Category: Uncategorized

Ikipe ya Manchester City yatsinze Tottenham igitego 1-0 yegukana Carabao Cup ku nshuro ya 4 yikurikiranya ndetse kiba igikombe cyayo cya mbere itwaye muri uyu mwaka w'imikino.

Myugariro Aymeric Laporte niwe watsinze iki gitego ku munota wa 82 nyuma ya coup franc yatewe neza na Kevin De Bruyne.

Indi kipe yatwaye iki gikombe cy'igihugu inshuro 4 yikurikiranya ni Liverpool yabikoze mu mwaka wa 1981 kugeza 1984.

Tottenham iheruka igikombe icyo aricyo cyose muri 2008 yashakaga kwegukana iki kugira ngo yakire neza umutoza wabo w'imyaka 29 Ryan Mason ariko ntibyakunze.

Manchester City iritegura kwegukana shampiyona y'uyu mwaka kuko irusha amakipe ayikurikiye arimo United amanota arenga 10 kandi hasigaye imikino mike.

Muri uyu mukino kandi wabereye I Wembley,Leta y'Ubwongereza yari yemereye abafana ibihumbi 8 kwinjira ndetse nibo barebye uyu mukino.

Abakinnyi babanje mu kibuga ku mpande zombi:

Manchester City (4-3-3): Steffen; Walker, Dias, Laporte, Cancelo; Fernandinho (Rodri 84), De Bruyne (Bernardo Silva 87) Gundogan; Mahrez, Foden, Sterling

Tottenham (4-2-3-1): Lloris; Aurier (Bergwin 90), Aldeweireld, Dier, Reguilon; Winks, Hojbjerg (sub Alli 84); Lo Celso ( Sissoko 67), Moura (Bale 67), Son; Kane

Source : http://umuryango.rw/imyidagaduro/imikino/article/manchester-city-yegukanye-carabao-cup-ku-nshuro-ya-4-yikurikiranya

Ntihigeze hatangazwa impamvu iyi gahunda yo kugeza mu Rwanda impunzi 122 ziturutse mu bihugu bya Afurika bitandukanye yasubitswe, gusa amakuru IGIHE ifite ni uko gahunda y'iyi ndege yagombaga kugera i Kigali saa Mbiri z'ijoro yabanje kwigizwa inyuma gusa bikaza kurangira byanzuwe ko itagihagurutse.

Kugeza ubu ntiharamenyekana niba no ku wa 26 Mata 2021, izi mpunzi zizabasha kugera mu Rwanda.

Byari biteganyijwe ko izi mpunzi ziri bwakirwe mu Rwanda n'Umuyobozi w'Ishami ry'Umuryango w'Abibumbye ryita ku Mpunzi, Filippo Grandi, uri mu ruzinduko rw'iminsi ine mu gihugu na Minisitiri ushinzwe Ibikorwa by'Ubutabazi, Kayisire Solange.

Kugeza ubu mu mpunzi 515 u Rwanda rwakiriye zivuye muri Libya, 257 zoherejwe mu bihugu bitandukanye by'amahanga byemeye kuzakira birimo Suède yakiriye 132, Norvège [46], Canada [66], u Bufaransa [11] n'u Bubiligi bwakiriye babiri.

Ku wa 10 Nzeri 2019 ni bwo Guverinoma y'u Rwanda, AU na UNHCR, byashyize umukono ku masezerano y'ubufatanye, azatuma iki gihugu cyakira impunzi zizaturuka muri Libya, aho zageze zishakisha inzira yazambutsa izijyana muri Méditerranée zikagera i Burayi.

Aya masezerano azatuma u Rwanda rwakira impunzi zigera kuri 500 yasinyiwe i Addis Ababa ku cyicaro cya AU, nyuma y'ubushake Perezida Kagame yagaragaje bw'uko u Rwanda rwakwakira izi mpunzi z'Abanyafurika.

Urugendo rw'impunzi 122 zo muri Libya zari zitegerejwe i Kigali rwasubitswe

---

Source : http://igihe.com/amakuru/u-rwanda/article/urugendo-rw-impunzi-122-zo-muri-libya-zari-zitegerejwe-i-kigali-rwasubitswe

Perezida w'u Burundi,Evariste Ndayishimiye yongeye guca ibintu ku mbuga nkoranyambaga ubwo yafotorwaga we n'umugore we bari kumwe n'abaturage ku isoko bakabaha amafaranga.

