Category: Uncategorized

Ni ikibazo gifitwe n'abaturage bo mu Kagari ka Nyakabanda mu Midugudu ya Ruhita na Rugarama iherereye mu Murenge wa Musha, bavuga ko kimaze imyaka myinshi ngo kuko kuva hatangira gahunda yo gutanga ibyangombwa by'ubutaka bo ntibigeze babihabwa, mbere babwirwaga ko ubwo indege yafotoraga yasimbutse igice batuyemo.

Nyuma ngo bamwe babwiwe ko impamvu batahawe ibyangombwa ari uko aho batuye ari mu gishanga, abandi ngo bakaba barubatse ku butaka bwa leta nyamara abenshi bavuga ko babuvukiyeho ari naho hari hatuye ibisekuru byabo.

Nshimiyimana Patrick Sergent utuye mu Mudugudu wa Ruhita avuga ko ikibazo bafite ari icy'ibyangombwa by'ubutaka badafite kuva ubwo byatangwagwa bwa mbere, mu mwaka wa 2017 ngo batangiye kubikurikirana ubuyobozi bw'umurenge bubasaba kwishyira hamwe bubashakira umuntu uza kubafotorera ubutaka.

Ati 'Icyo gihe twanditse abaturage 131 bafite icyo kibazo abenshi biganjemo abo mu Mudugudu wa Ruhita ndetse n'abo mu wa Rugarama; tumaze kwishyira hamwe ushinzwe ubutaka mu murenge yaduhaye umutekenisiye ngo aze adupimire, buri umwe yamuciye 20 000 Frw kuko twari benshi.'

Nshimiyimana yavuze ko nyuma yo gupimisha affiche cadastrale bazishyikirije ushinzwe ubutaka ku murenge ababwira ko agiye kubyohereza ku karere bakabakemurira ikibazo.

Ati 'Kuva 2016/2017 kugeza ubu mu 2021 ibyangombwa twarategereje turaheba. Twabuze n'umuntu waduha amakuru yaho bigeze, iyo tubajije baratubwira ngo biri ku Karere. Ikintu twifuza ni uko abashinzwe ubutaka bashyiramo imbaraga bakadushakira ibyangombwa byacu kuko imyaka ibaye myinshi twarishyuye tukabura igisubizo.

Nshimiyimana yavuze ko nk'urubyiruko usanga azitirwa cyane no kutagira ibyangombwa, yauze ko kuri ubu yakabaye yarubatse ariko ko kubera kutagira ibyangombwa abura naho yahera yaka uruhushya rwo kubaka.

Nsabimana Jean Népomuscène we yavuze ko kutagira ibyangombwa by'ubutaka byagiye bimugiraho ingaruka nyinshi zirimo kutabona amafaranga y'ishuri y'abana.

Ati 'Ntsindisha umwana sinshobore kuba naguza amafaranga ngo mujyane ku ishuri nibura nzagende nyishyura nyuma kuko nta yindi ngwate ngira. Ikindi sinshobora kwagura inzu yanjye ngo nyivugurure nyamara iri kunsaziraho. Urebye tumeze nk'aho nta kintu dufite kuko ntakigaragaza ko ubwo butaka ari ubwacu.'

Mukamana Hélène we yavuze ko kuri ubu nta burenganzira bafite ku masambu batuyemo n'ayo bahingamo ngo kuko nubwo bafite izo sambu nta wagira ikibazo ngo akateho agurishe nibura bimufashe kugikemura.

Niyomfura Angelique we yavuze ko kutagira icyangombwa cy'ubutaka byamugizeho ingaruka ubwo yajyaga gukuruza umuriro mu nzu ye.

Yavuze ko habanje kubaho kuwubima nyuma y'igihe kinini baza kwifashisha umuturanyi babona guhabwa umuriro, ku kijyanye n'ibyo ahomba bindi yavuze ko nk'urubyiruko kuri ubu nta wagana BDF kubera nta ngwate yo gutanga yabona, agasaba ubuyobozi kubafasha bakabona ibyangombwa.

