Webrwanda Backend

Category: Uncategorized

  • Real Madrid yongeye gushongorwa n'ikipe ya Barcelona iyereka ko bitari ku rwego rumwe #rwanda #RwOT

    Real Madrid yashakaga kwishyura nyuma y'uko itsinzwe mu mukino wa 'El Clasico' iheruka gukina na Barcelona mu ijoro ryashize, ariko birangira yongeye kugira ipfunwe. Mu ijoro ryo ku cyumweru cyashize, Madrid yatsinzwe na Barcelona ibitego 5-2 mu mukino wa nyuma wa Espagne Super Cup wabereye i Jeddah, muri Saudi Arabia.

    Ibyo byakurikiranye gutsindwa ibitego 4-0 iwayo na Barcelona muri shampiyona ya Espagne mu kwezi ku Ukwakira ku mwaka ushize.

    Kylian Mbappé yashyize imbere Madrid hakiri kare mu mukino wa kabiri, ariko Barcelona yahise ihunga ibitego byatsinzwe na Lamine Yamal, Robert Lewandowski, Raphinha — watsinze ibitego bibiri — na Alejandro Balde.

    Rodrygo yatsinze igitego cya Madrid ku isaha nyuma yuko umunyezamu wa Barcelona, Wojciech Szczesny, yirukanwe hakiri kare mu gice cya kabiri.

    Iyi ni intsinzi ya gatatu kuri Barcelona mu 2025 nyuma yo gutsindwa imikino ibiri yikurikiranya irangiye umwaka ushize.

    Lewandowski yagize ati: 'Ikiruhuko cya Noheri cyadufashije gutekereza ku byo twakoze bibi'. Ati: 'Ubu dushobora gutegereza ko imikino dufite kugeza shampiyona irangiye.'

    Madrid yatsinzwe bwa mbere nyuma yo gutsinda intsinzi eshanu zikurikirana.

    Umutoza wa Madrid, Carlo Ancelotti, yagize ati: 'Byari ijoro ribi.' Ati: 'Birababaje, ntituzabihisha, ariko ni umupira w'amaguru ni ugenda, tugomba kugerageza kwigira kubihombo. Tugomba gutegereza ibiri imbere.'

    Mbappé yari yabuze igihe abo bahanganye bahura mu kwezi kwa Ukwakira ariko atsinda igitego cyiza mu minota itanu mu mukino wabereye kuri stade ya King Abdullah Sports City, aho yatoraga umupira imbere mu gice cya Madrid, yiruka kuri myugariro hanyuma agasanga urushundura, rurangaye.

     

    Source : https://kasukumedia.com/real-madrid-yongeye-gushongorwa-nikipe-ya-barcelona-iyereka-ko-bitari-ku-rwego-rumwe/

  • Perezida Kagame yagize Jean-Guy Afrika Umuyob… – #rwanda #RwOT

    Ni icyemezo cyatangajwe mu gitondo cyo kuri uyu wa Mbere tariki 13 Mutarama 2025. Iki cyemezo Perezida Paul Kagame yagifashe ashingiye ku biteganwa n’Itegeko Nshinga rya Repubulika y’u Rwanda, cyane cyane mu ngingo yaryo ya 112.

    Mu 2022, Jean-Guy Afrika yagizwe Umuyobozi w’agateganyo w’Ibiro bishinzwe guhuza ibikorwa by’Akarere muri Banki Nyafurika itsura amajyambere. Afite uburambe muri politiki rusange, guhuza ibikorwa by’Akarere, imari ishingiye ku bikorwa remezo, no gutegura imishinga.

    Afrika afite impamyabumenyi ya ‘Master’s’ mu bucuruzi mpuzamahanga na politiki yakuye muri kaminuza ya George Mason.

    Agizwe Umuyobozi Mukuru w'Urwego rw'Igihugu rw'Iterambere, RDB, asimbuye Francis Gatare, wagizwe Umujyanama wihariye muri Perezidansi ya Repubulika na Perezida Kagame ku wa 20 Ukuboza 2024.

    RDB ni urwego rwashyizweho n'Itegeko nº 46/2013 ryo ku wa 16/06/2013. Ifite inshingano zo kwihutisha iterambere ry'ubukungu mu Rwanda hashyigikirwa iterambere ry'urwego rw'abikorera.

