Blog

Ni ingingo yagarutseho ku wa 30 Nzeri 2025, ubwo yari imbere y'Akanama k'Umutekano k'Umuryango w'Abibumbye mu biganiro byagarutse ku butumwa bw'Ingabo za Loni muri RDC, Monusco.

Amb. Martin Ngoga yagaragaje ko u Rwanda rushyigikiye ibiganiro bya Doha ndetse n'amasezerano ya Washington, ariko yibutsa ko byombi kugira ngo bitange umusaruro bisaba ubushake bwa politike ku mpande zose.

Ati 'Aya ni amahirwe aza rimwe yo kugarura amahoro muri Repubulika Iharanira Demokarasi ya Congo kandi akanama k'Umutekano ka Loni kagomba kubishyigikira. Turasaba impande zose kubahiriza ibyo zemeye kandi zikinjira mu biganiro mu buryo bwubaka kandi zigaharanira ko ibi biganiro bivamo ingamba zikomeye zizana amahoro, ndetse zigakemura ibibazo bihembera amakimbirane mu Burasirazuba bwa RDC. Ndashaka kongera gushimangira ko u Rwanda rufite ubushake muri ibi biganiro kandi tuzabishyira mu bikorwa.'

Mu ijambo rye Amb. Martin Ngoga yagarutse ku nenge ziri muri Raporo Loni iherutse gukora ku kibazo cy'umutekano muke mu Burasirazuba bwa RDC.

Yavuze ko kimwe mu bibazo iyi raporo ifite ari uko ica hejuru imvugo zihembera urwango, ndetse n'ubwicanyi bushingiye ku moko buri mu Burasirazuba bwa RDC.

Ati 'Imvugo zihembera urwango ni ikintu kibi cyane […] ni nde utarabonye imvugo z'urwango ku mbuga nkoranyambaga, mu nsengero, mu mashuri aho urwango rwigishwa abana b'imyaka 10. Mu cyumweru gishize abantu bamwe baribasiwe kubera ko bafite amazuru maremare, abazi amateka y'akarere bazi icyo ibyo bivuze, izuru rirerire rivuze urupfu ku bantu bamwe. Ibi ntabwo ari ibintu iyi raporo ikwiriye kugarukaho mu buryo bw'amahushuka.'

Yavuze ko ikindi kibazo iyi raporo itagarukaho mu buryo bwimbitse ari ikijyanye n'abacanshuro bari mu Burasirazuba bwa RDC.

Ati 'Raporo ntabwo ivuga ku bacanshuro. Hari amahame y'Umuryango w'Abibumbye akumira ikoreshwa ry'abacanshuro, hari imyanzuro irenga ibiri y'Akanama k'Umutekano ka Loni irwanya ikoreshwa ry'abacanshuro. Hari umwanzuro w'Umuryango wa Afurika Yunze Ubumwe urwanya ikoreshwa ry'abacanshuro, ni ryari aka Kanama kigeze kaganira ku kibazo cy'abacanshuro?'

'Ubu abacanshuro barahari, na mbere bari bahari ubwo baturumburwaga mu mashyamba, buri wese yari ahari yarabibonye, kubera iki Akanama k'Umutekano ka Loni kadafata ibi bintu nk'ikibazo? Kandi kubera iki ibi Monusco itabifata nk'ikibazo? Kubera iki ari ikibazo gihangayikishije u Rwanda? Ni uko ari hafi y'umupaka wacu.'

Kuki FDLR yabaye ndakorwaho?

Muri Nzeri 2025, Ihuriro ry'Ingabo za RDC ryategetse Abanyamulenge kuva muri Uvira mu minsi 10, bakajya mu Rwanda aho bakomoka. Ni icyemezo kandi cyarebaga Aba-Masai bo muri Tanzania na Kenya, kuko bivugwa ko na bo baremetse nk'Abatutsi.

Amb. Martin Ngoga yagarutse kuri iki kibazo, yibaza impamvu Umuryango w'Abibumbye utagize icyo ugikoraho.

Ati 'Abanye-Congo bavuga Ikinyarwanda barimo n'Abanyamulenge muri Kivu y'Amajyepfo bari kuvangurwa kugira ngo birukanwe banicwe, ni nde utarumvise cyangwa ngo amenye ko hari umwanzuro watanzwe muri Uvira usaba Abatutsi kuva mu gihugu, bahabwa nyirantarengwa y'iminsi 10 […] ni iyihe nama y'igitaraganya yateguwe mu gukemura iki kibazo?'

