Blog

Mu minsi ishize ni bwo Umutwe w'Abadepite watoye ku bwiganze umwanzuro wo kweguza Gachagua, aho Abadepite 281 batoye bemeza ko uyu mugabo akwiriye kweguzwa, mu gihe abatoye batemeranya n'iki cyemezo ari 44, nyuma iyi dosiye yahise yoherezwa muri Sena kugira ngo na yo iyifateho umwanzuro.

Amakosa uyu munyapolitiki ashinjwa arimo kubiba amacakubiri no gutesha agaciro ubutegetsi bwa Perezida William Samoei Ruto, no gukoresha umutungo wa Leta mu nyungu ze.

Kuri uyu wa 17 Ukwakira 2024, ni bwo Sena yateranye kugira ngo yige ku bijyanye no kweguza Visi Perezida Gachagua, ndetse na we yari yatumijwe kugira ngo atange ibisobanuro ku makosa ashinjwa, ariko umuhagarariye yavuze ko yafashwe n'uburwayi ndetse akajyanwa mu bitaro, asaba ko Sena yasubika icyo gikorwa kikazaba undi munsi.

Gusa Abasenateri bahisemo gukomeza igikorwa cyo gutorera icyemezo cyo kweguza Gachagua nubwo atabonetse ngo yisobanure, basaba abari bamuhagarariye gusohoka mu cyumba cy'Inteko Rusange, nubwo amategeko yemera ko bari kwimura icyo gikorwa kigasubukurwa undi munsi kugeza ku wa Gatandatu.

Abasenateri 53 muri 67 batoye bemeza ko Visi Perezida Gachagua agomba kweguzwa, bahamya ko ibyaha ashinjwa ari ukuri ko akwiriye kuva kuri uwo mwanya, kuko atubahirije Itegeko Nshinga ry'icyo gihugu nk'uko yabirahiriye.

Nyuma y'uko Sena itoye icyemezo cyo kweguza Visi Perezida, bivuze ko ahita ava muri izo nshingano, Perezida William Ruto akagena umusimbura we bitarenze iminsi 14.

Visi Perezida wa Kenya yegujwe

Iki kibuga cyari cyaravuguruwe mu mwaka wa 2018 gihabwa amatara atandatu meza ajyanye n'igihe ku buryo na nijoro cyakinirwaho, cyazengurukijweho senyenge ndetse kinahabwa imiryango ine yo kwinjiriraho.

Abaturage bavuga ko nyuma y'igihe gito gitashywe kumugaragaro n'Umukuru w'Igihugu ndetse n'Umuyobozi wa Coca Cola ku Isi, abajura batangiye kwiba ibyuma byari bikizengurutse kugeza ubwo n'inzugi bazimazeho kirongera kirangirika.

Muvunyi Eugene utuye mu Kagari ka Nyagakombe, yavuze ko bibabaje kuba ikibuga bubakiwe mu myaka itandatu ishize ndetse kikanatahwa n'Umukuru w'Igihugu cyangirika bikabije.

Yagize ati 'Iki kibuga kugira ngo cyangirike byatewe n'abayobozi batakitayeho, wasangaga nta bantu bashinzwe kukitaho ku buryo abajura bibaga ibikoresho byaho buri munsi. Ubu rero cyaduteye ubwigunge, amagare asigaye acamo, imodoka zigacamo, moto zo sinakubwira, turasaba ko cyakongera kigakorwa ariko kikanahabwa abagishinzwe umunsi ku munsi.'

Mugisha Japhet usanzwe ukinira muri iki kibuga umunsi ku munsi we yavuze ko bakigitaha cyari ikibuga cyiza gifite n'ubwatsi bwiza agasaba ubuyobozi kubafasha kikongera kubakwa mu buryo bujyanye n'igihe

Ati ' Ubu gukiniramo birabangamye cyane kuko muba muri gukina ukabona umuntu arambutse anyuzemo cyangwa amagare atwaye imyaka anyuzemo. Hakenewe ko cyakongera kikavugururwa ariko kikanacungirwa umutekano.'

