Blog

Kuri uyu wa Gatanu tariki ya 21 Nyakanga 2023, ni bwo habaye ikiganiro n’Itangazamakuru cyari kiyobowe na Umulisa Joselyne watangije umushinga wa Tennis Rwanda Children’s Foundation, kikaba cyabereye mu cyumba cy’Inama cya Marriott Hotel mu Mujyi wa Kigali.

Umulisa yatangiye asobanura imigabo n'imigambi y'uyu muryango n'icyo ugamije ku banyarwanda. Ati: “Intego nyamukuru y’iki kiganiro kwari ukumurikira Abanyarwanda ibijyanye n’uyu Muryango by’umwihariko Itangazamakuru kuko ari ryo ridufasha kugeza ijwi ryacu kure. 

Tennis Rwanda Children’s Foundation ni umuryango udaharanira inyungu, ukaba warashinzwe mu rwego rwo kumenyekanisha umukino wa Tennis mu Rwanda by’umwihariko mu bakiri bato”.

“Imwe mu ntego yacu nyamukuru, harimo gufasha abakinnyi bakiri bato bagera kuri 50 byibuze mu gihe cy’Imyaka iri hagati y’ibiri n’itatu bakaba batangiye guhatana ku rwego mpuzamahanga, babikesha uyu muryango wacu (Tennis Rwanda Children’s Foundation)”.

Agaruka ku mbogamizi bafite yagize ati: “Imbogamizi ya mbere harimo ubuke bw’ibibuga abana bitorezaho, kuko usanga ibyinshi ari iby’amakipe bityo abana kubyisanzuraho bikagorana”.

“Nk’Umuryango ntabwo turabasha kugira ibibuga twigengaho byadufasha gushyira mu ngiro mu buryo bwihuse ibyo twiyemeje, ariko tuzakomeza gukora ubuvugizi aho bishoboka, no gukora ibishoboka byose byafasha abana gukina Tennis kandi bakaryoherwa n’ibyiza biyibamo”.

Abana bagana uyu Muryango {Foundation) Tennis Rwanda Children’s Foundation, baba bari hagati y’imyaka 10 na 13, ku rugero rya 70% baba ari abakobwa mu gihe 30% ari abahungu.

Impamvu uyu mubare utangana, Umulisa avuga ko yagenzuye ibijyanye n’uyu mukino imbere mu gihugu, agasanga harimo intera itari ntoya hagati y’ibi byiciro byombi, bityo yiyemeza guteza imbere iki cyiciro, by’umwihariko nk’imwe mu ntego nyamukuru ya Guverinoma y’u Rwanda, yo gufasha umwana w’Umukobwa kwisanga muri buri cyiciro cy’ubuzima bw’Igihugu.

Nyuma yo gutangiza uyu muryango mu Mujyi wa Kigali mu mwaka ushize w’i 2022, muri uyu mwaka, ibikorwa bya Tennis Rwanda Children’s Foundation bizibanda mu Ntara y’Uburasirazuba b’umwihariko mu Turere twa Bugesera, Ngoma na Kirehe mu Nkambi y’Impunzi ya Mahama ku ikubitiro, nyuma byerekeze mu Ntara y’Amajyaruguru, Uburengerezuba n’Amajyepho.

Kuri ubu, umuryango Tennis Rwanda Children’s Foundation umaze hafi umwaka n’igice utangiye ibikorwa byawo mu Rwanda, ukaba ufite abana bakabakaba 100 ukorana nawo mu kubafasha kuzamura impano zabo muri Tennis.

Umulisa Joselyne ni muntu ki muri Tennis?

Umulisa ni Umunyarwadakazi umaze hafi imyaka 20 akina uyu mukino imbere mu gihugu no ku rwego mpuzamahanga. Yatangiye gukina uyu mukino ubwo yigaga mu mwaka wa kabiri w’amashuri yisumbuye mu mwaka w’i 2003. 

Mbere yo gutangira umwuga wo gutoza, Umulisa yabaye umukinnyi wa Tennis wabigize umwuga by’umwihariko ukina ku giti cye gusa akanyuzamo akanakina na bagenzi be.

Yakiniye ikipe y’Igihugu mu marushanwa atandukanye y’imbere mu gihugu no ku rwego mpuzamahanga. Ni umwe mu bakinnyi babaye nimero ya mbere mu Rwanda mu gihe kitari gito.

Atangira uyu Muryango, Umulisa avuga ko yahereye ku bana 8 gusa b’abakobwa, ariko kuri ubu nyuma y’amezi 18 amaze kugira abana bakina Tennis babarirwa mu 100, akaba abifata nk’ikintu cyo kwishimira.

Umuryango Tennis Rwanda Children’s Foundation watangiriye ku bibuga bya Tennis kuri Sitade Amahoro i Remera mu Mujyi wa Kigali, ibikorwa bikomereza ku bibuga bya Cercle Sportif de Kigali, Nyarutarama Tennis Club, kuri ubu ukaba unakorera muri Vision City Club i Gacuriro.

Umutoza mushya wa APR FC, Thierry Froger yavuze ko abizi neza ko umukino wa Rayon Sports ari umukino ukomeye bityo ko bagomba kuwitwaramo neza.

Uyu mutoza w’umufaransa yerekanywe ejo tariki ya 21 Nyakanga 2023 aho umukino wa mbere azatoza w’irushanwa ni uwa Super Cup izahuramo na Rayon Sports tariki ya 12 Kanama 2023.

Uzaba ari umukino ubanziriza umwaka w’imikino wa 2023-24 aho biteganyijwe ko shampiyona izatangira tariki ya 18 Kanama 2023.

