Blog

Rutahizamu wa Real Madrid ukomoka mu Bufaransa, Kylian Mbappé yavuze ko batazigera batererana mugenzi wabo, Vinicius Jr ku irondaruhu akorerwa aho mu ijoro ryakeye yiswe inkende inshuro 5.

Hari mu mukino wa Champions League aho bari Basuye Benfica bakayitsinda 1-0.

Iki gitego cyatsinzwe na Vinicius Jr, ubwo yari amaze kugitsinda yahawe ikarita y’umuhondo kubera uburyo yakishimiyemo.

Umukino waje guhagarara iminota igera ku icumi ubwo Vinícius Júnior yagaragazaga ko yakorewe irondaruhu na Gianluca Prestianni ukinira Benfica, akabibwira Umusifuzi François Letexier, ndetse we na bagenzi be bikura mu kibuga by’igihe gito.

Vinicius nyuma y’uyu mukino yagize ati “Abakora irondaruhu, hejuru ya byose ni ibigwari. Bisaba ko bashyira imipira bambaye ku minwa yabo ngo bagaragaze uburyo ari abanyantege nke.'

“Nta kintu cyabaye uyu munsi gishya mu buzima bwanjye n’ikipe yanjye, nahawe ikarita y’umuhondo kubera kwishimira igitego, sinzi impamvu nayihawe.”

Rutahizamu w’umufaransa bakinana, Kylian Mbappe yavuze ko Gianluca Prestianni atakongeye gukina muri Champions League kuko yise Vinicius inkende inshuro eshanu zose.

Ati “Prestianni ntakwiye kongera gukina Champions League hagatangwa urugero no ku bandi bana.”

“Yise Vinicius inkende inshuro eshanu, eshanu, nabyiboneye neza. Isura ye ntibeshya. Ntabwo bikwiye.”

Yakomeje avuga ko batazigera batererana Vinicius Jr, yasabye UEFA gukora iperereza cyane ko bafite amacamera.

Umutoza wa Benfica, Mourinho wanahawe ikarita itukura ku munota wa 85, yavuze ko atumva impamvu aho Vinicius Jr yakiniye hose havuka ikibazo nk’iki

Ati “Hari ikintu kitagenze neza kuko biraba muri buri stade. Buri kibuga aho Vinícius akinira, hari ikintu kiba, buri gihe.'

Yakomeje agira ati “Prestianni yambwiye ibye na Vinicius ambwira ibitandukanye n’ibyo Prestianni yambwiye. Si nshaka gufafa uruhande.”

Mourinho ukomoka muri Portugal kandi yavuze ko yabwiye Vinicius ko yatsinze igitego cyiza ariko uburyo yakishimiyemo bidakwiye.

Myugariro w’Umwongereza ukinira Real Madrid, Trent Alexander Arnold, yagize ati “Ndatekereza ko ibyabaye muri iri joro ari igisebo ku mupira w’amaguru ndetse byatwikiriye umusaruro wawubonetsemo n’igitego cyiza cyatsinzwe.'

Ku ruhande rwe, Gianluca Prestianni yavuze ko nta rondaruhu yakoreye Vinicius Jr ndetse ko atanabitekereza.

Ati “Ndashaka gusobanura ibintu neza ko nta rondaruhu nakoreye umukinnyi wa Real Madrid, Vinicius Jr wumvise nabi ibyo navuze.”

Amakuru avuga ko UEFA igiye gufungura iperereza kuri iki kibazo bakamenya aho ukuri kose kuri.

Real Madrid izakira Benfica ku wa Gatatu w’icyumweru gitaha mu mukino wo kwishyura.

Prestianni yahakanye iby’irondaruhu yashinjwe gukorera Mbappe

Mourinho ngo ntazi impamvu aho Vinicius yakiniye hose havuka ibi bibazo

Trent Alexander Arnold yavuze ko ibyabaye bidakwiye

Mbappe yavuze ko batazigera batererana mugenzi wabo

Police FC irakira APR FC mu mukino w’umunsi wa 21 ibura abakinnyi bane kandi babanza mu kibuga.

