Webrwanda Backend

Category: Uncategorized

  • Isango Star yahaye igihembo cyihariye Butera… – #rwanda #RwOT

    Ni igihembo yashyikirijwe mu ijoro ry'iki Cyumweru tariki 20 Kamena 2021, binyuze mu ikiganiro 'Sunday Night' cya Radio Isango Star gikorwa na Kavukire Alex [Kalex], Kayitesi Yvonne [Stecy] na Ian Shema.

    'Sunday Night Achivers Award' ni igihembo cyatanzwe ku nshuro ya mbere, ariko hari gahunda y'uko kizajya gitangwa buri mwaka, kigahabwa umuhanzi ufite ibikorwa by'indashyikirwa mu muziki we.

    Mu ijambo rye, Umuyobozi Mukuru wa Isango Star, Jean Lambert Gatare, yavuze ko Radio Isango Star yishimanye na Butera Knowless muri iki gihe gisaga imyaka 10 amaze mu muziki, ndetse na Album ya Gatanu yise 'Inzora' yamurikiye Abanyarwanda.

    Jean Lambert Gatare yavuze ko 'Nka Isango Star twasubije amaso inyuma dusanga tutagushimiye twaba twirengagije imbaraga wakoresheje zibonwa na buri wese muri iyi myaka isaga 10.'

    Akomeza ati 'Ntabwo byari byoroshye kubinyuramo, kandi ukabyitwaramo neza. Ntabwo bishoborwa na buri wese…Warakoze cyane.'

    Nyuma yo guhabwa iki gihembo, Knowless yavuze ko Isango Star yabaye Radio iya mbere mu Rwanda imuhaye igihembo cyo kumushimira mu muziki we.

    Avuga ko binyuze umutima we, kandi bigaragaza ko ibikorwa bye bigera kumubare munini.

    Ati 'Ndanezerewe cyane mu mutima wanjye. Nuzuye amashimwe menshi [Akubita agatwenge]. Nkuko nabivuze Isango iri muri Radio zamfashije kuva ntangira kugeza n'uyu mwanya, by'umwihariko. Kuko ni mu rugo, nta kintu na gito nabuze guhera ngira ngo ku ndirimbo imwe ntaranayirangiza ubanza yarahise ihitira hano.'

    Akomeza ati 'Kandi nanone nk'uko nabivuze iyo ukoze ikintu kikishimirwa niyo ntsinzi ya mbere uba ugize, rero bivuze byinshi cyane…Kunterekeza, mbese sinzi Imana ibahe umugisha cyane.'

    Knowless yavuze ko umukozi mwiza ari ukora kugira ngo akazi kagende neza, ariko ko iyo ugize amahirwe ugakora 'uwo ukorera akishima akagushima akakwereka ko ibikorwa byawe yabibonye yabishimye niyo ataguhemba, niyo atakora mu mufuko ngo aguhe amafaranga umushahara wawe ukorera, ariko yabyishimiye nicyo kintu cya mbere gishimisha.'

    Uyu muhanzikazi yavuze ko nta kintu cyinyura umutima we nko kuba imyaka 10 amaze mu muziki yahuriyemo n'ibicantege n'ibiterambaraga 'yaravunikiye ukuri'.

    Avuga ko abashima intambwe atera mu muziki we aribo batuma akomeza gukora umuziki mu rugendo adateganya gusoza vuba. Ati 'Ndishimye cyane. Ngira ngo mbwire abakunzi ba Isango Star ntabwo mwahisemo nabi. Muranshimije pe cyane. Kandi n'Umuyobozi [Jean Lambert Gatare] abyumve y'uko nishimiye n'umutima wanjye wose ndamushimiye.'

    Mu gihe cy'imyaka 10 amaze mu muziki, Butera Knowless yashyize ku isoko Album eshanu. Yabaye umuhanzikazi wa mbere wegukanye irushanwa rya Primus Guma Guma Super Stars, atwara ibihembo by'imbere mu gihugu no hanze.

    Uyu muhanzikazi yaririmbye mu bitaramo no mu birori bikomeye, akomeza gusohora indirimbo agerekana n'inshingano z'urugo yubakanye na Ishimwe Karake Clement.

