Category: Uncategorized

Ibi yabigarutseho kuri iki Cyumweru aganira na Rwanda Magazine ubwo yari kumwe n’abafana bari bagiye gusura rutahizamu Fall Ngagne wabazwe kubera ikibazo cy’imvune yagize.

Perezida wa Rayon Sports yavuze ko basabwa amanota 24 kugira ngo begukane igikombe anasobanura ko mu minsi iri imbere bazazana umutoza wungirije w’Umunyarwanda umenyereye shampiyona.

Yagize ati: “Turasabwa amanota 24 kugira ngo dutware igikombe cya shampiyona niyo ntego yacu. Umutoza wungirije araza vuba ndetse umukino utaha azaba ahari. 

Twashatse kuzana umutoza wa hano umenyereye shampiyona kurusha uko twajya kumushaka hanze. Turashaka umutoza umenyere shampiyona kugira ngo akomeze mu mujyo twari dufite kuko kuzana uwo hanze atangira kwiga shampiyona, oya”. 

Yavuze ko muri aka karuhuko k’ikipe y’igihugu bazakinamo imikino ya gicuti gusa bakiri kubitegura.

Ati: “Ntabwo turabitegura neza ariko ntabwo tuzarangiza aka karuhuko tudakinnye imikino ya gicuti ndetse niba micye ntabwo izajya munsi y'ibiri kugira ngo tugerageze n'abakinnyi tubona bameze ukuntu tubarebe cyane tubahe umwanya”.

Twagirayezu Thaddée yavuze ko Mukura VS bafite mu mukino uzakurikiraho bazayitsinda kubera ko itazongera gukora mu jisho Rayon Sports.

Ati: “Ndibaza ko Mukura VS itakongera kudutsinda bwa kabiri byaba ari igitangaza niko nabyita rero twiteguye neza tugiye mu karuhuko nibaza ko Mukura VS itakora mu jisho rya Rayon Sports bwa kabiri ntabwo bishoboka”.

Yavuze ko kuba abafana batekereje kujya gusura Fall Ngagne nawe bakanybwira ari igikorwa cyamushimishije cyane.

Ati: “Ni igikorwa cyanshimishije cyane, abafana ba Rayon Sports baje gusura Fall Ngagne yishimye yari kumwe n'abakinnyi bagenzi be bishimiye, bamuzaniye ubushobozi buba buri hejuru ni ibyishimo ni urukundo rwose Rayon Sports ni urukundo nanashishikariza abandi bafana bose si ngombwa no gusura uwavunitse gusa n'abandi babasura”.

Yavuze ko Fall Ngagne bamubaye hafi ko bagiye bakamuvuza bakamubaga bikagenda neza none ubu akaba ari koroherwa.

Ati: “Fall Ngagne twamubaye hafi twaramujyanye turamuvuza baramubaga binagenda neza, ubwishyu buri hejuru Rayon Sports irabwishyura urabona ko yatangiyre gukandagira imbago yanayishyize hasi ibintu bimeze neza nabwira abafana ba Rayon Sports ko mu mwaka utaha w'imikino azaba ahari”.

Kugeza ubu ikipe ya Rayon Sports niyo iyoboye urutonde rwa shampiyona n’amanota 46 aho irusha amanota 4 APR FC iyikurikira.

Iri huriro ryashyizweho ku wa 14 Werurwe 2025, mu Karere ka Muhanga, mu nama yahuje abarimu bigisha itangazamakuru muri za kaminuza enye zo mu Rwanda zirimo Institut Catholique de Kabgayi (ICK), Kaminuza y'u Rwanda (UR), East African University Rwanda (EAUR) na Mount Kigali University (MKU).

Umwarimu muri Kaminuza y'u Rwanda, Rev. Jean Pierre Uwimana, watorewe kuyobora iri huriro, yavuze ko intego nyamukuru y'iyi nama ari uguhuza abarimu bigisha itangazamakuru, gushyiraho amategeko arigenga no gutora abayobozi baryo.