Undi mugabo utifuje ko amazina ye atangazwa ukorera mu nkengero z'iki kibuga, yavuze ko bibabaje kuba hari nubwo bimwe mu bice by'isoko ariho byimurirwa, agasanga ubuyobozi butarahaye agaciro iki kibuga.

Umuyobozi w'Akarere ka Rwamagana wungirije ushinzwe Iterambere ry'Ubukungu, Kagabo Richard, yavuze ko iki kibuga cyangijwe n'uburyo giteye budafasha amazi kujya mu mpande ahubwo ngo iyo imvura iguye amazi yose yirundamo hagati.

Yagize ati ' Bisa n'aho mu buryo bwo kukiringaniza ubutaka bwacyo batagennye uburyo amazi agomba gutemba, bituma ya mirekere y'amazi imvura yaguye birushaho kugenda byonona ikibuga. Kugira ngo tuzamure ubutumburuke bwayo ntaho bizaba bitandukaniye no kurema ikibuga gishya.'

Visi Meya Kagabo yakomeje avuga ko kubijyanye n'isoko rikorera muri iki kibuga rimwe na rimwe ari ukubera abantu benshi barirema, bikarangira igice kimwe gikoreye muri iki kibuga.

Ati ' Ubu turacyashaka ubushobozi bw'uko aka gasoko dushobora kukabatunganyiriza kakaguka kajya ahandi atari mu kibuga. Icyo kibuga nacyo tukareba uburyo natwe twakoraho ibintu by'ingenzi byatuma kureka kw'amazi mu kibuga bivaho, tukayayobora akagenda aca mu mpande.Ibyo tuzabikora ari nko kwirwanaho mu gihe dutegereje uburyo cyakorwa neza.'

Abaturage bavuga ko iki kibuga gitunganyijwe neza byabafasha gukinira ahantu heza, byanaba ngombwa ikipe ya Muhazi United ikaba ari naho ikinira aho kujya gutira sitade ya Ngoma.

Iki kibuga nyuma yo kubakwa cyarongeye kirangirika

Mu kibuga hagati hasigaye harabaye inzira y'amagare na moto

Umuyobozi w'Akarere ka Rwamagana wungirije ushinzwe Iterambere ry'Ubukungu, Kagabo Richard yijeje abaturage ko kizongera kigakorwa

Mu 2020 hasohotse igishushanyo mbonera cya 2035 kugeza 2050 ku rwego rw'Igihugu kigaragaza imikoreshereze y'ubutaka.

Umuyobozi Ushinzwe imitunganyirize y'Imijyi n'Icyaro mu Kigo cy'Igihugu Gishinzwe Ubutaka, Mpayimana Portais, yagarutse ku bantu bakoresheje ubutaka icyo budateganyirijwe, mbere y'uko igishushanyo mbonera gisohoka.

Yavuze ko babareka bo ubwabo bakiha igihe cyo gushaka ubushobozi bakahashyira icyahateganyirijwe cyangwa se bakimuka.

Ati 'Niba igishushayo mbonera kije cyerekana ko aho hantu hateganyirijwe ubuhinzi kandi wowe warahashyize inzu, tuguha igihe cyo kwitegura ukahava cyangwa ukahashyira icyahateganyirijwe. Hari n'abatishoboye Leta isanzwe ifasha izakomeza ibafashe n'ubundi nabo batuzwe neza.'

Mpayimana kandi yavuze ko abantu bakwiriye kwitonda mbere yo kugura ubutaka bakamenya aho bagiye kugura icyo hateganyirijwe ku gishushanyo mbonera ndetse n'igihe bizashyirirwa mu bikorwa.

