Webrwanda Backend

Blog

  • UTB igiye guha impamyabumenyi abanyeshuri 140… – #rwanda #RwOT

    Umuhango wo gutanga impamyabumenyi n'impamyabushobozi ku banyeshuri basoje amasomo mu 2020 n'abasoje amasomo yabo mu 2021 uzabera muri Kigali Serena Hotel, kuri uyu wa 19 Kanama 2021.

    Ni ku nshuro ya munani, iyi Kaminuza igiye gushyira ku isoko abanyeshuri bayirangijemo. Kuri iyi nshuro, yakoresheje miliyoni 6 Frw igurira internet abanyeshuri kugira ngo bazakurikirane uyu muhango.

    Buri munyeshuri yafashwe amafoto n'amashusho azerekanwa mu muhango. Uzitabirwa na 200 bahagarariye abandi barimo, abazahembwa bahize abandi n'abanyamabahanga bayirangijemo.

    Abazahabwa impamyabumenyi barimo abasoje icyiciro Kabiri cya Kaminuza (A0), abazahabwa impamyabumenyi mu gihe cy'umwaka n'igice na Diploma y'imyaka ibiri (A1).

    Mu kiganiro n'itangazamakuru, kuri uyu wa Gatatu, Prof.Dr. Kabera Callixte, Ph. D Umuyobozi Mukuru wa Kaminuza ya UTB, yavuze ko icyorezo cya Covid-19 cyadutse mu Rwanda muri Werurwe 2020 muri Gicurasi 2020 bitegura gutanga impamyabumenyi ku banyeshuri bari basoje amasomo, bituma basubika uwo muhango.

    Avuga ko byasabye ko bategereza kugira ngo bazakore uyu muhango bashingiye ku mabwiriza yo kwirinda Covid-19.

    Umuyobozi w'iyi Kaminuza yavuze ko ubushakashatsi baherukaga gukora mbere ya Covid-19 bugaragara ko 85% by'abarangiza amasomo yabo babona akazi.

    Akomeza ati 'Amakuru dufite ni amakuru ya mbere ya Covid-19 nabyo bigiye bitandukana. Iyo ufashe abiga 'Degree Program' muri aya mashami yose usanga abarenga 85% baba bafite akazi. Iyo ni imibare ya mbere ya Covid-19.'

    'Naho abiga muri gahunda y'Imyuga n'Ubumenyingiro barengaho gato 95% baba bafite akazi bakora.'

    Yavuze ko uretse ababona akazi, mu 2018 UTB yari ifite abanyeshuri 46 bashinze kompanyi bikorera ku giti cyabo. Avuga ko muri kompanyi 10 zikomeye mu Rwanda harimo ebyiri z'abanyeshuri bize muri UTB.

    Avuga ko imyigishiririze yo muri iyi Kaminuza, ariyo ituma umunyeshuri asoza amasomo ye azi neza kwiyandikira umushinga ubyara inyungu kandi akanawubonera abaterankunga.

    Uyu muyobozi yavuze ko ubukerarugendo ari kimwe mu byakomwe mu nkokora na Covid-19, ariko ko ashingiye ku ngamba ziri gufatwa bafite icyizere cy'uko abanyeshuri babo bazaba mu ba mbere bazahabwa akazi ku isoko ry'umurimo.

    Ati 'Uko ubukungu bugenda bwisubiranya butezwa imbere, izi ngamba zo guhashya icyorezo zishyirwa mu bikorwa turizera y'uko nanone abanyeshuri bacu bazaba mu ba mbere bazabona akazi ugereranyije n'izindi 'sector' cyane cyane ko ari imwe muri 'sector' Leta y'u Rwanda yagiye itera inkunga no muri iki gihe cya Covid-19.'

    Mu Ishami ry'Amahoteli n'Ubukerarugendo no muri 'Vocation Traing Program' abakobwa basoje amasomo barangana na 62% n'aho abahungu ni 38%.

    Mu ishami rya Ikoranabuhanga n'Ubucuruzi harangije abakobwa 28% n'aho 72% ni abahangu.

    Kaminuza ya UTB yatangiye mu 2006 itangira itanga amasomo y'igihe gito yamaraga igihe cy'umwaka, ikanatanga amahugurwa nk'ay'icyumweru kimwe.

