Category: Uncategorized

Ni amakuru yatangajwe n'Ibiro by'Umukuru w'Igihugu, mu itangazo byanyujije kuri X ryavugaga ko impande zombi zaganiriye ku mubano w'ibihugu byombi.

Shimelis Abdisa wakiriwe na Perezida Kagame ayoboye iki gice cya Oromia kuva muri Mata 2019, ndetse ni umwe mu bajyanama bakuru ba Minisitiri w'Intebe wa Ethiopia, Abiy Ahmed, kuva mu 2018.

Oromia abereye umuyobozi ni igice kinini cya Ethiopia kiri ku buso bwa kilometero kare zirenga ibihumbi 350, kikagira abaturage bakabakaba miliyoni 40, bangana na kimwe cya gatatu cy'Abanya-Ethiopia bose.

Ni igice giherereye muri Ethiopia hagati ariko kigafata no ku Burengerazuba bwacyo, kigahana imbibi n'ibindi bice by'iki gihugu cyo mu Ihembe rya Afurika uretse icya Tigray.

Kizwiho kugira ubutaka bwera, umutungo kamere, kikaba gihingwamo ibyinganjemo ikawa, ariko kigakungahara no ku mabuye y'agaciro nka zahabu, gemstones n'andi.

Cyakunze guhura n'ibibazo bya politiki, iby'ibiza n'ibindi. Ishyaka rya The Oromo Liberation Front (OLF) rifite n'Umutwe w'ingabo uzwi nka Oromo Liberation Army (OLA) ni rimwe mu mashyaka akomeye muri iki gice ndetse akenshi wakunze kugirana ibibazo na leta.

OLA yigeze kwifatanya n'inyeshyamba zo mu Majyaruguru mu gace ka Tigray zari zimaze hafi umwaka zirwana n'ingabo za Leta, icyo gihe hari mu 2021.

U Rwanda na Ethiopia bifitanye umubano mwiza ushingiye ku bwubahane bwa dipolomasi n'amasezerano y'imikoranire igamije guteza imbere abaturage babyo.

Ibihugu byombi byashyize umukono ku masezerano atandukanye arimo ashingiye ku bufatanye mu by'amategeko, itangazamakuru, siporo, ubukerarugendo, ubuzima, uburezi n'umuco n'ayandi.

Bifitanye umubano ushingiye ku bufatanye mu nzego zirimo ubuhinzi, ubucuruzi, uburezi kandi bifitanye n'amasezerano y'ubufatanye kuri serivisi z'ingendo zo mu kirere zikorwa na RwandAir na Ethiopian Airlines.

Mu 2024, u Rwanda na Ethiopia byasinyanye amasezerano y'ubufatanye mu nzego eshanu zirimo ubufatanye mu bya politiki n'ubujyanama, ubucuruzi, siporo, kugabanya ibiza no kubicunga, hamwe n'ubufatanye mu ishoramari.

Umubano w'ibihugu byombi ushingira no kugenderanira, aho muri Mata 2024 Minisitiri w'Intebe wa Ethiopia, Dr Abiy Ahmed yari umwe mu bari baje gufata mu mugongo u Rwanda ubwo rwibukaga ku nshuro ya 30 Jenoside yakorewe Abatutsi mu 1994.

Ubwo yari yitabiriye inama ihuza ibihugu bya Afurika na Arabie Saoudite mu 2023, Perezida Kagame yagiranye ibiganiro na Dr Ahmed, na none byari bigamije kwagura umubano w'ibihugu byombi, ndetse no mu 2021 na bwo Umukuru w'igihugu yari yamwakiriye mu ruzinduko rw'iminsi ibiri Dr Ahmed yari mu Rwanda.

Perezida Kagame yaganiriye na Abdisa uyobora Oromia muri Ethiopia

Shimelis Abdisa wakiriwe na Perezida Kagame ayoboye iki gice cya Oromia kuva muri Mata 2019

Akenshi abagorwa no kubona amacumbi muri aka karere ni ababa barasenyewe n'ibiza, bakayoboka inzira yo gusembera cyangwa bagatangira kuba mu nzu zisakaye igice.

Abandi ni abimuka mu manegeka, ugasanga aho bimukiye ntibabashije guhita bagera ku byangombwa byose nk'ubwiherero bushyitse.