Yagize ati 'Hari abantu bagura ubutaka babona ko hari igikorwa runaka cyahagenewe nko mu 2035, ariko ugasanga agiye kuhashyira icyo gikorwa igihe kitaragera. Ntabwo ibyo ariko bimeze, bagomba kumenya ko icyo gikorwa bazagikora uwo mwaka ugeze kuko mu gihe utaragera biba bishobora guhinduka.'

Yakomeje avuga ko hari amategeko agenga imikoreshereze y'ubutaka, ubukoresheje nabi abihanirwa akaba yacibwa amande.

Uturere 13 tumaze gukorerwa igishushanyo mbonera

Kugeza ubu hakozwe igishushanyo mbonera cy'uturere 13 twaje dukurikira umujyi wa Kigali. Ni ibishyira mu bikorwa igishushanyo mbonera cyo ku rwego rw'Igihugu mu byiciro bito bigena imikoreshereze y'ubutaka ku buso bwose bw'Akarere haba mu mijyi no mu byaro.

Utwo turere ni Musanze, Rulindo, Gicumbi, Gakenke, Huye, Muhanga, Gisagara, Nyaruguru, Rwamagana, Ngoma, Nyagatare, Kirehe na Rubavu.

Tugiye dufite imijyi itwunganira ndetse igishushanyo mbonera kigaragaza uburyo utwo turere tuzaba dutuwe, ibikorwaremezo bihagenewe ndetse n'ubuso bw'ubutaka buzaba bugize buri cyiciro.

Mu turere tumaze gukorerwa igishushanyo mbonera bigaragara ko utwinshi muri two abaturage baho bazaba batuye mu mijyi cyane kurusha mu byaro, kuko utwinshi muri two igice kinini kizaba kigizwe n'ubuhinzi.

Uturere nka Kirehe, Nyagatare, Muhanga na Huye ni two tuzaba dufite igice kinini cy'ubuhinzi, aho Nyagatare buzaba bwihariye 60% by'ubutaka bwose bw'Akarere, Kirehe bukiharira 68.4% mu gihe Muhanga buzaba bwihariye 52.9% n'aho Huye bukiharira 47%.

Mu miturire bigaraga ko Muhanga ari ko Karere kazaba gatuwe cyane mu 2050 aho kazaba gatuwe na 1,026,000, Muri bo 80.5% bazaba batuye mu mujyi n'aho abandi basigaye bature mu cyaro.

Mu bigendanye n'ibikorwaremezo bitandukanye, buri karere kagiye gafite ibizakubakwamo, aho nka Kirehe izubakwamo umuhanda wa gariyamoshi, stade ndetse n'amazu y'imyidagaduro.

Nyagatare yo izubakwamo ikibuga cy'indege cya Gabiro n'aho Muhanga ho hatenganyijwe kuzashyirwa Stade mpuzamahanga ndetse n'ingomero. Mu tundi turere n'aho hagiye hafite ibikorwa byahateganyirijwe.

Uretse igishushanyo mbonera cy'uterere 13 hari utundi turere umunani twemejwe na njyanama, dutegerejwe kwemezwa mu Nama y'Abaminisitiri. Utwo turere ni Karongi, Rusizi, Bugesera, Kayonza, Gatsibo, Kamonyi, Ruhango na Nyamagabe.

Utundi turere dusigaye nka Burera, Nyamasheke, Rutsiro, Ngororero, Nyabihu na Nyanza natwo biteganyijwe ko mu 2025 tuzemezwa na njyanama.

Abubaka ibikorwa igihe cyo kubyubaka kitaragera nabo baburiwe

Abakoresha ubutaka nabi baburiwe

Ni igikorwa cyabaye ku wa Kane, tariki 17 Ukwakira 2024 ku cyicaro cya Kepler College i Kinyinya.

Iyi mikoranire igamije gushyigikira abana b'abakobwa bari mu mikino ndetse no gufasha abanyeshuri kuzajya babona amahirwe yo kwimenyereza umwuga muri CANAL+ nk'uko byagarutsweho n'abayobozi ku mpande zombi.

