Blog

Nicyo gitaramo cya mbere uyu muhanzi agiye gukorera i Kigali, nyuma y'imyaka itatu. Ariko yataramiye mu bindi bihugu, cyane muri Uganda.

Aherutse kwifata amashusho yemeza gutaramira i Kigali. Ahagana saa sita zo kuri iki Cyumweru tariki 31 Nyakanga 2022, nibwo yageze ku kibuga cy'indege Mpuzamahanga cya Kigali i Kanombe.

Yakiriwe n'abarimo Bundandi Nice wafatanyije na Nkusi Arthur gushinga Arthur Nation, ari nayo itegura ibi bitaramo ngarukakwezi.

Iki gitaramo giherekeza Nyakanga, kiratangira saa kumi n'ebyiri kuri M Hotel mu Kiyovu. Cyatumiwemo Rufendeke, Captain Regis, Merci, Ambassador w’abakonsomateri ndetse na Joshua. Kwinjira ni 10,000 Frw mu myanya isanzwe, ndetse na 20,000 Frw muri VIP.

Kuwa Gatatu tariki 6 Nyakanga 2022, yanditse kuri konti ye ya Instagram akurikirwaho n'abarenga ibihumbi 156 avuga ko yari akumbuye gutaramira Abanyarwanda, nyuma y'igihe kinini cyari giciyeho.

 

Avuga ko afite inkuru nyinshi zo guteraho urwenya, ariko kandi aragenzwa no gusaba imbabazi. Ati 'Kigali, hari haciye igihe. Mfite ibiraro byo gusiba, munyihanganire. Mfite gusaba imbabazi, ariko icy’ingenzi ni ibitwenge. Ntegereje kugaruka mu rugo.'

 

Aravuga gusaba imbabazi, kuko ku wa 5 Mata 2019 ku mbuga nkoranyambaga hakwirakwijwe amashusho ye aho yumvikanye atera urwenya ku Rwanda, akanakoreshamo ijambo Jenoside.

 

Salvador yateye urwenya avuga uburyo abantu bakirwa iyo bagiye muri kompanyi z'indege, z'ibihugu bitandukanye. Yavuze ko abakora mu ndege babanza gutanga amabwiriza mu rurimi rwabo kavukire, nyuma bagakurikizaho urw'amahanga.

 

Uyu mugabo yavuze kompanyi z'indege zitandukanye, ageze kuri RwandAir asukiranya amagambo menshi yo kuramukanya harimo n'ataba mu Kinyarwanda agera n'aho ashyiramo ijambo 'Jenoside.'

 

Icyo gihe, abakoresha imbuga nkoranyambaga cyane cyane Twitter ntabwo banyuzwe na gato n'uburyo Salvador yakoresheje ijambo Jenoside, mu magambo akoreshwa mu ndege ya RwandAir kandi ntaribamo, bifatwa nko gushinyagura.

Bahise bashyiraho Hashtag ya #GenocideIsNotComedy, ndetse banamusaba ko yavuguruza ibyo yavuze akanabisabira imbabazi.

Mu butumwa yanyujije kuri Twitter ku wa 6 Ukwakira 2019, Salvador yasabye imbabazi avuga ko yari yatinze kuzisaba kubera abamubwiye nabi.

Salvador aheruka i Kigali muri Seka Fest yo kuya 31 Werurwe 2019. Ni umunya-Uganda kavukire. Yakuriye ahitwa Ombokolo mu birometero bike uvuye mu Mujyi wa Kampala. Agace yavukiyemo akunze kukagarukaho cyane, mu biganiro by'urwenya akorera ahantu hatandukanye.

 

Umunyarwenya Salvador yageze i Kigali yitabiriye igitaramo cy'urwenya cya Seka Live giherekeza Nyakanga

 

Salvado ku kibuga cy'indege Mpuzamahanga cya Kigali yakiriwe na Budandi Nice

 

Salvado ni umunyarwenya, umukinnyi wa filime, wanakoze mu itangazamakuru ari umukozi wa 91.3 Capital FM

AMAFOTO: Ndayishimiye Nathanie-INYARWANDA.COM

Umwe mu bacuruzi bakomeye cyane muri Ukraine hamwe n'umugore we biciwe mu gitero 'gikaze' cy'ibisasu cy'Uburusiya ku mujyi wo mu majyepfo wa Mykolaiv.

