Category: Uncategorized

Mu kiganiro yagiranye na IGIHE, Jean Claude Nizeyimana, ushinzwe Isomero ry'Inteko y'Umuco yavuze ko guhera ku wa 28 Ugushyingo 2024, batangije imurikabikorwa rya serivisi z'inzu y'ibitabo y'igihugu, ari na yo yashibutsemo gahunda yo guhuza abanditsi n'abasomyi.

Ati 'Tugira ahantu abantu badakunze kugera, hari ibitabo bya kera, ibitaboneka, ibinyamakuru n'ibindi byose biri mu murage w'igihugu abantu batajya bageramo. Tubategurira uwo munsi kugira ngo bahinjire, bamenye ibyo dufite kuko nubwo tubibitse tuba dushaka ko n'abantu babikoresha. Iyo ni inshingano ya mbere.'

Yakomeje avuga ko kubera ko mu nshingano z'ikigo harimo no gushishikariza abantu gusoma no kwandika, bikaba mu byatumye batangiza gahunda yo guhuza abanditsi n'abasomyi b'ibitabo byabo.

Kuri iyi nshuro ibitabo byaganiriweho bwa mbere ni ibya Akariza Laurette Annely uri mu rubyiruko rwiyeguriye umwuga wo kwandika ibitabo.

Ibitabo bye birimo icyiswe 'Wet Under the Rainbow' cyasohowe mu 2023 n'icyo yise 'Rebounce'' cyagiye hanze muri uyu mwaka.

'Wet Under the Rainbow' ni igitabo gikubiyemo inkuru z'abavutse nyuma ya Jenoside yakorewe Abatutsi mu 1994, barimo abafite ababyeyi babaye mu mahanga, iz'abiciwe muri icyo gihe, inkuru z'abana bavutse ku babyeyi bayikoze n'abandi bibasiwe n'ihungabana ryayiturutseho.

Icya ''Rebounce'' kivuga ku ihererekanwa ry'ubudaheranwa nyuma yo kubona uko Abanyarwanda biyubatse nyuma ya Jenoside yakorewe Abatutsi.

Nizeyimana yavuze ko bahisemo gutangirana na Akaliza, kuko muri gahunda bafite ari ugushishikariza urubyiruko gukunda gusoma no kwandika.

Ati 'Twamuhisemo, kuko ari urubyiruko, kugira ngo afashe urundi rugenzi rwe, rubone ko kwandika bishoboka kandi birimo amahirwe, rubone ko rukwiriye kwandika amateka y'igihugu.'

Akariza Laurette Annely we yavuze ko iyi gahunda y'Inteko y'Umuco, yamushimishije cyane. Ati 'Kuntekereza mu banditsi ba mbere bagomba guhura n'abasomyi babo ni ibintu byanshimishije cyane. Ni igikorwa kidasanzwe kuko kigiye gutunga itoroshi mu bwanditsi. Hari igihe umuntu aba akunda gusoma ariko atazi uko yahura n'umwanditsi.

Agaragaza ko uko umwanditsi ahuye n'abasomyi bimufasha kugira izindi mbaraga n'ibindi bitekerezo bishyashya.

Ati 'Mu bindi bihugu byatangiye kera, umwanditsi aba afite aho ahurira n'abasomyi, ariko noneho ubu Inteko y'Umuco yabonye ko bikwiriye.'

Ibi bitabo bya Akaliza byaganiriweho biboneka muri Librairie Caritas, Librairie Ikirezi no ku Rwibutso rwa Jenoside rwa Kigali ruri ku Gosozi. Icya Rebounce kigura 25.000 Frw mu gihe icya Wet Under the Rainbow kigura 15.000 Frw.

Uretse kungurana ibitekerezo kuri ibi bitabo by'uyu mukobwa, bamwe mu banditsi bamenye ko hari serivisi bajyaga baka mu mahanga kandi zitangirwa mu Rwanda.

Zirimo no guhabwa nimero mpuzamahanga iranga igitabo izwi nka International Standard Book Number (ISBN).

Igikorwa cyo guhuza abasomyi n’abanditsi b’ibitabo cyitabiriwe n’ab’ingeri zinyuranye

Akariza Laurette Annely ni umwe mu bakiri bato bafite gahunda yo guteza imbere umwuga wo kwandika ibitabo

Abitabiriye igikorwa cy’Inteko y’Umuco cyo guhuza abasomyi n’abanditsi b’ibitabo, bahawe umwanya batanga ibitekerezo

Akariza Laurette Annely yavuze ko gahunda y’Inteko y’Umuco izafasha abanditsi n’abakunda gusoma gutemba imbere ubwanditsi

Ntamuhanga Ningi Emmanuel wamenyekanye mu itangazamakuru yashimiye umuhati wa Akaliza wo kubera urubyiruko urugero rwiza mu kwandika

Nizeyimana Jean Claude ushinzwe Isomero ry'Inteko y’Umuco yavuze ko bahisemo gutangirana iyi gahunda na Akaliza kuko ari urubyiruko, kandi bashaka guteza imbere abakiri bato kwitabira ibijyanye n’ubwanditsi

Inteko y'Umuco yatangije gahunda yo guhuza abanditsi b'ibitabo n'abasomyi babyo, bakaganira ku cyateza imbere ubwanditsi

Serge Rwagasore ni umwe mu bakunda gusoma no kwandika bari bitabiriye iki gikorwa. Uyu musore yasabye Akaliza ko ibitabo bye bibaye byiza byashyirwa mu Kinyarwanda

Uwera Marceline usanzwe ari umwanditsi w’ikinamico yavuze ko uyu mwuga ushyigikiwe watunga benshi

Amafoto: Kasiro Claude

Umuyobozi w’Ishyirahamwe ry’umukino wa Boxing ku Isi (World Alliance Boxing Association “WABA), Hon. Ky Col Onesmo Alfred yageze i Kigali ku nshuro ye ya mbere.