Uwimana Jeannette wo mu Mudugudu wa Taba, Akagari ka Rwamiko, Umurenge wa Mata, ni umwe muri 40 bahawe amabati 30 buri umwe n'umufatanyabikorwa Compassion International ishami rya Mata, wavuze ko kuva mu 2023 ibiza bimusenyeye ubuzima bukamugora cyane, imvura yajya igwa ikamunyagira n'umuryango we, mu byumba hakajya hahoramo ibyondo.

Ati “Twaterwaga agahinda n'ubuzima tubayemo, ukumva ntiwifuza uwakugenderera kubera igihunga cyo kwibaza aho wamwicaza cyangwa aho wamuraza kuko hari harasigaye agace gato k'inzu. Nk'ubu mfite umukobwa w'inkumi ariko yahoraga yiganyiriza kubona umushyitsi, kandi abana b'urubyiruko baba bakeneye kugenderana, ukanibaza uti ese bwije akiri hano namwugamisha hehe, ugasanga ni ikibazo.”

Uwimana, akomeza avuga ko ubu bagiye kongera isuku mu rugo ndetse banerekeze amaboko mu bikorwa by'iterambere kuko bakize imihangayiko yo kuba habi.

Nsengimana Vincent, wo mu Mudugudu wa Rwamiko, Akagari ka Rwamiko, muri Mata, na we avuga ko ubuyobozi bwabimuye mu manegeka bakajya gutura mu mudugudu.

Mu bushobozi bwe yagerageje kubaka inzu abanamo n'umuryango we, ariko ntiyahita ashobora kubaka ubwiherero buzima, ari na yo mpamvu yahawe ibikoresho byo kubwubaka birimo amabati, 'fer a beton' na sima byo gutinda ubwiherero ndetse n'urugi rwo kubukinga, agahamya ko bigiye kongera isuku mu rugo rwe.

Pasiteri Munyanziza Emmanuel, umushumba w'Itorero Inkuru Nziza rya Mata, yabwiye IGIHE ko bafatanyije na Compassion, bihaye intego yo kunganira Akarere mu muhigo wo kubakira abatishoboye ari na yo mpamvu batanze isakaro kuri aba baturage, kugira ngo umuturage akomeze abe ku isonga nk'uko ubuyobozi bukuru bw'igihugu bubyifuza.

Umuyobozi w'Akarere ka Nyaruguru wungirije ushinzwe imibereho myiza y'abaturage, Byukusenge Assumpta, yavuze ko akarere gafite umuhigo w'inzu 260 ndetse n'ubwiherero bwujuje ibisabwa 787, aho bamaze kubaka uburenze 500, byose bafatanije n'abafatanyabikorwa.

Ati “Dushima ubufatanye bw'abafatanyabikorwa bibumbiye muri JADF kuko badufasha gushyira mu bikorwa imihigo nk'iyi tuba dufite, yaba amadini n'amatorero nk'iri. Baba bafite abaturage basengera iwabo, ariko bakanafite ibibazo. Kubunganira bakabisobokamo, biba ari iby'agaciro.''

Kuri iyi nshuro, imiryango 40 niyo yahawe ibyo kubaka ubwiherero, indi miryango 24 ihabwa amabati 810 n'ibindi byangombwa bifasha gusakara, byose bikaba byaratwaye hafi miliyoni 9 n'ibihumbi 800Frw.

Uwimana Jeannette, ubwo yiteguraga guhabwa amabati 30 n’ibilo 3 by’imisumari byo kujya gusakara inzu ye yari yarasenywe n’ibiza

Visi Meya ushinzwe imibereho myiza muri Nyaruguru, yavuze ko n’ubwo ibibazo by’abadafite amazu bihora bivuka buri gihe, muri uyu mwaka bafite gahunda yo kubaka amazu 260

Ubaze umunsi ku wundi, ni iminsi 12 irashize izina Yampano ritumbagiye rikigarurira imitima y'abantu benshi ahanini bitewe n'uburyo yitwaye mu gitaramo 'New Year Groove and Album Launch' cy'umuhanzi The Ben.

Mbere y'uko ataramira muri iki gitaramo, umuhanzi Yampano yavuze ko The Ben abaye amutumiye yakora ibintu bidasanzwe muri BK Arena ndetse ku bw’amahirwe ye bigenda neza nk'uko yari yabyitangarije bituma abantu bamubona nk'utica umugambi.