Oleksiy Vadatursky, wari ufite imyaka 74, n'umugore we Raisa, bapfuye ubwo igisasu cya misile cyakubitaga ku rugo rwabo mu ijoro ryo ku wa gatandatu, nkuko byavuzwe n'ibitangazamakuru byo muri Ukraine.

Vadatursky yari afite kompanyi y'ubuhinzi ya Nibulon ikora mu byo kohereza ibinyampeke mu mahanga. Yari yaranahawe igihembo cy’'Intwari ya Ukraine'.

Umukuru (Mayor) w'umujyi wa Mykolaiv, Oleksandr Senkevych, yavuze ko iki gitero cy'ibisasu gishobora kuba ari cyo cya mbere gikaze cyane Uburusiya bugabye kuri uyu mujyi kugeza ubu.

Mu ijoro ry'uyu wa Gatandatu tariki 30 Nyakanga 2022, abanya-Kigali biganjemo urubyiruko rw'abanyeshuri bari bakoraniye muri BK Arena mu gitaramo 'Tayc in Live'.

Nicyo gitaramo kinini urebye mu byari biteganyijwe kuba mu kwezi kwa Nyakanga. Cyaramamajwe karahava, uko bucyeye n'uko bwije hagatangazwa amakuru ajyanye nacyo.

Urutonde rw'abahanzi byari byitezwe ko baririmba muri iki gitaramo, rwatumye benshi bihutira kugura amatike byikomezwa n'igikundiro Tayc afitiwe mu Rwanda binyuze mu ndirimbo ze ziri mu rurimi rw'Igifaransa.

Ni kimwe mu bitaramo Tayc akoze bihendutse ugendeye ku biciro by'ibindi bitaramo uyu muhanzi azaririmbamo, kugeza umwaka urangiye.

Ni cyo gitaramo kandi atagaragaje mu mashusho y'indirimbo 'Sans effet' aherutse gusohora y'ibyo azakora.

Cyaririmbyemo Kivumbi King, Kenny K Shot, Seyn, Christopher ndetse na Ruti Joel. Ni mu gihe abahanzi Nel Ngabo, DjPius na Kevin Kade batabashije kuririmba.

Bisa n'aho umwanya (igihe) bari kuririmbiraho cyahariwe umuhanzikazi wo mu Bufaransa, Ocevne ndetse na Dj wamaze umwanya munini acuranga. Ariko kandi Tayc yari yasabye ko ahabwa umwanya uhagije ku rubyiniro.

Ahagana saa yine n'iminota 54' nibwo Ocevne yageze ku rubyiniro, yambaye agakubutura kagaragaza amatako.

Uyu mukobwa yaririmbaga aganiriza abafana b'i Kigali, yumvikanisha ko ari iby'icyubahiro kuba yabashije kuririmba mu gitaramo cya mugenzi we Tayc.

Hari amashusho Tayc yashyize kuri konti ye ya Instagram mu gitondo cyo ku wa gatandatu agaragaza ari kumwe n'uyu mukobwa muri siporo, mu mihanda yageranye na Marriot Hotel aho bacumbitse kuva bagera i Kigali.

Yanagaragaje kandi amashusho bari mu myitozo ngororamubiri bakorera muri 'Gym'.

Ibinyamakuru bitandukanye byo mu Bufaransa, bivuga ko uyu mukobwa yagize izina rikomeye binyuze mu ndirimbo ze zirimo nka 'Mauvais Rôle”, 'Dégainer”, “Last Time” n'izindi zitandukanye.

Ni umukobwa w'umuhanga uririmba agaragaza ingufu ku rubyiniro, akamenya kuganiriza abo aririmbira, kandi agahuza neza n'abamucurangira.

Konti ye ya Instagram igaragaza ko ari umuhanzi ubarizwa mu inzu ifasha abahanzi ya Bosse Management [H24], ahuriyemo n’abarimo Barack, Tayc, Lefa, Titai, Guevn, na Lylah.

