Blog

Mu gusoza amarushanwa y'imikino itandukanye yateguwe n'Ubuyobozi bw'Intara y'Amajyepfo mu bigo by'Amashuri yisumbuye, Guverineri Kayitesi Alice yashimangiye ko mu bigo by'amashuri harimo impano nyinshi zikwiye kwitabwaho kugirango zizatange umusaruro. Yasabye urubyiruko kugendera ku Ndangagaciro zikwiye Umunyarwanda, bagaharanira kwanga ibyaha bashorwamo. Asanga kandi aya marushanwa yarageze ku ntego Intara yari yihaye iyategura.

Aya marushanwa, yateguwe n'Intara y'Amajyepfo hagamijwe gukangurira abanyeshuri kwirinda ababashora mu byaha birimo; Gukoresha ibiyobyabwenge, Guterwa inda z'imburagihe, Icuruzwa ry'Abantu n'Inyigisho z'Ubuhezanguni ndetse n'ibindi byaha bigenda byiyongera uko bwije n'uko bucyeye.

Guverineri Kayitesi asoza aya marushanwa yagize ati' Nkuko bigaragara, dufite impano mu mashuri yacu zikwiye gukurikiranwa kugirango tubashe kuzifasha kuzamuka, ejo zizaheshe Igihugu cyacu imidari n'Ishema. Dutangira aya marushanwa twashakaga gukomeza kwigisha urubyiruko rwacu ruri mu mashuri kugirango narwo ruzigishe urundi ku bijyanye no kwanga ibyaha bakoreshwa n'abantu bakuru. Twabonye ko ubutumwa twashakaga gutanga bwabagezeho kuko benshi batunguwe n'icyaha cy'icuruzwa ry'Abantu kuko ibibazo byisnhi babajije byabaga bigishingiyeho batabyumva'.

Akomeza yemeza ko aya marushanwa azakomeza kuba ngarukamwaka kugirango hakomeze gutangwa ubutumwa bwo kwigisha abakiri bato indangagaciro na Kirazira zibakwiye kuko ejo heza h'Igihugu hashingiye ku bato. Ahamya kandi ko kubyumva bakabigira ibyabo bitanga icyizere ko hari urufatiro ruhamye rutegura ejo heza.

Umuyobozi w'Akarere ka Kamonyi, Dr Nahayo Sylvere yabwiye intyoza ko yishimiye kuba abanyeshuri baturutse mu karere ayobora bagahagarariye neza. Avuga ko impano bagaragaza zizakomeza kwitabwaho kugirango zizagirire Igihugu akamaro. Yemeza kandi ko nta gushidikanya, ubutumwa bwatanzwe bwo kwanga ibyaha abana babwumvise ndetse bazanabugeza hirya no hino.

Yagize ati' Mu mashuri yacu hari impano nyinshi zikwiye kwitabwaho kuko zafasha Igihugu kwitwara neza. Ndemeza ko ubutumwa bwatanzwe bwageze aho bwagombaga kugera kuko abakiri bato bakwiye kujya bamenya ibibazo bibugarije birimo n'ibyaha.  Barigishijwe mu bigo by'Amashuri ndetse no ku bibuga nta kabuza ko bwageze aho twashakaga, nabo bazabugeza aho bazajya kuko umwaka ugeze ku musozo'.

Gafaranga Egide wakurikiranye iyi mikino, yemeza ko impano zihari zinakwiye gukomeza gukurikiranwa kugirango zizatange umusaruro nyawo mu gihe kizaza. Yemeza ko imikino ihuza abanyeshuri ikwiye guhangwa amaso kuko hagaragaramo impano nyinshi zikwiye gukomeza guhabwa umwanya zikigaragaza.

Umuyobozi wa Federasiyo y'Imikino ihuza abanyeshuri, Gatete Innocent yemeza ko iri rushanwa nirikomeza gukinwa buri mwaka hazajya haboneka impano nyinshi zajya zitanga umusaruro mu makipe atandukanye y'Igihugu. Ahamya kandi ko hakwiye kubaho gukurikirana izi mpano kugira ngo zibyazwe umusaruro.