    Mu 2007, yakoze ubushakashatsi ireba niba ishobora gufungura Kaminuza, bugaragaza ko hakenewe Kaminuza yigisha abantu uburyo bakira abantu, abashinzwe kureberera ibigo n'ibindi.

    Mu 2008, ni bwo UTB yemewe nka Kaminuza itangira itanga amasomo ajyanye n'Ubukerarugendo, ndetse mu 2009 hiyongeremo amasomo ajyanye n'ubucuruzi n'ikoranabuhanga n'andi masomo afasha Igihugu kubona abakozi bakora mu kibuga cy'indege n'ibindi bifitanye isano.

    Mu 2008, iyi Kaminuza yatangiranye abanyeshuri 450, uko imyaka ishira bagenda biyongera. Bituma muri Mutarama 2010, bafungura irindi shami muri Rubavu.

    Mu kwiyubakwa kwa Kaminuza mu ireme ry'uburezi, abarimu, abanyeshuri n'ibindi, UTB yubatse inyubako yayo muri Rubavu ndetse mu minsi iri imbere iyi Kaminuza izataha ku mugaragaro inyubako yayo muri Kigali izajya yigishirizamo.

    Inyubako ya Rubavu yuzuye itwaye arenga miliyari 1,800 Frw n'aho iya Kigali yuzuye itwaye miliyari 3 Frw.

    UTB ifitanye imikoranire na Kaminuza zo mu Rwanda, izo mu mahanga, ibigo bikomeye ku Isi n'abandi. Iyi Kaminuza imaze gushyira ku isoko abanyeshuri barenga 5000, kandi ngo bose ku isoko bitwara neza.

    Prof.Dr. Kabera Callixte, Ph. D Umuyobozi wa Kaminuza y'Amahoteli, Ubukerarugendo, Ikoranabuhanga n'Ubucuruzi (UTB) yavuze ko bafite icyizere cy'uko abanyeshuri 1406 bagiye guha impamyabumenyi bazaba aba mbere bazabona akazi ku isoko ry'umurimo  Uhereye iburyo: Dr Liliane Umutesi Umuyobozi wungirije Ushinzwe Amasomo n'Ubushakashatsi muri UTB, Prof.Dr. Kabera Callixte, Ph. D Umuyobozi wa Kaminuza y'Amahoteli, Ubukerarugendo, Ikoranabuhanga n'Ubucuruzi (UTB), Jean Bosco Rurangirwa Ushinzwe Imari n'Ubutegetsi muri UTB

    Rugamba Egide Umuyobozi Mukuru w'Ishami rya Kaminuza ya UTB i Rubavu yigisha iby'Amahoteli, Ubukerarugendo, Ikoranabuhanga n'Ubucuruzi

    Source : https://inyarwanda.com/inkuru/108723/utb-igiye-guha-impamyabumenyi-abanyeshuri-1406-mu-birori-bizaha-hifashishije-murandasi-bag-108723.html

  • Kanye West yatangaje igihe album ‘Donda’ izas… – #rwanda #RwOT

    Umuherwe akaba n’umuraperi kabuhariwe Kanye West uhorana udushya amaze gutangaza igihe azasohorera album ye 'Donda' itegerejwe n’abatari bacye by'umwihariko abafana be n’abakunda injyana ya Hip Hop/Rap dore ko uyu muraperi azwiho gukorana ubuhanga album ze, aribyo bituma zikundwa zikamuhesha n’ibihembo.

    Mu minota 30 ishize, Kanye West akoresheje urukuta rwe rwa Instagram, yatangaje itariki album Donda izashokera, ku itariki 26/08/2021 akaba aribwo izagera ku isoko no ku mbuga zindi zicuruza umuziki zirimo Spotify, Apple Music n’izindi. Kanye West akaba atangaje ibi hashize iminsi abafana be bamwinuba ko yatinze kuyisohora, nyuma yo kuyibasezeranya akayisubika inshuro 3 zose.