Yavuze ko igitekerezo cyo gushyiraho iri huriro cyaturutse mu nama y'itangazamakuru yabereye muri Tanzania umwaka ushize, aho basanze abarimu baryigisha bo mu bindi bihugu bibumbira hamwa nka African Journalism Education Network (AJEN).

Yagize ati 'Umwaka ushize, twitabiriye inama yabereye muri Tanzania, maze dusanga abandi barimu bigisha itangazamakuru hirya no hino muri Afurika barashinze amahuriro yabo, bidutera amatsiko. Byadufunguye amaso tubona inyungu ziri mu bufatanye, gusangira ubumenyi no gukorera hamwe kugira ngo twese dutere imbere.'

Rev. Uwimana yavuze ko RJEN izibanda ku kunoza imyigishirize y'itangazamakuru, guteza imbere ubushakashatsi no guteza imbere umwuga w'itangazamakuru mu Rwanda.

Ati 'Iyo abantu bafite ubunararibonye butandukanye bahuriye hamwe, bashobora kubaka ikintu gikomeye, nk'ubushakashatsi. Ntibigarukira gusa ku buryo twigisha abanyeshuri, ahubwo binagira uruhare mu guteza imbere umwuga w'itangazamakuru muri Afurika yose.'

Yakomeje ati 'Itangazamakuru si akazi uwo ari we wese yakora, bisaba ubumenyi n'ubunyamwuga. Kudakurikiza amahame y'umwuga biteza ibibazo birimo kuvuga no kwandika ibyo udahagazeho.'

Yasoje avuga ko bazashyiraho ingamba zo guteza imbere ubushakashatsi no kuvugurura imyigishirize y'itangazamakuru mu Rwanda.

Umunyamabanga Nshingwabikorwa w'Urwego rw'Abanyamakuru bigenzura, RMC, Mugisha Emmanuel, yashimye iki gikorwa, avuga ko gifitiye akamaro abanyamakuru b'ejo hazaza, kandi ko ubufatanye bw'abarimu buzafasha kuvugurura amasomo ajyanye n'ibikenewe ku isoko ry'umurimo.

Umuyobozi wa East African University Rwanda (EAUR), Prof. Kabera Callixte yavuze ko uyu mwaka utari igihe cyo guhangana ku ma Kaminuza ahubwo ari icyo gufatanya mu guteza imbere umwuga w'itangazamakuru.

Abagize komite nyobozi yatowe ni Rev. Jean Pierre Uwimana watorewe kuba Perezida, Andrew Onsongo aba Visi Perezida wa mbere, Dr. Joyce Kirabo agirwa Visi Perezida wa kabiri, Jeanne d'Arc Mukamana atorerwa kuba Umunyamabanga mu gihe Jean Baptiste Hategekimana ari Umubitsi.

---

Ni gahunda y'Umukuru w'Igihugu yo kwegera abaturage ibaye bwa mbere kuva hatangizwa gahunda ya NST2. Iki gikorwa, ni kimwe mu bihuza Umukuru w’Igihugu n’Abanyarwanda ariko by’umwihariko yabasanze aho bari.

Baganira ku iterambere n’ubuzima bw’Igihugu muri rusange, bakamugezaho bimwe mu bibazo n’ibyifuzo by’ibyo babona bibakwiriye, bityo bakagira uruhare mu bibakorerwa. 

Abahanzi batandukanye n'abahanga mu kuvanga imiziki bari kubafasha gususuruka mu ndirimbo zitaka u Rwanda n'ibyiza rumaze kugeraho mu iterambere, n’byo Abanyarwanda bishimira ko bamaze kugeraho bari ku isonga, bafashijwe n'ubuyobozi bw'Igihugu burangajwe imbere na Perezida Paul Kagame. 

Abahanzi King James na Butera Knowless basusurukije ibihumbi by'abaturage bari muri BK Arena bategereje kwakira Perezida Paul Kagame. Ni mu gihe abandi bahanzi bitabiriye iki gikorwa barimo Nel Ngabo, Platin P, Tom Close n’umugore we, Tricia, itsinda rya Buringuni na Burikantu n’abandi.