Nyuma y'uko akoze ibyo bitangaza muri BK Arena, abantu bakomeje kumukurikirana bya hafi ari nako bagenzura ibikorwa bye nk'umuhanzi wari uri kuvugwa cyane.

Muri iki gihe nubwo ari gito, kenshi byagaragaye ko waba ari umutwaro Yampano yikoreye nyamara nta bitugu bigari byo gutwaraho uyu mutwaro benshi bifuza ariko batazi uko uvuna.

Ku ikubitiro, umuhanzi Yampano yahise avuga ko atazi Bruce Melodie bituma abantu batangira kumwataka bavuga ko yaba ari ukwihenura kuko uwo Bruce Melodie avuga ko atazi, yanditse kera amusaba ko basubiranamo imwe mu ndirimbo ze.

Baca umugani ngo 'Umanika agati wicaye wajya kukamanura ugahaguruka'. Nyuma yo kubona ko yakoze amakosa, Yampano yaje kwivuguruza avuga ko abantu bamwumvishe nabi nyamara we yarashakaga kuvuga ko atazi Bruce Melodie.

Aha byari nyuma y'uko abafana ba Bruce Melodie bamwihakanye ndetse yewe n'aba The Ben batangiye kugira amacyenga bibaza niba adashobora kuzihakana The Ben mu gihe hari indi ntambwe yaba ateye.

Nyuma yo kuririmbira muri BK Arena, Yampano yagize ibitekerezo byinshi bigamije kubyaza umusaruro ubwo bwamamare bwe harimo gushyira hanze indirimbo akananirwa kuyimenyekanisha muri icyo gihe ahubwo aho ageze akora ibiganiro yakamenyekanishirijemo indirimbo ye agatwarwa uko abamutumiye bashaka.

Akiva ku rubyiniro, Yampano yahise yisanga yashyize hanze indirimbo yise 'Meterese' yakoranye n'umuraperi Bushali. Iyi ndirimbo yagiye hanze mu buryo bw'amajwi gusa nta mashusho ifite.

Mu gihe iyi ndirimbo itari yamara akanya ngo abantu bumvirize uburyohe bwayo, Yampano yahise yongera agarura indirimbo ye 'Icyomanzi' yakoze mu mwaka ushize ariko ntiyarebwa nk'abantu benshi cyane.

Ni indirimbo yongeye kugarura kuri YouTube byibuze atayikoreye amashusho ku buryo benshi mu bafana be bakururwa no kujya kureba amashusho yayo cyane ko benshi mu bahanzi bagiye bakoresha ubu buryo kandi bigatanga umusaruro.

Si ibyo gusa, Yampano amaze kuririmba mu tubari turenga 3 mu gihe cy'iminsi 12 gusa. Nk'uko bisanzwe, nta muntu wishyurira kwinjira mu kabari ahubwo aragura akongezwa bitewe n'ibyateguwe. 

Mu gihe wasubira muri BK Arena, wakwica (Wakwemeza nk’uko Yampano yabitangaje mbere yo kwemererwa kujya ku rubyiniro muri BK Arena) bande kandi mubana mu tubari? 

Bimwe mu byo abakunzi b’umuziki bibaza.

Igikundiro Yampano yakuye muri BK Arena, yagiye agitambagiza mu tubari dutandukanye muri Kigali aho nyuma byazagorana ko ikindi gihe agiye gukora igitaramo yabona abantu kuko n’ubundi basanzwe bagura byeri bakongezwa umuziki we cyangwa se basangira byeri mu kabari kamwe.

Nta muntu uteganya igihe inyenyeri ye izakira ariko habaho guteganya uko wayibungabunga mu gihe yaba yatse. Kutagira abamugira inama z'uburyo bwo kubungabunga inyenyeri ye yatse, biri mu biri gukoma mu nkokora Yampano.

Haba ibiganiro byo gutwika, ibikorwa by'umuziki arimo akora n'ibirori bya hato na hato, ni bimwe mu biri gutuma ikuzo Yampano yari afite riyoyoka gake gake nubwo benshi mu bantu bakimurangamiye ariko siko bose baba babaye abakunzi.

Ihene iracyahebeba Yampano yayifatirana?

 Yego! Mu minsi 12 ishize gusa ntabwo ari myinshi ku buryo ibyangiritse bitakosorwa. Kwiyumva nk'umuhanzi uhanzwe amaso ndetse ukamenya no kwitwara nk'abo bahanzi, ni bimwe mu byatuma Yampano akomereza ku muvuduko ariho magingo aya.

