Category: Uncategorized

Mbere yo kwishyura umusoro, iyi banki yungutse 43,1 Frw mu 2024, izamuka ryatewe n'ibikorwa by'iyi banki birimo guteza imbere ikoreshwa ry'ikoranabuhanga ndetse no kwegera abakiliya.

Iyi nyungu yagizwemo uruhare n'izamuka ry'inyungu yakwa ku nguzanyo iyi banki itanga, yazamutseho 23%, ikagera kuri miliyari 80,3 Frw.

Hagati aho, amafaranga abitswa n'abakiliya nayo yazamutseho 13% agera kuri miliyari 757,1 Frw. Ibi kandi byajyanye n'izamuka rya 8% ku nguzanyo iyi banki itanga, zageze kuri miliyari 620,6 Frw, ibigaragaza uruhare rw'iyi banki mu iterambere ry'u Rwanda.

Umuyobozi Mukuru wa BPR Bank Rwanda Plc, Patience Mutesi, yavuze ko iyi banki yagize inyungu ishimishije bitewe no kongera imbaraga mu mikoranire n'ibigo bito n'ibiciriritse.

Ati 'Inyungu twagize ishimangira urwego duriho ku isoko. Inyungu ya mbere y'umusoro yageze kuri miliyari 43,1 Frw, ibigaragaza izamuka rishimishije mu bucuruzi bwacu. Iri zamuka ryagizwemo uruhare n'izamuka rya 23% yaturutse ku nyungu yakwa ku nguzanyo, izamuka ry'inguzanyo dutanga mu bigo bito n'ibiciriritse ndetse n'ishoramari twakoze.'

Yashimangiye ko uyu mwaka, iyi banki yashyize imbaraga mu guteza imbere ikoranabuhanga, gukorana n'ibigo bito n'ibiciriritse ndetse no kongera imbaraga muri gahunda yo gutera inkunga imishinga y'iterambere rirambye, itangiza ibidukikije.

Ati 'Twishimiye ahazaza kandi dufite intego yo gutanga serivisi gukorana neza n'abakiliya bacu, abanyamigabane ndetse n'umuryango mugari dukorera.'

Umuyobozi w'Inama y'Ubutegetsi ya BPR Bank Rwanda Plc, George Rubagumya, yavuze ko abanyamigabane bazagabana 13,7% by'inyungu iyi banki yinjije, nyuma yo kwishyura imisoro.

Ati 'Umusaruro ushimishije twagize watumye Inama y'Ubutegetsi isaba ko amafaranga yishyurwa inyungu ku migabane.'

Ni ubwa mbere iyi banki igiye kwishyura imigabane ku banyamigabane bayo, aho izakoresha 13.7% by'inyungu bya miliyari 29,7 Frw iyi banki yungutse nyuma y'umusoro.

Ku rundi ruhande, umutungo rusange umaze kugera ku gaciro ka miliyari 971,8 Frw.

Umuyobozi Mukuru wa BPR Bank Rwanda Plc, Patience Mutesi, yavuze ko iyi banki yagize inyungu ishimishije bitewe no kongera imbaraga mu mikoranire n'ibigo bito n'ibiciriritse

Umuyobozi w'Inama y'Ubutegetsi ya BPR Bank Rwanda Plc, George Rubagumya, yavuze ko abanyamigabane bazagabana 13,7% by'inyungu iyi banki yinjije, nyuma yo kwishyura imisoro

Dr. Mulefu yabwiye RBA ko asanga Perezida Ndayishimiye adafitte ibisobanuro byo guha abaturage ku bwo gutsindwa kw'ingabo z'u Burundi zari zifatanyije n'iza RDC kurwanya M23.

Ibyo bituma akomeza gushakira impamvu ku Rwanda, avuga ko rufite gahunda yo gushoza intambara ku gihugu cye kugira ngo abenegihugu be bahugire kuri ibyo binyoma.

Ati 'Ese byibuze ntibyaba bishobora kuba bituruka ku kimwaro cy'ibyababayeho bageze muri RDC [Ndayishimiye] akavuga ati 'ibi bintu turabisobanurira dute abaturage bacu nitutavuga ko ibirimo biba ari u Rwanda'?'

