Webrwanda Backend

Blog

  • Senateri Havugimana wavuze ko abiyahura bakwiye kunywa uburozi aho gusimbuka étage yasabye imbabazi – #rwanda #RwOT

    Ibi Senateri yabitangaje mu butumwa yashyize kuri Twitter ku wa 18 Kanama 2021, nyuma y’uko hamenyekanye inkuru y’ Umukarani wagerageje kwiyahura ku nyubako y’isoko ry’Inkundamahoro iherereye i Nyabugogo.

    Kimwe n’abandi Banyarwanda benshi, Senateri Havugimana abinyujije kuri Twitter yagize icyo avuga kuri uku kwiyahura, gusa abantu baza kugaragaza ko ibyo yavuze bidakwiye.

    Muri ubu butumwa yamaze gusiba yavuze ko abubaka inzu bajya bashyiraho utwuma tureture tuzwi nka grillage, kugira ngo bikumire abifashisha inyubako biyahura.

    Senateri Havugimana yavuze ko abagiye kwiyahura bajya bakoresha ubundi buryo.

    Ubu butumwa ntibwakiriwe neza n’abakoresha imbuga nkoranyambaga bagaragaje ko iyi mvugo ihutaza abafite ikibazo mu bijyanye n’ubuzima bwo mu mutwe, bityo ikaba idakwiye ku muyobozi uri mu rwego nk’urwe.

    Uwitwa Gedeon yagize ati “Nyakubahwa mu byubahiro byanyu, kugira abantu inama yo kwiyahura bakoresheje ubundi buryo ntibikwiye, ntibikwiye kuvugwa na Senateri. Imbaraga zikwiye gushyirwa mu gukemura ibibazo bituma biyahura, mushyireho uburyo bwo kuganiriza abantu nk’igisubizo kimwe muri byinshi.”

    Nyuma yo kubona ko ibyo yavuze bitakiriwe neza, Senateri Havugima yakomeje gusobanura ibyo yavuze agira ati “Imyubakire y’imiturirwa yahindurwa kugira ngo ntikoreshwe mu buryo bwo kwiyahura. Nko guhera kuri etaje ya gatatu ntibashyireho urubaraza! Naho kwiyahura byo bizahoraho!”

    Yakomeje avuga ko imvugo ye itagamije kwigisha abantu kwiyahura ko ahubwo byahozeho no kuva kera.

    Ati “Mwanyumvise nabi rwose! Kwiyahura byahozeho kuva kera kandi ntibizashira. Ariko uburyo abantu biyahura byo umuntu yagira icyo abikoraho. Ntawe nigishije uko biyahura. Uretse ko n’ibitabo bibivuga byanditswe kuva kera. Ndashaka ko abantu bareka gukoresha imiturirwa biyahura.”

    “Ni ingaruka z’amateka mabi igihugu cyanyuzemo. Ahubwo ubushakashatsi bwagaragaje ko nk’ingaruka za jenoside zo ababyeyi bazisigira ababakomokaho! Abantu bakomeza bakigisha bakaganiriza abahungabanye kurusha abandi.”

    Imyubakire y’imiturirwa yahindurwa kugira ngo ntikoreshwe mu buryo bwo kwiyahura. Nko guhera kuri etaje ya gatatu ntibashyireho urubaraza! Naho kwiyahura byo bizahoraho!

    — Emmanuel Havugimana (@manuhavuga) August 19, 2021

    Mwanyumvise nabi rwose! Kwiyahura byahozeho kuva kera kandi ntibizashira. Ariko uburyo abantu biyahura byo umuntu yagira icyo abikoraho. Ntawe nigishije uko biyahura. Uretse ko n’ibitabo bibivuga byanditswe kuva kera. Ndashaka ko abantu bareka gukoresha imiturirwa biyahura

    — Emmanuel Havugimana (@manuhavuga) August 19, 2021

    Ibi bisobanuro bya Senateri Havugimana byabaye nko kumena lisansi mu muriro, maze abakoresha imbuga nkoranyambaga bakomeza kumwereka ko ibyo ari kuvuga bidakwiye kandi ko bidatanga igisubizo ku kibazo cy’umubare munini w’abantu bakomeje kwiyahura.