'Kubera iki kugeza uyu munsi Loni yaruciye irarumira kuri byo? Ni ibintu bisanzwe kuba ubwoko runaka bwategekwa kuva mu gihugu cyabwo, ngo bujye ahandi batekereza ko ariho bubarizwa?'

Amb. Martin Ngoga yabwiye aka Kanama ko bitumvikana uburyo ikibazo cya FDLR gikomeje kurenzwa ingohe, kandi iteje inkeke ku mutekano w'u Rwanda.

Ati 'FDLR ishyigikiwe na Guverinoma ya RDC ifite inkomoko mu ngabo zishe Abanyarwanda miliyoni imwe, ni wo mutwe wonyine wakoze Jenoside wagumanye imiterere ya gisirikare, mu bice bizwi, ugifite umugambi umwe […] nta wundi mutwe nzi wakoze Jenoside mu mateka wagumanye iyo miterere ya gisirikare, ugumana intwaro zawo, wongera kwisuganya ndetse urashyigikirwa kandi ukomeza guharanira gusohoza umugambi wawo mu gihe cy'imyaka 31, ndetse uyu munsi raporo ikaba ivuga ko hari ibice ugenzura, ariko ukaba ari ntakorwaho? Iyi ni FDLR iganirwaho hano nk'ikibazo kizwi.'

Yakomeje avuga ko FDLR ikorana na Leta ya RDC muri uyu mugambi, kandi na Loni izi iby'ubu bufatanye.

Ati 'FDLR iri muri FARDC kandi birazwi ndetse biri no muri raporo yanyu, FDLR ifashwa na Guverinoma ya RDC biri muri raporo yanyu, Monusco ikorana n'igisirikare cya RDC kandi izi neza ko FDLR iri muri iki gisirikare, icyo Monusco ikora ni ukwirinda batayo FDLR ibarizwamo, iyo ni iyihe mikorere?, aho niho Monusco ihagaze, ubufatanyacyaha bwaba buvuze iki? niba ubwo atari ubufatanyacyaha?'

Yavuze ko bitumvikana uburyo iri huriro ryiyemeje kurwanya M23, kandi ari Abanye-Congo baharanira uburenganzira bwabo.

Ati 'Mu bwenge bw'aka Kanama ni gute byagenze ngo habeho ubwo bufatanye bugamije kurwanya M23, kurwanya u Rwanda. M23 ni Abanye-Congo birukanwa mu gihugu cyabo, u Rwanda ni igihugu cyanyuze muri Jenoside biturutse kuri FDLR kandi rwagizweho ingaruka n'ibindi bitero 21 nyuma yo mu 1994. […] niba mushaka kumenya inshuro FDLR yateye u Rwanda, murebe umubare w'amatangazo mwagiye musohora, kubera ko buri gihe iyo bateye u Rwanda mugira abaturage banyu inama yo kutajya muri icyo gice cy'u Rwanda.'

Ni ikosa tudashobora kongera gukora

Amb. Ngoga yakomeje avuga ko niba abantu bashaka kumenye inshuro FDLR yateye u Rwanda bashobora kugendera kuri ayo matangazo.

Yavuze ko u Rwanda rudashobora gukuraho ingamba z'ubwirinzi mu gihe FDLR igihari, ashimangira ko rubikoze kwaba ari ugusubiramo amakosa.

Ati 'Mushobora gukusanya ayo matangazo, azababwira inshuro FDLR yateye u Rwanda, none turi gusabwa gukuraho ingamba zacu z'ubwirinzi, mu gihe FDLR ifite ibice igenzura nk'uko Keita yabitubwiye. Byatubayeho rimwe mu 1994, ubwo twemeraga inama z'Abanyamadini batubwira kwihisha mu nsengero, twicwa nk'inka, ntabwo bizongera kubaho. FDLR ni Abanyarwanda, kandi mu Rwanda niho bakwiriye kuba bari, ibi ni nabyo dusaba RDC gukora.'

Amb. Ngoga yavuze ko nyuma ya Jenoside yakorewe Abatutsi mu 1994 hari abayigizemo uruhare bahungira muri Tanzania, ariko iki gihugu cyibyitwaramo neza ku buryo nta kibazo u Rwanda rufitanye na Tanzania. Kuri RDC ho ngo si ko byagenze, kuko FDLR yahawe rugari, yongera kwisuganya ngo izongere itere u Rwanda yice Abatutsi.

Amb. Martin Ngoga yavuze ko kuba u Rwanda rwakuraho ingamba z'ubwirinzi FDLR igihari, ari ugusubiramo ikosa ryakozwe mu 1994

Byagarutsweho mu nama yamurikiwemo raporo y'isuzuma ku iyubahirizwa ry'uburenganzira bwa muntu hagendewe ku byo u Rwanda rwahawe n'Akanama k'Umuryango w'Abibumbye gashinzwe Uburenganzira bwa Muntu.