Uyu mukino ukaba uteganyijwe kuzaba ku wa Gatanu tariki 20 Gashyantare 2026 kuri Kigali Pele Stadium.

Police FC ikaba izakira uyu mukino idafite bamwe mu bakinnyi kandi basanzwe babanza mu kibuga.

Ku ikubitiro izaba idafite rutahizamu wayo Byiringiro Lague ndetse n’umukinnyi ukina mu kibuga hagati, Musanga Henry bafite amakarita 3 y’imihondo atabemerera gukina umunsi wa 20.

Abandi bakinnyi izaba idafite ni ba myugariro Ndayishimiye Dieudonne [Nzotanga] wagiriye imvune ku mukino wa Rayon Sports na Isaac Eze usanzwe ufite imvune.

Byiringiro Lague afite amakarita atamwemerera gukina n’ikipe yahozemo

Nzotanga yagiriye imvune ku mukino wa Rayon Sports

Isaac Eze afite imvune ntazakina na APR FC

Msanga Henry afite amakarita atatu

Kalisa Ernest wamamaye nka Samusure muri Sinema Nyarwanda, yavuze ko Bruce Melodie atigeze yanga kumugurira itike ahubwo yagiye kuyigura agasanga yarayibonye, bumvikana ko azamufasha mu bindi.

Ni nyuma y’uko mu mpera z’umwaka ushize Samusure yari yasabye uyu muhanzi itike imucyura imukura Mozambique undi akemera.

Gusa ntabwo ari yo yaziyeho ibintu ahamya ko nta kibazo kirimo cyane ko atigeze yanga kuyitanga.

Ati “Hatazagira uwongera kumbaza ikibazo cya Melodie, namusabye itike aremera ariko ntabwo yari azi igihe mbishakira, urumva njye nabishakaga muri uku kwezi kwa Kabiri, nta nubwo yari azi uburemere bw’impamvu nshaka gutaha kandi ntabwo yari yiteguye.”

Samusure yavuze ko Melodie bukeye yamuhamagaye akamubwira ko abona mu minsi mikuru amatike ahenze cyane, undi amubwira ko yakwitonda akareba mu kwa Mbere kose itike ihendutse cyane ko we ashaka kuzaza mu kwa Kabiri.

Yakomeje agira ati “Hari umuntu witwa Hope hashize iminsi arambaza ikibazo cya tike cyarakemutse? Nti oya Melodie aracyahuze ariko azabikora. Arambwira ngo ndumva hari icyo nabikoraho maze Melodie akazagufasha mu bindi, urumva ataragize neza? Itike yo kujya cyangwa kuva Mozambique si amafaranga make, hejuru y’amadorali 500 bitewe n’indege wateze.”

Yakomeje avuga ko Melodie yamuhamagaye ashaka kwishyura akamubwira ko yamaze kwishyurwa.

Ati “Melodie yaje kumpamagara ashaka kugura itike mubwira ko yaguzwe, sinari kumubwira ko ntayo njye ndi inyangamugayo, ahubwo ndamubwira ngo wafasha mu bindi, ampuza n’umwe mu bareberera inyungu ze, arambwira ngo ningera i Kigali nzabashake, ubu ninduhuka nzabashaka kuko n’utwo dutebe two mu rugo turakeneye.”

Samusure akaba yarageze mu Rwanda tariki ya 12 Gashyantare 2026 aho yari avuye muri Mozambique yari amaze imyaka 3 yarimukiye.

Samusure yavuze ko impamvu ataziye kuri tike ya Melodie atari uko yayimwimye ahubwo hari iyabonetse mbere we yemera gufasha mu bindi

Bruce Melodie yemeye kumufasha mu bindi

Junior Rumaga yasabye abasore kureka kumenyereza abakunzi babo kubaha ibintu bazi neza ko batazakomeza kubibabonera kuko nabyo biri mu bituma batandukana hadateye kabiri.

Umusizi Rumaga wa Nsekanabo uzwi nka Junior Rumaga yavuze ko uko umusore akomeza kwirarira ku mukobwa bakundana kugera no ku kwikokora utwo afite twose kugira ngo amuhe n’ibyo amusaba birenze ubushobozi faranga bwe biba bisa nko kwicira inzira yo gutandukana mu gihe bitabonetse.

