Blog

Nyampimga w’u Rwanda wa 2016, Miss Mutesi Jolly ari mu byishimo bikomeye nyuma yo kuzuza inzu nziza y’agatangaza.

Mu mashusho yagiye hanze agaragaza Miss Mutesi Jolly arimo atembera uyu muturirwa we ubona ko yishimye cyane.

Iyi nzu ifite byinshi bigezweho bivugwa ko yamutwaye agera kuri Miliyari y’amafaranga y’u Rwanda.

Iyo urebye iyi nzu y’umuturirwa ifite ubusitani bunini kandi bugezweho, pisine (piscine cg swimming pool), sauna, parikingi yo hejuru n’ibindi.

Nubwo itaruzura neza ubona ko imirimo yose nirangira izaba ari inzu nziza cyane.

View this post on Instagram

A post shared by ISIMBI TV (@isimbi__tv)

Iyi mpanuka yabaye ku wa 16 Nzeri 2025 saa Saba n'iminota 40 z'amanywa.

Itangazo rya RDF risobanura ko ari drone nto itagira abapilote y'Ingabo z'u Rwanda yakoreshwaga mu myitozo.

Riti 'Yataye inzira kubera ikirere kitari kimeze neza hanyuma ikorera impanuka mu Karere ka Rutsiro.'

Byasobanuwe ko muri iyi mpanuka, iyi drone yakomerekeje abanyeshuri batatu bari bavuye ku ishuri bataha mu rugo.

Babiri bahise bajya kuvurirwa ku Kigo Nderabuzima cya Kivumu, na ho uwa gatatu yajyanwe kuvurirwa ku Bitaro bya Murunda.

Riti 'Ingabo z'u Rwanda zirihanganisha imiryango y'aba bana bakomeretse ndetse zibabajwe n'ibibazo batewe n'iyi mpanuka.'

RDF kandi yavuze ko ikomeza gufatanya n'inzego z'ubuyobozi bw'ibanze n'abaganga kugira ngo abana bagize ikibazo bahabwe ubuvuzi bukwiye.

RDF yemeje ko itanga ubufasha bukenewe haba ku bana no ku miryango yabo.

RDF SMALL UNMANNED AERIAL VEHICLE ACCIDENT IN RUTSIRO DISTRICT pic.twitter.com/p3qGQcg4X2

— Rwanda Defence Force (@RwandaMoD) September 16, 2025

Abana bakomerekejwe na drone bari bavuye ku ishuri

Umwanzuro Inteko ya EU yatoye (2025/2861(RSP)) wo ku wa 11 Nzeri 2025, ugaragaramo ibirego byinshi ariko ugashimangira ko Ingabire Victoire watawe muri yombi muri Kamena 2025 afunzwe kubera impamvu za politiki.

Ingabire Victoire yatiwe igifungo cy'imyaka umunani mu 2010 akijuririye cyikuba kabiri biba imyaka 15. Yari akurikiranyweho ibyaha birimo gushyiraho umutwe w'abagizi ba nabi, guteza imvururu, kugirira nabi ubutegetsi buriho n'ibindi. Mu 2018 yahawe imbabazi na Perezida wa Repubulika.

Yongeye gutabwa muri yombi muri Kamena 2025, akurikiranyweho ibyaha birimo gushyiraho umutwe w'abagizi ba nabi, guteza imvururu, kugirira nabi ubutegetsi buriho, gukwirakwiza amakuru atari yo cyangwa icengezamatwara rigamije kwangisha Leta y'u Rwanda mu bihugu by'amahanga, gutangaza amakuru y'ibihuha, gucura umugambi wo gukora ibyaha byo kugirira nabi ubutegetsi buriho n'icyo kwigaragambya.

Minisitiri Amb. Nduhungirehe yabwiye Mama URWAGASABO TV ko atari ubwa mbere Inteko Ishinga Amategeko y'u Burayi itoye umwanzuro nk'uyu kuko ari ubwa gatatu kuko byabaye mu 2013, mu 2016 na 2025.

