Blog

Hashize iminsi hirya no hino mu gihugu humvikana abanyeshuri bagaragaza imico idasanzwe ku buryo abantu batandukanye, batangiye kwibaza ku burezi buhabwa abana bari mu mashuri.

Hari ingero z’abanyeshuri biga mu mashuri yisumbuye bagaragayeho imyitwarire idahwitse irimo nko gukubita abarezi babo ndetse n’indi mico idakwiye kuranga umunyeshuri mwiza.

Urugero ni mu Karere ka Rutsiro aho ku wa 15 Kamena 2021, umunyeshuri yahiritse umwarimu wari utwite, bikamuviramo kujyanwa kwa muganga. Hari kandi abana biga mu Rwunge rw’Amashuri rwa Kabusunzu bagaragayeho imico y’ubusinzi, kunywa itabi n’indi migirire y’isoni nke irimo gusomana imbere ya mwarimu.

Mu minsi yashize kandi ku mbuga nkoranyambaga hagaragaye amashusho y’abanyeshuri biga mu Karere ka Ruhango aho bari bari kubyina nk’abari gusambana, bakaba bari bari kwishimira ko umuyobozi wabo yirukanywe.

Izi ngero n’izindi zigaragara mu mashuri ni zo zituma abantu bibaza niba mu mirerere y’abanyeshuri hatarimo ikibazo.

Mu kiganiro na Radio Rwanda, Minisitiri w’Uburezi, Dr Uwamariya Valentine, yavuze ko muri rusange imyitwarire y’urubyiruko yahindutse.

Yagize ati “Iyo ugiye kureba urubyiruko imyitwarire muri rusange harimo icyahindutse […] Hari ukuntu urubyiruko rwibeshya ngo twakuze, cyane abarangiza amashuri yisumbuye basa n’aho bigaragaza nk’abavuye mu cyiciro kimwe bagiye mu kindi ariko bakabyitwaramo nabi.”

Yakomeje avuga ko kuba uru rubyiruko rufite imyitwarire idasanzwe usanga harabayeho kudohoka haba ku ruhande rw’ababyeyi ndetse n’abarezi.

Ati “Iriya myaka iba igoye ku buryo aba yumva yakora icyo ashaka cyose ariko hakaba no kudohoka muri rusange mu bijyanye n’imyitwarire. Ibi ndabisubiramo kugira ngo inzego zose zumve ko dukwiye gufatanya. Buriya umwana unanirana ku ishuri no mu rugo ntabwo aba ari umwana ufite gahunda. Biba byaratangiye gupfa mbere.”

Yakomeje agira ati “Mu muryango niho umwana atorezwa kubaha. Kera twatinyaga mwarimu n’aho atambutse ukaba wumva ko ugomba kumuha icyubahiro akwiye ariko iyo umwana yubahuka mwarimu nk’aho twabonye babakomeretsa, ibyo biza mu burere. Si ukwikuraho inshingano nka Minisiteri ariko iyo ababyeyi bafatanyije n’ishuri babasha gukemura icyo kibazo kuko si bwo uwo munyeshuri aba yitwaye gutyo.”

Minisitiri Uwamariya yasabye ababyeyi n’amashuri gukorana bakamenya uko imyitwarire y’abana ihagaze.

Ati “Hari amashuri atubwira ngo duhana umwana umubyeyi akaza kutumerera nabi, ni byiza ko ababyeyi n’amashuri bakorana umunsi ku munsi bakamenya ngo umwana yitwara ate, abayeho ate?”

“Kera tukiri mu mashuri wajyaga kubona ukabona umubyeyi aje kureba uko umwana yitwara cyangwa umurezi agatumaho umubyeyi ngo ngwino tuganire ku kibazo cy’umwana. Ababyeyi, abarimu n’abayobozi b’amashuri bongere gukorana umunsi ku munsi kugira ngo barere umwana ufite ubumenyi n’uburere.”

Kugeza ubu 60 % by’Abanyarwanda ni urubyiruko benshi bari mu mashuri, ibi bikaba bitanga umukoro ku babyeyi n’abarezi wo kubaha uburere bwiza kuko aribo bazagira uhurare mu kubaka u Rwanda rw’ejo.

Inkuru bijyanye:

Imvano y’amashusho y’abanyeshuri bo mu Ruhango bagaragaye babyina nk’abari gukora imibonano mpuzabitsina

Rutsiro: Umwarimu utwite yahiritswe n’umunyeshuri we ahura n’ikibazo

Kunywa itabi, inzoga no gusomanira imbere ya mwarimu biravuza ubuhuha ku biga ku Kabusunzu

Dr Uwamariya Valentine yavuze ko imyitwarire mibi y’abanyeshuri iterwa n’idohoka ry’ababyeyi n’abarezi

Kuri iki Cyumweru, tariki ya 18 Nyakanga 2021, ku Cyicaro cya Polisi y’u Rwanda i Remera, ni bwo Niyonsaba Marcel utuye mu Murenge wa Gikondo, Akarere ka Kicukiro na Mbarushimana Emmanuel, utuye mu Murenge wa Gisozi, Akarere ka Gasabo, beretswe itangazamakuru.

