Category: Uncategorized

Ibi byatumye benshi bafatira hafi amahirwe babonye yo guhugura abayobozi n'abakozi kugira ngo barusheho gutanga serivisi zinoze nka bimwe mu bikurura ba mukerarugendo.

Imwe muri porogaramu z'amahugurwa zabafashije, ni gahunda ya 'Hanga Ahazaza' yatangijwe na Mastercard Foundation ku bufatanye n'abafatanyabikorwa batandukanye barimo kaminuza ya Cornell SC Johnson College of Business, ubusanzwe ifite icyicaro muri Leta Zunze Ubumwe za Amerika, mu Mujyi wa New York.

Umuyobozi wa Mastercard Foundation mu Rwanda, Rica Rwigamba, yavuze ko intego nyamukuru y'aya mahugurwa ari gufasha urubyiruko rugera ku 30.000 kugira ubushobozi buhagije bwo gukora ibijyanye n'ubukerarugendo.

Yongeyeho ati 'Mu gihe intego ikiri imwe, turi gukorana n'abafatanyabikorwa bacu gutanga porogaramu zitandukanye yaba mu Isi ihanganye na Covid-19 cyangwa na nyuma yayo, twubaka ubushobozi mu bijyanye n'ubukerarugendo ndetse tunakoresha ikoranabuhanga mu gutanga amahugurwa ku banyeshuri.'

Kuva mu 2018, imishinga irenga 100 imaze guhabwa amahugurwa muri iyi porogaramu ya 'Hanga Ahazaza' ndetse hafi abakozi 800 bayikuyemo umusaruro ugaragara.

Kumva neza akazi bakora byatumye bamwe bahindura imikorere

Abahawe aya mahugurwa bemeje ko amasomo bafashe cyane cyane ajyanye no kubahugura uko bakora akazi neza kinyamwuga yabakuye ku rwego rumwe akabashyira ku rundi.

Umuyobozi w'abakozi muri hoteli ya One and Only Resort ikorera muri Pariki y'Igihugu ya Nyungwe, Jeanne Kayitesi, wohereje mu mahugurwa abakozi 32 muri 200 yari afite, yavuze ukuntu hari umukozi (wari uri ku rwego rwa manager) mu bo yohereje wahinduye imikorere amaze guhabwa amahugurwa ku buryo byatumye azamurwa mu ntera.

Ati 'Aya masomo yaramuhinduye, nabonye impinduka zikomeye mu miyoborere ye kuva yatangira gukora.'

Shehzad Rajani, ushinzwe ibikorwa by'imari muri hoteli ya Radisson Blu Kigali, ni umwe mu bayobozi bahawe amasomo muri Cornell University Hanga Ahazaza mu gihe cya Covid-19. Yavuze ko nubwo yakoze igihe kinini mu bijyanye n'imari, hari ibishya yungukiye mu masomo yahawe.

Yongeyeho ati 'Ubu ndi gushyira mu bikorwa ibyo nize, nabaye umuyobozi wumva abakozi be. Mbabaza intego zabo, ibyo bitegura gukora n'icyo biteganya kugeraho mu gihe kiri imbere. Igihe cyose bumva banyegera tukaganira nkabatega amatwi.'

Umuyobozi w'abakozi muri Radisson Blu and Kigali Convention Center, Eric Semuzima , yavuze ko yabonye itandukaniro rya mbere y'uko abakozi bahabwa amahugurwa na nyuma yaho.

Ati 'Ubu abakozi basigaye batinyuka bakavuga, bagashyikirana n'abagenzuzi babo mu kugaragaza ibibazo no kubishakira ibisubizo. Bifitiye icyizere ku buryo batagikenera umuntu uberekera kuri buri kazi bahawe, ndetse muri gahunda zacu ziri imbere, tuzatanga amahirwe ku bakozi bajye kwiga aya masomo.'

Aline Rwubaka, ushinzwe ibikorwa muri Primate Safari itanga serivisi z'ubukerarugendo we yagize ati 'Umushinga wacu wateye imbere, iyi porogaramu yatwubuye amaso itwereka uko ibyo dukora (ubukerarugendo) bikorwa. Ubu ntega amatwi abo dukorana niyo naba mfite akazi kanshyira ku gitutu.'

Umwe mu banyeshuri babaye indashyikirwa muri Cornell Hanga Ahazaza, Henry Hakundwumukiza, byamuhaye amahirwe yo kuba umwe mu barimu batanga amasomo muri iyi porogaramu.

Umuyobozi w'iyi porogaramu, Kim Szpiro, yagize ati 'Hari ba Henry babiri, Henry wa mbere y'amahugurwa ya Cornell na Henry wa nyuma yayo. Yavutse bundi bushya. Ubu Henry ni umunyeshuri, ni umwalimu, ni umufashamyumvire, ni rwiyemezamirimo ndetse yatangije n'urubuga rwa YouTube rwitwa 'Gourmet School of Culinary Arts' aho atanga amasomo yo guteka.'

