Category: Uncategorized

Iyi nama yateranye ku wa 17 Werurwe 2025 irimo n'Abaminisitiri b'Ingabo ku mpande zombi, yabanjirijwe n'iyahuje Abaminisitiri b'Ububanyi n'Amahanga n'ab'Ingabo bo muri EAC yabereye i Nairobi, na yo yigaga ku buryo umutekano wagaruka mu Burasirazuba bwa RDC.

Mu gitondo cyo kuri uyu wa Mbere, Minisitiri w'Ububanyi n'Amahanga w'u Rwanda, Olivier Nduhungirehe, ubwo yari abajijwe niba hari intumwa z'u Rwanda zigomba kwitabira iyi nama yabwiye IGIHE ati ' Yego, ni ho turi'.

Muri iyi nama harasuzumwa raporo yateguwe n'abagaba bakuru b'ingabo bo muri EAC na SADC, ubwo bahuriraga i Dar es Salaam tariki ya 24 Gashyantare, irebana n'ihagarikwa ry'imirwano mu Burasirazuba bwa RDC no kubaho kw'ibikorwa by'ubutabazi.

Mu bindi bakora harimo gutegura umurongo w'ibiganiro bya politike bizahuza ubutegetsi bwa RDC n'abashyamiranye na bwo.

Ni nyuma y'uko ibiganiro bya Luanda byahujwe n'ibya Nairobi binahabwa abahuza bashya barimo Olusegun Obasanjo wayoboye Nigeria, Uhuru Kenyatta wayoboye Kenya na Hailemariam Desalegn wabaye Minisitiri w'Intebe wa Ethiopia.

Inama zose u Rwanda rwitabiriye ku kibazo cya RDC rwagiye rushimangira ko intambara atari umuti ahubwo hakwiye kubaho ibiganiro hagati ya Guverinoma ya Congo n'umutwe wa M23 bagakemura ikibazo bagihereye mu mizi.

Inama y'Abaminisitiri ba EAC na SADC ishingiye ku myanzuro yafashwe n'abakuru b'ibihugu byo muri iyi miryango, ubwo bahuriraga mu nama idasanzwe yabereye i Dar es Salaam muri Tanzania tariki ya 8 Gashyantare 2025.

Ku wa 13 Werurwe 2025, habaye inama idasanzwe y'abakuru b'ibihugu bya SADC, bashimangira ko bashyigikiye ibiganiro bya politike ndetse ihita ihagarika ubutumwa bw'ingabo bwa SAMIRDC, bwafashaga FARDC mu kurwana na M23.

Iyi nama y'Abaminisitiri inabanjirije ibiganiro hagati ya RDC na M23 byahamagajwe na Perezida wa Angola João Manuel Gonçalves Lourenço watangaje ko bizaba ku wa 18 Werurwe 2025, ndetse Guverinoma ya Congo yemeje ko izabyitabira.

EAC na SADC bishyize hamwe mu gushaka umuti w’ikibazo cy’umutekano muri RDC

Hari habanje inama yahuje Abaminisitiri ba EAC

---

Source : http://igihe.com/amakuru/u-rwanda/article/u-rwanda-rwitabiriye-inama-ya-eac-na-sadc-yiga-ku-bibazo-bya-congo

Mbere y'umukino Musanze FC yatsinzemo. KIYOVU Sports 3-0, umutoza wungirije wa Muhazi Utd yahamagaye myugariro Shafik Bakaki wa Musanze amusaba kumufasha Kiyovu igatsinda Musanze FC.

Miggy na Musanze FC ntibacana uwaka bitewe n'uburyo batandukanye, Miggy akaba abikora ngo itsindwe ubundi yirukane Imurora Japhet 'Drogba', Miggy ashinja ko yamwirukanishije.