Niyonsenga Martine we aherutse kubona umukiliya umuha amafaranga menshi ku butaka atuyemo, amubajije ibyangombwa by'ubutaka arabibura birangira uwari ugiye kumugurira agiye gushaka ahandi.

Kanyeshuri Claver ufite imyaka 55 wavukiye mu Mudugudu wa Ruhita we avuga ko ubuyobozi bukwiriye kubegera nibura bukabasobanurira igituma badahabwa ibyangombwa ngo kuko bamwe mu baturage bagenda bakwiza ibihuha bitandukanye bituma barushaho kujya mu gihirahiro.

Yavuze ko kuri ubu abenshi baba bashaka kwaka inguzanyo ngo bayikoreshe mu buhinzi ariko ngo kubera kutagira ibyangombwa bikarangira babiretse.

Umuyobozi w'Umudugudu wa wa Ruhita, Ndagijimana Pierre Célestin, we yavuze ko abaturage benshi ayobora badafite ibyangombwa by'ubutaka, binatuma bamwe batigirira icyizere mu gukora ibyabateza imbere, yavuze ko bagiye babakorera ubuvugizi kenshi ariko ngo ntihagire igikorwa.

Umunyamabanga Nshingwabikorwa w'Umurenge wa Musha, Muhoza Théogène, yabwiye IGIHE ko ikibazo cy'aba baturage kizwi ariko ko harimo ibindi bibazo bya bamwe muri bo bafite ubutaka bwanditswe kuri leta n'abandi bagiye biha ku butaka bw'ishyamba rya leta.

Ati 'Hariho igice bigaragara ko leta yatwaye ubutaka bw'abaturage bitewe n'akavuyo kabaye mu gutanga ibyangombwa, ahandi ugasanga abaturage nabo batwaye ubutaka bwa leta, byabaye ngombwa ko hahamagarwa ikipe zitandukanye zirimo Minisiteri y'Ibidukikije, haza Ikigo cy'Igihugu cy'Ubutaka, Akarere, Ikigo cy'Igihugu gifite mu nshingano amashyamba n'abandi kugira ngo harebwe uko ikibazo giteye.'

Gitifu Muhoza yakomeje avuga ko hari aho basanzwe bamwe muri aba baturage bagomba kuva mu butaka bwa leta ndetse ngo n'amabaruwa barayahawe, hari ngo n'ahandi basanze bariya baturahe ubutaka ari ubwabo ko bagomba guhita bahabwa ibyangombwa byabo.

Abaturage basabwe bwitonda ubutaka bugakurwa kuri leta bukabandikwaho bakabona guhabwa ibyangombwa by'ubutaka bwabo.

Abaturage basabwe bwitonda ubutaka bugakurwa kuri leta bukabandikwaho bakabona guhabwa ibyangombwa by'ubutaka bwabo

Abaturage 130 barashinja ubuyobozi kubasiragiza imyaka ine mu kubona ibyangombwa by'ubutaka

Itangazo rihagarika ubu buki ryashyizwe umukono n'Umuyobozi wa Rwanda FDA, Dr Charles Karangwa.

Icyemezo cyo guhagarika no guhamagaza ubuki bwa 'HONEY FIVE' cyafashwe nyuma y'igenzura rya Rwanda FDA rishingiye ku mpungenge zatanzwe n'abaguzi bagaragaje ko butujuje ubuziranenge.

Iryo tangazo rikomeza rivuga ko 'hashingiwe ku bisubizo bya laboratwari byagaragaje ko ubuki bwa HONEY FIVE bwahinduriwe umwimerere n'ababupfunyika ndetse mu bugenzuzi bwakozwe uwabutunganyaga kandi akabupfunyika yemeye ko yongeramo isukari.''