Ni inama yabereye i Kigali kuri uyu wa 30 Nzeri 2025 ihuriza hamwe inzego za Leta zirebwa n'Uburenganzira bwa Muntu n'abo mu miryango itari iya Leta bikora ku Burenganzira bwa Muntu.

Iyo nama iba nyuma y'imyaka ine igamije gusuzuma ibikubiye muri raporo y'ibyakozwe muri iyo myaka mbere yo kwemezwa burundu ngo ishyikirizwe Akanama ka Loni ku Burenganzira bwa Muntu.

U Rwanda rwinjiye muri iryo suzuma mu 2011 rukaba rumaze gutanga raporo eshatu z'ibyakozwe mu kubahiriza Uburenganzira bwa Muntu aho inshuro iheruka mu 2020 rwari rwesheje imihigo ku ijanisha rya 95% ry'imyanzuro rwemeye.

Mu gushyirwa mu bikorwa iyo myanzuro Akanama ka Loni ni ko kayitegura kakayiha ibihugu bigahitamo iyo byiyemeje kuzashyira mu bikorwa.

Mu 2021 u Rwanda rwari rwahawe igera kuri 260 ariko rwiyemeza gukora 160 ari na yo yatanzweho raporo.

Bimwe mu byakozwe muri iyo myaka ine bikubiye mu mibereho inyuranye y'abantu ifite aho ihuriye n'uburenganzira bwa muntu harimo imitangire ya serivisi, uburezi, ubuvuzi, ubwisanzurure bwo gutanga ibitekerezo n'ibindi bishyirwa miu bikorwa n'inzego zinyuranye.

Minisitiri w'Ubutabera, Dr. Ugirashebuja Emmanuel yavuze ko ibyinshi u Rwanda rwiyemeje byagezweho mu kubahiriza uburenganzira bwa muntu.

Ati 'Ibyinshi twagiye tubigeraho nko mu burezi twongeye amashuri kugira ngo abana bagire uburenganzira bwo kwiga, twakoze byinshi ku bafite ubumuga harimo kwandika inkoranyamagambo yabo, hari amafaranga agenerwa abageze mu zabukuru yiyongeye ndetse no gutora itegeko rigenga sosiyete sivile kugira ngo ibyo zikora bigirire akamaro abantu.'

Yakomeje agaragaza ko nubwo raporo igisuzumwa ngo yemezwe burundu kugira ngo izashyikirizwe Loni ku itaiki 21 Mutarama 2026 ariko imyanzuro u Rwanda rwiyemeje yashyizwe mu bikorwa ku ijanisha riruta iry'ubushize.

Ati 'Iyo urebye mu ijnisha usanga turenga kuri 95% turi nko kuri 97% ubu ngubu. Turi kumurika ibyo tuzi ko byakozwe ariko turakira ibindi bitekerezo nyuma y'iyi nama tozongera dukore ijanisha.'

Dr. Ugirashebuja yongeyeho ko ibikubiye muri iyo raporo byuzuzanya na gahunda z'imbere mu gihugu kuko ni zo zikorwaho isuzuma.

Umunyamabanga Nshingwabikorwa w'Umuryango utanga ubufasha mu by'amategeko (LAF), Kananga Andrews yavuze ko imyanzuro u Rwanda rwemeye yashyizwe mu bikorwa ku kigero kiri hejuru kurusha iyindi yose yabanje gusa ko kugabanya ubucucike mu magororero no kwihutisha imanza ziregwamo abana biri mu bikwiye gushyirwamo ingufu.

Umujyanama Mukuru mu Biro bishinzwe Uburenganzira bwa Muntu mu Buhuzabikorwa bw'Amashami ya Loni mu Rwanda, Ngabirano Michael yashimangiye ko u Rwanda rugaragaza umuhate ufatika mu kubahiriza uburenganzira bwa muntu.

Gusa, yavuze ko asanga hagikenewe ko abaturage bisanzura mu kugaragaza uko babona ibijyanye na politiki ndetse na zimwe mu ngingo ziri mu itegeko riherutse gutorwa rigenga imiryango itari iya Leta zikongera gusuzumwa.