Amakipe yatwaye Ibikombe mu buryo bukurikira;

1. Athretism/Kwirukanka basiganwa

==========

Abahungu : NYARUGURU

Abakobwa : KAMONYI

2. Sitting Volleyball:

===============

HVP GATAGARA -Huye

3. Handball:

========

Abakobwa : GS KITABI -Nyamagabe

Abahungu : ES KIGOMA -Ruhango

4. BASKET BALL:

===========

Abakobwa : ENDP Karubanda -Huye

Abahungu : College St Marie Reine de Kabgayi-Muhanga

5. Volleyball:

==========

Abahungu: GS St Joseph — Muhanga

Abakobwa : College Indangaburezi -Ruhango

6. Football:

=========

Abakobwa : GS REMERA RUKOMA-Kamonyi

Abahungu : Ecose Musambira -Kamonyi

Akarere ka Kamonyi kashyikirijwe igikombe cyuko kahize utundi two mu ntara y'Amajyepfo.

Akimana  Jean de Dieu

Source : https://www.intyoza.com/amajyepfo-guverineri-kayitesi-yasabye-urubyiruko-kwitwararika-no-kwanga-ibyaha-rushorwamo/

Umunyezamu Bwanakweli Emmanuel na Ngendahimana Eric biravugwa ko bamaze kumvikana n’ikipe ya City of Lusaka FC yo muri Zambia.

Mu gitondo cyo kuri iki Cyumweru tariki ya 26 Kamena ni bwo umunyezamu wakiniye Police FC na Kiyovu Sports, Bwanakweli Emmanuel akaba yari muri Sunrise FC yerekeje muri Zambia aho yagiye kurangizanya na City of Lusaka FC.

Amakuru kandi avuga ko uyu mukinnyi atari we wenyine wifuzwa n’iyi kipe ahubwo na Eric Ngendahima wari usoje amasezerano ye muri Kiyovu Sports.

Aba bakinnyi bombi amakuru avuga ko kugira ngo babone iyi kipe ikina mu cyiciro cya kabiri babifashijwemo na Albert Mphande wahoze abatoza muri Police FC hano mu Rwanda.

Bwanakweli Emmanuel yamaze kugera muri Zambia

Ngendahimana Eric na we aravugwa muri Zambia

Source : http://isimbi.rw/siporo/article/abakinnyi-2-b-abanyarwanda-bashobora-kwerekeza-muri-zambia

Amarerero ni gahunda y'igihugu yashyizweho hagamijwe guteza imbere imikurire y'abana.

Ababyeyi bamaze kwitabira kujyana abana babo mu marerero bavuga ko batangiye kubona inyungu haba kuri bo ubwabo ndetse no ku bana babo.

Amarerero ari mu byiciro bine. Harimo azwi nka 'Home based ECDs', aho umubyeyi ashobora gushyiraho ahantu runaka abana bashobora kwigira maze bakahahurira bagahabwa uburere buboneye ariko ari mu rugo rw'umuturage.

Hari kandi 'Community Based ECDs' aho ibigo bitandukanye, imiryango itari iya Leta, amadini n'abandi bashobora gushyiraho irerero rizajya rifasha abana bato guhabwa uburere no kwitabwaho.

Uretse ayo marerero hari andi aboneka ku bigo by'amashuri bitandukanye ari byo bita School Based ndetse n'amarerero rusange (Center based ECDs) aho umurenge cyangwa akagali gashobora guhitamo ahantu runaka hazajya harererwa abana.

Yamuragiye Cecille, ni umwe mu babyeyi bafite abana muri rimwe mu marerero yo mu kagari ka Nyarusazi umurenge wa Bwishyura. Irerero ritaraza yaburaga aho asiga umwana we w'imyakata bigatuma ajya guca inshuro adatekanye.

Ati “Najyaga guca inshuro bikangora kubera ko nabaga muhetse, ariko aho namuzaniye hano, ndagenda ngakora akazi kanjye ntekanye nataha saa sita ngakora uturimo two mu rugo nkanabatekera, tukajya kumufata saa kumi”.

Uyu mubyeyi avuga ko gusiga umwana mu irerero biruta kumusigira umukozi wo mu rugo kuko umukozi wo mu rugo na we akenshi aba akiri umwana, mu gihe mu marerero hakoramo ababyeyi bakuze nabo bafite abana.