Umuyobozi Mukuru wa CANAL+ Rwanda, Sophie Tchatchoua, yasobanuye iby'aya masezerano.

Yagize ati 'Twasinyanye amasezerano y'uburyo bubiri, ubwa mbere ni ukuzajya duha abanyeshuri amahirwe yo kwimenyereza umwuga, icya kabiri ni ugushyigikira imikino mu bakobwa ndetse n'imyigire yabo. Ni muri urwo rwego twatanze buruse ku bakinnyi batanu ba Kepler WBBC.'

Umuyobozi Mukuru wa Kepler College, Munyampenda Nathalie yavuze ko abikorera bakwiye kugira uruhare muri siporo kuko aribwo izatera imbere.

Ati 'Turashaka ko abikorera bashyigikira siporo y'u Rwanda kuko ni bwo izatera imbere. Turashimira CANAL+ ko yabashyigikiwe kuko aya mafaranga azajya mu kubishyurira amashuri ndetse n'ibindi nkenerwa.'

Yakomeje agira ati 'Twizeye ko aba bakinnyi bazakomeza kuzamura urwego rwabo kuko twabahisemo tubona bafite ahazaza kandi ntekereza ko ubu bagiye kurushaho kuko bazajya bakina babohotse kuko babonye ubamenyera iby'ishuri.'

Gasherebuka Vicky usanzwe ukina muri Kepler WBBC akaba n'umwe mu bahawe iyi buruse, yavuze ko izabafasha gutera imbere mu mikinire yabo ndetse no mu masomo.

Ati 'Iyi buruse twabonye izongera byinshi mu masomo yacu, twiga dushyizeho umwete no mu mikinire kuko tuzi ko inyuma yacu dushyigikiwe. Kepler mutwitege mu mwaka w'imikino utaha.'

Kepler WBBC ni ikipe nshya muri Basketball y'u Rwanda, gusa yagaragaje imbaraga zikomeye kuko mwaka wa yo wa mbere yegukanye umwanya wa gatatu muri Shampiyona ya 2024.

CANAL+ ni sosiyete icuruza amashusho imaze kuba ubukombe mu Rwanda aho izwi cyane mu mikino itandukanye, amakuru, filimi z'ubwoko bwose ndetse n'ibiganiro bitandukanye bikunzwe ku Isi.

Abakinnyi batanu ba Kepler WBBC bahawe buruse na CANAL+ Rwanda

Umuyobozi Mukuru wa CANAL+ Rwanda, Sophie Tchatchoua, yavuze ko ubu bufatanye buzafasha abanyeshuri gutera imbere mu masomo n’imyigire yabo

Umuyobozi Mukuru wa Kepler College, Munyampenda Nathalie yavuze ko abikorera bakwiye kugira uruhare muri siporo kuko aribwo izatera imbere

Gasherebuka Vicky yatangaje ko buruse bahawe igiye kubafasha kwigana no gukinana umwete biruseho

CANAL+ yatanze buruse ku bakinnyi batanu ba Kepler WBBC

Kepler WBBC yabaye iya gatatu mu mwaka wayo wa mbere muri Shampiyona ya 2024

Ni umuhigo iyo banki yatanze ubwo Ishyirahamwe ry'abari n'abategarugori bayikoreramo (I&M Bank Ladies) bateraga inkunga Ikigo nderabuzima cya Rubungo giherereye mu Murenge wa Ndera mu Karere ka Gasabo, mu gukurikirana abana barenga 350 bagaragaweho ibimenyetso by'igwingira.

Iyo gahunda iyi banki yiyemeje iri mu murongo wo gufatanya mu gushyira mu bikorwa intego z'iterambere rirambye cyane cyane mu ntego ya kabiri yo kurwanya inzara n'iya gatatu yo kwimakaza imibereho myiza.

