Blog

Ni igitaramo cyakurikiye ibiganiro byatanzwe ku ngingo zitandukanye zirimo gukunda igihugu, kwereka aba-diaspora amahirwe ari mu ishoramari ry'u Rwanda, kwirinda ingengabitekerezo ya Jenoside , gahunda ya Ndi Umunyarwanda no kongera kurebera hamwe bishimira ibyo u Rwanda rwagezeho mu nzego zitandukanye zigize ubuzima bw'igihugu.

The Ben werekeje muri Canada ku itariki 20 Ugushyingo 2023 kugirango abone umwanya uhagije wo gukorana n'itsinda ryitwa abasangirankweto ryamufashije ku rubyiniro yaraye ataramiye abarenga 2000 abasiga batanyuzwe kuko wabona badashaka kumurekura.

 The Ben yaririmbye indirimbo ze zabaye ikimenyabose ku bakunda umuziki nyarwanda zirimo 'I am in Love' imyaka 11 isohotse. Iyi ndirimbo yayiteye abari muri sale barahaguruka baririmbana ijambo ku rindi. Bamwe bageragezaga gufata amashusho muri telefone zabo bazasigarana nk'urwibutso. Yageze kuri 'Habibi' yasohotse mu myaka 6 ishize asuhuza abafana mu ntoki bamwe bakanga kumurekura. Ni nayo ndirimbo yasorejeho abasezeye baramwegera agenda abaramutsa badashaka ko batandukana.

REBA UKO MASAMBA, KENNY SOL NA THE BEN BATARAMIYE ABARENGA 2000 MURI CANADA

“>

Ni mu gihe Masamba Intore yaririmbye indirimbo zikumbuza Aba-diaspora u Rwanda. Yateye indirimbo ye yitwa Hobe Hobe Ab'iwacu Muraho asanga bayizi kumurusha. Ni indirimbo yumvikanisha ko abanyarwanda bakwiriye gukunda iwabo.

 Ati:'Umuntu udakunda iwabo ubundi akunda iki? iyo wicaye iwacu mu Rwanda ni nko kwibera mu ijuru…'. Ubwo yateraga iyi ndirimbo abari muri sale bateze amaboko barayibyina ari nako bafata amashusho y'urwibutso bazasigarana.

Masamba Intore yaherukaga muri Canada ku itariki 08 Nzeri 2023 ubwo yahuraga n’abayobozi ba Diaspora nyarwanda iba muri  iki  gihugu

Abarenga 2000 bari bishimiye The Ben

Yateye Habibi abibutsa ibihe by’urukundo

The Ben yaririmbye ‘I am in Love’ imaze imyaka 11 isohotse abari muri sale barahaguruka

The Ben yaririmbye abafana bacana amatoroshi ya telefoni zabo

The Ben agomba kugaruka ku itariki 28 Ugushyingo agakomeza imyiteguro y’ubukwe butegerejwe ku matariki 15-23 Ukuboza 2023.

AMAFOTO: KAMANA ELLY, CANADA

VIDEO :EMMALITO&KAMANA ELLY CANADA

Mu minsi ishize, The Ben nibwo yerekeje mu gihugu cya Canada mu gitaramo agiye kuhakorera. Ariko mbere y’uko agenda yavuze ko ibyo yumva bavuga ko bashaka ‘Battle’ hagati ye na Bruce Melodie atari byiza.

Yagize ati”:Ubundi hateguwe igitaramo abafana ba The Ben na ba Bruce Melodie tukabashimisha byaba byiza. Ijambo Battle muryirinde kuko amateka y’igihugu cyacu yerekana ko ihangana ricamo abantu ibyiciro atari ryiza. Bitewe n’amateka y’igihugu cyacu nta Battle dukeneye”.

Umuhanzi Bruce Melodie nawe ubwo yaganiraga n’itangazamakuru, yagize ati:” None se nyine niba atabishaka ibyo kujya muri ‘Battle, ubwo nyine ntabwo ari ngombwa”.