    Mu binubiraga itinda ry'iyi album Donda harimo umuherwe Jack Dorsey uyobora urubuga rwa Twitter, aho aherutse gusaba Kanye West gusohora iyi album mu gihe cya vuba, cyangwa se akaba asohora zimwe mu ndirimbo zarangiye kuri iyi album kugira ngo abafana be babe bazumva; nyamara ibi ntacyo Kanye West yabikozeho kugeza uyu munsi atangarije itariki izasohokeraho.

    Kanye West utangaje igihe album Donda izagerera hanze abakunzi be bakayumva, yari amaze kubisubika inshuro 3 dore ko ubwa mbere yavuze ko azayisohora ku itariki 20/07/2021 ntiyayisohora, akabishyira ku itariki 27/07/2021 nabwo akabisubika maze akabyimurira ku itariki 06/08/2021 nabwo ntayisohore, kugeza ubu atangarije itariki 26/08/2021.

    Album Donda ikaba imaze guca agahigo ko kuba album itunganyirijwe muri sitade ya 'Mercedes Benz Stadium' iherereye mu mujyi wa Atlanta muri Amerika. Ibi bikaba byaratumye abantu benshi bayitegerezanya amashyushyu menshi yo kuyumva. Ikindi kihariye kuri iyi album, ni uko izina ryayo ari irya nyina wa Kanye West witwa Donda West, wapfuye muri 2009. Iyi akaba ari album uyu muraperi yatuye umubyeyi we.

    Source : https://inyarwanda.com/inkuru/108725/kanye-west-yatangaje-igihe-album-donda-izasohokera-nyuma-yo-gusubikwa-inshuro-eshatu-108725.html

  • Abantu 3 bahitanwe na covid-19 mu Rwanda abandi 635 barayandura #rwanda #RwOT

    Minisiteri y'Ubuzima yatangaje ko kuri uyu wa Gatatu,abantu 3 bahitanwe na Covid-19 bituma abamaze gupfa bagera kuri 980.Abapfuye n''abagore 2 n'umugabo 1 .

    Uyu munsi kandi abantu 635 batahuweho icyorezo cya COVID-19 mu #Rwanda babonetse mu bipimo 10,299.

    Abakingiwe uyu munsi ni 9,768 bagejeje abamaze gukingirwa ku 961,563 barimo 397,500 bahawe doze 2.

    Kuri uyu wa Gatatu taliki ya 18 Kanama 2021, Minisiteri y'Ubuzima yakiriye doze 489,060 z'urukingo rwa COVID-19 rwo mu bwoko bwa Pfizer zatanzwe na Leta Zunze Ubumwe z'Amerika (USA) muri gahunda ziyemeje yo gufatanya n'isi guhangana n'iki cyorezo.

    Minisitiri w'Ubuzima Dr. Ngamije Daniel, yashimiye Leta Zunze Ubumwe z'Amerika zihaye u Rwanda inkingo mu gihe zikenewe, ashimangira ko zihita zitangira gukoreshwa.

    Yagize ati: 'Turashimira Guverinoma ya Leta Zunze Ubumwe zAmerika (USA) ku bw'izi nkingo. Mu gihe u Rwanda rukomeje ibikorwa byo gukingira mu gihugu hose hagamijwe gutabara ubuzima no kugabahnya ingaruka zibabaje z'icyorezo cya COVID-19, izi doze zije zikenewe cyane ndetse zirahita zitangwa.'

    U Rwanda rubaye Igihugu cya mbere cyakiriye inkunga y'inkingo itanzwe na Leta Zunze Ubumwe z'Amerika muri doze zisaga miliyoni 500 icyo Gihugu cyiyemeje gutanga ku Isi yose, kikaba cyarakoranye n'Umuryango w'Afurika Yunze Ubumwe (AU) ndetse no mu bufatanye bw'ibihugu bugamije gukwirakwiza no gusaranganya inkingo za COVID-19 mu bihugu byose buzwi nka COVAX.

    Ambasaderi Peter H. Vrooman wahagarariye Leta Zunze Ubumwe z'Amerika mu Rwanda mu gihe cy'imyaka ine, akaba aheruka guhabwa inshingano nshya muri Mozambique ni we waherekeje izo nkingo.

    Yagize ati: 'Leta Zunze Ubumwe z'Amerika zinejejwe cyane no gufata iya mbere mu rugamba rwo guhangana n'icyorezo cya COVID-19. Ubuzima ubuzima bwanyu ni ubuzima bwacu, kandi ubuzima bwacu ni ubuzima bwanyu.'