Yongeyeho ko Henry yatanze umusanzu mu gutegura integanyanyigisho za Leta z'isomo ry'ubutetsi mu mashuri yisumbuye na kaminuza.

Haracyakenewe kongera ingufu mu bijyanye n'ubukerarugendo n'amahoteli mu Rwanda

Nubwo hari icyahindutse mu mitangire ya serivisi no mu mikorere ya bamwe mu bakozi ba hoteli n'abakora muri sosiyete z'ubukerarugendo, haracyakenewe kongerwamo izindi imbaraga cyane ko bikiri ibintu bishya mu Rwanda.

Mu by'ingenzi bikenewe harimo kumenya ururimi rw'Icyongereza neza, kumenya uko umukiliya aganirizwa, uburyo bwiza bwo gutanga serivisi, uko bateza imbere imishinga yabo ndetse no guhugurwa mu bijyanye no kwandika zimwe mu nyandiko zikoreshwa mu kazi zirimo gusubiza ubutumwa bw'abakiliya, ibibazo byabo, gutanga raporo n'ibindi.

Rwubaka yavuze ko mu Rwanda hakenewe kaminuza nyinshi zitanga impamyabushobozi z'icyiciro cya kabiri ndetse n'icya gatatu cya Kaminuza mu masomo y'ubukerarugendo n'amahoteli nka bimwe biteza imbere igihugu.

Gahunda ya Cornell Hanga Ahazaza ifite intego yo gufasha urubyiruko kubona akazi no kumenya birushijeho akazi k'ubukerarugendo n'amahoteli uko gakorwa.

Kim Szpiro uhagarariye Cornell Hanga Ahazaza, yavuze ko iyi kaminuza igirana imikoranire ya hafi n'abandi bafatanyabikorwa ba Mastercard muri iyi gahunda hagamijwe guteza imbere ubukerarugendo n'amahoteli.

Gahunda ya Hanga Ahazaza yatangijwe na Mastercard Foundation izakomeza gutanga amasomo kugeza mu 2023, kuko ni gahunda yagenewe imyaka itanu, ikarangira itanzweho miliyoni 50$.

Mu bushakashatsi bwakorewe ku barangije amasomo muri Cornell University Hanga Ahazaza, muri Werurwe 2021, bwagaragaje ko 94% y'abahuguwe byabafashije mu kazi kabo, 28% bazamurwa mu ntera, 39% bongerewe umushahara, mu gihe abandi 14% batangiye business zabo ku giti cyabo.

Cornell University Hanga Ahazaza itanga amasomo ya Hospitality Management, Recognition of Achievement in Service Excellence ndetse na Specialization Certificate.

Ukeneye gufata amasomo ya Cornell Hanga Ahazaza, wakwiyandikisha unyuze ku rubuga www.ecornell.com/portal/hanga-ahazaza-apply/ cyangwa ukandikira umuyobozi wayo Kim A. Spziro kuri e-mail [email protected] cyangwa ugahamagara kuri 0786 406 120.

Binyuze muri gahunda ya 'Hanga Ahazaza' abakozi b’ibigo birenga 100 bamaze guhugurwa

Hari abantu bakora amasezerano y'ubuzima bwabo, ibi bigira ingaruka ku muhanzi cyane ko ari ho twibanze cyane kubera ko hari ingero nyinshi urebeye nko muri Nigeria aho umuhanzi witwaga Kiss Daniel kuri ubu asigaye witwa Kizz Daniel kubera ko izina rye na ryo ryari riri mu masezerano y'abamurebereraga inyungu ze bakaza kurimubuzaho uburenganzira.

Mu kiganiro n'abanyamakuru hari aho Badrama yari ari gusobanura kuri Marina wagiye atamumenyesheje avuga ko hari ibyo batari bicara ngo baganire harimo uburyo azagira uruhare ku bihangano bya Marina, ku masezerano ye no ku mikoreshereze y'izina rye. Aha ni ho umunyamakuru Ally Soudy yahise afatira abaza Badrama ko yasobanurira abantu neza uburyo imikoreshereze y'izina rya Marina bizagenda. 

Yagize ati “(…) Yeah! Izina na ryo rigira Copy right”. Badrama ati “Oya ntabwo naje gusobanura ibibazo biri Technical, ibyo ni ibintu bishobora gukorwa n'abacamanza, ibyo ni ibintu bishobora gukorwa na Marina, icya mbere ni ukwicara na Marina ibyo bibazo tukabyigaho kubera ko birahari, njyewe na Marina ibyo turabizi”. Ally Soudy amubajije uko bihagaze Badrama yabiciye ku ruhande cyane avuga ko ari ibyo mu kazi.