Mu 2020 ni bwo Miggy uri mu bakinnyi beza bakina mu kibuga hagati u Rwanda rwagize, yatangaje ko asezeye gukina mu Ikipe y'Igihugu Amavubi ariko akomeza kuboneka mu makipe asanzwe, na yo yashyizeho akadomo muri Kamena 2023.

Mugiraneza Jean Baptiste yakinnye mu makipe atandukanye arimo La Jeuneusse, Kiyovu Sports, APR FC, Gor Mahia, Azam FC, KMC na Police FC.

 

Source : https://yegob.rw/ku-mbuga-nkoranyambaga-hasakaye-amajwi-ya-mugiraneza-jean-baptiste-miggy-wumvikana-asaba-umukinnyi-wa-musanze-kumufasha-kiyovu-sports-igatsinda-musanze-fc-amajwi/

Ku mugoroba wo kuri iki cyumweru tariki ya 16 werurwe nibwo ikipe y'igihugu y'umupira w'amaguru, Amavubi, yatangiye imyitozo yayo ku mahoro mu kwitegura imikino bafite yo gukomeza urugendo barimo mu gushaka tike izaberekeza mu gikombe cy'Isi cyo muri 2026.

Ni Amavubi y'umutoza mushya, Adel Amrouche wahise anatangiza iyi myitozo ari kumwe n'abunguriza be barimo Eric Nshimiyimana na Dr Carolin Braun. Imyitozo ya mbere yibanze ku kunanura imitsi ndetse no kuruhura amaguru byoroheje, bifasha kuruhuka ku bakinnyi bari bamaze igihe bakina imikino myinshi muri shampiyona n'abandi bakoze ingendo zo mu ndege bitabira umwiherero.

Ikipe y'igihugu ifite imikino ibiri itoroshye yose bazakirira ku mahoro, ku itariki ya 21 werurwe, 2025 bazakira Nigeria (Super eagles) mu gihe ku  itariki ya 25 bazakira Lesotho, imikino yombi izaba ku isaha ya saa kumi nebyiri z'umugoroba.

Amavubi ari mu itsinda C ndetse akomeje kuyobora iri tsinda n'amanota 7, azaba ari gukina umukino wa 5&6 muri uru rugendo aho ari kumwe n'amakipe menshi harimo n'akomeye nka South Africa, Benin na Nigeria.

 

Source : https://yegob.rw/amavubi-afite-abatoza-bashya-yaraye-akoze-imyitozo-ya-mbere-yitegura-imikino-yo-gushaka-tike-yigikombe-cyisi/

Ni umwanzuro Guverinoma y'u Rwanda yafashe kuri uyu wa Mbere tariki 17 Werurwe, ndetse ugomba guhita ushyirwa mu bikorwa. U Rwanda ruvuga ko rwawufashe nyuma yo kubyigana ubushishozi mu ngeri zose, bitewe n'imyitwarire yabwo ya gikoloni.

Itangazo ryashyizwe hanze na Minisiteri y'Ububanyi n'Amahanga rivuga ko u Bubiligi bwakomeje gutesha agaciro u Rwanda 'yaba mbere no mu gihe cy'aya makimbirane yo muri Repubulika Iharanira Demokarasi ya Congo, aho u Bubiligi bufite uruhare mu mateka mabi by'umwihariko mu gukora ibikorwa bibangamira u Rwanda'.

Rwavuze ko uyu munsi, u Bubiligi bwafashe uruhande mu makimbirane ari kuba rujya ku ruhande rubangamiye u Rwanda, kandi rugakwirakwiza ibinyoma n'uburyarya kugira ngo hafatwe ibyemezo bibangamiye u Rwanda ariko byose bigamije 'guhungabanya u Rwanda n'akarere'.

Iri tangazo rinavuga ko 'Abadipolomate bose b'u Bubiligi mu Rwanda basabwe kuva mu gihugu mu gihe kitarenze amasaha 48', ruvuga ko ruzubahiriza amahame mpuzamahanga ya Vienne rurinda imitungo n'inyubako z'u Bubiligi biri mu Rwanda.