Dr. Mulefu yavuze ko ayo magambo ya Perezida Ndayishimiye ashobora guteza umwuka mubi cyangwa umutekano muke mu Karere k'Ibiyaga Bigari.

Ibyo kandi abihurizaho na Amb.Fatuma Ndangiza uri mu badepite bahagarariye u Rwanda mu Nteko Ishinga Amategeko y'Umuryango wa Afurika y'Ibirasirazuba (EALA).

Yavuze ko amagambo y'Umukuru w'Igihugu cy'u Burundi azasubiza inyuma bikomeye intambwe mu bya dipolomasi iri guterwa n'ibihugu byombi mu guhosha umwuka mubi umaze iminsi ututumba.

Ati 'Njye numvishe ari ijambo rintangaje kandi ukabona bitari bikwiye cyane cyane ko ubuyobozi bw'ibihugu byombi tuzi ko bumaze igihe buri mu biganiro mu rwego rwa dipolomasi byo gushakisha umuti w'ikibazo.'

'Biratangaje kuba Perezida w'ikindi gihugu avuga u Rwanda ariko akaruvuga mu buryo bwo gushakisha intambara n'ubushotoranyi bidafite ishingiro.'

Minisitiri w'Ububanyi n'Amahanga n'Ubutwererane, Amb. Nduhungirehe Olivier, abinyujije ku rububa rwa X yavuze ko amagambo ya Perezida Ndayishimiye ababaje kuko hari intambwe yari imaze guterwa mu mubano w'ibihugu byombi harimo no guhosha intambara y'amagambo.

Dr. Mulefu Alphonse yatangaje ko amagambo ya Perezida w’u Burundi ashobora kuba aterwa n’ikimwaro cy’uko Ingabo ze zatsinzwe na M23

Ni igikorwa cyabereye ku cyicaro cy'Ingabo z'u Rwanda, RWANBATT-2, mu Kigo cya Gisirikare cy'Ingabo za Loni i Malakal ku wa 26 Werurwe 2025.

Umuyobozi w'Ingabo ziri mu butumwa bwa Loni muri Sudani y'Epfo, Lt. Gen. Mohan Subramanian, yashimye uruhare rwa Leta y'u Rwanda mu bikorwa byo kugarura amahoro, ikinyabupfura n'umuhate w'abasirikare b'u Rwanda n'uruhare ntagereranywa mu kugarura amahoro.

Yanashimye uruhare rukomeye batayo ya RWANBATT-2 yagize mu bikorwa byo gutabara abakozi ba Loni bendaga kwicwa n'inyeshyamba zitwa White Army mu gace ka Nassir.

Umuyobozi Mukuru uhagarariye u Rwanda muri Sudani y'Epfo akaba n'Uwungirije wa UNMISS ushinzwe ibikorwa bya gisirikare, Brig. Gen Louis Kanobayire, yavuze ko ingabo z'u Rwanda zigira uruhare mu gucunga umutekabo zifatanyije n'ingabo z'igihugu, kugenzura iyubahirizwa ry'uburenganzira bwa muntu no gufasha mu butasi hagamijwe kurinda umutekano w'abaturage.

Umuyobozi wa RWANBATT-2, Lt. Col. Charles Rutagisha, yavuze ko imidali bambitswe igaragaza ishema ryo kuba barangije amezi icyenda mu butumwa bwo kugarura amahoro muri Sudani y'Epfo, ahamya ko byongerera imbaraga ababirimo.

Yashimiye abayobozi bose ba UNMISS, Guverinoma ya Sudani y'Epfo n'izindi ngabo ziri muri ubu butumwa ku ruhare rukomeye bagira mu gufasha kuzuza inshingano.

Magingo aya u Rwanda ni urwa gatatu mu kugira abasirikare n'abapolisi benshi mu butumwa bwa Loni bwo kugarura amahoro.

Ingabo z’u Rwanda zashimiwe uruhare zigira mu gutabara abakozi ba Loni n’abasivile

Ingabo z’u Rwanda ziri muri UNMISS zavuze ko imidali y’ishimwe izongerera umuhate mu byo zikora

Minisitiri Prévot yasobanuye ko aba basirikare bari mu kigo cya gisirikare cya Kindu mu Ntara ya Maniema ihana imbibi na Kivu y'Amajyaruguru na Kivu y'Amajyepfo, mu butumwa bw'umuryango w'Ubumwe bw'Uburayi (EU) bwo gufasha ingabo za RDC.