    Nyuma yo gukingira abari ku ruhembe rw'imbere mu guhangana n'iki cyorezo barimo n'Abajyanama b'Ubuzima mu Gihugu hose, u Rwanda rwatangiye gukingira Abanyarwanda n'Abanyamahanga batuye mu Rwanda bafite imyaka iri hejuru ya 40 ndetse n'ibyiciro by'abari mu byago byo kwibasirwa n'iki cyorezo.

    Ibyo byiciro birimo abagore batwite n'abonsa, abafite ibibazo by'ubuzima bitandukanye, n'abageze mu zabukuru bacikanwe kuri ubu bakaba basangwa aho bari mu ngo zabo.

    Kugeza ubu mu rwanda hamaze gukingirwa abakabakaba miliyoni imwe, igikorwa kikaba gikomeje ku buryo mu 2022 hazaba hamaze gukingirwa abasaga 60% by'abaturarwanda.


    Source : https://umuryango.rw/amakuru/mu-rwanda/ubuzima/article/abantu-3-bahitanwe-na-covid-19-mu-rwanda-abandi-635-barayandura

  • Riderman yashimye Bagenzi Bernard wizihije is… – #rwanda #RwOT

    Riderman yinjira mu muziki, yatangiye kwamamara ubwo yari mu itsinda rya UTP Soldiers ryabiciye biracika, mu mazamuka y'injyana za kizungu mu Rwanda zirimo n'iya Hip Hop akora kugera n'ubu.

    Igihe cyaje kugera mu mwaka wa 2007 baza gutandukana, nyamara Bagenzi Bernard yamubaye hafi muri ibyo bihe bikomeye, atuma yongera kwigirira icyizere cyo gukomeza nk'umuhanzi wigenga.

    Ubu rero, uyu mugabo amenyerewe mu gutunganya umuziki ndetse no kurera impano z'abahanzi akabagira inama, dore ko kugeza ubu amaze kugira benshi bari mu biganza cyangwa babinyuzemo kandi bakomeye mu muziki nyarwanda.

    Uyu muhanzi yabivuze mu butumwa yanyujije kuri Instagram kuri uyu wa Gatatu tariki 19 Kanama 2021, ku munsi w'amavuko wa Bagenzi Bernard.

    Rideman abinyujije ku rukuta rwe rwa Instagram yagize ati: 'Amashimwe menshi cyane ku ruhare rwawe mu kubaka muzika Nyarwanda. Sinzibagirwa mva muri UTP Soldiers nkumva ko byose birangiye, ukamfasha gukora 'Turi muri Party' na 'Ntagukwiye'. Ikirenze ibyo kandi, ni ukuntu wakomeje kunshyigikira ungaragariza ko nshoboye nkwiye kwigirira icyizere, mu gihe njye numvaga ndi gupacapaca.'

    'Turi Muri Party' ni imwe mu ndirimbo za Riderman zamufashije kwigwizaho abakunzi benshi cyane mu myaka yo hambere. Muyoboke Alex akimara kubona ubutumwa bwa Riderman, yagaragaje ko igikorwa cyo kuzirikana uwakugiriye neza ari ubutwari.

    Agira ati: 'Uwibuka akazirikana ineza yagiriwe akabishimira azagororerwa. Riderman ibyo uvuga ndabizi neza nari mpari. Bagenzi warakoze cyane kandi na n'ubu uracyakorera uruganda rw'umuziki.' Bagenzi nawe adatinze yagize ati: 'Muvandimwe wanjye Riderman, uri incuti nziza uretse ko twatangiranye mu muziki, ariko uri n'incuti nziza idahinduka, urakoze cyane ibi bivuze byinshi.'

    Bagenzi Bernard mbere yatunganyaga indirimbo mu buryo bw'amajwi ndetse ashinga inzu ifasha abahanzi batandukanye barimo Khizz, Active, Khalfan, Davis D, Kevin Kade, Danny Nanone n'abandi benshi.

    Bagenzi Bernard kandi ni umwe mu bahanga mu gutunganya amashusho bari mu Rwanda, indirimbo amaze gukora ni nyinshi cyane.

