muri Koreya y’Epfo

Ireney avuga ko yakunze Julie kubera ko ari umukobwa ukijijwe kandi uzi ubwenge

Ireney Mercy na Julie bahaye agaciro ingamba zo kwirinda Covid-19 mu bukwe bwabo

Ubukwe bwa Ireney Mercy na Julie bwari bubereye ijisho

Julie IGIRANEZA umugore wa Ireney Mercy SAFARI, yaminuje muri Koreya y’Epfo mu bijyanye n’Ubukerarugendo no kwakira neza abakiriya

Kuri iki cyumweru tariki 13 Kamena 2021 ubwo hakomezaga imikino y’umunsi wa Kane wa shampiyona haba mu makipe arwana no kutamanuka, ndetse n’amakipe ashaka igikombe cya Shampiyona, APR FC yongeye guseruka gitore ubwo yanyagiraga Police FC ibitego 3-0 byose byabonetse mu gice cya 2.

Igitego cya mbere cyabonetse ku munota wa 65 gitsinzwe na myugariro Omborenga Fitina mu gihe Mugunga Yves utari warakinnye umukino uheruka, yatsinze ibitego bigera kuri 2 kumunota wa 75 no ku munota wa 83 ikipe y’igipolisi cy’u Rwanda itaha idakozemo.

Ku rundi ruhande Niko As Kigali yatsindaga irusha ikipe ya Espoir FC ibitego 4-0. Ni umukino wabereye i Muhanga aho As Kigali iri kwakirira imikino muri iyi minsi.

Igitego cya mbere cyabonetse ku munota 10 gitsinzwe na Tshabalala Hussain, Muhadjiri atsinda ibitego 2 ku munota wa 27 na 83 mu gihe igitego cy’agashingura cumu cyabonetse mu minota y’inyongera gitsinzwe na Biramahire Abeddy ku munota wa 90+2

Indi mikino y’amakipe ashaka igikombe cya Shampiyona, Rutsiro yanganyije na Bugesera FC 0-0, Rayon Sports umukino wabaye mbere yanganyije na Marine igitego kimwe kuri kimwe.

Amakipe arwana no kutamanuka, Mukura yatsindiwe i Musanze igitego kimwe ku busa, Kiyovu Sport itsinda Gorilla FC igitego kimwe kubusa cya Saba Robert. Mu gihe ejo hazakina Sunrise FC izakira As Muhanga, Gasogi United yakire Etincelles.

Ubu As Kigali niyo ya mbere n’amanota 10 ikarusha igitego kimwe APR FC, Rayon Sports ikaba iya 3 n’amanota 5. Mu makipe arwana no kutamanuka, Kiyovu Sport Ni iya mbere n’amanota 9 inganya na Musanze, Gorilla FC ikagira amanota 7.

Aubrey Graham wamamaye ku izina rya Drake ni umuraperi ukomoka mu gihugu cya Canada gusa akaba akorera umuziki muri Leta Zunze Ubumwe za Amerika. Uyu mugabo akaba yaramenyekanye cyane kuva muri 2008 yinjira muri Young Money kugeza ubu ahagaze neza yaba mu mufuka no mu buhanzi.

Drake akunze kumvikana mu ndirimbo ze zitandukanye avuga ko akunda cyane uburiri bwe. Ubu buriri akunze kuvuga cyane buranihariye cyane dore ko matera araraho ikoze mu bwoya bw’ifarashi. Iyi matera kandi iranahenze kuko yatwaye Drake akayabo k’ibihumbi 400 by’amadolari kugirango ayigure, uyashyize mu manyarwanda aragera kuri Miliyoni 400 Frw.

Mu mafoto akurikira ihere ijisho matera ya Drake ikoze mu bwoya bw’ifarashi igura ibihumbi 400 by’amadolari:

Src:www.RapUp.com

Private Bakuru Muhuba yafatiwe ku butaka bw'u Rwanda ku wa Gatandatu, yashyikirijwe igihugu cye ahagana saa Moya z'ijoro ryo kuri iki Cyumweru, tariki ya 13 Kamena 2021.

Igikorwa cyo guhererekanya uyu musirikare cyabereye ku Mupaka wa Cyanika mu Karere ka Burera aho u Rwanda na Uganda bihanira imbibi. Hari nyuma yo kugenzura neza ko ibyo Private Bakuru yafatanywe bisubijwe byose.

Uyu musirikare yafashwe yarenze imbibi z'igihugu cye kuko yafatiwe mu Mudugudu wa Majyambere mu Kagari ka Kamanyana, mu Murenge wa Cyanika ho mu Karere ka Burera.

Yafashwe yambaye imyenda y'Igisirikare cya Uganda, afite imbunda yo mu bwoko bwa Medium Machine Gun (MMG), amasasu 100, indebakure imwe, telefoni imwe n'ibyangombwa bya gisirikare.

Nyuma yo gusubizwa igisirikare cya Uganda, Private Bakuru Muhuba yavuze ko yatunguwe n'uburyo yakiriwe neza mu Rwanda kugeza ubwo asubijwe iwabo.