Ati 'Inteko y'Umuryango w'Ubumwe bw'u Burayi igomba gushingwa ibijyanye n'imibereho myiza y'Abanyaburayi. Bafite ibibazo bijyanye n'uburenganzira bwa muntu i Burayi, bafite ibibazo bijyanye n'umutekano mu mijyi imwe n'imwe mu Burayi, ni ibyo bari bakwiye kwitaho.'

'Iyi Nteko y'i Burayi igomba kumenya ko u Rwanda ari igihugu cyigenga, gifite ubwigenge kuva twakwipakurura ubukoloni bw'Abanyaburayi. Ntabwo Inteko y'u Burayi yivanga mu mikorere y'igihugu nk'u Rwanda gifite inzego, gifite n'urwego rw'ubutabera rwigenga.'

Yasobanuye ko ku byaha Ingabire Victoire aregwa kuri iyi nshuro agifatwa nk'umwere mu gihe atarabihamywa n'inkiko.

Ati 'Rero kugira ngo ize nk'iya Gatera ivuge ngo Victoire Ingabire urubanza ntirumeze neza, ngo arazira ko ari umunyapolitiki ngo tumufungure, ibyo harimo agasuzuguro na ya mitekerereze y'ubukoloni twipakuruye kera.'

Minisitiri Nduhungirehe yavuze ko u Rwanda na Komisiyo y'Umuryango w'Ubumwe bw'u Burayi bifitanye umubano mwiza n'ubutwererane n'izindi nzego nyubahirizategeko za EU, ndetse ngo imyanzuro yagiye itorwa n'Inteko y'uyu muryango nta na rimwe yigeze ibuza umubano w'impande zombi gukomeza gutera imbere.

Ati 'Ntabwo duha agaciro uwo mwanzuro nk'uko tutahaye agaciro indi myanzuro yatowe n'iyo nteko y'u Burayi.'

Inteko y'u Burayi ireba he uburenganzira bwa muntu buhohoterwa muri RDC igaceceka?

Minisitiri Nduhungirehe yagaragaje ko mu Burasirazuba bwa Repubulika Iharanira Demokarasi ya Congo Abanyamulenge bicwa, aho abarwanyi ba Wazalendo babahaye iminsi 10 ngo basubire mu Rwanda iwabo cyangwa bazahasige ubuzima.

Yasobanuye ko mu bice bitandukanye by'u Burasirazuba bwa RDC drone z'ingabo za Leta zatwitse inzu z'Abatutsi bo muri aka gace iyo Nteko irebera.

Ati 'Kugira ngo Inteko y'u Burayi ifunge amaso mu gihe uburenganzira bwa muntu burimo guhohoterwa mu Burasirazuba bwa Congo hanyuma ngo kubera ko hari umudepite ufitanye ubucuti n'umuryango wa Victoire Ingabire ngo bagiye gusohora umwanzuro kuri Victoire Ingabire. Ibyo ni ibintu bitangaje. Niba Inteko y'u Burayi ishishikajwe n'uburenganzira bwa muntu nisohore imyanzuro ivuga ibibazo bihari mu karere, ivuga ibibazo byo kutubahiriza uburenganzira bwa muntu mu Burasirazuba bwa Congo.'

Abarwanyi ba Wazalendo baherutse gukorera imyigaragambyo ikomeye mu mujyi wa Uvira mu ntara ya Kivu y'Amajyepfo, basaba ko Brig Gen Gasita Olivier wagizwe Umuyobozi wungirije w'akarere ka gisirikare ka 33 ushinzwe ibikorwa by'igisirikare n'ubutasi, asubira iyo yavuye kuko ngo ni Umunyarwanda. Byatumye ahunga uyu mujyi.