    Mu gitondo cyo kuri uyu wa 19 Kanama 2021, Senateri Havugimana abinyujije kuri Twitter yasabye imbabazi avuga ko iki kibazo cyo kwiyahura yagifashe mu buryo budakwiye.

    Ati “Ndasaba imbabazi kubera ubutumwa nanditse kuri Twitter. Ndemera ko iki kibazo cyo kwiyahura n’ubuzima bwo mu mutwe muri rusange gikwiye kwitabwaho, inzego zose bireba zikakiganiraho. Ngiye gufata umwanya wo kurushaho kubisobanukirwa. Nsabye imbabazi ku uburyo nafashe iki kibazo.”

    Ndasaba imbabazi kubera ubutumwa nanditse kuri twitter. Ndemera ko iki kibazo cyo kwiyahura n’ubuzima bwo mu mutwe muri rusange gikwiye kwitabwaho, inzego zose bireba zikakiganiraho. Ngiye gufata umwanya wo kurushaho kubisobanukirwa.Nsabye imbabazi ku uburyo nafashe iki kibazo.

    — Emmanuel Havugimana (@manuhavuga) August 19, 2021

    Uku gusaba imbabazi kwakiriwe neza ndetse abenshi bamwereka ko bamubabariye, ndetse ko bibaho ko umuntu yavuga ikintu atumva uburemere bwacyo neza.

    Bwana Senateri, gusaba imbabazi abanyarwanda nk’umuyobozi wo kurwego uriho nibyiza numara gusobanukirwa no gusoma byinshi ku mpamvu zituma abantu biyaka ubuzima muzafashe yaba muri Sena no mu nteko gutangiza ibiganiro byafasha leta mu kubona uko imibare ya biyahura yagabanuka.

    — Robert Cyubahiro McKenna (@RobCyubahiro) August 19, 2021

    Thx Sir,n’ibisanzwe kwibeshya mugukora reaction kubintu runaka muburyo buhabanye nuko byagakozwe ntagikuba cyacitse.gira amahoro atangwa n’imana yi Rwanda.

    — Habineza Potien (@HPotien) August 19, 2021

    Inzobere zivuga ko iyo habayeho kwiyahura, ababitangaza bakwiriye kwitondera cyane imvugo bakoresha kuko bititondewe na byo bishobora gutera ikibazo, bikaba intandaro yo gushishikariza abandi kwiyahura (suicide contagion).

    Bavuga ko atari byiza kuveba uwiyahuye cyangwa se kubisigiriza kuko bishobora gutuma abandi babitekereza bumva ko ari ibisanzwe cyangwa se ko ari uburyo bwiza bwabafasha gukira akababaro bafite.

    Kuvuga kuri iyi ngingo mu ruhame, inzobere zivuga ko ari byiza kubigaragaza nk’ikibazo cy’ubuzima aho kubifata nk’icyaha cyangwa byacitse.

    Senateri Emmanuel Havugimana yasabye imbabazi kubera imvugo yakoresheje ku biyahura

    source : https://ift.tt/3gfnX4v

  • Mc Brian yatanze mituweli ku baturage 250 i Nyagatare – #rwanda #RwOT

    Ni mu gikorwa cyabereye mu Murenge wa Karangazi mu Karere ka Nyagatare mu Ntara y’Uburasizuba. Kiri mu byo asanzwe by’urukundo akunze kwita ‘Giving Back to the Community’. Ni igikorwa cya gatanu bakoze mu myaka itanu ishize.

    Murekatete Juliet, Visi Meya Ushinzwe Imirebereho myiza y’abaturage mu karere ka Nyagatare, yavuze ko ubwisungane mu kwivuza bwatanzwe na Mc Brian n’inshuti ze bugiye gufasha aba baturage bwahawe.

    Ubu bwisungane bufite agaciro k’ibihumbi 750 Frw.

    Ati “Ubu ntimugire ngo mwakoze ku gikorwa kimwe cyo kwivuza gusa. Ndangira ngo mbasobanurire ibikorwa birimo uko bingana. Bakoze ku buzima bwose. Umunyeshuri uri hano murimo murabona ko harimo abanyeshuri bambaye impuzamnkano, ubu ntabwo ashobora kurwara ngo areke kwivuza, niyivuza azajya no kwiga akurikirane amasomo neza. Ubwo mudufashije guhangana n’abana bata ishuri.”