Ubwo Perezida Ndayishimiye n'umufasha we bavaga i Gitega berekeza mu mu mujyi wa Bujumbura ,bafashe akanya barahagarara baganiriza abenegihugu b' i Karunga muri komine Isare mu ntara ya Bujumbura ahacururizwa ibiribwa bitandukanye.

Mu mafoto yafashwe,yagaragaje aba bombi bari imbere y'ibiribwa aho Madamu wa Perezida Angelique Ndayishimiye yagaragaye ari guhereza abantu amafaranga gusa ntibyamenyekanye niba yarimo kubagurira.

Nkuko ibinyamakuru mu Burundi bibitangaza,Umukuru w'igihugu akaba yashimiye aba bacuruzi akazi bakora,abasaba gukorera mu makoperative kugira biteze imbere anabemerera kubatera inkunga.

Source : http://umuryango.rw/amakuru/mu-mahanga/ubuzima/article/burundi-perezida-ndayishimiye-n-umufasha-we-bahagaze-ku-isoko-baha-abaturage

Abakinnyi 10 n'abafasha b'abatoza babiri ba AS Muhanga basanganywe Coronavirus bituma umukino wa gicuti wagombaga guhuza iyi kipe na Sunrise FC kuri iki Cyumweru usubikwa.

Ibipimo bishya byafashwe abakinnyi n'abandi bakozi ba AS Muhanga mbere yo gukina umukino wa gicuti na Sunrise FC byerekanye abarwayi 12 ba Coronavirus muri iyi kipe yo mu Ntara y'Amajyepfo.

Itegeko ryo kwipimisha ni ihame ku makipe yose akina Shampiyona y'Icyiciro cya Mbere mu Rwanda mu rwego rwo kwirinda ikwirakwira rya Coronavirus.

Ku rundi ruhande, Sunrise yagombaga gukina na AS Muhanga kuri Stade ya Muhanga yo yipimishirije mu Mujyi wa Kigali.

Nyuma yo kumva inkuru ko ikipe byari bifitanye umukino wa gicuti yabonetsemo ubwandu, Sunrise yahisemo gukora imyitozo yayo yihariye ku kibuga yagombaga gukiniraho.

AS Muhanga yagaragayemo abakinnyi banduye mu gihe habura iminsi irindwi ngo shampiyona y'Icyiciro cya Mbere mu Rwanda isubukurwe.

Nk'uko bigaragara ku ngengabihe yashyizwe ahagaragara n'Ishyirahamwe ry'Umupira w'Amaguru mu Rwanda, imikino ibanza y'amatsinda izakinwa hagati ya tariki ya 1-8 Gicurasi mu gihe iyo kwishyura izaba tariki ya 11-17 Gicurasi 2021.

AS Muhanga iri mu itsinda A rigizwe na APR FC, Gorilla FC na Bugesera FC mu gihe irya B rifatwa nk'irikomeye kurusha ayandi, rigizwe na Rayon Sports, Kiyovu Sports, Gasogi United na Rutsiro FC. Itsinda C rigizwe na Police FC, AS Kigali, Musanze FC na Etincelles FC mu gihe irya D rigizwe na Mukura Victory Sports, Sunrise FC, Marines FC na Espoir FC.

Si ubwa mbere, AS Muhanga igaragayemo abakinnyi banduye Coronavirus kuko ku wa 21 Ukuboza 2020, iyi kipe yagaragayemo abakinnyi batanu banduye Coronavirus, mbere y'uko shampiyona isubikwa.

Source: IGIHE

Source : http://umuryango.rw/imyidagaduro/imikino/article/abakinnyi-10-n-abafasha-b-abatoza-2-basanzwemo-covid-19

Abantu batari munsi ya 82 biciwe mu muriro wadutse ku bitaro bivura abarwaye coronavirus mu murwa mukuru Baghdad wa Iraq.

Abandi barenga 100 bakomerekeye muri uwo muriro, wadutse ku bitaro bya Ibn Khatib mu ijoro ryo ku wa gatandatu.

Amakuru avuga ko impanuka yatumye ububiko (tank) bw'umwuka wa oxygen buturika, bigateza uwo muriro.

Videwo zo ku mbuga nkoranyambaga zigaragaza abazimya umuriro bacicikana bazimya uwo muriro, mu gihe abantu bahungaga bava muri iyo nyubako.

