Category: Uncategorized

Ni gahunda iyo kaminuza yatangije ku wa 5 Gashyantare 2025, ubwo abagera kuri 46 batoranyijwe basinyaga amasezerano yo kwishyurirwa amafaranga y'ishuri mu byiciro bitandukanye.

Abazishyurirwa ishuri bagabanyijemo ibyiciro bitatu bishingiye ku manota bagize mu bizamini by'amajonjora bakoreshejwe. Abagize ari hejuru ya 85% bazarihirwa imyaka itatu y'icyiciro cya kabiri cya kaminuza mu mashami atandukanye.

Ni mu gihe abagize amanota ari hagati ya 70% na 85% bazarihirwa imyaka ibiri, naho abagize ari hagati ya 60% na 70% bazarihirwa umwaka umwe.

Umuyobozi Mukuru wa UTB, Ntahemuka John yavuze ko igitekerezo cyo gutanga 'bourse' ku banyeshuri bayo cyatanzwe na Mukarubega Zulfat washinze iyo kaminuza, nyuma yo kubona ko imaze kwiyubaka bigaragara.

Ati 'Igitekerezo cyaje nyiri kaminuza amaze kubona ko twimukiye mu nyubako yacu. Asanzwe aharanira gufasha urubyiruko haba mu kurushakira amahirwe harimo n'ay'akazi no kwimenyereza umwuga hanze y'u Rwanda.'

'Yaje gusanga rero ibyo bidahagije ahubwo areba n'abana bafite ubushobozi buke ariko batsinze neza ikizamini gisoza amashuri yisumbuye ariko batabasha kwiyishyurira kaminuza. Yagize igitekerezo cy'uko bafashwa kwiga kaminuza habaho ipiganwa abatsinze baremererwa'.

Ntahemuka yongeyeho ko iyo kaminuza yashyize hanze itangazo, abagera kuri 300 batanga ubusabe bwabo bahabwa ikizamini cyanditse n'icyo kuvuga noneho abagize amanota asabwa baratoranywa.

Iyo gahunda biteganyijwe ko izajya iba buri mwaka kandi izagenda irushaho gufata abanyeshuri benshi.

Asiimwe Angel uri mu bahawe 'bourse' yavuze ko yishimiye cyane ayo mahirwe yahawe yo kwiga arihirwa, ndetse ashishikariza urubyiruko rufite imbogamizi y'ubushobozi gutanga ubusabe muri UTB rukagerageza amahirwe.

Ati 'Ni amahirwe akomeye cyane ndashimira UTB n'Igihugu byaduhaye amahirwe yo kwiga. Abandi baciye muri iyi kaminuza mbona bahagaze neza nanjye nziga nshyizeho umwete kuko iyi kaminuza ni nziza.'

Kwizera Ignace nawe ugiye kwiga kuri 'bourse' ya UTB yavuze ko yiteze kunguka ubumenyi bugezweho ku isoko ry'umurimo by'umwihariko ibijyanye n'imyuga.

Ati 'Byari bigoranye kwiyishyurira kaminuza kuko nari maze umwaka nsoje amashuri yisumbuye nicaye kuko mu rugo nta bushobozi bafite. Nsanzwe ngerageza kwikorera kandi niteze ko ibyo ngiye kwiga bijyanye n'ubucuruzi n'ikoranabuhanga bizamfasha cyane. Nasaba urubyiruko bagenzi banjye kureba kure bagaha agaciro kwiga imyuga kuko igezweho ku isoko ry'umurimo.'

Kayigire Célestin ufite umwana wemerewe kurihirwa amasomo umwaka wose yavuze ko ari amahirwe akomeye cyane ku mwana we kubona agiye kurihirwa ishuri, by'umwihariko muri kaminuza ahamya ko UTB ihuje n'icyerekezo cy'Igihugu.