Uyu mugabo yitabiriye yageze ku kibuga cy’indege Mpuzamahanga cya Kigali, kuri uyu wa Gatandatu tariki 7 Ukuboza 2024.

Yakiriwe na n’Umuyobozi wa (Sports Genix International ‘SGI’), Guy Didier Rurangayire uri mu bategura irushanwa ‘Universe Boxing Championship’ rigiye kuba ku nshuro ya Gatatu, rikaba irya mbere rikozwe ku rwego Mpuzamahanga nk’abibigize umwuga.

Uyu muyobozi yitabiriye irushanwa rya Boxing riteganyijwe kuri iki Cyumweru tariki 8 Ukuboza 2024, ribera muri Kigali Universe.

Biteganyijwe ko Hon. Ky Col Onesmo Alfred, azatangiza ku mugaragaro ishyirahamwe rya Boxing mu Rwanda, aho rizitwa ‘WABA Rwanda’.

Azitabira kandi akurikirane irushanwa ry’iteramakofe ry’ababigize rizabera muri Kigali Universe, kuri iki Cyumweru tariki 8 Ukuboza 2024.

Umuyobozi w’Ishyirahamwe rya Boxing ku Isi, Hon. Ky Col Onesmo Alfred McBride (wambaye ikote) yageze i Kigali ku nshuro ye ya mbere 

Onesmo Alfred azafungura ku mugaragaro ishyirahamwe rya ‘Boxing’ mu Rwanda 

Onesmo ari mu bazitabira umukino wa ‘Boxing’ uzabera muri Kigali Universe

Tom Close yanditse kuri konti ye ya X [Yahoze ari Twitter], agaragaza ko hashize iminsi atanze ikirego ku rubuga rwa Youtube, agaragaza ko ari we nyiri filime yari yiyitiriwe n'undi muntu, akanayishyira ku rubuga rwa Youtube.

Uyu muhanzi uherutse gushyira ku isoko Album ya Cyenda yise 'Essence', yabwiye InyaRwanda ko kuba uriya muntu yarashyize 'Trailer' ye ku rubuga rwa Youtube, byatumye hari abashoramari batekereza ko filime iri gukorwa, itari mu biganza bye.

Yavuze ati 'Hari umuntu wari warayishyize (Trailer ya Filime ye) kuri Youtube ye bituma hari abantu turimo kuganira kugira ngo bashore amafaranga mu ikorwa ryayo, bacyeka ko atari iyanjye.'

Tom Close avuga ko bakimara kubibona, bandikiye urubuga rwa Youtube, bagaragaza ibimenyetso bishimangira ko iyi filime ari iyabo.

Kandi asobanura ko kwandika kuri X, byari mu rwego rwo kuburira buri wese wabigerageza. Ati 'Twakoze 'Claim' (batanze ikirego) bayikuraho (Urubuga rwa Youtube ruyikuraho), ariko binaba ngombwa ko nandika hariya [Ku rubuga rwa X] kugira ngo niba hari n'undi wabikoze/ wabikora ayikure aho yaba yarayishyize abireke.”

Uyu muhanzi wamamaye mu ndirimbo zinyuranye nka 'Ferrari', 'Iyo nakunze', 'Ntibanyurwa' n'izindi, atekereza ko 'Trailer' ye yashyizwe kuri Youtube n'umuntu wayikuye mu bo yayisangije mu nama yayisobanuyemo.

Ati ''Trailer' nayisangije abantu twari turimo gukora ibiganiro by'imikorere, birashoboka ko ariho uwayishyize kuri Youtube yayikuye.' Tom Close yavuze ko iyi filime yamaze kurangiza kandi 'izasohoka mu gihe kiri imbere'.

Filime ya Tom Close ishingiye ku nkuru y'umusore w'umusirikare witwa Rwimo, uva mu kazi aba asanzwe akora akajya gutabara umuryango we uba waratewe na ba rushimusi b'inka. 

Yageze iwabo afite amahitamo abiri, gukomeza kurwana n'abajura bibasira inka z'iwabo, cyangwa agasubira mu kazi ka gisirikare.

Ni filime yakinnyemo abarimo umunyarwenya Nkusi Arthur na Se Mazimpaka Jones Kennedy, Bahali Ruth n'abandi. Ifatwa ry'amashusho ryayobowe na Director Gad, ni mu gihe Tom Close ariwe wayanditse.

Mazimpaka Jones Kennedy umubyeyi wa Nkusi Arthur, uri mu bakinnyi b'imena muri filime 'Imuhira' ya Tom Close
Tom Close yifashishije ibikoresho bya gisirikare mu ikorwa ry'iyi filime ye ya mbere

Umunyarwenya akaba n'umukinnyi wa filime, Nkusi Arthur ari mu bakinnyi ngenderwaho muri iyi filime

Tom Close yatangaje ko hari umuntu wari wiyitiriye filime ye ku rubuga rwa Youtube

eKash ni uburyo umuntu ufite amafaranga runaka ashobora kuyoherereza mugenzi we ukoresha undi.

