Category: Uncategorized

Isomwa ry’urubanza ryari riteganyijwe kuri uyu wa Kabiri tariki 29 Nzeri 2020 ku isaha ya saa munani, ariko abacamanza 3 n’Umwanditsi binjiye mu cyumba saa 16h15.

Urukiko rwavuze ko Nyamvumba Robert akatiwe gufungwa imyaka 6, akaba afite iminsi 30 yo kujurira.

Robert Nyamvumba ntiyari mu Rukiko Rwisumbuye rwa Nyarugenge, ndetse ntiyari kuri Video conference, Abamwunganira mu mategeko na bo ntibari bahari, kimwe n’Ubushinjacyaha ntibwari buhagarariwe.

Aregwa n’Ubushinjacyaha icyaha cy’indonke kugira ngo hakorwe ikinyuranyije n’amategeko, Umucamanza avuze ko Urukiko rusuzuma niba ahamwa n’icyaha, rwasanze hari ibaruwa y’uwitwa Javier Elizalde yatanze ikirego mu Bugenzacyaha (RIB) arega Nyamvumba Robert ko yamwatse 10% by’isoko rya miliyari 72Frw.

Javier Elizalde yapiganiraga isoko muri EDCL, rimwe mu mashami agize Sosiyete y’Ingufu (REG) akoresheje Sosiyete ye yitwa Salvi Istanbul Electric Ware.

Umucamanza yavuze ko kwiregura kwa Robert Nyamvumba nta shingiro gufite kuko mu Bushinjacyaha no mu Bugenzacyaha yiyemereye ibyo yakoze byose byo kwaka asaba indonke ageze mu Rukiko arabihakana.

Umucamanza yavuze ko kuba yaraburanye abihakana bitahabwa agaciro kuko abyemera mu Bushinjacyaha nta gahato yashyizweho.

Umucamanza yavuze ko Nyamvumba Robert ahamwa n’icyaha cyo kwaka indonke.

Ku buremere bw’Igihano umwe mu Banyamategeko yabwiye Umuseke ko niba Robert Nyamvumba yarashakaga 10% bya miliyari 72Frw ari ko gaciro isoko ryari rifite, bivuze ko yari guhabwa ruswa ya miliyari 7.2Frw

Yagize ati: “Icyo gihe bakuba gatatu ruswa yari kwakira, niyo mpamvu ihazabu ari miliyari 21.6Frw.”

Robert Nyamvumba ubwo yari mu Rukiko ku wa 10 Nzeri 2020 yahakanye ibyaha byose aregwa n’Ububushinjacyaha avuga ko yahatiwe kubyemera, asaba kugirwa umwere kuko nta cyaha yakoze.