Perezida Paul Kagame yari aherutse kuvuga ko u Rwanda rudashobora kwihanganira imyitwarire y'u Bubiligi, ko rugomba gufata umwanzuro ukomeye.

Ati 'Ibyago bimwe dufite ni ukuba twarakolonijwe n'agahugu gato nk'u Rwanda ndetse ako gahugu kagatema u Rwanda, kakarucamo ibice ngo rungane nka ko. Ubwo ni u Bubiligi mvuga kandi ndaza kubwihanganiriza. U Bubiligi bwishe u Rwanda mu mateka arenze imyaka 30, rukajya rutugarukaho abasigaye rukabica…twarabihanangirije kuva kera, turaza kubihangiriza n'ubu.

Umukuru w'Igihugu yavuze ko u Bubuligi aribwo bumaze iminsi bushikariza ibihugu n'inzego zitandukanye ko zafatira u Rwanda ibihano.

Ati 'Ubu buracya twapfuye kuba ibihano? […] N'abariya bafite uruhare mu bibazo, nibo basaba ibihano? Wabaza uti ni iyihe mpamvu y'ibi bihano? Bati ntabwo tubizi ariko u Bubiligi bwatubwiye ngo dufate ibihano'.

Minisitiri w'Ububanyi n'Amahanga n'Ubutwererane, Ambasaderi Olivier Nduhungirehe, mu kiganiro yagiranye na IGIHE muri Gashyantare 2025 yasobanuye ko mu nzego u Bubiligi bwashyizeho igitutu kugira ngo zifatire u Rwanda ibihano harimo Banki y'Isi n'umuryango w'Ubumwe bw'Uburayi (EU).

Ati 'Ni ibigo byinshi. Banki y'Isi, Umuryango w'Ubumwe bw'Uburayi,…Ni henshi, ntaho batajya, bajya mu nzego zose zitanga amafaranga.'

Perezida Kagame yavuze ko u Bubiligi bwahereye kera bubangamira u Rwanda, kugeza n'aho bwanze Ambasaderi warwo, Vincent Karega, bishingiye ku kuba ngo ataritwaye neza mu bibazo bya RDC.

Ati ' Baduhereye kera, na mbere y'iyi ntambara cyangwa igitangira, ndetse tukabiyama, tukabirengagiza, tukareba hirya, barabanza banga Ambasaderi wacu twaboherereje ngo ntibamushaka, ngo hari ukuntu atakoreye neza Congo…ariko tukababaza tuti muri bande, mwadushinzwe na nde? Abanyarwanda ko mwemera Imana, Imana koko yashinze u Rwanda aba abantu? Turaza kubibibutsa neza mpaka.'

Nyuma y'uyu mwanzuro w'u Rwanda, Minisitiri w'Ububanyi n'Amahanga w'u Bubiligi, Maxime Prevot, yatangaje ko igihugu cye nacyo kiza gusubiza, ashinja u Rwanda kutayoboka inzira y'ibiganiro mu gihe hari ibyo impande zombi zitumvikanaho.

Yavuze ko u Bubiligi nabwo buza kwirukana Abadipolomate bose b'u Rwanda.

Ambasade y’u Bubiligi mu Rwanda iherereye mu Mujyi wa Kigali rwagati imbere ya Kigali Marriott Hotel

U Bubiligi bumaze iminsi busaba inzego zitandukanye zirimo Banki y’Isi guhagarikira inkunga u Rwanda

U Rwanda rwashinje u Bubiligi kurubangamira no gukwirakwiza ibihuha bigamije kuruhungabanya

Amafoto: Kwizera Herve

---

Source : http://igihe.com/amakuru/u-rwanda/article/u-rwanda-rwaciye-umubano-n-u-bubiligi-runirukana-abadipolomate-babwo

Umuhanzikazi Camila Cabello akomeje kwerekana ibyishimo mu rukundo rwe n'umunyemari Henry Junior Chalhoub. Mu mpera z'icyumweru gishize, aba bombi bagaragaye bari kumwe i Rome mu Butaliyani, aho bari mu biruhuko byuje urukundo n'ibyishimo.