    Ifite kandi inshingano zo kugira uruhare mu gutegura no gushyira mu bikorwa politiki n'ingamba bigamije kwihutisha ibikorwa byose by'iterambere ry'ubukungu no gufasha Leta n'urwego rw'abikorera kubigiramo uruhare rugaragara, gushyira mu bikorwa politiki n'ingamba bigamije guteza imbere ishoramari ry'abenegihugu n'iry'abanyamahanga mu Rwanda hagamijwe kwihutisha iterambere ry'ubukungu.

    Ifite kandi mu nshingano gushyira mu bikorwa politiki n'ingamba bigamije guteza imbere ibijyanye no kohereza ku masoko yo mu karere n'ayo ku rwego mpuzamahanga ibicuruzwa na serivisi byongerewe agaciro, uretse ibiri mu nshingano z'izindi nzego; guteza imbere urwego rw'ubukerarugendo, kugira uruhare mu kugena no gushyira mu bikorwa politiki n'ingamba birebana n'ubukerarugendo no kubungabunga pariki z'Igihugu n'ahandi hantu hakomye mu birebana n'ubukerarugendo. 


    Jean-Guy Afrika yagizwe Umuyobozi Mukuru wa RDB

    Source : https://inyarwanda.com/inkuru/150795/jean-guy-afrika-yagizwe-umuyobozi-mukuru-wa-rdb-150795.html

  • DR-Congo ntirimo! Ibihugu bya Afurika bifite… – #rwanda #RwOT

    Ubu bushakashatsi bugaragaza ko Liberia ari yo ifite abaturage benshi bashaka kwimuka, aho 76% by'abaturage bayo batangaje ko bifuza kuva mu gihugu, ikurikirwa na Sierra Leone ifite 75%. Ibindi bihugu bifite umubare munini w'abaturage bashaka kwimuka ni Ghana (65%), Congo-Brazaville (54%) na Nigeria (51%).

    Iri suzuma ritanga amakuru yihariye ku bijyanye n'imigendekere y'ubwiyongere bw’abashaka kuva muri Afurika, rishyira ahagaragara imbogamizi zituruka ku bukungu, umutekano muke ndetse no gushaka amahirwe menshi mu bihugu by'amahanga nk'imwe mu mpamvu zishobora kuba zitera ubwo bwiyongere.

    Dore urutonde rw'ibihugu 10 bya mbere muri Afurika bifite umubare munini w'abaturage bashaka kwimuka:

    1. Liberia – 76%

    2. Sierra Leone – 75%

    3. Ghana – 65%

    4. Congo Brazzaville – 54%

    5. Nigeria – 51%

    6. The Gambia – 50%

    7. Comoros – 48%

    8. Togo – 45%

    9. Eswatini – 45%

    10. Guinea – 44%

    Ibi byarateje impaka ku ngaruka mbi bishobora kugira ku bukungu bw'ibi bihugu.

    Source : https://inyarwanda.com/inkuru/150791/dr-congo-ntirimo-ibihugu-bya-afurika-bifite-umubare-munini-wabaturage-bashaka-kwimuka-150791.html

  • Passy Kizito yinjiye mu itangazamakuru – #rwanda #RwOT

    Ni ubwa mbere uyu musore kuva yatangira umuziki nk'umuhanzi wigenga agaragaje inyota yo kwinjira mu itangazamakuru. Kuko mu myaka itanu ishize yashyize imbere cyane gukora ibihangano byakunzwe mu bukorwa bukomeye, ariko ntiyari yarigeze atangaza ko mu nzozi afite harimo no gukora itangazamakuru.

    Mu myaka yo ha mbere hari abahanzi bagiye bagerageza gukora itangazamakuru, kandi bahiriwe n'uyu mwuga. Babanjirijwe n'abarimo Luwano Tosh [Uncle Austin] wa Kiss Fm, Bagabo Adolphe wamenye nka Kamichi usigaye abarizwa muri Leta Zunze Ubumwe za Amerika wakoreye Voice of Africa, Andy Bumuntu wakoreye Kiss Fm aho muri iki gihe akorera Unicef, Platini P wakoreye Isango Star, Karisye Martin [MC Tino] n'abandi.