Umuyobozi w'Ishami ry'Umuryango w'Abibumbye ryita ku Bagore, Jennet Kem ubwo yavugaga ijambo

Minisitiri w'Ubutabera, Dr. Ugirashebuja Emmanuel yavuze ko ibyinshi u Rwanda rwiyemeje byagezweho mu kubahiriza uburenganzira bwa muntu mu myaka ine ishize

Inzego zitandukanye zikora ku Burenganzira bwa Muntu mu Rwanda zari zitabiriye inama yo kumurika raporo y’ibyakozwe

Ni ibyagarutsweho ku wa 30 Nzeri 2025, mu Nama y'Ihuriro ry'Abahinzi bo muri Afurika y'Uburasirazuba (EAFF), yabereye I Kigali.

Ni inama yitabiriwe n'abahinzi baturuka mu bihugu bitandukanye byo muri Afurika y'Iburasirazuba (EAC) n'abafatanyabikorwa batandukanye, mu kwiga ku kwihaza mu biribwa no gukora ubuhinzi bw'igihe kirekire.

Iyi nkunga ya miliyari 44 Frw yiyongera ku zindi miliyari zirenga 127 Frw yari yatanzwe na EU binyuze mu Kigega Mpuzamahanga Giteza Imbere Ubuhinzi (IFAD).

Umuyobozi Wungirije w'Ishami rishinzwe Politiki y'Imari mu Ishami ry'Umuryango w'Ubumwe bw'u Burayi mu Rwanda, Elise Hadman, yashimye umuhate w'ihuriro EAFF mu myaka 20 rimaze agaragaza ko ryagize uruhare mu guteza imbere abahinzi bato no kugaragaza ibyifuzo byabo.

Elise yavuze ko EU ku bufatanye na Banki ya Kigali (BK), bamaze gutanga inkunga irenga miliyari 170 Frw ku mashyirahamwe y'abahinzi bo mu Rwanda binyuze muri gahunda yiswe 'Global Gateway Strategy'.

Ati 'Ubu amashyirahamwe y'abahinzi n'abatunganya umusaruro amaze kubona amafaranga arenga miliyoni 75 z'ama-Euro (angana na miliyari 127 Frw) yatanzwe na EU ku bufatanye na BK binyuze mu kigega IFAD. Uyu munsi, twishimiye kongera kwemeza ko tugiye gutanga indi nkunga ya miliyoni 26 z'ama-Euro (miliyari 44 Frw) yose hamwe akaba amaze kurenga miliyari 170 Frw.'

Yongeraho ko EU izakomeza gutera inkunga no gushyigikira ibikorwa byo guteza imbere ubuhinzi kuri uyu mugabane mu rwego rwo kwihaza mu biribwa.

Minisitiri w'Ubuhinzi n'Ubworozi, Dr. Mark Cyubahiro Bagabe, yavuze ko iyi nkunga izafasha abahinzi, abatunganya umusaruro n'ibigo by'ubuhinzi kubona amafaranga yo kwagura ibikorwa no guhangana n'ingaruka z'imihindagurikire y'ikirere.

Ati 'Mu kwizihiza iyi myaka 20 EAFF imaze, turebe imbere mu guteza imbere ubuhinzi bw'igihe kirekire, kandi bwinjiriza Akarere kose. Iyo tubonye inkunga, tugomba kuyikoresha mu kongera umusaruro, si mu bikorwa byo kwishimisha. Ibi ni byo bizadufasha kugabanya icyuho cyo gutumiza ibiribwa hanze ya Afurika.'

Biteganyijwe ko inkunga yose y'Umuryango w'Ubumwe bw'u Burayi mu buhinzi bw'u Rwanda izagera kuri miliyoni 500 z'ama-Euro hagati ya 2020 na 2030.

Elise Hadman, yashimye umuhate w'ihuriro EAFF mu myaka 20 rimaze agaragaza ko ryagize uruhare mu guteza imbere abahinzi bato

Dr. Mark Cyubahiro Bagabe, yavuze ko iyi nkunga izafasha abahinzi, abatunganya umusaruro n'ibigo by'ubuhinzi kwagura ibikorwa byabo

Abayobozi batandukanye beretswe bimwe mu bitunganywa mu musaruro w’ubuhinzi

Ni ikigo kizaba gishamikiye ku Ishuri Ryisumbuye Ryigisha Ubuhinzi n'Ubworozi rya Kinazi (ESK TSS).

Umuyobozi w'Akarere ka Ruhango, Habarurema Valens, avuga ko iki kigo kizubakwa mu ntego yo kwagura icyari gihari kigahabwa ibindi byangombwa birimo amabagiro ane ya kijyambere, inganda zitunganya amata, ibyuzi umunani byororerwamo amafi, hakazashyirwa kandi imirimashuri izajya ikorerwamo ubuhinzi buteye imbere ya hegitari zisaga ebyiri.