Umubyeyi witwa Kayigire Célestin yavuze ko UTB itanga uburezi bujyanye n’icyerekezo cy’Igihugu

Kwizera Ignace yavuze ko yiteze kunguka ubumenyi bugezweho ku isoko ry'umurimo by'umwihariko ibijyanye n'imyuga

Asiimwe Angel uri mu bahawe 'bourse' yavuze ko yishimiye cyane ayo mahirwe yahawe yo kwiga arihirwa

Umuyobozi Mukuru wa UTB, Ntahemuka John yavuze ko igitekerezo cyo gutanga 'bourse' ku banyeshuri bayo cyatanzwe na Mukarubega Zulfat washinze iyo kaminuza

Byabereye mu Mudugudu wa Kasenjara, Akagari ka Karusimbi, Umurenge wa Bushenge mu Karere ka Nyamasheke ku wa 6 Gashyantare 2025.

Mu masaha ya mu gitondo nibwo uyu mugabo w'imyaka 50 bivugwa ko afite uburwayi bwo mu mutwe yafashe umuhoro atema inka, umugore we wari utwite, atema n'umuturanyi.

Amakuru IGIHE ifite ni uko uyu mugabo yajyaga afatwa n'uburwayi bwo mu mutwe bakamusengera agakira. Uyu munsi ngo byari byongeye bajya kumusengera n'ubundi.

Umunyamabanga Nshingwabikorwa w'Umurenge wa Bushenge, Mukabarahira Jeannine yabwiye IGIHE ko aya makuru bayamenye ndetse ko bajyanye aho byabereye n'inzego zirimo Polisi, DASSO ndetse na RIB.

Umuvugizi wa Polisi y'u Rwanda mu Ntara y'Iburengerazuba, SSP Bonafature Twizere Karekezi, yabwiye IGIHE ko nyuma yo gukora ayo marorerwa, yatemye n'inka ye, mu gihe inzego z'umutekano n'iz'ubuyobozi zari zitabaye asohoka mu nzu n'umupanga agiye gutema abari aho baramurasa ahita arapfa.

Ati “Turihanganisha imiryango yabuze ababo, tunasaba abaturage kuba maso no gutanga amakuru hakiri kare ku bantu bagaragaza imyitwarire ishobora guteza ibyago kugira ngo dukumire ibyago mbere yuko bibaho.”

Biteganyijwe ko imirambo ijyanwa ku Bitaro bya Bushenge, mu gihe harimo hategurwa uburyo bwo kuyishyingura.

Uyu mugabo n'umugore we basize abana bane, umuto muri bo afite imyaka itanu.

Ntibari bazi ko bazakirwa nk'uko bakiriwe. Bakinjira ku mupaka, basabwe kurambika intwaro hasi, bagakura ububiko bw'amasasu ku mbunda zabo, barangiza bakamanika amaboko.

Ni uko byagenze, hanyuma barasakwa, bamburwa ibyo bari bafite birimo n'ibiyobyabwenge by'urugomi, ubundi bajyanwa mu kigo batuyemo uyu munsi.

Abo basirikare bose hamwe ubu bacumbikiwe mu Murenge wa Rugerero mu Karere ka Rubavu. Aho bari, bafite ibikoresho nkenerwa byose, kuva ku biryamirwa kugera ku byo kwa mbara n'ibiribwa.

Bose ni 131, umugore ubarimo ni umwe. Bateka ibyo bashaka, bishingiye ku byo bahawe n'u Rwanda. Abafite uburwayi, bafite umuganga uhoraho ubitaho, ibyo byarangira, bakidagadura, bagakina umupira w'amaguru ndetse bakiyibutsa n'akarasisi ka gisirikare.

Nyuma y'aho kandi bagira umwanya wo gusabana, bakaririmba indirimbo bari basanzwe baririmba bari iwabo mu gisirikare, harimo nk'iyo kwiragiza Imana yitwa 'Nzambe' n'indi yitwa 'Soldat jusqu'à la mort'.

Bagera mu Rwanda bwa mbere, bavuze ko intambara bashowemo n'ubuyobozi bukuru bwabo itari isobanutse, kuko bari bameze nk'aboherejwe gupfa.

Umwe muri bo akigera i Rubavu, yabwiye IGIHE ko ubwo M23 yageraga i Goma, bo bari ku Kibuga cy'indege cy'uyu mujyi.

Ati 'Ni gute twashoboraga koherezwa ku kibuga cy'indege mu gihe ingabo z'umwanzi zari zigose umujyi wose, ziri kurasa buri hantu hose? Ubwo buryo bw'imirwanire ntibwumvikana.'