Uyu mukobwa afitanye indirimbo na Tayc yitwa ‘Last Time’ imaze amezi atandatu isohotse, ari nayo yarebywe cyane. Yaririmbye i Kigali nyuma y’uko hashize ukwezi kumwe asohoye indirimbo yise ‘Mauvais rôle’. Ocevne yatunguranye mu gitaramo ‘Tayc live in Kigali’, dore ko atari ku rutonde rw’abagombaga kuririmbamo Ocevne yaririmbye akanyuzamo agakaraga umubyimba bikizihira benshi. Ni umukobwa ukiri muto mu myaka, utanga icyizere mu muziki 

Ocevne yagaragaje ko yanyuzwe no gutaramira i Kigali ahawe umwanya na mugenzi we bahuriye muri Label Mu gitaramo hagati Tayc yikuye ishati anezeza abanya-Kigali barenga ibihumbi icyenda barebye igitaramo cye 

Tayc yaririmbye yimenaho amazina y’uruganda rw’i Nyange ari nako ayatera mu bari begereye urubyiniro

Tayc yahamagaye ku rubyiniro Ocevne baririmbana indirimbo yabo bise ‘Last Time’ yatumye uyu mukobwa amenyekana cyane 

Tayc ni umubyinnyi w’umuhanga…. Afite impamvu yamaze igihe kinini abyiga mu ishuri 

Umutima wishimye kuri Tayc nyuma yo gukora andi mateka mu rugendo rw’umuziki we Tayc yateraga indirimbo akajya mu bafana kumva ko bafatanyije nawe kuririmba 

Tayc yambaye ibendera ry’u Rwanda, agaragaza ko yanyuzwe

     

Christopher yaririmbye asiganwa n’igihe ku buryo zimwe mu ndirimbo ze yaziciyemo 

Uyu muhanzi yaririmbye nyinshi mu ndirimbo ze zo ha mbere zirimo nka ‘Byanze’, ‘Ndabyemeye’ n’izindi

KANDA HANO UREBE AMASHUSHO Y'INDIRIMBO 'LAST TIME' YA OCEVNE NA TAYC

 “>

AMAFOTO: Shemainnocent12

Nyuma y’imyaka 2 itaragenze neza muri APR FC kugeza aho anahagaritswe, rutahizamu Jacques Tuyisenge yateye umugongo Police FC asinyira AS Kigali.

Uyu mukinnyi w’ikipe y’igihugu Amavubi, yinjiye muri APR FC muri 2020 aho yayisinyiye imyaka 2 ariko ikaba itaragenze neza.

Yaranzwe n’imvune nyinshi aho akirukiye ntiyahiriwe nabwo kuko muri Werurwe 2022 afashe icyemezo cyo kuva mu mwiherero w’iyi kipe nyuma yo kutishimira uko yari afashwe n’umutoza Adil Erradi, APR FC nayo yahise imuhagarika kuva icyo gihe kugeza shampiyona irangiye nta mukino n’umwe yigeze akina.

Uyu rutahizamu wari waganirijwe na Police FC mbere, ndetse amakuru akaba avuga ko hari byinshi bari bamaze kumvikana, yayiteye umugongo yerekeza muri AS Kigali.

Ku mugoroba wo kuri iki Cyumweru tariki ya 31 Nyakanga 2022, binyuze ku mbuga nkoranyambaga za yo, AS Kigali yamaze gutangaza ko yamaze gusinyisha uyu rutahizamu amasezerano y’umwaka 1.

Jacques Tuyisenge wakiniye amakipe atandukanye yo hanze y’u Rwanda nka Gor Mahia yo muri Kenya na Petro Atletico de Luanda muri Angola. Etincelles FC, Police FC na APR FC zo mu Rwanda, asize mu mukino 26 yakiniye APR FC yayitsindiye ibitego 2 atanze n’umupira umwe wavuyemo igitego.