    Murekatete yavuze ko abahawe mituweli batoranyijwe n’inzego zibishinzwe bagendeye ku baturage batari bagatanze ubwisungane mu kwivuza.

    Mc Brian aganira na IGIHE, yavuze ko ari umusanzu yatanze ari inshingano nk’umuturage ushaka ko igihugu cye gitera imbere.

    Ati “Ni ibikorwa nkora, kugira ngo nshimire Igihugu cyanjye amahirwe kimpa mu mwunga wanjye wo kuba MC. Kuko ibyiza ngeraho mbona ntabundi buryo nashimira Igihugu cyanjye uretse gutanga umusanzu wo gufasha abababaye.”

    Mu 2017, Mc Brian afatanyije n’inshuti be basangiye n’abana bo ku muhanda bashishikariza gusubira mu ishuri no mu miryango. Mu 2019, iri tsinda ryatanze ihene ku miryango yo mu karere ka Bugesera.

    Mu gihe cya Guma mu Rugo mu 2020, Mc Brian n’inshuti ze batanze ibiribwa ku miryango 10 itishoboye.

    Mc Brian yayoboye ibirori by’imikino ya Shampiyona Nyafurika ya Basketball (BAL) yabereye muri Kigali Arena, Tour du Rwanda inshuro eshatu n’andi marushanwa ategurwa na Ferwacy.

    Uyu musore yayoboye kandi Kigali Marathon, imikino yose ya Basketball yo mu Rwanda shampiyona n’andi marushanwa ya Basketball, imikino myinshi igiye itandukanye, ibitaramo bigiye bitandukanye harimo ibya Meddy, The Ben, Riderman, ubukangurambaga bwa Leta butandukanye n’ibindi.

    Aba baturage ni bamwe mu bari bataragira amahirwe yo kubona ubwisungane mu kwivuza

    Iki gikorwa abantu bakurikizaga amabwiriza yo kwirinda Coronavirus

    Imiryango 43 niyo yahawe ubu bufasha

    Mc Brian yiyemeje gukora ibikorwa nk’ibi ashaka kwitura ineza igihugu kubera amahirwe agenda abona mu buzima bwe

    Murekatete Juliet, Visi Meya Ushinzwe Imirebereho myiza y’abaturage mu karere ka Nyagatare yashimiye ubufasha MC Brian na bagenzi be bahaye abaturage

    Nyuma y iki gikorwa abantu bacinye akadiho

    MC Brian amaze igihe kinini akora akazi k’ubushyushyarugamba

    source : https://ift.tt/3y0ACya

  • Afro Basketball: Abafana bemerewe kwinjra ku… – #rwanda #RwOT

    Kuva tariki 24 Kanama kugera tariki 5 Nzeri 2021 hano mu Rwanda muri Kigali Arena, hateganyijwe imikino y’igikombe cya Afurika kizitabirwa n’ibihugu bigera kuri 16.

    Binyuze mu ishyirahamwe ry’umukino wa Basketball mu Rwanda FERWABA, batangaje ko kuri ubu abafana bemerewe kwinjira muri iyi mikino ariko bakaba bujuje ibisabwa. 

    Mu bizagenderwaho kugira ngo abafana babashe kwinjira, harimo no kuba umufana yarikingije Covid-19. Umuntu uzajya yinjira muri Kigali Arena kureba iyi mikino agomba kuba yarikingije nibura inshuro imwe, kuba waripimishije Covid-19 nibura mu masaha 48.

    Umuntu ushaka kwikingiza akinjira muri iyi mikino azajya abanza ace muri Camp Kigali yikingize. Abashaka kwipimisha bazajya bapimirwa kuri Sidate Amahoro cyangwa ukipimishiriza aho ushaka ukazana ibisubizo. Itike zo kwinjira muri iyi mikino ziri mu bice bitatu harimo itike y’ibihumbi 15, ibihumbi 10 ndetse n’ibihumbu 7 kandi aya mafaranga yose azaba arimo n’ayo kwisuzumisha.

    Source : https://inyarwanda.com/inkuru/108733/afro-basketball-abafana-bemerewe-kwinjra-ku-kibuga-108733.html

  • Ntihazagire uwizera amareshyamugeni ya Perezida Yoweri K. Museveni , asaba guhagarika iyicarubozo rikorerwa Abanyarwanda, Burya abeshya kurusha uko ahumeka #rwanda #RwOT

    Mu mpera z'icyumweru gishize Perezida Yoweri K. Museveni yavuze ijambo ryateye benshi kwibaza niba yararikuye ku mutima, icyakora abenshi bakaba basanga ari ibinyoma asanganywe, byo kuvuga ibihabanye n'ibyo atekereza.