Yavuze ko ubwo yabonaga ibisasu biri kugana mu cyerekezo cy'aho bari bari yari yamaze kubona kare ko ibintu bitameze neza, ifata icyemezo cyo kujya muri MONUSCO ariko nayo iramwanga, afata inzira ahungira mu Rwanda.

Uburyo aba basirikare bitaweho bigaragaza ubumuntu bw'Inzego z'Umutekano z'u Rwanda, ibintu ushobora kubona ahantu hake.

Umwe mu basirikare bakuru ba RDC witwa Lt Kasereke Tshombe ati 'Turashimira u Rwanda ku buryo rwatwakiriye neza kandi mu mahoro. Icyo dusaba Guverinoma ya Congo ni ukudufasha gusubira iwacu, tugataha mu mahoro. Turasaba kandi guhabwa uburyo bwo kuvugana n'abo mu miryango yacu kugira ngo bamenye ko turi amahoro.'

Kuva umutwe wa M23 wafata Umujyi wa Goma, abasirikare benshi ba FARDC bashyize intwaro hasi, bamanika amaboko, bemera ko batsinzwe.

Nyuma M23 yatangaje ko igiye kubaha imyitozo ku buryo bazavamo abasirikare bafite indangagaciro bitandukanye n'uko bari basanzwe bakora.

Umuhuzabikorwa wa AFC/M23, Corneille Nangaa, yavuze ko yaba abasirikare bamanitse amaboko n'abafatiwe ku rugamba n'abo muri FARDC, bose ari abavandimwe babo.

Ati 'Ni Abanye-Congo, nk'uko bimeze kuri twe. Bari bafite intego bagomba kugeraho, ariko boherejwe na perezida wabo, waje no kubatererana. Barwanaga mu kurinda ubutegetsi bwe. Yarabaretse kugira ngo bicwe n'inzara, ashyira abana mu gisirikare, abatoza huti huti maze abohereza ku rugamba banyweye ibiyobyabwenge.'

Nangaa yavuze ko abo bafashe bafite amahitamo y'icyo bakora, cyane ko bari baratakaje ubushake bwo gukomeza kurwana, icyakora akagaragaza ko uko byagenda kose ari abaturage ba Congo, ko batazabatererana.

Ati 'Bamwe baniteguye kutwiyungaho, bakifatanya natwe mu mpinduramatwara yacu. Turi kubohereza mu bigo bizabigisha uburyo bwo kwiyubaka, imyitwarire myiza n'uburyo impinduramatwara ikora.'

Nubwo bimeze bityo, hari abandi basirikare barenga 3000 bahungiye mu maboko ya Loni, bafitwe n'Ingabo za MONUSCO. Ntabwo ibyabo birasobanuka kugeza ubu.

Nyuma yo kwigarurira Umujyi wa Goma, imirimo y'abaturage yarasubukuwe. Ubu ni umujyi utekanye, serivisi zose zongeye gutangwa.

Yaba ubucuruzi, ubuvuzi, amashuri byose birakora nta nkomyi. Abaturage basobanura ko batekanye kurusha ikindi gihe kuko nta musirikare ukibahohotera nk'uko byabaga mbere y'uko M23 ifata Umujyi wa Goma.

Uretse abasirikare bahungiye mu Rwanda, hari n'abaturage basanzwe bahunze ubwo imirwano yabaga, bakiriwe neza, bahabwa ibikoresho by'ibanze, amahoro amaze kugaruka iwabo, basubira i Goma.

Mu gushimangira umutekano no kurinda abaturage, ubu M23 yamaze no gushyiraho abayobozi b'Intara ya Kivu y'Amajyaruguru aho Bahati Musanga Joseph yagizwe Guverineri w'iyo ntara.

Yungirijwe na Manzi Ngarambe Willy wagizwe Visi-Guverineri wa Kivu y'Amajyaruguru ushinzwe ibijyanye na politiki, ubuyobozi, n'amategeko.

Ni mu gihe Amani Bahati Shaddrak we yagizwe Visi Guverineri wa Kivu y'Amajyaruguru ushinzwe ubukungu, imari n'iterambere.

