Category: Uncategorized

Abayobozi b'urwo rwego batangaje ko Mondlane uherutse gutaha avuye mu buhungiro, pasiporo ye y'abadipolomate yarangiye kubera ko yeguye nk'umudepite muri icyo gihugu, ubwo yajyaga kwiyamamaza mu matora y'Umukuru w'Igihugu.

SENAMI ibinyujije mu itangazo yashyize hanze, yavuze ko abakora mu bijyanye no gucunga ibyangombwa by'abinjira n'abasohoka ku kibuga cy'indege cya Maputo (Maputo International Airport) ubwo bangenzuraga ibyangombwa by'uyu muyobozi babonye ko agendera kuri Pasiporo y'abadipolomate kandi itagikora kubera ko yeguye mu Nteko Ishinga Amategeko muri Mozambique.

SENAMI yavuze ko mu gihe Mondlane yakwifuza Pasiporo isanzwe yayibona nta kibazo.

Mondlane wari umaze amezi abiri muri Afurika y'Epfo yavuze ko yagarutse mu gihugu cye kugira ngo abe Umukuru w'Igihugu.

Mondlane ntiyemeye ibyavuye mu matora ya Perezida, yagizemo amajwi 20%, asaba abaturage kujya mu mihanda bakigaragambya nubwo we yahise ahunga.

Nubwo Mondlane yagaragaje ko habayemo uburiganya mu matora, tariki 23 Ukuboza 2024, Urukiko rushinzwe kurinda Itegeko Nshinga muri Mozambique, rwashimangiye intsinzi ya Daniel Francisco Chapo wo mu ishyaka rya FRELIMO.

Venâncio Mondlane ubwo yageraga ku kibuga cy’indege avuye mu buhungiro mu gihugu cya Afurika y’Epfo

Mu Ukwakira 2023 nibwo iri shuri ryafunguye amarembo i Kigali. Ni ishuri rizajya ritanga amasomo agamije guteza imbere imiyoborere myiza ku Mugabane wa Afurika.

Biteganyijwe ko umuhango wo kurifungura ku mugaragaro uzaba ku wa Kabiri tariki 14 Mutarama 2025.

Ryashibutse ku muryango African School of Governance Foundation washinzwe ku bitekerezo birimo ibya Perezida Paul Kagame, Hailemariam Desalegn wahoze ari Minisitiri w'Intebe wa Ethiopia n'abandi bakuru b'ibihugu bya Afurika.

Iteka rya Minisitiri w'Uburezi, Nsengimana Joseph, ryemerera African School of Governance, gutangira gukora mu Rwanda, rikanayiha ubuzimagatozi. Rigaragaza kandi ko rizajya ritanga amasomo y'icyiciro cya gatatu cya kaminuza.

Iri teka ryasohotse ku wa 07 Mutarama 2025, rigaragaza ko rigomba gutangira gukurikizwa ku munsi ryatangarijweho mu Igazeti ya Leta ya Repubulika y'u Rwanda.

Amosomo iri shuri rizajya ritanga ni ay'icyiciro cya gatatu cya kaminuza mu bijyanye n'Imiyoborere arimo Master of Public Administration [MPA], Master of Public Administration in Natural Resource Governance [MPA-NRG] na Master of Public Administration in Human Development [MPA-HD].

Hazajya hatangwa kandi amahugurwa y'igihe gito ku bashaka gukarishya ubumenyi mu bijyanye n'imiyoborere.

Ryitezweho kuzatanga ubumenyi bugamije gufasha Afurika kwigobotora ibibazo bitandukanye bijyanye n'imiyoborere, hahugurwa urubyiruko rutandukanye kugira ngo rugire uruhare kuri ejo hazaza.

Prof Kingsley Moghalu wahoze ari Guverineri wa Banki Nkuru ya Nigeria ni we muyobozi mukuru w'iri shuri.

Prof. Anna Lucy Mdee usanzwe ari umwarimu muri Kaminuza ya Leeds mu Bwongereza, ni we muyobozi mukuru wungirije ushinzwe amasomo, Nkurunziza Mark nawe akaba umuyobozi ushinzwe ibikorwa n'imari.