HONEY FIVE ni ubuki buvanwa mu Ishyamba rya Nyungwe, ndetse urebeye ku birango biri ku gacupa bushyirwamo byerekana ko ari umwimerere utavangiye.

Rwanda FDA yasabye abakwirakwiza, amaguriro y'ibiribwa (supermarkets) n'abacuruzi badandaza ubuki guhagarika gukwirakwiza no kugurisha ubuki bwa HONEY FIVE ndetse bagasubiza ubuki bwose ku babubaranguje bitarenze iminsi 10.

Ikomeza iti 'Ukora ubuki bupfunyitse bwa HONEY FIVE arasabwa kwakira ubuki azagarurirwa n'abo yagurishije kandi agatanga raporo yimbitse (igaragaza amazina y'abaranguye, nimero za telefoni n'ingano y;ubuki bwagaruwe) kuri Rwanda FDA.''

Rwanda FDA yasabye abaturage bose guhagarika kugura ubuki bwa HONEY FIVE bwakuwe ku isoko.

Abakora n'abatunganya ubuki bupfunyitse basabwe kubanza kumenyekanisha aho bakorera n'ibicuruzwa byabo muri Rwanda FDA.

Iki kigo cya Rwanda FDA kandi cyaburiye abapfunyika n'abagurisha ubuki bwahinduriwe umwimerere kuko uzafatirwa muri ibyo bikorwa azabihanirwa bikomeye.

#RWOT Guhamagaza no guhagarika ikwirakwizwa ry'ubuki bwahinduriwe umwimerere bwitwa HONEY HIVE. pic.twitter.com/qujBM0i34s

— Rwanda Food and Drugs Authority (@RwandaFDA) March 15, 2021

Ubuki bwa HONEY FIVE bwahagaritswe ku isoko ry’u Rwanda

Ubu buki bwasanzwe bwarongewemo isukari

Akaliza Amanda umwe mu bakobwa 20 bahataniye ikamba rya Nyampinga w’u Rwanda 2021, yakorewe umuvugo n’umusizi Manzi Didier.

Muri uyu muvugo wa Manzi Didier agaragazamo amashusho ya Akaliza Amanda aririmba, ari mu ijonjora ry’ibanze rya Miss Rwanda anyura imbere y’akanankemurampaka anasubiza ibibazo bamubuza.

Hari aho agira ati“kazasesa imihigo bagakunde, kazanga amahugu bagakunde, kazahagarira u Rwanda mu mahanga bagakunde(…) Kazaba Nyampinga w’u Rwanda bagakunde.”

Manzi muri uyu muvugo yumvikana avuga ko Akaliza Amanda yakuze ari umwana uteye ubwuzu akunzwe na bose.

Akaliza Amanda afite nimero imwe muri Miss Rwanda aho kumutora ari ukohereza ijambo MISS ugasiga akanya ukandika 1 ukohereza kuri 1525.

Akaliza Amanda akaba afite umushinga wo kurwanya ikibazo cy’ihungabana, ikibazo ahamya ko gifitwe na benshi mu Rwanda.

Akaliza Amanda ari mu bakobwa 20 bagomba kuvamo Nyampinga w’u Rwanda 2021

Didier wahimbiye umuvugo Amanda

“Ahubwo ku kintu cyose twihe agaciro nk’abakozi b’Imana bagabura ibyayo, twihangana cyane mu makuba, mu mibabaro, mu byago” 2Abakorinto 6:4

Hari ibintu byinshi abantu bakora kugira ngo bagire agaciro, hari abantu benshi bumva ko agaciro kabo kava mu mashuri ahanitse. Ese agaciro kawe ugakura mu gutura mu nzu nziza, ni byiza, ese ugakura mu kumva ko urenze abandi bantu bose, ni ugutunga imodoka nziza, ni ukugira amafaranga menshi?, ibyo bintu byose ni byiza cyane ariko uramutse udakora ibigutesha agaciro.