Mu mafoto yafashwe, aba bombi bagaragaye bari gusomana ndetse andi mafoto yagaragaje uburyo bari bari kugendana urukumbuzi, bakikiranze amaboko, ibintu byakomeje gutuma abakunzi babo bavuga ko urukundo rwabo rurushaho kuba rukomeye.

Uru rugendo rwabo ruje nyuma y'uko bari bamaze iminsi i Paris mu Bufaransa, aho bitabiriye Paris Fashion Week ku wa 13 Werurwe 2025. Camila Cabello, w'imyaka 28, na Henry Junior Chalhoub, umunyemari ukomoka muri Libani w'imyaka 39, bamaze igihe bagaragara bari kumwe, by'umwihariko kuva mu mpeshyi ya 2024.

Muri Mutarama 2025, aba bombi bongeye kugaragara bari mu kiruhuko ku kirwa cya St. Barts, aho bagaragaje urukundo rudasanzwe mu mafoto menshi yakwirakwijwe ku mbuga nkoranyambaga.

Camila Cabello yagiye mu rukundo na Henry nyuma y'igihe gito atandukanye na Shawn Mendes, umuhanzi bakundanaga kuva mu 2019.

Urukundo rwa Camila na Shawn rwari rwakunzwe na benshi, dore ko bombi bakoranye indirimbo yitwa 'Señorita', yatumye bakundwa n'abatari bake ku isi.

Nyamara, muri 2021 baratandukanye, gusa nyuma bongeye kwiyunga. Icyakora, mu 2023 byarangiye batandukanye burundu, ibintu byababaje abakunzi babo.

Ubu rero, Camila Cabello n'umukunzi we mushya bakomeje kuryoherwa n'urukundo rwabo, aho bakomeje kwerekana ko bishimanye mu buryo butangaje.

Ku mbuga nkoranyambaga, abafana babo bagenda batanga ibitekerezo bitandukanye, bamwe bishimira ko Camila yishimye, mu gihe abandi bagaragaza ko bakunze cyane uburyo asigaye asa nk'uwisanzuye.

Nubwo Camila Cabello atigeze atangaza byinshi ku mubano we na Henry, imyitwarire yabo igaragaza ko urukundo rwabo rukomeye kandi rurushaho gukura umunsi ku wundi.

Ibinyamakuru mpuzamahanga bikurikirana ubuzima bw'aba bombi bikomeje gutangaza ko bashobora kuba bafite imigambi ikomeye yo gukomeza urukundo rwabo mu bihe biri imbere.

Ese uru rukundo ruzamara igihe kirekire? Ibyo ni ibisigaye imbere. Ariko ikigaragara ni uko Camila Cabello ari mu bihe byiza cyane by'urukundo, aho ari kuryoherwa n'ubuzima hamwe n'umukunzi we mushya Henry Junior Chalhoub.

Source : https://kasukumedia.com/camila-cabello-akomeje-kuryoherwa-nurukundo-numunyemari-henry-junior-chalhoub/

Abayobozi n'abashinzwe kurengera ibidukikije muri Zambia bahangayikishijwe n'ingaruka zikomeye zituruka ku isuka rya acide ryabereye mu kirombe cy'Abashinwa, ryanduje uruzi runini kandi rikaba rishobora kugira ingaruka ku baturage babarirwa muri za miliyoni. Ibi bibaye nyuma y'uko hagaragaye ibimenyetso by'umwanda mu ntera ya kilometero 60 munsi y'uruzi.