    Passy Kiziyo yabwiye InyaRwanda, ko ari amakuru meza kuri we kuba yabashije gutsinda ikizamini cyo gukorera Magic FM. Uyu musore ari ku mwanya wa Kabiri, aho abanjirijwe n'umukobwa witwa Uwingabiye Anick wagize amajwi 80 ku ijana; Uwingabiye yari asanzwe ari umukozi wa Kiss Fm, aho yateguye akanatangaza ibitambuka ku mbuga nkoranyambaga za Kiss Fm, yanakoraga ibiganiro binyuranye kuri Radio. Anafite umuyoboro wa Youtube witwa 'Channel 250'. 

    Ku mwanya wa Gatatu mu bakoze ikizamini kuri Magic FM (Magic Fm Producer/Presenter), hariho Umunyamakuru Sebushishi Beaugarad wakoreye RBA mu bihe bitandukanye, ni mu gihe ku mwanya wa Kane, uwatsinze ikizamini ari Migambi Gilbert/Umuhungu wa Mukeshabatware Dismas wamamaye mu ikinamico no mu kwamamaza. Migambi yari asanzwe yumvikana kuri iyi Radio mu biganiro binyuranye birimo ibishamikiye ku muziki n'amakuru.

    Urutonde rw'abakoze ikizamini cyo gukorera Magic FM ruriho abantu 22 babashije gukora ikizamini; abatsinze ni bane, ni mu gihe abatsinzwe ari 18. Ni mu gihe abantu bane bari biyandikishije gukora ikizamini, batabashije kwitabira. Amanota y'abatsinze iki kizamini yagiye hanze ku wa 7 Mutarama 2025.

    Mu myaka ibiri ishize, nibwo Passy Kizito yashyize imbaraga cyane mu ikorwa ry’ibihangano bye, aho yasohoye indirimbo zirimo nka ‘Basi Sori’ yakoranye na Chriss Eazy imaze kurebwa n’abantu barenga Miliyoni 5, ‘Byina’, ‘Golo’, ‘What If’ yakoranye na DiezDola, ‘Sante’ n’izindi zinyuranye.


    Passy Kizito ari ku rutonde rw'abantu bane babashije gutsinda ikizamini cyo gukorera Magic FM 

    Passy Kizito yagize amanota 79% amuhesha amahirwe yo kuba umunyamakuru wa Magic Fm 

    Ni ubwa mbere Passy Kizito azaba yumvikanye ku ndangururamajwi nk'umunyamakuru 

    Anick Uwingabiye wari usanzwe akorera Kiss Fm, yahize abandi agira amanota ya mbere (80%) yamuhesheje akazi muri Magic Fm

    KANDA HANO UBASHE KUREBA INDIRIMBO 'WHAT IF' PASSY KIZITO YAKORANYE NA DIEZDOLA

    “>

    Source : https://inyarwanda.com/inkuru/150781/passy-kizito-yinjiye-mu-itangazamakuru-150781.html

  • Polisi y'u Rwanda yashimye uruhare rw'urubyiruko rw'abakorerabushake mu gukimira ibyaha – #rwanda #RwOT

    Ibi Umuvugizi wa Polisi y'u Rwanda, ACP Boniface Rutikanga, yabigarutseho mu kiganiro yagiranye n'umunyamakuru wa RBA.

    Muri iki kiganiro ACP Boniface Rutikanga yagaragaje ko ubu bufatanye bumaze gutanga umusaruro ugaragara.

    ACP Rutikanga yavuze ko iyi gahunda y'ubufatanye yatangijwe mu 2013 hagamijwe guhuza ibikorwa bya Polisi n'abaturage binyuze muri gahunda ya 'community policing'.

    Urubyiruko rw'abakorerabushake rwatoranyijwe kubera ko ari rwo rugize umubare munini w'Abanyarwanda kandi rukaba ari narwo rufite imbaraga kandi umusanzu warwo umaze kugaragara.

    Ati 'Badufasha mu gukumira no kurwanya ibyaha hirya no hino mu gihugu. Bifatanya n'irondo na Polisi, bakanadufasha mu bikorwa birimo gucunga umutekano mu birori no mu bindi bikorwa bihuriramo abantu benshi, nko kuri stade cyangwa muri gare.'