    Bagenzi Bernard na Riderman mu ifatwa ry’amashusho y’indirimbo Bagenzi Bernard wizihiza isabukuru y’amavukoMuyoboke Alex wemeje ko gushima ari ubutwari 

     

    Source : https://inyarwanda.com/inkuru/108721/riderman-yashimye-bagenzi-bernard-wizihije-isabukuru-yamavuko-muyoboke-alex-abiha-umugisha-108721.html

  • Kamonyi: Abasigajwe inyuma n’amateka bahawe ubufasha, basabwa kubuheraho bivana mu bukene – #rwanda #RwOT

    Ubwo bufashwa bwahawe imiryango yiganjemo ikennye yazahajwe n’ingaruka z’icyorezo cya Covid-19. Bwatanzwe n’imiryango nterankunga itandukanye irimo Medicus Mundi, Fondo Alaves de Emergencia ku bufatanye n’umuryango utegamiye kuri Leta, Arde Kubaho.

    Ubufasha bwatanzwe bugizwe n’amabati, matela, ibishyimbo, umuceri, isukari, ifu y’ibigori, amavuta, imisumari, ibigega by’amazi, imikeka, ibiringiti, udupfukamunwa n’amasabune.

    Meya w’Akarere ka Kamonyi, Tuyizere Thadée, yasabye abafashijwe kubungabunga ibikoresho bahawe kuko byagaragaye ko hari benshi babihabwa nyuma bakabigurisha hadateye kabiri.

    Yashimiye umuryango Arde Kubaho n’abafatanyabikorwa bibutse abasigajwe inyuma n’amateka muri Kamonyi, asaba abahawe ibikoresho kubibungabunga no kubyitaho.

    Umuyobozi wa Arde Kubaho, Augustin Bahati yabwiye abahawe ibikoresho ko hazabaho igenzura ku mikoreshereze yabyo, harebwe niba buri umwe wabihawe yarabibungabunze uko bikwiye.

    Yavuze ko bakwiriye kubikoresha biteza imbere, ibyo kurya bakabikoresha neza mu gihe bashakisha ubundi buryo bw’imibereho.

    Kalisa Rajab, umwe mu bahawe ibikoresho yavuze ko yari amaze igihe aryama habi, none ubu akaba agiye kuryama neza kuko yahawe matela.

    Ati “Naryamaga hasi, ntaho nari mfite ho guhengeka umusaya. Inzu yanjye nayo yavaga bikomeye ku buryo nijoro amazi yansangaga aho ndyama nkamera nk’utewe n’umwuzure. Ndashimira cyane Arde Kubaho n’abafatanyabikorwa bayo badutekerejeho.”

    Yavuze ko ibikoresho by’isuku bahawe bigiye kubafasha kwirinda indwara ziterwa n’umwanda na Covid-19.

    Kalisa kandi yavuze ko amabati yahawe n’imisumari azabyifashisha asana igisenge cy’inzu ye.

    Abahawe ubwo bufasha ni abasigajwe inyuma n’amateka bo mu Mirenge ya Runda, Rukoma, Nyamiyaga, Rugalika na Nyarubaka.

    Hatanzwe ibigega by’amazi bizajya bifasha abaturage kwizigamira amazi no mu gihe cy’imvura

    Hatanzwe n’amabati kugira ngo abafite inzu ziva cyangwa abagiye kubaka bubake neza

    Mu bufasha bwatanzwe harimo matela n’ibiribwa

    Umuyobozi wa Arde Kubaho, Augustin Bahati yasabye abahawe ibikoresho kubifata neza

    Kalisa yavuze ko ubufasha bahawe bagiye kubukoresha neza, bikenura

    Meya Tuyizere yihanangirije abahawe ubufasha kutazagurisha ibyo bahawe, ahubwo ko bagomba kubikoresha biyubaka

    source : https://ift.tt/37UyJZb

  • RwandAir igiye gutangira ingendo zijya Goma na Lubumbashi – #rwanda #RwOT

    Iyi nkuru nziza yatangajwe na RwandAir kuri uyu wa 18 Kanama 2021, aho ku ikubitiro ingendo zijya muri iyi mijyi ibiri zizajya ziba nibura buri cyumweru.

