Blog

Yanditse iti “Kubera ko Guverinoma ya Amerika yamaze guhungisha abakozi ba Ambasade yayo i Kabul, tuzakomeza gufasha abaturage ba Amerika n’imiryango yabo bashaka kuva muri Afghanistani, twe turi i Doha muri Qatar”.

Gusohoka kw’Ingabo za Amerika ndetse na Ambasade yayo muri Afghanistani, byafashwe nk’intsinzi ku Batalibani ku buryo ngo banarashe amasasu mu Murwa mukuru wa Afghanistan, Kabul, mu rwego rwo kwishimira intsinzi nk’uko byatangajwe na ‘France 24’ dukesha iyi nkuru.

Zabihullah Mujahid, Umuvugizi w’Abatalibani ari ku Kibuga cy’indege cya Kabul yagize ati “Dukeje igihugu cya Afghanistani, iyi ntsinzi ni iyacu twese”.

Ati “Gutsindwa kwa Leta zunze Ubumwe za Amerika, ni isomo rikomeye no ku bandi bashaka gutera Afghanistani. Ariko Abatalibani bazakomeza gukorana neza mu bya ‘dipolomasi’ na Amerika ndetse n’Isi”.

Umunyamabanga wa Leta zunze Ubumwe za Amerika, Antony Blinken, kuri uyu wa Mbere tariki 30 Kanama 2021, yavuze ko ‘kubera umutekano na politiki bitameze neza muri Afghanistani, abaturage ba Amerika bazifuza guhungishwa nyuma y’uko Ingabo zicyo gihugu zivuye muri Afghanistani, bazafashwa kandi ko Amerika izakomeza gukorana n’Abatalibani nibakomeza kubahiriza ibyo bemeranyijweho’.

Biteganyijwe ko Perezida Joe Biden wa Amerika aza kugeza ijambo ku Banyamerika ku birebana na Afghanistani, kuri uyu wa Kabiri tariki 31 Kanama 2021, saa kumi n’imwe ku isaha mpuzamahanga.

Ingabo za Amerika za nyuma zavuye muri Afghanistani ejo ku wa Mbere tariki 30 Kanama 2021, zikaba zari zimaze guhungisha abantu bagera ku 123.000 b’abasivili, guhera tariki 14 Kanama 2021, ubwo hatangiraga ibikorwa byo guhungisha abantu muri Afghanistani.

Abo basirikare ba Amerika batashye, basize igihugu cya Afghanistani mu maboko y’Abatalibani, nyuma y’imyaka 20 bari bamaze muri icyo gihugu, iyo ngo akaba ari yo ntambara yabaye ndende mu ntambara Leta zunze Ubumwe za Amerika zarwanye mu mateka yazo.

Ku munsi w’ejo ikipe y’igihugu y’u Rwanda “Amavubi” yakoze imyitozo yayo ya mbere Agadir, imyitozo yabereye ku kibuga kimwe muri bibiri by’imyitozo bya stade izaberaho umukino.

Rafael York yakoze imyitozo bwa mbere mu Mavubi

Usibye abakinnyi baturutse mu Rwanda, abandi bakinnyi bakina hanze y’u Rwanda ari bo Abdul Rwatubyaye, Manzi Thierry, Rafael York, Mukunzi Yannick bose bageze Agadir ndetse bakaba banakoranye imyitozo n’abandi.

Ni mu gihe kandi Bizimana Dhihad wahageze nyuma kubera umukino wa shampiyona yari yaraye akinnye yakoze imyitozo yoroheje ku ruhande, akaza gukorana n’abandi mu myitozo yo kuri uyu mugoroba ibera ku kibuga kizaberaho umukino.

Uyu mukino w’ikipe y’igihugu y’u Rwanda na Mali biteganyijwe ko uzaba kuri uyu wa Gatatu ku i Saa tatu z’ijoro zo mu Rwanda, naho undi wa kabiri muri iri tsinda bakazawukina na Kenya ku Cyumweru tariki 05/09/2021 kuri Stade ya Kigali i Nyamirambo.

Aba bana baba barataye imiryango yabo bakajya mu mihanda aho usanga bambura abantu

Polisi y’u Rwanda, imaze iminsi ikora umukwabu udasanzwe wo guhiga no gufata abazwiho ibyo bikorwa bigayitse, nyuma y’uko mu mujyi wa Musanze ndetse no mu nkengero zaho, byari bimaze kugaragara ko ubujura n’urugomo, bigenda bifata indi ntera.

Izo nsoresore zigaragaramo n’abana biyise aba Marine, bari mu kigero kiri hagati y’imyaka itandatu n’imyaka 11, bagendana inzembe, ibyuma bikomeretsa, n’ibindi bikangisho bifashisha mu kwambura abantu. Akenshi binjira no mu maduka y’ubucuruzi yo mu mujyi wa Musanze, bakambura abacuruzi ibintu bitandukanye ndetse n’amafaranga bakiruka.