Jacques Tuyisenge muri APR FC

Jacques Tuyisenge umukino wa mbere yakiniye APR FC hari tariki ya 28 Ugushyingo 2020, APR FC itsinda Gor Mahia 2-1 mu mukino ubanza w’ijonjora ry’ibanze rya CAF Champions League wabereye i Kigali, yinjiye ku munota wa 56 asimbuye Dany Usengimana.

Tariki ya 5 Ukuboza 2020 umukino wo kwishyura wa Gor Mahia wabereye Kenya bagatsindwa 3-1, basezererwa ku giteranyo cy’ibitego 4-3.

Umukino wa mbere yakiniye APR FC muri shampiyona hari tariki ya 11 Ukuboza 2020 bakina na Kiyovu Sports batsinze 1-0, ni igitego Serumogo Ally yitsinze, hari ku munsi wa 3 wa shampiyona ya 2020-21 yaje guhita isubikwa kubera Coronavirus isubukurwa muri Gicurasi 2021 batangira bushya.

Bitewe n’imvune yagiriye ku mukino wa ¼ cya CHAN yabereye muri Cameroun, Jacques Tuyisenge ntabwo yatangiye shampiyona ya 2020-21 yakinwe mu buryo bw’amatsinda yatangiye muri Gicurasi 2021, aho APR FC yari mu itsinda rimwe na Gorilla FC, Bugesera na AS Muhanga. Imikino yose ibanza uko ari itatu ntabwo yayikinnye.

Tariki ya 11 Gicurasi 2021 nibwo Jacques Tuyisenge yongeye kwisanga ku rupapuro rw’umukino, hari mu mikino y’amatsinda yo kwishyura aho APR FC yatsinze Bugesera FC 2-1, Jacques Tuyisenge yabanje ku ntebe y’abasimbura.

Yatsindiye bwa mbere APR FC muri shampiyona, tariki ya 14 Gicurasi 2021 bakina na AS Muhanga umukino wo kwishyura wo mu itsinda (wari umunsi wa 5), bayitsinze 3-1 Jacques Tuyisenge wari wabanje ku ntebe y’abasimbura yatsinzemo 2.

Mu mukino ukurikiyeho wa Gorilla wasozaga imikino y’amatsinda wabaye tariki ya 17 Gicurasi 2021, Jacques Tuyisenge yabanje mu kibuga ariko nta gitego yigeze atsinda.

APR FC yasoje itsinda ari iya mbere, yahise izamuka ijya mu cyiciro cy’amakipe 8 ahatanira igikombe, bagombaga gukina nta mikino yo kwishyura, yahereye kuri Espoir FC tariki ya 23 Gicurasi 2021, bayitsinda 1-0 cya Ombiorenga Fitina, Jacques Tuyisenge yabanje ku ntebe y’abasimbura.

Yakurikijeho AS Kigali bakinnye tariki ya 26 Gicurasi 2021, Jacques yabanje mu kibuga banganya 1-1, icya APR FC cyatsinzwe na Byiringiro Lague.

Jacques Tuyisenge yari mu bakinnyi 11 ba APR FC babanje mu kibuga ku mukino w’umunsi wa 3 w’amakipe ahatanira igikombe APR FC yatsinzemo Bugesera FC 3-0, gusa nabwo ntabwo yigeze atsinda, hari tariki ya 10 Kamena 2021.

Tariki ya 14 Kamena 2021 bakinnye na Police FC mu mukino w’umunsi wa 4 w’amakipe ahatanira igikombe, Jacques Tuyisenge yagiye mu kibuga asimbura, umukino bawutsinze 3-0 ariko nabwo kureba mu izamu biba ikibazo.

Umunsi wa 5 w’iyi shampiyona wakinwe tariki 16 Kamena 2021, APR FC yahuye na Rayon Sports mu mukino w’abakeba, warangiye APR FC itsinze 1-0 cya Anicet winjiye mu kibuga mu minota ya nyuma, Jacques Tuyisenge yari yabanje mu kibuga.

