Blog

Yabigarutseho kuri uyu wa 5 Nzeli 2025 mu nama nyafurika ya cyenda yiga ku bijyanye no guteza imbere ubwikorezi bwo mu kirere (Aviation Africa Summit And Exbitions 2025).

Perezida Kagame yashimiye abateguye iyi nama no kuyizana mu Rwanda ndetse abaha ikaze mu Mujyi wa Kigali, yemeza ko igaragaza uruhare rukomeye ubwikorezi bufite mu iterambere.

Yagarutse ku mushinga wa Zipline Rwanda, agaragaza ko mu myaka nka 10 ishize, u Rwanda rwatangiye kohereza amaraso mu bice bitandukanye by'igihugu.

Zipline Rwanda yatangiriye ibikorwa byayo mu Rwanda mu Ukwakira 2016.

Mu Ugushyingo 2024, iki kigo cyari kimaze kugeza serivisi zacyo mu bitaro 654 birimo amavuriro mato arenga 100, gishyira amaraso, imiti n'inkingo n'ibindi bikoresho byo mu buvuzi.

Ubu 35% by'ibyo Zipline Rwanda itanga biba ari inkingo n'intanga biterwa amatungo.

Drone ya Zipline ikora urugendo rw'ibilometero 160, igendera ku muvuduko wa kilometero 130 ku isaha, icyakora kuri ubu urugendo runini ikora ruyisaba iminota itarenze 40. Ni uruva i Muhanga rwerekeza ku Bitaro by'Akarere bya Mibilizi mu Karere ka Rusizi.

Zipline Rwanda ifite imihanda irenga 500 indege zayo zinyuramo zijyanye ubutumwa, ibyumvikana ko n'ahantu zigwa hangana n'uwo mubare.

Perezida Kagame ati 'Iri koranabuhanga ntabwo ryagabanyije igihe byatwaraga gusa ahubwo ryatabaye n'abantu. Ubufatanye bwacu bwatanze umusaruro ndetse turi kugerageza uko twarizana mu mujyi rikazajya rijyanayo ibikoresho mu bijyanye n'ubucuruzi bw'ikoranabuhanga.'

Perezida Kagame yanagarutse ku gikorwa cyo kumurika drones zitwara abantu mu Rwanda, avuga ko Abanyarwanda bishimiye cyane kugira uruhare mu gutangiza drones zitwara abantu ndetse ko biteguye gufatanya mu iterambere ry'iri koranabuhanga.

Drones zatangijwe mu Rwanda zizwi nka 'eVTOL' zikorwa n'Uruganda rwo mu Bushinwa rwa EHang. Zikoresha amashanyarazi ku rugero rwa 100%.

Imwe itwara abantu babiri. Ishobora no gutwara ibilo birenga 620 by'imizigo. Ishobora kugenda intera y'ibilometero 30 iri mu kirere. Ishobora kugenda iminota 25 itarashiramo umuriro.

Umukuru w'Igihugu yavuze ko intumbero ya Afurika ari ugushora imari mu bwikorezi bwo mu kirere mu buryo bugaragara hagamijwe iterambere ry'ubukungu.

Yavuze ko ubwiyongere bw'abaturage ndetse n'iterambere ry'ubukerarugendo, byatumye abashaka gukora ingendo zo mu kirere muri Afurika biyongera.

Ni mu gihe kuko mu 2044 abagenzi bakoresha indege bazaba barageze kuri miliyoni 411 bavuye kuri miliyoni 180,1 bariho ubu.

Perezida Kagame ati 'Mu myaka igiye kuza abakoresha ingendo zo mu kirere ku Mugabane wacu bazikuba hafi kabiri. Ku rwego rw'umugabane hashyizwemo imbaraga nyinshi mu gufungura ikirere cyacu binyuze mu mishinga itandukanye.'

Yavuze ko Isoko rusange rya Afurika na ryo riri kugira uruhare mu kongera ubukungu bwa Afurika, agaragaza ko u Rwanda ruzakomeza kugaragaza uruhare rwarwo mu gushyiraho politiki zitandukanye ziteza imbere uyu mushinga.

Ati 'Nk'urugero twakuyeho viza ku Banyafurika bose. Guteza imbere abari n'abategarugori mu kwitabira urwego rw'ubwikorezi bwo mu kirere na byo biri mu bituraje ishinga.'

Yavuze ko mu gihe ibyo byaba bikozwe mu buryo bukwiriye, bizatanga imirimo myinshi no kwimakaza udushya.