Usibye abahanzi, hari n’abanyarwenya ndetse n’abakinnyi ba filime bitabiriye iki gikorwa barimo Clapton Kibonge, Niyitegeka Gratien (Papa Sava), Fally Merci, Kadudu n’aba-DJs barimo DJ Ira wanahawe ubwenegihugu bw’u Rwanda, DJ Sonia n’abandi.

Ni igikorwa kandi cyitabiriwe n’abanyamakuru bakomeye mu Rwanda, barimo Anita Pendo, Rucine Patrick n’abandi.

Perezida Kagame yashimiye Abanyarwanda by'umwihariko abarenga 8000 bahuriye muri BK Arena, avuga ko yari yifuje guhura n'abaturage bo mu Mujyi wa Kigali ari benshi, bagahurira i Gahanga ariko ntibyakunda kubera imvura.

Ati 'Nabonye ko bitaba byiza kongera gushyira abantu hamwe, ibihumbi 300, ibihumbi 400 ngo hanyuma banyagirwe n'imvura gusa tubure n'umwanya wo kuganira. Ni yo mpamvu twahisemo guhamagara bake n'abandi bahagarariye uturere, ndibwira ko ibyo tuganirira aha na bo biri bubagereho.'

Perezida Kagame yavuze ko iterambere u Rwanda rumaze kugeraho ryagizwemo uruhare n'Abanyarwanda bose kandi ari ko bikwiye gukomeza kumera.

Ati 'Ibyo byose navuga ko mubifitemo uruhare, byagiye bitera imbere mu buryo budasanzwe. Ndabibashimira cyane n'abandi bose dukorana. Ni ko bikwiye kumera, ni ko bikwiye gukomeza ndetse bikaba byanarushaho.'

Abaturage bo mu bice bitandukanye by'Umujyi wa Kigali banyuzwe no kuganira n'Umukuru w'Igihugu ndetse no kumushimira ibyo amaze kubagezaho ariko bafite n'ibyo bifuza kumusaba.

Abaganiriye n’itangazamakuru bavuga ko Perezida Kagame yakuye u Rwanda kure, akarugeza ku iterambere rishingiye ku mibereho myiza, ibikorwaremezo birimo imihanda, amasoko, amashuri n’amavuriro.

Mu mafoto, ihere ijisho ibyishimo by’abaganiriye na Perezida Kagame muri BK Arena:

Ibyishimo byari byose ubwo Perezida Kagame yasesekaraga muri BK Arena

Abanya-Kigali bari babukereye

Tom Close n’umugore we, Tricia bitabiriye

Abahanzi barimo Nel Ngabo na Platini P bari bahari

Butera Knowless yatanze ibyishimo bisendereye

King James na we yasusurukije imbaga y’ibihumbi by’abantu bari bateraniye muri BK Arena

Umunyarwenya Clapton Kibonge ntiyahatanzwe

Uyu mubyeyi yongeye gutungurana aza yabucyereye

Abitabiriye babanje gucinya umudiho bayobowe na Knowless na King James

DJ Ira yasabye ubwenegihugu arabuhabwa

Urubyiruko rwaserutse mu myambara igaragaza ko bari kumwe na Perezida Kagame

Abari bafite ibibazo batashye basubijwe

Byari ibyishimo gusa gusa

Umuyobozi w'Itorerero Méthodiste Libre mu Rwanda, Bishop Kayinamura Samuel yabwiye RBA ko Pasiteri Habiyambere yahagaritswe nyuma y'uko iryo torero risanze hari imicungire itanoze y'itorero n'umutungo waryo bahitamo kuba bamuhagaritse iminsi 30 y'agateganyo ngo habanze hakorwe isuzuma.

Yagize ati 'Inama zishinzwe itorero zabaye zimuhagaritse by'agateganyo mu gihe kingana n'iminsi 30. Hazaba hakorwa igenzura kugira ngo tumenye neza uko imiyoborere ye n'ibyerekeranye n'umutungo bihagaze.[…] Tuzagaragaza [ibyavuyemo] nyuma y'isesengura rigiye gushyirwaho mu kwezi kumwe.'

Bishop Kayinamura yavuze ko Pasiteri Habiyambere yahise anasimbuzwa by'agateganyo na Pasiteri Hakizimana Félicien wayoboraga Paruwasi y'iryo torero rya Kamembe muri Rusizi kugira ngo abe akomeje izo nshingano hatajemo icyuho.