Abajijwe niba nawe yumva koko atari ngombwa cyangwa se harimo gutinya, yagize ati:” Njyewe ubundi nkorera umuziki amafaranga; ibyo kuvuga ngo habayeho kurwana, ngo gutinya, ngo gutsindwa, icyo nzicyo iyo iza kuba, uko byari kugenda kose nari kuyikuramo amafaranga naho ubundi bitarimo amafaranga mutware kure rwose”.

Melodie avuga ko ubundi mbere na mbere kugira ngo yemere ibya ‘Battle’, yabyumvanye Muyoboke Alex hanyuma nawe agahita abyemera. Mu kiganiro yigeze gukorera ku muyoboro wa Youtube MIE, yagize ati”Nigeze kumva muvuga ibya ‘Battle’ niba nayo muyishaka muzamuzane ubundi mubakubitire akanyafu ku nda ubundi mpite nimanukira”.

Melodie aherutse gushyira hanze indirimbo afatanyije n’umunyabigwi muri muzika y’Isi  Shaggy, indirimbo bise ‘When She’s Around’ ariko kuri ubu iri guca ibintu hirya no hino. 

Binyuze muri iyi ndirimbo, uyu muhanzi agiye gutaramira muri Amerika mu bitaramo yise “iHeartMedia Jingle Ball”.

Melodie kandi yanavuze ko adashobora gutoroka ngo agume muri Amerika kubera ko nta hantu ashobora gukura abantu bamukunda nk’uko Abanyarwanda bamukunda.

Reba ikiganiro Melodie yagiranye na Inyarwanda

“>

Reba indirimbo ‘When She’s Around’ ya Melodie na Shaggy

 

“>

Bruce Melodie yasubije Ben watinye ko bakora ‘Battle’

The Ben aherutse gutangaza ko gukoresha ijambo ‘Battle’ bidakwiye habe na gato

Ibihembo bimaze imyaka itatu bitangwa bya Isango na Muzika, bigiye kongera gutangwa ku nshuro ya kane. Uyu mwaka, Isango Star isanzwe itanga ibi bihembo yongeyemo agashya katari kamenyerewe ko kuzenguruka mu bigo by'amashuri byatoranijwe.

Uyu munsi tariki 25 Ugushyingo 2023, ku ikubitiro iyi gahunda yatangiriye mu ishuri ry'abakobwa rya Maranyundo Girls School riherereye mu Bugesera. Kimwe mu byibanzweho ni ubutumwa bukangurira urubyiruko kwirinda Virusi itera Sida.

Umuyobozi w'ishuri rikuru rya Maranyundo, Sr Musanabaganwa Leatitia yatangiye ashimira Isango Star yatekereje iri shuri ikaritoranya mu bigo bitatu igomba kuzengurukamo mbere yo gutanga ibi bihembo.

Alyn Sano umwe mu bahanzi bahataniye ibihembo bya Isango na Muzika wanegukanye iki gihembo mu 2020, yakirwanye akaruru kenshi k'ibyishimo, yakirwa ku rubyiniro n'umwe mu banyeshuri bari bateguye kumubaza ibibazo ndetse n'umunyamakuru wa Isango Star akaba n'umushyushyarugamba Kayitesi Tessy.

Sano, yahereye ku rugendo rwe muri muzika uko yatangiye aririmba muri korali mu kigo cy'abadive yigagamo, nyuma y'amashuri yisumbuye akaza gukomereza mu itsinda ry'abanyamuziki aho yasubiragamo indirimbo z'abandi.

Alyn Sano yabwiye aba banyeshuri ko yatangiye gukora umuziki nk'umwuga mu 2018 nyuma yo gusoza kaminuza, anabaririmbira gato ku ndirimbo ye ya mbere yise 'Naremewe Wowe.'

Uyu muhanzikazi wavuze ko yakuranye inzozi zo kuba umukinnyi w'umupira w'amaguru, yaganirije abana b'abakobwa ku buryo bakwirinda Virusi itera Sida kugira ngo babashe kugera ku nzozi zabo nta nkomyi.

Yabasobanuriye ko umuziki ari akazi nk'akandi ndetse kabeshaho neza ugakorana ikinyabupfura, aboneraho no gusaba ababyeyi gushyigikirana abana babo bafite impano y'ubuhanzi.