Ati 'Abakozi bo mu rugo ntabwo umuntu aba abizeye ku buryo wabasigira abana, nyine twarabagiraga ariko twajyaga mu kazi tudatekanye kubera no kutizera ingeso n'imico byabo'.

Nyiraruvugo Alphonsine, afite abana batandatu. Umwaka ushize nibwo yafashe icyemezo cyo kujyana umwana we mu irerero, mu gihe abana be bakuru barerwaga n'abakozi cyangwa bakarerwa na bakuru babo.

Ati 'Amarerero aradufasha ntabwo ari kimwe no kugumisha abana mu rugo kuko ubona umwana wanjye namuzanye hano mu rugo haza umuntu yamubona akiruka akajya kwihisha, ariko ubu asigaye ari umwana ushabutse. Iyo mu rugo haje umuntu aragenda akamusuhuza, akaza akambwira ngo hano haje umuntu ugusha.'

Ababyeyi kandi bavuga ko amarerero yafashije abana babo ku isuku kuko babyuka bakabikarabiriza bakabajyana mu irerero, mu gihe mbere umwana yirirwanaga n'umukozi cyangwa na bakuru be, akirirwa umunsi wose adakarabye.

Ubuzima bw'umwana mu irerero

Abana barererwa mu irerero bagerayo saa moya za mu gitondo, bagahabwa igikoma n'umugati, bakigishwa amasomo asanzwe yo mu ishuri, saa sita bagahabwa ifunguro rigizwe n'indyo yuzuye.

Kuva saa saba kugera saa cyenda baba baryamye , iyo babyutse barakina bakahabwa urubuto, saa kumi zuzuye ababyeyi babo bakaza kubafata.

Mu irerero ryo mu mudugudu wa Bwishyura ryitwa Itetero A, buri mubyeyi ufitemo umwana ahabwa umunsi wo kujya gufasha umurezi w'abana.

Uwo mubyeyi mu nshingano haba harimo gukorera abana isuku, no gufasha mwarimu wabo kuko bigoye ko umwarimu umwe yakwita ku bana 24 bafite bafite kuva ku myaka ibiri kugera kuri itatu.

Niyindebera Claudine, umwarimu w'abana bo mu irerero Itetero A avuga ko uretse kuba irerero rifasha mu gukangura ubwonko bw'umwana riganira uruhare mu kurwanya imirire mibi n'igwingira.

Ati 'Mu kwezi kwa cyenda umwaka ushize hano twari dufitemo abana bafite ikibazo cy'imirire mibi, babiri bari mu muhondo undi umwe yari mu mutuku. Uyu munsi bose bameze neza”.

Mu marero inshuke zihabwa indyo yuzuye zikagishwa amasomo y’ibanze azifasha gutinyuka

Ababyeyi bafite abana mu marerero basigaye bakora imirimo yabo nta gihugu kuko baba bizeye ko bazize umwana ahantu hatekanye

Gusigira abana b’inshuke abakozi bo mu ngo byabateraga igishyika

---

Source : http://igihe.com/amakuru/u-rwanda/article/karongi-uko-amarerero-yavunnye-amaguru-ababyeyi-bahoranaga-abana-ku-mugongo

Uyu munsi i Dar Es Salaam hari huzuye uruvunganzoka rw'abafana ba Yanga Africans bari bitabiriye umuhango wo kumurika igikombe cya shampiyona cya 28, Yanga SC iherutse kwegukana.

Ku munsi w'ejo Yanga yakomeje kwitwara neza muri shampiyona nyuma yo kunganya na Mbeya City igitego 1-1 kuri Stade Sokoine mu Karere ka Mbeya.Kugeza ubu ntiratsindwa muri shampiyona.

Igitego cya Yanga cyatsinzwe na Heritier Makambo ku munota wa 39 mbere y'uko Mbeya City yishyura ibifashijwemo na Joseph Ssemujju ku munota wa 50 kuri penaliti yavuye ku gukora umupira n'intoki kwa Bakari Mwamnyeto mu rubuga rw'amahina.

