Category: Uncategorized

Kuri uyu wa Kabiri ni bwo Perezida Paul Kagame yoboye Inama y'Abaminisitiri yateraniye muri Village Urugwiro.

‎‎Nk’uko bigaragara mu myanzuro y’iyi Nama y’Abaminisitiri, Col Pacifique Kayigamba Kabanda yagizwe Umunyamabanga Mukuru w'Urwego rw'Ubugenzacyaha (RIB).

‎‎Yasimbuye (Rtd) Jeannot Kibezi Ruhunga wari waragiye kuri uyu mwanya muri 2018 ubwo Perezida Kagame yashyiragaho abayobozi b'Urwego rw'Igihugu rw'Ubugenzacyaha (Rwanda Investigation Bureau -RIB).

‎Col Pacifique Kabanda yari asanzwe ari Umushinjacyaha Mukuru wa Gisirikare, umwanya yashyizweho muri Gicurasi 2024, mu mpinduka Perezida Kagame akaba n'Umugaba w'Ikirenga w'Ingabo z'u Rwanda yakoze mu nzego zitandukanye za gisirikare.

‎‎Mu bindi byemejwe muri iyi nama y’Abaminisitiri harimo ibijyanye na gahunda yo guteza imbere inganda, kunoza imitangire ya serivisi no guhanga ibishya hagamijwe kwihutisha iterambere ry'Igihugu, harimo ishyirwaho ry'ikigega cyo gushyigikira urwego rw'abikorera (PSSF) hagamijwe gufasha inganda zitunganya ibicuruzwa n'ubucukuzi bw'amabuye y'agaciro.

Col Pacifique Kayigamba Kabanda yagizwe umuyobozi wa RIB

Imyanzuro y’Inama y’Abaminisitiri yateranye kuri uyu wa Kabiri 

Hemejwe ko serivisi z'irangamimerere zegerezwa abaturage ku buryo bazibona ku mavuriro abegereye no mu nzego z'ibanze.

Inama y'Abaminisitiri yagaragarijwe ko site zo kwiyandikishirizaho zongerwa zavuye kuri 446 zigera ku 3220 harimo utugari, ibitaro na za ambasade z'u Rwanda mu mahanga.

Itangazo ryanyujijwe kuri X n'Ibiro bya Minisitiri w'Intebe rirakomeza riti 'Guhindura amazina bizajya bikorwa hifashishijwe ikoranabuhanga kandi byemezwe bitarenze iminsi 30.'

Inama y'Abaminisitiri yamenyeshejwe ibijyanye na gahunda ikomeje yo guteza imbere inganda, guhanga imirimo no guteza imbere ubukungu.

Mu nzego z'ingenzi zizashimangirwa mu guteza imbere inganda harimo urwo gutunganya ibikomoka ku buhinzi n'ubworozi, gutunganya impu, gukora imyenda n'ubwubatsi hagamijwe guteza imbere ibitunganyirizwa mu nganda.

Harimo kandi kureshya ishoramari ry'abikorera, guhanga imirimo no kongera ibyoherezwa mu mahanga, gushyiraho ikigega cyo gushyigikira urwego rw'abikorera (PSSF) hagamijwe gufasha inganda zitunganya ibicuruzwa n'ubucukuzi bw'amabuye y'agaciro.

Inama y'Abaminisitiri kandi yamenyeshejwe ko mu byanya by'inganda bitandukanye biri mu gihugu hazongerwamo ibikorwaremezo by'ingenzi.

Urwego rw'inganda rukomeje gutezwa imbere. Nk'ubu Ikigo cy'Igihugu cy'Ibarurishamibare, NISR, giherutse gutangaza ko mu 2024, umusaruro mbumbe w'u Rwanda wari miliyari 18,785 Frw uvuye kuri miliyari 16.626 Frw mu 2023, aho urwego rw'inganda rwagize uruhare rwa 21% ku musaruro mbumbe w'igihugu, ruzamukaho 10%.

Ni mu gihe mu bijyanye na politiki y'igihugu y'isanzure igamije guhanga ibishya mu by'isanzure no kwihutisha iterambere ry'ubukungu bw'igihugu, hashyirwaho ibikorwa remezo bya satelite n'iby'isanzure mu rwego rwo guhindura u Rwanda igicumbi cy'iby'isanzure mu karere.

Iyi politiki kandi izatezwa imbere hifashishwa ikoranabuhanga mu by'isanzure mu guteza imbere ifatwa ry'ibyemezo rishingiye ku makuru yizewe mu nzego z'iterambere ry'ubukungu n'imibereho myiza.

Bizakorwa kandi hashimangirwa ubufatanye no guteza imbere ubumenyingiro mu rwego rwo kureshya ishoramari ry'abikorera n'ubumenyi bw'imbere mu Gihugu.

Ku makuru y'ingenzi mu burezi Inama y'Abaminisitiri yeretswe ko buri mwaka, Minisiteri y'Uburezi isuzuma intambwe imaze guterwa mu burezi hagamijwe kunononsora ibikwiye kwibandwaho no kunoza imyigire n'umusaruro uva mu burezi.