    Yongeyeho ko uru rubyiruko rutanga amakuru afasha Polisi gukumira ibyaha no gutanga ubutabazi bw'ibanze.

    Ati 'Hari amakuru baduha y'ahantu hashobora kuba hari nk'ikoreshwa ry'ibiyobyabwenge. Baba bazi byinshi kurusha Polisi kuko biba biri mu miryango bahorana nayo no mu matsinda y'urubyiruko baba bari hafi yarwo.'

    Yagaragaje ko polisi ifite gahunda yo gushyiraho amahugurwa kugira ngo uru rubyiruko rurusheho gusobanukirwa inshingano zarwo.

    Urugero ni nko kwigishwa uburyo bwo kurinda ibimenyetso ahabereye ibyaha cyangwa impanuka kugira ngo iperereza rikorwe neza.

    ACP Rutikanga yagize ati 'Turashaka kubigisha kumenya uburyo ahabereye impanuka harindwa kugira habungwabungwe ibimenyetso ndetse n'uburyo bwo gutanga ubutabazi bw'ibanze mu gihe habaye ikibazo, kugira ngo bamenye uko bafasha umuntu mbere y'uko inzego bireba zihagera.'

    Ubufatanye bwa Polisi n'urubyiruko rw'abakorerabushake bwagize uruhare rukomeye mu gukumira ibyaha no guteza imbere umutekano mu gihugu.

    Polisi ishimira uru rubyiruko kubera uruhare rwarwo rukomeye, kandi irushishikariza gukomeza kuba intangarugero mu gufasha abaturage no kubaka u Rwanda rufite umutekano usesuye.

    Polisi y'u Rwanda yashimye uruhare rw'urubyiruko rw'abakorerabushake mu gukimira ibyaha

    Source : http://igihe.com/amakuru/u-rwanda/article/polisi-y-u-rwanda-yashimye-uruhare-rw-urubyiruko-rw-abakorerabushake-mu

  • Abagura ubutaka ntibakorere amasezerano imbere ya noteri bashobora kuririra mu myotsi – #rwanda #RwOT

    Urukiko rw'Ikirenga ruherutse gutanga umurongo ko kugira ngo byemezwe ko umutungo utimukanwa watanzwe, hagomba kubaho icyemezo cy'iyandikisha ry'ubutaka gitangwa n'Umubitsi w'impapuro mpamo z'ubutaka, kandi kugira ngo atange cyo cyemezo, agomba gushingira gusa ku masezerano yo kwegurira undi uwo mutungo yakozwe mu buryo bw'inyandiko mpamo.

    Ibi byumvikanisha ko amasezerano yakorwa mu bundi buryo butari ubwo nta gaciro aba afite.

    Ibyo bitandukanye n'uko usanga kenshi Abanyarwanda bagura ubutaka badakunze gushyira imbere gukorana inyandiko imbere ya noteri, ibituma uwaguze ubutaka ashobora kugwa mu bihombo.

    Ibyo Urukiko rujya kubitegeka rwabishingiye ku kirego cyari cyatanzwe muri rwo cyo gusubirishamo urubanza ku mpamvu z'akarengane.

    Mu 2017, Nsanzimana André na Uwankubito Alphonse, wari uhagarariwe n'umugore we Mukangarambe Berthilde, bagiranye amasezerano y'ubugure, maze bemeranya ko Nsanzimana André aguriye Uwankubito inzu y'ubucuruzi iri muri gace ku bucuruzi ka Tyazo, mu Kagari ka Kibogora, Umurenge wa Kanjongo, Akarere ka Nyamasheke, ku giciro cya 23.000.000 Frw, ariko akazayishyura mu byiciro.

    Ibyo byatumye nta hererekanyamutungo ryumvikanyweho ribaho, ku wa 13 Werurwe 2021, Irankunda Esther yaje kurega mu Rukiko Rwisumbuye rwa Rusizi, asaba ko umutungo baguze ubandikwaho we na Nsanzimana kuko bari barashyingiranyweho bahisemo icungamutungo ry'ivangamutungo rusange.
    Urukiko rwaje kubyemeza ariko abaguriwe ubutaka bajuririra icyo cyemezo mu Rukiko Rukuru rwa Rusizi narwo rwemeza ko ikirego cyabo nta shingiro gifite.