Umutoza wungirije wa Yanga, Cedric Kaze yagize ati: “Abakinnyi banjye bakwiriye gushimirwa kubera kwitwara neza muri uyu mukino wa shampiyona wari ukomeye cyane.”

Umunyamabanga wa Leta mu biro bya Perezida,Innocent Bashungwa yashyikirije igikombe kapiteni wa Yanga Bakari Mwamnyeto mu muhango muto wabereye kuri Stade Sokoine.

Perezida w'ishyirahamwe ry'umupira w'amaguru muri Tanzaniya (TFF) Wallace Karia, abayobozi b'Inama y'Ubutegetsi ya Tanzaniya ndetse n'abayobozi b'akarere ka Mbeya bitabiriye umuhango wo gutanga igikombe cyanagaragayemo abakinnyi ba Yanga n'abayobozi bayo bahabwa imidari ya zahabu kubera gutwara igikombe cya shampiyona.

Yanga Africans yatwaye igikombe ubu ifite amanota 71 mu gihe habura umukino umwe ngo shampiyona irangire mu gihe Simba SC ya Kabiri ifite amanota 60 nubwo ifite imikino 2.

Mi mikino 29 imaze gukina,Yanga yatsinze 21,inganya 8 mu gihe itaratsindwa na rimwe.

Source : https://umuryango.rw/imyidagaduro/imikino/article/yanga-africans-yakiriwe-n-uruvunganzoka-rw-abafana-bayo-bishimiraga-igikombe

Gen.Chico Tshitambwe wari umuyobozi w'abajepe barinda Perezida Tshisekedi wari woherejwe kurandura M23 , nyuma yo gutsindwa kwa Gen. chirumwami, yarasiwe kurugamba ataramara iminsi ibiri.

Gen Chico yarashwe akaboko mu gihe yari amaze iminsi ibiri ageze ku rugamba,isoko y'amakuru ya Rwandatribune dukesha iyi nkuru ivuga ko uyu mu jenerali yarasiwe mu mirwano yabereye mu gace ka Rutshuru muri gurupoma ya Bweza mu ntambara ihanganishije ingabo za FARDC na M23 muri aka gace ka Rutshuru.

Nk'uko bivugwa Gen Chico yari yoherejwe gufatanya na Gen Chirumwami kuyobora ibikorwa bya operasiyo Sokola II,umwe mu bayobozi ba Sosiyeti sivile yo muri gurupoma ya Bweza yabwiye Rwandatribune ko abarwanyi ba M23,bashakaga gufata mpiri uyu mu Jenerali kubera amagambo yakunze kuvuga yerekana ko ariwe uje kurangiza ikibazo cya Bunagana.

Mbere Yuko Gen.Chico aza muri Kivu y'amajyaruguru yagiye atanga impuruza kuri M23 avuga ko aje kubarimbura akabahamba I Bunagana,abasesenguzi bakomeje kwibaza ahazaza h'igisilikare cya Congo cyakunze kugaragaza intege nke mu kurandura imitwe irenga magana abiri yitwaje intwaro ibarizwa muri iki gihugu.

Si ubwambere uyu mutwe w'inyeshyamba uciye intege ingabo za Leta FARDC kuva ubwo izingabo zatsindwaga n'izi nyehyamba zikamburwa ikigo cya Rumangabo.

Nyuma izi ngabo zaje kwamburwa umugi wa Bunagana ndetse n'ibikoreho byabo bya gisirikale.ubwo imbunda zikomeye za FARDC zirimo n'ibifaru byagiye mumaboko y'M23.

Source : https://umuryango.rw/amakuru/mu-mahanga/umutekano/article/gen-chico-ushinzwe-abarinda-tshisekedi-yarashwe-na-m23-yari-yarahiriye

Nk’uko byari biteganijwe ku isaha ya saa 17:00 imiryango ya BK Arena yabereyemo iki gitaramo yari ifunguye ndetse abantu batangiye kwinjira, gusa mu masaha ya saa moya zishyira saa mbiri ni bwo abanyabirori batangiye gushyushywa mu muziki uvangavanze wa Dj Ira.