Uyu mutwe ukorana n'ingabo za FARDC urimo n'abana uhabwa intwaro na Leta ya RDC kugira ngo bajye kwica abo yita Abanyarwanda baba muri RDC.

Minisitiri Nduhungirehe yavuze ko Inteko ya EU ikwiye kuvuga ku bibazo byugarije u Burasirazuba bwa RDC niba koko iharanira uburenganzira bwa muntu

Ibicuruzwa byoherejwe mu mahanga biturutse mu Rwanda byageze kuri miliyoni 346.04$ mu gihe ibyo u Rwanda rwatumije mu mahanga byanganaga na miliyoni 1.247,39$ naho ibyo u Rwanda rwatumije hanze rukongera kubyohereza mu mahanga byanganaga na miliyoni 142,41$.

Raporo ya NISR igaragaza ko muri iki gihembwe cya kabiri ibyo u Rwanda rwohereje mu mahanga byagabanyutseho 35,64% ugereranyije n'ibyo rwohereje mu gihembwe nk'iki mu 2024 kuko byo byanganaga na miliyoni 537,64$.

Ibyo u Rwanda rwohereza mu mahanga kandi byagabanyutseho 28,03% ugereranyije n'igihembwe cya mbere mu 2025.

Ibyatumijwe mu mahanga muri iki gihembwe cya 2025 byagabanyutseho 20,50% ugereranyije n'igihembwe nk'iki cya 2024, bigabanyukaho 9,55% ugereranyije n'igihembwe cya mbere cya 2025.

Ibyo u Rwanda rwatumije mu mahanga rukongera kubyoherezayo byagabanyutseho 13,17% ugereranyije n'igihembwe cya kabiri cya 2024 icyakora bizamukaho 5,19% ugereranyije n'igihembwe cya mbere cya 2025.

NISR igaragaza ko ibicuruzwa byaje ku isonga mu gutumizwa mu mahanga byiganjemo imashini n'ibikoresho by'ubwikorezi byari bifite agaciro ka miliyoni 249,02$, ibiribwa n'amatungo bya miliyoni 224,67$, ibicuruzwa byo mu nganda bifite agaciro ka miliyoni 172,23$, ibikomoka kuri peteroli bya miliyoni imiti n'ibindi bifitanye isano na byo byatwaye arenga miliyoni 137,61$.

Ibihugu bitanu u Rwanda rwoherejemo ibicuruzwa birimo Leta Zunze Ubumwe z'Abarabu, Repubulika Iharanira Demokarasi ya Congo, u Bushinwa, u Bubiligi na Luxembourg.

Ibyo bihugu byoherejwemo ibicuruzwa bifite agaciro ka miliyoni 236,71$ bingana na 68,40% by'ibyo u Rwanda rwohereje mu mahanga.

Ni mu gihe RDC, Ethiopia, UAE, u Burundi n'u Budage ari byo bihugu bitanu bya mbere u Rwanda rwoherejemo ibyo rwari rwatumije mu mahanga.

RDC yihariye 94,55% by'ibicuruzwa u Rwanda rwatumije mu mahanga rukongera kubyoherezayo. Ibicuruzwa byinshi kurusha ibindi u Rwanda rwatumije mu mahanga rukongera kubyohereza mu bindi bihugu ni ibiribwa n'amatungo byari bifite agaciro ka miliyoni 51,62$ bigakurikirwa n'ibikomoka kuri peteroli, amavuta n'ibindi byari bifite agaciro ka miliyoni 31,94$.

U Bushinwa, Tanzania, u Buhinde na Leta Zunze Ubumwe z'Abarabu ni byo bihugu biza ku isonga mu byo u Rwanda rukuramo ibicuruzwa byinshi.

U Rwanda kandi mu gukorana n'ibihugu byo muri EAC muri icyo gihembwe rwohereje ibicuruzwa bifite agaciro ka miliyoni 16,06$ mu bindi bihugu bigize uyu muryango bingana na 18,69% by'ubucuruzi hagati y'uwo muryango.