Yagize ati 'Nari mu kazi kacu ka gisirikare ni bwo narenze iwacu nisanga ku butaka bw'u Rwanda, umusirikare waho arampamagara anyereka ko narenze iwacu, baramfashe banyakiye neza ubu nta kibazo na kimwe mfite. Baranganirije, nishimiye uburyo mu Rwanda nakiriwe ku buryo ntabitekereza, mbese nta kibazo navuga ubu mfite kandi nishimiye kongera gusubira mu gihugu cyanjye.''

Uyu musirikare wa Uganda watanzwe n'igisirikare cy'u Rwanda, RDF binyujijwe mu Biro bishinzwe Abinjira n'Abasohoka mu Rwanda ku Mupaka wa Cyanika. Impande zombi zashyize umukono ku nyandiko yerekana ko iryo hererekanya ryabayeho.

Intumwa ya Perezida wa Uganda mu Karere ka Kisoro wari ukuriye itsinda rya Uganda ryakiriye uwo musirikare, Captain Mugisha Peter, yashimye u Rwanda uko rwitwaye muri iki kibazo no kuba uwafashwe ubwe yivugira ko yakiriwe neza.

Yagize ati 'Ubusanzwe nta kintu kiba kigaragaza neza imbibi z'igihugu aho zirangiriye ku buryo biba bishoboka ko umuntu yaharenga akisanga ahandi byoroshye. Turashimira u Rwanda uko kuva ejo batwakiriye dutangiye gukorana kuri iki kibazo; ubushake bwo kugikemura mwagaragaje n'uko umusirikare wacu abyivugira ko yafashwe neza kandi nta kibazo birerekana inzira nziza n'ubushake u Rwanda rushyira mu mibanire yacu.''

Mu itangazo RDF yashyize hanze kuri uyu wa 13 Kamena 2021, yemeje ko hari umusirikare wa Uganda wafashwe yarenze imbibi z'igihugu cye.

Private Bakuru Muhuba ubusanzwe abarizwa muri Batayo ya 32 ikorera mu gace ka Nyakabande muri Uganda. Ibikoresho byose yafatanywe yabisubijwe ndetse mbere yo gushyikirizwa abamwakiriye yabanje kubigenzura neza ko byuzuye.

Private Bakuru Muhuba yafatiwe ku butaka bw'u Rwanda ku wa Gatandatu nyuma yo kurenga imbibi z’imipaka y’ibihugu byombi

Private Bakuru Muhuba yerekanaga ibyo yafatanywe birimo imbunda n’amasasu 100

Ingabo z’u Rwanda, RDF, yashyikirije Uganda umusirikare wayo wafatiwe ku butaka bw'urwa Gasabo

Private Bakuru Muhuba yabanje kugenzura neza imbunda yafatanywe mbere yo gushyikirizwa ingabo z’igihugu cye

U Rwanda na Uganda byasinye ku nyandiko yerekana ko habayeho guhererekanya umusirikare wa Uganda wafatiwe mu Karere ka Burera

Umusirikare wa Uganda wafatiwe mu Rwanda yashimye uko yakiriwe

Abantu bashatse amayeri menshi yo gukora utubari, aho hari abagiye bafata restaurant bakazishyiramo utubari rwihishwa cyangwa ugasanga abandi bahinduye urugo rw'umuturage akabari.

Umuvugizi wa Polisi y'Igihugu, CP John Bosco Kabera, mu kiganiro cyanyuze kuri Televiziyo y'u Rwanda kuri iki Cyumweru, yavuze ko hadutse abantu bafata imodoka zabo bakazihindura utubari.

Yagize ati 'Byaragaragaye ko hari abantu bafatanya rimwe na rimwe n'abacuruzi b'inzoga, babona isaha zo gufunga zegereje, bakagura ibinyobwa bakajya kunywera no gukorera ibirori mu modoka no mu ngo.'

Yakomeje avuga ko abakora ibyo bakwiriye kubihagarika. Ati 'Ni ukuvuga ko imodoka iba ihindutse akabari. Utubari n'ibirori byo mu modoka cyangwa mu ngo birabujijwe, abazajya babifatirwamo bazajya babihanirwa.'

Minisitiri w'Ubutegetsi bw'Igihugu, Gatabazi Jean Marie Vianney, we yavuze ko hagiye gushyirwaho ingamba zikakaye zo guhangana n'abashyira utubari aho babonye.

Yagize ati 'Ubu hagiye gushyirwamo imbaraga zikomeye mu gukurikirana iby'utubari tubera mu ngo, turakora ibishoboka byose kugira ngo iki cyemezo cyubahirizwe dufatanyije na polisi n'inzego z'ibanze.'

Kunywa umuntu atwaye cyangwa azi ko ari butware imodoka ni bimwe mu byo Polisi ikunze gusaba abantu kwirinda, kuko biteza impanuka.

Mu mezi atandatu ashize Polisi y'u Rwanda yabaruye impanuka ziterwa n'abantu banyoye ibisindisha zigera 223, zikaba zaraguyemo abasaga 69 naho abarenga 400 bazikomerekeyemo. Hafashwe kandi abantu bagera ku 1200 batwara ibinyabiziga banyoye ibisindisha.

CP Kabera yavuze ko Polisi itazihanganira abahindura imodoka zabo cyangwa ingo utubari