Abafite uburwayi, bafite umuganga ubitaho akabaha ubuvuzi bw’ibanze

Amacumbi yabo ni uku ateye, ababashisha kubaho neza batekanye

Mu ntangiriro z’iki Cyumweru, bahawe imyambaro itandukanye

Bahawe gaz bifashisha mu guteka ibiryo bashaka

Aba basirikare bishimira uko babayeho ndetse bagashima Guverinoma y’u Rwanda yabakiriye neza ititayeko bagenzi babo bayihekuye

Bacumbikiwe mu nzu nziza zifite ibikoresho byose by’ibanze

Ikigo babamo gihora kirinzwe ijoro n’amanywa

Bafatanywe ibikoresho by'amashanyarazi birimo fusibles 445 n'insinga zireshya na metero 295 z'uburebure, mu bikorwa bya Polisi bitandukanye byabereye aho bakorera ubucuruzi mu turere twa Kicukiro, Gasabo na Rulindo.

Umuvugizi wa Polisi y'u Rwanda, ACP Boniface Rutikanga yavuze ko ari abiba n'ababatiza umurindi bose barimo n'ababigura bagamije kubicuruza bose bahagurukiwe.

Ati 'kubisobanura, gukurikirana abajura gusa ntibihagije, udakurikiranye n'ababibagurira, kandi ibi ni ibikorwa tuzakomeza gukora. Bose uko ari barindwi bafatanywe ibikoresho batabasha gusobanura inkomoko yabyo nyuma y'amakuru yari ahari ko hari ibikoresho by'amashanyarazi byagiye bikurwa ku miyoboro migari mu bice bitandukanye.'

Yakomeje avuga ko 'Babiri muri bo bafatiwe ahitwa Zinia mu Karere ka Kicukiro, bane bafatirwa ku Gisozi mu Karere ka Gasabo mu gihe undi umwe yafatiwe mu Karere ka Rulindo. Abantu nk'aba batinyuka guteza ikizima, bagateza umutekano muke ntabwo tuzabihanganira kuko aho biriya bikoresho byavuye, ingaruka zakurikiyeho ni nyinshi cyane. Bafashwe mu cyumweru kimwe gusa, icyo twibutsa ni uko tugikomeza n'ubutaha n'abandi bakibirimo bazafatwa.'

Yatanze umuburo ko uzafatirwa mu iduka acuruza ibidafitiwe ubusobanuro bw'inkomoko wese azafatwa nk'uwiba cyangwa usenya ibikorwaremezo.

Geoffrey Zawadi, ukuriye Ishami riishinzwe abafatanyabikorwa mu kigo cy'igihugu gishinzwe ingufu (REG) mu butumwa yatanze, yavuze ko kwangiza ibikorwaremezo bifatwa nk'ubugizi bwa nabi kuko bibuza iterambere ry'abaturage n'igihugu muri rusange.

Ati 'Aba ni abagizi ba nabi, bangiza ibikorwaremezo by'amashanyarazi batambamira gahunda y'igihugu yo kugeza amashanyarazi ku baturarwanda bose. Iyo dufite abantu nk'aba biba bimeze nko kuvomera mu rutete. Tugomba kuba benshi mu kubirwanya tukarusha imbaraga ababyonona, ntitwakwemera ko abantu bacye bahemukira benshi igihugu kigahora gisubiramo ibikorwa bimwe ntitubashe gutera imbere.'

Umuyobozi w'Ishami rishinzwe Ubugenzuzi muri RICA, Joseph Mutabazi yashishikarije abacuruza ibikoresho by'ikoranabuhanga n'iby'amashanyarazi byakoresheje kwihutira kureba ko bubahiriza amabwiriza kuko ubugenzuzi bukorwa ku bufatanye n'inzego z'umutekano bugikomeje umunsi ku munsi.

Yasabye n'abaguzi mu gihe bagiye ku iduka cyangwa mu isoko bakeneye bene ibyo bikoresho; gusaba inyemezabwishyu no gukurukirana bakagira amakuru bamenya ku byo bagiye kugura kuko biri mu burenganzira bwabo kumenya inkomoko y'aho byavuye.