Mu bizakorwa muri uyu mwaka mu guteza imbere uburezi harimo gukomeza gushora imari mu kubaka amashuri, gukundisha abana ishuri no kongera ikoreshwa ry'ikoranabuhanga mu mashuri.

Itangazo ry'Ibiro bya Minisitiri w'Intebe rirakomeza riti 'Mu gihugu hose hakomeje gahunda yo gufasha abarimu kwiyungura ubumenyi mu rurimi rw'lcyongereza, ku buryo abarimu bose bazagera ku rwego mpuzamahanga mu bumenyi bw'ururimi bityo babashe kwigisha uko bikwiye.'

Mu guteza imbere uburezi kandi muri uyu mwaka hazashyirwaho gahunda yihariye yo kwigisha abanyeshuri bafite imyaka irengeje icyiciro cy'amashuri barimo ndetse n'urubyiruko rwataye ishuri.

Abo banyeshuri bazahabwa ubumenyi n'ubumenyingiro bw'ibanze mu myuga n'ikoranabuhanga bizabafasha mu kubona imirimo.

Kuri uyu wa 26 Werurwe 2025 Perezida Kagame yayoboye Inama y’Abaminisitiri yafatiwemo ibyemezo bitandukanye

Inama y’Abaminisitiri yabaye ku wa 26 Werurwe 2025 yitabiriwe n’abaminisitiri batandukanye

Byabereye mu Mudugudu wa Taba, Akagari ka Shangi, Umurenge wa Shangi ku wa 25 Werurwe 2025.

Nyiragasigwa yavuye iwe mu Mudugudu wa Busasamana, Akagari ka Shangi, Umurenge wa Shangi, mu masaha ya mu gitondo, ajya kuri SACCO gufata amafaranga y'izabukuru yari yarasabye muri Ejo Heza nk'umuntu urengeje imyaka 55, bayamuha undi arataha.

Mu nzira ataha yanyuze ku nshuti ye Mukamusengo Evelyne w'imyaka 85, ngo amugezeho iyi nkuru kuko Mukarusengo na we yari yarasabye aya mafaranga ariko we atarayabona.

Mu rugo kwa Mukamusengo hari icyobo cyahacukuwe gifata amazi ava ku mureko bakayakoresha mu mirimo irandukanye.

Nyiragasigwa yagezeyo anyura ahari icyo cyobo agwamo abanje umutwe, abari mu gikari ntibamenya ibyabaye bikomereza imirimo, aza kubonwa n'undi mugore wari uhinguye yapfuye.

Umukozi ushinzwe imari n'ubutegetsi, mu Murenge wa Shangi, Nsanzimana Jean Pierre wasigaye mu nshingano za gitifu, yabwiye IGIHE ko bakimenya aya makuru bajyanyeyo n'inzego z'umutekano, basanga koko ni byo, Nyiragasigwa yapfuye.

Ati 'Twihanganishije abaturage tunabasaba kujya bagira amakenga ku kintu cyose bakeka ko gishobora guteza impanuka'.

Icyobo mukecuru Nyiragasigwa Floride yaguyemo gifite metero 1 na santimetero 50.

Umukecuru w’imyaka 80 wo mu Karere ka Nyamasheke yaguye mu cyobo gifata amazi arapfa

Imibare igaragaza ko abandi 26 bakomeretse, 12 barembye, mu gihe abarenga 23.000 bamaze guhunga ingo zabo, n'aho hegitari 17.000 z'amashyamba zimaze gushya.

Ku wa 21 Werurwe 2025, nibwo inkongi yatangiriye mu Karere ka Sancheong, ikwirakwira mu bindi bice bya Gyeongbuk, Uiseong, Andong, Cheongsong na Yeongyang, kubera umuyaga ukaze ari n'awo ntandaro y'iyo nkongi.

Iyo nkongi imaze no gusenya urusengero rwa Gounsa rwari rumaze imyaka 1300 ariko ibikoresho bimwe na bimwe bibumbatiye amateka byakuwemo bijyanwa ahandi.

Minisitiri w'Intebe akaba na Perezida w'Agateganyo wa Koreya y'Epfo, Han Duck-soo,yavuze ko ari yo nkongi ikomeye yangiye byinshi mu mateka y'igihugu.

Abasirikare 5000 n'abashinzwe kuzimya inkongi boherejwe mu bice byibasiwe ngo batabare ariko umuyaga ukomeje kubangamira imirimo yo kuzimya umuriro nk'uko BBC yabitangaje.

Koreya y'Epfo imaze kugira inkongi 244 muri uyu mwaka, bikaba bikubye inshuro zirenga ebyiri ugereranyije n'umwaka ushije.

Abantu 24 ni bo bamaze guhitanwa n’inkongi yibasiye Koreya y’Epfo

Byabereye mu Mudugudu wa Gitwe, Akagari ka Gitwe Umurenge wa Karambi ku wa 25 Werurwe 2025.