Ku isaha ya saa 20:13 Chris Eazy yageze ku rubyiniro aririmba mu buryo bwihuse indirimbo ze zirimo “Fasta”, “Amashu” na “Inana”, mu minota micye yari asoje ariko yayikoresheje neza kandi agaragarizwa urukundo rwo hejuru.

Ku isaha ya 20:36 ni bwo Dj Toxxyk yatangiye kuvangira abantu umuziki muri bwa buryo bukundwa n'abatari bacye maze abantu si ugukaraga umubyimba karahava.

Saa 20:42 Okkama yinjiye mu mwambaro w'igisarubeti aririmba indirimbo 'Iyallah' akomereza kuri 'Puculi'. Ubwo yatangiraga kuririmba 'No', yasabye abantu gucana amatoroshi za telefone ubundi bararirimbana ijambo ku rindi.

Ku isaha ya 21:00 ni bwo Dj Neptune yatangiye kuvangira umuziki abanyabirori, maze saa 21:26 ahamagara Afrique aririmba indirimbo ze zirimo ‘Rompe’, ‘Agatunda’ n'izindi.

Ku isaha ya 21:33 Afrique akimara kuvaho yasimbuwe na Fave ukunzwe cyane mu ndirimbo zirimo 'Beautifully' ageze ku yitwa 'Baby Riddim' biba ibindi kuko abakunzi b'umuziki we n'abanyabirori muri rusange baririmbanaga nawe ijambo ku rindi.

Saa 21:54 ni bwo Ariel Wayz yatangiye kuririmba ahera ku yitwa 'Good Luck' aherutse gusohora na 'Your Love'. 

Ku isaha ya saa 22:01 hakurikiyeho Kenny Sol wakiriwe neza n'abafana mu ndirimbo yinjiriyemo ikunzwe na benshi kuva yasohoka yitwa 'Haso'.

Yakurikijeho iyo aheruka gushyira hanze yitwa 'Joli'. Nubwo imaze iminsi micye ntibyabujije abantu kuyiririmbana nawe akantu ku kandi maze asaba abafana gusubiramo nawe izina Dj Neptune waje kumufasha ari nawe warimo ashyushya iki gitaramo.

Dj Neptune yagaragaje ubuhanga mu kuyobora ibitaramo no mu kuwuvanga yishimirwa n'abafana byo ku rwego rwo hejuru.

Kenny yakurikiwe na Nasty C wagaragaje ubuhanga bukomeye, yerekwa urukundo by’akarusho mu ndirimbo 'Particular' ya Patoranking ariko ari mu bo bayisubiranyemo.

Ageze ku yitwa 'SMA' yakoranye na Rowlene byahinduye isura kuko buri umwe wabonaga ko avuye hasi akajya ibicu. Mu gusoza yahaye abantu 'Freestyle' azamura amarangamutima ya benshi banajyaniraga nawe yongera gushimangira ko ari mu baraperi ba mbere muri Africa.

Dj Neptune yabwiye abanya Kigali ko yakunze ukuntu ari abanyabirori mbere yuko ahamagara ku rubyiniro Bushali waje yambaye imyambaro y'indwanyi za cyera ifite n'umwitero w'umutuku. Bushali yabyinishije abantu karahava mu ndirimbo zirimo 'Mukwaha' no 'Ku gasima'.

Saa 22:38 Bushali yahamagaye Juno Kizigenza baherutse gukorana indirimbo yitwa 'Kurura' maze banafatanya kuririmbana 'Kinyatrap'.

Ku isaha ya saa 22:45 ni bwo Khaligraph Jones yahamagawe ku rubyiniro maze ahereza abanyarwanda imirongo ya Rap. Nubwo ari mu baraperi bazwiho kugira imiraperi yirukanka, ntibyabujije abanyabirori bari bitabiye igitaramo cya Chop Life Kigali kugaragaza ko bishimye kandi abenshi ukabona bajyana nawe.

Ubwo Khaligraph Jones yari ari ku rubyiniro, Made Beat yazamutse arahamusanga mbere gato y’uko Bruce Melodie aza kumukorera mu ngata bakaririmbana “Sawa Sawa” baheruka gukorana. 

Khaligraph yavuze ko yishimiye kugera bwa mbere mu Rwanda maze atura abitabiye iki gitaramo indirimbo y'Imana agaragaza ko yishimye.