Ni byiza cyane kwiga ariko iyo wiga udakora ibigutesha agaciro. Iyo ufite diporome, cyangwa akazi keza ariko ibyo ukora bigutesha agaciro, mu byukuri uba wibeshya. Kubahwa ni byiza, kugira umutungo uhanitse ni byiza, ariko bizakubera umugisha kurutaho nubikora wihesha agaciro.

'Umunsi umwe nagiye mu nzu abagabo benshi bakoreramo siporo, nanjye nari ngiye gukora siporo. Nahahuriye n’abagabo barenze icumi, mu gihe cy’akaruhuko batangira kuganira umwe aravuga ati 'Njyewe mfite umudamu n’abana 6, ariko maze gutera inda abakobwa 5′.

Mu byukuri uwo ni umugabo utambuka abantu bagakangarana, yahawe umugisha afite umutungo mwinshi, afite ubushobozi bwinshi ariko numvise ibyo bintu akora nsanga ntibimuhesha agaciro, ahubwo bimutesha agaciro.

Undi aravuga ati’ Njyewe narumiwe!, umukobwa wese turyamanye mpita mutera inda’ avuga ko amaze kubyara abana 5 bose hirya y’abo yabyaranye n’umugore we w’isezerano. Barakomeje baravuga, baravuga ubwoba buranyica'! Pasiteri Desire Habyarimana

Mu byukuri iyo urebeye abantu benshi inyuma, ubona bagerageza gukora ibintu byakabahaye agaciro, ariko bo ubwabo batiha agaciro ubuzima babaho butabaha agaciro. Bibiliya yatubwiye ngo’ Ahubwo ku kintu cyose twiheshe agaciro’

Ni byiza gukora cyane ibyakaguhaye agaciro, ariko ntubivange n’ibigutesha agaciro

Ese muri 2021 iyo ukubise umugore wawe utekereza ko biguha agaciro?, tekereza kuba uri umugabo bizwi ko usambana, ko uca inyuma umugore wawe noneho n’abana bawe bakaba babizi, utekereza ko biguha agaciro mu muryango?. Abagore baca inyuma abagabo babo, utekereza ko ibyo biguha agaciro?, birakakwambura.

Si ibyo gusa uyu munsi hari abantu bakizerera mu isi y’umwijima, bakijya mu nzu z’abapfumu kuraguza! utekereza ko kuba warize ujijutse, hanyuma bakabona usesera mu nzu z’abapfumu biguha agaciro?, birakakwambura. Kuba bakwizera bakaguha kuyobora umutungo w’abandi hanyuma ukawunyereza, utekereza ko biguha agaciro?, birakakwambura.

Ni byiza ko umuntu amenya ko gukora ibimuha agaciro ariho hava agaciro. Mu gitabo cy’Umubwiriza haravuga ngo’ Hari ikintu kimwe yabonye gitangaje! Ni abantu bavanga imirimo myiza n’imirimo mibi’. Mu byukuri birababaje kubona umuntu agerageza gukora ibyakamuhesheje agaciro, ariko ukabona yitwikira ijoro akora ibimwambura agaciro.

Nta muntu n’umwe ushobora kubahwa yambaye ubusa: Ese iyo utinyuka kwambara nabi ukajya mu muhanda, rimwe na rimwe ubona nko muri bisi umuntu arwana no gukurura, cyangwa se yageze mu birori akahasanga abantu biyubashye, ukabona ararwana no gukurura kugira ngo yambare yikwize. Ntabwo biguha agaciro, nta muntu n’umwe uhabwa agaciro no kwambara ubusa.

Kuba uri umuntu utaha mu rugo rwawe umugore n’abana bagakangarana, bakaguhunga utekereza ko ibyo biguha agaciro?, birakakwambura. Kuba uri umuntu utagira ubuntu kandi Imana yaraguhaye umugisha, ntabwo biguha agaciro birakakwambura. Ibyo birareba haba ku bo mu nzu y’Imana ( Abashumba, abayoboye amatorero n’abakristo muri rusange) n’abo hanze.