    Isango Star iri muri Radio zimaze igihe ziteza imbere umuziki w'u Rwanda. Ifite ibiganiro byihariye by'imyidagaduro bizamura abahanzi, kandi bigaha umwanya munini umuziki w'u Rwanda. Byanatumye iki gitangazamakuru gifungura Televiziyo [Isango Star Tv], ifite ishami ry'ibindi biganiro.

    Inkuru wasoma: Karibu mu cyumba cy’amateka ya Knowless, umunyarwandakazi ugwije ibigwi mu muziki

    Butera Knowless yavuze ko akozwe ku mutima n'igihembo yahawe na Isango Star, ashima Jean Lambert Gatare  Mu myaka 10 yuzuye ari mu muziki, Knowless yatanze ibyishimo mu nguni zose z'ubuzima  Knowless yavuze ko Radio Isango Star yamuhaye hafi kuva ku munsi wa mbere akandagiza ikirenge mu muziki  Uhereye ibumoso: Kavukire Alex [Kalex], Butera Knowless, Ian Shema na Kayitesi Yvonne [Stecy]  Isango Star yahaye igihembo 'Sunday Nighy Achivers Award' wizihiza imyaka 10 mu muziki

    Source : https://inyarwanda.com/inkuru/106772/isango-star-yahaye-igihembo-cyihariye-butera-knowless-106772.html

  • Musanze: Abagore baranenga bagenzi babo bijanditse muri Jenoside yakorewe Abatutsi #Rwanda #RwOT via @kigalitoday #rwanda #RwOT

    Abitabiriye umuhango wo kwibuka bunamiye inzirakarengane zazize Jenoside
    Abitabiriye umuhango wo kwibuka bunamiye inzirakarengane zazize Jenoside

    Ibyo babitangarije mu muhango wabereye mu Karere ka Musanze ku wa kane tariki 18 Kamena 2021, wo kwibuka abagore n’abana bazize Jenoside yakorewe Abatutsi, wateguwe n’abagize Urugaga rw’Abagore rushamikiye ku muryango RPF Inkotanyi bo mu Murenge wa Muhoza.

    Mukamulisa Aurelie, ukuriye urwo rugaga mu Murenge wa Muhoza yagize ati “Tubabazwa cyane n’uko hari abagore batwambitse icyasha bijandika mu bikorwa byo kwica Abatutsi mu gihe cya Jenoside yabakorewe. Burya umugore yifitemo imiterere karemano yo kuba agira uruhare mu gutanga ubuzima.Tugaya abatandukiriye bagakoresha imbaraga mu kwambura ubuzima abo babuhaye”.

    Ati “Bumve ko ibyo bakoze bikidutera ikimwaro kandi ntituzahwema kubyamagana bitubabaza kuko barengereye cyane”.

    Mu kwibuka abagore n’abana bazize Jenoside, abagore bagize Urugaga rushamikiye ku muryango RPF Inkotanyi mu Murenge wa Muhoza, bahamagariye umuryango nyarwanda guharanira ko Jenoside yakorewe Abatutsi itazongera kubaho ukundi.

    Mukamulisa ati “Iki gikorwa kuri twe gifite uburemere bukomeye cyane mu mitima yacu. Kwibuka bitubera umwanya wo gusubiza amaso inyuma, tugatekereza uko inzirakarengane z’abagore zishwe zitageze ku ntego yo kwirerera abana bari barabyaye ngo bakure, bitewe n’uko ayo mahirwe bayavukijwe. Kwibuka ayo mateka yose tuba dushaka kubwira abato ububi bwa Jenoside, kugira ngo na bo bazakurane umutima w’uko itazongera kubaho ukundi”.

    Abitabiriye uwo muhango batarenga 20 kubera amabwiriza yo kwirinda Covid-19, bakoze urugendo ruturuka ku biro by’Umurenge wa Muhoza, berekeza ku rwibutso rwa Muhoza, rushyinguwemo abasaga 800 biciwe mu cyahoze ari Cour d’Appel Ruhengeri.

    Mukamulisa Aurelie ukuriye Urugaga rw
    Mukamulisa Aurelie ukuriye Urugaga rw’Abagore rushamikiye ku Muryango RPF Inkotanyi

    Bashyize indabo ku mva bunamira izo nzirakarengane, nk’ikimenyetso cyo kubibuka no kubasubiza agaciro bambuwe.