Mu gihe yabona amahirwe yo kubona abajyanama mu muziki ndetse hakaba hagira umushoramo amafaranga akamushyira ku rwego (Standard) rwo hejuru, ni umwe mu bahanzi bagaruza vuba ayashowe mu gihe abona ibyo yifuza ngo akore ibintu byiza.

Kwirinda huti huti no gushaka kwemeza abantu ni bimwe mu bishobora gukora ku muhanzi Yampano kuruta uko yakora bike byiza abantu bakeneye.

Mu gihe atahindura umujyo wa huti huti, Yampano  ashobora kwisanga yasoromye ibimusumba.

Yampano aherutse kwandikira amateka muri BK Arena

Yampano akomeje kugaragaza guhuzagurika cyane mu gihe gito amaze ahanzwe amaso n’abantu bose

Reba uko Yampano yitwaye mu gitaramo ‘New Year Groove and Album Launch’ muri BK Arena

“>

Reba indirimbo 2 zikozwe mu buryo bw’amajwi Yampano yahise ashyira hanze huti huti

“>

“>

Reba indirimbo “Icyomanzi” ya Yampano imaze umwaka hanze
“>

Iki gikorwa cyabaye ku wa 10 Mutarama 2025 cyaranzwe no gushimira ariko hanaragazwa zimwe mu mbogamizi urwego rw'itangazamakuru rugihura na zo, cyane cyane itangazamakuru rya Afurika.

ANA yatangijwe mu 2015 igamije gufasha ibitangazamakuru byo muri Afurika n'ibindi mpuzamahanga kubona amakuru yizewe kandi y'umwihariko ku bukungu n'iterambere rya Afurika.

Ifite amashami mu mijyi 10 yo muri Afurika harimo n'u Rwanda igakorera no mu Burayi.

Umuyobozi Mukuru wa ANA, Dounia Ben Mohamed, yavuze ko intego nyamukuru y'iki kigo ari ukugaragaza isura nziza ya Afurika, no kwibanda ku iterambere rishingiye ku rubyiruko n'abashoramari b'Abanyafurika, yemeza ko babigezeho, nubwo urugendo rukomeje.

Yashimiye abafatanyabikorwa bakoranye mu myaka 10 ishize avuga ko ari bo babafashije kugera bageze ubu. Ati 'Mwadufashije kugera ku ntego zacu no guteza imbere itangazamakuru ryo muri Afurika.”

Uyu muhango wahurije hamwe abafatanyabikorwa ba ANA bo mu nzego zitandukanye nko mu itangazamakuru, inzego za leta, n'iz'abikorera, baganira ku mahirwe n'inzitizi zikigaragara mu itangazamakuru rya Afurika.

Umuyobozi ushinzwe itumanaho akaba n'Umuvugizi w'Umuryango w'Ibihugu bikoresha Igifaransa, Oria Kije Vande Weghe, yagarutse ku bibazo bikiri mu itangazamakuru ryo muri Africa.

Mu bibazo yagarutseho birimo nk'ubunyamwuga buke kuri bamwe bakora itangazamakuru, kudakoresha no kutihugura mu bijyanye n'ikoranabuhanga cyane cyane iry'ubwenge bw'ubukorano (AI), inzego z'abikorera zidashora imari mu bitangazamakuru n'ibindi.

Yagize ati 'Ni ingirakamaro cyane kugira igitangazamakuru gikora kinyamwuga, itangazamakuru rigira uruhare runini muri sosiyete yacu ariko turacyahura n'imbogamizi. Ibintu byo gukura inkuru ahandi ukayandukura bigomba guhagarara mu itangazamakuru, abanyamakuru bakajya gushaka inkuru aho zabereye bagatanga amakuru nyayo yizewe'.

Yakomeje avuga ko ikoranabuhanga ryiyongereye ku Isi kandi ryageze no mu itangazamakuru ariko hakwiye kumenywa uko rikoreshwa hirindwa ibibazo ryateza mu gihe ryaba rikoreshejwe nabi.

ANA kandi yamuritse gahunda nshya yiswe ANA school, igamije kongerera ubumenyi abana n'urubyiruko mu bijyanye n'itangazamakuru n'ikoranabuhanga, kumenya amakuru ajyanye n'abana n'urubyiruko, no guhuza urubyiruko n'abana bo hirya no hino cyane ku Isi by'umwihariko muri Afurika.