Abashakashatsi bo mu kigo cy'ubwubatsi cya Zambia batangaje ko iryo suka ryabaye ku ya 18 Gashyantare, ubwo urugomero rufite imyanda ya acide iva mu birombe by'umuringa byo mu majyaruguru y'igihugu rwagwaga.

Ibi byatumye imyanda igera kuri miliyoni 50 yisuka mu mugezi uhuza uruzi rwa Kafue, inzira y'amazi y'ingenzi muri Zambia. Iyo myanda irimo aside yibanze, ibishishwa byashongeshejwe hamwe n'ibyuma biremereye.

Uharanira ibidukikije, Chilekwa Mumba, yavuze ati: 'Iyi ni impanuka y'ibidukikije ikomeye cyane. Sino Metals yanduje uruzi rutunze abantu babarirwa muri za miliyoni.' Yongeyeho ati: 'Imibereho y'abaturage yahungabanye bikomeye. Ubutaka bw'abahinzi buranduye, mu gihe hasigaye amezi abiri ngo basarure. Byose byangiritse.'

Amashusho yafashwe nyuma y'ibi biza yagaragaje ibirundo by'amafi yapfuye ku nkombe z'umugezi, ndetse n'imirima y'ibigori yangiritse.

Umuturage witwa Sean Cornileus yagize ati: 'Mbere ya 18 Gashyantare, uru rwari uruzi rukomeye kandi rutunze abantu. Ubu rwabaye nk'umugezi wapfuye.'

Minisiteri y'uburobyi n'ubworozi yasabye abaturage kwirinda kurya amafi yavuye mu ruzi rwa Kafue n'indi migezi yanduye.

Umuhinzi Juliet Bulaya yavuze ati: 'Nyuma y'aho urugomero rumenetse, nabonye imyanda itemba mu cyuzi cy'amafi, maze amafi yose arapfa. Narahagaze ndababara, nibaza uko nzishyura amafaranga nashoye muri uwo mushinga.'

Nubwo urukuta rw'urugomero rwakosowe ku ya 19 Gashyantare 2025, ingaruka z'iyi mpanuka ku mibereho y'abaturage, ku bukungu ndetse no ku bidukikije ntiziramenyekana neza.

Source : https://kasukumedia.com/ubwoba-mu-bayobozi-ba-zambia-nyuma-yimpanuka-yisuka-rya-acide-yanduje-uruzi-rwa-kafue/

Aya makuru yemejwe n'Umuvugizi wa Perezida Félix Tshisekedi wa RDC, Tina Salama, ubwo yaganiraga na Reuters ku wa 16 Werurwe 2025.

Salama yasobanuye ko atahita atangaza abazahagararira Leta ya RDC muri ibi biganiro, ati 'Kugeza ubu, ntabwo twavuga abagize itsinda.'

M23 yemeje ko yakiriye ubutumire bwa Angola, bwaturutse kuri Minisitiri w'Ububanyi n'Amahanga, Ambasaderi Tete Antonio. Yagaragaje ko yiteguye kwitabira ibiganiro by'amahoro.

Tariki ya 11 Werurwe ni bwo Perezida João Lourenço wa Angola yafashe icyemezo cyo gutangiza ibi biganiro by'amahoro, nyuma yo kwakira Tshisekedi i Luanda.

Ibiro bya Perezida wa Angola byatangaje ko ibi biganiro bitaziguye bizatangira tariki ya 18 Werurwe 2025, nyuma y'igihe kinini Leta ya RDC ivuga ko itazaganira na M23.

Tina Salama yemeje ko Leta ya RDC izitabira ibiganiro byayo na M23

Perezida wa Angola yafashe icyemezo cyo gutangiza ibi biganiro nyuma y’uruzinduko Tshisekedi yagiriye i Luanda

---

Source : http://igihe.com/amakuru/u-rwanda/article/leta-ya-rdc-yemeje-ko-izitabira-ibiganiro-byayo-na-m23

Ku munsi w'ejo Perezida Kagame yagiranye ikiganiro n'abaturage b'Umugi wa Kigali agaruka ku ngingo zitandukanye harimo kwihanangiriza igihugu cy'Ububiligi muri gahunda yacyo yo gushakishiriza ibindi bihugu mu gufatira u Rwanda ibihano kandi Ububiligi ari nyirabayazana w'ibibazo u Rwanda runyuramo guhera igihe cy'ubukoloni.