    Umuyobozi wa Ibuka mu Murenge wa Muhoza, Hamza Iddi, yabwiye abitabiriye uwo muhango ko bafite uruhare rukomeye mu gusigasira amateka no gukumira abayagoreka.

    Yagize ati “Amateka y’igihugu cyacu arebana n’uko Jenoside yateguwe ikanashyirwa mu bikorwa, ni ngombwa ko twirinda ko hagira uyagoreka cyangwa ngo ayasibanganye. Iyo twibuka Jenoside yakorewe Abatutsi, tugasura hamwe mu habitse ayo mateka, ni uburyo bukomeye tuba dukwiye kubakiraho tuyasigasira ariko kandi twirinda kuyihererana ahubwo tukayasakaza mu bagize imiryango yacu, kugira ngo n’abayamenya mu buryo busobanutse bazakomeze kuba uruhererekane”.

    Abo bagore bashimangiye ko nyuma y’imyaka 27 ishize Jenoside yakorewe Abatutsi ihagaritswe, hari ibikorwa byinshi bizamura imibereho n’ubukungu byakozwe, mu kubaka igihugu cyari cyarashegeshwe n’amateka mabi. Bityo ngo ntibazigera bemerera uwo ariwe wese wakongera kugisubiza inyuma.

    Hari imiryango itishoboye abo bagore bashyikirije ubufasha

    Mukandayisenga Justine, ni umubyeyi w’abana babiri worojwe inka, akaba ayitezeho kubona amata n’ifumbire.

    Yagize ati “Nishimiye inka aba babyeyi b’abanyamuryango ba RPF Inkotanyi bangabiye. Twanywaga amata ari uko tuyasabye cyangwa tuyaguze, ariko kuva uyu munsi nishimiye ko bihindutse, kuko twabonye inka izajya idukamirwa. Ubu sinatinya no kwatisha umurima, ngahinga kuko n’ifumbire izajya iboneka ari nyinshi. Urumva ko ubukene bugiye kuba amateka. Ndashimira Umukuru w’Igihugu cyacu Kagame, wimakaje uyu muco wo koroza abatishoboye”.

    Mukandayisenga Justine worojwe inka ngo imufashe kuzamura ubukungu
    Mukandayisenga Justine worojwe inka ngo imufashe kuzamura ubukungu

    Uyu muryango wagabiwe inka wiyongeraho indi miryango ibiri harimo uwashyikirijwe ibikoresho byo mu nzu, bigizwe n’intebe, ibitanda n’ibiryamirwa undi ushyikirizwa ibiribwa n’ibikoresho by’ibanze by’isuku.

    Urugaga rw’Abagore rushamikiye ku muryango RPF Inkotanyi rwabibashyikirije mu rwego rwo gushyigikira imigambi ya RPF Inkotanyi y’uko buri Munyarwanda agira imibereho myiza.

  • Kicukiro: Abaturage bikoreye imihanda ya kaburimbo y’ibirometero birenga bitanu #Rwanda #RwOT via @kigalitoday #rwanda #RwOT

    Bamaze kwiyubakira imihanda ya kaburimbo ya Km 5.3
    Bamaze kwiyubakira imihanda ya kaburimbo ya Km 5.3

    Iyo mihanda yatashywe ku mugaragaro ku Cyumweru tariki 20 Kamena 2021, abaturage bashimirwa ubufatanye bubaranga mu kwishakamo ibisubizo badategereje ko Leta ari yo ibakorera byose.

    Umuturage wo mu Mudugudu wa Mpinga ya Nyanza, Akagari ka Rukatsa, Aimable Ruzima, avuga ko igitekerezo cyaturutse mu baturage ubwabo, kuko muri ako gace hari imihanda y’igitaka yatumaga hagaragara nabi kandi hamaze gutera imbere.

    Agira ati “Hano hari iterambere ry’imiturire, ariko hakaba ikibazo cy’imihanda itari ikoze neza, rimwe na rimwe imodoka z’abaturage zananirwaga kwinjira mu bipangu kubera icyondo, zikanyerera”.