Muri byo 46% byoherejwe muri Uganda bifite agaciro ka miliyoni 7,49$, u Burundi bukaba bwaroherejwemo ibicuruzwa bifite agaciro ka miliyoni 5,58$.

Muri rusange agaciro k'ibyo u Rwanda rwohereje muri EAC kazamutseho 53,63% ugereranyije n'igihembwe nk'icyo mu 2024.

Ubucuruzi bw'u Rwanda bwageze ku gaciro ka miliyoni 1.735$ mu gihembwe cya kabiri cya 2025

Byagarutsweho mu nama nyafurika yabereye mu Rwanda yahuje abahagarariye ibigo bifasha ibindi mu kunoza imitangire inoze ya serivisi ikishimirwa n'abakiliya Customer Experience mu bihugu bitandukanye bya Afurika izwi nka The Africa Customer Experience Leaders Forum 2025.

Yahurije hamwe abarenga 100 bahagarariye ibihugu 21 bya Afurika yateguwe na CX Touchpoints Rwanda Ltd.

Muri iyo nama yamaze iminsi ibiri, hagaragajwe ko gutanga serivisi nziza ari izingiro ryo kugera ku iterambere ndetse u Rwanda rugaragazwa nk'urugero rwiza rwo gutanga serivisi inoze, iterambere ryo guhanga udushya, gushyira mu bikorwa ingamba zo kunoza serivisi haba mu bikorwa by'ubucuruzi ndetse na Guverinoma.

Umuyobozi wa CX Touchpoints Rwanda, Nyinawumuntu Jeannette, yagaragaje ko Afurika ikwiye gushyira imbaraga muri gahunda zo kunoza serivisi zitangwa no mu rugendo rw'iterambere rirambye.

Ku munsi wa mbere w'Inama ya Africa CX Leaders Forum 2025 hibanzwe cyane ku gushaka ibisubizo bigendanye n'isoko rya Afurika, hashyirwa imbere uburyo bushya bwo gushyiraho imiterere ya Customer Experience ikwiriye ibihugu byo ku mugabane.

Ikindi cyasuzumwe ni uburyo bwo kubaka gahunda zinoze zigamije guha ishingiro ijambo ry'abakiliya mu bibakorerwa (Voice of the Customer (VoC), zifasha ibigo gusobanukirwa neza no gusubiza mu buryo buboneye ibitekerezo n'ibyifuzo by'ababagana.

Abitabiriye banagaragaje ko guverinoma zifite uruhare rukomeye mu gushyiraho uburyo bwiza bworohereza serivisi nziza abaturage, hifashishijwe urugero rw'u Rwanda, rukwiye kwigirwaho amasomo yimbitse ku buryo politiki na gahunda z'imiyoborere zishobora kuzamura uburambe bw'abaturage mu mitangire ya serivisi.

Hanabaye kandi ibiganiro bishingiye ku bushakashatsi ku myitwarire y'umuguzi muri Afurika, aho hatanzwe inama zifatika zigamije kongera icyizere n'ubudahemuka bw'abakiliya mu bigo by'ubucuruzi n'imiryango.

Dominic Wilhelm yagararagarije abitabiriye iyo nama kandi uburyo bwo gushyira imbaraga mu gukoresha ikoranabuhanga rya AI kuko rishobora gufasha ibigo byo muri Afurika guhora ku isonga mu mitangire ya serivisi nziza.

Impuguke Joan Ntabadde Kyeyune we yasabye abayobozi b'ibigo bishinzwe guteza imbere kwakira neza abakiliya mu bihugu bitandukanye kugira uruhare mu guhindura umuco wo kwakira ababagana cyangwa abakiliya mu bigo mu rwego rwo kongera ubudahemuka no kugirirwa icyizere.