Perezida Paul Kagame yatangaje ko u Bubiligi bwajujubije u Rwanda kuva mu myaka myinshi ishize, bwica Abanyarwanda ariko inzira yo kwiyubaka n'imbaraga zakoreshejwe mu guharanira iterambere ry'igihugu bigaragaza ko abantu badakeneye kuba Ababiligi cyangwa kwisanisha na bo.

U Bubiligi bwakolonije u Rwanda nyuma y'u Budage bwari bumaze gutsindwa intambara ya mbere y'Isi, kuva ubwo butangiza politiki y'ivangura n'urwango yagejeje kuri Jenoside yakorewe Abatutsi mu 1994.

Perezida Kagame aganira n'abaturage b'Umujyi wa Kigali ku wa 16 Werurwe 2025, yavuze ko ibyago igihugu cyagize ari ukuba mu bukoloni bw'agahugu gato cyane karangiza kakagicamo ibice.

Ati 'Ibyago bimwe dufite ni ukuba twarakolonijwe n'agahugu gato nk'u Rwanda. Ndetse ako gahugu kagatema u Rwanda kakarucamo ibice kugira ngo rungane nka ko. Ubwo ni u Bubiligi mvuga kandi ndaza kubwihanangiriza.'

Yakomeje ati 'U Bubiligi bwishe u Rwanda bukica Abanyarwanda, amateka arenze imyaka 30 bukajya butugarukaho, abasigaye bukongera bukabica, twarabihanangirije kuva kera, turaza kubihanangiriza n'ubu ngubu.'

Ku wa 14 Gicurasi 1910, hateranye inama mu Bubiligi, igamije gukemura ikibazo cyari kimaze igihe cy'Ababiligi bashakaga kongera ubutaka bw'aho bahawe. Iyo nama yari irimo Ababiligi bakolonizaga Congo, Abadage bakolonizaga u Rwanda, Urundi na Tanganyika ndetse na Uganda na Kenya byakolonizwaga n'Abongereza.

Nyuma y'iyo nama ni bwo guhera mu 1910 kugeza mu 1912, bashyizeho imipaka igabanya u Rwanda n'ibindi bihugu by'ibituranyi, icyo gihe bitwaje icyo bise imbibi karemano zirimo Ibirunga, Akanyaru, Akagera n'Ikiyaga cya Kivu, bakatakata ubutaka bw'u Rwanda busigara ari buto cyane ugereranyije n'uko bwahoze.

Perezida Kagame yagaragaje ko abaturage b'u Rwanda bajyanywe muri ibyo bihugu atari u Rwanda rwaboherejeyo, byagizwemo uruhare n'abakoloni.

Ati 'Kugira ngo rero aho bisanze muri ibyo bihugu babwire abantu ngo nimuhaguruke musubire aho mukwiriye kuba muri mu Rwanda, niba ushaka kubikora birukanane n'ubutaka bwabo. Ariko niba ukoresha ukuri cyangwa ushaka amahoro ugomba guha abantu uburenganzira bwabo. Iyo udahaye abantu uburenganzira bwabo baraburwanira.'

Perezida Kagame yavuze ko u Bubiligi bwafashe uruhande mu bibazo by'akarere nyamara ari bwo bwabiteje, bugashinja u Rwanda kuba ikibazo nyamara bubeshya.