Mu gihe bivugwa ko u Bubiligi bwohereje ingabo zo gufasha iza RDC kurwanya umutwe witwaje intwaro wa M23, Minisitiri Prévot yasobanuye ko ubufasha abasirikare b'Ababiligi batanga atari ubwo kujya ku rugamba.

Umubano w'u Rwanda na RDC ntumeze neza kuva mu ntangiriro za 2022, aho kugira ngo hashakwe igisubizo, u Bubiligi bwakomeje kwiyegereza RDC, byifatanya mu kurushinja gufasha abarwanyi ba M23 ndetse birusabira ibihano.

Nubwo Minisitiri Prévot agaragaza ko ubufasha ingabo z'u Bubiligi ziha iza RDC ari buto, bisa n'aho hari umugambi w'igisirikare utarahishurwa igihugu cyabo gifite muri RDC no mu karere muri rusange.

Tariki ya 17 Werurwe 2025, indege y'Ingabo z'u Bubiligi yavuye i Bruxelles, yerekeza i Kinshasa, ikomereza muri Kindu ku munsi wakurikiyeho. Yasubiye i Kinshasa, ihava tariki ya 20 Werurwe.

Tariki ya 21 Werurwe, iyi ndege itwara abantu 16 yagarutse mu karere ka Afurika y'Ibiyaga Bigari, igwa i Bujumbura mu Burundi, isubira i Bruxelles ku munsi wakurikiyeho.

Ingabo z’u Bubiligi zikorana n’abasirikare bo mu mutwe w’ingabo zitabara aho rukomeye muri RDC

Mu kiganiro aherutse kugirana na BBC, uyu Mukuru w'Igihugu yavuze ko afite amakuru yizeye, agaragaza ko u Rwanda rushaka gutera u Burundi rubinyujije mu mutwe wa RED Tabara usanzwe ikorera mu Ntara ya Kivu y'Amajyepfo muri RDC.

Yagize ati 'Turabizi ko u Rwanda ruri kugerageza kudutera ruciye ku butaka bwa Repubulika Iharanira Demokarasi ya Congo, rubicishije mu mutwe wa RED-Tabara. Ariko twebwe tubabwira ko niba bashaka gutera Bujumbura baciye muri Congo, natwe Kigali si kure duciye mu Kirundo.'

Si ubwa mbere Perezida Ndayishimiye yari avuze ku bijyanye n'intambara hagati y'ibihugu byombi kuko ubwo yari mu rusengero rwa Vision de Jésus-Christ, yashinje u Rwanda guteza akarere kose ibibazo.

Yagize ati 'Erega ibyo barota ngo baratera u Burundi ni ibisazi, njye mbyumva nk'ibisanzwe. Numvise bavuga ngo 'Urumva, IIngabo z'u Rwanda zirakomeye'. Uuuh! Iyo muba muzi nanjye ingabo mfite. Iyo baba bazi ingabo mfite. Bazimenye bate bataganira n'Imana ngo ibereke? U Burundi bufite ingabo, iziboneka n'izitaboneka, burarinzwe.'

Ikidashidikanywaho ni uko Ingabo z'u Burundi zifatanyije na Leta ya Repubulika Iharanira Demokarasi ya Congo n'Umutwe wa FDLR, mu kwica Abatutsi bo muri Congo, bazizwa ubwoko bwabo.

Umurongo w'u Rwanda ku mutwe w'iterabwoba wa FDLR urazwi neza, ari nayo mpamvu bigoye kwiyumvisha impamvu hari ibihugu bishobora gushyigikira uwo mutwe, wamaze gutangaza ko wifuza gukuraho ubuyobozi bw'u Rwanda, ukanakomeza umugambi wo gushyira mu bikorwa Jenoside.

Icyakora nubwo u Burundi bwahisemo kwifatanya n'uwo mutwe, mu minsi ishize humvikanye inkuru y'ibiganiro ku mpande zombi, bigamije gushakira hamwe umuti w'ikibazo kiri hagati y'ibi bihugu.