Ku rundi ruhande, Dr. Lucy Kiruthu yasobanuriye abitabiriye uburyo bwo guhuza ingengo y'imari n'imishinga ifite ingaruka nziza ku bakiliya cyangwa abaturage.

Nyuma y'ibiganiro abo bayobozi banagize umwanya wo gusura urwibutso rwa Jenoside rwa Kigali ruherereye ku Gisozi bunamira abarushyinguwemo, asobanurirwa amateka yagejeje u Rwanda kuri Jenoside yakorewe Abatutsi, uburyo yahagaritswe ndetse n'urugendo rwo kongera kwiyubaka.

Abatanga serivisi basabwe kuzinoza

Ibihugu bya Afurika byasabwe kwigira ku Rwanda mu kunoza itangwa rya serivisi

U Rwanda rwagaragajwe nk’urugero rwiza

Akanyamuneza kari kose kuri aba bayobozi

Abitabiriye barashimiwe

Basuye Urwibutso rwa Jenoside rwa Kigali bunamira inzirakarengane zirushyinguwemo

Ubwo bari ku rwibutso rwa Jenoside rwa Kigali bafashe ifoto y’urwibutso

Mu gusoza inama habayeho no kwerekana umuco nyarwanda

Habayeho umwanya wo gucinya akadiho

Ibi yabitangaje mu kiganiro yagiranye na RBA, cyagarukaga ku mikoranire myiza hagati y'ibihugu byombi.

Abdourahman Ali yatangaje ko u Rwanda na Djibouti ari ibihugu bihuriye ku bintu byinshi birimo n'umuco, bikaba bikwiye kuba imbarutso yo kwagura imikoranire hagati y'abikorera, nk'uko Leta zombi zikorana bya hafi.

Yagize ati 'Dusanzwe dufatanya ariko dukwiye kurushaho kongera imikoranire nk'uko guverinoma zacu zifatanya. Kuki tutakwagura imikorere tukanayiteza imbere kurushaho?'

Ibi yabigarutseho nyuma y'uko u Rwanda na Djibouti bagiranye amasezerano y'ubufatanye mu 2016 mu rugaga rw'abikorera, aho bibandaga ku gukorera hamwe hagati y'impande zombi hagamijwe guteza imbere ubukungu.

Umubano mwiza hagati y'ibihugu byombi waranzwe no kugabirana ubutaka, aho u Rwanda rumaze guhabwa ubuso bungana na hegitari 60 ku byambu by'iki gihugu, mu gihe u Rwanda rwahaye iki gihugu izigera ku 10 mu gace kahariwe inganda.

Umuyobozi Mukuru wa Air Djibouti, Abdourahman Ali yasabye kwagura imikoranire hagati y’abikorera

Uyu muryango washinzwe mu 1995, utangira nk'igitekerezo gito mu muhora witiriwe Albert (Albertine Rift) nyuma uhinduka ijwi rikomeye muri Afurika.

Kugeza ubu ARCOS imaze kwagura ibikorwa byayo mu bihugu bitandukanye byo muri Afurika bifite imisozi miremire ya Afurika hagamijwe iterambere rirambye.

Umuyobozi Mukuru wa ARCOS akaba ari nawe wayishinze, Dr. Sam Kanyamibwa, yagaragaje ko kwizihiza imyaka 30 uyu muryango umaze ushinzwe bituma batushaho kugira umuhate wo kurengera ibidukikije ku Isi.

Ati 'Uyu munsi si uwo kwibuka gusa imyaka ishize, ahubwo ni ukwizihiza urugendo duhuriyeho rwerekana icyerekezo, kwihangana no gukorera hamwe. Turi mu gihe gikomeye, aho ihindagurika ry'ikirere n'iyangirika ry'urusobe rw'ibinyabuzima bisaba ibikorwa bishingiye ku bufatanye.'

ARCOS yashimiye abafatanyabikorwa bayo muri urwo rugendo rw'imyaka 30 barimo BK Foundation na Entreprise Multiservices Ltd (EMS), bazwiho ubwitange mu kubungabunga ibidukikije no guteza imbere abaturage.