Ati 'U Bubiligi bwakolonije ibyo bihugu bitatu [RDC, u Rwanda n'u Burundi] bakagenda bakajya i Kinshasa bagatunga urutoki u Rwanda, bakavuga ko baza kurufatira ibihano kandi bagiye kubwira Isi yose kubikora ku Rwanda. Ariko se wowe nta soni ugira? Guhamagarira Isi yose guteranira ku Rwanda koko, uko rungana?'

Yongeyeho ati 'Twebwe uko twicaye aha tugateranirwaho n'Isi yose? Ibyo ntibikwiriye kuba bitera isoni abantu bamwe? Baturetse ko twirwaziza dushaka kubaho uko dushaka kubaho, baduhaye amahoro! Tugiye kuzira ko tungana na bo ariko ko bo bafite ahandi bavugira haturuta?'

The post Umurage mubi w'Ububiligi ku Rwanda wagarutsweho na Perezida Kagame appeared first on RUSHYASHYA.

Source : https://rushyashya.net/umurage-mubi-wububiligi-ku-rwanda-wagarutsweho-na-perezida-kagame/?utm_source=rss&utm_medium=rss&utm_campaign=umurage-mubi-wububiligi-ku-rwanda-wagarutsweho-na-perezida-kagame

Umulisa yabwiye InyaRwanda ko ibirori byo kwambikwa impeta byabaye mu ijoro ryo kuri iki Cyumweru tariki 17 Werurwe 2025, bibera mu Mujyi wa Warsaw aho asanzwe abarizwa, anakorera ibikorwa bye bijyanye no kumurika imideli. 

Uyu mukobwa yavuze ko umwaka ushize ari mu rukundo n'uyu musore, kandi afite byinshi yamukundiye byagejeje ku kwiyemeza kwitegura kubana nk'umugabo n'umugore.

Yavuze ko nyuma yo kwambikwa impeta batangiye kuganira ibijyanye n'ubukwe. Ati 'Gahunda y'ubukwe ni mu gihe cya vuba ariko ntabwo turemeza amatariki. '

Mu butumwa yanyujije ku rubuga rwa Instagram, Umulisa yagaragaje ko kuva ku munsi wa mbere ahura n'uyu musore yabonaga ko ari we 'uzatuma mba umukobwa wa mbere wishimye kuri iyi si. Ndagukunda cyane Chris. Nambitswe impeta.'

Muri Kamena 2022, uyu mukobwa yari ku rutonde rw'abandi bari baserukiye ibihugu byabo muri Miss Supranational International 2022, ariko yaje kwigumura ku munota wa nyuma, ni nyuma y'uko Minisiteri y'Urubyiruko n'Iterambere ry'Ubuhanzi yari imaze gutangaza ko yahagaritse irushanwa rya Miss Rwanda n'ibindi bikorwa bifitanye isano n'amarushanwa y'ubwiza.

Irushanwa ryagombaga kubera muri Poland. Icyo gihe Umulisa yanditse ku rubuga rwa Instagram agira ati 'Ni ukubera ko igihugu cyacu cyafashe umwanzuro wo kuba gihagaritse ibikorwa byose by'amarushanwa y'ubwiza imbere mu gihugu ndetse no kugihagararira.'

Mbere y'iri rushanwa, uyu mukobwa yari yahatanye mu irushanwa rya Miss Warsaw, ndetse yabashije kuboneka mu icumbi ba mbere bavuyemo uwegukanye ikamba.

Umulisa ni Murumuna wa Uwase Clementine wamamaye nka Tina wahagarariye u Rwanda muri Miss Supranational mu 2018 na Miss Elite mu 2020. 