Nteziryimana w'imyaka 25 yashakanye byemewe n'amategeko na Tuyizere Fortunée w'imyaka 27. Hari hashize amezi ane bagiranye amakimbirane, umugabo ajya i Kigali na ho umugore asubira iwabo.

Mu masaha ya mu gitondo cyo ku wa 25 Werurwe 2025 ni bwo abaturanyi babonye uyu mugabo ari gusambura inzu yubakanye n'umugore we.

Bamubonye amaze gukuraho amabati ayajyanye kuyagurisha mu isantere y'ubucuruzi ya Kamina, umugore we atabizi.

Umunyamabanga Nshingwabikorwa w'Umurenge wa Karambi, Karemera Innocent, yabwiye IGIHE ko aya makuru akimenyekana, inzego z'ibanze zifatanyije n'iz'umutekano bataye muri yombi uyu mugabo banamenyesha umugore we ikibazo cyabayeho.

Ati “Ubuyobozi bw'umudugudu n'abaturanyi baduhaye amakuru ko urwo rugo rwari rusanzwe rufitanye amakimbirane ashingiye ku micungire mibi y'umutungo”.

Muri rusange mu karere ka Nyamasheke, habarurwa ingo 637 zibanye mu makimbirane.

Icyakora ubushakashatsi bwakozwe n'Urwego rw'Igihugu rw'Imiyoborere RGB, bugaragaza ko ibibazo bikibangamiye umuryango Nyarwanda birimo amakimbirane yo mu ngo biri kugenda bigabanuka, bitewe ahanini n'ingamba zikomeje gushyirwamo imbaraga mu guharanira kubaka umuryango utekanye.

Bugaragaza ko amakimbirane yo mu ngo yari ku kigero cya 17% mu 2024, avuye kuri 22%, yariho mu 2023 mu gihe mu mwaka wari wabanje yari kuri 18,6%.

Ibiro by’Akarere ka Nyamasheke

Ibyo bibaye nyuma y'uko mu mirenge ya Nyakabanda, Mageragere, Rwezamenyo na Gitega yo mu Mujyi wa Kigali hajyaga humvikana ubugizi bwa nabi burimo kwiba abaturage no kubakorera urundi rugomo.

Mu ijoro ryo ku wa 24 rishyira ku wa 25 Werurwe 2025 Polisi yataye muri yombi abantu umunani bo mu Murenge wa Nyakabanda, aho bikekwa ko bibaga abantu babashikuje ibyo bafite hashingiwe ku makuru yatanzwe n'abaturage.

Muri iryo joro kandi hatawe muri yombi abandi bantu bane bafatiwe mu cyuho mu Murenge wa Mageragera ubwo bari bamaze kwiba imashini y'umuturage izwi nk'ikiryabarezi.

Abo bajura bari baracurishije imfunguzo binjira mu nzu y'umuturage bakuramo iyo mashini ariko Polisi ibata muri yombi bakiri kuyigurisha.

Umuvugizi wa Polisi mu Mujyi wa Kigali, CIP Gahonzire Wellars yabwiye IGIHE ko abandi bajura bane batawe muri yombi mu ijoro ryo ku wa 25 Werurwe ubwo bari bamaze kwambura abantu telefone no kubatera ibyuma.

Yagize ati 'Bari bamaze gushikuza abakobwa babiri telefone ebyiri i Nyakabanda, iruhande rwa 'Green Corner', bamaze no gutera ibyuma abagabo babiri bari bagerageje gutabara abo bakobwa. Twabafatanye n'ibyuma bakoreshaga ndetse umwe muri abo bakomerekejwe yajyanywe mu Bitaro bya Kibagabaga.'

Muri telefoni bari bibye imwe ni iyo mu bwoko bwa iPhone indi ari Tecno.

CIP Gahonzire yavuze ko abo bajura bane bari basazwe bakora urwo rugomo ariko bagacika kuko Polisi yari isanzwe ibafiteho amakuru.

CIP Gahonzire yihanangirije abakora ibikorwa nk'ibyo ariko anasaba abantu muri rusange kwirinda urugomo ahubwo bagakora ibibateza imbere, cyane ko abafashwe bakiri urubyiruko kuko bari hagati y'imyaka 18 na 30.

Yahumurije abaturage bahungabanyirizwaga umutekano n'abo bagizi ba nabi ndetse abasaba gukomeza gutanga amakuru, yizeza ko Polisi itazajenjekera buri wese ubangamira ituze ry'abaturage.

Bimwe mu byuma byafatanywe abo bajura

Ibi ni byo byagarutsweho mu bugenzuzi bwakozwe na RSB mu Karere ka Karongi kuri uyu wa Gatatu tariki 26 Werurwe 2025, aho basuye sitasiyo icuruza lisansi na gaze, bareba niba iminzani ikoreshwa yubahiriza ibipimo byemewe.  