Mu kiganiro na ISIMBI, Rumaga yagize ati 'Niba umumenyereza ibintu kandi birenze ubushobozi bwawe ku buryo wabimuha buri munsi, uri gufungura icyumba cye cy’inzara gishobora kuzasibwa n’undi. Ntawe ugira inzara y’icyo atazi.'

Rumaga yanakomoje ku mpungenge akomeje guterwa no kuba ibintu byose byakabaye bikorerwa imbere mu miryango bisigaye biri ku mbuga nkoranyambaga mu gufatwa nko gutera imbere byadutse.

Ati 'Kuri ubu abantu bamaze kubishyira ku gashyorongamuhogo ku buryo ibintu byose bisa nk’aho mushaka guhuruza imbaga cyangwa bababone kandi ntabwo muzi ko byose biza bikamunga hamwe mwubakira n’umuryango wanyu.'

Mu kwezi gushize nibwo Akarere ka Huye kahaye Rumaga umusozi wa Kiruri ubumbatiye amateka menshi ya gihanzi, aho Rumaga yiyemeje kuwubyaza umusaruro mu buryo bwo kwagura inganzo ye n’abo bakorana muri Siga Rwanda.

Rumaga yasabye abahungu kureka kumenyereza abakunzi babo ibyo batazahora babona

Umunyamideli w’Umunya-Tanzania Hamisa Mobetto yahawe imodoka y’agatangaza n’umugabo w’umukinnyi w’umupira w’amaguru ukomoka muri Burkina Faso, Stéphane Aziz Ki, mu rwego rwo kwizihiza isabukuru y’umwaka umwe bamaze bashyingiranywe.

Aziz Ki usanzwe akinira Waydad AC, yifashishije urukuta rwe rwa Instagram , agaragaza amarangamutima akomeye afitiye umugore we, anamushimira uko babanye muri uwo mwaka wa mbere w’ishyingiranwa.

Yagize ati: 'Uyu munsi turuzuza umwaka umwe. Ndashimira Imana. Nishimiye amahoro, iterambere n’amasengesho dusangiye. Imana ikomeze kutuyobora, irinde urugo rwacu kandi yongere urukundo n’ubwumvikane hagati yacu. Ndagukunda cyane.'

Mu rwego rwo kwizihiza uyu munsi wihariye, Aziz Ki yahaye Hamisa Mobetto impano y’imodoka nshya, agaragaza ko ari uburyo bwo kumushimira.

Yagize ati 'Iyi ni impano nto igamije kukwereka uko ngushimira, uri umugore wihangana, ufite imbaraga, wuje urukundo kandi ugaragaza urumuri mu buzima bwanjye.'

Yakomeje avuga ko nta mpano n’imwe ishobora gusobanura neza urukundo amufitiye.

Ati 'Nta mpano ihenze naguha ishobora kugaragaza uko ngukunda kandi ngushimira. Uri umugisha ukomeye mu buzima bwanjye.'

Akaba yamuhaye imodoka yo mu bwoko bwa Mercedes-Benz G-Class ikaba izwi nka G-Wagon.

Aba bombi bashyingiranywe ku wa 16 Gashyantare 2025 mu mujyi wa Dar es Salaam, mu birori byitabiriwe n’inshuti n’imiryango yabo. Mbere y’ubukwe, Aziz Ki yari yatanze inkwano y’inka 30.

Imodoka yahaye Mobetto

Ubwo yamuhaga urufunguzo

Byari ibyishimo ku mpande zombi

Aziz Ki na Mobetto barizihiza umwaka bamaze bashyingiranywe

Mobetto yashimiye Aziz Ki

Samusure yahishuye ko ubwo yahungiraga mu gihugu cya Mozambique yabanje gufatwa na benshi mu banyarwanda bahakorera nk’umuntu watumwe na Leta y’u Rwanda kuneka abavuga rumwe nayo.