Polisi yafashe abantu barindwi bakekwaho kwangiza no gucuruza ibikorwaremezo by'amashanyarazi

Ni umukinnyi wageze ku kibuga cy’indege i Kanombe mu rukerera rwo kuri uyu wa Kane tariki 6 Gashyantare 2025. 

Souleymane Daffe ukina mu kibuga hagati yugarira ndetse akaba akina no mu mutima w’ubwugarizi ariko akaba aho akunda cyane ari mu kibuga hagati, yavuze ko icyatumye ahitamo kwerekeza muri Rayon Sports ari ukubera ko ari ikipe nini ndetse n’abayobozi bayo bakaba baramuvugishije neza.

Yagize ati: “Rayon Sports ni ikipe nini, narebye uko ikora ndeba uko ibayeho ndeba na buri kimwe, bimpa imbaraga zo kuba ndihano. Icyongeyeho ubuyobozi bwamvugishije neza, ibyo byose byampaye imbaraga zo kuba ndi hano”.

Yavuze ko mbere yo kuza muri Rayon Sports atigeze avugisha abandi banya-Mali bakiniye Rayon Sports barimo Omar Sidibe, Diarra na Adama Bagayogo uyirimo kugeza uyu munsi.

Yageneye ubutumwa abafana avuga ko azakora buri kimwe kugira ngo abashimishe. Yagize ati: “Ndabizi ko banyitezeho ibintu bihambaye ariko nababwira ko ndi hano kubera impamvu nziza zo gukina no kunyura abafana. Rero nzakora buri kimwe ngo mbashimishe ndabyizeye”. 

Uyu mukinnyi yavuze ko Umujyi wa Kigali ari mwiza ugereranyije n’uwa Mali, Bamako ndetse ko umukino Rayon Sports ifite mu mpera z’icyumweru yiteguye gukina dore ko ari byo bimuzanye.

Souleymane Daffe amasezerano y’umwaka n’igice mu ikipe ya Rayon Sports akaba yarakinags muri Provenance de Salitas yo muri Burkina Faso. Yanakinnye kandi muri AS Real de Bamako y’iwabo muri Mali. 

Muri Mutarama Rayon Sports yasinyishije abakinnyi 4 ari bo Umunya-Cameroun, Assana Nah Innocent umaze igihe akorana n'abandi imyitozo, rutahizamu w'Amavubi, Biramahire Abeddy, Adulai Jaló wo muri Guineé-Bissau ndetse n’uyu munya-Mali ari nawe wari usigaye kuyigeramo.

Murera iratangira imikino yo kwishyura ya shampiyona kuri iki Cyumweru yakira Musanze FC kuri Kigali Pelé Stadium.

Souleymane Daffe ubwo yari ageze ku kibuga cy’indege i Kanombe 

Souleymane Daffe yakiriwe n’umuvugizi wa Rayon Sports, Roben Ngabo n’umuyobozi w’abafana, Claude Muhawenimana 

“>

Byagarutsweho kuri uyu wa 5 Gashyantare 2025, ubwo Inteko Rusange ya Sena y'u Rwanda, yagezwagaho raporo ya Komisiyo y'Ububanyi n'Amahanga, Ubutwererane n'Umutekano ku gikorwa cyo kugenzura ishyirwa mu bikorwa ry'Amasezerano Mpuzamahanga yerekeye impunzi yashyiriweho umukono i Geneve ku wa 28 Nyakanga 195.

Perezida w'iyo Komisiyo, Senateri Murangwa Ndangiza Hadidja, yagaragaje ko mu igenzura bakoze, barebye uburyo u Rwanda rufasha impunzi mu ngeri zitandukanye zirimo uburezi, ubuzima, umurimo, ibidukikije ndetse n'ibirebana n'isuku n'isukura.

Muri izo nzego zose byagaragaye ko u Rwanda rwakira neza abarugana ndetse ko rutanga amahirwe ku bantu bose.

Nko mu rwego rw'uburezi, Murangwa yagaragaje ko hari amashuri 848 hirya no hino mu gihugu yigamo n'abana b'impunzi bari mu Rwanda, hari amashuri atandatu y'imyuga n'ubumenyi ngiro ndetse kuri ubu hari na kaminuza zifasha abatsinze neza zirimo na Kepler.