Umuyobozi Mukuru wa ANA, Dounia Ben Mohamed, yashimiye abafatanyabikorwa bakoranye n’icyo kigo mu myaka 10 ishize

Umuyobozi ushinzwe itangazamakuru n'Ubuvugizi bw'Umunyamabanga mukuru wa OIF, Louise Mushikiwabo, Oria Kije Vande Weghe yagaragaje ibibazo bikigaragara mu itangazamakuru nk’ubunyamwuga buke, amikoro make n’ibindi

U Rwanda rwashyize imbere gahunda yo kwishakamo ibisubizo, mu nzira yo kwihaza mu biribwa no guhangana n'ibibazo by'amapfa bishobora kwibasira abaturage hashyirwaho ibigega bihunikwamo ibinyampeke bishobora kwitabazwa aho rukomeye.

Umwaka w'ingengo y'imari wa 2022/2023 wasojwe u Rwanda rufite mu bigega toni 5.837,7 z'ibigori, toni 5.330,03 z'ibishyimbo, toni 122,96 z'umuceri n'ifu y'ibigori ingana na toni 125,2.

Raporo y'Ibikorwa bya Minagri ya 2023/2024 igaragaza ko ku bufatanye n'ibigo birimo EAX, FAITH, TSC na KY haguzwe toni 29.510,08 z'ibigori na toni 7.281 z'ibishyimbo kandi zihita zihunikwa mu bigega.

Igaragaza ko kugeza muri Kamena 2024 ibigega by'igihugu byarimo toni z'ibigori 32.736 mu gihe ibishyimbo byari toni 10.405,2.

Minagri igaragaza ko binyuze muri gahunda yo guhunika ibinyampeke, Leta y'u Rwanda yagobotse ibihugu bya Zambia na Zimbabwe byahawe toni 1000 z'ibigori kuri buri gihugu kubera amapfa yabizahaje.

Hari kandi ibigori, umuceri n'ibishyimbo byatanzwe mu kugoboka imiryango yagizweho ingaruka n'ibiza mu turere twa Ruhango, Rusizi, na Karongi. Hari na toni 1.909,3 z'ibishyimbo zahawe Urwego rw'Igihugu rushinzwe igorora (RCS), Gereza ya Nyarugenge ihabwa toni 289, iya Rwamagana ihabwa toni 340, iya Huye yahawe toni 242 n'ahandi.

Ikigo cy'Igihugu gishinzwe Igororamuco cyo cyahawe toni 609,74 z'ibigori, toni 281,9 z'ibishyimbo, na toni 30 z'ifu y'ibigori na ho toni 95,2 z'ifu y'ibigori yasaranganyijwe mu turere dutandukanye mu gihugu.

Minisiteri y'Ubuhinzi n'ubworozi igaragaza ko Abanyarwanda bihagije mu biribwa kugeza ubu ari 79,4%.

Imibare igaragaza ko inganda zitunganya umusaruro ukomoka ku bigori zagemuriwe toni 76.737, uruganda rutunganya ifu y'imyumbati rugemurirwa toni 12.109 mu gihe amata yagemuriwe amakusanyirizo y'amata hirya no hino mu gihugu ari litiro 83,9.

Urwego rw'ubuhinzi kandi rwagize uruhare rwa 27% mu musaruro mbumbe w'igihugu mu 2023.

Ibiribwa bitandukanye u Rwanda ruhunitse byariyongereye

Uko umukino uri kugenda umunota ku munota;

43′ APR FC yongeye kurata uburyo ku mupira Niyomugabo Claude ahaye Niyibizi Ramadhan arekura ishoti rinyuze hejuru y’izamu kure

42′ Dusabimana Jean Claude yeretswe ikarita y’umuhondo ku ikosa yari ikoreye Nshimiyimana Yunusu

41′ Dushimimana Olivier muzungu akorewe ikosa mu rubuga rw’ikipe ye 

38′ Rachid Mapoli w’Amagaju FC ahawe booo n’abafana ba APR FC nyuma yuko yari azamutse acenga neza ariko yagera imbere y’izamu akarekura ishoti rinyuze kure 

36′ Amagaju Fc nyuma yo gusatirwa cyane nayo yarabonye uburyo imbere y’izamu ku mupira Ciza Husen Seraphin yarabonye imbere y’izamu ariko Nshimiyimana Yunusu aratabara