Meya Habarurema yakomeje avuga ko bitazarangirira aho kuko abanyeshuri n'abarimu babo bazajya basohoka mu kigo bakajya kwigisha abahinzi baturiye ikigo bo mu gice cy'Amayaga mu Mirenge imwe yo mu turere twa Ruhango, Kamonyi na Nyanza.

Anavuga ko muri iki kigo bazajya bakenera umusaruro wo gutunganya kandi ugomba kuva mu baturage.

Ati ''Ni umushinga munini dufatanyamo na Leta ya Luxembourg, ibizajya biva mu bworozi haba mu mafi, ingurube, ihene, intama, inka se n'ibizivamo nk'amata, byose bizajya bitunganywa noneho bigurishwe mu Rwanda no mu mahanga i Burayi.'

Yakomeje abwira abaturage kumva neza ko icyo kigo kije ari umufatanyabikorwa uzabaherekeza mu iterambere ry'ubuhinzi n'ubworozi, kibagurira umusaruro wabo ndetse kinabongerera ubumenyi, bityo ko bakwiye kuzacyakirana yombi ibikorwa byacyo.

Umuyobozi wa ESK TSS, Oreste Musengamana, yavuze ko hari n'ibindi bikorwa bazajya bakora byongera umusaruro w'ubuhinzi birimo ifumbire yo kwifashisha mu buhinzi, batunganye imbuto zo gutera byose mu nyungu zo kuzamura ubumenyi bw'abanyeshuri no no kuzamura umusaruro w'abahinzi bazajya bafatanya mu bushakashatsi no gukorana.

Kugeza ubu imirimo yo kongera inyubako n'ibindi bizakenerwa muri iki kigo igeze kuri 30%, ikazasozwa itwaye asaga miliyari 2 Frw. Ikigo nk'iki kandi kizubakwa mu Karere ka Musanze, ku buryo bizaba ari bibiri gusa mu Rwanda.

Inzu izashyirwamo imashini zizajya zitunganya umusaruro iri kubakwa, aho muri ‘pavement’ yayo bari gushyiramo ibyuma ngo ikomere zitazajya zitigisa inzu ikiyasa

Muri ESK TSS, hari hasanzwe ibikorwa byo gutubura no kubungabunga imbuto gakondo

Umutoza wa Pyramids FC, Krunoslav Jurčić yifatiye ku gahanga APR FC bitewe n’ikibuga n’amasaha yashyizeho umukino.

Harabura amasaha make atageze kuri 4 APR FC igacakirana na Pyramids FC mu mukino ubanza w’ijonjora ry’ibanze rya CAF Champions League.

APR FC ikaba igiye gukina na Pyramids FC umukino wa 5 mu myaka 3 iheruka, muri izo nshuro zose nta mukino n’umwe irabasha gutsinda iyi kipe yo mu Misiri kimwe n’uko na yo itarabasha gutsindira mu Rwanda.

Umutoza wa Pyramids FC agaruka kuri uyu mukino, yavuze ko APR FC ari ikipe we yubaha ku giti cye.

Ati “nuhaba iyi kipe cyane kuko ifitemo abakinnyi beza, kuri iyi nshuro tuzakinira kuri iki kibuga, saa munani biradusaba kwitonda birushijeho.”

Yakomeje agaragaza ko atishimiye na gato ikibuga bazakiniraho ndetse n’isaha bazakiniraho.

Ati “Kuki bahinduye ikibuga n’amasaha? Ndabizi uzi impamvu babikoze, gusa ibi biri ku rwego rwo hasi tugomba gutekereza iterambere ry’umupira w’Afurika, tugatekereza iterambere ry’umupira w’u Rwanda, utekereza ko bazatera imbere kubera gukinira hano saa munani?”

“Oya tugomba kureba ishusho ngari kandi ntabwo uyibonera ku mukino umwe ko wawutsinze ndetekereza ishusho y’umupira w’u Rwanda bisaba kurebera mu ishusho yagutse, ako si akazi kanjye mumbabarire, wenda dushobora gukinira mu muhanda kubera impamvu zimwe na zimwe.”

Yakomeje avuva ko mu minsi ishize yarebye APR FC muri CECAFA Kagame Cup gusa atavuga ko iri ku rwego rwo hejuru cyangwa urwo hasi, gusa ngo bo bari ku rwego rwo hejuru.

Umukino ubanza urabera kuri Kigali Pelé Stadium uyu munsi saa 14h00′ ni mu gihe umukino wo kwishyura uzabera mu Misiri ku Cyumweru tariki ya 5 Ukwakira 2025.