Kabalisa Placide, umukozi mu ishami rishinzwe ingero n'ibipimo muri RSB, yasobanuye ko mu bugenzuzi bakora, bareba niba iminzani ikoreshwa mu bucuruzi bunyuranye ikora neza kandi yujuje ubuziranenge. Iyo basanze umunzani ufite ibipimo nyabyo, bawushyiraho ikirango cya RSB kibyemeza, bityo bigaha icyizere abaguzi ko ibyo baguze byuzuye.  

Yagize ati: 'Tubagenzura mu kwezi kwa Mutarama tukongera mu kwa Nyakanga, ni ukuvuga nyuma y'amezi atandatu. Iyo umuntu acuruje atagira kiriya kirango, ahanishwa amande ari hagati ya 500,000 Frw na 2,000,000 Frw nk’uko amategeko abiteganya.'

Murinzi Céléstin, uyobora sitasiyo ya Kobil i Karongi, yavuze ko kugira ngo abakiriya babeho batekanye, bereka buri mukiriya ko bafite icyemezo cya RSB, ndetse bakabanza gupima gaze cyangwa lisansi mbere yo kuyigurisha.

 Ati: 'Ntabwo bikunze kubaho ko abakiriya banenga gaze yacu, kuko mbere yo kuyibaha turayipima tukabereka ibiro nyabyo.'

Irizerwa Emmanueline, Umuyobozi mu Ishami Rishinzwe Ibipimo n'Ingero muri RSB, yasobanuye ko kudakurikiza ibipimo byemewe bishobora guteza ibibazo bikomeye, harimo no guturika kw'amacupa ya gaze kubera uburemere burenze ubwo icupa ryemerewe gupakira.  

Ati: 'Tuba tugira ngo niba usabye ibilo 15 uhabwe ibilo 15, niba usabye ibilo 20 uhabwe ibilo 20. Kubera ko Gaz ari ikintu gikoreshwa cyane mu ngo z’Abanyarwanda, tubikora kugira ngo dufashe muri ubwo bucuruzi.'

Muri gahunda yo gukumira ayo makosa, RSB isaba abaguzi gusuzuma neza ko Gaz baguze yujuje ibiro basabye, bakareba niba umunzani ukoreshwa ufite ikirango cya RSB.

Irizerwa yongeyeho ati: 'Iyo umuturage abonye ibiro bidahuye n'ibyo yishyuye, yemerewe kwanga iyo Gaz no kubimenyesha RSB.'

Murinzi Céléstin yavuze ko mbere yo kugura Gaz, abaguzi bashishikarizwa kuyipimisha kugira ngo hatabaho impaka nyuma. Ati: 'Uje gutwara Gaz turayimupimira. N'iyo atabisabye natwe ubwacu turabikora, kugira ngo adashidikanya ku byo aguze.'

RSB isaba abacuruzi gukoresha iminzani yujuje ubuziranenge

Kabalisa Placide yavuze ko umucuruzi wese ucuruza Gaz agomba kugira umunzani wagenzuwe na RSB, kandi ukagira ikirango cy'ubuziranenge. Iyo umuguzi asanze Gaz ye itujuje ibipimo byanditseho, yemerewe kwanga kuyitwara no kubimenyesha RSB.  

Ni mu gihe Abaturarwanda bose basabwa kwita ku bipimo n’ingero mu bikorwa byabo bya buri munsi, byaba iby’ubucuruzi, inganda, ubuhinzi, ubworozi n’ibindi, bazirikana kureba niba ibipimo byuzuye mu rwego rwo kurema icyizere mu baguzi.

Abaguzi bashobora gutanga ibitekerezo cyangwa ibirego ku bucuruzi budakurikiza ibipimo byemewe binyuze ku murongo utishyurwa wa RSB wa 3250 cyangwa ku mbuga nkoranyambaga zemewe z'iki kigo.  

RSB yibutsa ko ikirango cyayo ku munzani kimara umwaka umwe, bityo abacuruzi bagomba kugenzurirwa buri mwaka kugira ngo bakomeze gutanga serivisi zizewe kandi zifitiwe icyizere.  

Iki gikorwa cy’ubukangurambaga gikomereje mu turere dutandukanye, aho RSB izakomeza gusura sitasiyo, ingand n'amasoko kugira ngo abaguzi bahabwe ibicuruzwa bifite ubuziranenge, birinde igihombo, ndetse hirindwe n’ibindi bibazo byose byaterwa n’ubucuruzi butanyuze mu mucyo.

RSB iri mu bukangurambaga bwo kurwanya iminzani idakora neza kuko iteza igihombo gikomeye umuguzi n’umucuruzi

Kabalisa Placide ukorera RSB, yatangaje ko buri mwaka hagenzurwa iminzani hagamijwe kureba niba igikora neza kandi yujuje ubuziranenge

Umuyobozi mu ishami rishinzwe ibipimo n’ingero muri RSB, Irizerwa Emmanueline yavuze ko kudakurikiza ibipimo byemewe mu bucuruzi bishobora guteza ibindi bibazo bikomeye 

Amategeko avuga ko umucuruzi ufashwe akoresha umunzani utagira ikirango cya RSB ahanishwa amande ari hagati y’ibihumbi 500Frw na miliyoni 2Frw

“Protocol” ni uburyo cyangwa sisiteme y’amahame asobanutse agenga imyitwarire, imikoranire n’imyiteguro mu gihe cy’ibikorwa bitandukanye yaba inama, ubukwe, amateraniro, igitaramo n’ibindi. Ni mu rwego rwo gukurikirana neza gahunda y’ibikorwa no kubaha/kwakira neza abanyacyubahiro, abakuru cyangwa abashyitsi mu buryo bwihariye.