    Kimwe mu byo Perezida Museveni yagarutseho, ni uburenganzira bw'abanyamahanga baba muri Uganda, dore ko abantu n'imiryango mpuzamahanga bakomeje kwamagana ihohoterwa baborerwa muri Uganda. Abakunze kwibasirwa n'iyicarubozo bakorerwa n'urwego rw'ubutasi rwa Uganda, CMI, ni Abanyarwanda batabarika bicwa, bagakubitwa, bagafungirwa ahantu hatazwi, bagacuzwa utwabo, mbere yo kuvugunywa ku mupaka wa Uganda n'uRwanda. Aba banyarwanda bashinjwa kuba intasi z'uRwanda, nyamara ntawe urashyikirizwa ubucamanza ngo aburanishwe ku byaha aregwa

    Mu ijambo rye, Perezida Museveni 'yamaganye' ako karengane, karimo gufunga no guhambiriza Abanyamahanga mu buryo butemewe n'amategeko. Aha rero niho benshi batangiye gukeka ko ibyo yavuze atabitewe n'umutimanama, ko ahubwo ashobora kuba amaze kuganzwa n'amajwi menshi amusaba guhagarika ubugome akorera Abanyarwanda.

    Icyakora abasobanukiwe imikorere ya Perezida Museveni, bavuga n'iyo byaba ari ugutinya icyo gitutu, bitamubuza kuvuga ibinyuranye n'ibyo akora, cyane cyane ko ubugome bwa Gen Abel Kandiho utegeka CMI, bujyanye n'amawiriza ya shebuja Museveni.

    Ikinyoma cya Perezida Museveni si icya none. Abamuzi neza bemeza ako ari umuntu ugira amarira y'ingona, ku buryo adatinya kuririra umuntu yishe ubwe, ndetse akanatabara umuryanyo we. Ibi byarabaye ubwo uwari umuvugizi wa Polisi, Andrew Felix KAWEESI yahitanwaga n'ibyegera bya Museveni, biraba ubwo Gen WAMALA KATATUMBA yarusimbukaga agiye kwicwa n'abatumwe na Museveni ndetse umukobwa we akahasiga ubuzima.

    Museveni yasutse amarira ubwo umunyapolitiki ukomeye, Ibrahim KABIRIGA, yicwaga n' inkoramaraso za Museveni, n'ahandi n'ahandi abantu bahitanywe n'inzego za Museveni, ntibimubuze gusuka marira y'ingona, ati : 'Nashenguwe bikomeye n'urupfu rw'intwari yabohoye Uganda, kandi iperereza rikomeye rizagaragaza abicanyi, bahanwe b'intangarugero'.

    Byahe byo kajya! Kandi birumvikana, uperereza ni we mwicanyi.
    N'ubu rero ntihagire Umunyarwanda wirara ngo Perezida Museveni yamaganye akarengane bakorerwa muri Uganda.

    Inama ni ukugabanya ingendo muri icyo gihugu, kuko Umunyarwanda wese uzanga kujya mu mitwe y'itrabwoba nka RNC, FDLR n'indi ishyigikiwe n'ubutegetsi bwa Uganda, nta kabuza azagirirwa nabi. Ururimi rwa Perezida Museveni ntacyo rupfana n'ubwonko bwe, kuko ibyo avuga bihabaye kure n'ibyo akora.

    The post Ntihazagire uwizera amareshyamugeni ya Perezida Yoweri K. Museveni , asaba guhagarika iyicarubozo rikorerwa Abanyarwanda, Burya abeshya kurusha uko ahumeka appeared first on RUSHYASHYA.

    Source : https://rushyashya.net/55808-2/?utm_source=rss&utm_medium=rss&utm_campaign=55808-2

  • Ibintu 7 ugomba kwirinda nyuma yo kurya – #rwanda #RwOT

    Ibyo ugomba kwirinda nyuma yo kurya

    1.Irinde koga nyuma yo kurya

    Iyo ukimara kurya, igogorwa rikenera imbaraga zihagije ndetse n'amaraso aba atembera mu bice by'urwungano ngogozi.