Birababaje kumva umushumba aca inyuma umugore we, cyangwa umuntu yitwa umukristo ariko yiba, cyangwa se atagira ubuntu. Ibyo byose bikwambura agaciro.

Agaciro kacu kava he?

Iyo umuntu abaho ubuzima butubaha Imana, sinzi ko ashobora gukora ibyamuha agaciro. Yego hari abantu b’imfura babonye uburere bwiza mu muryango, agukura yihesha agaciro ariko ibyo nakwizera cyane kuruta ibindi, ni uko uba warakiriye Kristo nk’Umwami n’umukiza mu buzima bwawe akaguhindura, ukaba ukora imirimo myiza iva mu kubaha Imana. Ubuzima butarimo kubha Imana( Bw’umuntu udakijijwe), n’ink’imodoka itagira asiranse.

Sinakwizeza ko utazakora impanuka mu gihe udafute Kristo nk’umugenga w’ubuzima bwawe, nk’ushinzwe ejo hawe hazaza akakurinda akakurengera. Mu isengesho rya Data wa twese haravuga ngo nidusenga tujye tuvuga ngo 'Ntuduhane mu bitwoshya ahubwo udukize umubi’.

Byumvikane ko umuntu yatsinzwe kuva kuri Adamu, akora ibimutesha agaciro ariko iyo twisunze imbaraga z’ubuMana dushobora gukora imirimo myiza, tugakora ibiduha agaciro. Iyo ukoze ibikwambura agaciro si wowe ugata wenyine ahubwo: N’umugore wawe agargata, n’abana bawe baragata.

Sinakubwira ipfunwe abana baba bafite iyo bumva papa wabo aca inyuma mama wabo. Ntushobora kumva umubabaro, igikomera abana bagira iyo bamenye ko mama wabo asambana. Hari igihe umuntu agira isoni zo kumva ko avukana na runaka, bitewe n’imyitwarire ye. Ariko hari n’igihe biha ishema umuntu kuko avuka mu muryango runaka, bitewe n’imyitwarite myiza y’umwe muri bo.

Agaciro kawe gakwiye kuva mu kuba warakiriye Kristo Yesu nk’Umwami n’Umukiza, akaba umuyobozi w’ubuzima bwawe. Birashoboka ko iyi nyigisho ikugezeho ubuzima bwawe burimo ibintu byinshi bigutesha agaciro, ariko Yesu numuha ubuzima bwawe ngo abuyobore, nkwijeje ko ushobora kugarurirwa agaciro.

Yesu ashobora kuguha ubuzima butunganye kandi bwejejwe.

Iyi nyigisho yateguwe, inatambutswa na Pasiteri Desire Habyarimana kuri Agakiza Tv.

Ushobora kuyireba yose hano: 🔴 LIVE: IGITARAMO – 07: Esther N. & Past Desire H. “AGACIRO KAWE UGAKURA HE?” Ubuhamya bwa Charlotte

Source: Agakiza Tv

[email protected]

Rutahizamu w’Amavubi Jacques Tuyisenge avuga ko kubona itike y’igikombe cy’Afurika cya 2021 ku ikipe y’igihugu bigoranye cyane bitewe n’amanota u Rwanda rufite.

Imyaka 17 irashize Amavubi arota gusubira mu gikombe cy’Afurika yagiyemo inshuro imwe rukumbi muri 2004 gusa.

U Rwanda rufite imikino 2 yo mu itsinda F muri uku kwezi aho ruzakina na Mozambique na Cameroun, mu gihe rwatsinda iyi mikino rwaba rufite amahirwe menshi yo kujya muri iki gikombe.

Jacques Tuyisenge utazakina iyi mikino kubera imvune yakuye muri CHAN, yabwiye BBC ko amahirwe ari ku mukino wa Mozambique u Rwanda ruzakira mu rugo, ni mu gihe ariko abibona nk’ibintu bikomeye cyane.