Biri mu murongo wa gahunda leta yo kwihutisha iterambere icyiciro cya kabiri (nst2) yubakiye ku nkingi eshanu z'ingenzi zirimo no kurwanya igwingira n'imirire mibi.

Guverinoma yiyemeje ko mu myaka itanu, izashyira imbaraga mu kurwanya imirire mibi ku buryo igwingira ry'abana rizava kuri 33% rikagera kuri 15%.

Umuyobozi Mukuru wa I&M Bank Ladies witwa Igiraneza Christine yatangaje ko iri tsinda barishinze mu 2018 batangira guhuriza hamwe amikoro.

Babifashijwemo na Banki bakorera mu bumenyi no mu mafaranga, kwizigamira byakomeje kwaguka batangira no gufatanya na leta.

Mu 2022 I&M Bank Ladies yateye inkunga imirenge itanu yo mu Karere ka Gasabo, yishyurira abantu 1000 ubwisungane mu kwivuza, bivuye muri ya mafaranga bizigama ku bufatanye n'ubuyobozi.

Igiraneza ati 'Buri mwaka twihaye intego yo gufasha leta bijyanye na gahunda ishyize imbere. Ni ibintu bizakomeza. Umugore ni we mutima w'urugo, Perezida Kagame yaduhaye ijambo natwe tuzamufasha mu mu gushyira mu bikorwa imigambi yiyemeje nk'Umukuru w'Igihugu.'

Ikigo Nderabuzima cya Rubungo, gifite gahunda yihariye yo kurwanya imirire mibi aho cyateguye imirima gihingamo imboga, cyubaka ibiraro byo kororeramo inkwavu n'inkoko kugira ngo kibone ibifasha kwita kuri abo bana.

Muri Gicurasi 2024 iki kigo cyapimye abana bo muri ako gace gisanga abangana na 353 bagaragaza igwingira, biyemeza kubakurikirana, ari na byo iyi nkunga ya I&M Bank Ladies ije kunganira.

Abo biyongera ku bandi 20 bafite imirire mibi ihutiyeho, imwe igaragarira buri wese ishobora guhitana umwana by'ako kanya nta gikozwe.

Umuyobozi w'Ikigo Nderabuzima cya Rubungo, Soeur Uwamahoro Collette ati 'Iyo nkunga duhawe izatwunganira, tugere ku rwego rwisumbuye ku rwo twari tugezeho mu kurwanya imirire mibi n'igwingira. Dushaka kubona ibidufasha gutegura indyo yuzuye ariko tukanoroza abaturage bakabona uko bategura indyo yuzuye baha abana babo.'

Imibare iheruka mu Karere ka Gasabo igaragaza ibijyanye n'imirire mibi mu bana kageze kuri 18%, Umuyobozi w'Ishami ry'Ubuzima n'iterambere ry'Imibereho Myiza y'Abaturage mu Karere ka Gasabo, Rutarindwa Alphonse akagaragaza ko ubu bafite abana 185 bafite imirire mibi bari gukurikirana by'umwihariko.

Uyu muyobozi yavuze ko kandi mu guhangana n'icyo kibazo biyemeje no kurwanya inzoka zituruka ku mwanda, kuko na zo zigira uruhare mu kudindiza gahunda yo kurwanya igwingira n'imirire mibi.

Guverinoma y'u Rwanda ikomeje gushyira imbaraga mu guhangana n'ikibazo cy'igwingira ry'abana bafite imyaka iri munsi y'itanu, aho mu ngengo y'imari ya 2024/2025 yagenewe ibikorwa bigamije kurandura iki kibazo yangerewe ikagera kuri miliyari 357.8 Frw.

