Blog

Kiyovu Sports yongeye gutsindwa muri FIFA iyitegeka kwishyura uwahoze ari umukinnyi wayo, Muzamiru Mutyaba miliyoni 11 z’amafaranga y’u Rwanda.

Kiyovu Sports imaze iminsi mu itangazamakuru ivugwamo inkuru zitandukanye cyane cyane izitari nziza.

Ibyari bishyushye muri iyi minsi uburyo ikipe yakuwe muri Kiyovu Sports igarurwa gucungirwa mu Muryango wa Kiyovu Sports ni mu gihe Umuyobozi wa Kiyovu Sports Company Ltd, Mvukiyehe Juvenal atabyemera.

Mu gihe bitarafata umurongo neza, muri iyi kipe hongeye kuza indi baruwa iturutse mu Mpuzamashyirahamwe y’Umupira w’Amaguru ku Isi (FIFA) iyimenyesha ko yatsinzwe ikirego yarezwemo n’umugande, Muzamiru Mutyaba.

Muri 2021 nibwo Muzamiru Mutyaba yasinyiye Kiyovu Sports amasezerano y’imyaka 2 aho bumvikanye amafaranga y’u Rwanda miliyoni 20.

Muri aya mafaranga yishyuwe miliyoni 10, andi akomeza kugenda yishyuza ariko arinda asoza amasezerano ye muri Nyakanga 2023 atishyuwe.

Uyu mugabo yanagiye ikipe imufitiye n’ibirarane by’umushahara ndetse n’uyu mwenda. Muzamiru Mutyaba yahise ajya kurega muri FIFA.

Tariki ya 25 Kanama 2023 FIFA yamenyesheje Kiyovu Sports ko igomba kwishyura uyu mukinnyi miliyoni y’amafaranga y’u Rwanda y’umushahara yari afitiwe.

Akaba agomba kwishyurwa kandi miliyoni 10 z’amafaranga y’u Rwanda nk’amafaranga yaguzwe yari asigawemo, yiyongeraho inyungu ya 5% yayo ku mwaka kuva tariki ya 31 Nyakanga 2022 kugeza igihe azishyurirwa.

Iyi kipe yahawe iminsi 45 yo kwishyura aya mafaranga kuva tariki ya 25 Kanama 2023 itabikora ikazabuzwa kwandikisha abakinnyi bashya.

Muzamuru Mutyaba abatsinze nyuma ya Vuvu Pinoki na we bishyuye ndetse n’abanya-Sudani, John Mano ndetse Shiboub bayitsinze muri FIFA.

Iyi kipe kandi haheruka gusohoka ibaruwa ya Igitego Hotels yishyuza Kiyovu Sports miliyoni zigera ku 153 za serivisi bayihaye.

Muzamuru Mutyaba yatsinze Kiyovu Sports muri FIFA

Umunyarwandakazi Mukansanga Salima ari mu basifuzi 5 bakuwe muri 32 n’Impuzamashyirahamwe y’Umupira w’Amaguru muri Afurika (CAF) bagomba kuzasifura igikombe cy’Afurika.

Mukansanga Salima wasifuye igikombe cy’Isi cy’abagabo ndetse n’Igikombe cy’Isi cy’Abagore yari mu basifuzi bo hagati 32 bari batoranyijwe na CAF gufata amasomo ya nyuma bitegura gusifura igikombe cy’Afurika cya 2023 kizabera muri Côte d’Ivoire muri Mutarama 2024.

Aya masomo yasize abasifuzi batanu barimo Mukansanga Salima baje gukurwamo ku munota wa nyuma bakaba batazasifura iki gikombe.

Bivugwa ko Mukansanga Salima basanze atari ku rwego CAF yifuza kugira ngo abe yasifura imikino y’abagabo.

Hari kandi umusifuzi wanditse izina muri Afurika, Bacary Gassama aho we ngo ashinjwa imisifurire itari myiza mu mikino yose ya CAF.

Undi musifuzi watunguye benshi kuri uru rutonde ni umunya-Zambia, Janny Sikazwe. Uyu we bivugwa ko ashobora kuba yarazize ikosa yakoze mu gikombe cy’Afurika cy’ubushize aho yasoje umukino wa Tunisia na Mali ku munota wa 85 habura iminota 5 ngo umukino urangire.

Umunya-Senegal, Maguete N’diaye n’umunya-Afurika y’Epfo, Victor Gomez bo basanze bafite amakosa menshi mu mikino ya CAF bagiye basifura.