Minisitiri w'intebe wa Iraq Mustafa al-Kadhimi yasabye ko hahita hakorwa iperereza ku byateye icyo yise “impanuka yateje akababaro kenshi”.

Jenerali Kadhim Bohan ukuriye ubwirinzi bwa gisivile muri Iraq, yavuze ko umuriro watangiriye mu gice kivura indembe cyo kuri ibyo bitaro, mu gace “kagenewe gukangura ibihaha”.

Hafi “abarwayi 30 bari barwariye mu gice cyita ku ndembe”, cyari kigenewe abarwayi ba Covid-19 bashegeshwe cyane kurusha abandi i Baghdad, nkuko umukozi wo ku bitaro yabibwiye ibiro ntaramakuru AFP.

Abarwayi bose bajyanwe ku bitaro bindi biri hafi aho.

Mu masaha yo mu rukerera rwo kuri iki cyumweru, uwo muriro wari wahagaritswe, nkuko ikigo cy'ubwirinzi bwa gisivile cya Iraq cyabivuze.

Guverineri wa Baghdad Mohammed Jaber yunze mu rya Minisitiri w'intebe asaba ko hakorwa iperereza ryihutirwa ngo hamenyekane niba hari umuntu ukwiye “kugezwa imbere y'ubutabera” kubera uburangare.

Mu itangazo, akanama ka leta ya Iraq k'uburenganzira bwa muntu kavuze ko ibyabaye ari “icyaha gikorewe abarwayi baciwe intege cyane na Covid-19”.

Abakozi bo mu butabazi bwihuse bavuze ko benshi mu barwayi bapfuye ubwo bakurwaga ku mashini zibaha umwuka wo guhumeka wa oxygen kugira ngo bahungishwe, mu gihe abandi bapfuye bazize guherwa umwuka kubera imyotsi.

Halla Sarraf, ukuriye umuryango utegamiye kuri leta wa Iraq Health Access, yabwiye BBC ati:

“Ubwo umuriro watangiraga umuntu yari acyeneye kuzimya imiyoboro minini iyobora umwuka, ibi urebye bivuze gukata oxygen ku bayicyeneye cyane kurusha abandi”.

Ibitaro byo muri Iraq byagejejwe ku mpera y'ubushobozi bwabyo muri iki gihe cy'icyorezo cya coronavirus, ibi biza byiyongera ku gushegeshwa n'imyaka iki gihugu cyamaze mu ntambara, uburangare na ruswa.

Ubwandu bwa Covid bukomeje kwiyongera cyane muri Iraq kuva mu kwezi kwa kabiri. Umubare w'abanduye bose hamwe barenze miliyoni imwe muri iki cyumweru.

Minisiteri y'ubuzima ya Iraq kugeza ubu yatangaje abanduye coronavirus 1,025,288 n'abo imaze kwica 15,217 kuva iki cyorezo cyatangira.

Mu kwezi gushize, iki gihugu cyatangije gahunda yo gukingira, kandi kimaze kwakira doze hafi 650,000, nyinshi muri zo zabonetse binyuze muri gahunda yo gusaranganya inkingo hagati y'ibihugu bikize n'ibicyennye izwi nka Covax.

BBC

Source : http://umuryango.rw/amakuru/mu-mahanga/ubuzima/article/iraq-abarwayi-82-ba-covid-19-bapfuye-nyuma-yuko-ububiko-bwa-oxygen-buturitse

Umukino wa gicuti wahuzaga ikipe ya RAYON SPORTS FC na Police FC wahagaritswe ku munota wa 23 kubera ko Rayon Sports yari yawuteguye ngo itari yasabye aba Police baza kurinda umutekano.

Rayon Sports yatunguye Police FC iyisaba kuza kuri uyu mukino ku cyumweru nyamara amakuru yavugaga ko uzaba ku munsi w'ejo.

Amakuru avuga ko Rayon Sports yamenyesheje Police FC ko barakina uyu munsi cyane ko no kuwa Gatanu Perezida wayo atigeze atangaza umunsi uzaberaho.

Ubwo yasinyishaga Luvumbu na Muhire Kevin ku munsi w'ejo,nabwo ntihatangajwe igihe uyu mukino uzaberaho.

Uyu mukino wa gicuti wari ugamije gutyaza abakinnyi ku mpande zombi cyane ko yaba Muhire Kevin na Luvumbu bari kuwukina ku ruhande rwa Rayon Sports mu gihe na Police FC yari kureba abakinnyi bayo.