Ku isaha ya saa 22:55 ni bwo Bruce Melodie yageze ku rubyiniro bafatanya kuririmba 'Sawa Sawa', abakunzi babo babafasha kuyiyirimba bafashijwe na Dj Ira wabavangiraga umuziki.

Bruce Melodie yagumye ku rubyiniro ariko afatanya n'abakunzi be kuririmba indirimbo ze kuva ku ya mbera kugera ku ya nyuma. Baririmbanye by'umwihariko “Saa moya”. Bruce Melodie yeretswe urukundo rwo hejuru.

Ku isaha ya 23:21 ni bwo Ladipoe yatunguranye ku rubyiniro aririmba zimwe mu ndirimbo ze zikunzwe zirimo “Running” yakoranye na Fireboy, “Know You” yakoranye na Simi, “Feeling” yakoranye na Buju kimwe na “Afro Jigga” yafatanije na Rema.

Iki gitaramo cyashyizweho akadomo na rurangiranwa Tekno waririmbye iminota itari myinshi ariko anyura abakunzi be batari bacye nk’uko byigaragaje mu ndirimbo zirimo ‘Pana’ na ‘Buga’ yakoranye na Kizz Daniel iyoboye izindi muri Nigeria no mu bice bitandukanye by’isi.

Tekno ni we wasoreje abandi bahanzi bose

   

Khaligraph Jones yavuze ko ari ubwa mbere ageze mu Rwanda ariko yabyishimiye

Sherrie Silver ari mu bitabiriye

Minisitiri Aurore Mimosa Munyagaju yihereye ijisho Chop Life Kigali

Bruce Melodeie yongeye gushima abanyarwanda uburyo badahwema kumwereka urukundo

Bushali yaserutse mu myambarire y’ingabo za cyera

Nasty C yashimangiye ko ari mu baraperi bakomeye ku isi

Kenny Sol yereswe urukundo rwo hejuru nawe ashimangira ko ashoboye

Ariel Wayz yaririmbye indirimbo zitandukanye zirimo n’iyo aherutse gukora yitwa ‘Good Luck’ 

Dj Neptune yagaragaje ubuhanga bukomeye mu kuyobora ibitaramo no kuvanga umuziki

Fave yaririmbye indirimbo ze zikunzwe nka ‘Beautiful’ ahagurutsa abanyabirori

Afrique ni umwe mu bahanzi nyarwanda bishimiwe

Dj Toxxyk yavanze umuziki abafana barawucinya karahava

Dj Ira niwe wabimburiye abandi ku rubyiniro

Chriss Eazy yahagurukije BK Arena nubwo yaririmbye iminota mbarwa

Okkama yashimishije abafana karahava

Dj Dizzo uheruka kugaruka mu Rwanda nyuma yo guteranyirizwa ubufasha bw’amafaranga kubera uburwayi nawe yitabiriye

Ladipoe yatunguranye 

AMAFOTO: Sangwa Julien – InyaRwanda.com 

Source : https://inyarwanda.com/inkuru/118467/ladipoe-yatunguranye-umuziki-nyarwanda-utigisa-arena-akantu-ku-kandi-ku-gitaramo-cya-chopl-118467.html

Source : https://www.kigalitoday.com/amakuru/amakuru-mu-rwanda/article/muhanga-hari-abagiheka-mu-ngobyi-bagakora-ingendo-ndende-bajya-kwa-muganga

Mu gikorwa cyo kwibuka ku nshuro ya 28 Jenoside yakorewe Abatutsi ku bari abakozi ba Leta bishwe muri Jenoside, abakozi bitabiriye 'Kwibuka' basabwe gutanga serivisi nziza, kwirinda amacakubiri n'ingebitekerezo mbi ikomoka ku moko yatumye Jenoside ikorerwa abatutsi, aho abasaga miliyoni 1 bishwe mu gihe gito. Ibi, babisabwe ubwo hibukwaga Abatutsi bahoze bakorera Leta mu cyahoze ari Perefegitura ya Gitarama.