Mu bagize inama y'ubutegetsi y'iri shuri harimo Donald Kaberuka wahoze ari Umuyobozi wa Banki Nyafurika Itsura Amajyambere [BAD], Francis Gatare uherutse kugirwa Umujyanama wihariye muri Perezidansi ya Repubulika n'abandi.

Iri shuri rifite icyicaro mu nyubako yahoze ikoreramo Urwego rw'Igihugu rw'Iterambere, RDB, ku Gishushu mu Karere ka Gasabo.

Prof Kingsley Moghalu wahoze ari Guverineri wa Banki Nkuru ya Nigeria ni we muyobozi mukuru w'iri shuri

Akarere ka Ngoma ni kamwe mu twubatswemo ibikorwaremezo byinshi muri iyi myaka ya vuba byanatumye gahinduka nyabagendwa.

Ibyo bikorwaremezo birimo stade, hoteli, imihanda myiza ya kaburimbo izenguruka aka Karere, umuhanda ugahuza na Bugesera n'ibindi byinshi.

Nubwo bimeze gutyo, umuntu wagendereye aka karere agorwa no kubona imodoka mu masaha ya nimugoroba, kuko nyinshi mu modoka zitwara abagenzi Saa Kumi n'Ebyiri ziba zisoje, izindi zikarangiza gutwara abagenzi saa Moya zuzuye, nyuma yaho biragoye ko wabona imodoka igutwara.

Umwe mu baturage IGIHE yasanze muri gare ya Ngoma yagize ati 'Biratangaje kubona umuntu aje gutega agiye Kayonza cyangwa i Kigali kuva Saa 18:30 kugeza nka saa Moya akaba atabona imodoka, ni ibintu bibabaje cyane umujyi nk'uyu wakabaye wagutse ku buryo igihe cyose umuntu aziye yakabonye imodoka imutwara.'

Umumotari witwa Nshimiyimana umaze igihe kinini akorera muri aka karere yavuze ko hari abagenzi benshi bakura mu byaro babageza muri gare bagasanga ahantu hose bafunze ku buryo nta modoka babona.

Yasabye ubuyobozi kugerageza gukorana n'abikorera hakaboneka imodoka zishobora gukomeza gutwara abantu kugeza nibura Saa Tatu z'ijoro.

Tuyisenge Emmanuel we yagize ati 'Iyo ugeze hano muri gare saa Moya z'ijoro nta modoka wahabona, ni ibintu bibangamye cyane kuko urumva iyo uje muri gahunda zawe muri Ngoma bigusaba kwicara ucungana n'amasaha bikanatuma udakora ibyo wateguye utuje kuko kuva Saa Kumi n'Ebyiri imodoka abantu batangira kuzirwanira kuko mu minota mike zihita zibura.'

Tuyisenge yavuze ko uku kubura kw'imodoka binatuma Umujyi wa Ngoma ukonja hakiri kare ku buryo ngo saa Moya z'ijoro ahantu hose baba banatangiye gufunga. Yavuze ko ari ibintu ubuyobozi bukwiriye kwigaho bigahindurwa kuko bituma aka gace kadatera imbere.

Umuyobozi w'Akarere ka Ngoma wungirije ushinzwe Iterambere ry'Ubukungu, Mapambano Nyiridandi Cyriaque, yabwiye IGIHE ko iki kibazo bakizi ndetse banatangiye kuganira na ba rwiyemezamirimo mu rwego rwo gushaka ibisubizo birambye.

Ati 'Natwe ikibazo twarakibonye ariko nk'uko mubizi twari tumaze igihe dushyiramo ibikorwaremezo mu Mujyi wa Ngoma, hari no kubakwa umuhanda ujya Bugesera ubu naho hamaze kujyamo imodoka zijya za Sake ziturutse i Kigali. Twakoranye inama na ba rwiyemezamirimo bakoresha imodoka zitwara abagenzi kugira ngo batangire gutekereza mu buryo bwagutse, abantu be kumva ko kurenza saa Moya uri i Ngoma ari ikibazo.'