    Muri Werurwe 2019, ni bwo u Rwanda na RDC, byasinyanye amasezerano yo gufungurirana ikirere, byatumye RwandAir itangiza ingendo zerekeza i Kinshasa ndetse n’indege za Congo Airways bikaba uko mu kirere cy’u Rwanda.

    Muri Mata uwo mwaka, RwandAir yahise itangira gukora ingendo eshatu mu Cyumweru za Kigali-Kinshasa, aho kuri ubu ijya cyangwa ikava ku Kibuga cy’Indege Mpuzamahanga cya N’Djili kiri i Kinshasa.

    Mu ruzinduko Perezida Paul Kagame aheruka kugirira muri Congo nyuma y’aho mugenzi we Félix Tshisekedi asuye u Rwanda ku wa 25 Kamena 2021, ibihugu byombi byasinyanye amasezerano atsura ubuhahirane arimo n’agena amahame yo gukuraho gusoresha kabiri ibicuruzwa byambukiranya imipaka.

    RDC ni igihugu gikorana ubucuruzi n’u Rwanda. Nta gushidikanya ko kongera ingendo za RwandAir, mu bice bitandukanye bya RDC bizongera ubuhahirane n’imigenderanire hagati y’ibihugu byombi bikagura n’urwego rw’ubucuruzi bubarurwa hagati yabyo.

    Ambasaderi w’u Rwanda muri Repubulika Iharanira Demokarasi ya Congo, Vincent Karega, mu kiganiro aherutse kugirana n’abanyamakuru cyabereye i Kinshasa, yasabye abaturage b’ibihugu byombi gukomeza gufatanya mu rugamba rw’iterambere.

    Ati “Ndashishikariza Abanyarwanda baba muri RDC kimwe n’Abanye-Congo bahisemo u Rwanda nk’igihugu cyabo cya kabiri, kubahiriza amategeko y’aho baba.”

    Ku bijyanye n’ubucuruzi, Karega yavuze ko u Rwanda rufite amahirwe menshi yabyazwa umusaruro n’Abanye-Congo, nko kuba ari inzira yakwifashishwa mu kwinjiza cyangwa kohereza mu mahanga ibicuruzwa binyuze ku cyambu cya Dar es Salaam na Mombasa.

    RwandAir igiye gutangira ingendo zijya mu Mijyi ya Goma na Lubumbashi

    source : https://ift.tt/3ss8aE4

  • Ruhango: Umugabo yateye icyuma undi amushinja kumusambanyiriza umugore – #rwanda #RwOT

    Byabereye mu Mudugudu wa Musenyi mu Kagari ka Cyirwa ahagana saa tatu z’umugoroba wo ku wa 16 Kanama 2021. Abaturanyi b’uwo muryango bavuga ko amakuru bamenye ari uko umugabo yatashye ageze mu rugo rwe asanga undi mugabo ari kumusambanyiriza umugore, barwana kugeza ubwo afashe icyuma arakimutera amukomeretsa ku izuru.

    Bavuga ko uwo mugabo akimara guterwa icyuma yahise ahunga bamuburira irengero.

    Umwe ati “Byabaye nijoro ariko twabimenye mu gitondo kare. Ni umugabo ngo wasanze umugore we ari gusambana n’undi mugabo aba ateye icyuma uwo yasanze amusambanya.”

    Bakomeza bavuga ko bageze aho yari aryamye bahasanga icyuma kiriho amaraso ndetse n’imyenda uwo mugabo yahasize.

    Umuturanyi ati “Ndetse twageze aho yari aryamye tuhasanga icyuma, amaraso, n’imyenda ye. Twasohotse dukurikira ibitonyanga by’amaraso inyuma y’inzu turamanuka turashaka hose turamubura ku buryo dukeka ko yaba yamwishe.”

    Aba baturage babanje gukeka ko yamwishe ariko ubuyobozi bw’Umurenge wa Mbuye buvuga ko nyuma yaje kuboneka basanga yakomeretse.

    Abo baturage kandi banenga uwo mugore kuba yarabonye abo bagabo bombi bari kurwana agahita ahunga akabata mu nzu ntatabaze abaturanyi cyangwa ubuyobozi, bakavuga ko ashobora kuba yaranze kubivuga kubera icyaha yikekagaho cyo guca inyuma umugabo we bigateza amakimbirane.