Imikino ibanza y'amatsinda izakinwa hagati ya tariki ya 1-8 Gicurasi mu gihe iyo kwishyura izaba tariki ya 11-17 Gicurasi 2021.

Itsinda rya mbere rigizwe na APR FC, Gorilla FC, Bugesera FC na AS Muhanga mu gihe irya kabiri rifatwa nk'irikomeye kurusha ayandi, rigizwe na Rayon Sports, Kiyovu Sports, Gasogi United na Rutsiro FC.

Itsinda C rigizwe na Police FC, AS Kigali, Musanze FC na Etincelles FC mu gihe irya D rigizwe na Mukura Victory Sports, Sunrise FC, Marines FC na Espoir FC.

Ku munsi wa mbere w'iyi mikino, tariki ya 1 Gicurasi 2021, hazakinwa imikino itanu irimo ibiri yo mu itsinda rya nyuma.

APR FC ifite igikombe cya Shampiyona ya 2019/20, izatangira gukina tariki ya 2 Gicurasi, yakira Gorilla FC iri gukina Icyiciro cya Mbere ku nshuro ya mbere.

Rayon Sports izakira Gasogi United mu mukino uzabera kuri Stade Amahoro tariki ya 2 Gicurasi, iminsi itatu mbere y'uko icakirana n'umukeba w'ibihe byose, Kiyovu Sports tariki ya 5 Gicurasi 2021.

Kuri uyu munsi,abakinnyi 10 ba As Muhanga Football Club n'abafasha b'abatoza 2 basanze banduye COVID-19. Umukino wa Gicuti wari guhuza iyi kipe na Sunrise FC uhise usubikwa.
Amakuru

Source : http://umuryango.rw/imyidagaduro/imikino/article/umukino-wa-gicuti-wahuzaga-rayon-sports-na-police-fc-wahagaritswe-utarangiye

Uyu mugabo w'imyaka 52 asanzwe ari umuhwituzi wibutsa abaturage ibyo bagomba gukora birimo gutanga imisanzu, kubahiriza amasaha yo kuba abantu bageze mu ngo kubera COVID-19 n'ibindi.

Nzahumunyurwa utuye mu Mudugudu wa Rurama, Akagari ka Musenyi mu Murenge wa Mutete, mu Karere ka Gicumbi yatawe muri yombi ku wa 22 Mata 2021.

Yafashwe nyuma y'amagambo 'atoneka' abarokotse Jenoside yakorewe Abatutsi yababwiye ubwo yakusanyaga imisanzu.

IGIHE yamenye ko aya magambo yayavuze nk'ubuhwituzi ubwo yari mu gasoko karemera muri Santere ya Kamasasa i Gicumbi.

Yagize ati 'Abo napfakaje muri Jenoside yakorewe Abatutsi, bansange imbere y'umuryango wo kwa Mvuyekure Onesphore, bitwaje amafaranga 5000 Frw mbabarure.''

Umuvugizi w'Umusigire w'Urwego rw'Igihugu rw'Ubugenzacyaha, Dr. Murangira B. Thierry, yabwiye IGIHE ko Nzahumunyurwa yafashwe anashyikiriza Sitasiyo ya RIB ya Byumba.

Ati 'Iperereza rikomeje gukorwa kugira ngo dosiye ye ishyikirizwe Ubushinjacyaha.''

Nzahumunyurwa Clément yigeze gufungwa imyaka 10 nyuma yo guhamywa uruhare muri Jenoside yakorewe Abatutsi mu 1994, aho nyuma yo kugisoza ararekurwa.

Mu gihe cyo kwibuka hakunze kuboneka ibikorwa bifitanye isano n'ingengabitekerezo ya Jenoside bikorwa n'abantu batandukanye. Mu myaka itanu ishize hagaragayemo ibyaha bigera kuri 440 birimo 114 mu 2017, mu 2018 hagaragara ibyaha 72, mu 2019 ho hagaragaye ibyaha 80, mu 2020 ni 91 naho mu 2021 ho hagaragaye 83.

Mu cyumweru cya mbere cy'ibikorwa byo kwibuka ku nshuro ya 27 Jenoside yakorewe Abatutsi, RIB yakiriye ibirego 87 by'ingengabitekerezo ya Jenoside n'ibindi byaha bifitanye isano nayo hagati ya tariki 7 na 13 Mata 2021.