Umuhuzabikorwa w’ibikorwa bya Polisi n’abaturage mu Ntara y’Amajyaruguru, CIP Alex Ndayisenga, yasobanuye ko gufata bamwe mu bagaragara muri ibyo bikorwa, byashobotse ku bufatanye bw’amakuru yatanzwe n’abaturage ndetse n’inzego z’ibanze, kandi igikorwa cyo gushakisha n’abandi kirakomeje.

Yagize ati “Ni gahunda tugikomeza yo gushakisha n’abandi, kuko ibikorwa nk’ibi byo guhungabanya umudendezo n’ituze ry’abaturage, tudashobora kwemera ko bikomeza. Abafashwe mu gihe hanaboneka ibimenyetso by’ibyaha bacyekwaho, bazashyikirizwa Ubugenzacyaha”.

Yongera ati “Abo bana bato biyise aba Marine, ubusanzwe baba bafite imiryango bakomokamo. Icyo tugiye gukora, ni ugufatanya n’inzego z’ibanze, bafashwe gusubizwa iwabo, abandi bajyanwe mu bigo ngororamuco”.

CIP Alex Ndayisenga aboneraho kuburira abishora mu bujura n’ibindi bikorwa by’urugomokubireka amazi atararenga inkombe.

Yagize ati “Ubujura n’urundi rugomo urwo ari rwo rwose, ni kimwe n’ibindi byaha bikomeye. Polisi uwo ibifatiyemo, imushyikiriza ubutabera, agahabwa ibihano birimo n’igifungo. Urubyiruko ruri mu bantu bagaragara cyane muri ibi byaha, ni yo mpamvu turuburira, turwibutsa ko Polisi iri maso amanywa n’ijoro; kandi ko itazigera yihanganira abashaka gutungwa n’ibyo batakoreye”.

Ati “Turabagira inama yo gukoresha amaboko n’imbaraga zabo mu bikorwa binyuze mu mucyo, kandi birahari byinshi bashobora gukora, bahere ku mahirwe igihugu kibaha. Bashore ubwenge n’amaboko, kandi bazagera ku byiza byinshi, birinde ubwo bujura kuko n’ubwo byatwara igihe, abakibirimo bazafatwa babihanirwe”.

Abaturage bakiranye yombi iyi gahunda yo gushakisha abajura, kuko bari bamaze kubamaraho ibintu. Uwineza Angeline baheruka kumutegera mu muhanda, mu masaha ya mu gitondo ubwo yari agiye kurangura, bamwambura amafaranga, telefoni ndetse baranamukubita.

Yagize ati “Nari ngiye kurangura inyanya mu masaha ya mu gitondo nka saa kumi n’ebyiri. Ubwo narimo ngenda mu muhanda wa kaburimbo wo kwa Mudjomba, hafi y’ahitwa kuri Lacienda mu mujyi wa Musanze, ako kanya mbona abana nka barindwi bavumbutse muri rigole zikikije umuhanda, barangota baranigagura”.

Yongera ati “Muri uko kuniga, bafashe inzembe n’ibyuma bari bitwaje, bakata imishumi y’agakapu nari nabitsemo amafaranga ibihumbi 50 yo kurangura inyanya, ibyangombwa ndetse na telefoni byarimo, byose baratwara. Banankubise ingumi n’imigeri myinshi mu nda. Bansiga naguye igihumure, sinogera kubabona, n’ibyanjye mbiheba uko”.

Undi mugabo uheruka gukomeretswa n’insoresore zamuteze ubwo yari atashye ari kumwe n’umugore we bavuye mu kazi.

Yagize ati “Badutegeye mu muhanda w’ahitwa i Nyarubande mu ma saa moya y’ijoro ndi kumwe n’umugore wanjye tuvuye ku kazi. Bakiduhagarika twabanje kugira ngo ni abantu bayobye kuko babanje kutubwira ngo tubarangire ku mugabo ntibuka izina batubwiye”.

Ati “Mu gihe narimo ngerageza kubasubiza, nibwo nagiye kubona mbona basingiye igikapu nari mpetse cyarimo imashini, ngerageza kubarwanya, mbarushije imbaraga, umwe muri bo ankubita ibuye rinini mu musaya. Icyo gikapu n’ibyarimo, amatelefoni n’ibyangombwa twari dufite byose barabitwatse, badusiga aho banadukomerekeje; twahakuwe n’abaturage bahadusanze nyuma, batujyana kwa muganga kwipfukisha ibikomere”.

Yongera ati “Kuba Polisi yatangiye gushakisha abantu batwiba bakanadukorera urugomo, turumva biri butume twongera kugarura icyizere cy’ubuzima, kuko twari tumaze iminsi mu mihangayiko, tugenda twikandagira, twumva tudatekanye kubera ayo mabandi”.

Imibare itangwa na Polisi ikorera mu Karere ka Musanze, igaragaza ko kuva tariki 28 Kanama 2021 kugeza ubwo twakoraga iyi nkuru ku wa mbere tariki 30 Kanama 2021, hamaze gufatwa abagera kuri 38, muri bo 19 ni abana bato biyise aba Marine.

Nk’uko byagaragaye ku mbuga nkoranyambaga Muyango ari gukora ku ntoki z’umwana we yari amaze kubyara, Kimenyi yashimiye abamushimiye kubera ibyishimo arimo byo kubyara, ndetse ku mbuga nkoranyambaga akaba yagize ati “nyemerera Data ngushime.”