Ibi yabitangarije mu kiganiro n’itangazamakuru ubwo yavugaga ko Marina uherutse gusezera muri The Mane atari abizi ndetse ko atigeze abimenyeshwa cyane ko atari akwiye kuva muri The Mane uko yishakiye.

Badrama yavuze ko isezera rya Marina atari arizi

Ku mpamvu z’uko Marina yasezeye kandi gusezera hari ibyo bamukozeho bishobora kugira ingaruka kuri uyu muhanzikazi cyane ko bica amarenga ko byaba bimeze nk'iby’uyu muhanzi wo muri Nigeria aho Marina ashobora kuba yarasinye ibizatuma agaruka cyangwa bakitabaza inkiko n'ubwo uyu mugabo aterura ngo avuge ukuri neza kuri uyu muhanzikazi.

Yagize ati “Marina afite uburenganzira bwo kuvuga ngo ndajya aha n'aha ariko ntabwo ibye birasobanuka, Queen Cha niwe muhanzi wenyine utarigeze abangamira amategeko n'ubwo kontaro ye hari ibyo tukiganiraho kubera ko ntabwo irasetswa, kuri Marina rero we impamvu yahagaritse amasezerano kenshi aba adashobora kuzitanga mu biganiro atanga cyangwa akaba yabitanga mu rukiko”.

Badrama yakomeje avuga ko amasezerano ya Marina harimo ikibazo, ati “Marina afite uburenganzira bwo kuvuga ngo ndi aha n'aha ariko ntabwo byumvikanyweho nta n'impamvu twamenyeshejwe twabonye ibaruwa adushimira n'uwo ariwe ariko avuga ko agiye gukomereza urugendo rwe ahandi kandi nta muntu upfa gusezera gutyo''

Badrama kandi yongeye gukomoza ku buryo yabonye umuhanzikazi Marina amukuye kwa Uncle Austin kandi ko hari icyo yamutanzeho avuga kandi ko byari bikurikije amategeko ndetse ko byaciye mu mucyo rero uyu muhanzikazi nawe yari akwiye kugenda biciye mu mucyo

Biraca amarenga ko Marina ashobora kwamburwa izina

Bibaye aribyo koko nk'uko Badrama yabivuze hakwiyambazwa inkiko kubera ko Badrama we yavuze ko Marina agomba kongera akicara agatekereza ku byo yakoze akareba niba ari ukuri kandi ko ari inshingano za Badrama kugana inkiko n'ubwo bizaterwa n'ibihe biriho aho yahise atanga ingero kuri Safi Madiba nawe bagombaga kugera mu nkiko ariko bikaza kurangira neza atebya cyane ati “Na n’ubu Safi turi inshuti”.

No mu bihe bigoye Badrama yabaga ari kumwe na Marina

Kiyovu Sports yamaze kwirukana umutoza mukuru w’iyi kipe, Karekezi Olivier, amakuru avuga ko kimwe mu byo yazize ari ukudakinisha rutahizamu w’iyi kipe, Babawu Samson wanze gukoresha amarozi.

Amakuru ISIMBI ifitiye gihamya ni uko uyu mubabo wari umutoza mukuru wa Kiyovu na rutahizamu ukomoka mu gihugu cya Nigeria, Babuwa Samson, umubano wabo utari umeze neza.

Intandaro ya byose ni uko uyu mutoza yaba yarasabye uyu mukinnyi kimwe n’abandi gukoresha uburozi benshi bazi nka ‘Juju’ undi akanga.

Ku mukino wabaye ku munsi w’ejo hashize ku wa Gatandatu tariki ya 1 Gicurasi 2021, ufungura itsinda B rya shampiyona, Kiyovu Sports yatsinzwe na Rutsiro FC 2-1, ni umukino uyu rutahizamu atagaragayemo.

Amakuru ISIMBI yamenye ni uko uyu rutahizamu yanze gukoresha ‘Juju’ (amarozi benshi bizera ko atanga intsinzi muri ruhago) maze umutoza ahitamo kumushyira hanze.

Umwe mu nshuti za hafi z’uyu mukinnyi yabwiye ISIMBI ko yamaze kubwira ubuyobozi bw’iyi kipe ko igihe cyose bazaba bamusaba gukoresha uburozi atazigera akandagira mu kibuga kuko bihabanye n’imyizerere ye.

Andi makuru ISIMBI yamenye ni uko uyu mukinnyi uri ku musozo w’amasezerano ye muri Kiyovu Sports aho azarangira mu kwezi gutaha, yamaze gufata umwanzuro ko atazongerera iyi kipe yambara icyatsi n’umweru.