Mu kiganiro cye cya mbere n’itangazamakuru cyabaye ejo hashize, Thierry Froger yavuze ko abizi ko uyu mukino ari ingenzi kuri iyi kipe y’ingabo z’igihugu.

Ati “Umukino wa Rayon Sports ni ingenzi cyane, ni umukino wa mbere w’umwaka kuri APR FC.'

Yavuze ko kuri uyu mukino bazagerageza guhindura ibintu kugira ngo barebe ko batsinda uyu mukino.

Ati “Nziko ari umukino w’ingenzi ku bafana, tuzagerageza guhindura ibintu.”

APR FC yagarutse kuri gahunda yo gukinisha abanyamahanga yamaze kugura abanyamahanga 7 na Danny Ndukumana uzakina nk’umunyarwanda.

Abanyamahanga baguzwe ni umunyezamu Pavelh Ndzila ukomoka muri Congo Brazaville, Umugande Taddeo Lwanga, Abanya-Cameroun, Joseph Apam Assongue na Salomon Bienvenue Banga, umunya-Sudani Sharaf Eldin Shaiboub Ali ndetse na rutahizamu ukomoka muri Nigeria, Victor Mbaoma

Thierry Froger yavuze ko umukino wa Rayon Sports ari ingenzi cyane

APR FC yakoze imyitozo yiyereka abafana muri Kigali Pelé Stadium bari baje kwihera ijisho abanyamahanga yaguze.

Ni imyitozo yabaye ku gicamunsi cyo kuri uyu wa Gatanu tariki ya 21 Nyakanga 2023, ni nyuma y’ikiganiro n’itangazamakuru aho barekanye umutoza mushya Thierry Froger w’Umufaransa wahawe amasezerano y’umwaka umwe.

Hahise hakurikiraho imyitozo ya APR FC yakozwe n’abakinnyi bashya 6 ari bo; Pavelh Ndzila, Taddeo Lwanga, Nshimirimana Ismaïl Pitchou, Joseph Apam Assongue, Sharif Shaiboub na Ndikumana Danny uzakina nk’umunyarwanda.

Iyi myitozo ikaba yakurikiranywe n’abafana benshi ba APR FC bari buzuye muri Kigali Pelé Stadium.

Bari bafite amatsiko menshi yo kubona abakinnyi b’abanyamahanga ikipe yabo yaguze, ni nyuma y’imyaka 11 ikinisha abanyarwanda gusa.

Mu bakinnyi batakoze ni umunya-Cameroun, Salomon Bienvenue Banga n’umunya-Nigeria, Victor Mbaoma.

Nshimirimana Ismaïl Pitchou wavuye muri Kiyovu Sports

Umugande Taddeo Lwanga

Niyomugabo Claude usanzwe muri APR FC

Abafana ba APR FC bari bishimye

Bari benshi cyane kuri Kigali Pelé Stadium

Byari ibyishimo ku bafana ba APR FC

AMAFOTO: Kigali Today

Mu rukerera rwo kuri uyu wa Gatandatu, saa munani z’ijoro kuri DRV PNK Stadium nibwo amateka mashya yandikwaga muri Leta Zunze Ubumwe za Amerika. Nyuma yuko yerekanwe muri Inter Miami, Lionel Messi yakinnye umukino we wa mbere.

Iyi kipe ya Inter Miami yari yakinnye na Cruz Azul mu irushanwa rya League Cup. Umukino watangiye Inter Miami yari imbere y’abafana bayo ariyo ifungura amazamu mbere ku gitego cyari gitsinzwe na Robert Taylor Thomas ku munota wa 44.

Mu gice cya kabiri Cruz Azul nayo yaje kwishyura ku munota wa 65 umukinnyi witwa Uriel Antuna atsinda igitego. 

Iminota 90 y’umukino yaje kurangira amakipe yombi akinganya maze umusifuzi yongeraho iminota, bigeze ku munota wa 4 w’inyongera Lionel Messi wari winjije mu kibuga asimbuye ku munota 54, yahawe kufura ayirekura neza umuzamu wa Cruz Azul ntiyamenya ibyabaye inshundura zihita zinyeganyega.

Umukino warangiye Inter Miami yegukanye intsinzi nyuma yo gutsinda ibitego 2-1. Uyu wari umukino wa mbere kuri Lionel Messi ndetse na Sergio Busquets muri Inter Miami ndetse bose binjiye mu kibuga basimbuye ku munota umwe wa 54.

Uyu mukino kandi wari witabiriwe n’ibyamamare bitandukanye birimo umunyamiderikazi Kim Kardashian ndetse n’umukinnyi wa Basketball muri NBA, Lebron James ndetse na Selena Williams.

Nyuma y’uko Messi atsinze igitego gitanga intsinzi ku mukino we wa mbere mu minota ya nyuma ari mu kiganiro n’itangazamakuru yahise avuga ko yashakaga gutanga ibyishimo ku bantu bari bagiye kumureba.

Ati”Twashakaga gutangirana intsinzi ku bantu bari baje kureba umukino. Byari ngombwa gutangira umuntu atsinda. Nagize amahirwe ya nyuma yo kugerageza gutsinda maze ku bw’amahirwe aba ari ko bigenda”.

Lionel Messi yakoze amateka ku munsi we wa mbere muri Inter Miami 

Uko Messi yarekuye kufura ivamo igitego 

David Beckham ari kumwe n’umugore we bari kwihera ijisho umukino 

Lebron James ahoberana na Messi mbere y’umukino 

Kim Kardashian yitabiriye uyu mukino ari kumwe n’abana be bambaye imyambaro yanditseho Messi mu mugongo