Ubwo APR FC yanyagiraga Marines FC mu mukino w’umunsi wa 6 wa shampiyona y’amakipe ahatanira igikombe tariki ya 19 Kamena 2021, Jacques yabanje mu kibuga ariko mu bitego 6 batsinze aburamo na 1 kuko Lague yatsinze 3, Mugunga 1, Djabel 1 na Fitina 1. Umukino wa nyuma APR FC yatsinze Rutsiro 6-0 tariki ya 25 Kamena 2021 ntiyigeze awukina.

Shampiyona ya 2021-22 Jacques Tuyisenge yagaraye muri 18 APR FC igomba kwifashisha inshuro 11.

Hashize amezi atanu icyamamare muri sinema Will Smith akubitiye urushyi Chris Rock imbere y’abantu mu birori bya Oscars Awards 2022, aho yarumukubise abitewe n’uburakari yagize bitewe n’urwenya rudashimishije Chris Rock yateye ku mugore we Jada Pinkett Smith. Kuri ubu Will Smith yasabye imbabazi uyu munyarwenya bwa mbere, ndetse azimusaba ku mugaragaro.

Will Smith yashyize ahagaragara amashusho y'iminota itandatu ku rubuga rwe rwa YouTube, maze asaba imbabazi Chris Rock kuba yaramukubise urushyi muri Oscars Awards muri Werurwe. Yasubije kandi bimwe mu bibazo abantu bamubajije, bijyanye n’ibyabaye hagati ye na Chris Rock.

Will Smith yagize ati: “Navugishije Chris kandi ubutumwa yansubije ni uko atiteguye kumvugisha, gusa yambwiye ko igihe azaba yiteguye ko tuganira azamvugisha”.

Yakomeje agira, ati: “Ndagusaba imbabazi” yongeraho ati: “Ndi hano igihe cyose witeguye kuvuga.”

Will Smith yagize ati: “Nta gice cyanjye mu mubiri kivuga ko aribwo buryo bwiza bwo kwitwara muri ako kanya. Ndicuza ibyo nakoze kuko ntibyari bikwiriye kuba”.

Will Smith yasabye imbabazi Chris Rock ku mugaragaro

Will Smith wegukanye Oscar Awards ye ya mbere muri iryo joro kubera kwitwara neza muri  filime yitwa “King Richard”, yakomeje avuga ko umugore we, Jada Pinkett Smith atigeze amubwira ngo ajye kugira icyo akora nyuma y'uko Chris Rock amaze gutera urwenya rujyanye n’umutwe we bitewe n'uko utariho umusatsi kuko arwaye indwara ya alopecia, yatumye umusatsi we ushiraho.

Will Smith kandi yaboneyeho asaba imbabazi umugore we Jada Pinkett agira ati: “Nahisemo njyenyine, nkurikije ibyambayeho, amateka yanjye na Chris”. “Jada nta ruhare yabigizemo, sinawe wambwiye kubikora. Mbabarira mukunzi wanjye. Ndashaka gusaba imbabazi abana banjye n’umuryango wanjye, kubera ibibazo nabashyizemo.”

Iyi ibaye inshuro ya mbere Will Smith asaba imbabazi Chris Rock nyuma yo kumukubita urushyi imbere y’imbaga, mu birori bya Oscar Awards 2022.

Ikigo cy’Igihugu cy’igororamuco (NRS), kirashimwa n’imwe mu miryango y’abafite ababo bagororerwa mu bigo byacyo bitandukanye mu Rwanda, kubera kubafasha (…)

Minisitiri w’Ububanyi n’Amahanga n’Ubutwererane w’u Rwanda, Dr Vincent Biruta, umaze iminsi muri Zimbabwe mu ruzinduko rw’akazi, yasuye igicumbi cy’Intwari (…)

Ubwitabire bw'iki gitaramo cyabereye muri Bk Arena, ni igisobanuro kigari cy'uko abanyeshuri bari mu biruhuko koko!

Urubyiruko rwambaye rutikwije, inzoga n'itabi basangira, bakata umuziki, bifata amashusho n'ibindi, ni urwibutso rudasaza bazaganiraho igihe kinini basubiye ku ishuri.

'Tayc live in Kigali' ni igitaramo cyamamajwe kuva mu mezi atatu ashize! Umusaruro wabyo wigaragaje n'ubwo hari abatashye uko baje.