Mu birego byose byakiriwe na RIB yasanze ibigera kuri 83 ari byo bifitanye isano n'ingengabitekerezo mu byatanzwe byose.

Ibyo birego byatanzwe bishingiye ku byaha bkozwe binyuze mu magambo asesereza abarokotse Jenoside yakorewe Abatutsi byagizwemo uruhare n'umubare munini w'abari hejuru y'imyaka 31.

Mu gihe yahamywa n'urukiko iki cyaha, Nzahumunyurwa Clément yahanishwa ingingo ya karindwi y'itegeko ryo kurwanya ingengabitekerezo ya Jenoside iteganya ko umuntu ukorera mu ruhame kandi ku bushake igikorwa kigamije gushimagiza Jenoside, gushyigikira Jenoside no kwemeza ko Jenoside yari ifite ishingiro aba akoze icyaha. Ukoze kimwe muri ibyo bikorwa ahanishwa igifungo kiri hagati y'imyaka itanu n'irindwi n'ihazabu iri hagati y'ibihumbi 500 Frw na miliyoni 1 Frw.

---

Source : http://igihe.com/amakuru/u-rwanda/article/gicumbi-nzahumunyurwa-wishyuje-5000-frw-abagore-yise-ko-yapfakaje-muri-jenoside

Ibi Filippo Grandi yabigarutseho kuri uyu wa 25 Mata 2021 ubwo yasuraga inkambi ya Gashora icumbikiye izi mpunzi zikomoka mu bihugu bitandukanye birimo Somalia; Ethiopia, Eritrea, na Sudan.

Filippo Grandi wari kumwe na Minisitiri ushinzwe ibikorwa by'Ubutabazi, Marie Solange Kayisire yatambagijwe ibice bitandukanye by'iyi nkambi birimo ivuriro, inzu batuyemo n'inzu ikorerwamo imirimo y'ubukorikori itandukanye.

Nyuma yo gusura ibice bitandukanye by'iyi nkambi, Filippo Grandi yavuze ko gushyiraho iyi Nkambi ya Gashora cyari igitekerezo cya Perezida Kagame kugira ngo abimukira bakorerwaga ibikorwa bibi muri Libya babone aho bajya hatekanye.

Ati 'Nishimiye kuba ndi hano muri iki kigo. Iki kigo cyavutse biturutse ku gitekerezo cya Perezida Kagame. Aha hari mu gihe Isi yose yabonaga mu itangazamakuru amashusho ateye ubwoba y'ibigo bifungirwamo abantu muri Libya aho abantu benshi baturutse mu bihugu bitandukanye barimo bahura n'akaga.'

'Icyo gihe Perezida Kagame yari Umuyobozi w'Umuryango wa Afurika yunze Ubumwe (AU). Mu ijambo yagejeje ku bantu yavuze ko u Rwanda rushaka gufasha, navuganye na we yemera ko dushobora gutangiza uburyo bwo gushyiraho ahantu abantu bavuye muri ibi bigo bashobora gushyirwa bakitabwaho akaba ari naho hashakirwa ibisubizo by'ibibazo bafite bijyanye no kujya mu bindi bihugu.'

Filippo Grandi yavuze ko inkambi nk'izi zakirirwamo impunzi zaturutse muri Libya ari ebyiri zonyine ku Isi harimo n'iherereye muri Niger.

Yavuze ko ashimira Perezida Kagame n'Abanyarwanda kuba baremeye gufata inshingano zikomeye zo kwakira izi mpunzi ziturutse muri Libya.

Ati “Ibi nibyo bihugu byaje biravuga biti turashaka gufatanya inshingano. Mu by'ukuri ndashaka kugaragaza ishimwe ryanjye kuri Perezida Kagame n'Abanyarwanda ku kuba baremeye gufata inshingano. Ni inshingano ziremereye, kugira abantu amagana hano ku butaka bwanyu no mu gihugu cyanyu mukabakira muri ibi bihe bikomeye, turi gushyira umuhate mu kubashakira ibisubizo.”

Yashimye uburyo impunzi zifashwe

Bitewe n'ubuzima yabonye babagamo muri Libya, Filippo Grandi yavuze ko yashimye uburyo yasanze izi mpunzi zifashwe mu Rwanda, aho zihabwa ibijyanye na serivisi z'ubuvuzi, burimo n'ubw'indwara zo mu mutwe.