Ukoresha Airtel Money ashobora koherereza amafaranga mugenzi we ukoresha MTN Mobile Money cyangwa undi ukoresha banki runaka akoherereza amafaranga mugenzi we ukoresha indi banki.

Bikorwa ako kanya bidasabye kubikuza amafaranga ufite kuri konti runaka ukajya kuyabitsa ku yindi.

Abazitabira iyi siporo rusange bazerekwa uburyo 'eKash' iri gufasha mu bijyanye no kwishyurana hifashshijwe ikoranabuhanga, ibikomeje guteza imbere ubukungu bushirishingiyeho, bikanafasha mu guca umuco wo kubika ibifurumba by'amafaranga mu nzu, rimwe na rimwe ugasanga yibwe, yahiye cyangwa yangiritse mu bundi buryo.

Bijyanye n'uko Car-Free Day yitabirwa na benshi, bizaba umwanya mwiza kuri RSwitch ku kugaragaza akamaro ko kwishyurana hifashishijwe ikoranabuhanga n'uburyo bwo kwitabira eKash.

Biteganyijwe ko muri 'Car Free Day' hazaba hari abakorerabushake bazwi nk'Intore mu Ikoranabuhanga, bazasobanura ibyiza bya eKash, uko ikoreshwa no gusubiza ibindi bibazo byibazwa.

Banki Nkuru y'u Rwanda, BNR ibigaragaza ko nko mu 2023/2024 ubwishyu bwakozwe hakoreshejwe telefone bwiyongereyeho 75%, bugera kuri miliyoni 419.7 buvuye kuri 240.5.

Amafaranga yishyuwe binyuze muri ubwo buryo yiyongereyeho 43% ava kuri miliyari 1575 Frw mu mwaka wabanje, agera kuri miliyari 2252 Frw.

eKash ikomeje kunozwa aho mbere byasabaga kwiyandikisha bikorewe kuri 'application' na 'USSD' za banki n'ibigo by'imari bitandukanye cyangwa ukagana ishami rikwegereye, ariko ubu ntibikiri ngombwa ko ukoreshe ubwo buryo aba yariyandikishije.

Umuntu wese ashobora kohereza amafaranga anyuze ku kigo cy'itumanaho cyangwa icy'imari runaka nta zindi nzira asabwe.

Ushaka kohereza amafaranga akanda *182*1*2#, indi mibare banki runaka ikoresha, application runaka cyangwa uburyo bwo kuri internet bukoreshwa n'abashaka serivisi za banki 'internet banking', bidasabye izindi nzira ngo zo kubanza kwiyandikisha n'ibindi.

Ikirango gishya cya ‘eKash’

Car Free Day ihuza abantu b’ingeri zitandukanye aho baba bahuriye muri siporo rusange. Iba kabiri mu kwezi

Ni igikorwa cyabaye ku wa 06 Ukuboza 2024, cyitabirwa n'abarimo Minisitiri w'Ubutabera, Dr. Ugirashebuja Emmanuel; Minisitiri w'Uburezi Nsengimana Joseph n'abandi.

Mu basoje barimo 31 basoje bwa mbere muri ILPD mu masomo arebana n'amategeko arengera abana (Child justice).

Umwe mu bayasojemo witwa Murebwayire Shafiga, ati'' Twize neza ubutabera bunogeye abana. Twiga uburyo bashobora gukorerwa ibyaha, cyangwa se uko bashobora kwisanga bari mu byaha. Twize uko tugomba kubijyanisha n'uburyo bw'imitekerereze yabo n'imibereho y'imiryango bavukamo. Tugiye kujya tubyitaho byose.'

Sindayigaya Nicodeme, usanzwe akora mu Rukiko rw'Ikirenga, yavuze ko kurangiza amasomo ya kaminuza asanzwe mu mategeko biba ari ubumenyi bwo mu bitabo gusa(theorie), bityo ko haba hakenewe no gushyira mu bikorwa kandi ko nta handi ho kurahura ubwo bwenge hatari muri ILPD.

Ati 'Aya masomo atuma umuntu asobanukirwa neza ibyo yize akiri mu mashuri asanzwe, bigatuma abasha gukora akazi ke neza, ndetse akanajyanisha amategeko n'aho Isi iba igeze. Twungutse byinshi, tugiye gutanga umusaruro ushyitse.''

Asaahndia Terence, waturutse muri Cameroun, yabwiye IGIHE ko ubumenyi yaje yifuza bwo kuba inzobere mu mategeko ajyanye n'abinjira n'abasohoka, abutahanye bwuzuye.

Ati 'Ndateganya ko mu mwaka utaha, nzaba ndi umunyamategeko wo mu bijyanye n'abinjira n'abasohoka, kuko ubunararibonye n'ubumenyi nkuye muri iki kigo burabinyemerera.''

Umuyobozi Mukuru wa ILPD, Dr. Kalimunda Aime Muyoboke, yashimiye Guverinoma y'u Rwanda, idahwema gutera inkunga ILPD mu bikorwa byayo byose, kugira ngo ibashe kugera ku ntego zayo.