Iby'ibi biganiro byari binaherutse kugarukwaho na Perezida Paul Kagame, wavuze ko hari icyizere cy'uko umubano wazahuka.

Abarundi n'Abanyarwanda turi bamwe

Mu mboni za Gatete Ruhumuliza, Umunyamategeko akaba n'Umushakashatsi, u Rwanda n'u Burundi ni ibihugu bihuriye kuri byinshi birimo umuco n'amateka, aho yemeza ko u Burundi bwakomotse ku Rwanda.

Ati 'Twebwe tuzi amateka ni natwe dufite inshingano zo kugandukira bagenzi bacu. Abarundi ni bene wacu, twebwe tuzi amateka, kandi twe twubahiriza amateka. Ntabwo dushobora gushingira ku byo Abarundi bikora, abariho, batazi amateka, ngo tumere nka bo, tugomba kubaruta.'

Yongeyeho ati 'Abarundi bakomotse ku Banyarwanda, iriya ngoma y'u Burundi, Ntare Rushatsi, yari umwana w'umwami wo mu Rwanda. Ubundi abantu bavuga Rwanda-Urundi, ariko ubicuritse ugahera ku Burundi, bivuze ngo Urundi-Rwanda, ni bene wacu. Bavuga Rwanda-Urundi kugira ngo bayobye uburari, abantu batamenya icyo bishatse kuvuga, ariko 'ru' mu Burundi ni u Rwanda [baba bashatse kuvuga].'

Gatete ashimangira ko intambara hagati y'u Burundi n'u Rwanda, zakunze kuvamo ishyano gusa.

Ati 'Bariya ni bene wacu, ntabwo dushobora kurwana, byarabaye ko twarwanaga, nta watsindaga, icyo twahakuraga ni ishyano gusa.'

Uyu munyamategeko ashimangira ko mu ntambara yabereye mu Kirundo hagati y'impande zombi, nta ruhande na rumwe rwigeze ruyungukiramo ko bose batakaje abantu benshi.

Ati 'Bashobora kudutera, tukirwanaho, ariko ntabwo twakikora mu nda. Bariya ni bene wacu, ingoma y'u Burundi yavuye mu Rwanda. Byarabaye [kurwana]. Abanyarwanda n'Abarundi bahoraga barwana.”

“Rimwe, ahantu bita i Kirundo, abantu bararwanye haba ikirundo cy'abantu, ntabwo ari Abanyarwanda bari bicwe, nta n'ubwo ari Abarundi, bari bombi, ni imirwano itagira utsinda, ni bene umugabo umwe barwana.'

Gatete kandi avuga ko ibihugu byombi bigomba kubana neza, ati 'Twe tubizi [amateka] dufite inshingano zo kubibitsa. Amaherezo tugomba kubana neza, kuko turi abantu bamwe, Abanyarwanda n'Abarundi. Ntabwo intambara nshobora kuyishyigikira.'

Amakuru y'urupfu rwe yatangiye kumenyekana ku gicamunsi cyo ku wa Gatatu. Yapfuye azize uburwayi bwa Cancer yari amaranye igihe kinini.

Muri Nyakanga 2016, Umugore we Christine Rusagara nawe yari yitabye Imana azize uburwayi bwa Cancer, icyo gihe yaguye mu bitaro byo mu Bwongereza.

Mu 2016, Rusagara yahamijwe kwamamaza nkana ibihuha no kugomesha rubanda arwangisha ubutegetsi buriho, gukora igikorwa kigamije gusebya Leta ari Umuyobozi ndetse no gutunga imbunda binyuranije n'amategeko.

Mu 2019, Urukiko rw'Ubujurire rwamukatiye igifungo cy'imyaka 15, nyuma yo kujurira bitewe no kutanyurwa n'igihano yari yahawe n'Urukiko Rukuru rwa Gisirikare mu 2016 cyo gufungwa imyaka 20.

Rusagara yakoze imirimo itandukanye irimo kuba umuyobozi ushinzwe ubufatanye mpuzamahanga bwa gisirikare (Defence Attaché) muri Ambasade y'u Rwanda mu Bwongereza.