Kalisa Ernest wamamaye muri sinema nyarwanda nka Samusure yavuze ko ibi byo gufatwa nabi muri sosiyete ngari y’abanyarwanda bakorera mu mujyi wa Maputo ahanini byaturukaga ku kuba batiyumvisha uburyo umuntu wari ufite izina ry’ubwamamare nk’irye yashoboraga kwisanga atakambira gukora akazi rimwe na rimwe gafatwa nk’akagayitse.

Mu kiganiro yagiranye na ISIMBI, Samusure yanagaragaje ko uku kwitiranwa n’umukozi w’inzego z’ubutasi bw’u Rwanda byagiye bigakwirakwira mu buryo bukomeye kugera n’aho yigeze kwishyurwa igice cy’ibanze cy’amafaranga kugira ngo aze kuyobora imihango y’ubukwe bumwe bw’abanyarwanda baba muri iki gihugu akaza kuyagumana adakoze akabwirwa ko bitagikunze kubera kumwishisha.

Ati 'Hari ubukwe bw’abanyarwanda nagombaga kujya kuyobora ndetse bari babanje no kunyishura amadolari 300 gusa nyuma mbere y’uko buba ababyeyi babwira uwari watekereje kumpa akazi bati 'ariko warasaze, urazana Samusure hano uzi icyamuzanye koko. Uriya araneka.’ '

Uyu wakinnye yitwa 'Rulinda” muri filime 'Seburikoko’ yavuze ko ku ntangiriro yabanje kubura akazi bidaturutse ku kutagira icyo ashobora gukora ahubwo ko ahanini byavaga mu ndorerwamo yo gufatwa nk’umuntu wifashije kandi utagenzwa na kamwe.

Ati 'Nubwo nari ku gitutu cyo gupagasa ngo mbone uko nishyura abo nari mbereyemo imyenda ariko nkigerayo sinabonye akazi. Nta muntu washoboraga kumpa akazi kuko bose babaga bibaza niba nagakora kubera kubisanisha n’uko banzi.'

Samusure yavuye mu Rwanda mu Kwakira 2022, icyo gihe akaba yaratangaje ko yari yimukiye i Maputo muri Mozambique nyuma yo guhura n’ikibazo cy’abantu yari afitiye amadeni ndetse bamwe batangiye no kumurega ahitamo kujya gushakira amafaranga mu mahanga aho gufungirwa mu Rwanda.

Uyu mugabo yavuze ko yageze igihe yumva yakwiyahura bitewe n’uko ubuzima bwari bwamucanze amadeni yabaye menshi, gusa ngo hari umugore waje kumureba amubwira ko hari inzozi yarose ahatirwa kuza kuzimubwira.

Yamubwiye ko umugisha we wose azawunona, yishyuriwe amadeni yari afite, arinzwe gereza gusa na we hari ibyo agomba kwigoma birimo ubusambanyi ikirenze kuri ibyo, umudayimoni wo kwiyahura umurimo agomba kuwurwanya.

Akimubwira ibyo kwiyahura kuko nta muntu n’umwe yari yarabibwiye yahise amenya ko ari Imana imumutumyeho. Ni bwo yahise ahungira Mozambique aciye muri Tanzania.

Uwizeyimana Sylvestre uzwi nka Wasili yamaze guhindurirwa inshingano muri iyi kipe aho ubu ari we ushinzwe itangazamakuru n’itumanaho muri Rayon Sports by’agateganyo.

Wasili usanzwe ari umuvugizi w’abafana b’iyi kipe akanakora ikiganiro ‘Rayon Time’, azakomeza kubifatanya n’izi nshingano.

Yahawe izi nshingano nyuma y’uko Ngabo Roben wari ushinzwe itangazamakuru n’itumanaho asezeye kuri izi nshingano tariki ya 10 Gashyantare 2026, ubuyobozi bw’iyi kipe bukaba bwarashyizeho Wasili nk’umukozi ukoresha imbuga nkoranyambaga by’agateganyo.

Amakuru ISIMBI yamenye ni uko Wasili yashyizweho by’agateganyo mu gihe hakirimo gushakwa uzajya ubikora cyane ko we yumva yakoze inshingano asanganywe zo kuba umuvugizi w’abafana.

Uwizeyimana Sylvestre, akaba afite igikundiro cyane mu bafana b’iyi kipe bitewe n’uburyo avugamo ikipe yabo, amagambo ayitaka bituma buri mufana yumva yaza kuyireba ku kibuga.