Perezida Kagame yatangaje ko Sosiyete y'u Rwanda y'ubwikorezi bwo mu Kirere, RwandAir na yo iri kwagura ibyerekezo ijyamo, icyakora agaragaza ko ubwikorezi bwo mu kirere bukomeje guhura n'imbogamizi zikomeye cyane zirimo izamuka ry'ikiguzi cy'imirimo ndetse n'ibikorwaremezo bike.

Ati 'Bituma ubwikorezi bw'abantu n'imizigo bihenda kurusha uko byakagenze. Ntabwo ingendo zikwiriye kuba iz'abakire gusa, ahubwo dukeneye gufatanya twese, ibigo, cyane cyane Afurika Yunze Ubumwe (AU) n'Ikigo Nyafurika gishinzwe umutekano no kuyobora ingendo z'indege (ASECNA) bigahabwa imbaraga kugira ngo hagerwe ku ntego y'ikirere kimwe ndetse n'ingendo zidaheza ku mugabane wacu.'

Perezida Kagame yavuze Abanyafurika bashobora kugera kuri byinshi mu gihe bakoreye hamwe na cyane ko Afurika ifite umutungo kamere n'ubushobozi bukenewe.

Yahaye ikaze abarenga 1600 bitabiriye inama, agaragaza icyizere cy'uko ibizavamo bizagira uruhare mu kubaka Afurika Abanyafurika bashaka ndetse ikwiriye kubayo.

Umuyobozi w'Ikigo Nyafurika gishinzwe umutekano no kuyobora ingendo z'indege (ASECNA), Prosper Zo'o Minto'o na we yavuze ko Afurika ikeneye guteza imbere ibikoresho no kubakira ubushobozi abakora mu bwikorezi kugira ngo bajyane n'ikoranabuhanga.

Ati 'Dufite icyuho mu bijyanye n'ibikoresho, ibibuga by'indege bike,… hari byinshi byo gukora. Turi gukorana na AU kugira ngo duhangane n'ibi bibazo dufatanyije n'abandi bafatanyabikorwa kugira ngo ubwikorezi bwo mu kirere bujyanye n'ikoranabuhanga rigezweho.'

Zo'o Minto'o yavuze ko bari gushaka ikoranabuhanga rishingiye ku cyogajuru kugira ngo bateze imbere ubwikorezi butekanye ku rugero twifuza.

Yibukije ko ubukerarugendo bwa Afurika buri kuri 50% kubera ko ubwikorezi bwo mu kirere buhenze. Agaragaza ko bidakwiriye kuba urugendo ruva i Dakar kugera i Kigali rudakwiriye gutwara iminsi itatu, ahubwo bakwiriye gushyiramo imbaraga ingendo zikihuta.

Igitekerezo cyo mu Rwanda ku bijyanye n'ikoreshwa rya drones mu mirimo ya gisivili cyagukiye muri Nigeria, Ghana, Côte d'Ivoire, Kenya, u Buyapani, u Burayi no muri Leta za Arkansas na Utah muri Amerika, no muri Aziya mu Buyapani n'ahandi.

Abanyarwanda ni bo bagiye gufasha kubaka izo site mu bindi bihugu, ndetse no muri Amerika ahubakirwa drones zizanwa mu Rwanda harimo Abanyarwanda barenga batanu bafasha ibihugu byose Zipline iri gukoramo.

Zipline iri mu bushakashatsi butandukanye bwo kongera ingano y'igihe batiri ya drone yamara itarasubizwa ku muriro, ndetse mu 2026 iki kigo kigaragaza ko kizaba cyazanye drones zindi zikozwe mu bundi buryo butandukanye zifashishwa mu mijyi.

Ubwo Perezida Kagame yari ageze ahari kubera inama yiga ku guteza imbere ubwikorezi bwo mu kirere

Perezida Kagame yitabiriye inama yiga ku guteza imbere ubwikorezi bwo mu kirere iri kubera i Kigali

Inama yiga ku guteza imbere ubwikorezi bwo mu kirere yitabiriwe n’abapilote batandukanye barimo n’Abanyarwanda

Drones za Zipline zikomeje gutanga umusaruro mu gutabara imbabare

U Rwanda ruri kugerageza uburyo bwo kwifashisha drones za Zipline mu bucuruzi bwifashishije ikoranabuhanga

Abahanzi b’indirimbo zo kuramya no guhimbaza Imana, Chryso Ndasingwa na Sharon Gatete basezeranye imbere y’amategeko

Aba bombi basezeraniye mu Murenge wa Kinyinya mu Karere ka Gasabo mu Mujyi wa Kigali, kuri uyu wa Kane tariki 4 Nzeri 2025.