    Iyo woze, cyane cyane amazi ashyushye, amaraso atemberera mu bice by'inyuma (ahagana ku ruhu) mu rwego rwo kugabanya ubushyuhe, bityo igogorwa rikagenda nabi.

    Ugomba gutegereza byibuze iminota 30 nyuma yo kurya, ukabona koga.

    2.Irinde kunywa icyayi gishyushye

    Icyayi kibonekamo ibinyabutabire byitwa tannin, bishobora kubuza proteyine wariye kwinjira mu mubiri. Iyo unyweye icyayi nyuma yo kurya, bishobora kubuza kandi umubiri kwinjiza ubutare (iron/fer) bityo ukaba wagira ikibazo cyo kugira ubutare bucye mu maraso (anemia)

    3.Gukora siporo

    Umubiri ukenera umwanya uhagije wo gukora igogorwa ry'ibyo wariye mbere yo gukora imyitozo ngorora mubiri kabone naho byaba ari ukugenda (walking). Iyo ukoze siporo ukimara kurya, igogorwa rigenda nabi, bikaba byatera gutumba inda, kugaruka kw'aside yo mu gifu, kuruka ndetse no kubuza umubiri kwinjiza intungamubiri.

    Ni ngombwa gutegereza byibuze amasaha macye nyuma yo kurya, ukabona gukora sport.

    4.Kuryama ukimara kurya

    Kuryama ukimara kurya bishobora gutera ibibazo bitandukanye mu gifu. Ibikunze kugaragara ni ugutumba, kumva ibintu bivuga mu nda cyangwa se no gusinzira nabi.

    Ni byiza gutegereza byibuze amasaha 2 nyuma yo kurya, ukabona kuryama.

    5.Kwirinda kunywa amazi akonje

    Amazi akonje abangamira bikomeye ndetse agacamo hagati igogorwa cyangwa se icagagurwa ry'ibyo uba wariye, bihinduka uduce duto dushobora kwinjira mu maraso (intungamubiri) kugira ngo bijye gutunga ingirangingo n'uturemangingo dutandukanye.

    Niba ufite inyota mu gihe uri kurya, wanywa amazi ashyushye (y'akazuyazi) kuko yo afasha mu igogorwa.

    6.Kunywa itabi

    Hari abantu bakunda itabi, yamara kurya akumva ashatse kurenzaho itabi. Ibi ni amakosa akomeye, kuko iyo unyweye itabi ukimara kurya, nicotine iboneka mu itabi ihura n'umwuka wa oxygen uba ukenewe ari mwinshi nyuma yo kurya. Bikaba byakora uburozi bukomeye kurusha mu bihe bisanzwe, ari nabwo buvamo kanseri zitandukanye.

    7.Kurya imbuto ukimara kurya

    Bimenyerewe mu mico itandukanye, ko barya imbuto bakimara kurya. Nyamara nubwo bikorwa na benshi, ntibikuraho ko ari ikosa. Imbuto zikenera enzymes (ibi ni ibinyabutabire byitabazwa mu igogorwa) zazo zihariye, iyo uziriye ukimara kurya, bitera igifu kutabasha gukamura neza intungamubiri mubyo uba wariye.

    Ni byiza kurya imbuto igihe mu gifu nta kindi kintu kirimo, nibwo intungamubiri zinjira neza.

    Src:www.healthline.com

    Source : https://inyarwanda.com/inkuru/108734/ibintu-7-ugomba-kwirinda-nyuma-yo-kurya-108734.html

  • Dore ibiribwa birwanya umunaniro #rwanda #RwOT

    Umubiri wawe ukoreshwa n’ibyo uwugaburira. Inzira nziza yo kubona imbaraga nyinshi mu mubiri ni ukureba neza ko ufata ibiryo byiza bishoboka.

    Ibyo urya ni byo bigena ingufu umubiri ugomba kugira.Ese wabonye ukuntu uhita unanirwa nyuma yo gufata ifunguro rinini rya saa sita cyangwa nimugoroba? Biterwa n’uko umubiri wawe uba urimo gukoresha ingufu nyinshi mu kugogora ibyo wariye.