Umuntu avuze ko ari cyo gitaramo kitabiriwe cyane ku rwego rwo hejuru kuva uyu mwaka watangira, ntiyaba agiye kure y'ukuri. Ururimi rw'igifaransa rwari rwahawe intebe!

Umuhanzi Mukuru yari Tayc ubarizwa mu Bufaransa. Mbere yo kugera i Kigali kwe, hatangajwe abahanzi bo mu Rwanda bazamubanziriza ku rubyiniro.

Ariko bose siko baririmbye. 'Affiche' y'iki gitaramo igaragaza Christopher, Nel Ngabo, Kenny K Shot, Ruti Joel, Kivumbi King, Dj Pius, Seyn, Kevin Kade, Inki, Dj Toxxyk, Dj Tyga, Dj Pyfo, Target Band na Urban Song.

Kuva saa kumi n'imwe kugeza saa mbiri n'iminota 16' ari nabwo igitaramo cyatangiraga, abari muri BK Arena bumvaga umuziki wavanzwe n'abarimo Dj Tyga.

Hacuranzwe indirimbo nyinshi z'abahanzi bo mu mahanga n'abo mu Rwanda, mu murongo wo kubanza gushyushya abanya-Kigali mbere y'uko abahanzi bashyiraho akabo.

Bivuze ko kuva icyo gihe (saa:17H-20H:16') cyose nta muhanzi wigeze ajya ku rubyiniro, ibintu byagize ingaruka ku bahanzi, bamwe bataha bataririmbye.

Igihe cyabaye ikibazo… , abahanzi b'i Kigali baratsikamirwa!

Iki gitaramo cyafunguwe n'umuhanzi Inki ahagana saa mbiri n'iminota 17, asanganirwa ku rubyiniro na Ruti Joel aririmba indirimbo ye yise 'Igikobwa'.

Uyu muhanzi yaririmbye indirimbo imwe kandi nabwo mu buryo bwa 'Acapella'. Byaturutse ku kuba abateguye iki gitaramo bamubwiye ko nta gihe gihari, agomba kuririmba umwanya muto akava ku rubyiniro.

Yagerageje gucinya akadiho, asaba abantu gufatanya nawe kuririmba 'Igikobwa' ava ku rubyiniro atanyuzwe.

Ruti Joel yavuye ku rubyiniro akomereza mu rwambariro (Back Stage). Mu minota micye umuhanzi Seyn n'abahanzi be, Kivumbi ndetse na Kevin Kade begera hafi y'urubyiniro bitegura kuririmba.

Seyn yaririmbye, akurikirwa na Kivumbi ariko Kevin Kade ntibyakunze ko aririmba.

Kevin yagaragaye hafi y'urubyiniro abaza mu bihe bitandukanye igihe agomba kuririmbira, ariko birangira atagiye ku rubyiniro ava aho igitaramo cyaberaga, ataha ataririmbye.

Umuhanzi Christopher ari kumwe n'itsinda rye ryamufashije mu majwi ndetse n'abacuranzi be baririmbye basiganwa n'igihe, kugeza ubwo uyu muhanzi yaririmbye nyinshi mu ndirimbo ze zo ha mbere zakunzwe azicamo ibice.

Mu gihe yiteguraga gukomeza, umushyushyarugamba yamubwiye ko ahubwo yatinze kuva ku rubyiniro.

Christopher yakoze uko ashoboye aririmba nyinshi mu ndirimbo ze, kugeza kuri 'Micasa' aherutse gusohora'.

Uyu muhanzi yavuye ku rubyiniro aramukanya na Ishimwe Karake Clement washinze Kina Music yamuzamuye, anasuhuza Tom Close ubundi akomereza muri 'Back stage'.

Mu kanya gato Christopher yamaze aganira na Clement na Tom Close, niko abacuranzi ba Nel Ngabo bazamuraga ibyuma ku rubyiniro kuko yashakaga kuririmba mu buryo bw'umwimerere ibizwi nka 'Live'.