Buri muntu wese utegura igikorwa runaka, akenera itsinda rikora Protocol mu buryo bw’umwuga mu kwirinda akajagari. Protocol nziza igira uruhare runini mu migendekere myiza y’ibikorwa n’ibirori bitandukanye, akaba ari yo mpamvu abategura ibitaramo, inama n’ubukwe, bashishoza cyane mu guhitamo abanyamwuga mu kwakira neza abantu (Protocol).

Ntuvunike ushakisha abagufasha muri Protocol mu bikorwa uri gutegura kuko nkuzaniye amakuru utigeze wumvisha amatwi yawe y’abanyamwuga byahamye bazatuma ibirori byawe byirahirwa na buri wese. Uti ‘abo ni ni bande’?. Ni “Ihirwe Services & Protocol”, kompanyi nshya mu bya Protocol yiyemeje kuvugutira umuti ibibazo byose biri mu buryo abantu bakırwa.

Ubudasa bwa Ihirwe Services & Protocol buruzuzanya n’ibyagarutsweho n’inzobere mpuzamahanga mu kwakira abantu, Diane Brown, wagiriye abantu inama ikomeye akabasaba guha agaciro cyane ibijyanye na Protocol. Nk’uko tubicyesha FIU College of Arts, Science and Education, yaragize ati: “Ntugashyireho gusa icyumba, shyiraho uburambe”.

Diane Brown yumvikanishije ko Protocol nziza atari umuhango wo gushyiraho ahantu runaka hari bukoranire abantu, ahubwo ubunyamwuga n’uburambe ni ingenzi mu kwakira neza abantu ibizwi nka Protocol. Hakenewe serivisi nziza mu kwakira abantu no kubakirana ubwuzu n’akanyamuneza nk’uko biri gukorwa na Ihirwe Services & Protocol iri kwirahirwa na benshi.

Nubwo mu Rwanda hari kompanyi nyinshi zikora ibijyanye na Protocol, hari impamvu nyinshi zo gukorana na Ihirwe Servies & Protocol yashinzwe na Sandra Amahirwe usobanukiwe neza ibijyanye no kwakira abantu dore ko amaze imyaka myinshi abyina mu Inganzo Ngari imaze kogoga amahanga bayaratira u Rwanda. Aho hose yaharahuye ubumenyi n’ubunararibonye muri Protocol.

Mu kiganiro na inyaRwanda, Sandra Amahirwe yavuze ko umwihariko wa Ihirwe Services & Protocol ari ugutanga serivisi nziza “zihumura”, gutanga akazi ku rubyiruko ruzakorana n’iyi kompanyi. Yavuze ko yayishinze mu ntangiriro za 2025 nyuma yo “kubona ibirori byinshi tubyinamo bikeneye Protocol kandi mu buryo bunoze”.

Uyu mukobwa usanzwe ari umushabitsi mu mwuga w’ubudozi, akaba afatwa nk’ishyiga ry’inyuma mu Inganzo Ngari, yakomoje ku mvugo ivuga ko “akanyoni katagurutse ntikamenya iyo bweze”, yitsa ku bijyanye na Protocol yarahuye mu Buhinde akubutsemo mu mezi macye ashize.

Umuyobozi Mukuru wa Ihirwe Services & Protocol, Sandra Amahirwe

CEO wa Ihirwe Services & Protocol, Amahirwe Sandra yavuze ko yasanze u Buhinde burusha u Rwanda “kwishimira abantu babagana – bagira ubwuzu cyane, kandi bakora ibishoboka ngo bakubonere ibyo wifuza vuba bishoboka”. Ati “Ntabwo wagenda batakubajije ikitagenze neza ngo bagikosore (bakunda feed-back), bakorera ku gihe”.

Icyakora n’ubwo bimeze gutyo hari ibyo yasanze barushwa n’u Rwanda. Ati “Ariko tubarusha isuku”. Ibyo yarahuye mu Buhinde, yiyemeje kubyinjiza mu Rwanda abinyujije muri kompanyi ye Ihirwe Services & Protocol, ubu bakaba bari kwakirana ubwuzu ababagana, kandi bakishimira kubwirwa ibitagenze neza kugira ngo bikosorwe.

Niba ufite inama, ubukwe, igitaramo n’ibindi birori binyuranye, ntuhangayike wibaza uburyo bizakorwamo ngo bigende neza utaba iciro ry’imigani, gana Ihirwe Services & Protocol, abanyamwuga bizewe mu bijyanye na Protocol. Bandikire kuri Instagram: @ihirwe_service_protocol cyangwa ubahamagare kuri telefone ariyo: +250787611095.