    Inzira yoroshye yo kwirinda umunaniro nyuma y’ifunguro ni ukurya amafunguro mato mato umunsi wose. Ibi bizagumisha umubiri wawe kuri gahunda buri gihe.

    Ibiribwa bitanyujijwe mu nganda

    Ibiribwa byanyujijwe mu nganda bikongerwamo amasukari, ibiribwa bifunze mu makarito n’inyama zibikwa igihe kirekire n’ibindi biribwa bimeze bityo, bishobora kubangamira imbaraga z’umubiri wawe.

    Imbuto n’imboga zikiri nshyashya

    Ibiribwa bishya, ni isoko y’intungamubiri nyinshi. Bitandukanye n’ibiribwa bitunganirizwa mu nganada kuko bishobora kwamburwa intungamubiri zigufasha kugira ngo ubeho igihe kirekire, ibiryo bishya mu bisanzwe birimo intungamubiri nyinshi. Ni byiza kurya imbuto n’imboga bikiri bishyashya.

    Ibinyobwa bitarimo caffeine

    Cafeine ni nziza mu rugero, kandi byagaragaye ko ifite inyungu mu buzima. Nubwo itanga imbaraga z’igihe gito, ntabwo iha umubiri imbaraga z’igihe kirekire.

    Niba ushaka kugira ibyo ukosora, hitamo nibura ikawa y’umukara. Soda n’ibinyobwa bitera imbaraga bishobora kuba byuzuyemo isukari itunganijwe bishobora kugutera guhanuka, kandi biganisha ku bindi bibazo by’ubuzima iyo urengeje urugero.

    Amazi:

    Kunywa amazi ni ngombwa kugira ngo habeho imikorere myiza y’umubiri. Nubwo amazi adatanga ingufu mu buryo bwa karori, bifasha koroshya inzira z’ingufu mu mubiri, ni zo zongera imbaraga ubwazo.

    Kunywa amazi umunsi wose, ukareka soda, ikawa, n’ibindi binyobwa. Niwimenyereza ibi, uzabona impinduka nziza ku buryo bwihuse.

    Imineke

    Imineke yuzuyemo umunyu ngugu wa potasiyumu, fibre, vitamins n’ibindi byinshi byagufasha kongera ingufu karemano (natural energy)

    Source: www.healthline.com

    [email protected]

    Source : https://agakiza.org/Dore-ibiribwa-birwanya-umunaniro.html

  • Pariki y’ubukerarugendo ya Nyandungu igiye gutahwa ku mugaragaro #Rwanda #RwOT via @kigalitoday #rwanda #RwOT

    Pariki ya Nyandungu ubu yaruzuye, igiye gutangira gufungurwa ku mugaragaro
    Pariki ya Nyandungu ubu yaruzuye, igiye gutangira gufungurwa ku mugaragaro

    Ubuyobozi bw’Ikigo cy’Igihugu cy’ibidukikije (REMA) butangaza ko gahunda yo gutaha iyo Pariki irimo gutegurwa.

    Kabera Juliet, Umuyobozi mukuru wa REMA ati “Kubaka Pariki byararangiye, ubu turimo gutegura igikorwa cyo kuyitaha ku mugaragaro”.

    Itariki nyayo yo gutaha iyo Pariki, cyangwa se igihe abantu bazatangirira kuyisura, ntibiratangazwa.

    Umushinga wo gutunganya iyo Pariki watewe inkunga n’ikigega cy’u Rwanda cyo kwita ku bidukikije ‘FONERWA’, aho umushinga watwaye agera kuri Miliyari 5.4 z’Amahanga y’u Rwanda.

    Umushinga wo gutunganya Pariki ya Nyandungu wabayeho guhera mu 2015, ariko utangira gushyirwa mu bikorwa mu 2016.

    Ibikorwa byo gutunganya iyo Pariki byagombaga gukorwa mu byiciro bibiri, ariko byose bikaba byarangiye mu 2020.

    Gusa REMA ivuga ko habayeho gukererwa k’uwo mushinga, kuko byasabye kongera kuwiga ndetse no guhindura Rwiyemezamirimo, ariko ubu umushinga wararangiye, kandi n’abantu bagiye kujya basura ibyiza bigize iyo Pariki.

    Abashinzwe ibyo kwita ku bidukikije, bashimye cyane uwo mushinga, bavuga ko ufasha mu kubungabunga ibidukikije mu Mujyi ukura vuba nka Kigali.