    Uwankubito Alphonse na Mukangarambe Berthilde basubirishijemo urwo rubanza mu mpamvu z'akarengane bavuga ko amasezerano yabaye adakwiye guhabwa agaciro kuko atigeze akorerwa imbere ya Noteri kandi ko uvuga ko yaguze atabasha kugaragaza inzira cyangwa uburyo yakoresheje yishyura amafaranga yari yumvikanyweho, kuko ubugure buba bwuzuye igihe ugura yishyuye ikiguzi akabona guhabwa icyo yaguze, kandi ko ibyo bitabayeho.

    Mu kubisuzuma, Urukiko rw'Ikirenga rwasanze amasezerano yarakozwe mu buryo bw'inyandiko bwite nyamara arebana n'ubugure bw'umutungo utimukanwa ugizwe n'inzu, ko kuba atarakorewe imbere ya Noteri ngo yemeze ubwo bugure, atakozwe mu buryo bw'inyandiko mpamo.

    Rwagaragaje ko ayo masezerano nta gaciro afite; bityo ko inkiko zibanza zitagombaga kuyashingiraho ngo zitegeke ko ubutaka iyo nzu yubatsemo bwandikwa ku mazina ya Irankunda Esther na Nsanzimana André.

    Urukiko rw'Ikirenga kandi rwemeje ko amasezerano y'ubugure bw'inzu yabaye hagati ya Uwankubito Alphonse na Nsanzimana André adafite agaciro, rutegeka ko ubutaka buherereye mu Kagari ka Kibogora, Umurenge wa Kanjongo, Akarere ka Nyamasheke, n'inzu irimo bikomeza kwandikwa kuri Uwankubito Alphonse na Mukangarambe Berthilde.

    Ni imirongo kandi yakoreshejwe mu zindi manza zitandukanye mu rwego rwo gukemura ibibazo bisa mu buryo bumwe.

    Uretse ibirebana n'amasezerano ariko hari ibindi ugura ubutaka mu Rwanda aba akwiye kwitondera birimo kumenya niba uwo mugiye kugura ubutaka ari nyirabwo, nta wundi muntu babusangiye, nta tambama bufite, butaratanzwemo ingwate, icyo bwagenewe gukoreshwa n'ibindi bitandukanye.

    Urukiko rw’Ikirenga rwagaragaje ko abagiye kugura ubutaka mu Rwanda bakwiye gukora amasezerano imbere ya noteri

    Source : http://igihe.com/amakuru/u-rwanda/article/impamvu-amasezerano-y-ubugure-bw-ubutaka-atakorewe-imbere-ya-noteri-nta-gaciro

  • Abaraperi bo mu 'Icyumba cya Rap' biyemeje guhindura isura ya Hip Hop #rwanda #RwOT

    Abaraperi bagize uruhare mu gitaramo cyiswe 'Icyumba cya Rap,' cyabereye muri Camp Kigali ku wa 10 Mutarama 2025, bagaragaje ko guhagarika igitaramo bamwe bataririmbye bitaturutse ku makosa ya MA Africa yari yagiteguye, ahubwo byatewe no kutubahiriza gahunda kwa bamwe mu bahanzi.

    Nubwo byabaye uko, bemeje ko bagiye gukora ibishoboka byose kugira ngo iterambere rya Hip Hop rikomeze, banayiheshe isura nshya nziza.

    Diplomate, umwe mu baraperi baririmbye muri iki gitaramo, yiseguye ku bakunzi ba Hip Hop babonye ibitaragenze neza.

    Abinyujije ku mbuga nkoranyambaga, yashimiye abitabiriye igitaramo n'abahanzi bagenzi be. Yongeyeho ko ibibazo byagaragaye bigomba kuba amasomo yo kurushaho kwivugurura no guharanira ikinyabupfura, ubunyamwuga, no gukunda umurimo.