35′ Nyamukangagira yongeye kurata ikindi gitego cyabazwe! Ruboneka Jean Bosco ahaye umupira Tuyisenge Arsene nawe awushyira kwa Niyibizi  Ramadhan arekura ishoti rikubita igiti cy’izamu maze Dushimimana Olivier agiye gusobyamo biranga

32′ APR FC irase igitego cyabazwe ku mupira mwiza Dauda Yussif yarahaye Ruboneka Jean Bosco acenga ba myugariro b’Amagaju FC nawe awushyira kwa Tuyisenge Arsene wari usigaranye  n’umunyezamu arekura ishoti gusa Twagirumukiza Clement aratabara

30′ Mugisha Gilbert aryamye hasi ari kwitabwaho n’abaganga nyuma yuko atewe umupira mu nda

27′ Biragaraga ko abakinnyi ba APR FC batari batangira guhuza 100% muri uyu mukino,Aliou Souane yarazamuye umupira muremure ashaka Dushimimana Olivier Muzungu ariko birangira umurenganye

25′ APR FC ikomeje gushaka igitego hakiri kare, Ruboneka Jean Bosco azamuye umupira muremure abarimo Nshimiyimana Yunusu bagerageza gushyiraho umutwe ariko uba muremure urabarengana

23′ Tuyisenge Arsene abonye umupira ari mu rubuga rw’amahina arihindukiza arekura ishoti gusa umupira ukubita mu bituza bya Tuyishime Emmanuel umupira ujya muri koroneri itagize icyo itanga

21′ Pavelh Ndzira afashe umupira wa mbere kuva umukino watangira ku ishoti ryari rirekuwe na Ndayishimiye Edouard

19′ Nyuma yuko abonye ibyo guhererakanya bitari gukunda uwitwa Aliou Souane afashe umwanzuro arekura ishoti rirerire ari inyuma gusa umupira uragenda unyura hejuru y’izamu kure

16′ Aliou Souane ahaye umupira muremure Dushimina Olivier Muzungu washoboraga nawe kuwuhindura mu rubuga rw’amahina bikaba byagira icyo bibyara ariko ntiyabikora asubiza inyuma

12′ Amagaju Fc abonye kufura impande y’umurongo ugabanyamo ikibuga kabiri ku ikosa Niyibizi ramadhan yarakoreye Malanda Destin gusa itewe na Matumona ba myugariro ba APR FC bakura umupira imbere y’izamu nta nkomyi

10′ Umukinnyi w’Amagaju FC,Nkurunziza Seth  aryamye hasi aho ari kwitabwaho n’abaganga nyuma yuko agonganye nuwa APR FC

8′ Amakipe yombi nta nimwe irabona uburyo buremereye imbere y’izamu ry’indi, APR FC niyo iri kugerageza guhererekanya ariko ikabikorera mu rubuga rwayo

5′ Kiza Seraphin yarabonye umupira wa mbere imbere y’izamu rya APR FC ariko Niyibizi Ramadhan aratabaar ahita awumwaka ataragira icyo awumaza

3’  Ikipe ya APR FC niyo iri guhererekanya umupira igerageza igerageza gushaka aho yamenera

2′ APR FC ibonye uburyo bwa mbere ku mupira Mugisha Gilbert yarasunikiye mu rubuga rw’amahina  Tuyisenge Arsene nawe aragenda arekura ishoti gusa Twagirumukiza Clement umupira awukuramo

1′ Umukino utangijwe n’Amagaju FC ariko Dushimimana Olivier ahise awaka Kiza Useni seraphin

15:00′ Umukino uratangiye

14:54’Abasifuzi bagiye kuyobora uyu mukino ni Twagiramukiza Abdoul uri hagati,Karangwa Justin(umusifuzi wa mbere w’igitambaro), Nsengiyumva Jean Paul(umusifuzi wa kabiri w’igitambaro) mu gihe umusifuzi wa kane ari Kayitare David.