    Nyuma yo kwicara bagatekereza icyo bakora kuri icyo kibazo, Ruzima avuga ko abaturage batanze imisanzu yabo y’amafaranga, ariko ko ayo gukorera iyo mihanda icyarimwe atahise aboneka yose.
    Ati “Burya ibintu byose ni ubufatanye, kandi Leta ni abaturage. Iyo abayobozi bafatanyije n’abaturage, bagera kuri byinshi, kuko Leta iba ifite ibikorwa byinshi iba igomba gukora”.

    Abo baturage bavuga ko ibyo bagezeho ari ibyo kwishimira, kandi bagasaba n’abandi b’ahandi kuza kubyigiraho.

    Umunyamabanga Nshingwabikorwa w’Umurenge wa Kagarama, Chantal Uwamwiza, avuga ko ubukangurambaga bugitangira hari bamwe mu baturage batabyumvaga neza, ariko ko hari ababyumvise vuba bafasha n’abatarabyumvaga na bo bibona muri icyo gikorwa.

    Ati “Icya mbere ni ukubereka agaciro k’ibikorwa baba bagiye kwikorera. N’iyo haba harimo abatabyumva neza, iyo hari abatanze amafaranga mu minsi mike bakabona ibikorwa akoze, n’abandi bahita babona agaciro kabyo”.

    Umuyobozi Nshingwabikorwa w’Akarere ka Kicukiro, Solange Umutesi, yashimiye abaturage b’Umurenge wa Kagarama muri rusange, anashimira by’umwihariko ababashije kwikorera igikorwa nk’icyo cy’indashyikirwa.

    Asaba abaturage ba Kicukiro gukomeza kurangwa n’ubufatanye hagati yabo ubwabo no hagati yabo n’ubuyobozi, mu rwego rwo kurushaho kugera ku iteramebere bifuza badategereje Leta.

    Ubwo batahaga iyo mihanda
    Ubwo batahaga iyo mihanda

    Mu murenge wa Kagarama muri rusange bateganyije kwikorera imihanda ya kaburimo kuri kilometero 14.5, ariko ubu hamaze gukorwa kilometero 5.3. Yose izuzura itwaye miliyoni 924 z’Amafaranga y’u Rwanda.

    Mu gutaha iyo mihanda kandi hanatangijwe gahunda y’Ubumwe n’ubwiyunge, bahemba umuryango w’abarokotse Jenoside wabyaye ariko abawugize bombi bakaba nta babyeyi bagira bo kubahemba, bawutegesha urugori, ariko baranawuremera.

    Hanaremewe undi muturage usanzwe akora akazi ko gutunganya imisatsi, wahawe amafaranga ibihumbi 300 ngo yo kumufasha kuzamura ibikorwa bye, kandi byose byagizwemo uruhare n’abaturage bo muri uwo Murenge wa Kagarama.

    Hamuritswe n’ibindi bikorwa byakozwe mu mihigo y’umwaka wa 2020-2021.


  • Bwiza Emerance yahigitse abagera kuri 210 yegukana irushanwa ryateguwe na KIKAC Music Label #rwanda #RwOT

    Bwiza Amerance umukobwa w’imyaka 21, yegukanye irushwa rya 'The Next Diva — Indi Mbuto’ ryateuwe na KIKAC LTD binyuze muri KIKAC Music Label, uyu mukobwa akaba agiye kwitabwaho n’iyi nzu itunganya umuziki mu gihe cy’imyaka 5.

    Iri rushanwa ryabaga ku nshuro ya mbere, ryahuje abakobwa 211 aho bakoresheje uburyo bwo kwifata amashusho ubundi bakoherereza kuri Email, Facebook, WhatsApp na Instagram bya KIKAC LTD.

    Uko bari 211 ababashije kugera ku cyiciro cya nyuma bari 30, akanama nkemurampaka kari kayobowe na Semivumbi Daniel(Danny Vumbi) usanzwe na we uba muri KIKAC Music Label, bemeje ko Emerance Bwiza wo mu Bugesera ari we wahize abandi.

    Uyu mukobwa akaba agiye gusinya muri KIKAC Music Label amasezerano y’imyaka 5 azatangira gushyirwa mu bikorwa uyu mwaka 2021, iyi nzu ikaba isanzwemo abandi bahanzi bakomeye nka Danny Vumbi na Mico The Best.