Mu bijyanye n'umurimo ndetse n'iterambere, Leta yatanze hegitare 136,8 zihingwaho n'amatsinda agizwe n'Abanyarwanda ndetse n'impunzi kandi bibafasha kwiteza imbere.

Hari kandi umushinga Jya Mbere wahinduriye impunzi ubuzima binyuze mu guterwa inkunga y'ishoramari n'indi itandukanye.

Mu nkingi ijyanye n'ubuzima kuri ubu umubare munini w'impunzi zikoresha ubwisungane mu kwivuza bwa mituweLi n'ibindi bitandukanye bigamije kwimakaza ubuzima bwiza bwazo.

Yakomeje agaragaza ko nubwo hakozwe byinshi byiza, hakiri ibibazo bishingiye ku mubare munini w'abashomeri, inyubako zishaje, kubona inguzanyo ku mpunzi kuko ziba zidafite ingwate, n'ibindi bitandukanye.

Ati 'Na bo bakwiriye kumenya ko bagomba kuba ibisubizo mu bibazo bafite bakajya bishakamo ibisubizo nk'Abanyarwanda, bagafata umuco wo mu Rwanda.'

Yakomeje ashimangira ko igihugu gifite umugambi wo kwinjiza impunzi mu buzima bw'iterambere na cyane ko ibyo bibazo bimwe bigenda bishakirwa ibisubizo ku bufatanye n'izindi nzego zitandukanye.

Ati 'Nubwo hari imbogamizi zikigaragara mu gushyira mu bikorwa ibyo u Rwanda rwiyemeje, igihugu gifite ubushake na gahunda yo kurushaho kwinjiza impunzi mu buzima bw'iterembere ry'igihugu.'

Senateri Niyomugabo Cyprien yashimye cyane uruhare rw'u Rwanda mu gufata neza impunzi ndetse n'uburyo hari gukorwa gahunda yo kuzigisha indangagaciro nyarwanda zo kwishakamo ibisubizo.

Ati 'Buriya ibi bintu byose Komisiyo yatugejejeho byiza bikorerwa impunzi ntabwo bipfa kwizana gusa, biva mu ndangagaciro z'umuco w'u Rwanda harimo gukunda igihugu.'

Yakomeje ati 'Nashimye cyane ko abana bose bajya mu mashuri bakiga, hakubakwa amashuri bakiga kimwe n'Abanyarwanda, gahunda zigakurikizwa bishamikiye ku ndangagaciro zo kugira urugwiro, ubwuzu no kwita ku bakugana. Ubu buryo bakirwa bishimangira indangagaciro yo kubaha ubuzima.'

Senateri Evode Uwizeyimana yagaragaje ko u Rwanda rwagaragaje ubudasa mu gufasha izo mpunzi nubwo hari izo usanga zirota kujya mu mahanga bikaba byazikoma mu nkokora ku gushyira mu bikorwa ingamba zo kwikura mu bukene.

Ati 'Hari aho usanga ibi byo kuza baterura babiri babajyana muri Arizona, babajyana muri Canada, bituma abantu bapfa mu mutwe ku buryo umuntu wese usanga aryama atekereza kugenda.'

Ku rundi ruhande Senateri Prof. Penina Uwimbabazi yashimangiye ko uko impunzi zifashwa byerekana ko igihugu giha agaciro abantu bose ndetse n'impunzi zigafatwa nk'abanyagihugu.

U Rwanda rucumbikiye impunzi zirenga ibihumbi 134, zirimo 82.262 zingana na 61% zaturutse muri Repubulika Iharanira Demokarasi ya Congo, mu gihe impunzi 51.134 zingana na 38% zavuye mu Burundi.

Zicumbikiwe mu nkambi zitandukanye zirimo Mahama, Kigeme, Nyabiheke, Mugombwa n'ahandi hatandukanye.

Sena y’u Rwanda yashimye ubushake bw’igihugu mu kwinjiza impunzi mu bikorwa by’iterambere

Zimwe mu mpunzi zihitamo gukora imishinga yo korora amatungo magufi

Hari kandi abamenye ubwenge bagakora n’ibikorwa by’ubucuruzi

Hari abahitamo gukora imishinga y’ubuhinzi