Yavuze ko kuri ubu bari mu biganiro na ba rwiyemezamirimo kugira ngo bongere amasaha ku buryo imodoka zakongerwa amasaha zikoreraho kugeza saa Tatu z'ijoro cyangwa saa Yine. Yijeje abaturage ba Ngoma ndetse n'abagenderera aka Karere ko mu minsi mike iki kibazo kizaba cyakemutse burundu.

Abakorera n'abagenderera Akarere ka Ngoma babangamiwe no kuba nyuma ya saa Moya z'ijoro babura imodoka

Aya mahugurwa agenerwa abapolisi bo ku rwego rwa ba ofisiye bato abaye ku nshuro yayo ya 15, yitabiriwe mu gihe cy'amezi atanu n'abagera kuri 45 barimo; 15 bakomoka muri Sudani y'Epfo, 21 bo muri Polisi y'u Rwanda, batatu bo mu Rwego rw'Igihugu rushinzwe iperereza n'umutekano (NISS), bane bo mu Rwego rw'Igihugu rushinzwe Ubugenzacyaha (RIB) na babiri bo mu Rwego rw'Igihugu rushinzwe Igorora (RCS).

Ubwo yasozaga aya mahugurwa ku mugaragaro, Umuyobozi Mukuru Wungirije wa Polisi y'u Rwanda ushinzwe Ibikorwa, Vincent Sano yavuze ko kubaka ubushobozi ari urufunguzo rwo kubasha guhangana n'ibiteza umutekano muke bigenda bihindura isura uko isi irushaho gutera imbere.

Ati 'Mu kazi ko gucunga umutekano ku Isi muri iki gihe, bisaba ko abakozi mu nzego zose bireba bagira ubumenyi n'ubushobozi bukenewe kugira ngo babashe guhangana n'ibiteza umutekano mucye mu bihugu byacu, mu Karere ndetse n'ahandi ku isi. Ni yo mpamvu, guverinoma y'u Rwanda na Polisi y'u Rwanda by'umwihariko, bashyira imbaraga nyinshi mu kubaka ubushobozi.'

Yakomeje avuga ko 'Amahugurwa musoje uyu munsi ni ingenzi kuri Polisi y'u Rwanda, Polisi ya Sudani y'Epfo no kuri mwe ubwanyu by'umwihariko. Kuba muyasoje neza ni ibyo kwishimira mutekereza ku rugendo mwanyuzemo, ubuyobozi bw'ishuri, inteko y'abarimu na bagenzi banyu mwafatanyije amahugurwa.'

Sano yabasabye kuzihatira gushyira mu bikorwa intego z'aya mahugurwa no gukomeza kurangwa n'ishyaka n'imyitwarire myiza kugira ngo babashe kuzuza neza inshingano zabo no gutanga umusaruro.

Ati 'Aya mahugurwa agamije kongerera abayitabira ubumenyi bujyanye no gutekereza, gutegura no gukora akazi ko gucunga umutekano mu buryo burenze ubusanzwe bukoreshwa kandi bujyanye n'igihe. Hari icyizere ko ubumenyi n'ubushobozi muyungukiyemo bikubiye hamwe n'imyitwarire myiza n'ishyaka byabaranze bizabafasha gukora neza akazi aho muzaba mwoherejwe gukorera no kurushaho gutanga umusaruro.'

Ba Ofisiye 45 basoje amahugurwa ku mikorere ya kinyamwuga n'ubuyobozi

Ni mu butumwa abatwara moto mu Mujyi wa Kigali bahawe mu mpera z'iki cyumweru, ubwo basurwaga n'Ishami rya Polisi rishinzwe umutekano wo mu muhanda (TRS) muri parikingi zitandukanye zabashyiriweho mu Mujyi wa Kigali.