Sandra (ibumoso) hamwe na mugenzi we bakorana muri Ihirwe Services & Protocol

Ihirwe Services & Protocol yahize kwakira abantu neza byo ku rwego rwo hejuru

Ubunyamwuga n’uburambe ni byo Ihirwe Services & Protocol yubakiyeho

Sandra avuga ko urubyiruko rwinshi ruzabona akazi muri kompanyi ye ya Protocol

Ihirwe Services & Protocol ibarizwamo abakobwa b’uburanga n’abasore b’ubukaka

Sandra Amahirwe yamamaye mu Itorero Inganzo Ngari rimaze kubaka ibigwi mu Rwanda

U Rwanda binyunze mu Kigo cy'Igihugu gishinzwe Ubugenzuzi bw'Ubuziranenge, Ihiganwa mu Bucuruzi no Kurengera Umuguzi-RICA hategurwa ibikorwa bitandukanye mu kwizihiza uwo munsi mpuzamahanga bigendeye ku nsanganyamatsiko y'uwo munsi. 

Uyu mwaka, umunsi mpuzamahanga wahariwe kurengera umuguzi, uzizihizwa ku wa Gatanu tariki 28 Werurwe 2025, ku nsanganyamatsiko igira iti 'Uruhare rw'abaguzi mu kubungabunga ibidukikije'.

Iyi nsanganyamatsiko ijyanye n'icyerekezo cy'igihugu muri gahunda ya Guverinoma y'imyaka itanu iri mbere/NST2 ndetse n'icyerecyezo cya 2050, kigamije kuzamura imibereho myiza y'abaturage no kubahiriza ubuziranenge bw'ibidukikije.

Mu rwego rwo kwitegura uwo munsi, Ikigo cy'Igihugu gishinzwe Ubugenzuzi bw'Ubuziranenge, Ihiganwa mu Bucuruzi no Kurengera Umuguzi (RICA), ku bufatanye na Minisiteri y'Ubucuruzi n'Inganda (MINICOM), Ministeri y'Ubutegetsi bw'Igihugu (MINALOC), Minisiteri y'Ibidukikije (MoE), Ikigo cy'Igihugu gishinzwe kugenzura imirimo ifitiye igihugu akamaro (RURA), Banki Nkuru y'u Rwanda (BNR), Ikigo cy'Igihugu gishinzwe Ibidukikije (REMA), Ishyirahamwe ry'Ibigo ry'Imali iciriritse mu Rwanda (AMIR), Umuryango uharanira uburenganzira bw'Umuguzi mu Rwanda (ADECOR), Save Environment Initiative, We Do Green, na Rwanda Climate Change Development Network ( RCCD) bateguye kandi bashyira mubikorwa ibikorwa by'ubukangurambaga muri uku kwezi kwahariwe uburenganzira bw'umuguzi mu gihugu.

Mu gihe isi yose yizihiza uyu munsi ku itariki ya 15 Werurwe, u Rwanda rwemeje ko uku kwezi kose kwa Werurwe 2025 ari Ukwezi kwahariwe uburenganzira bw'Umuguzi aho ibikorwa bitandukanye biri gukorwa mu rwego rwo gukangurira abaguzi uburenganzira bwabo ndetse n'uruhare rwabo mu kubungabunga ibidukikije.

Ibi bijyanye n'icyerekezo u Rwanda rwihaye muri Vision 2050, gahunda ya Guverinoma y'igihe kirekire y'iterambere ry'u Rwanda, igamije kuzamura ubukungu ariko hanitawe ku kurengera ibidukikije.

Mu gihe insanganyamatsiko y'Umunsi Mpuzamahanga Wahariwe Uburenganzira bw'Umuguzi ishingiye ku gukangurira abaguzi kurengera ibidukikije birinda gukoresha ibikoresho byangiza ibidukikije (urugero: palasitike, amasashi, ndetse n'ibindi bikoresho cyangwa imyanda bitabora, ndetse n'ibicuruzwa bitujuje ubuziranenge nk'imiti ikoreshwa mu buhinzi kuko yangiza ubutaka).

U Rwanda rugamije gushishikariza abaguzi, abacuruzi, ibigo by'ubucuruzi, n'abafata ibyemezo gukomeza kugira uruhare mu kwimakaza uburyo bwo kugura no gukoresha ibikoresho bitangiza ibidukije kandi biramba.

Mu gukomeza guteza imbere uburyo bw'imibereho irambye, u Rwanda rushyigikiye ibikorwa by'iterambere ry'imari ibungabunga ibidukikije (Green finance), ubuhinzi burengera ibidukikije (eco-friendly agriculture), ndetse n'amategeko nka politiki yo guca palasitike ikoreshwa inshuro imwe, byose bigamije gushishikariza abaguzi n'abacuruzi kugira uruhare mu kurengera ibidukikije.