    Umunyamabanga Nshingwabikorwa w’Umurenge wa Mbuye, Kayitare Wellars, yabwiye IGIHE ko bamubonye ku mugoroba wo kuri uyu wa Kabiri yakomeretse bamujyana kwa muganga.

    Ati “Twageze aho turamubona yari yakometse tubanza kujya kumuvuza. We avuga ko atasambanyije umugore w’abandi ahubwo yasanze bari kurwana agiye kubakiza, umugabo amutera icyuma ahita amuhunga.”

    Akomeza avuga ko kugeza ubu umugabo ukekwaho gutera icyuma ndetse n’umugore we batawe muri yombi na RIB kugira ngo ipererereza rikorwe neza.

    Uwatewe icyuma yagiriwe inama yo gutanga ikirego niba yumva yarahohotewe, gusa abaturanyi bavuga ko hari imyenda ye yagaragaye ku buriri yari aryamanyeho n’uwo mugore w’abandi, bisobanuye ko yayihataye yirukanka yambaye ubusa.

    Gitifu Kayitare yagiriye inama abashakanye kwirinda ubusambanyi no gucana inyuma kandi abafitanye ibibazo bakiyambaza ubuyobozi aho kwihanira.

    Inyubako y’Ibiro by’Akarere ka Ruhango

    [email protected]

    source : https://ift.tt/37SAeXJ

  • Inguzanyo zitishyurwa neza mu bigo by’imari zikomeje gutumbagira – #rwanda #RwOT

    Ubusanzwe Banki Nkuru y’u Rwanda itanga inama z’uko igipimo cy’inguzanyo zitishyurwa neza kitagomba kurenga 5%, bisobanuye ko mu gihe ibi bipimo byakomeza kuzamuka, bishobora kugira ingaruka zitari nziza ku rwego rw’amabanki muri rusange, ibyanagira ingaruka zikomeye ku bukungu bw’u Rwanda muri rusange.

    Ku rundi ruhande, ibipimo by’inguzanyo zifite ibyago byo kwinjira mu cyiciro cy’izitishyurwa neza, bivuze ko zikeneye kwitabwaho by’umwihariko, cyarazamutse kiva kuri miliyari 157 Frw bingana na 6% by’inguzanyo zose mu mwaka ushize, kigera kuri miliyari 422 Frw, bingana na 13,2% by’inguzanyo zose muri Kamena uyu mwaka.

    Icyakora ibigo by’imari iciriritse byabashije kugabanya inguzanyo zitishyurwa neza, ziva ku kigero cya 12,8% mu mwaka ushize, zigera kuri 6,6% muri Kamena uyu mwaka, ahanini bitewe n’ubwiyongere bw’ibikorwa by’ubucuruzi buciriritse burimo ubushingiye ku buhinzi, bwakomeje gukora no mu bihe bya Guma mu Rugo.

    Inzego zagaragayemo ibibazo byo kwishyura inguzanyo ziganjemo amahoteli na restaurant, urwego rw’uburezi ndetse n’urwego rw’ubwikorezi, nk’uko Banki Nkuru y’Igihugu (BNR) yabitangaje.

    Izamuka ry’inguzanyo zitishyurwa neza ariko ntiriratangira kugira ingaruka zikomeye ku rwego rw’amabanki, kuko umutungo warwo wazamutseho 20%, ugera kuri miliyari 4.624 Frw muri Kamena uyu mwaka, uvuye kuri miliyari 3.353 Frw.

    Urwego rw’imari iciriritse narwo rwazamutseho 16,8% muri Kamena uyu mwaka, ugereranyije na 5,4% rwari rwazamutseho muri Kamena umwaka ushize. Uyu mutungo wavuye kuri miliyari 330 Frw ugera kuri 386 Frw.

    Igipimo cy’ubwihaze bw’imari shingiro y’urwego rw’imari mu Rwanda kiri hejuru, kuko kiri kuri 22,5% ku mabanki na 35% ku bigo by’imari iciriritse, hejuru y’igipimo cya 15% kigaragazwa nk’ikitagomba kugibwa munsi.