Yanashimye abafatanyabikorwa bayo barimo UNICEF yabafashije mu kwigisha amasomo y'amategeko arengera umwana, INES Ruhengeri na Kaminuza y'u Rwanda zitahwemye kubafasha mu kubona ibyumba byo kwigishirizamo n'izindi nyunganizi.

Minisitiri w'Ubutabera akaba n'Intumwa Nkuru ya Leta Dr. Ugirashebuja Emmanuel, yashimiye abarangije amasomo yabo, ashima umuhate bagize.

Yabasabye kuzakomeza kwihugura kuko n'ubundi ubumenyi mu mategeko buhora bukura havuka amategeko, n'amabwiriza bishya, bagomba guhora bamenya.

Dr. Ugirashebuja yongeye kwibutsa ko Isi ikomeje kwihuta cyane mu ikoranabunga ririmo n'iry'ubwenge buhangano (AI), abasaba guhora biteguye impinduka nziza zizanwa n'ikoranabuhanga.

Ati 'Dutangiye kubona AI iza mu kazi k'amategeko, namwe rero mugomba guhora mwiteguye kwakira ibishya bizanwa n'ikoranabuhanga mubona byabafasha mu kazi kanyu. Ni ukugira ngo mutazatakara ku isoko ry'umurimo.''

Yashimye umusanzu wa ILPD, avuga ko ubu u Rwanda rubarwa mu bihugu bitatu bya mbere bifite inzego z'ubutabera zubatse neza muri Afurika, bigizwemo uruhare n'iryo shuri.

Abanyamategeko barenga 4024 ni bo bamaze kungukira ubumenyi bubafasha kuzuza inshingano zabo mu nzego z'ubutabera, bigizwemo uruhare na ILPD, imaze kwigwamo n'abanyamahanga bo mu bihugu 17 bya Afurika.

Minisitiri w'Ubutabera akaba n'Intumwa Nkuru ya Leta, Dr. Ugirashebuja Emmanuel yasabye abasoje amasomo muri ILPD guhora bihugura kuko kwiga bitarangira

Karigirwa Liliane yagaragaje ko amasomo bahawe bagiye kuyifashisha mu guteza imbere urwego rw’ubutabera mu Rwanda, Afurika n’Isi muri rusange

Abitabiriye umuhango wo gutanga impamyabumenyi muri ILPD banyuzwe n’umuziki uyunguruye bikozwe n’intyoza muri wo

Mu gikorwa cyo gutanga impamyabumenyi mu bize muri ILPD, abitabiriye banyuzwe n’imbyino za Kinyarwanda

Umuyobozi Mukuru wungurije ushinzwe Amasomo n’Ubushakashatsi muri ILPD, Dr. Yves Sezirahiga yahanuye abarenga 500 basoje amasomo muri ILPD

Abo mu miryango y’abasoje amasomo mu by’amategeko muri ILPD, bari baje kwishimana n’ababo ku ntambwe ikomeye bateye

Abanyeshuri 527 basoje amasomo mu bijyanye n’amategeko bari bamaze igihe bahererwa muri ILPD

Minisitiri w’Uburezi, Nsengimana Joseph yishimanye n’abasoje amasomo muri iri shuri

Umuyobozi w’Akarere ka Nyanza, Ntazinda Erasme na we yifatanyije n’abo muri ILPD bahawe impamyabumenyi

Minisitiri w’Uburezi, Nsengimana Joseph, atanga impamyabumenyi ku barangije amasomo

Umunyamabanga Mukuru w'Urwego rw'Igihugu rw'Ubugenzacyaha RIB, Col (Rd) Jeannot K Ruhunga (ubanza ibumoso) akaba n’umwe mu batanga amasomo muri ILPD na we yitabiriye igikorwa cyo guha impamyabumenyi abasoje amasomo

Umuyobozi Mukuru wa ILPD, Dr Aimé Muyoboke Karimunda yashimiye inzego zitandukanye zibafasha kugera ku ntego zabo zo guteza imbere no kwigisha amategeko

Umwanditsi w’agateganyo muri ILPD, Mugisha Richard na we yashimiye abanyeshuri ku bwitange bagaragaje mu bihe by’amasomo

Byatangajwe na Minisitiri w'Ububanyi n'Amahanga wa RDC, Thérèse Kayikwamba Wagner, mu kiganiro yagiranye n'umunyamakuru Christian Lusakueno wa Top Congo FM kuri uyu wa 6 Ukuboza 2024.

FDLR yashinzwe n'Interahamwe, ingabo zatsinzwe (Ex-FAR) n'abahoze mu butegetsi bwateguye Jenoside yakorewe Abatutsi mu 1994. Ihabwa ubufasha na Leta ya RDC burimo intwaro, amafaranga n'imyitozo ya gisirikare, nk'uko byemezwa n'impuguke z'Umuryango w'Abibumbye.

Gusenya uyu mutwe ni kimwe mu by'ingenzi biganirwaho mu biganiro bibera i Luanda muri Angola, bihuza Intumwa z'u Rwanda n'iza RDC kuva muri Werurwe 2024, ndetse mu Ugushyingo 2024 zemeranyije ko bizakorwa mu byiciro bitatu.