14:51′ Amagaju FC agiye gukina uyu mukino ubusatirizi bwayo buyobowe na Kiza Husen Seraphin umaze gutsinda ibitego 8 muri shampiyon mu gihe umukinnyi wa APR FC ufite byinshi ari Mamadou Lamine Bah n’ibitego 3

14:39′ Uyu mukino ugiye kuba nyuma yuko muri iyi Sitade n’ubundi ku munsi wejo hari hakiniwemo umukino Mukura Vs yatsinzemo Rayon Sports ibitego 2-1

14:38’Amakipe yombi arimo arishyushya mbere yuko acakiranira mu kibuga

Abakinnyi 11 ba APR FC babanje mu kibuga;Pavelh Ndzila, Niyomugabo Claude, Aliou Soaune, Nshimiyimana Yunussu, Niyigena Clement, Dauda Yussif, Ruboneka Jean Bosco, Niyibizi Ramadhan, Mugisha Gilbert Dushimimana Olivier na Tuyisenge Arsene.

Abakinnyi 11 b’Amagaju FC babanje mu kibuga;Twagirumukiza Clement ,Nkurunziza Seth,Shema Jean Baptiste,Dusabe Jean Claude,Matumona Wakonda,Tuyishime Emmanuel,Semageni Cyrille,Rachid Mapoli ,Malanda Destin,Ndayishimiye Eduard na Kiza Husen Seraphin.

Mu mukino ikipe Amagaju FC iheruka gukina muri shampiyona yatsinzwe na Rutsiro FC ibitego 2-1 naho APR FC yo yatsinze Marine FC ibitego 2-1.

Uko amakipe yombi ahagaze kugeza ubu, ikipe y’Amagaju FC iri ku mwanya wa 9 n’amanota 18, mu gihe APR FC yo iri ku mwanya wa 2 n’amanota 31.

Uyu ni uwa Gatatu ikipe y’Amagaju FC igiye gukina na APR FC kuva yakongera gukina icyiciro cya mbere mu mwaka ushize w’imikino nyuma y’uko yari yaramanutse mu Cyiciro cya Kabiri mu 2019.

Imibare yerekana ko mu mikino 11 ya shampiyona iheruka imaze guhuza aya makipe yombi,APR FC yatsinzemo 8 , Amagaju FC nta n’umwe yatsinzemo mu gihe banganyijemo 3.

Uyu mukino uhuriranye n’uko Amagaju FC arimo arizihiza isabukuru y’imyaka 90 ibayeho. Iyi kipe iri mu makipe akuze mu Rwanda yashinzwe mu 1935.

Abakinnyi ba APR FC bishyushya

Ubwo abakinnyi ba APR FC bageraga kuri sitade 

Abamaze kugera muri Sitade mpuzamahanga ya Huye biganjemo abafana ba APR FC 

Ku wa Gatanu tariki 10 Mutarama 2025, benshi mu bakurikirana imyidagaduro yo mu Rwanda bakiranye ubwuzu inkuru y’uko Mutesi Jolly ari mu rukundo n’umuherwe wo muri Tanzania.

Ntibyateye kabiri, Miss Mutesi Jolly yahise atera utwatsi urukundo rwe na Lugumi Saidi ucuruza intwaro? avuga ko Instagram yiwe yibwe bityo uwayibye akaba ariwe wanditse ko ari mu rukundo.

Ni ubutumwa bwanyujijwe ku rubuga rwa Instagram aho Lugumi yanditse ngo “Warakoze kunkunda.” Hanyuma Mutesi Jolly asubiza agaragaza ko ibintu bimeze neza.

Nyuma yagiye ku rubuga rwa X avuga ko ibiri kuri Instagram atari ukuri kuko bamwibye konti ye.

Nyamara nubwo yabivuze atyo, mu byumweru bitanu bishize, uyu mugabo yatanze igitekerezo ku mashusho ya Miss Mutesi Jolly agaragaza agatima hanyuma Jolly nawe amusubirisha akandi gatima.

Kuri iki Cyumweru tariki 12 Mutarama nabwo, Mutesi yongeye kuvuga ku by’urukundo avugwamo n’uyu muherwe, ashimira abakomeje kumuba hafi muri iki gihe benshi bakomeje kumuvugaho ibyo yita ‘ibihuha, ari nako yihaniza abari kwemeza uru rukundo.

Ati: “Urukundo ni ikintu cyiza cyane, kandi igihe cyose ruzaza mu buzima bwanjye nzarwakira nta gushidikanya kandi mu buryo bwanjye.”

Yakomeje abwira abakomeje kumuvugaho inkuru yita ibihuha, bakomeje kumwibasira bavuga ko akundana n’umuherwe, avuga ko yiteguye guhangana na bo, aboneraho no kugaragaza ko atewe ishema n’abakomeje kujya impaka z’uko akundana n’umuntu utunze agatubutse.