Nyuma yo gusubiza ibibazo byose yabajijwe bijyanye n'urugendo rwe kugeza ubu, Alyn yamanutse mu banyeshuri ataramana nabo mu ndirimbo ze zinyuranye zirimo 'Radiyo,' Boo and Bae, Say Less, None, anabigisha indirimbo iri kuri album ye yise 'Mariya' ishishikariza urubyiruko kwirinda Virusi itera Sida.

Umuganga muri RBC nawe yafashe umwanya ahamagara ku rubyiniro abanyeshuri bafite inzozi zo kuzaba abaganga, maze ababaza ibibazo byerekeranye na Sida. Yabaganirije ku bubi bwayo, ababwira ko inegekaza umubiri ikawuca intege. Yababwiye kandi ko mu rwego rwo kuyirandura burundu, hashyizweho umunsi mpuzamahanga wo kurwanya Sida uba buri tariki ya 01 Ukuboza. Uyu muganga yanabibukije ko kwa muganga bagira serivisi zitandukanye zirimo gupima no kwita ku bafite Virusi itera Sida.

Nyuma y'ubutumwa bwa RBC, hakiriwe Bwiza ku rubyiniro nawe yakiranwa ibyishimo byinshi maze abanza kuganiriza abanyeshuri ku rugendo rwe mu muziki. Yavuze ko mu nzozi yari afite harimo kuba umuhanzi, umukinnyi wa filime cyangwa umukinnyi wa Basketball, ndetse ko izo mpano zose yazigerageje ariko bikaza kurangira abaye umuhanzi. Kuri ubu, afite inzozi z'uko mu myaka itanu iri imbere, azaba ari umuhanzi uhagarariye u Rwanda ku rwego mpuzamahanga, uhagarariye Afurika y'i   Burasirazuba ndetse na Afurika muri rusange.

Yafashe umwanya abwira aba banyeshuri ko bafite umugisha w'uko bagifite ababitaho bakabibutsa kwirinda. Yababwiye ko Sida ari mbi, ababwira ko bakwiye kwishima ariko na none bakibuka kwirinda kuko Sida idapimishwa ijisho.

Bwiza yafashe umwanya munini ataramana n'abanyeshuri, baririmbana indirimbo ze hafi ya zose zirimo 'Yiwe,' Ready, Rumours, Exchange, Do Me, Cinema afatanije na Chriss Eazy n'izindi.

Umuyobozi mukuru wa Isango Star, Marie Leatitia Mugabo Agatesi yashimiye ubuyobozi bw'ikigo cya Maranyundo Girls School n'umuterankunga mukuru w'iki gikorwa, RBC. Yibukije kandi urubyiruko ko arizo mbaraga z'igihugu bityo ko bakwiye kwirinda uko bashoboye, abasezeranya kuzasubirayo kubagira inama by'umwihariko.

Umuyobozi waje uhagarariye umuyobozi mukuru w’Akarere ka Bugesera, yashimiye Isango Star yateguye iki gikorwa hamwe na RBC. Yashimiye kandi ikigo cya Maranyundo Girls School cyemeye gutanga umwanya ndetse n'ibindi byose byifashishijwe muri ubu bukangurambaga, anibutsa urwo rubyiruko ko aribo igihugu kitezeho byinshi.

Biteganijwe ko iki gikorwa cya 'Isango na Muzika Tour' kizakomereza muri Kaminuza y'u Rwanda ishami rya Huye ku wa Gatanu w'icyumweru gitaha tariki ya 01 Ukuboza, ubundi gisorezwe i Karama ahitwa Norvege ku ya 09 Ukuboza 2023. Ibi bihembo bizatangirwa muri Park Inn Hotel tariki ya 17 Ukuboza 2023.