Ni mu gihe biteganyijwe ko ku wa 22 Ugushyingo 2025 ari bwo bazakora ubukwe.

Ni nyuma y’uko ku wa 25 Kamena 2025 ari bwo Ndasingwa yambitse impeta umukunzi we.

Ni umuhango wari ukurikiye uwo gufata irembo wabaye ku wa 22 Kamena 2025, ari nabwo benshi bamenye inkuru y’urukundo rwabo cyane ko mu mwaka bari bamaranye, abantu batari barigeze barutahura.

Iki kigo cyafunguwe ku wa 3 Nzeri 2025, mu Karere ka Rwamagana, Umurenge wa Muhazi, kikazajya cyakira abagororwa basigaje ibihano biri hagati y'amazi atandatu n'umwaka.

Iki kigo gifite ubushobozi bwo kwakira abagororwa 2500, aho ku ikubitiro cyatangiranye n'abagororwa 250 baturutse mu magororero atandukanye mu gihugu.

Minisitiri w'Umutekano Imbere mu Gihugu, Dr. Vincent Biruta, yavuze ko gufungura ikigo nk'iki biri mu mushinga mugari wa Leta y'u Rwanda wo kumenyereza abagororwa ubuzima busanzwe bityo abagororwa bazaza muri iki kigo bakwiye kubyaza umusaruro ubumenyi bazahakura.

Ati 'Muzasanga imiryango yanyu, ariko muzasanga n'abandi Banyarwanda harimo abo mushobora kuba mwaragiranye ibibazo byatumye mujyanwa mu igororero/ Iyi gahunda rero yo muri iki kigo ni ukubategura muri ibyo byose, kugira ngo muzave muri ubu buzima muri abantu bagororotse kandi bafite icyo bashobora kwimarira n'imiryango yabo ndetse n'igihugu muri rusange.'

Komiseri Mukuru w'Urwego rw'u Rwanda rushinzwe Igorora, CG Evariste Murenzi, yasobanuye ko nubwo abagororwa basozaga ibihano byabo barahindutse, ariko bagorwaga no kongera kwisanga mu buzima busanzwe bitewe n'igihe babaga bamaze mu igororero.

Avuga ko ari muri urwo rwego bashyizeho iki kigo ngo bafashe abagororwa bagiye gusoza ibihano byabo kubatoza uburyo bwiza bwo kongera kwisanga mu muryango.

Yagize ati “Uyu ni umushinga w'icyitegererezo w'ibindi bigo bizubakwa mu ntara zose, bije kunganira ubundi buryo busanzwe bwo kugorora no kwita ku bagororwa ariko bikazajya byakira abagororwa bari hafi kurangiza ibihano, bategurwa gusubira mu miryango yabo. Ibi bikaba biri mu cyerekezo cya RCS cyo gufasha abagonganye n'amategeko gusubira mu miryango yabo barahindutse abaturage beza bubahiriza amategeko.'

Umwihariko kuri iki kigo

Kugeza ubu, mu Rwanda habarurwa abagororwa barenga ibihumbi 76, bagororerwa mu magororero 13 ari mu Rwanda.

Mu bisanzwe gereza yubakishwa uruzitiro rufite hagati ya metero umunani na metero 10, gusa iki kigo cyo uruzitiro rwacyo ni nk'urw'inkuta zisanzwe kuko rufite hagati ya metero ebyiri n'eshatu.

Gifite abacungagereza bake ugereranyije n'amagororero asanzwe, ndetse benshi mu bacungagereza bo kuri iki kigo nta ntwaro bazajya bakoresha mu gucunga abagororwa bakirimo.

Abagororwa bajyanwa muri iki kigo bazajya batoranywa hashingiwe ku myitwarire yabo muri gereza, no kuba yarakatiwe igihano kitari munsi y'imyaka ibiri.

Mukaniyonshuti Jeanette uri muri 250 batangiranye n'iki kigo yavuze ko ubuzima bwaho butandukanye cyane na gereza zisanzwe.

Yagize ati 'Hano hatandukanye cyane n'aho twari turi kuko ho twabaga dushorewe n'abacungagereza ahantu hose, no gusurwa ari ugutonda umurongo ariko hano hameze nko mu rugo turisanzuye nta kibazo.'

Abagororwa bageze muri iki kigo bazajya bahabwa amahirwe yo kujya gusura inshuti n'imiryango yabo by'igihe gito, aho bashobora guhabwa uruhushya rwo gutaha ubukwe, gushyingura, gusura umurwayi kwa muganga n'ibindi.