Ati: “Gukundana cyangwa kudakundana n’umuherwe, iyi niyo mpaka yonyine nifuza ko abantu bagira ku mugabo wanjye mu by’ukuri.”

Said Lugumi ni umucuruzi uzwi cyane ukomoka muri Tanzania. Ni nyiri Sosiyete yitwa Lugumi Enterprises, ikora ibikorwa byihariye mu by'ikoranabuhanga ryifashishwa mu iperereza (forensic ICT services) ndetse no mu gutanga ibisubizo by'imikorere mu bijyanye no gucapa (corporate printing solutions).

Umutungo nyakuri wa Said Lugumi ntaho utangazwa ku buryo wawumenya, ariko nk'umuyobozi wa sosiyete ikomeye kandi y'icyitegererezo, bikekwa ko afite umutungo ukomeye.

Mutesi Jolly yagaragaje ko atewe ishema n’urukundo akomeje kuvugwamo n’umuherwe umurusha imyaka 24 

Lugumi Saidi wateye iya mbere mu guhamya urwo akunda Miss Mutesi Jolly 

Abo banyamuryango barenga 300 bageze mu zabukuru bose bahabwa inkunga y'ingoboka.

Babwiye RBA ko batanze umusanzu kuva mu 2015, koperative yabo itangira maze mu 2016 baguramo inzu y'ubucuruzi ya miliyoni 30 Frw ngo ijye ibafasha kubona icyo bikenuza.

Bashinja ubuyobozi bw'iyo koperative kubarira amafaranga ku buryo ntacyo iyo nzu ibamariye kuko nta nyungu na nkeya bigeze bayibonamo.

Mukarusanga Thérèse yagize ati 'Iyo nzu ntituzi amafaranga yinjiza n'asohoka.'

Mugenzi we, Mutangana Joseph ati 'Iyo nzu twayubatse tugira ngo igire icyo itumarira ku nkunga twahabwaga na Perezida ngo twikenure.Twamaze kuyubaka tugira ngo hari icyo izatumarira ariko nta n'ifaranga na rimwe ndayiryaho. Dukeneye ubuvugizi ngo turebe ko twasaza neza.'

Abo banyamuryango kandi bavuga ko ubu bifuza ko iyo nzu igurishwa bakagabana ayivuyemo n'inyungu zagiye zivamo kuko bashaje ndetse abandi bakaba bagenda bitaba Imana.

Uwurukundo Thérèsie ati 'Baduhamagazaga mu nama za buri gihe ntizigire icyo zitumarira uretse kwica imirimo. Ndifuza ko iyi nzu igomba gushyirwa ku isoko tukagabana avuyemo ariko n'inyungu zavuyemo kuva mu 2015'.

Umuyobozi w'iyo koperative, Mukabera Vestine yavuze ko amafaranga make yagiye ava mu bukode bw'iyo nzu yagiye akoreshwa mu kuyisana, andi ahabwa abari abanyamuryango bagiye basezera.

Ati 'Hari ibihumbi 560 Frw twahaye abantu 36 bavuye muri koperative yacu. Ayo yose ni amafaranga yavaga kuri iyo nzu kandi kuva mu 2016 nta bwizigame abanyamuryango bagiye batanga, bategereza gusa ava mu bukode kandi iyo tutabonye umukiliya uyikodesha nta handi ava'.

Umuyobozi wungirije w'Akarere ka Nyamagabe ushinzwe Iterambere ry'Ubukungu, Habimana Thadée yavuze ko nk'ubuyobozi bagiye gukurikirana icyo kibazo.

Yagize ati 'Simpamya ko uko babivuga ari ko byagenze tutarajya gukora ubusesenguzi n'ubugenzuzi ngo tumenye niba ayo mafaranga barayariye. Hari igihe ugenda ugasanga habayemo ibindi bibazo abanyamuryango badasobanukiwe. Tuzagenda turebe ikibazo kirimo tubafashe'.

Inzu y'ubucurzi bubatse buri munyamuryango yayitangagaho 3500 Frw buri kwezi akuwe ku nkunga y'ingoboka igenerwa abageze mu zabukuru.

Koperative Imbere Heza VUP Gasaka igizwe n'abanyamuryango bageze mu zabukuru 348.

Abagize koperative y’abageze mu zabukuru i Nyamgabe barasaba gusubizwa amafaranga bubatsemo inzu ntibabone inyungu