    Bwiza Emerance yegukanye The Next Diva – Indi Mbuto

    Source : http://isimbi.rw/imyidagaduro/article/bwiza-emerance-yahigitse-abagera-kuri-210-yegukana-irushanwa-ryateguwe-na-kikac-music-label

  • Abakunzi ba Ruhago bazinjira muri Weekend bazi iyegukanye shampiyona hagati ya APR na AS Kigali #rwanda #RwOT

    Iyi mikino ya nyuma yashyizwe ku wa Gatanu tariki 25 Kamena 2021 nyuma y’uko yagombaga gukinwa kuri uyu wa Kabiri tariki 22 Kamena ariko ikaza gusubikwa.

    Kuri uyu wa Mbere tariki 21 Kamena Ishyirahamwe ry’Umupira w’Amaguru mu Rwanda (FERWAFA) ryashyize hanze urutonde rw’uko iriya mikino izakinwa hakomeza kwirindwa icyorezo cya COVID-19 kuko ubu na Stade Umuganda isanzwe yakirirwaho imikino n’amakipe amwe itari gukinirwaho.

    Iyi ngengabihe igaragaza ko tariki 25 Kamena 2021 hazakinwa umukino wa Marine FC na Bugesera FC uzabera i Musanze, hakazakinwa umukino uzahuza APR FC na Rutsiro FC uzabera kuri Stade ya Huye.

    Kuri uwo munsi kandi hari umukino uzahuza AS Kigali na Police FC ukazabera i Muhanda naho Rayons Sports a Espoir FC zikazakinira i Bugesera.

    Iyi mikino izakinwa hari amakipe abiri ahabwa amahirwe yo kwegukana igikombe ku isonga hakaba hari APR FC ifite amanota 16 ikaba iyanganya na AS Kigali ariko iriya kipe y’Ingabo z’u Rwanda ikaba izigamye ibitego 14 mu gihe AS Kigali yo izigamye ibitego 10.

    UKWEZI.RW

    Source : http://www.ukwezi.rw/Imikino/article/Abakunzi-ba-Ruhago-bazinjira-muri-Weekend-bazi-iyegukanye-shampiyona-hagati-ya-APR-na-AS-Kigali

  • Ingeso 10 abakobwa bari mu rukundo bagira zib… – #rwanda #RwOT

    Amakosa mato abakobwa bakora ariko bakarakaza abakunzi babo cyangwa se bakabababaza:

    1. Gushaka gutwara umwanya we wose

    Kimwe mu bintu abakobwa bakora ngo bibangamira abasore haro ugushaka gutwara umwanya we wose, ibi bivuze kumuhamagara igihe cyose, gushaka kumenya aho ari igihe cyose n'icyo ari kuhakora, gushaka kubonana nawe buri gihe, mbese ntumuhe umwanya wo kubaho ubuzima bwe yisanzuye. Ibi ngo bibangamira abasore batari bake, aba yifuza ko wamuha umwanya wo gukora gahunda ze, kubonana n'incuti ze n'ibindi bitandukanye, ntibivuze ko nta gaciro aguha ahubwo wishaka ko umwanya we wose ujyamo wowe gusa.

    2. Kuganiriza incuti ibibazo bafitanye n'umukunzi nk'aho ari ibisanzwe

    Abasore usanga baba bazi neza ko abakobwa baganiriza incuti zabo ibijyanye n'umusore bakundana ariko nanone ngo abasore ntibakunda ko uganiriza inshuti zawe ku bibazo mwagiranye ngo nurangiza unabifate nk'aho kubivuga ari ibintu bisanzwe, ngo abasore babyanga cyane cyane iyo ubishyize ku mbuga nkoranyambaga yaba mu buryo buziguye cyangwa butaziguye. Iyo umusore agukunda aba yumva wamubwira incuti ze ariko ntuvuge ibibazo mugirana, iyo amenye ko wabivuze biramubabaza.

    3. Kwisanzura cyane no kwigenga cyane

    Ubusanzwe abasore bakunda umukobwa wigenga kandi wisanzura ku buryo byoroshye kuganira nawe ndetse ngo abakobwa bigenga baba bazi icyo bashaka mu buzima. Ibi ariko ngo iyo birengeje urugero abasore barabyanga, aba akeka ko uko kwigenga kwawe no kwisanzura cyane bifite ikindi bihatse, yaba ari uburara cyangwa indi mico itari myiza.