Ni mu gihe kugeza ubu mu Mujyi wa Kigali kuva hatangijwe gahunda yo gushyiraho parikingi zagenewe abatwara abagenzi kuri moto, kuri ubu habarurwa izigeze ku munani zimaze gukorwa, akaba ari gahunda izakomeza hirya no hino mu gihugu.

Parikingi enye ziherereye Nyabugogo mu Karere ka Nyarugenge; ahakikije ikigo abagenzi bategeramo imodoka (Gare); indi ikaba hafi ya Gare yo mu Mujyi ahazwi nka Downtown.

Mu Karere ka Kicukiro parikingi iri ku marembo ya Gare ya Nyanza izindi ebyiri zikaba zarashyizwe mu Karere ka Gasabo; ku Giporoso ahazwi nko kuri Sabans na Kimihurura.

Umuvugizi w'Ishami rya Polisi rishinzwe umutekano wo mu muhanda; SP Emmanuel Kayigi yavuze ko parikingi zashyiriweho abatwara n'abatega moto zizafasha kunoza iyi serivisi, bigakorwa mu ituze hirindwa akajagari n'umuvundo.

Ati “Gahunda yo gushyiraho parikingi za moto yitezweho guca umuvundo n'akajagari byajyaga bigaragara bikabangamira urujya n'uruza rw'ibinyabiziga. Nk'uko ibigo abagenzi bategeramo imodoka bizwi kandi bifasha koroshya iyi serivisi, turashishikariza abatwara moto nabo kubahiriza parikingi zashyizweho bakaba arizo bategererezamo abagenzi mu rwego rwo kwirinda umuvundo bateza bazenguruka mu mihanda cyangwa baparika ahatarabigenewe.”

SP Kayigi yasabye n'abagenzi batega moto kubahiriza iyi gahunda bazitegera muri parikingi kuko biri mu bizafasha mu kurwanya gukorera mu kajagari no kurwanya imwe mu myitwatire mibi yarangaga bamwe mu bamotari nko gutwara badafite uruhushya, ubujura bwo gushikuza telefoni n'amasakoshi abagenzi, guhisha cyangwa guhindura pulake n'andi makosa atandukanye.

Umujyanama wa kabiri muri Ambasade y'u Rwanda mu Buhinde, Mwepesi Emile yavuze ko imikorananire myiza y'ubufatanye hagati y'u Rwanda n'u Buhinde ari yo yatumye hashyirwaho igabanyirizwa ry'igiciro mu bitaro Abanyarwanda benshi bivurizamo mu Buhinde.

Yagize ati “Umubare munini w'Abanyarwanda baza kwivuriza mu Buhinde bivuriza mu Bitaro bya Medanta biri muri Leta ya Haryana. Bahabwa igabanyirizwa rya 15% ry'ibiciro, ku bufatanye bw'ibitaro na Ambasade y'u Rwanda.”

Yakomeje avuga ko ibihugu byombi byazamuye umubano ku rwego rwo hejuru mu bijyanye n'ubufatanye mu nzego zose.

Yatangaje ko indwara ziza ku isonga mu zo Abanyarwanda bajya kwivuza mu Buhinde ari kanseri, gusimbuza ingingo zirwaye, kubagwa amagufa no kwivuza umutwe udakira.

Igiciro cyo gusimbuza impyiko muri ibyo Bitaro bya Medanta biri mu Murwa Mukuru New Delhi, kiva ku bihumbi 12$ kugeza ku bihumbi 15$ (ari hagati miliyoni 16.764 Frw na miliyoni 20.955 Frw).

Bisobanuye ko Umunyarwanda ujya gusimbuza impyiko mu Bitaro bya Medanta yagombaga kwishyura miliyoni 16.764 Frw agabanyirizwa akishyura 14.249.400 Frw, bivuze ko iyo 15% aganyarizwaho arenga miliyoni 2.5 Frw.

Mugabo Yvette ni umwe mu bagiye kuvuza umubyeyi we mu Bitaro bya Medanta binivurizamo n'abandi Banyafurika, aho avuga ko yahamaze ukwezi kumwe kandi ko serivisi bahawe kuva bagera Buhinde zari nta makemwa.