Icyiciro cya mbere cyo gusenya uyu mutwe ni icyo gusesengura ibibazo ushobora guteza no gutahura ibirindiro byayo n'aho ibitse ibikoresho, icya kabiri ni ukuyigabaho ibitero, icya gatatu ni ugucyura abarwanyi bayo. Byateganyijwe ko byose bizakorwa mu mezi atatu.

Umunyamakuru yabajije Minisitiri Kayikwamba impamvu Leta ya RDC idasaba u Rwanda kuganira na FDLR nk'uko na yo isabwa kuganira n'umutwe witwaje intwaro wa M23 urwanirira Abanye-Congo bo mu bwoko bw'Abatutsi.

Ni ikibazo umunyamakuru yabajije bisa n'aho adafite amakuru ahagije, kuko tariki ya 23 Werurwe 2023, ubwo Umuvugizi wa Guverinoma ya RDC, Patrick Muyaya, yaganiraga n'abanyamakuru i Kinshasa, yavuze ati 'Byaba byiza ko umuryango mpuzamahanga usaba Perezida Kagame kuganira na FDLR.'

Mu gisubizo kivuguruza Umuvugizi wa Guverinoma, Minisitiri Kayikwamba yabwiye uyu munyamakuru ko Leta ya RDC idashobora gusaba u Rwanda kuganira na FDLR kuko igizwe n'abajenosideri, asobanura ko ari rwo rwafata icyemezo cyo kubikora cyangwa kubireka.

Kayikwamba yagize ati 'Hari ibintu bibiri abantu batekereza kuri icyo kibazo; isano iri hagati ya FDLR na Jenoside, amateka y'u Rwanda. Abanyarwanda ubwabo ni bo bashobora gusobanura uko bakemura icyo kibazo cy'amateka ababaje. U Rwanda ni rwo rwafata icyemezo cy'icyo rukwiye gukora.'

Uyu muyobozi yasobanuye kandi ko abaturage ba RDC bagizweho ingaruka n'ubugizi bwa nabi abarwanyi ba FDLR bakorera mu Burasirazuba bwa RDC, mu myaka irenga 20 bamazeyo.

Ati 'Ntabwo duhakana ko FDLR iri muri RDC, kubera ko FDLR ihungabanya umutekano w'abaturage bacu. Biri mu nyungu zacu ko FDLR iva muri RDC.'

Minisitiri w'Ububanyi n'Amahanga n'Ubutwererane w'u Rwanda, Olivier Nduhungirehe, mu Ugushyingo 2024 yatangaje ko bidashoboka ko u Rwanda rwagirana ibiganiro n'umutwe wakoze Jenoside.

Yagize ati 'FDLR ni umutwe wakoze Jenoside, nta biganiro ibyo aribyo byose bishobora kubaho n'umutwe wakoze Jenoside. Nta gihugu na kimwe nigeze mbona mu Burayi cyangwa u Budage gisabwa kuganira n'Abanazi. Uyu ni umutwe wakoze Jenoside, watwiciye abaturage barenga miliyoni, rero ntibishoboka ko twaganira n'umutwe w'abajenosideri.'

Ku barimo Muyaya bagereranya FDLR na M23, Minisitiri Nduhungirehe Nduhungirehe yagaragaje ko bitumvikana kugereranya umutwe wakoze Jenoside n'urwanirira abaturage bicwa.

Minisitiri Nduhungirehe yagize ati 'Nta muntu wagereranya umutwe wakoze Jenoside n'umutwe urwanira abantu bahohoterwa, bakanicwa.'

Biteganyijwe ko tariki 15 Ukuboza 2024, Perezida Paul Kagame w'u Rwanda, Félix Tshisekedi wa RDC na João Lourenço wa Angola bazahurira i Luanda, baganire ku myanzuro yafashwe mu Ugushyingo 2024, by'umwihariko uwo gusenya FDLR.

Minisitiri Kayikwamba yagaragaje ko umutwe wa FDLR wakoze jenoside, bityo ko Leta ya RDC itasaba u Rwanda kuganira na wo

Minisitiri Nduhungirehe yavuze ko Leta y’u Rwanda idashobora kuganira n’umutwe wakoze jenoside

Imibare wamenya mbere yuko Rayon Sports icakirana na APR FC mu mukino w’i 104

Kuva APR FC yashingwa ifite ibikombe 22 bya Shampiyona naho Rayon Sports yashingiwe i Nyanza mu myaka 58 ishize, ifite ibikombe icyenda bya shampiyona.

Ikipe y'Ingabo imaze kwegukana Igikombe cy'Amahoro inshuro 14 mu gihe Rayon Sports igishaka ku nshuro ya 10.

Umwaka wa 2017, ni wo wonyine aya makipe yabashije guhuramo inshuro nyinshi, dore ko yahuye inshuro eshanu mu marushanwa atandukanye, ibintu bitigeze bibaho mu mateka y'aya makipe yombi bikunda kuvugwa ko ahuzwa na Leta (ntashobora gukina umukino wa gishuti yiteguriye yo ubwayo).

Muri rusange kuva mu 1995, ufashe imikino ya shampiyona ukongeraho n'andi marushanwa izi kipe zagiye zihuriramo n'imikino ya gishuti n'ubwo itabaye inshuro nyinshi usanga Rayon Sports na APR FC zimaze guhura inshuro 103.