    Nkuranga Egide, umwe mu bantu bita ku bidukikije ati” Kubaka Pariki ibungabunga ibidukikije ‘eco-park’ mu Mujyi wa Kigali byari ngombwa, bitewe n’iterambere ryawo ryihuta”.

    Yongeyeho ko uretse kuba iyo Pariki yigisha abaturage kurinda ibidukikije, izaba yiyongereye ku byiza nyaburanga bisurwa n’abakerarugendo muri Kigali.

    Nkuranga ati “Imijyi myinshi iteye imbere, igira ubukerarugendo bushingiye ku bidukikije ‘eco-tourism’, ibi byerekana uko igihugu cyacu cyateye imbere mu bukerarugendo ndetse no mu kwita ku bidukikije.

    Biteganyijwe ko iyo Pariki nitangira gukora, izajya ibyara inyungu zigera no ku baturage bayituriye.

    Iyo Pariki nifungura kandi, abantu bayisuye bazajya babona ibyiza bitandukanye, kandi hazaba harimo na Interineti ‘Wi-fi’, ndetse na za camera zifasha mu gucunga umutekano muri iyo Pariki, nk’uko byatangarijwe The New Times.

    REMA itangaza ko uretse iyo Pariki ya Nyandungu imaze gutunganywa, hari n’ibindi bishanga bizatunganywa muri Kigali.

    Kabera Juliet ati “Umushinga wo gutunganya ibishanga ntuzarangirira ku gishanga cya Nyandungu gusa, tuzakomereza no ku bindi bishanga”.

    source : https://ift.tt/37Xh4Ag

  • Héritier Luvumbu wakiniraga Rayon Sports yasinye umwaka muri Angola #Rwanda #RwOT via @kigalitoday #rwanda #RwOT

    Nyuma y’amezi yari yarasinyiye ikipe ya Rayon Sports akayikinira imikino ya shampiyona yakinwe mu buryo bw’amatsinda, Héritier Nzinga Luvumbu ntiyabashije gukomezanya n’iyi kipe yifuzaga kuba yamwongerera amasezerano.

    Héritier Luvumbu wigaruriye abakunzi ba Rayon Sports mu minsi mike yabakiniye, ubu yasinye amasezerano y’umwaka umwe mu ikipe ya Clube Desportivo Primeiro de Agosto ikina shampiyona y’icyiciro cya mbere muri Angola.

    Luvumbu yahawe numero 9 mu ikipe ye nshya

    Luvumbu yahawe numero 9 mu ikipe ye nshya

    Uyu mukinnyi ushobora gukina aca ku ruhande cyangwa inyuma ya rutahizamu yakinnye mu makipe arimo Royale Union saint-gilloise yo mu Bubiligi, akinira AS FAR Rabat ndetse na Athletic Youssoufia Berrechid zo muri Maroc, ubu akaba yakiniraga Rayon Sports yo mu Rwanda.

    Héritier Luvumbu yari amaze iminsi akinira Rayon Sports
    Héritier Luvumbu yari amaze iminsi akinira Rayon Sports

    source : https://ift.tt/37Y7xsK

  • #AfroBasket2021: Tunisia ibitse igikombe giheruka yageze mu Rwanda (AMAFOTO) #Rwanda #RwOT via @kigalitoday #rwanda #RwOT

    Mu gihe habura iminsi ibarirwa ku ntoki ngo u Rwanda rwakire igikombe cya Afurika mu mukino wa Basketball “FIBA AFROBASKET 2021”, ibihugu bitanu ubu bimaze kugera mu Rwanda.

    Ku gicamunsi cy’ejo ikipe y’igihugu ya Uganda yari yabanje kuvugwaho ikibazo cy’amikoro yageze mu Rwanda, aho yaje ikurikiwe n’ikipe y’igihugu ya Tunisia inafite igikombe cya AfroBasket giheruka.

    Tunisia igera mu Rwanda…..

    Iyi Tunisia ifite igikombe giheruka, iri mu itsinda B hamwe na Central African Republic (CAF), Misiri (izo zombi nazo zageze i Kigali) ndetse na Guinea itaragera mu Rwanda.