Mukansanga Salima yakuwe ku rutonde rw’abazasifura igikombe cy’Afurika

Irushanwa ngarukamwaka ry’amagare rya Grand Prix Chantal Biya riri kubera muri Cameroon, abanyarwanda banze kurekura ndetse bari gucungira hafi bamwe mu bakinnyi bahanganye. Kuri uyu wa Gatatu, hakinwaga agace ka kabiri, aho abakinnyi bahagurutse i Younde, banyura Ebolowa, basoreza Nkolandom.

Yari intera ingana na Kilometero 165.2. Hamza Yacine ukomoka muri Algeria niwe wabaye uwa mbere, akoresheje amasaha imota 46 n’amasegonda 46. Chren Martin yabaye uwa kabiri akoresheje ibihe bingana n’iby’uwa mbere. Tuyizere Etienne niwe munyarwanda waje hafi, aho yaje ku mwanya wa 7 akoresheje ibihe bimwe n’uwa mbere.

Muhoza Eric yabaye uwa kabiri mu banyarwanda, aba uwa 9 muri rusange nawe akoresheje ibihe bimwe n’uwa mbere. Nyuma y’aka gace ka kabiri, Muhoza Eric yambaye umwenda w’umukinnyi uzi guterera agasozi.

Ku rutonde rusange nyuma y’uduce tubiri tumaze gukinwa, Hamza Yacine ni uwa mbere, aho amaze gukoresha amasaha 6 iminota 20 n’amasegonda 26. Muhoza Eric niwe munyarwanda uza hafi ku rutonde rusange aho ari ku mwanya wa 13 akaba anganya ibihe n’uwa mbere.

Kuri uyu wa Kane, abasigwa barakina agace ka 3, kaza guhaguruka Ebolowa kagasoreza Mengong, ku ntera ya Kirometero 104.2

Iri rushanwa riri ku rwego rwa 2.2, uyu mwaka rigizwe n'uduce dutanu gusa aho rizasozwa ku wa Gatandatu, tariki ya 7 Ukwakira.

Ryitabiriwe n'amakipe y'ibihugu bya Cameroun, Burkina Faso, Bénin, Algérie, Maroc, u Rwanda na Côte d'Ivoire. Hari kandi n'amakipe asanzwe yo mu Bufaransa [Team France Defense], Slovakia [Banská Bystrica] na SNH yo muri Cameroun.

Muhoza Eric niwe wambaye umwenda w’umuzamutsi mwiza 

Amza Yacine niwe kuri ubu uyoboye itsinda muri rusange

Iyo muganira agaragaza ko afite icyizere cy'ubuzima bw'ejo hazaza uko byagenda kose. Iyi ni imwe mu nkuru z'abakobwa bagiye bava mu miryango asangiye n'abandi benshi banyura mu buzima nk'ubu bagateseka ku buryo kubona ahazaza habo biba bigoye.

Guverinoma yagiye ishyiraho ingamba zinyuranye mu kwita kuri buri umwe; ariko kandi imiryango ikangurirwa kwita ku burere bw'umwana. Hari abantu ku giti cyabo n'imiryango itegamiye kuri Leta ikoresha ubushobozi bafite mu guhindura ubuzima bw'abakobwa n'abagore.

Uwimana Delphine afite inkuru itangaje mu rugendo rwe rw'ubuzima. Asanzwe ari umuganga ariko wahisemo kuba rwiyemezamirimo abinyujije mu guteza imbere abakobwa n'abagore mu rwego rwo guharanira ubuzima bw'abo.

Yize kuvura mu bihugu by'amahanga, agarutse mu Rwanda asanga abakobwa n'abagore bakuranye mu Karere ka Gakenke bugarijwe n'ubukene, bituma yiyemeza gutangiza ishuri ryigisha kudoda ndetse no kwihanganira imirimo.

Yabanje kwakira abanyeshuri babarizwa mu cyiciro cya mbere 1 n'icya 2 cy'ubudehe, abacikirije amashuli, impfubyi, ababana n'ubumuga n'ababyariye iwabo.

Bahabwa amahirwe yo kwiga ku buntu mu gihe cy'umwaka bagasoza bafite ubumenyi n'ubushobozi bukenewe ku isoko ry'umurimo.

Uwamahoro yabwiye InyaRwanda ko gutangiza iki kigo byasembuwe n'igihe yamaze akorana na koperative z'abakobwa n'abagore abigisha imyuga mu gihe cy'amezi atatu, akabona bidahagije, ahubwo akiyemeza kubahuriza hamwe kugira ngo bajye banahabwa impamyabumenyi.

Ibi ariko byanasembuwe n'uko yabonaga hakenewe ko imyuga ihuzwa no guhanga udushya. Ati 'Byongeye nkabona imyuga gusa itavanze na guhanga udushya, bidahagije kugira ngo tureme akazi karambye ku bakobwa dufasha.'