    Banki Nkuru y’u Rwanda yatangaje ko igipimo cy’inguzanyo zitishyurwa neza cyageze kuri 5.7% kivuye kuri 5.4% mu mwaka ushize

    source : https://ift.tt/2Uxf9iI

  • Perezida wa Afghanistan yahungiye muri Leta Zunze Ubumwe z’Abarabu – #rwanda #RwOT

    Minisiteri y’Ububanyi n’Amahanga n’Ubutwererane ya UAE, niyo yatangaje kuri uyu wa Gatatu ko Perezida Ashraf n’umuryango we bari muri icyo gihugu ndetse ivuga ko guverinoma imuhaye ikaze.

    Itangazo rya Guverinoma ya UAE rigira riti “UAE yakiriye Perezida Ashraf Ghani n’umuryango we binjiye mu gihugu ku mpamvu z’ubutabazi ”,

    Perezida Ashraf yahunze igihugu ku mugoroba wo ku Cyumweru ndetse agenda nta tangazo cyangwa ngo agire icyo avuga ku bijyanye n’ihunga rye cyangwa aho yaba agiye.

    Ambasade y’u Burusiya i Kabul yari yatangaje ko uyu mugabo w’imyaka 72 y’amavuko, yahunganye imodoka enye zipakiyemo amafaranga ndetse n’indege yo mu bwoko bwa kajugujugu nk’uko byatangajwe na Reuters.

    Perezida Ashraf Ghani wahunze igihugu nyuma yo guhirikwa n’aba-Taliban yagaragaye muri Leta Zunze Ubumwe z’Abarabu

    source : https://ift.tt/2UA7wrS

  • Kayonza: Ubuyobozi buvuga ko bimwe mu bikorwa byemerewe gukomeza byatumye COVID-19 yiyongera #Rwanda #RwOT via @kigalitoday #rwanda #RwOT

    Imirenge ine mu Karere ka Kayonza ni imwe muri 10 yakomeje gahunda ya Guma mu Rugo mu minsi ishize ubwo indi mirenge 40 yakurwagamo, iyo 10 ikaba yaragumyemo kubera ubwiyongere bwa COVID-19.

    By’umwihariko Umurenge wa Mwili n’uwa Murundi irangwamo ubworozi bwinshi kandi yororewemo n’abantu baturuka mu turere dutandukanye mu gihugu.

    Umuyobozi w’Akarere ka Kayonza, Murenzi Jean Claude, avuga ko kuba ibikorwa by’ubuhinzi n’ubworozi byarakomezaga mu gihe ibindi byose byahagaritswe biri mu byatumye COVID-19 itagabanuka muri utwo duce.

    Ati “Urumva mu gihe abantu twari muri Guma mu Rugo, ibikorwa by’ubuhinzi n’ubworozi byarakomezaga, muri iyi mirenge rero, hari urujya n’uruza rw’aborozi baturuka Gatsibo, Nyagatare, i Kigali n’ahandi bahafite inka, ni yo mpamvu indwara yahageze kubera ibikorwa bihakorerwa.”

    Murenzi avuga ko bafashe ingamba zo kubahiriza amabwiriza ya Guma mu Rugo cyane cyane abarwayi ntibasohoke mu ngo zabo.

    Yagize ati “Ni ukubahiriza amabwiriza uko yakabaye cyane abarwariye mu ngo bakirinda kugendagenda ahubwo bagategereza iminsi 14 bagapimwa basanga barakize bakabona gukomeza imirimo yabo.”

    Umuyobozi w’Akarere ka Kayonza yashishikarije abaturage bakora ibikorwa byemewe gukomeza kubahiriza ingamba zijyanye no kwirinda ndetse uwumva atameze neza akipimisha kugira ngo atazanduza abandi.

    Mu Karere ka Kayonza imirenge ya Mwili, Murundi, Rukara na Nyamirama ni yo yagumye muri gahunda ya Guma mu Rugo kugera tariki ya 31 Kanama 2021 nk’uko biri mu mabwiriza ya Leta yo ku itariki, icyo ihuriyeho ikaba ikorerwamo cyane ibikorwa by’ubuhinzi n’ubworozi cyane.

    source : https://ift.tt/3j0OTXv