Yasabye abakiristu b'iryo torero kudacika intege bagakomeza imirimo bakoreraga itorero n'indi ibateza imbere basanzwe bakora.

Ihagarikwa ry'uwo mupaisiteri rije nyuma y'uko mu Ugushyingo 2024, Dr. Mugiraneza Mugisha Samuel wahoze ari Musenyeri wa Diyosezi Angikikani ya Shyira ahagaritswe ku murimo bitewe n'ibibazo by'imiyoborere n'imitungo byamuvugwaho.

Dr. Mugiraneza kuri ubu yatangiye kuburanishwa kuri ibyo byaha akurikiranyweho aho mu ntangiriro za Gashyantare uyu mwaka yitabye Urukiko rw'Ibanze rwa Muhoza mu Kerere ka Musanze ariko aburana ahakana ibyo ashinjwa.

---

Ni imvura yaguye mu mugoroba wo ku wa 15 Werurwe 2025, yangiza umuhanda uhuza imirenge ya Musha na Ndora ku gishanga cya Ngiryi, amazi arawurengera.

Abahageze bavuze ko babonye amazi asendereye mu mirima, yica n'imyaka yarimo.

Umwe muri bo ati 'Wari umuceri ubereye ijisho none warengewe. Dufite ubwoba ko waba warengewe n'isayo cyangwa umucanga kuko byaba birangiye.'

Umuyobozi w'Akarere ka Gisagara wungirije ushinzwe iterambere y'ubukungu, Habineza Jean Paul, yabwiye IGIHE ko imvura yaguye ku gicamunsi yangije umuceri w'abahinzi mu bishanga bibiri.

Ati 'Umwuzure wibasiye igishanga cya Ngiryi muri Musha, ariko si ho gusa, kuko no mu Murenge wa Kibilizi muri Duwani naho hageze umwuzure mu gishanga.'

Yakomeje agira ati 'aho muri Ngiryi hangiritse hegitari zisaga 80, mu gihe kuri Duwani, hangiritse hegitari ziri hafi ya 20.'

Habineza yavuze ko ibyangijwe n'imvura bitari byagafatiwe ubwishingizi bw'ibihingwa, kuko bari babanje gukusanyiriza amafaranga hamwe bitegura kujya kubusaba mu cyumweru gitaha.

Yasabye abahinzi kurushaho kwitabira gahunda yo gushinganisha ibihingwa byabo kuko haba harimo nkunganire ya Leta ingana na 40% mu gihe umuhinzi we yiyishyurira 60%.

---

Amateka agaragaza ko Jenoside yakorewe Abatutsi imaze guhagarikwa n'ingabo zari iza RPA Inkotanyi, u Rwanda rwari rwarasenyutse mu nguni zose ku buryo nta cyo guheraho cyari gihari.

Mu kiganiro Perezida Kagame aherutse kugirana n'umunyamakuru Mario Nawfal, yagaragaje ko ibihugu bifite ijambo mu Muryango w'Abibumbye bitashatse gutabara Abatutsi mu Rwanda bicwaga bazizwa uko bavutse bitewe n'uruhare bimwe mu bikomeye biyifitemo.

Perezida Kagame yavuze ko Abafaransa n'Ababiligi batari gushaka guhagarika Jenoside kuko bafitanye isano n'ingengabitekerezo yayo na politiki y'urwango kuva mu gihe cy'ubukoloni, mu gihe François Mitterrand wari Perezida w'u Bufaransa akaba inshuti magara ya Perezida Habyarimana ku buryo byari byarageze no muri politiki ya bombi.

Yavuze ko n'abataragize uruhare rutaziguye muri Jenoside nka Leta Zunze Ubumwe za Amerika bakoze ikosa ryo guterera agati mu ryinyo.

Ati 'Byari nk'aho ntacyo bibabwiye, kandi n'ubu bibaho baravuga ngo ni bimwe by'Abanyafurika byo kwicana.'