Yigeze kuba kandi Umunyamabanga uhoraho muri Ministeri y'Ingabo, Umuyobozi w'Urukiko Rukuru rwa Gisirikare n'umuyobozi w'Ishuri Rikuru rya Gisirikare rya Nyakinama.

Rtd. Brig Gen Frank Rusagara yitabye Imana afite imyaka 70

Umushinga Kuza-Kids ushyirwa mu bikorwa n'Umuryango Protect Citizen kuva muri Nzeri 2024.

Uwo mushinga ukorana n'amarerero abiri yo mu Karere ka Rulindo harimo irya Bukinga rirererwamo abana 25 bato b'ababyeyi basarura icyayi n'irindi rya Kiruli mu Murenge wa Base rirerwamo abana 150 bafite kuva ku myaka itatu.

Ingo mbonezamikurire uwo mushinga ukoreramo uzitera inkunga y'ibikoresho nkenerwa mu gukangura ubwonko bw'abana n'ibindi bitandukanye.

Uhugura kandi abarezi babo ku buryo bwiza bwo kubitaho n'ababyeyi ku gutegura indyo yuzuye kandi ugakurikirana uko bishyirwa mu bikorwa.

Gusura ibikorwa by'uwo mushinga byabaye ku wa 26 Werurwe 2025 byitabirwa n'Ubuyobozi bwa Kuza-Kids, NCDA, ubuyobozi bw'inzego z'ibanze n'abandi bafatanyabikorwa b'uwo mushinga.

Umuyobozi Mukuru Wungirije wa NCDA, Munyemana Gilbert, yavuze ko ingo mbonezamikurire za Kuza-Kids zirimo ibikoresho bihagije n'ibindi bisabwa byose bifasha abana gukura neza.

Yashimye uburyo ibyo bikorwa by'izo ngo mbonezamikurire bifasha ababyeyi kwita ku bana babo neza by'umwihariko abana b'abasoromyi b'icyayi batitabwagaho uko bikwiye kubera akazi k'ababyeyi babo.

Yagize ati 'Umufatanyabikorwa nka Kuza-Kids ufata icyemezo cyo gutangira umushinga nk'uyu wo kwita ku bana ni ikintu twishimira. Turahamagarira n'abandi bafatanyabikorwa bose n'ababyeyi kugira ngo ibyo twabonye hano bibe urumuri rutuma n'ahandi iyo serivise ikomeza kunozwa.'

Meya wa Rulindo, Mukanyirigira Judith yavuze ko kuba uwo mushinga ukorera mu karere ayoboye ari umusanzu ukomeye cyane mu kugabanya igwingira mu bana.

Yagizeti 'Izi ngo mbonezamikurire za Kuza-Kids ziri ku rwego rwisumbuye ku zo dusanzwe dufite ariko twifuza ko n'izindi zizamuka zikamera nka zo. Zizajya zitanga umusanzu ukomeye cyane abaturage bajye bazikoreraho ingendo shuri bazirebereho uko izindi ngo mbonezamikurire zigomba kuba zimeze.'

Umuhuzabikorwa w'umushinga Kuza-Kids, Ilibagiza Rose yavuze ko bishimira kuba uwo mushinga warafashije ababyeyi guhindura imyuvire mu kwita ku mirire y'abana babo bakabasha gukura neza.

Ati 'Imyumvire y'ababyeyi igenda ihinduka, barakubwira bati 'twari tuzi ko umwana utamuhaye umugati atakura neza ariko twamenye ko n'ibyo duhinga bidukikije bishobora kubafasha twabiteguye neza.''

Ilibagiza yavuze kandi ko uwo mushinga uteganya kwagukira no mu tundi turere kuko icyo ari igice cyawo cy'igerageza ariko ibyo umaze kugeraho bikomeje gufasha bigaragara mu mikurire y'abana.

Mu Karere ka Rulindo habarurwa ingo mbonezamikurire zigera kuri 865 zirimo abana bagera ku 31.486 n'abarezi babo bagera ku 2.281.