Aganira na RBA yagize ati 'Twageze ku kibuga cy'indege mu masaha ya nijoro cyane, ibitaro byohereza imodoka iza kudufata itujyana kuri hoteli ducumbitsemo. Kubera umubano mwiza igihugu cyacu gifitanye n'u Buhinde mu buvuzi, badukurikirana neza ndetse ku Banyarwanda hari igabanyirizwa ku biciro badushyiriyeho. Twasanze u Buhinde bwita ku barwayi cyane hakagira igihinduka.”

Imitangire myiza ya serivisi mu bitaro byo mu Buhinde ishingiye ku kuba ari igihugu gifite ikoranabuhanga riteye imbere mu buvuzi ndetse n'ibitaro bifite uburambe n'inzobere mu kuvura indwara zikomeye ku rwego rw'Isi.

Ubushobozi bw''bikorwaremezo by'ubuvuzi mu Buhinde bumaze igihe kinini kuko nk'Ibitaro byitwa Apollo biri i New Delhi byubatswe mu 1986 bifite abaganga ibihumbi umunani, farumasi nyinshi n'ibitanda byakira abarwayi ibihumbi 10.

U Buhinde bufite ubuvuzi buteye imbere mu ndwara zitandukanye zirimo iz'umutima, kanseri, gusimbuza ingingo, ubugororangingo, kubaga ibibyimba, kubaga umugongo n'izindi.

Abanyarwanda bari hagati ya 20 na 30 boherezwa kwivuriza mu Buhinde buri kwezi.

Abanyarwanda bivuriza mu Buhinde bemerewe igabanyirizwa rya 15%

Ku bufatanye n'Ishuri-Umuco ryashinzwe n'Abanyarawanda batuye mu mujyi wa Liège, Umunyamakuru Hélène Annet na Yvan Gorré wandika agategura filimi n'ibiganiro binyura kuri Televiziyo y'u Bubiligi muri kiganiro cy'abana cyitwa 'Les Niouzz', bajyanye n'abana biga mu Ishuri-Umuco mu Rwanda hakorwa iyo filime mbarankuru.

Abo bana bajyanye na Eric Twagirimana warishinze ndetse n'uwitwa Karurenzi Donatille bafatanya ibikorwa byo kwigisha muri iryo shuri.

Iyo filime yashingiwe ku byo abo bana bagiye babona, byaba amateka ababyeyi babo babayemo muri Jenoside yakorewe Abatutsi n'uko bababonye u Rwanda rwiyubatse.

Babifatanyaga n'ubuhamya bwa Karurenzi Donatille, warokokeye i Kabgayi, bituma filime igira umwihariko wo guhuza ibiganiro by'abana n'ubuhamya.

Ikindi ni uko amashusho n'injyana byakoreshejwe na byo byahaye imbaraga, iyi filime yiswe 'La Force des Racines'.

Iyi filime y'iminota 26, yatoranyijwe mu zindi 19 zahataniraga igihembo ngarukamwaka cyiswe 'Prix du Journalisme 2024 du Parlement de la Fédération Wallonie-Bruxelles.'

Yatoranyijwe kuko abakemurampaka babonye yarakoranywe ubushake n'ubwitonzi kugira ngo izabere imfashanyigisho urubyiruko mu gusobanukirwa amateka ya Jenoside yakorewe Abatutsi mu Rwanda, no kumenya aho u Rwanda rugeze rwiyubaka.

Babinyujije muri iyi filime, Hélène Annet na Yvan Gorré batanze umusanzu ukomeye mu gusobanura ibihe bikomeye Abanyarwanda banyuzemo, banakangurira abakiri bato guhangana n'ibibazo byugarije Isi birimo urugomo n'ivanguramoko.

Hélène Henet yasobanuye ko yakoze iyi filime kugira ngo agaragaze ibyaranze Jenoside yakorewe Abatutsi, yifashishije ubuhamya bwa Donatille Karurenzi wari ufite imyaka 13 y'amavuko mu 1994, akarokokeye i Kabgayi.