Iyo bigeze kuri mukeba uburyo ayisererezamo ni bimwe mu bimwongerera igikundiro ku buryo benshi bemeza ko bigoye kuba wabona uwabikora neza kumurusha.

Nyuma y’umunsi wa 20 wa Shampiyona (Rayon Sports imaze gukina 19) iri ku mwanya wa 6 n’amanota 32 mu gihe APR FC na Al Hilal za mbere zifite 38.

Wasili yahinduriwe inshingano

Inkuru nziza ku bakunzi ba Rayon Sports nyuma y’uko abakinnyi batatu bayo bari bamaze iminsi bafite ibibazo by’imvune batangiye imyitozo.

Abo bakinnyi ni Nshimiyimana Fabrice, Habimana Yves ndetse na myugariro w’Umunya-Senegal, Youssou Diagne.

Youssou Diagne wari inkingi ya mwamba mu bwugarizi bwa Rayon Sports umwaka ushize w’imikino, yagize imvune tariki ya 24 Ukuboza 2025 ubwo iyi kipe yari mu myitozo yiteguraga umukino w’umunsi wa 13 wa shampiyona ya 2025-26.

Rutahizamu Habimana Yves we yagiriye ikibazo cy’imvune y’akagombambari mu myitozo ya Rayon Sports tariki ya 27 Mutarama 2026.

Aba bakinnyi bose bakaba basubukuye imyitozo na bagenzi babo uyu munsi ku wa Mbere tariki ya 16 Gashyantare 2026 ubwo ikipe yarimo ikora imiyitozo yitegura umukino w’igikombe cy’Amahoro ifitanye na City Boys ku wa Gatatu tariki ya 18 Gashyantare 2026.

Uko ari babatu bakaba batangiye gukorera ku ruhande imyitozo yoroheje ntabwo baratangira gukora imyitozo yuzuye bakorana n’abandi.

Habimana Yves yasubukuye imyitozo

Fabrice na we yari amaze iminsi atagaragara kubera imvune

Youssou Diagne yari amaze iminsi hanze y’ikibuga

Zuchu, yatangaje ko nubwo yishimiye impano y’isakoshi y’igiciro yahawe n’umugabo we Diamond Platnumz, ngo iyo aza kubimenya mbere yari gusaba guhabwa amafaranga yayiguze aho kuyigurirwa.

Ibi yabitangaje nyuma yo gutaramira abakunzi b’umuziki mu birori bya GaraBallantines byabereye muri Milimani City ku wa Gatandatu tariki 14 Gashyantare 2026.

Iyo sakoshi yahawe gifite agaciro kagera kuri miliyoni 21 z’amashilingi ya Tanzania, ni ukuvuga asaga miliyoni 11 mu mafaranga y’u Rwanda.

Zuchu yavuze ko nubwo yari impano nziza kandi igaragaza urukundo, atari cyo yari akeneye cyane muri icyo gihe.

Yagize ati 'Mu by’ukuri, iyo nza kumenya ko Diamond agiye kungurira isakoshi y’agaciro kangana kuriya, nari kumusaba kumpa amafaranga aho kuyashyira mu byo kuyingurira, kuko si cyo nari nkeneye.'

Nubwo yavuze ko amafaranga ari yo yari kumufasha kurushaho, Zuchu yemeye ko impano nk’izo na zo zifite agaciro kihariye, cyane cyane iyo zitanzwe mu rwego rwo kugaragaza urukundo no kwita ku wundi.

Muri ibyo birori byahuje ibyamamare byinshi, Diamond Platnumz yagaragaje urukundo rudasanzwe ubwo yatumiye Zuchu ku rubyiniro bakabyinana imbere y’abafana benshi.

Ibi birori byitabiriwe n’ibyamamare bitandukanye mu myidagaduro ya Tanzania, aho abahanzi n’ibindi byamamare birimo Ben Pol bagaragaye mu myambarire itangaje.

Zuchu yavuze ko isakoshi Diamond yamuhaye atari yo yari akeneye, yari akeneye amafaranga