Ati 'Nanyuzwe cyane n'akazi kakozwe na Guverinoma y'u Rwanda, UNHCR na sosiyete sivile kuko dufite imiryango ikora akazi k'ingirakamaro. Icyanshimishije ni ukuganira n'abantu bacumbikiwe hano, twabonye umuryango waturutse muri Somalia, abasore bavuye muri Eritrea na Ethiopia.'

'Mu by'ukuri banyuze mu bibazo byinshi. Iki kigo kuri bo cyabarokoreye ubuzima bitari uko hano babasha kuhabonera ahazaza ku bijyanye n'ubuzima bwabo ahubwo ari ukubera ko bitabwaho, yaba mu bijyanze n'ubuzima busanzwe nk'abafite uburwayi, ibikomere cyangwa inzara bitabwaho ariko nanone bakitabwaho mu bijyanye n'ubuzima bwo mu mutwe.”

“Nakubwira ko nasuye bimwe mu bigo bari bafungiyemo muri Libya, banyuze mu bibazo bikomeye, iyicarubuzo, ihohoterwa, gukoreshwa no gufatwa ku ngufu. Kuba babona ubufasha mu bijyanye n'ubuzima ni ingenzi cyane.'

Bamwe muri izi mpunzi baganiriye na Filippo Grandi bamugaragarije ko bafashwa byihuse kugira ngo babone ibisabwa byose byabafasha kwimurirwa mu bindi bihugu. Yababwiye ko gahunda zo kubimurira mu bindi bihugu zagiye zidindizwa n'icyorezo cya COVID-19 ariko abizeza ko zigiye kwihutishwa ku bufatanye n'ibihugu byemeye kubakira.

Minisitiri Kayisire yavuze ko bagize umwanya wo kuganira na Filippo Grandi ku bibazo byugarije impunzi birimo n'ikijyanye n'uko inkunga zagenerwaga yagabanutse.

Uretse gusura Inkambi ya Gashora, biteganyijwe ko Grandi ari buhe ikaze irindi tsinda ry'impunzi 122 ziturutse muri Libya u Rwanda rwakira ku mugoroba wo kuri iki Cyumweru, tariki 25 Mata 2021.

Mu gusoza urugendo rwe, azakomereza i Burundi aho azajyana n'impunzi z'Abarundi zizaba zitashye.

U Rwanda rwatangiye kwakira bwa mbere impunzi ziturutse muri Libya mu Ugushyingo 2019, kugeza ubu rukaba rumaze kwakira abagera 515 barimo n'abamaze kwimurirwa mu bindi bihugu.

Amasezerano areba impunzi zimwe z'Abanyafurika zaheze muri Libya ziri mu mayira zishaka kujya i Burayi, yashyizweho umukono tariki ya 10 Nzeri 2019 hagati y'u Rwanda, Umuryango wa Afurika yunze Ubumwe (AU) n'Ishami ry'Umuryango w'Abibumbye ryita ku mpunzi, UNHCR.

Ibikubiye mu masezerano ni uko leta y'u Rwanda igomba gutanga uburinzi kuri izi mpunzi, UNHCR ikagira uruhare mu kuzibeshaho.

Umwanzuro wo kuvana izi mpunzi muri Libya wafashwe nyuma y'uko aho ziri hari hatangiye kuraswa, ikibazo cyatijwe umurindi n'uko Libya yugarijwe n'umutekano muke nyuma y'ihirikwa rya Muammar Gaddafi, ku buryo igihugu kidafite ubutegetsi buhamye ngo buzirengere.

Umuyobozi w'Ishami ry'Umuryango w'Abibumbye ryita ku Mpunzi(UNHCR) Filippo Grandi yatemberejwe ibice bitandukanye bigize iyi nkambi yatujwemo impunzi zavuye Libya

Filippo Grandi na Minisitiri Kayisire basobanurirwa uko serivisi z’ubuvuzi zihagaze muri iyi nkambi

Yagize umwanya wo gusura inzu zitandukanye izi mpunzi zatujwemo

Filippo Grandi na Minisitiri ushinzwe ibikorwa by’Ubutabazi baganira n’umwe mu miryango ikomoka muri Somalia

---

Source : http://igihe.com/amakuru/u-rwanda/article/perezida-kagame-yashimiwe-ku-nshingano-ziremereye-yafashe-zo-kwakira-impunzi