Ibikorwa biri gukorwa muri uku kwezi kwahariwe uburenganzira bw'umuguzi

Mu rwego rwo gushishikariza abaguzi kugira uruhare mu kurengera ibidukikije, muri uku kwezi hari gukorwa ibikorwa birimo: 

• Gukangurira abaguzi kugabanya ikoreshwa rya palasitike, ndetse n'ibikoresho byangiza ikirere, guhitamo ibikoresho bikoresha ingufu nke, gushyigikira ubucuruzi kurengera ibidukikije, no gusobanura amategeko arengera ibidukikije.

• Gukangurira ibigo by'ubucuruzi kwinjiza muri gahunda zabyo ubukangurambaga mu kurengera ibidukikije.

• Gukora ubukangurambaga mu itangazamakuru no mu baturage, gutanga imfashanyigisho zifashishwa mu gukwirakwiza ubutumwa.

• Gukora ibiganiro mu baturage hagamijwe kwigisha ku burenganzira bw'umuguzi no kurengera ibidukikije.   

• Gutegura irushanwa rya gatanu ry'inyandiko z'abanyeshuri (Student Essay Contest) rigamije gukomeza kuzamura ubumenyi mu banyeshuli kubijyanye n'uburenganzira bw'umuguzi.

Uruhare rw'abafatanyabikorwa mu kwezi kwahariwe uburenganzira bw'umuguzi:

Umuyobozi Nshingwabikorwa w'Ihuriro ry'Ibigo by'Imari Iciritse mu Rwanda (AMIR), Kwikiriza Jackson yavuze ko ubukangurambaga bw'uyu mwaka bwibanze ku burenganzira bw'abaguzi mu bijyanye n'imari, by'umwihariko mu buryo bwo kubona serivisi z'imari zitabangamira ibidukikije. 

Yagize ati 'Binyuze mu mushinga wa SERVE uterwa inkunga na MasterCard Foundation ugamije guhanga imirimo mu rubyiruko ruri mu bikorwa by'uruhererekane nyongeragaciro mu buhinzi bw'urusenda, inyanya, imiteja n'ubworozi bw'inkoko. Twafatanyije n'ibigo by'imari iciritse mu gukangurira abahinzi, aborozi n'abandi baturage ku burenganzira bwabo mu bijyanye na serivisi n'Imari, tunabashishikariza kumenya uko ubuhinzi n'ubworozi bujyana no kurengera ibidukikije.'

Uwamariya Claudine muri RICA, yagaragaje ko uburenganzira bw'umuguzi bushingiye ku Itegeko ryo mu 2012 rigenga ihiganwa mu bucuruzi no kurengera Umuguzi.

Yavuze ko uburenganzira bw'umuguzi burimo kubona amakuru yuzuye ku bicuruzwa, guhabwa ibicuruzwa byujuje ubuziranenge, guhabwa ibiro byuzuye kubicuruzwa aguze, kumenya ibiciro kuri buri gicuruzwa agiye kugura, guhabwa inyemezabuguzi, no guhabwa serivisi inoze.

Yagize ati 'Kurengera uburenganzira bw'umuguzi ntibigirira inyungu gusa abaguzi, ahubwo binagira uruhare mu iterambere rirambye binyuze mu kwimakaza ubucuruzi butabogamye, kugabanya ingaruka mbi ku bidukikije no guteza imbere ubukungu bw'igihe kirekire nkuko biteganywa muri gahunda ya guverinoma y'imyaka itanu iri imbere/NST2 ndetse n'icyerekezo cyirekire 2050.'

Uwamariya yavuze ko mu kwezi kwahariwe umuguzi, abacuruzi bakangurirwa inshingano zabo zo gukora ubucuruzi bwubahirije amategeko bubahiriza uburenganzira bw'umuguzi, ndetse birinda gucuruza ibicuruzwa bitujuje ubuziranenge kuko harimo ibyangiza ibidukikije birimo nko gucuruza amasashe atemewe. Abaguzi bazasobanurirwa uburenganzira bwabo ndetse bakangurirwe kwirinda kugura ibicuruzwa byangiza ibidukikije ndetse n'ibikoresho bapfunyikamo (Packing materials).

Yasoje agira ati 'Abaguzi bafite uruhare runini mu kurengera ibidukikije ari nayo mpamvu muri ubu bukangurambaga abaguzi bazakangurirwa uruhare rwabo mu kubungabunga ibidukikije.'

Umunyamabanga Nshingwabikorwa w'Umuryango ADECOR, Damien Ndizeye yavuze ko u Rwanda rushyira imbere ubukangurambaga bugamije gusobanurira abaguzi, ibigo by'ubucuruzi n'abafata ibyemezo uburyo bwo kugira imyitwarire iboneye irengera ibidukikije,

Yagize ati 'Ubusanzwe abantu batekereza ko kurengera ibidukikije ari inshingano za Leta n'inganda, nyamara buri muntu afite uruhare mu kugera kuri iyo ntego. Ubutumwa bw'uku kwezi buratwibutsa ko buri cyemezo dufata, n'iyo cyaba gito, gishobora kugira uruhare mu kurengera ibidukikije ku nyungu z'abazadukomokaho.'