    4.Guhorana n'abasore no kugira inshuti nyinshi z'abasore

    Abakobwa bakunze kubangamirwa cyane no kugira umukunzi ufite inshuti nyinshi z'abakobwa ariko bo bakifata nk'aho kugira inshuti nyinshi z'abahungu ntacyo bitwaye ndetse ugasanga hari ufite umukunzi ariko agahorana n'abasore muri za gahunda zitandukanye. Ibi bibangamira abasore cyane iyo umukunzi wabo ahorana n'abasore. Ibi ngo si ugufuha cyangwa ibindi ahubwo biri muri kamere y'umuntu kubabazwa n'iyo umukunzi wawe afite inshuti nyinshi badahuje igitsina ahorana nabo.

    5. Guhora ushaka kumuhindura

    Usanga hari abakobwa bakundana n'umusore ufite imico runaka cyangwa akamenyero runaka kadahuye n'uko babyifuza, ariko bakizera ko bazabahindura uko bumva babishaka. Si bibi kuba wafasha umukunzi wawe kureka ingeso mbi nko kunywa itabi cyangwa kunywa cyane inzoga, ariko ngo abasore ntibakunda na gato umukobwa uza mu buzima bwabo agashaka guhindura ibintu byose. 

    Hari n'igihe ngo umubangamira ugerageza kumukundisha ibintu adashobora gukunda na rimwe, urugero umusore ashobora kuba akunda umupira ukagerageza kuwumukuraho mgo umushyire ku kureba filime z'urukundo ariko burya ngo uba uri kumubangamira cyane.

    6. Kutamushimira

    Abakobwa usanga akenshi bashimishwa no guhabwa impano cyangwa se kwitabwaho mu buryo butandukanye. Abasore ngo bababazwa cyane n'iyo birya bakimara kugira ngo bashimishe umukunzi ariko we ugasanga ntabwo ajya ashimira na rimwe. Niba ufite umukunzi, kumushimira ni kimwe mu bintu bikomeye aba yifuza.

    7. Kutamenya igihe adashaka kuvuga

    Ngo muri kamere y'abasore, hari igihe aba yumva adashaka kuvuga, cyane cyane iyo afite ibyamubabaje, niba mukundana ashobora kubikubwira mu ncamake cyangwa ntanabikubwire, hagakurikiraho guceceka kugira ngo abanze yakira ikibazo yahuye nacyo cyangwa ashobora no guceceka ntacyo yabaye, iyo ari muri iki gihe cyo guceceka ugakomeza kumuhatira kuvuga, arabangamirwa cyane.

    8. Kutumva ibyo ashaka kugeraho mu buzima bwe

    Buri muntu mu buzima aba afite ubuzima yifuza kubamo ndetse n'ibyo ashaka gukora kugira ngo atere imbere. Abasore ngo babangamirwa cyane n'iyo umukunzi wabo atekereza ko ibyo bari gukora cyangwa bateganya gukora nta kintu bizabagezaho cyangwa ari ibintu bidafatika. Aba atekereza ko ari wowe muntu wagakwiye kuba umwumva kurusha abandi, iyo umweretse ko ibyo akunda ari impfabusa biramubabaza.

    9. Gukomeza gukoresha telephone muri kumwe

    Igihe muri kumwe, umusore aba ashaka ko umuha umwanya wawe wose ndetse ukanamutega amatwi, iyo abona ukomeza kwitaba abantu kuri telephone ubutitsa cyangwa ukomeza wandikirana n'abantu ku mbuga nkoranyambaga, ureba agahise kose kuri interineti, biramubangamira cyane.

    10. Guhorana amaganya

    Mu buzima nta muntu utagira ibibazo ariko abasore ngo banga umukobwa uhoana utubazo tutarangira mu buzima bwe. Ikibazo si uko waba ufite ibibazo ahubwo ngo uburyo uheranwa ba nyo n'uko ubyitwaramo nibyo bimubangamira. Abasore ngo bakunda umukobwa uzi kwikomeza no kwihagararaho igihe afite ibibazo kurusha uko wahora mu maganya n'agahinda katarangira.