Ibi ni bimwe mu byarakaje perezida wa Kiyovu Sports, Mvukiyehe Juvenal kuko atumva uburyo umukinnyi yaguze amuhenze(yatanzweho miliyoni 8 asinya umwaka umwe) yicazwa nta mvune afite ngo kuko yanze gukoresha amarozi, bahitamo gutandukana n’uyu mutoza.

Ku mugoroba wo kuri iki Cyumweru nibwo Kiyovu Sports yasohoye ibaruwa ivuga ko yamaze gutandukana na Karekezi Olivier wayigezemo muri Gicurasi 2020.

Karekezi Olivier yamaze kwirukanwa muri Kiyovu Sports

Babuwa Samson yanze gukoresha Juju, bikozeho umutoza Karekezi Olivier

Aka gace ka mbere ka Tour du Rwanda 2021 kahagurukiye kuri Kigali Arena gasorezwa i Rwamagana nyuma yo gukora intera y'ibilometero 115,6.

Abakinnyi 80 bavuye mu makipe 16 yitabiriye irushanwa ry'uyu mwak bahagurukiye kuri Kigali Arena bazamuka kuri KIE- kwa Rwahama, Umushumba Mwiza — Inyange- Masaka Hospital- Kabuga — Rwamagana. Abakinnyi bageze i Rwamagana kuri Dereva Hotel ahasorejwe isiganwa, barazengurutse inshuro 10, zifite intera ya kilometero 6.5.

Agace ka mbere ka Tour du Rwanda 2021 karimo umusozi umwe watangiweho amanota y'abahatanira umwenda w'abarusha abandi kuzamuka imisozi, yegukanwe na Mohd Zariff wa Terengganu yo muri Malaysia wakurikiwe na  Suaza ukinira Team Medellin yo muri Colombia.

Abakinnyi barimo Suaza wa Team Medellin yo muri Colombia, Teugels wa Tarteletto yo mu Bubiligi na Mohd Zariff wa Terengganu yo muri Malaysia, bakomeje kuyobora bagenzi babo, aho basesekaye muri Rwamagana barusha igikundi kibakurikiye iminota ibiri.

Abanya-Colombia bakomeje gusiga abo bari bahanganye, dore ko ubwo bari basigaje kuzenguruka inshuro enye gusa barushaga igikundi kibakurikiye amasegonda 58.

Ubwo hari hasigaye ibilometero 20 ngo abakinnyi bagere aho basoreza, Teugels, Suaza na Sagiv bari basizeho igikundi kibakurikiye cyarimo abakinnyi b'ikipe ya Start-Up Nation yo muri Israel, amasegonda 14.

Hasigaye ibirometero 15 ngo aka gace gasozwe, abakinnyi barimo Hivert wa B&B Hotels, Roldan wa Medellin na Marchand wa Tarteletto bacomotse mu gikundi barimo, banagisigaho amasegonda 15.

Hasigaye ibilometero 10 ngo bagere aho basoreza abakinnyi 8 basohotse mu gikundi barimo  bashaka uwegukana aka gace, barimo Sanchez (Medellin), Boileau (B&B Hotels), Umba (Androni), Weldemichael (Erythrée), Goeman (Tarteletto), Gaillard (Total Direct Energie), Kagimu (Bike Aid), Piccoli (Israel Start-Up Nation).

Habura ibilometero 8 ngo bagere ku musozo Piccoli wa Israel Start-Up Nation yasize bagenzi be arijyana anyonga igare ashaka kugera ku murongo ari uwa mbere.

Umunya-Colombia Brayan Sanchez Vergara Stiven ukinira Team Medellin niwe wegukanye agace ka mbere  atanze ku murongo bagenze barenga 40 bahagereye rimwe, ariko ipine y'igare rye ikora mu murongo mbere y'izindi zose.

Hakizimana Sept niwe munyarwanda wasoje ku mwanya wa hafi, dore ko yasoje ku mwanya wa 14 akoresheje ibihe bimwe n'uwambere.

Kuri uyu wa mbere tariki ya 03 Gicurasi 2021 Tour du Rwanda irakomeza hakinwa agace ka kabiri ka Kigali- Huye ku ntera y'ibilometero 120.5.

Sanchez ukomoka muri Colombia niwe wegukanye agace ka mbere ka Tour du Rwanda 2021

Ikipe ya SACA iri mu ziserukiye u Rwanda muri iri rushanwa

Abasiganwa bahagurukiye kuri Kigali Arena

Team Rwanda mu nzira banyonga

Abasiganwa bageze aho basoreza bahatanye ipine ku rindi ‘Sprint’

Sanchez yatanze abandi gukandagira mu murongo, ahita yegukana agace ka mbere ka Tour du Rwanda 2021