Yasobanuye ko n'Umunyamabanga Mukuru wa Loni wari uri ho icyo gihe yavuze ko ubwo ari Abahutu bari kwica Abatutsi ubwo n'Abatutsi bakwica Abahutu.

Ati 'Ni nko kuvuga ngo bariya ni abanyamahane, ni inyamaswa ntabwo ari abantu. Kuvuga ko twese ari uko tumeze. Ubwo busumbane bwo kumva ko bamwe bari hejuru y'abandi, ni Abanyafurika, ni Abanyarwanda, nta wari ubyitayeho.'

Pereziada Kagame yavuze ko bamenye umugambi wa Jenoside yategurwaga gukorerwa Abatutsi ariko babigejeje kuri Loni ibatera umugongo.

Ati 'Twabiganirije abakozi ba Loni, uramutse wegereye Gen. Dallaire wari umuyobozi w'ingabo za Loni yabikubwira. Twarahuraga, twaraganiraga, twasangiraga ibiri gutegurwa kuva kera mu 1991/2.'

Abajijwe icyo Loni yabivuzeho yagize ati 'sinamenya icyo Loni yari kuvuga kuko Loni ni Loni. Loni igizwe n'aba n'ubundi bari inyuma, urabizi muri Jenoside u Bufaransa bwanayigizemo uruhare, u Bubiligi bwayigizemo uruhare kandi rimwe na rimwe bari mu bategeka ikigomba gukorwa muri Loni.'

Ubuzima bw'Abarenga miliyoni bwaguranywe ibihumbi 250$

Perezida Kagame yavuze ko hanatanzwe igitekerezo cyo gukuraho umurongo wa Radio Television Libres des Milles Collines (RTLM) ariko muri Loni bavuga ko bihenze cyane nyamara byari kubatwara ibihumbi 250$.

Ati 'Ubwo ayo yari menshi kugira ngo utabare abantu. Kuki bari kwigora babijyamo? Ibyo bikwereka agasuzuguro.'

Perezida Kagame yavuze ko Abanyarwanda bashishikazwa no kubaho ubuzima bwabo bishimye uko babishoboye ariko bakavoma amasomo mu mateka y'ahahise.

Ati 'Tubaho ubuzima bwacu twishimye uko bishoboka ariko ntitwibagirwa amasomo aturuka mu mateka yacu. Twize byinshi ku buryo tuzi guha agaciro ubuzima. Nzi neza icyo kuba impunzi ari cyo, nzi icyo kubura ubuzima bivuze, kuko narabibonye muri Jenoside, abo mu muryango wanjye ba hafi barishwe. Imiryango myinshi mu Rwanda, bamwe mu bo muhura, mwaganiriye babuze ababo. Bamwe mu bato ubona hano basigaye bonyine nta wo mu muryango basanga, bose barishwe. Ariko tugomba kubaho, tugomba kujya hamwe tukabaho ubuzima bushingiye ku masomo twize.'

Perezida Kagame yavuze ko hari ibihugu by'amahanga bigenda bisezeranya abantu ibintu byinshi birimo uburenganzira bwa muntu n'ibindi nyamara bababeshya.

Ati 'Nta muntu waguha ubuzima. Baragutenguha, barabeshya. Dushingiye kuri ayo masomo, twishyize hamwe tugakora ibishoboka niba hari inshuti cyangwa abantu bifuza gukorana natwe tugakomezanya inzira igana iterambere turabyemera ariko tukaba tuzi ko tugomba kwita ku nshingano zacu.'

Gakwerere wishe Umwamikazi Gicanda byarangiye agejejwe mu Rwanda

Perezida Kagame yavuze ko kimwe mu bitangaje byabaye mu minsi yashize ari uko umwe mu barwanyi ba FDLR boherejwe mu Rwanda harimo n'uwishe nyina wabo wari utuye i Butare (Huye).

Ati 'Iyi ni inkuru utapfa kwiyumvisha ariko ari hariya, yarazanywe, yari azwi, byari bizwi ahantu hose ariko ntawabyitayeho kugeza ubu. Ubwo wakora iki? Hubahirizwa ubutabera nk'uko tubizi.[…] Ibihe nk'ibyo bishegesha benshi mu buryo bukomeye ariko bake bagakomezwa n'ayo masomo.'