Perezida w'Umuryango Uharanira inyungu z'Abarokotse Jenoside yakorewe Abatutsi (Ibuka) mu karere ka Muhanga, Rudasingwa Jean Bosco, avuga ko uwabuze uwe muri Jenoside ntacyo wamuha ngo uwagiye agaruke. Avuga ko abibukwa bishwe na bagenzi babo bakoranaga ndetse n'abo bahaga Serivise.

Yagize ati' Uwabuze uwe ntacyo wamuha ngo kimusimbure kuko yarafatiye runini abo mu muryango we. Dukwiye kwibuka ko aba bishwe batanga serivisi kuko bose bari bafite ibyo bakorera Leta. Dukwiye kurenga aya mateka mabi yo kwicwa n'abo bahaga serivisi ndetse na bagenzi babo bakoramaga bakagombye kuba barabarinze'.

Akomeza yemeza ko ubukana bw'amateka ya Jenoside ntaho twabuhungira ndetse akemeza ko abishwe bari abakozi bafashaga imiryango yabo kubaho. Asanga hakwiye gukosorwa amateka mabi yanyuzwemo hakimakazwa gukora amateka meza yo kuzaraga abana bacu bavutse n'abazavuka, bakerekwa icyo twigiye ku ivangura risharira twaciyemo igihe kirekire, bagakangurirwa gutanga serivisi nziza zo gukosora amateka mabi.

Nsengiyumva Daicola ufite abe yibuka bahoze bakorere Leta mu cyahoze ari Segiteri Ruli, yavuze ko ashimira Leta y'u Rwanda yashyizeho umwanya wo kujya bibuka Abavandimwe, Ababyeyi, Abana n'Inshuti zabo bishwe muri Jenoside yakorewe Abatutsi.

Avuga ko ajya atekereza ko azongera kubonana n'abo nkuko bigishwa ko bazabona Yezu Kirisitu nawe wapfuye urupfu rusa nk'urwabo. Avuga ko bahungiye i Kabgayi, ko abakoreraga Leta benshi bibukwa abazi kuko babatwaraga abareba bakajya kubica. Asaba kurenga amateka mabi yatumye Abatutsi bicwa urupfu rubi ntacyo bakoze.

Ashima ndetse agasaba buri wese Gushima ingabo z'Igihugu zahoze ari iza FPR-Inkotanyi bakoze akazi gakomeye cyane kugirango barokore Abatutsi bicwaga, aho nta cyizere bari bafite cyo kubaho, bumva ko bamaze gupfa.

Umuyobozi w'Akarere ka Muhanga, Kayitare Jacqueline yemeza ko abakozi b'Akarere b'ubu bakwiye kusa neza ikivi cyatangiwe na bagenzi babo bishwe muri Jenoside, bakicwa bazira uko bavutse kandi bakicwa na bagenzi babo bakoranaga ndetse bakicwa n'abazaga kubasaba serivisi. Asanga kandi Abarokotse Jenoside bakwiye kwegerwa kugira ngo bafashwe komorwa ibikomere bagendana bitarakira. Yemeza ko icyizere gihari ko nta munyarwanda uzongera gufata umuhoro ngo ateme mugenzi we.

Agira kandi ati' Igihugu cyacu cyanyuze mu bihe bikomeye by'ivangura no gucamo ibice abantu. Ntabwo bizongera kuko Leta yacu idushakira icyiza, tukaba umwe tukirinda amacakubiri ndetse tukagira ubumuntu tukirinda ibibi byadushora mu bibazo byatuma twicana. Ibikorwa byo kwibuka abacu dukora ntabwo tubikora ku bw'umuhango cyangwa umugenzo, ahubwo ni igikorwa cyo kwamagana abagize ubunyamaswa bakica abacu muri Jenoside yakorewe Abatutsi, bakica abavandimwe bacu'.

Kwibuka ku nshuro ya 28 abahoze ari abakozi ba Leta bishwe muri Jenoside mu karere ka Muhanga, hibukwa abatutsi 43 bamaze kumenyekana bakoraga mu cyahoze ari Perefegitura ya Gitarama, harimo abo muri Komini ya Nyamabuye, Mushubati, Buringa Nyakabanda, Nyabikenke, Rutobwe, bose bazize Jenoside yakorewe Abatutsi mu Rwanda 1994. Abarokotse Jenoside hamwe n'Ubuyobozi, basaba abazi abandi batarashyirwa ku rutonde kubavuga bakajya bibukirwa hamwe n'abandi.