Muri izo nshuro zose hamwe APR FC niyo imaze gutsinda inshuro nyinshi aho imaze gutsinda inshuro 44, Rayon Sports ikaba yaratsinzemo inshuro 33 naho bakaba barangajyije inshuro 26.

Muri iyo mikino 103 habonetsemo ibitego 263, harimo 126 ku ruhande rwa Rayon Sports n'ibitego 137 ku ruhande rwa APR FC.

Amazina atazibagirana muri uyu mukino

Jimmy Gatete wabashije gukinira aya makipe yombi, ni we ufite agahigo ko gutsinda ibitego byinshi mu mukino uhuza aya makipe, dore ko buri kipe yayitsindiye ibitego bine mu mikino itandukanye.

Sina Jérôme ari mu bakinnyi babashije gutsindira ikipe imwe ibitego byinshi muri uyu mukino, kuko afite bitandatu mu gihe Masudi Djuma watoje Rayon Sports na AS Kigali, ari we wabashije gutsindira APR FC ibitego byinshi, bigera kuri bitanu, anganya na Issa Bigirimana.

Kuva aya makipe yombi atangiye guhura, Davis Kasirye ukomoka muri Uganda, ni we wabashije gutsinda ibitego bitatu mu mukino umwe mu gihe abakinnyi barimo Sina Jérôme, Bokota Labama, Lionnel St Pleux, Ruhinda Farouk, Bokungu Ndjoli, Kambale Salita Gentil, Hakizimana Muhadjiri n'abandi bagiye batsindamo ibitego bibiri ku mukino.

Raoul Shungu ukomoka muri Repubulika Iharanira Demokarasi ya Congo ni we mutoza watsinze imikino myinshi yahuje aba bakeba kuko mu myaka itandukanye yatoje Rayon Sports yatsinze imikino irindwi atsindwa ine, anganya itanu muri 16 yatoje ahanganye na APR FC.

Imikino itazibagirana yahuje APR FC na Rayon Sports 

Umukino wa mbere itazibagirana ni uwakinwe tariki ya 03 Ugushyingo 1996 i Nyamirambo, ku mukino wa nyuma w'igikombe cyari cyateguwe n'iyahoze ari Kaminuza Nkuru y' u Rwanda (UNR), mu rwego rwo gukusanya inkunga yo gusana ibyari byangijwe n'inkongi muri iyi Kaminuza, Rayon Sports yanyagiye APR FC ibitego 5-2.

Yongeye kuyisubira tariki ya 26 Ukwakira 1997 i Remera kuri Stade Amahoro ku mukino wo kuyishyikiriza igikombe cya Shampiyona yari imaze kwegukana uwo mwaka, aho na none Rayon Sports yongeye gutsinda APR FC ibitego 5-2.

Mu 2011-2012, mu gikombe cy'Amahoro, APR FC yatsinze Rayon Sports ibitego 3-1 muri ½. APR FC yatsindiwe na Lionel Saint Preux, Kabange Twite na Papy Faty. Impozamarira ya Rayon Sports yatsinzwe na Hamiss Cédric.

Mu 2012-2013, APR FC yatangiye umwaka w'imikino itwara igikombe cy'isabukuru y'imyaka 25 ya FPR, itsinze ku mukino wa nyuma Rayon Sports ibitego 3-1. Ibitego byose byatsinzwe mu gice cya kabiri na Ruhinda Farouk (Sssentongo), watsinze bibiri n'aho ikindi gitsindwa na Cyubahiro Jacques. Hategekimana Aphrodis 'Kanombe' yatsindiye Rayon Sports impozamarira.

Mu mukino wa shampiyona wo kwishyura, wabaye tariki ya 9 Werurwe 2013, Rayon Sports yanyagiye APR FC ibitego 4-0 bitsinzwe na Hategekimana Aphrodis 'Kanombe', Hamisi Cédric na Kambale Salita Gentil 'Papy Kamanzi' watsinzemo ibitego bibiri.

Mu 2015, Hakizimana Louis yayoboye umukino APR FC yanyagiyemo Rayon Sports 4-0 ndetse no mu 2016 ayobora umukino Rayon Sports yangayigemo APR FC 4-0.

Mu 2017, amakipe yombi yahuriye mu mukino wa Super Cup wakinwe iminsi ibiri itandukanye. Iminota 63 ya mbere y'umukino yabereye i Rubavu, Rayon Sports itsinda 2-0 amatara yo kuri Stade Umuganda ahita azima. Indi minota 27 yakiniwe i Nyamirambo nyuma y'iminsi itanu, tariki ya 27 Nzeli, irangira nta kindi gitego kibonetse mu mukino, Gikundiro itwara igikombe.

Ubwo Rayon Sports yari imaze gutsinda APR FC igitego 1-0 mu mukino wahuje amakipe yombi muri Mata 2019, abafana b'impande zombi barahanganye ndetse izi mvururu zatumye amakipe yabo ahanwa na FERWAFA.

Gutsindwa na APR FC ibitego 2-0 mu Ukuboza 2019, byirukanishije umunya-Mexique Javier Martinez Espinoza watozaga Rayon Sports hashize iminsi itatu gusa umukino ubaye mu gihe Umunye-Congo Guy Bukasa yasezeye ku kazi nyuma yo gutsindwa na APR FC igitego 1-0 muri Kamena 2021.