    Src:www.Elcrema.com

    Source : https://inyarwanda.com/inkuru/106763/ingeso-10-abakobwa-bari-mu-rukundo-bagira-zibangamira-abasore-bakundana-106763.html

  • Ange Kagame arasobanura uko ababyeyi bakubaka ubwonko bw’umwana bifashishije imikino #rwanda #RwOT

    Ni ubutumwa bukubiye mu mashusho y’Ishami ry’Umuryango w’Abibumbye ryita ku bana, UNICEF, bujyanye n’ukwezi kwahariwe kuzirikana ku burere bw’umwana.

    Muri ayo mashusho Ange Kagame avugamo ati 'Ndi umubyeyi unyuzwe', nyuma y’uko ku wa 19 Nyakanga 2020 we na Bertrand Ndengeyingoma bibarutse umwana w’umukobwa w’imfura.

    Yavuze ko imyaka ya mbere y’ubuzima bw’umwana ni ingirakamaro, kubera ko ibyo ahura nabyo n’imibanire ye n’abandi bigena imikurire y’ubwonko bwe.

    Yashimangiye ko abana bigira byinshi mu mikino guhera bakivuka, ariko byose bikajyana no kuba bafite buzima bwiza, babonye ibibatunga bakeneye.

    Ati 'Gukina bituma umwana abasha kwimenya akamenya n’abandi. Impinja zigenda zivumbura ibintu biri hafi yazo. Icy’ingenzi ababyeyi bashobora gukora mu gufasha ubwonko bw’umwana gukura neza harimo kumenya umwana, kumusobanukirwa cyangwa gusobanukirwa ibyo akenera ndetse no kongera ubusabane n’umwana nk’uko abahanga babyita ubusabane bwo kwiganana.'

    Ubwo buryo bwo kwiganana bukorwa nk’iyo umwana agusekeye cyangwa akavuga akantu runaka, umubyeyi akamwigana.

    Yakomeje ati 'Kwiganana ntabwo ari ibintu bihita byikora iyo ukibigerageza bwa mbere. Ariko uko ugenda ubikora, birushaho kuborohera no kubaryohera mwembi, ari umwana n’umubyeyi.'

    Mu gukina ngo umwana agenda avumbura ibintu byinshi, cyane ko uko agerageza ikintu kimwe ahita abona n’ikindi gishoboka.

    Ange Kagame yavuze ko umwana yiga byinshi mu mikino y’uburyo bubiri, gukina n’abantu bakuru cyangwa n’abo bangana.

    Yakomeje ati 'Gukina bishobora gukorwa igihe wonsa cyangwa ugaburira umwana wawe, igihe umuhindurira imyenda, cyangwa se igihe umwuhagira. Icyo gihe cyose ni amahirwe yo gushyikirana n’umwana binyuze mu mikino no kwiga hagati y’abana n’abantu bakuru.'

    'Ababyeyi bakwiye kumva ko igihe umwana agusekeye nawe ukamusubiza udakwiye kugarukira aho, ahubwo ukomerezaho mugakina, icyo gihe uba wubaka ubwonko bw’umwana.'

    Yavuze ko atari imikino ihambaye, kuko gusekera umwana no kwita ku marangamutima ye bimufasha, kandi bikaba inshingano y’ababyeyi bombi.

    Ati 'Ni ingenzi cyane kandi ko ababyeyi bombi, umubyeyi w’umugabo n’umugore bakina n’umwana wabo. Uko ufata umwanya ugasubiramo ubwo busabane buri munsi, uba utegura umwana wawe, umwubakira umusingi w’ubuzima mu kwiga no gukemura ibibazo.'

    Abahanga bagaragaza ko iminsi 1000 ya mbere y’umwana ari ingenzi cya ku buryo igomba kwitabwaho cyane.

    Source : http://www.ukwezi.rw/mu-rwanda/Amakuru-anyuranye/article/Ange-Kagame-arasobanura-uko-ababyeyi-bakubaka-ubwonko-bw-umwana-bifashishije-imikino

  • AMAFOTO : Umukinnyi wa Police FC yatereye ivi umukunzi we amwemerera kumubera umugore ahita anamuhemba akabizu #rwanda #RwOT

    Muvandimwe yatereye ivi uyu mukunzi we Umwari Rurangwa Irene uzwi nka Soleil mu ijoro ryo kuri iki Cyumweru tariki ya 20 Kamena 2021 muri The Manor Hotel mu Mujyi wa Kigali.