    Yagize ati: 'Imbogamizi zizahoraho ariko ntituzasubira inyuma. Twiyemeje guharanira iterambere rya Hip Hop no kuyambika isura nshya. Icyo gusaba imbabazi ni icyacu, kandi turimo gukora cyane kugira ngo twikuremo ibitaragenze neza.'

    Jay C, undi muhanzi wagaragaye mu gitaramo, nawe yemeye amakosa yabayeho asaba abakunzi babo gukomeza kubashyigikira. Yavuze ko gahunda yari isobanutse, aho buri muhanzi yagombaga kuririmba ku gihe runaka, ariko kutubahiriza ayo masaha byatumye bamwe batabona umwanya wo kwitabira urubyiniro uko byari byateganyijwe.

    Yagize ati: 'Buri muhanzi yari afite igihe cye cyo kuririmba, ariko kubera kudashyira mu bikorwa gahunda neza, hari abatararirimbye uko bikwiriye cyangwa batabonye umwanya wo kwiyerekana ku rubyiniro.'

    Aba bahanzi bagarutse ku kwiyemeza gukosora amakosa yabayeho no gukomeza guharanira iterambere rya Hip Hop. Banakomeje gusaba abafana kutabacika intege no kubafasha muri uru rugendo rwo kubaka umuco w'ubunyamwuga n'ikinyabupfura mu muziki wa Hip Hop.

    Bizeje ko igitaramo cy'Icyumba cya Rap kizakomeza kuba ikitegererezo cyo guteza imbere uyu muziki, hakurwaho ibyo byose byabangamira iterambere ryawo.

    Source : https://kasukumedia.com/abaraperi-bo-mu-icyumba-cya-rap-biyemeje-guhindura-isura-ya-hip-hop/

  • U Rwanda rwitegura kwakira inteko rusange ya 26 y'umuryango EAPCCO #rwanda #RwOT

    U Rwanda ruritegura kwakira inteko rusange ngarukamwaka ya 26 y'umuryango uhuza abayobozi bakuru ba Polisi mu Karere k'Afurika y'Iburasirazuba (EAPCCO), izaba kuva tariki ya 26 kugeza ku ya 31 Mutarama 2025.

    Iyi nteko rusange ni urubuga rukomeye rwo kuganiriraho ibibazo rusange by'umutekano mu Karere, gusangira amakuru, no kongera ubushobozi mu bihugu bigize EAPCCO.

    Izahuriza hamwe abayobozi bakuru ba polisi baturutse mu bihugu 14 bigize uyu muryango, bagamije gushimangira ubufatanye mu guhangana n'impinduka ziteza umutekano muke.

    Insanganyamatsiko y'iyi nama igira iti: 'Gushimangira ubufatanye mu gukumira no kurwanya iterabwoba, ibyaha byambukiranya imipaka n'ibindi byaha by'inzaduka.' Izibanda ku buryo bwo gufatanya guhangana n'ibyaha bikoresha ikoranabuhanga n'ibyambukiranya imipaka, byombi bikomeje kwiyongera no guhungabanya umutekano.

    Inteko rusange ya 26 yitezweho kuba igisubizo gikomeye ku ngamba z'ibihugu bigize EAPCCO mu gushimangira ubufatanye bw'ibanze mu gukumira no kurwanya ibyaha byugarije Akarere.

    Source : https://kasukumedia.com/u-rwanda-rwitegura-kwakira-inteko-rusange-ya-26-yumuryango-eapcco/

  • U Rwanda rugiye kwakira inteko rusange ya 26 ya EAPCCO – #rwanda #RwOT

    Inteko rusange ya EAPCCO ni urubuga rwifashishwa mu gusuzuma no gukemura ibibazo rusange byugarije umutekano w'akarere, gusangira amakuru no kubaka ubushobozi mu bihugu bigize uyu muryango.

    Izahuriza hamwe Abayobozi bakuru ba Polisi zo mu bihugu 14 bigize EAPCCO kugira ngo baganirire hamwe ibijyanye no gushimangira ubufatanye mu guhangana n'impinduka mu biteza umutekano muke.

    Ni inteko rusange izaba ifite insanganyamatsiko igira iti 'Gushimangira ubufatanye mu gukumira no kurwanya iterabwoba, ibyaha byambukiranya imipaka n'ibindi byaha by'inzaduka'.