Umuyobozi mukuru w’ishuri rya Maranyundo Girls School

Uwaje ahagarariye Meya  w’Akarere ka Bugesera yashimiye Isango Star yatekereje iki gikorwa

Muganga waturutse muri RBC yaganirije aba banyeshuri ku bubi bwa Sida na serivise zitangwa kwa muganga

Umuyobozi mukuru wa Isango Star yashimiye ubuyobozi bw’iri shuri bwemeye kwakira igikorwa nk’iki

Bwiza yishimiwe cyane mu ndirimbo yise ‘Do Me’

Yashishikarije urubyiruko kwidagaduro runibuka kwirinda Sida, avuga ko we ari mukuru akoresha agakingirizo

Abanyeshuri bishimiye aba bahanzi ku rwego rwo hejuru

Alyn Sano yifashishije indirimbo ye yise ‘Mariya’ itari izwi na benshi akangurira urubyiruko kwirinda Sida

Yabwiye abanyeshuri ko ibintu byose kubigeraho bisaba ikinyabupura

Sano yahamije ko ubuhanzi ari akazi nk’akandi kandi kabeshaho ugakora yitangaho urugero

Yaririmbanye n’abanyeshuri bigaragara ko indirimbo ze zose bazizi neza

Yavuze ko mu byo yari yambaye, inkweto n’imisatsi aribyo bihenze kurusha ibindi

Yashishikarije urubyiruko kwirinda ibishuko byugarije urubyiruko by’umwihariko abana b’abakobwa muri iyi minsi

Inkumi za Kigali Protocol nazo zari zihari muri iki gikorwa

Iki kigo cyigamo abakobwa babarirwa muri 430

Abanyeshuri batoranijwe nk’abanyamakuru bafatanyije na MC Tessy kubaza aba bahanzi ibibazo bitandukanye 

MC Tessy usanzwe ari n’umunyamakuru wa Isango Star niwe wayoboye gahunda

Dj Kavori yavanze umuziki, anyura abanyeshuri bo ku Maranyundo

Abanyeshuri bataramye banahungukira ubumenyi

Akanyamuneza kari kose ku bashyitsi bakuru muri iki gikorwa

Umuhanzikazi Irakoze Erica umwe mu bakunzwe cyane mu muziki wo mu Rwanda ndetse no mu Burundi nka Miss Erica, yasezeweho bwa nyuma ndetse ahita anashyingurwa mu cyubahiro mu muhango wabereye mu Burundi.

Miss Erica yasezeweho ku wa 24 Ugushyingo 2023 mu rugo iwe hanyuma ku wa 25 Ugushyingo 2023 ahita ashyingurwa mu marira menshi ndetse n’isanduku yashyinguwemo itwikirizwa ibendera ry’igihugu cy’u Burundi bigaragaza ko yari umuntu ufitiye  igihugu akamaro.

Benshi mu byamamare mu Burundi bitabiriye uyu muhango barimo Sat B, bagaragaje agahinda  ku bwo kuba babuze umuhanzi mugenzi wabo wari ukiri muto kandi hari imbaraga yongerera umuziki wo mu Burundi.

Miss Erica wari ufite imyaka 31, yitabye Imana ku wa 17 Ugushyingo 2023 nyuma y’imyaka 11 akora umuziki mu njyana zirimo Afro Pop, Hiplife, R&B ndetse n’izindi njyana zitandukanye.

Si ugukundwa mu muziki wo mu Burundi gusa, Miss Erica yabaye hafi y’umuziki wo mu Rwanda ndetse akorana n’abanzi bo mu Rwanda barimo Diplomate kandi yaje gukorera muri Kiwundo Entertainment yakoreraga mu Rwanda nyuma iza gusenyuka.

Miss Erica yatwaye ibihembo birimo Buja Music Awards mu 2019 nk'umuhanzikazi mwiza mu Burundi ndetse n'ibya Afrimusic Song Contest yatwaye mu 2020. Icyo gihe yegukanye igihembo cya 'Eurovision Coverage Facebook Buzz Award' n'icya 'Best French Lyric'.

Isanduku ya Miss Erica yatwikirijwe ibendera ry’u Burundi.

Miss Erica yitabye Imana ku myaka 31 gusa.

Nyuma y’icyumweru yitabye Imna, Miss Erica yashyinguwe.

Byari agahinda ubwo MIss Erica yashyingurwaga.

Sat B yari mu bashyinguye Miss Erica.

Umuryango wa Miss Erica wababajwe n’urupfu rwe.

Miss Erica yamaze gushyingurwa.