'Ni bwo nibwiye ko kugira ngo tubafashe mu buryo burambye ari ukubaha inyigisho nibura z’umwaka zabahindurira ubuzima.'

Avuga ko nyuma yo gushyira ku isoko aba banyeshuri ikigo kinabaherekeza mu buzima bwo gushaka imirimo no kwisanga ku isoko.

Ati 'Icyo gihe babasha kubona inyungu ihorahora ku buryo byibuze babasha kubona ibyo kubatunga mu buzima bwa buri munsi.'

Ku wa Kabiri tariki 3 Ukwakira 2023, ishuri ryatanze impamyabumenyi ku banyeshuri 63, basanga abandi 52 bahawe izi mpamyabumenyi nyuma y'umwaka umwe wari ushize iri shuri rifunguye.

Yubakiye ku kugira uruhare mu guteza imbere imideli mu Rwanda

Uwamahoro avuga ko abakobwa n’abagore yafashije kwiteza imbere akomeza kubagira inama yo kwigirira icyizere ku isoko ry’umurimo, ariko kandi bagakora ibikorwa bifite ireme bituma babasha guhangana n’abandi bahuriye ku isoko.

Ati “Iyo uzi neza isoko uriho, ukamenya isoko uriho, ugashyiraho igicuruzwa cyawe rero baba barabikoze, icyo tubabwira ni ukwigirira icyizere, kandi bagakomeza gukora ibikorwa bifite ireme, hanyuma tukanabafasha mu gukomeza kubakurikirana.”

Uwamahoro asobanura ko iri shuri yashinze aribona nk’indorerwamu y'iyaguka ry’uruganda rw’imideli mu Rwanda, ashingiye ku kuba bamwe mu bakora imideli atari ibintu bize, ahubwo babikora kubera ko ari ibintu bakunze.

Ati “Abanyamideli benshi babikora kubera ko babikunda ntabwo ari ibintu bize. Icya kabiri abandi babikora hari igihe usanga babikunda ariko badafite kubishingiraho mu bushabitsi, kandi guhanga imideli n’ubucuruzi nk’ibindi n’ubwo hazamo igice cy’impano n’ubuhanzi.”

Asobanura ko abakobwa n’abagore bigishwa gukora imyenda no kudoda kandi bakigishwa uko babihuzwa n’ubucuruzi buteye imbere ku buryo buri munyamideli wese yabyisangamo.

Yavuze ati “Twiteguye guhaza isoko ry’inaha ntibibe ko ibintu byiza byose bituruka i Kigali.”

Uwamahoro asobanura ko mu rugendo rwo gufasha abakobwa n’abagore gutera imbere, agihura n’imbogamizi aho usanga bamwe mu bakobwa batifitiye icyizere ndetse ntibiyumvishe ko ibyo bagiye gushyira ku isoko bizakundwa n’abantu.

Ngo hari bamwe mu bajijinganya bavuga ko ababyeyi babo batazaborohera. Uwamahoro avuga ko bamwe mu banyeshuri yigisha harimo ababyariye iwabo n’abandi bafashwe ku ngufu.

Avuga ko binyuze muri iri shuri bigisha abakobwa ibijyanye n’imyororokere kugirango buri wese arusheho kumenya ubuzima bwe.

Ati “Twigisha abakobwa kumenya umubiri wabo. Bakamenya izo ngaruka, bakamenya kuba uri umukobwa bivuze iki? Noneho bakamenya icyo bakora bisunze gukoresha amategeko abagenga ajyanye n’ubuzima bw’imyororokere, bakabimenya kandi bakaba basaba n’ubufasha ku mavuriro igihe bibaye ngombwa.”

Uwamahoro yavuze ko banahanze ikoranabuhanga ribafasha kugera ku bakobwa benshi bo muri Gekenke. Iyi ‘Application’ bahanze iriho ‘video’ zinyuranye zifasha abakobwa kumenya birushijeho ubuzima bw’imyororokere.

Uwamahoro Delphine avuga ko urugendo yatangiye arwitezeho kwagura uruganda rw’imideli mu Rwanda. Asanzwe ari umuganga wahisemo kubihuza no gufasha abakobwa n’abagore 

Uwamahoro Delphine avuga ko inzozi ze ari ugukora uko ashoboye Gakenke igatera imbere-Aha ari kumwe n’Umunyamabanga Nshingwabikorwa w’Intara y’Amajyaruguru, Bwana Nzabonimpa Emmanuel


 

Abanyamideli banyuranye bagaragajwe imyambaro yahanzwe nk’imwe mu ntego bihaye yo kuzamura uruganda rw’imideli mu Rwanda 

Bamwe mu banyamideli baracyagaragaza imbogamizi z’irimo ibikoresho bakoresha