Meya wa Rulindo, Mukanyirigira Judith, yavuze ko kuba uwo mushinga ukorera mu karere ayoboye ari umusanzu ukomeye cyane mu kugabanya igwingira mu bana

Umuyobozi Mukuru Wungirije wa NCDA, Munyemana Gilbert, yavuze ko ingo mbonezamikurire za Kuza-Kids zirimo ibikoresho bihagije n'ibindi bisabwa byose bifasha abana gukura neza

Umuhuzabikorwa w'umushinga Kuza-Kids, Ilibagiza Rose, yavuze ko bishimira kuba uwo mushinga warafashije ababyeyi guhindura imyumvire mu kwita ku mirire y'abana babo

Umuyobozi bw'Urwunge rw'Amashuri rwa Kiruli (ahari urugo mbonezamikurire rwa Kuza-Kids) yagaragaje ko abana bazajya bahatangirira umwaka wa mbere w'amashuri abanza bazajya baba bajijutse

Umwe mu barezi b’abo bana avuga uburyo Kuza-Kids yamufashije kumenya uburyo bwiza bwo kubitaho

Meya Mukanyirigira agaburira abana

Abasuye ingo mbonezamikurire basabanye n’abana barererwamo

Hari aho abana bato bagenewe kuryama

Abana bo mu ngo mbonezamikurire za Kuza-Kids bigishirizwa ku bikoresho bibafasha gukangura ubwonko

Abana bahabwa amafunguro arimo n’igikoma cyujuje intungamubiri zisabwa ngo umwana akure neza

Abana bafashwa gukangura ubwonko bwabo

Aba bakozi batawe muri yombi mu bihe bitandukanye kuva tariki ya 21 n'iya 26 Werurwe 2025.

Mu batawe muri yombi harimo Mbasha David wari Umuyobozi w'imirimo rusange mu Karere, Kayigire Anselme wari Umuyobozi ushinzwe Imari mu Karere na Nzaramyimana Emmanuel, wari rwiyemezamirimo ufite Ikigo cy'Ubwubatsi yitwa E.T.G Ltd.

Hanatawe muri yombi kandi Sibomana Charles wari usanzwe ari umukozi ushinzwe ingengo y'imari mu Karere ka Kayonza.

Umuvugizi wa RIB, Murangira B. Thierry yabwiye IGIHE ko Mbasha David, Kayigire Anselme na Sibomana Charles bakurikiranyweho icyaha cyo kunyereza umutungo wa Leta mu gihe Nzaramyimana Emmanuel we akurikiranyweho icyaha cy'ubufatanyacyaha kuri iki cyaha.

Ati 'Barakekwaho kuba barakoze iki cyaha mu bihe bitandukanye mu 2022. Iperereza ry'ibanze rigaragaza ko bishyuye ikigo kitari cyo arenga miliyoni 67 Frw ihagarariwe na Nzaramyimana Emmanuel wahise ayabikuza kandi ataramugenewe.''

Abafashwe bafungiye kuri Station ya RIB ya Nyarugenge mu gihe dosiye yabo yoherejwe mu Bushinjacyaha ku wa 26 Werurwe 2025.

Icyaha cyo kunyereza umutungo bakurikiranyweho giteganywa n'ingingo ya 10 y'itegeko nimero 54/2018 ryo kuwa 13 Kanama 2018 ryerekeye kurwanya ruswa.

Ugihamijwe ahanishwa igifungo kuva ku myaka irindwi kugeza ku myaka 10 hakiyonegeraho n'ihazabu y'Amafaranga y'u Rwanda yikubye inshuro kuva kuri eshatu kugeza kuri eshanu z'agaciro k'umutungo yanyereje.

Ni mu gihe ubufatanyacyaha n'icyitso muri ibyo bikorwa ahanwa n'ingingo ya 84 y'itegeko nimero 68/2018 ryo ku wa 30 Kanama 2018 riteganya ibyaha n'ibihano muri rusange. Ubihamijwe ahanwa nk'uwakoze icyaha.

RIB yasabye abantu bose kwirinda ibikorwa byo kunyereza umutungo wa Leta kuko bigira ingaruka mbi ku iterambere, ihamya ko uzabifatirwamo wese azahanwa nk'uko amategeko abiteganya.

RIB yataye muri yombi abakozi batatu b’Akarere ka Kayonza