I&M Bank Ladies yashyikirije Ikigo Nderabuzima cya Rubungo, Soeur Uwamahoro Collette inkunga ijyanye no kurwanya igwingira n’imirire mibi mu bana

Abagize I&M Bank Ladies bagize uruhare no mu gupima abana harebwa niba bafite imirire mibi cyangwa igwingira

Abagize I&M Bank Ladies bagaburiye abana bagaragaweho imirire mibi bari kwitabwaho mu Kigo Nderabuzima cya Rubungo

Umwe mu bagize itsinda rya I&M Bank Ladies agaburira umwana

Abayobozi batandukanye baruraga ibyo kurya bagombaga kujya kugaburira abana bagaragaweho n’imirire mibi

Ubwo abagize itsinda rya I&M Bank Ladies bari bagiye kwerekwa ibikorwa Ikigo Nderabuzima cya Rubungo kimaze kugeraho mu guhangana n’imirire mibi

Ibyi ni biraro byo kororeramo inkoko n’ingurube Ikigo Nderabuzima cya Rubungo cyo mu Karere ka Gasabo cyubatse kugira ngo bizagifashe guhangana n’imirire mibi

Abayobozi batandukanye beretse ibiraro byo kororeramo inkoko n’ingurube Ikigo Nderabuzima cy Rubungo cyo mu Karere ka Gasabo cyubatse kugira ngo bizagifashe guhangana n’imirire mibi

Abagize itsinda rya I&M Bank Ladies ribarizwamo abari n’abategarugori bo muri I&M Bank Rwanda Plc bifatanyije n’abo mu Kigo Nderabuzima cy Rubungo cyo mu Karere ka Gasabo guhangana n’igwingira

Umuyobozi wari Uhagarariye Ibitaro bya Kibagabaga witwa Uramutse Jean Pierre yagaragaje ko ibyo bitaro biri gufatanya na leta bya hafi mu kugabanya imibare y’abana bagwingiye n’abafite imirire mibi

Umuyobozi Mukuru wa I&M Bank Ladies witwa Igiraneza Christine, yagaragaje ko biyemeje gufatanya na Perezida Kagame mu gushyira mu bikorwa imishinga igihugu cyihaye

Umuyobozi w'Ikigo Nderabuzima cya Rubungo, Soeur Uwamahoro Collette yagaragaje ko hari abana barenga 300 bagaragaweho n’ibibazo by’igwingira bari gukurikirana

Ni ingingo yagarutseho ku wa 17 Ukwakira 2024, ubwo hasozwaga Inama Mpuzamahanga yigiraga hamwe uruhare rw'Abenjeniyeri mu iterambere rirambye mu nzego zinyuranye.

Ni inama yakiriwe n'Urugaga rw'Abenjeniyeri mu Rwanda, IER, yitbirwa n'abarenga 800. Ni ku nshuro ya mbere yari ibereye muri Afurika kuva Ihuriro ry'Ingaga z'Abenjeniyeri ku Isi riyitegura ryashingwa mu 1968.

Magingo aya abantu hafi miliyari imwe batuye Isi ntibafite umuriro w'amashanyarazi, mu gihe abarenga miliyari 2,7 batagerwaho na internet.

Kuri Afurika imibare ya Banki y'Isi igaragaza ko abantu miliyoni 600 batagerwaho n'umuriro w'amashanyarazi mu gihe abatuye uyu mugabane bangana na 40% ari bo bonyine bakoresha internet.

Kimwe mu bikoma mu nkokora ikwirakwiza ry'ibi bikorwaremezo hakiyongeraho n'imihanda n'ibindi ku mugabane harimo n'imiterere yawo.

Minisitiri Ingabire yasabye abenjeniyeri gutekereza kuri buri wese mu gihe hari imishinga bashyira mu bikorwa.

Ati “Inshingano yanyu si ugukemura ibibazo bya tekiniki gusa ahubwo ni ugushyiraho sisiteme zizabasha guhangana n'ibihe.'

'Mugomba kubaka inganda mu buryo burengera ibidukikije, guhanga udushya hashyizwe imbere ubudaheza no gushyiraho ibikorwaremezo bihuza abantu bose bidafasha gusa bamwe na bamwe.'