    Kugeza ubu ibihugu bimaze kugera mu Rwanda ni Sudan y’Amajyepfo, Republika ya Centrafrika, Misiri, Uganda yaje ejo ku manywa ndetse,Tunisia ndetse n’u Rwanda ruzaba rwakira aya amrushanwa.

    Imikino ya AfroBasket 2021 izabera muri Kigali Arena, izatangira guhera taliki 24 Kanama kugeza taliki 05 Nzeri 2021, aho ku munsi wa mbere ruzakina na Republika Iharanira Demokarasi ya Congo ku i Saa kumi n’ebyiri z’umugoroba.

    AMAFOTO: Muzogeye Plaisir

    source : https://ift.tt/3j06vTf

  • Abantu 17 bafashwe bacukura amabuye y’agaciro batabyemerewe #Rwanda #RwOT via @kigalitoday #rwanda #RwOT

    Iryo tsinda rigizwe n’abantu biyise “Abapari” bafatanwe ibiro 8.5 by’amabuye y’agaciro yo mu bwoko bwa gasegereti, bayacukuraga mu mirima y’abaturage iri hafi y’ibirombe by’ubucukuzi bw’amabuye y’agaciro bya Rutongo, mu Kagari ka Mugambazi, Umurenge wa Murambi no mu Kagari ka Kivugizi mu Murenge wa Masoro.

    Umuyobozi wa Polisi w’agateganyo mu Karere ka Rulindo, CIP Pacifique Semahame Gakwisi, yavuze ko abo bantu bafashwe biturutse ku makuru yatanzwe n’abaturage bangirijwe imirima.

    Yagize ati “Polisi yakiriye amakuru ava mu baturage bavuga ko hari abantu bigabiza imirima yabo bagacukuramo amabuye y’agaciro babangiriza imirima yegereye ikirombe cy’ubucukuzi bw’amabuye y’agaciro cya Rutongo. Tumaze kubona ayo makuru twateguye igikorwa cyo gufata abo bantu hafatwa 17 barimo kugabana amabuye bari bamaze gucukura muri iryo joro, bafatanwe ibiro 8 n’igice”.

    CIP Semahame yakomeje avuga ko abo bantu 17 bagize itsinda ryiyise Abapari, aba inshuro nyinshi baba bari mu bikorwa byo gucukura amabuye y’agaciro mu buryo butemewe n’amategeko.

    Yavuze ko abo bantu bangiza imirima y’abaturage n’ibindi bidukikije ndetse iyo bamenye ko hari umuturage wabibwiye Polisi bamugirira nabi. Ubwo bafatwaga bari bafite ibikoresho gakondo bifashisha mu bucukuzi bw’amabuye y’agaciro.

    CIP Semahame yibukije abaturage ko usibye kuba ibyo bikorwa byangiza imirima y’abaturage, ubundi bihabanye n’amategeko kuko bagomba gusaba ibyangombwa bibemerera gucukura amabuye y’agaciro.

    Ati “Kugira ngo ukucure amabuye y’agaciro ugomba kubanza gushaka ibyangombwa bitangwa n’inzego zibifitiye ububasha. Ibi biri mu rwego rwo kugira ngo hirinde ingaruka zose zaba igihe urimo gucukura amabuye kuko biriya bikorwa bikunze kubamo impanuka nyinshi. Uhabwa ibyangombwa hakagenzurwa ko ubishaka afite ubushobozi n’ibikoresho byo guckura amabuye y’agaciro”.

    Uwo muyobozi yashimiye abaturage batanze amakuru bigatuma bariya bantu bafatwa, yibutsa abakishora muri ibyo bikorwa ko Polisi y’u Rwanda itazahwema kubafata bagashyikirizwa ubutabera.

    Abafashwe ndetse n’ibyo bafatanwe bahise bashyikirizwa Urwego rushinzwe ubugenzacyaha (RIB) rukorera muri sitasiyo ya Polisi ya Murambi kugira ngo hakorwe iperereza.

    Itegeko rigena ubucukuzi bw’amabuye y’agaciro na kariyeri nimero 58/2018 ryo kuwa 13/08/2018, mu ngingo ya 54 ivuga ko umuntu wese ushakashaka, ucukura, utunganya, ucukuza amabuye y’agaciro cyangwa kariyeri nta ruhushya aba akoze icyaha.

    Iyo abihamijwe n’urukiko ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano.

    Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.

    source : https://ift.tt/3mfEWaH