Ati 'Na hano dutuye mu Burayi, urwango, urugomo no kwihakana abantu byabayeho kandi bikomeje no kugaragara. Hari n'ubwo bituruka ku tuntu duto.'

Yavuze ko intego yabo yari ukwerekana ko ibyabaye mu Rwanda n'iwabo byabayo mu gihe nta cyaba gikozwe ngo bihagarare, agaragaza ko ari n'uburyo bwo gukebura abakiri bato bakaba maso, bakamenya neza amateka, bakubahana, ntibagirane ibibazo kuko bafite byinshi bahuriyeho.

Mu kiganiro na IGIHE, Donatille Karurenzi yagaragaje ko yishimiye iki gihembo bijyanye n'uruhare kizagira mu gusobanura amateka.

Abishingira k'uko kuva iyi filime yasohoka, abarimu n'abanyeshuri bo mu Bubiligi barayifashisha, ndetse rimwe na rimwe bagatumira abarokotse Jenoside yakorewe Abatutsi kugira ngo batange ubuhamya, bakarushaho gusobanukirwa.

Ati 'Uretse n'igihembo twishimiye cyane urugendo duherutsemo [mu Rwanda] kuko ni rwo ntandaro y'iyi filimi mbarankuru. Byaduhaye imbaraga zo gukomeza gukundisha abana igihugu, kubasobanurira amateka yacyo, amateka ababyeyi babo baciyemo.'

Yavuze ko icyo gihembo kinasubiza agaciro abishwe muri Jenoside yakorewe Abatutsi, n'abayirokotse, kikanibutsa abatuye Isi ko bakwiye kubaka imbere heza hashingiye ku mahoro no gufashanya.

Ishuri-Umuco ryatangijwe mu mpera z'umwaka wa 2019 n'Abanyarwanda baba mu mahanga muri DRB-Rugari Liège.

Bishyize hamwe mu rwego rwo kwishakamo ibisubizo no gufasha abana bakomoka ku Banyarwanda kurushaho kunga ubumwe no gusigasira umuco nyarwanda.

Eric Twagirimana uyobora Ishuri-Umuco de Liège yashimiye cyane Inteko y'Umuco, Misiteri y'Ububanyi n'Amahanga n'Ubutwererane, MINUBUMWE na Polisi y'u Rwanda uko babafashije cyane mu rugendoshuri rwavuyemo iyi filime, n'abandi bose bakoze ngo iki gikorwa kigere aho kigeze kandi neza. Ati 'Ndashimira cyane kandi Ababyeyi dufatanya kwigisha abana bacu umuco n'ibijyana nawo byose muri Liège, mukomeze mukigire icyanyu.'

Inteko Ishinga Amategeko ya Bruxelles (Parlement de la Fédération Wallonie-Bruxelles) yahembye abakoze filime mbarankuru igaruka kuri Jenoside yakorewe Abatutsi

Umunyamakuru Hélène Henet na Yvan Gorré baganira n'Umunyamakuru wa IGIHE

Ubwo Umunyamakuru Hélène Henet na Yvan Gorré bahabwaga bashyikirizwaga igihembo

Abagize Ishuri – Umuco de Liège bigishwa amasomo atandukanye arimo ajyanye n’Umuco Nyarwanda

Twagirimana Eric uyobora Ishuri-Umuco de Liège yashimiyeinzego z’ubuyobozi bw’u Rwanda babafashije cyane mu rugendo shuri bakoreye mu Rwanda rwavuyemo iyi filime

Perezida w'Inteko Ishinga Amategeko ya Bruxelles (Parlement de la Fédération Wallonie-Bruxelles) Benoit Dispa, akikijwe n'abanditse iyi filime n'abagize Inteko n’abari mu kanama nkemurampaka

Donatille Karurenzi mu kiganiro na IGIHE. Hari nyuma yo kwakira iki gihembo cya filime mbarankuru igaruka kuri Jenoside yakorewe Abatutsi yagizemo uruhare