Si ibyo gusa kuko bazajya bahabwa amasomo y'imyuga n'ubumenyingiro y'igihe gito kiri hagati y'amezi atandatu n'umwaka, aho mu masomo bazahabwa harimo ibijyanye n'ubwiza ndetse no gukora imisatsi, kuboha, ubudozi, ubwubatsi n'ibindi.

Abari basanzwe bazi iyo myuga bazafashwa kubona amasoko, guhuzwa n'abikorera batandukanye, gushyirwa mu makoperative n'ibindi.

Abagororwa bari muri iki kigo kandi bazahabwa ubujyanama ku bijyanye n'ubuzima bwo mu mutwe, imibanire n'abandi ndetse bahuzwe n'imiryango y'abo bakoreye ibyaha kugira ngo basabe imbabazi hagamijwe ubwiyunge.

Abagororwa bari muri iki kigo kandi bazajya bitabira ibikorwa rusange by'abaturage byo mu Karere ikigo giherereyemo, birimo umuganda rusange, kubakira abaturage, kwibuka n'ibindi.

Iki kigo cyubatswe na Leta y'u Rwanda ku nkunga y'umuryango Starling Foundation, The Church of Jesus Christ of Latter-day Saints.

Muri iki kigo abagororwa bazajya bahabwa amasomo y'imyuga n'ubumenyingiro arimo kuboha, kudoda n'ibindi.

Minisitiri w'Umutekano mu Gihugu, Dr. Vincent Biruta, yavuze ko iki kigo kiri mu mushinga mugari wo kubaka ibigo bifasha abagororwa gusubira mu buzima busanzwe mu gihugu hose

Murenzi Abdallah wayoboye Rayon Sports, yavuze ko umukeba ba bafite ari Kiyovu Sports n’aho APR FC ari iyo kuryoshya ibirori.

Murenzi Abdallah ubu uri muri Komite y’Inama y’Ubutegetsi ya Rayon Sports, yabivugiye mu kiganiro cy’Imikino kuri Fine FM cyo kuri uyu wa Kane aho yari umutumirwa.

Yavuze ko APR FC ari ikipe y’ejobundi nshya ataba ari umukeba wa bo ahubwo ari iyo kuryoshya ibirori.

Ati “aba ni bashya nta kibazo ntabwo tubabara, hari umuntu wambajije ngo witeguye ute derby ya Kiyovu ndamubwira nti uvuze ijambo rya nyaryo iyo ni yo derby tuzi, APR FC iraho kugira ngo iryoshye ibirori.”

Avuze ibi mu gihe benshi bemeza ko umukino uhuza Rayon Sports yashinzwe 1968 na APR FC yashinzwe mu 1993 ari wo mukino w’abakeba “Derby” mu rw’Imisozi 1000.

Yafatiwe mu mu Karere ka Burera, Umurenge wa Butaro, akagari ka Mubuga kuri uyu wa Gatatu, tariki 3 Nzeri 2025.

Umuvugizi wa Polisi y'u Rwanda mu Ntara y'Amajyaruguru, IP Ignace Ngirabakunzi, yatangarije IGIHE ko uyu mugabo yafashwe nyuma yo gukwirakwiza amakuru y'ibinyoma kandi aca igikuba mu bantu.

Ati 'Ni byo koko yafashwe kuri uyu wa Gatatu, ashyikirizwa Urwego rw'Igihugu rw'Ubugenzacyaha, RIB, akurikiranyweho gutangaza ibinyoma bica igikuba mu baturage. Ni ho duhera dusaba abantu bafite uburyo n'uburenganzira bwo gutanga ibitekerezo n'amakuru, kubikora mu buryo bwiza, aho gukwiza ibihuha bisenya igihugu, bikanakura umutima abaturage.'

Akomeza agira ati 'Intwaro iyo ari yo yose wakoresha usenya cyangwa uvuga ibinyoma bisenya, bica igikuba ndetse bigatera ubwoba, ntabwo bishobora kwemerwa n'uwo ari we wese. Uzabikora, azafatwa, ashyikirizwe inzego zibishinzwe zimukoreho iperereza ndetse zinamenye n'icyo yari agendereye. Ni yo mpamvu n'uriya yashyikirijwe inzego zishinzwe kumukurikirana.'

Uyu mugabo afungiye kuri Sitasiyo ya Polisi ya Butaro, mu gihe iperereza rikomeje.

Umutoza mukuru wa APR FC, Abderrahim Taleb yavuze ko afitiye icyizere umunyezamu we, Ishimwe Pierre ko n’amakosa akora ari ukubera imikino mike no kutigirira icyizere kandi ibyo ari ibintu bikosoka.