    Muvandimwe Jean Marie Vianney agaruka ku kintu yamukundiye, yavuze ko ari umukobwa utuje kandi umushyigikira.

    Ati 'Ni umukobwa utuje, angira inama kandi akunda gusenga. Umuntu aba yarahuye na benshi ariko akunda kungira inama kandi akananshyigikira mu kazi kanjye ka buri munsi.'

    Kimwe n’abandi bantu bakundana, na bo ngo bagiye bashwana bagatandukana ariko bakongera bakiyunga kugeza uyu munsi ubwo bafataga umwanzuro wo guhitamo kuzabana akaramata.

    Amakuru avuga ko nyuma yo kumwambika impeta ya fiançailles, nta gihindutse bazasezerana imbere y’amategeko muri iki Cyumweru.

    Source : http://www.ukwezi.rw/Imikino/article/AMAFOTO-Umukinnyi-wa-Police-FC-yatereye-ivi-umukunzi-we-amwemerera-kumubera-umugore-ahita-anamuhemba-akabizu

  • Serge Iyamuremye yateye intambwe ya mbere mu gutera ishoti ubuseribateri #rwanda #RwOT

    Serge Iyamuremye yasabye anakwa umukunzi we Sandrine Uburiza ku wa Gatandatu w’icyumweru dusoje tariki 19 Kamena 2021, ubera mu Mujyi wa Kigali.

    Uretse ko hariho amabwiriza yo kwirinda COVID-19 atemerera abantu benshi gutaha ubukwe, Serge Iyamuremye ibirori bye yabigize ibanga rikomeye ku buryo byamenywe na bake.

    Umuntu wahaye amakuru HOSE yatubwiye ko abitabiriye ubu bukwe bari bahawe amabwiriza ko nta wemerewe gufotora.

    Uburiza Sandrine ugiye kuba umugore wa Serge Iyamuremye asanzwe atuye muri Leta Zunze Ubumwe z’Amerika ndetse ni n’umuhanzi uririmba izo kuramya no guhimbaza Imana.

    Bivugwa ko nyuma y’ubukwe, Iyamuremye azahita asanga umufasha muri Amerika bagaturayo.

    Serge Iyamuremye ni umwe mu baramyi bakunzwe cyane mu Rwanda. Azwi mu ndirimbo zitandukanye zirimo Arampagije, Biramvura, Yesu Agarutse n’izindi.

    Kimwe n’abandi baramyi iby’urukundo rwe yabigize ibanga rikomeye kugeza akoze ubukwe.

    Source : http://www.ukwezi.rw/Imyidagaduro/Serge-Iyamuremye-yateye-intambwe-ya-mbere-mu-gutera-ishoti-ubuseribateri

  • Ange Kagame yeretse ababyeyi bimwe mu byafasha ubwonko bw’abana babo gukura neza #Rwanda #RwOT via @kigalitoday #rwanda #RwOT

    Ange Kagame
    Ange Kagame

    Ubumenyi yateganyije gusangiza ababyeyi yabunyujije ku rubuga rwe rwa You Tube, aho yatangiye avuga ko ubwonko bw’umwana bukura vuba mu myaka ye ya mbere.

    Mu byo yagejeje ku babyeyi umuntu yafata nk’amasomo, Ange Kagame yavuze ko imyaka ya mbere y’ubuzima bw’umwana ari ingenzi, cyane ko ari yo igaragaza imikurire ya buri mwana.

    Agira ati “Imyaka ya mbere y’ubuzima bw’umwana ni ingirakamaro ku mikurire y’ubwonko bwe, kubera ko ibyo ahura na byo n’imibanire n’abandi bantu b’ingenzi kuri we, ari bimwe mu bigena imikurire y’ubwonko bwe”.

    Arongera ati “Uyu musingi wo mu myaka ya mbere kandi ugira ingaruka ku buzima bwose bw’umuntu ari mu myigire, mu migenzereze, imiterere ndetse n’ubuzima bwo mu mutwe”.