Abana bo mu Ishuri-Umuco basuye Ingoro y’Amateka y’Urugamba rwo Guhagarika Jenoside yakorewe Abatutsi

AMASHUSHO: Ikiganiro cyihariye na Donatille Karurenzi wari uhagarariye Ishuri-Umuco rya Liège, nyuma y'uko Filimi Documentaire yiswe 'La force des raciness', ivuga ku mateka ya Jenoside yakorewe Abatutsi yahawe igihembo cy’Itangazamakuru cya 2024 n'Inteko Ishinga Amategeko y'u… pic.twitter.com/xpag5VosCr

— IGIHE (@IGIHE) January 9, 2025

[email protected]

Yatangiye urugendo rwo guca agahigo ku wa Gatanu tariki 17 Gashyantare 2017 saa mbili za mu gitondo arusoza ku wa Gatandatu, tariki ya 18 Gashyantare 2017 saa yine n'iminota umunani za mu gitondo, aho yakiniraga muri Petit Stade i Remera.

Ni agahigo yashyizeho afite gahunda yo gukusanya amafaranga yo kurangiza kubaka Stade mpuzamahanga ya Cricket iherereye i Gahanga muri Kicukiro no kurushaho kuzamura no kumenyekanisha umukino wa Cricket mu Rwanda.

Kuva mu 2017 u Rwanda rwabonye Stade Mpuzamahanga ya Cricket i Gahanga, rutangira gutera imbere muri uyu mukino cyane ko rwagiye rwitabira Igikombe cy'Isi mu bangavu n'Igikombe cya Afurika.

Uwamahoro akinira Ikipe y'Igihugu ya Cricket kuva mu 2008, akaba yarayinjiyemo yiga mu mwaka wa kabiri w'amashuri yisumbuye.

Aganira na IGIHE yavuze ko ' Gushyiraho aka gahigo nanubu katarakurwaho, nabikoze kugira ngo ngaragaza ko n'abakobwa bashoboye, ibyo abahungu bakora nabo babishobora.'

'Byari ibintu bidasanzwe kuri njewe n'ubwo ari umuhigo nari nihaye ntabwo byari byoroshye, amasaha 26 no kuyatekereza ubwayo urananirwa, ariko bitewe n'icyo naharaniraga kugeraho narabitekerezaga muri njye ngahita ngarura imbaraga.'

Uwamahoro yavuze ko yifuza ko umukino wa Cricket ukomeza gutera imbere kandi n'umubare w'abakobwa bawukina nawo ukiyongera kandi bakayoboka n'indi mikino itandukanye.

Ati 'Siporo ni ubuzima, ishobora no kugutunga ubwo rero urumva ko mfite impamvu zo gukangurira abakobwa kuyiyoboka.'

'Bakitabira siporo ariko nanone ntibibagirwe ubuzima busanzwe, aha ndibanda ku ishuri. Hari igihe bumva ko iyo ugiye muri siporo ureke kwiga nyamara byose wabihuza. Cricket ni umukino wo mu mutwe ubwo rero urumva ko byuzuzanya.'

Uwamahoro yaciye amarenga ko n'ubwo yahagarika gukinira Ikipe y'Igihugu, hari imirimo myinshi yakerekezamo amaboko mu rwego rwa siporo by'umwihariko muri Cricket.

Ati 'Ubu ngeze muri cya gihe mvuga ngo hari abo nsize bashobora kunsimbura. Hari abana bato bari kuzamuka kandi mbona babizi, icyo nifuza ni ukubona bakomeza kuba benshi cyane.'

'Muri cricket habamo amahirwe menshi atandukanye arimo gusifura, kogeza, gutoza, kubara amanota, aho hose niho ngenda nisanga ku buryo nakomereza muri uyu mukino.'

Jenoside yakorewe Abatutsi yabaye Umwamahoro afite amezi atandatu, aho yagiriye ibyago byo kubura se umubyara.

Nubwo yasigaranye na nyina gusa, avuga ko yamureze neza bituma akura yumva ko buri kimwe cyose yiyemeje gukora ashobora kukigeraho.