Umulisa yatangaje ko yambitswe impeta n'umusore witwa Chris wo muri Poland 

Umulisa yavuze ko umwaka ushize ari mu rukundo n'uyu musore byagejeje ku kwiyemeza kubana 

Umulisa yavuze ko we na Chris bari kwitegura ubukwe ariko ko bataremeza amatariki

Source : https://inyarwanda.com/inkuru/153538/umulisa-waserukiye-u-rwanda-muri-miss-supranational-international-yambitswe-impeta-yurukun-153538.html

Mu ijoro ryo kuri uyu wa 16 Werurwe 2025, ahagana ku i saa 22h30, mu Mudugudu wa Ryabitana, Akagari ka Gihinga, Umurenge wa Gacurabwenge ho mu karere ka Kamonyi ahazwi nko Mugihigi inyuma y'Akarere, abagizi ba nabi bateze uwitwa Nsengimana Jean Baptiste w'imyaka 45 y'amavuko bamukubita icyuma mu mutwe(Fer a Beton), apfa agejejwe ku kigo nderabuzima cya Kamonyi.

Amakuru abaturage bahaye intyoza.com mu ijoro nyuma y'ubu bugome, bavuga ko ubwo uyu mugabo yari atashye ahagana ku i saa tatu n'igice(21h30), aba bagizi ba nabi bamukurikiye bari ku igare, ajya muri Butike guhaha mu gusohoka arimo yerekeza iwe baramwitambika, bamukubita icyuma(Fer a Beton) mu mutwe, bamuta munsi y'umukingo, bamutwara ibyo bamusanganye uretse Kontaki y'imodoka batajyanye yaje gushyikirizwa Mudugudu nawe akayiha Komanda wa Polisi.

Ku makuru abaturage bahaye umunyamakuru wa intyoza.com ni uko uyu Nyakwigendera yari umushoferi wikorera utwara abagenzi i Kigali. Asize abana batatu n'umugore babanaga.

Umuvugizi wa Polisi y'u Rwanda mu Ntara y'Amajyepfo, SP Emmanuel Habiyaremye yemereye intyoza.com ko aya makuru y'iyicwa rya Nsengimana Jean Baptiste ari ukuri. Ati' NSENGIMANA Jean w'imyaka 45 yakubiswe arakomeretswa biza kumuviramo urupfu ubwo yari agejejwe ku kigo nderabuzima cya Kamonyi. Nyuma umurambo wajyanywe ku bitaro bya Rukoma gusuzumwa'.

Akomeza avuga ko Polisi y'u Rwanda ikorera mu Karere ka Kamonyi yafashe abantu batatu barimo abasore 2 n'umudamu umwe bakaba bafungiye kuri Sitasiyo ya Polisi ya Gacurabwenge mu gihe iperereza ryatangiye.

Amwe mu makuru intyoza.com yamenye ni uko mu bakekwaho kwica uyu mugabo, hahise hafatwa uwitwa Twizeyimana Jean Bosco w'imyaka 23 y'amavuko, mu gihe uwo bari kumwe witwa Uzabakiriho Muhozi bakunze kwita Pissu w'imyaka 24 y'amavuko yahise atoroka bakimara kumwica.

Mu bafashwe kandi, amakuru agera ku intyoza.com ni uko harimo umugore bivugwa ko ari umucuruzi w'ibiyobyabwenge(Urumogi) ari nawe ngo uzi cyane aba bagizi ba nabi cyane ko iwe ariho bakundaga kujya gushaka urumogi.

Umuvugizi wa Polisi y'u Rwanda mu Ntara y'Amajyepfo, SP Emmanuel Habiyaremye avuga ko Polisi y'u Rwanda yibutsa buri wese ko nta muntu n'umwe uzavutsa undi ubuzima ngo bimugwe amahoro kuko ku bufatanye bwa Polisi n'abaturage bazahiga uwo ariwe wese ukekwa agashyikirizwa amategeko agakora akazi kayo. Asaba kandi buri wese kumva ko ubufatanye mu gukumira no kurwanya ibyaha bimureba, ko kandi nta bwihisho na bumwe ku banyabyaha kuko nta nahamwe Polisi itagera.
intyoza.com

 

Source : https://www.intyoza.com/2025/03/17/kamonyi-gacurabwenge-abagizi-ba-nabi-bateze-umugabo-atashye-baramwica/