Bafashwe ku wa Gatanu, tariki ya 16 Nyakanga 2021, ubwo bari kwa noteri wikorera, mu Murenge wa Muhima bahinduza inyandiko kugira ngo babone uko bagurisha iki kibanza.

Kimenyi Vincent utuye mu Murenge wa Kanombe, Akarere ka Kicukiro, wari muri gahunda zo kugura iki kibanza, yasobanuye uburyo yahamagawe n’aba bagabo.

Ati “Nari narasabye umukomisiyoneri kunshakira ikibanza, tariki ya 13 Nyakanga 2021, nza guhamagarwa n’umugabo ambwira ko afite ikibanza ku Gisozi, nagiye kukireba ngezeyo komisiyoneri wari wandangiye icyo kibanza ambwira ko ataboneka. Yampaye nimero z’uwitwa Ndoli, ajya kunyereka icyo kibanza, yambwiye ko cyanditse ku witwa Antoine Ngarambe, ariwe turavugana igiciro.”

“Bampaye nimero ye ndamuhamagara ambwira ko aba hanze kandi ashaka gusubirayo ariyo mpamvu adashaka ibintu bitinda, ansaba ko muha miliyoni 15 Frw, mubwira ko muha 14, twemeranya ko muha miliyoni 13 indi imwe nkazayimuha tumaze gukora mitasiyo.”

Ku wa Gatanu tariki ya 16 Nyakanga 2021, ni bwo bagiye kwa noteri guhinduza ibyangombwa, ubwo bari kwa noteri Niyonsaba wiyitaga nyir’ikibanza yavuze ko umugore we ariwe ufite ibyangombwa byacyo kandi ari kwa muganga, ari butinde. Uyu mugore avuga ngo ni uwitwa Claudette nubwo bajye kuvumburwa ko ngo atari umugore we.

Niyonsaba Marcel wari wigize nyir’ikibanza, avuga uburyo yisanze muri izi gahunda z’ubuhemu, n’impamvu yatumye asohoka kwa noteri agahunga abeshya ko yibagiwe indangamuntu.

Ati “Njye ndi umushoferi wa Taxi, Claudette twari duhuye nka kabiri, ariko Emmanuel we twari duturanye ku Gisozi. Tariki ya 16 Nyakanga 2021, bampamagaye bambwira ko hari ikibanza bafite bashaka kugurisha kiri ku Gisozi, mpageze bansaba ko mba nyiracyo mfatanyije na Claudette wari ufite ibyangombwa bwacyo by’ibihimbano, ariko bari bambwiye ko atari icyabo.”

Niyonsaba Marcel avuga ko icyamuteye guhunga ava kwa noteri nta byangombwa by’iki kibanza bimwanditseho bari bafite, ubwo yumvaga noteri abasaba amarangamuntu byamuteye kwibaza, ahitamo kubeshya ko ntayo afite arahunga, ariko aza gufatwa na Polisi ubwo yarimo acika. Yasabye imbabazi kuba yaremeye kujya mu mugambi w’ubuhemu kandi abizi, agasaba n’undi wese utekereza kwishora mu byaha nk’ibi kubireka.

Uwiyitaga umukomisiyoneri, Mbarushimana Emmanuel, yavuze ko yari yemerewe 300.000 Frw yo guhindura nimero ya telefoni bakoresheje mu kugurisha icyo kibanza.

Ati “Njyewe bari banyemereye ko bazampa ibihumbi magana atatu nyuma yo kugurisha ikibanza, nimero narayihinduye tuyiha Niyonsaba Marcel ayikoresha yiyita Ngarambe Antoine kuko ariwe yari yanditseho. Ndasaba imbabazi kuba narishoye mu buhemu, nkanagira inama undi wese ushaka kubijyama kubireka.”

Umuvugizi wa Polisi y’u Rwanda, CP John Bosco Kabera, yaburiye n’undi wese ushaka kurya iby’abandi atavunitse, asaba abantu kuba maso kuko abatekamutwe bagwiriye.

Ati “Abantu badukanye ubutekamutwe bwo kugurisha iby’abandi nk’ibibanza, inzu n’ibindi, aba twabafatiye mu cyuho bashaka kugurisha ikibanza kitari icyabo, turi urwego rw’umutekano kandi turiho ngo dukurikirane abanyabyaha n’imikorere yabo.”

“Abantu barye bari menge, niba ushaka kugurishwa ikintu witonde ubaze inzego zibishinzwe. Amayeri mwayabonye, bafite inyandiko zigaragaza ko ikibanza ari icyabo, ntimukihutire kugura imari ishyushye kuko byabaviramo ibihombo.”

Iki kibanza aba bagabo barimo bakigurisha miliyoni 14 Frw. Bafatiwe mu cyuho amafaranga batarayahabwa.

Aba bagabo uko ari babiri bakurikiranyweho ibyaha bitatu, kugurisha ikintu cy’undi cyangwa kugitangaho ingwate, kwihesha ikintu cy’undi hakoreshejwe uburiganya ndetse n’icyaha cyo guhimba, guhindura inyandiko cyangwa gukoresha inyandiko mpimbano.

Uko ari babiri bakurikiranyweho gushaka kugurisha ikibanza kitari icyabo

Umuvugizi wa Polisi y’u Rwanda, CP John Bosco Kabera, yasabye abantu kwigengesera igihe bafite icyo bagiye kugura