Ubufatanye mu gushyira mu bikorwa ukwezi kwahariwe umugizi

Ibyo byose bizagerwaho binyuze mu bufatanye bw'inzego zitandukanye zirimo: Ikigo cy'Igihugu gishinzwe Ubugenzuzi bw'Ubuziranenge, Ihiganwa mu Bucuruzi no Kurengera Umuguzi (RICA), Minisiteri y'Ubucuruzi n'Inganda (MINICOM), Ministeri y'Ubutegetsi bw'Igihugu (MINALOC), Minisiteri y'Ibidukikije (MoE), Ikigo cy'Igihugu gishinzwe kugenzura imirimo ifitiye igihugu akamaro (RURA), Banki Nkuru y'u Rwanda (BNR), Ikigo cy'Igihugu gishinzwe Ibidukikije, Ishyirahamwe ry'Ibigo ry'Imali iciriritse mu Rwanda (AMIR), Umuryango uharanira uburenganzira bw'Umuguzi mu Rwanda (ADECOR), Save Environment Initiative, We Do Green, na Rwanda Climate Change Development Network ( RCCD).  

Uku kwezi kw'Uburenganzira bw'Umuguzi kwitezweho guha abantu ubumenyi n'ibikoresho byabafasha gufata ibyemezo biboneye, bikajyana n'icyerekezo cy'igihugu cyo kugera ku iterambere rirambye rishingiye ku kurengera ibidukikije.

Kugeza ubu mu Rwanda hari imiryango Nyarwanda ibiri iharanira uburenganzira bw'abaguzi, irimo Rwanda Consumer's Protection Organization (ADECOR) yatangiye mu 2018 na Africa Centre for Competition, Consumer Protection and Intellectual Property Policy (ACCIP Rwanda), ikigo cyibanda ku bushakashatsi ku burenganzira bw'abaguzi, ihiganwa mu bucuruzi ndetse n'umutungo bwite mu by'ubwenge cyatangiye mu 2019.

Umuguzi afite uburenganzira bukurikira:

Guhabwa amakuru yuzuye kugicuruzwa cg serivise;

Guhabwa igicuruzwa cyujuje ubuziranenge (urugero: kuba igicuruzwa

kitararangije igihe, Kuba igicuruzwa kitarangiritse, n'ibindi);

Kumuha ibicuruzwa byujuje ibipimo (ibiro bihwanye nibyo yaguze);

Kugenzura Imitere n'imikorere y'icyo ashaka kugura;

Kumutega amatwi;

Kumwereka ibiciro kuri buri gicuruzwa akeneye;

Guhabwa inyemezabuguzi;

Kwakirwa neza;

Umucuruzi afite inshingano zikurikira:

Kumanika Ibiciro by'ibicuruzwa n'ibya serivise aho bigaragarira Abaguzi bose;

Gucuruza ibyujuje ibipimo;

Gucuruza ibyujuje ubuziranenge;

Guha Umuguzi amakuru y'ukuri akeneye ku gicuruzwa ndetse na Serivise;

Kwita ku isuku y'ibicuruzwa n'iyaho ukorera;

Gutanga inyemezabwishyu yuzuye;

Uhereye ibumoso: Visi Meya Ushinzwe imibereho myiza mu Karere ka Nyabihu, Bwana Simpenzwe Pascal; Hakizimana Java wari uhagarariye Umuryango uharanira uburenganzira bw'Umuguzi mu Rwanda (ADECOR), Philipe Murangira, Umukozi ushinzwe ibijyanye no gucunga amahiganwa ku isoko muri RICA, Habyarimana wo mu Ikigo cy'Igihugu gishinzwe Ibidukikije, Ishyirahamwe ry'Ibigo ry'Imali iciriritse mu Rwanda (AMIR), ndetse na Emmanuel Nsengiyumva, Umukozi Ushinzwe Iterambere ry'umurimo mu Karere ka Nyabihu
U Rwanda ruzifatanya n'Isi yose muri rusange mu kwizihiza Umunsi Mpuzamahanga wahariwe kurengera uburenganzira bw'umuguzi
 

Uyu mwaka, umunsi mpuzamahanga wahariwe kurengera umuguzi, uzizihizwa ku wa Gatanu tariki 28 Werurwe 2025, ku nsanganyamatsiko igira iti 'Uruhare rw'abaguzi mu kubungabunga ibidukikije'

Mu rwego rwo gushishikariza abaguzi kugira uruhare mu kurengera ibidukikije, muri uku kwezi hari gukorwa ibikorwa binyuranye
Ubukangurambaga bw'uyu mwaka bwibanze ku burenganzira bw'abaguzi mu bijyanye n'imari, by'umwihariko mu buryo bwo kubona serivisi z'imari zitabangamira ibidukikije 

Uburenganzira bw'umuguzi bushingiye ku Itegeko ryo mu 2012 rigenga ihiganwa mu Bucuruzi no kurengera Umuguzi