Byavuzwe kenshi ko Muyango yaba asigaye abana mu nzu na Kimenyi ndetse biza kuvugwa ko yaba atwite bishimangirwa n’uburyo Muyango yagaragaraga ubwo bamutereraga ivi muri Gashyantare 2021, gusa aba bombi birinze kugira byinshi babivugaho.

Mu minsi ishize nibwo Kimenyi yatawe muri yombi n’abandi bakobwa bazira kurenga ku mabwiriza yo kwirinda Covid 19, nyuma yo gutegura ibirori byo gutegurira umwana uzavuka bizwi nka baby shower, gusa yaje kurekurwa nyuma yo gutanga amande.

Miss Muyango wabaye Miss photogenic mu mwaka wa 2019 amaze igihe kinini akundana na Kimenyi Yves akaba umwe mu bantu bakurikirwa cyane ku mbuga nkoranyambaga nka Instagram.

Yahawe igare rishya risimbura iryo yari afite rishaje

Ubwo yashyikirizwaga irryo gare n’ubuyobozi bw’Akarere ka Nyaruguru tariki 24/8/2021, yashimye abatekereje kumushumbusha, kuko kugendera ku rishaje byari bisigaye bituma atabasha kugera mu gasantere ka Kamirabagenzi akunze kudoderamo inkweto, nyamara ari byo bimufasha kubona amafaranga atunga urugo rwe.

Akimara kwakira igare yagize ati “Ubu guhera ejo n’ejobundi ndabasha kujya kwirwanaho, kugira ngo ubuzima bukomeze neza”.

Ubundi ngo ataramugara yagabaga i Kigali, akora umurimo w’ubunyonzi, hanyuma muri 2002 agongwa n’imodoka ahetse umugenzi, bimuviramo kumugara igice cyo hasi cy’umubiri.

Ati “Imana yambaye hafi sinapfa, nza kubaka, nzana umugore, ubu dufitanye abana bane. Kuba amaboko ari mazima ndayakoresha nkayabyaza umusaruro, kuko nanze gusaba. Ubwo mbashije kubona inyunganirangingo, birushijeho kuba byiza.”

Umuyobozi w’Akarere ka Nyaruguru wungirije ushinzwe imibereho myiza, Colette Kayitesi, avuga ko muri rusange mu Karere ka Nyaruguru abafite ubumuga bakeneye amagare y’inyunganirangingo kuri ubu bari 77, hakaba havuyemo umwe. Ngo bari gushaka uko n’abasigaye bayahabwa.

Na ho mu Rwanda hose, abakenera amagare y’inyunganirangingo muri rusange ni ibihumbi 17 nk’uko bivugwa na Marcel Nkurayija, ushinzwe ubuzima mu Nama y’igihugu y’abafite ubumuga.

Agira ati “Abo nkubwiye ni abapimwe bikagaragara ko bayakeneye ubwo twashyiraga abafite ubumuga mu byiciro, ariko umubare w’abakenera inyunganigangingo y’igare ugenda uhindagurika buri munsi bitewe n’uko hari abagira impanuka bagenda biyongera ku bari basanzwe, na bo bagenda bashumbushwa andi bitewe n’uko ayo bari bafite yashaje biturutse ku ko bayifashisha mu buzima bwabo bwa buri munsi.”

Anavuga ko kugeza ubu amagare atangirwa ubuntu, ku buryo abayakeneye badakwiye kuyabura. Icyakora, bayahabwa nyuma yo gupimwa n’abaganga babihuguriwe bagiye bari ku bitaro by’uturere, ari na bo bagena ingano y’amagare baba bakeneye kuko abantu bose badakenera angana.

Ati “Nk’uko iyo umuntu agiye ku isoko agiye kugura inkweto areba izikwiranye n’ikirenge cye, n’abafite ubumuga babanza gupimwa ngo harebwe ingano y’ayo bakeneye.”

Haherewe ku bipimo byoherejwe, amagare yatunganyijwe yoherezwa kuri farumasi y’akarere hanyuma akazahakurwa ashyirwa abo yasabiwe.

Yafotowe asana ipine ry’igare rye rishaje bituma ahabwa irishya

Nkurayija anavuga ko bidakwiye ko ababonetse bose batanga amagare ku bafite ubumuga, bitanyujijwe muri iyi nzira yo kubanza kubapima, kuko hari igihe umuntu yahabwa igare ryamwongerera ibibazo.

Aha atanga urugero rw’umwana udafite amaguru wahabwa igare rikwiriye umuntu mukuru, rishobora kumutera n’umugongo kuko ryatuma uruti rw’umugongo rwe ruhetama.

Asaba kandi abahabwa amagare y’inyunganirangingo kuyifashisha mu buzima bwabo bwa buri munsi, kugira ngo banabashe kwibeshaho, kuko ngo hari abo byagaragaye ko bayahabwa hanyuma bakayasiga mu rugo bakajya gusaba, bashaka gutera imbabazi abo basaba.