Ku rubyiniro hariho ibyuma birimo piano, ingoma za kizungu, indangururamajwi za kwifashishwa n'abaririmbyi babiri bafasha umuhanzi n'ibindi. Hari na gitari yacuranzwe n'uwacurangiye Christopher.

Abaririmbyi ba Nel Ngabo ni byo bashakaga gukoreraho ariko bongeyemo bicye. Bitewe n'uko amasaha yari amaze kwicuma, abateguye iki gitaramo banze ko Nel Ngabo aririmba mu buryo bwa Live, basaba ko ari 'Play Back' kugira ngo ibintu byihute.

Abashinzwe kureberera inyungu ze barabyanga, bagaragaza ko kuva yatangazwa nk'umuhanzi uzaririmba muri iki gitaramo yakoze imyitozo yo kuririmba mu buryo bwa Live, bityo ko bitakunda ko aririmba 'Play Back'.

Umwe mu baganiriye na InyaRwanda ati 'Ntibyari gushoboka ko aririmba Play back, kandi bazi neza ko yiteguye kuririmba Live. Ni ukudusuzuguza abahanzi bo mu mahanga, mbese banze guta ikuzo imbere ya Tayc.'

Umwe mu bashinzwe kureberera inyungu z'abahanzi, avuga ko abateguye iki gitaramo banze ko Nel Ngabo aririmba Live kubera ko ibyuma yari gukoresha byari gusigasira ku rubyiniro bigatanga isura itari nziza kuri Tayc waririmbye mu buryo bwa Play back.

Avuga ko nta gisobanuro Tayc yari kuba afite cyangwa se kuzabwira abantu, ku kuntu yaririmbye play back kandi hari ibyuma byari kumufasha kuririmba Live.

Mu gihe cy'isaha imwe Tayc [Yacumbikiwe muri Marriott Hotel] yamaze ku rubyiniro, yaririmbye mu buryo bwa Play back acurangiwe na Dj. Yagiye kugera ku rubyiniro, ibyuma byose byakuweho.

Umuhanzi Rukabuza Rickie uzwi nka Dj Pius nawe ntiyaririmbye muri iki gitaramo. Asanzwe ari Dj akaba n'umuhanzi ubimazemo igihe kinini.

Ni umwe mu bari bitezwe muri iki gitaramo, dore ko yari amaze igihe kinini atagaragara mu bitaramo.

Ntiyaririmbye biturutse ku kuba amasaha atubahirijwe muri iki gitaramo, bigatuma Tayc ahabwa umwanya munini cyane ko yari yasabye abateguye iki gitaramo kumuha umwanya uhagije. Ibyo yasabye byagize ingaruka ku bahanzi b'i Kigali.

Abajijwe impamvu ataririmbye muri iki gitaramo, Dj Pius yabwiye InyaRwanda ati 'Umusaza (Tayc) ngo yashakaga igihe gihagije.'

Amakuru avuga ko bamwe mu bahanzi b'i Kigali bari ku rutonde rw'abagombaga kuririmba muri iki gitaramo batari bagahawe amafaranga yose bemeranyije.

Umurishyo wa nyuma w'iki gitaramo wavugijwe saa sita z'ijoro n'iminota 37' na Tayc, washimye uko yakiriwe i Kigali. Ni umuhanzi w'umuhanga wagaragaje ko kuba yarize ibijyanye no kubyina, afite icyo yari agamije.

Yaririmbye ameze nk'umurika album y'indirimbo ze, kuko yakoze mu nguni zose z'ubuzima bwe bw'umuziki, asoreza ku ndirimbo 'Le Temps' yamuhaye ikuzo mu muziki we.

    

Nel Ngabo ntiyaririmbye mu gitaramo cya Tayc kubera ko yangiwe kuririmba mu buryo bwa Live    

Dj Pius yabwiwe ko Tayc akeneye umwanya uhagije mu gitaramo cye, bituma ataririmba 

Kevin Kade yamaze umwanya munini ategereje kuririmba ariko ntiyahabwa umwanya 

Ruti Joel wabashije kugera ku rubyiniro, yaririmbye indirimbo imwe gusa nabwo mu buryo bwa 'Acapella' 

Tayc yasigiye urwibutso abakunzi be i Kigali