Umurundi Masudi Djuma yirukanywe na Rayon Sports mu Ukuboza 2021 nyuma y'iminsi mike atsinzwe imikino yahuyemo na Kiyovu Sports ndetse na APR FC naho Umunya-Portugal Jorge Paixão ntiyongererwa amasezerano nyuma yo gusezererwa na APR FC muri ½ cy'Igikombe cy'Amahoro cya 2022.

Uyu mukino wandikiweho amateka 

Ku munsi wejo kuwa Gatanu nibwo ikipe ya Rayon Sports yatangaje ko amatike yo kwinjira kuri uyu mukino yashize. 

Ni ubwambere ibi byari bibaye kuva Stade Amahoro yavugurwa igashyirwa ku bushobozi bwo kwakira abantu barenga ibihumbi 45 dore ko hari harakiniwemo imikino 9 irimo n’iyi kipe y’igihugu y’u Rwanda, Amavubi.

Bivuze ko nibura mbere yo gukina,Rayon Sports yamaze gutsinda igitego cya mbere cyo kwinjiza akayabo k’amafaranga dore ko ayavuye mu kurusha amatike akabakaba miliyoni 200 Frw. 

Aya aza yiyongera ku yandi yavuye mu bafatanyabikorwa bari bwamamaze muri uyu mukino dore ko mu kiganiro n’itangazamakuru cyabaye kuwa Kane ,abayobozi bayo bari batangaje bamaze kubona miliyoni 50 Frw.

Uyu mukino wari umaze igihe kinini utegerejwe 

Uyu mukino wari umaze igihe kinini cyane utegerejwe kuko amatariki wari uteganyijweho , yimuwe inshuro ebyiri bitewe n’impamvu zigiye zitandukanye.

Ku ikubitiro wari uteganyojwe ko uri bukinwe ku itariki 14 Nzeri 2024, ariko ntiwaza gukinwa, kubera ko APR FC yari mu mikino ya CAF Champions.

Waje kwimurirwa ku itariki 19 Ukwakira, ariko nabwo ntiwakinwa kubera ko ikipe y'igihugu yari mu myiteguro yo gukina na Djibouti mu majonjora yo gushaka itike y'igikombe cya Africa cy'abakinnyi bakina mu bihugu bavukamo (CHAN).

N'ubwo iturufu yo kudakina umukino ku itariki 19 Ukwakira yabaye imyiteguro y'ikipe y'igihugu, APR FC yari yamaze gutanga ubusabe muri Rwanda Premier League isaba ko yazakina na Gasogi United kuri iyi taliki, mu mwanya wo gukina na Rayon Sports.

Ni umukino Rayon Sports iramanuka mu kibuga irusha amanota 11 ikipe ya APR FC, kuko kugeza ubu Rayon Sports inayoboye shampiyona y'u Rwanda n'amanota 29 izigamye ibitego 16, APR FC yo ni iya Gatandatu n'amanota 18 izigamye ibitego 4.

“>

Uyu muryango wageze mu Rwanda mu 1994, utanga inkunga y'ibiribwa n'ubuvuzi bw'ibanze n'ibikoresho nkenerwa ku baturage bari bakuwe mu byabo.

Nyuma y'aho World Vision yagize uruhare mu kubaka no gusana amacumbi yari yasenywe mu gihe cya Jenoside yakorewe Abatutsi, inakomerezaho muri gahunda y'ubumwe n'ubwiyunge n'isanamitima.

Mu 2000 ni bwo uyu muryango waje kwinjira no mu bikorwa byo guteza imbere urwego rw'uburezi binyuze mu gufasha abana b'impfubyi kwiga no kugira uruhare mu kwegereza abaturage ibikorwa remezo nk'amazi, kubaka imidugudu, amavuriro, amashuri, udukiriro n'ibyumba by'ikoranabuhanga (ICT centers), inzu zo kurwanya imirire mibi (nutrition centers) n'ibindi.

Ubwo hizihizwaga isabukuru y'imyaka 30 umaze, ku wa 3 Ukuboza 2024, Minisitiri w'Ibikorwaremezo, Dr. Jimmy Gasore, yagaragaje ko uyu muryango wagize uruhare rukomeye mu iterambere ry'igihugu mu ngeri zinyuranye.

Ati 'World Vision yaje gufasha mu iterambere by'umwihariko muri Minisiteri y'Ibikorwaremezo dufatanya mu gutanga amazi meza no mu bijyanye n'isuku n'isukura kandi ni ibintu twishimira cyane ko n'imbere bizadufasha kugeza amazi meza kuri benshi, amashuri n'amavuriro n'ibindi.'

Yagaragaje ko muri gahunda ya Guverinoma y'u Rwanda y'imyaka itanu, igihugu cyiteze byinshi ku miryango itari iya Leta mu kuyishyira mu bikorwa.

Yavuze ko kuba World Vision imaze gushora arenga miliyoni 625$ ari amafaranga menshi kandi byagize impinduka nziza ku baturage.

Ati 'Kuba mumaze gushora arenga miliyoni 625$ ni ikintu gikomeye, ni amafaranga menshi mu mibare ariko biba akarusho ku mpinduka zigaragaza zagiye zibaho nk'uko abaturage babitangamo ubuhamya.'