Umuyobozi Mukuru w'Urugaga Nyarwanda rw'Abenjeniyeri mu Rwanda- IER, Eng. Gentil Kangaho, yavuze ko muri iyi nama yari imaze iminsi itatu ibera i Kigali, bakuyemo byinshi bizashyirwa mu bikorwa, bijyanye n'intego z'iterambere z'igihugu.

Ati 'Hari ubushakashatsi bwakorewe hirya no hino bwamurikiwe hano natwe dushobora kuzana mu Rwanda, nk'urugaga tukanashyiraho itsinda rigomba kuzabikurikirana. Tuzakomeza gufatanya n'aba bafatanyabikorwa n'ibiba ngombwa twohereze amatsinda mu ndegoshuri.'

Eng. Kangaho yavuze ko bagiye kwinjira mu mikoranire na Minisiteri y'Uburezi kugira ngo havugururwe porogaramu z'amasomo y'ubwenjeniyeri atangwa kugira ngo ajyanishwe n'ibikenewe ku isoko ry'umurimo rya none.

Muri iyi nama Guverinoma y'u Rwanda binyuze muri MInisiteri y'Ibikorwaremezo yiyemeje kuzashyigikira porogaramu yahatangirijwe y'imyaka 10 igamije kuzamura ubushobozi bwa Afurika binyuze mu guteza ubumenyi mu mwuga w'ubwenjeniyeri.

Ni porogaramu ifite intego yo gushyiraho ibigo bitanu by'icyitegererezo muri buri karere ka Afurika, bizahugurirwamo abenjeniyeri barenga 100.000 nabo bazafasha guhugura abandi muri Afurika.

Iyi porogaramu izita cyane ku kubaka ubushobozi, kuzamura ubumenyi, no kuziba icyuho mu bunyamwuga kikigaragara.

Muri iyi nama kandi hagaragajwe ubushakwe bwo gushyiraho amasezerano ahuriweho y'Afurika azatuma ba injeniyeri bo ku Mugabane baba ndakumirwa mu bihugu byawo aho impamyabumenyi zabo zizajya zemerwa hose, bikazatuma bashobora gukorera mu bihugu bitandukanye nta nkomyi.

Byitezwe ko aya masezerano nashyirwaho azaazaba agamije gushyigikira iterambere ry'umwuga w'ubwenjeniyeri no gusangizanya ubunararibonye.

Minisitiri w'Ikoranabuhanga na Inovasiyo, Ingabire Paula, yagaragaje ko inshingano z'abenjeniyeri mu nzego zinyuranye zitagarukira gusa mu gukemura ibibazo bya tekiniki, ahubwo harimo no kwita ku mibereho myiza y'abaturage, kurengera ibidukikije no guharanira ubudaheza binyuze mu bikorwa bakora

Umuyobozi Mukuru w'Urugaga Nyarwanda rw'Abenjeniyeri mu Rwanda- IER, Eng. Gentil Kangaho, yijeje gukorana na Minisiteri y’Uburezi mu kuvugurura porogaramu z’amasomo y’ubwenjeniyeri

Muri iyi nama hagiye haberamo ibiganiro by’ingirakamaro

Ingabo z’u Rwanda zari zihagarariwe muri iyi nama yari imaze iminsi itatu

Iyi nama yari yitabiriwe n’abatari bake

Umuyobozi Mukuru w'Urugaga Nyarwanda rw'Abenjeniyeri mu Rwanda- IER, Eng. Gentil Kangaho

Abagore bari bahagarariwe muri iyi nama

Ubwo Dr. Joseph Karemera yigaga muri Uganda mu gace ka Kireka yubatse umubano udasanzwe na se wa Amb. Christine Umutoni.