Ati“Umukino wo mu rugo buri gihe uba ari ingenzi, kuko tugomba gutsinda imikino isigaye ngo dukomeze. Ibyo bigomba guhera kuri Mozambique twayakiriye. Nidutsindwa, amahirwe yacu azaba arangiye.”

Yakomeje agira ati “Dutsinze umukino wo mu rugo byaduha amahirwe. Twakwizera gutsinda n’umukino ukurikiyeho. Ariko birumvikana ntibizaba byoroshye. Dufite amanota abiri gusa.”

Umukino w’u Rwanda na Mozambique ukaba uzabera mu Rwanda ku wa 24 Werurwe ni mu gihe uwa Cameroun uzabera muri Cameroun tariki ya 31 Werurwe 2021.

Kugeza ubu muri iri tsinda Cameroun niyo iyoboye itsinda n’amanota 10, Mozambique 4 inganya na Cape Verde mu gihe u Rwanda rufite 2.

Jacques Tuyisenge utazakina iyi mikino kubera imvune abona amavubi asabwa gukora ibikomeye

Leta y’Ubuholandi yavuze ko icyo cyemezo cy’agateganyo, kizageza nibura tariki 29 z’uku kwezi kwa gatatu, ari ukwirinda.

Repubulika ya Ireland yari yafashe icyemezo nk’iki kubera amakuru yo kuvura kw’amaraso ku bantu barutewe muri Norvège.

Gusa ishami rya ONU rishinzwe ubuzima ku isi WHO/OMS rivuga ko nta kintu kigaragaraza ihuriro hagati y’uru rukingo no kuvura kw’amaraso.

Ikigo cy’uburayi kireba iby’imiti (European Medicines Agency, (EMA) – kiri kwiga ku kuvura kw’amaraso kumaze kuba – kivuga ko ibyiza by’uru rukingo bikiruta ibyago rwateza.

Denmark, Norvège, Bulgaria, Iceland na Thailand byamaze guhagarika gukoresha urukingo rwa AstraZeneca.

Ni izihe ngamba Ubuholandi bwafashe ?

Mu itangazo leta y’iki gihugu yasohoye, yavuze ko ifashe iyi ngingo nko kwirinda nyuma y’amakuru ko muri Denmark na Norvège rwahagize ingaruka zikomeye.

Hugo de Jonge, minisitiri w’ubuzima w’Ubuholandi yagize ati : “Ntabwo twareka ngo habeho gucyekeranya ku rukingo.

“Tugomba kumenya ko ibintu byose bimeze neza, rero ni byiza kuba duhagaritse ubu”.

Iki cyemezo cyo ku cyumweru kiraba gikerereje gahunda yo gukingira mu Buholandi.

Iki gihugu cyari cyaratumije doze miliyoni 12 z’urukingo rwa AstraZeneca, doze 300,000 zagombaga guterwa abantu muri iki cyumweru.

AstraZeneca ivuga iki ?

Mu itangazo, AstraZeneca ivuga ko nta bihamya byerekana kwiyongera ko kuvura kw’amaraso kubera uru rukingo.

Ivuga ko mu bihugu bigize ubumwe bw’Uburayi (EU) n’Ubwongereza, hamaze kuvugwa abantu bakingiwe 15 bagize uko kuvura (vein thrombosis (DVT) na 22 bagize ikibazo cy’ibihaha.

Ann Taylor ukuriye ubuvuzi muri icyo kigo agira ati : “Ku bagera kuri miliyoni 17 muri EU na UK bamaze guterwa uru rukingo, umubare w’abagize kuvura kw’amaraso muri bo ni bacye cyane ugereranyije n’amagana y’abashoboraga kwandura”.

Yongeraho ati : “Turi kugenzura ubuziranenge birenze ibipimo bisabwa kubera ibivugwa ku rukingo, kugira ngo ntiruteze ikibazo abantu”.

Ivomo : BBC

UKWEZI.RW