    Inteko rusange ya 26 y'Umuryango EAPCCO yitezweho gusubiza icyifuzo cy'ibihugu biwugize cyo gufatanyiriza hamwe mu guhangana n'ibyaha byifashisha ikoranabuhanga n'ibyambukiranya imipaka bigenda byiyongera.

    Umuryango wa EAPCCO washinzwe mu 1998, mu nama ya mbere yahuje abayobozi bakuru ba Polisi muri Afurika y'Iburasirazuba yabereye i Kampala muri Uganda, hagamijwe guhuriza hamwe imbaraga z'inzego zishinzwe kugenzura uko amategeko yubahirizwa mu guhangana n'ibyaha ndengamipaka n'ibyifashisha ikoranabuhanga.

    Ibihugu bigize uyu muryango ni 14, ari byo; u Rwanda, Uganda, Kenya, Tanzania, u Burundi, Ibirwa bya Comores, Ethiopia, Eritrea, Djibouti, Sudani, Sudani y'Epfo, Repubulika Iharanira Demokarasi ya Congo, Seychelles na Somalia.

    Mu ntego z'Umuryango wa EAPCCO harimo gushyigikira, gushimangira no kwagura ubufatanye hashyirwaho ingamba zihuriweho zo gukurikirana ibikorwa bigize ibyaha ndengamipaka n'ibindi bifitanye isano nabyo mu Karere.

    Hari kandi gutegura no guhanahana amakuru y'ingenzi ajyanye n'ibyaha kugira ngo bifashe ibihugu bigize umuryango kubikumira, guharanira ko ibikorwa bihuriweho byo kurwanya ibyaha bishyirwa mu bikorwa, kubika neza amakuru ku byaha no gufatanya gukurikirana ibyaha byambukiranya imipaka hifashishijwe uburyo bwose buteganyijwe ku rwego rwa Polisi Mpuzamahanga (Interpol).

    Indi ntego ni gushyiraho ingamba n'umurongo w'amahugurwa agendanye n'igihe hagendewe ku cyerekezo n'umusaruro witezwe ku nzego za Polisi mu karere,

    Mu gihe iyi Nteko rusange ya 26 y'Umuryango wa EAPCCO izaba ibera mu Rwanda, ku nshuro ya mbere hazaba irushanwa rigamije kumurika ibikorwa ku myiteguro y'imitwe ya Polisi zo mu bihugu bigize umuryango ku guhangana n'ibihungabanya umutekano hifashishijwe intwaro na tekiniki 'EAPCCO SWAT Challenge'.

    Iri rushanwa rizaba kuva ku itariki ya 29 kugeza ku ya 30 Mutarama 2025, mu kigo cy'amahugurwa yo kurwanya iterabwoba (CTTC) giherereye i Mayange mu Karere ka Bugesera.

    Amakipe yatoranyijwe mu nzego z'umutekano mu bihugu bigize EAPCCO azarushanwa mu myitozo itandukanye igamije gusuzuma imbaraga z'umubiri, gukorera hamwe ndetse n'ubuhanga bujyanye n'amayeri yo guhangana n'ibihungabanya umutekano.

    Iri rushanwa rizatanga amahirwe yo kwerekana ubushobozi bw'akarere mu guhangana n'ibihungabanya umutekano no kurushaho gusangira ubumenyi hagati y'amakipe azaryitabira.

    Ibihembo bizahabwa amakipe azitwara neza hashingiwe ku kugaragaza ubwitange no kuba indashyikirwa mu guhangana n'ibihungabanya umutekano.

    Source : http://igihe.com/amakuru/u-rwanda/article/u-rwanda-rugiye-kwakira-inteko-rusange-ya-26-ya-eapcco

  • Kuki hari abumva ko nta kuntu u Rwanda rutaba rufite ingabo muri Kongo? #rwanda #RwOT

    Kuva intambara yatangira guca ibintu mu burasirazuba bwa Kongo, amajwi ashinja ingabo z'u Rwanda uruhare muri iyo ntambara yakomeje kwiyongera, ashingiye gusa ku kugenekereza, no ku birego bya Leta ya Kongo bitagira ibimenyetso, uretse gusa ko abarwana nayo bavuga ikinyarwanda.