Ambasaderi Umutoni ashimangira ko Karemera yagize uruhare rukomeye mu gukomeza urundi rubyiruko n'abana bakundaga kuba bari mu rugo rwa Rutwaza Leonidas na Didasiana Kiguzi (iwabo wa Umutoni).

Ati 'Ababyeyi banjye badushyizemo kwihangana no kwigirira icyizere, kabone n'iyo haba hari ibibazo. Igihe badushinyagurira kubera ko twiswe “Abanyarwanda” turi impunzi, Karemera yaduhaye imbaraga mu kwemeza umwirondoro wacu.'

Yakomeje ati 'Yakundaga kutubwira ko nta kintu kibi kiri mu kuba turi Abanyarwanda, ibyatumaga twumva duhangayitse yaje gutuma tubisimbuza kumva ko dutewe ishema nabyo.'

Umutoni yavuze ko yigiye byinshi kuri Dr. Joseph Karemera babanye akiri muto kandi ko yamuteye akanyabugabo no mu gihe yabaga yacitse intege.

Ati 'Ubufasha bwe bwanyigishije kwaguka mu nzira nahisemo. Na nyuma iyo nasaga n'uwacitse intege mu ishuri ndi kwiga amategeko, yanyibutsaga intego twihaye, yakundaga kumbwira ko nta munyarwanda urambirwa.'

Yavuze ko Dr. Karemera Yari umuntu wagiraga ubuntu cyane kuko yagabanaga ikintu icyo ari cyo cyose na buri umwe nubwo cyaba ari gito cyane kandi akabitaho.

Yakundaga kandi gufasha abato gukomeza kwagura no kunguka ubumenyi no mu bihe bigoye.

Amb. Umutoni yashimangiye ko yibuka uko Karemera yamufashije ubwo yari afite umwana w'imyaka ibiri ndetse anatwite umwana wa kabiri akagorwa no kubona amafaranga yo kwishyura ishuri mu cyiciro cya gatatu cya Kaminuza ariko Karemera akamutera imbaraga ndetse akanamufasha kwishyura.

Kimwe na bandi bagiye batanga ubuhamya kuri Dr. Joseph Karemera, yavuze ko yaranzwe no gukunda igihugu na mbere y'urugamba rwo kukibohora kandi ko yabibye izo mbuto zo gukunda igihugu mu bato.

Yahishuye kandi ko ko Dr. Karemera yazirikanaga uruhare rwa buri wese mu rugamba rwo guteza imbere igihugu kandi yahoraga yibutsa buri muntu icyerekezo igihugu kiganamo no kubiharanira.

Yashimye uruhare rwe mu bikorwa by'ubuvuzi ku rugamba rwo kubohora igihugu kuko byari bihe bigoye kandi ibyagezweho byari bikwiye kwandikwa kuko byatanze umusanzu ukomeye.

Ambasaderi Umutoni yashimangiye ko Dr. Karemera arenze kuba yari umuyobozi ahubwo ko yari inshuti kandi ifite inzozi zo kugera kubyiza agakunda abantu n'igihugu.
Yashimye umuryango wa Karemera wemeye kubakira mu muryango by'umwihariko umugore we Annonciatha Numutali kubera ubutwari bwe.

Yagaragaje ko umurage wa Karemera utazibagirana ahubwo ko abo yatoje, yasangije urukundo, bazamukorera mu ngata aho yaragereje kandi ko ibikorwa bye bitazibagirana.

Amb. Christine Umutoni Nyinawumwami(ibumoso), Annonciatha Numutali (umugore wa Karemera) na Dr. Joseph Karemera

Amb. Christine Umutoni Nyinawumwami na Dr. Joseph Karemera

Amb. Christine Umutoni Nyinawumwami wambaye ibara rya Pink ari kumwe n’umuryango wa Dr. Joseph Karemera

Amb. Christine Umutoni Nyinawumwami avuga ko Dr. Joseph Karemera yagize uruhare mu kwiga kwe