Akimana Jean de Dieu

Source : https://www.intyoza.com/muhanga-kwibuka28-abakozi-ba-leta-basabwe-kwirinda-amacakubiri-bagatanga-serivise-nziza/

Nyuma y’imyaka 5, Rwamagana City FC yazamutse mu cyiciro cya mbere mu mupira w’amaguru mu Rwanda, ni nyuma y’uko yatsinze Interforce FC ibitego 2-1 mu mukino wa 1/2 wo kwishyura.

Gutsinda uyu mukino wabereye mu Bugesera kuri iki Cyumweru byatumye Rwamagana City izamuka ku giteranyo cy’ibitego 4-1 mu mikino yombi, yaherukaga mu cyiciro cya mbere 2016.

Ku mukino wa nyuma usoza Icyiciro cya Mbere uzaba ku wa Gatatu, tariki ya 29 Kamena 2022, Rwamagana City FC izahura na Sunrise FC yasezereye Vision FC.

Aya makipe yombi yazamutse, yasimbuye Etoile de l’Est na Gicumbi FC zasubiye mu Cyiciro cya Kabiri nyuma yo gusoreza mu myanya ibiri ya nyuma mu mwaka w’imikino wa 2021/22.

Vision FC na Interforce FC zizakinira umwanya wa gatatu mu mukino uzabanziriza uwa nyuma ku wa Gatatu saa Sita n’igice i Nyamirambo.

Rwamagana City yagarutse mu cyiciro cya mbere

Source : http://isimbi.rw/siporo/article/nyuma-y-imyaka-5-rwamagana-city-yagarutse-mu-cyiciro-cya-mbere

Perezida Paul Kagame yashimye abitabiriye inama ya CHOGM baturutse hirya no hino ku isi ndetse n'inzego zitandukanye zirimo n'iz'umutekano zakoze akazi gakomeye kugira ngo iyi nama y'Abakuru b'Ibihugu na za Guverinoma zo muri Commonwealth (CHOGM) yaberaga i Kigali igende neza.

Mu butumwa Perezida Kagame yanyujije kuri Twitter, yashimiye abitabiriye iyi nama, yemeza ko ari ishema kuba u Rwanda rwarakiriye Abakuru b'Ibihugu na za Guverinoma.

Ati 'Ndashimira abantu 4000 twabanye muri #CHOGM2022. Ku bayobozi bagenzi banjye, byari iby'agaciro kubakira mwese mu Rwanda ndetse no kongera gushimangira intego dusangiye yo guharanira kugeza abaturage b'umuryango wa Commonwealth ku hazaza harangwa n'uburumbuke ndetse no kwihesha agaciro. Mwese turabifuriza urugendo ruhire no kugera mu rugo amahoro.'

Yakomeje ashima inzego zose zabigizemo uruhare ngo CHOGM igende neza.

Ati 'Ndashimira abafashije mu gutegura iyi nama bose, abashinzwe umutekano barinze abantu bose, abakozi hirya no hino ahaberaga inama zitandukanye, hamwe n'Abanyarwanda bose bitanze kugira ngo #CHOGM2022 igende neza! Ndabashimiye cyane, mwahesheje ishema igihugu!”

Iyi nama ya CHOGM yasojwe kuri uyu wa Gatandatu n'Umwiherero w'Abakuru b'Ibihugu byari byitabiriye hanyuma hafatwa umwanzuro wo kongera Togo na Gabon muri Commonwealth ndetse no kongerera manda Umunyamabanga Mukuru wa Commonwealth, Patricia Scotland.

Abitabiriye inama ya CHOGM by'umwihariko abayobozi batandukanye bashimiye u Rwanda intambwe ikomeye rwateye nyuma yo kuva muri Jenoside yakorewe Abatutsi igahitana abarenga miliyoni.

Source : https://umuryango.rw/amakuru/mu-rwanda/politiki/article/perezida-kagame-yashimiye-abitabiriye-chogm2022-n-inzego-z-umutekano-zatumye