    Imwe mu miryango mpuzamahanga, umuntu atatinya kwita 'nyamwongerabibi', ndetse n'abiyita 'impuguke' za Loni zakabaye zifasha ibihugu gukemura amakimbirane, nabo baguye mu mutego w'ikinyoma wa Leta ya Kongo, basohora ibyegeranyo bishinja uRwanda gufasha M23, ngo kuko nta mutwe w'inyeshyamba warusha ingabo za leta ubutwari, disipuline, ubuhanga n'ibikoresho, udashyigiwe byanze bikunze n'igisirikari gikomeye nka RDF, Ingabo z'uRwanda. Ibyo gusa biba bibaye ihame, ko impamvu M23 irusha ingabo za leta imbaraga ari uko iterwa inkunga n'uRwanda.

    Inshuro zose Perezida w'u Rwanda, Paul Kagame, yabajijwe niba koko u Rwanda rufite ingabo muri Kongo, yabajije ba nyir'icyo kibazo impamvu bumva nta kuntu ingabo z'u Rwanda zaba zitari muri Kongo. Kugeza ubu ntawe urasubiza icyo kibazo cya Perezida Kagame, ahubwo bose bahitamo kwigumira mu gihirahiro bishyizemo ubwabo.

    Habuze n'umwe usubiza Perezida Kagame ati, 'Ntawe uRwanda rugomba kubanza gusaba uruhushya mbere yo gufata ingamba zo kwirindira umutekano'.

    Habuze n'umwe ugira ati: 'Nubwo nta bimenyetso dufite, dusanga uRwanda ruramutse rwarohereje ingabo muri Kongo, nta kosa rwaba rufite, kuko rudakwiye kwipfumbata no kurebera, mu gihe leta ya Kongo itahwemye gufasha FDLR mu myiteguro yo gutera uRwanda ngo yongere yimike ubutegetsi b'abajenosideri'.

    Uwagenera Perezida Kagame icyo gisubizo, yakwibutsa amagambo ya Perezida Tshisekedi, wivugiye ko azashyigikira uwo ari we wese uzashaka guhirika ubutegetsi mu Rwanda, ko rero nta kuntu RDF yaba itarafashe ingamba zo kubuza Tshisekedi gushyira mu bikorwa umugambi we.

    Abananiwe gusubiza Perezida Kagame impamvu bakeka ko uRwanda rufite ingabo muri Kongo, kuki batamubwira ko basanga zaba zaragiye guca intege FDLR, ngo itongera kugaba ibitero nk'icyo yagabye mu Kinigi muw'2019, ndetse inzirakarengane zikahasiga ubuzima?

    Nibyo, ni amakosa kwemeza ko ingabo z'igihugu runaka zambutse umupaka zikajya ku butaka bw'ikindi gihugu, utabifitiye ibimenyetso simusiga. Muri Bibiliya ho banavuga ko 'gukeka ari ko kubeshya'. Gusa uramutse uvuze ko nta mpamvu ubona yatuma Rwanda rutega ijosi ngo Tshisekedi na FDLR ye bazaze bateme, hari benshi bashyigikira igitekerezo cyawe.

    Ubutaha Perezida Kagame nakubaza impamvu utekereza ko uRwanda rufite abasirikari muri Kongo, uzamusubize ko ubuzima bw'inkware itabukesha impuhwe z'agaca. Uti: 'Kuba rero n' Abanyarwanda bari mu mahoro n'umudendezo, si ku bw'mbabazi za Tshisekedi, FDLR, P5 , FLN n'abandi bagizi ba nabi, ahubwo ni umusaruro w'ingamba z'ubwirinzi uRwanda rwashyizeho'.

    The post Kuki hari abumva ko nta kuntu u Rwanda rutaba rufite ingabo muri Kongo? appeared first on RUSHYASHYA.

    Source : https://rushyashya.net/kuki-hari-abumva-ko-nta-kuntu-u-rwanda-rutaba-rufite-ingabo-muri-kongo/?utm_source=rss&utm_medium=rss&utm_campaign=kuki-hari-abumva-ko-nta-kuntu-u-rwanda-rutaba-rufite-ingabo-muri-kongo