Umunyezamu wa mbere wa APR FC, ishimwe Pierre ntabwo yagize irushanwa ryiza rya ‘APR Preseason Tournament’ aho hari amakosa yakoze bituma abakunzi b’iyi kipe bamwijundika.

Byahereye ku mukino wa Police FC yabatsinzemo 3-2, ntabwo banyuzwe n’uburyo yitwaye. Umukino Azam FC yaraye na wo ibatsinzemo byabaye uko bituma abakunzi b’iyi kipe bamwijundika.

Mu gihe benshi bari bakimwibazaho, yahise anahamagarwa mu ikipe y’Igihugu Amavubi ubu iri muri Nigeria gukina n’iki gihugu mu gushaka itike y’igikombe cy’Isi cya 2026.

Umutoza mukuru wa APR FC, Taleb akaba yavuze ko nta byacitse ahubwo ibyo Pierre abura ari ibisanzwe ari ubikoraho.

Ati “Pierre arabura imikino myinshi y’amarushanwa. Amakosa akora bigaragara ari ukwiburira icyizere, yakoze ikosa mu mukino uheruka, uyu munsi, urabona ari icyizere cye kiri hasi ariko ni umunyezamu ufite ejo hazaza heza.”

“Ngomba kumukosora, nkamwigisha kuko umwarimu nicyo akora, ntabwo ari ukumuhana kuko Pierre afite ibyiza byinshi rero ngomba kumufasha kuko ubona icyo abura ari ukwigirira icyizere.”

Byavugwaga ko APR FC ishobora kumuzaniraho undi ariko byarangiye nta wundi azanye.

Agaruka ku ikipe ye yose afite yavuze ko afite ikipe nziza cyane kandi yizeye ko azitwara neza mu marushanwa yose azakina.

Umukinnyi Mpuzamahanga w’umunyarwanda, Samuel Gueulette yamaze kongera amasezerano y’imyaka 4 mu ikipe ye ya Raal La Louviere mu Bubiligi, ni mu gihe benshi batunguwe no kubona adahamagawe mu Mavubi.

Uyu mukinnyi ukina inyuma ya ba rutahizamu ari muri Raal La Louviere kuva muri 2021 ikina mu cyiciro cya 4 ayizamura cya 3, icya kabiri kugeza ayigejeje mu cyiciro cya mbere ari n’aho irimo gukina, yamaze kumwongera amasezerano y’imyaka 4 bivuze ko azamugeza muri 2029.

Gueulette ubanzamo muri iyi kipe yo mu cyiciro cya mbere mu Bubiligi, benshi batunguwe no kubona atahamagawe mu bakinnyi umutoza Adel Amrouche yajyanye muri Nigeria gukina n’iki gihugu ndetse azanifashisha ku mukino wa Lesotho mu gushaka itike y’igikombe cy’Isi cya 2026.

Amakuru akaba avuga ko bifitanye isano no kuba ataritabiriye imikino ya gicuti u Rwanda rwakinnye na Algeria, gusa andi makuru atizewe neza ni uko ngo yaba hari ibibazo yagiranye n’umutoza wungirije Eric Nshimiyimana.

Samuel Gueulette akaba ashobora kuba na we ari ku rutonde rw’abakinnyi umutoza Adel Amrouche yavuze ko akiri umutoza mukuru w’ikipe y’igihugu Amavubi atazigera yongera kubahamagara, barimo na Hakim Sahabo wa Standard de Liege mu Bubiligi.

Samuel Gueulette yahamagawe bwa mbere mu ikipe y’Igihugu Amavubi muri 2018 mu batarengeje imyaka 20 mu gushaka itike y’igikombe cy’Afurika, yakiniye abatarengeje imyaka 23 kugeza ahamagawe no mu ikipe nkuru.

Umuhanzikazi Musabyimana Gloriose uzwi nka Gogo yitabye Imana bitunguranye aguye mu gihugu cya Uganda aho yari yagiye gukorera ibitaramo.

Uyu muhanzi w’imyaka 36 waririmbaga indirimbo zo kuramya no guhimbaza Imana, yavuye mu Rwanda ku wa Kane w’icyumweru gishize yitabiriye Igiterane yari yatumiwemo cyabereye mu gace ka Kakumiro cyabaye ku Cyumweru.

Amaze kuririmba, igiterane kirangiye bahise bajya Kampala, bahageze amakuru avuga ko ari bwo yarembye ajyanwa ku Bitaro biri mu Mujyi wa Kampala byitwa Kengeri Doctors Medical Centre ari n’aho yaguye ejo hashize ku wa Gatatu.