Umuyobozi Mukuru wa BK Foundation, Ingrid Karangwayire, yavuze ko Banki ya Kigali yishimira ibikorwa bya ARCOS byo kubungabunga ibidukikije no guteza imbere abaturage ari yo mpamvu bahisemo gukorana.

Ati 'Intego yacu ni uguteza imbere impinduka n'imibereho myiza mu Rwanda kandi ibikorwa bya ARCOS ni urugero rw'ibyo twishimira gushyigikira, nk'ishami rya BK Group twishimiye kwizihizanya na ARCOS uyu munsi w'amateka.'

Umuyobozi Mukuru wa Enterprise Multiservices Ltd, Sabin Murererehe, avuga ko kuva batangira imikoranire na ARCOS mu 2020 umusaruro wiyongereye cyane mu kurwanya ibikorwa byangiza ibidukikije haterwa ibiti.

Ati 'Kuva twatangira gukorana mu 2020, twashoboye gutegura ingemwe z'ibiti bisaga miliyoni 10 yaba ibiribwa, ibivangwa n'imyaka ndetse n'iby'amashyamba.'

Mu myaka 30 ishize, ARCOS yageze kuri byinshi kandi byasize impinduka. Kuva mu 2021 kugeze 2025 imaze gutera ibiti bisaga miliyoni 14, hegitari 60.000 z'ubutaka bwangiritse ziri gusanwa, ingo zisaga 90.000 zifashwa na ARCOS mu kuzamura imibereho myiza y'abaturage.

Abagera ku 165.000 bamaze guhabwa imirimo binyuze mu mishinga yawo, ufite abakozi 245 ndetse n'abanyamuryango bagera ku 6,200.

ARCOS yagejeje ingengo y'imari ingana na miliyari 24,6 Frw mu 2025.

Uyu muryango washinze ikigega umusave gifite agaciro kangana na miliyari 1,2 Frw, gitera inkunga imishinga iciriritse igamije guteza imbere abaturage ndetse no kurengera ibidukikije.

Umaze gushinga ihuriro rya 'African NGO Alliance for Environmental Sustainability (ANAES)' mu 2023, rihuza imiryango 32 ikorera ku mugabane w'Afurika mu bikorwa byo kurengera ibidukikije no guteza imbere imibereho myiza y'abaturage.

Kugeza ubu ARCOS ifatanya n'amatsinda arenga 2.000 y' 'Inshuti z'Ibidukikije' agamije kurengera ibidukikije cyane cyane yimakaza uruhare rw'urubyiruko n'abagore.

Mu bijyanye n'uburezi, ARCOS ikorana na Kaminuza n'amashuri 350, muri gahunda yo guteza imbere imfashanyigisho zigamije ihame ryo kurengera ibidukikije n'iterambere rirambye. Iyi gahunda muri ayo mashuri imaze kugera ku banyeshuri barenga 140.000.

Umuyobozi Mukuru wa ARCOS akaba ari na we wayishinze, Dr. Sam Kanyamibwa, yagaragaje ko kwizihiza imyaka 30 uyu muryango umaze ushinzwe bibibutsa gukomeza kugira umuhate wo kurengera ibidukikije ku Isi

Umuyobozi Mukuru wa Enterprise Multiservices Ltd, Sabin Murererehe, avuga ko kuva batangira imikoranire na ARCOS mu 2020 umusaruro umaze wiyongereye cyane mu kurwanya ibikorwa byangiza ibidukikije haterwa ibiti

Umuyobozi Mukuru wa BK Foundation, Ingrid Karangwayire, yavuze ko biteguye Banki ya Kigali yishimira ibikorwa bya ARCOS byo kubungabunga ibidukikije no guteza imbere abaturage akaba ariyo mpamvu bahisemo gukorana