Yasobanuye ko no mu gihe cy'urugamba rwo guhagarika Jenoside, abari mu ngabo za RPA benshi bari barapfushije abo mu miryango yabo ariko bakomeza urugamba batabara ubuzima bw'abandi Banyarwanda bamwe batanabazi ariko bahitamo kubakiza aho guhugira mu kwihorera.

Isura y'igihugu nyuma yo guhagarika Jenoside yakorewe Abatutsi…

Perezida Kagame yavuze ko nyuma yo guhagarika Jenoside yakorerwaga Abatutsi ibintu byose byari byarapfuye, ku buryo wasangaga ahantu hose ari imirambo.

Ati 'Nta buzima bwari buhari, ibintu byose byari byarangiritse. Wabonaga imirambo iribwa n'imbwa zaba izo mu gasozi n'izindi.'

Yavuze ko ingabo za Loni zari mu Rwanda mbere zabarirwaga hagati ya 5000 na 6000 ariko ubwo Jenoside yari imaze gukaza umurego Loni yahisemo kugabanya ingabo bazigeza kuri 250 gusa.

Perezida Kagame yavuze ko aho gutabara Abatutsi bicwaga, bategereje kujya kurasa imbwa ziri kurya imirambo y'abishwe.

Ati 'Ingabo za Loni zishinzwe kugarura amahoro zari aha muri Jenoside aho gutabara abantu ahubwo zitangira kurasa imbwa zirya imirambo y'abishwe, abo bagombaga gutabara.'

Perezida Kagame yavuze ko mbere yo gufata Umujyi wa Kigali hari ahantu ingabo za RPA zageze zisanga abantu benshi bishwe, hakoreshwa imashini zihinga bacukura ibyobo bakajya basunikiramo imirambo yarengaga 3000.

Ati 'Abasirikare bacu bagezeyo basanga harimo abakomeretse ariko batapfuye, batabayemo 14 babakura mu mirambo umwe mu basirikare bakuru antumaho ngo nze ndebe ibyabaye. Ni bwo byari bikimara kubaho nko mu minota 20. Nababujije kuzongera kumpamagara Ahantu nk'aho cyangwa kumbwira inkuru nyinshi nk'izi kuko ntabwo byari kubaho buri munsi ngo nshobore gufata ibyemezo bwikwiriye.'

Abasirikare ba Loni batinye Interahamwe, mubyara wa Perezida Kagame aricwa

Perezida Kagame yavuze ko umugambi wa Jenoside wamenyekanye kera, babimenyesha Loni ariko iterera agati mu ryinyo.

Yavuze ko mubyara we yakoreye Loni imyaka irenga 17 ariko abarangiye aho ari ngo bamutabare baramutererana.

Ati 'Yiciwe hamwe n'abandi bantu icyenda, umuryango wari kumwe mu nzu. Kandi mu minsi yari yabanje nari navuganye n'abasirikare ba Loni mbaha amerekezo y'aho aba bantu bari kandi aba bantu bakoreraga Loni. Yitwaga Florence yari amaze imyaka 17 akorera Loni.'

Yakomeje ati 'Igihe nongeye guhura n'umwe mu basirikare bakuru arambwira ngo twaragiye tubona imihanda irafunze, ndavuga nti abantu mufite ibifaru n'intwaro ziremereye muragenda mubona insoresore zitwaje intwaro murahunga ntimwatabara abantu? Numvise ari impamvu igayitse.'

Ibihugu byanze gufata abakoze jenoside…

Perezida Kagame yavuze ko mu bihugu bitandukanye by'i Burayi, Canada, Amerika n'ahandi hari abantu bakekwaho uruhare muri Jenoside yakorewe Abatutsi bidegembya, nyamara haratanzwe ibirego n'inyandiko zisaba kubata muri yombi.

Yatanze urugero ku bagabo batanu baba mu Bwongereza u Rwanda rumaze imyaka irenga 10 rusaba icyo gihugu kubaburanisha cyangwa kubohereza mu Rwanda byose bikaba byaranze.

---