Umuyobozi wa World Vision mu Rwanda, Pauline Okumu, yashimiye Leta y'u Rwanda ku bufatanye n'uyu muryango mu rugendo rwo guteza imbere abaturage n'igihugu muri rusange.

Ati 'Guhera mu 1994 turi guharanira kongera kubaka icyizere, dukomeza no guteza imbere imiryango, haba mu bikorwa by'iterambere no mu guhangana n'ibibazo by'ubutabazi ku bagirwaho ingaruka n'ibiza no gufasha impunzi.”

“Ibi twabigezeho binyuze mu burezi, kurengera umwana, ubuzima, isuku n'isukura, kongera ubushobozi bwo kwigira, iterambere ry'ubukungu n'imibereho myiza, kurengera no kubungabunga ibidukikije n'ibindi. Uru rugendo ni ikimenyetso cy'imbaraga zituruka ku bufatanye n'intego dusangiye.'

Yakomeje agira ati 'Uyu munsi, twishimiye kugaragaza bimwe mu byagezweho. Mu myaka 30 ishize, hashowe asaga miliyoni 625 z'amadolari ya Amerika mu kuzamura imibereho myiza y'abana n'imiryango yabo mu Rwanda.'

Yeshimangiye ko biteguye gukomeza gukorana n'u Rwanda by'umwihariko mu gushyira mu bikorwa gahunda yo kwihutisha iterambere ya NST2.

Perezida wa World Vision, Andrew Morley, yagaragaje ko nyuma y'urugendo rw'imyaka 30, biteguye gukomeza gufatanya na Leta y'u Rwanda mu kugera ku ntego zarwo.

Ku rundi ruhande kandi Umuyobozi wa World Vision mu Karere ka Afurika y'Iburasirazuba, Liliane Dodzo, yemeje ko u Rwanda ari igihugu kiri gutera imbere kandi gikwiye kureberwaho n'amahanga mu kwishakamo ibisubizo.

Abaturage barashima

Bamwe mu baturage bafashijwe na World Vision mu bihe bitandukanye, baragaragaza ko bishimira ko yabakuye mu bwigunge.

Mukaruhaba Valerie ati “Ntimwabona ibyishimo dufite, mbere twajyaga kwivuza i Bungwe ukaba wahagenda nk'amasaha abiri kandi niho n'amashuri yabaga ku buryo hari abana bagendaga bakaruha rimwe na rimwe bakagarukira mu nzira.'

Hagenimana Thacien yagize ati “Twari turiho mu buzima bugoranye ariko ubu bagiye kutwegereza ishuri n'ivuriro, twari tubikeneye ku buryo n'abana bataga ishuri bagiye kujya baza kwiga hafi, abarwayi bivurize hafi ntawe uzongera kurembera mu rugo.'

Abahawe amazi bashima ko bakikijwe kuvoma ibirohwa mu gihe hari n'abafashijwe kwikura mu bukene.

Umuyobozi wungirije w'Ikigo cy'Iterambere cy'Abanya-Koreya mu Rwanda, KOICA, Yóo jee Hyun, yavuze nk'abafatanyabikorwa ba World Vision, urugendo rw'imyaka 30 rwabaye intangarugero kandi rutanga umusanzu ukomeye ku iterambere ry'imibereho myiza y'abaturage.

Umuyobozi w'Amashami ya UN mu Rwanda, Ozonnia Ojielo, yasabye imiryango mpuzamahanga ikorera mu Rwanda gukomeza kugira uruhare mu bikorwa bitandukanye bikibangamiye imibereho y'abaturage.

Ubuyobozi bwa World Vision mu Rwanda bwishimira uruhare bwayo mu iterambere ry’igihugu

Minisitiri w’Ibikorwaremezo, Dr. Jimmy Gasore, yagaragaje ko uruhare rwa World Vision ari ntagereranwa mu myaka 30 imaze

Umuyobozi wa World Vision mu Karere ka Afurika y'Iburasirazuba, Liliane Dodzo, yashimye iterambere ry’u Rwanda

Umuyobozi w'Amashami ya UN mu Rwanda, Ozonnia Ojielo, yashimye uruhare rwa World Vision mu Rwanda

Bora François yashimye ubufasha yahawe na World Vision n’uruhare rwayo mu myaka 30 ishize

Sam Bizimana yavuze umuvugo utaka World Vision yamuteye ingabo mu bitugu

Umuyobozi Mukuru wa World Vision Rwanda, Pauline Okumu, yashimye ubufatanye n’u Rwanda mu myaka 30 ishize

Umuyobozi wa UNICEF mu Rwanda, Julianna Lindsey, yari mu bitabiriye ibyo birori

Imbyino z’abasore bo mu Itorero Inyamibwa zari zinogeye ijisho

Ababyinnyi b’Itorero Inyamibwa ni bo basusurukije abitabiriye ibirori mu mbyino gakondo

Lion Imanzi ni we wari uyuboye ibyo birori

Ubwo Minisitiri Dr. Jimmy Gasore yakirwaga

Umuyobozi Mukuru wa Imbuto Foundation, Shami Elodie, ari mu bitabiriye ibi birori

Abitabiriye ibi birori bafataga ifoto y’urwibutso

Imyaka 30 ya World Vision mu Rwanda yaranzwe n’ibikorwa bitandukanye

Hafashwe ifoto y’urwibutso n’abitabiriye ibyo birori

Amafoto: Rusa Prince