Webrwanda Backend

Category: Uncategorized

  • Badukozeho! Abanyamujyi banenze abakerensa Covid-19 batumye amabwiriza yo kuyirinda akazwa – #rwanda #RwOT

    Abaganiriye na IGIHE, bemeza ko ingamba zirimo kwambara neza agapfukamunwa, gusukura intoki no guhana intera zitacyubahirizwa, bikiyongeraho utubari n’ibirori bikorwa rwihishwa, byose bikaba bitumye ingamba zo kwirinda Covid-19 zikazwa.

    Mutuyimana Samuel, yatanze ubuhamya avuga ko azi utubari dukora rwihishwa, avuga ko atumva impamvu z’umutekano zitaduhagarika nk’uko amabwiriza abiteganya.

    Ati “Utubari turakora kandi biba bizwi, none se ko ikintu kibera mu Mudugudu kikarara kimenyekana ni gute abayobozi batamenya utubari dukora mu mudugudu wabo?”

    Uyu mugabo yavuze ko impamvu inzego z’ibanze zidafatira ibihano abafite utubari dukora rwihishwa, ari uko batanga ruswa nyinshi, ati “Baricecekera kuko babaha ruswa, nono se ko bamenya utarishyuye umutekano?”

    Sibomana Parfait yavuze ko abica amabwiriza yo kwirinda Covid-19 bahinduye amayeri babikoramo.

    Ati “Ntawe ukijya mu kabari ngo anywere inzoga mu icupa, bahita bayisuka mu kirahuri icupa bakarijyana kugira ngo Polisi itabavumbura. Ikindi ubu hari aho ujya bagahita bagusaba gufata ifunguro kugira ngo baguhe inzoga, bagamije ko Polisi iramutse ije itunguranye, bahita bavuga ko iyo nzoga wayakanye n’ifunguro.”

    Ku ruhande rwa Hirwa Ezekiel, yavuze ko ibyo kwambara agapfukamunwa bisigaye mu mijyi n’ahandi hantu hari inzego zibutsa abantu kukambara, ariko kabaye amateka mu nkengero z’umujyi.

    Ati “Uragira ngo mu mihanda mito se abantu bambara udupfukamunwa? Ubona umuntu avuye muri kaburimbo agahita agakuramo wagira ngo Covid-19 ntihagera. Abacuruzi ntibagishyira amazi muri ‘Kandagira Ukarabe’ zabo nta mazi abamo, n’abayafitemo bibutsa abakiliya gukaraba ni mbarwa.”

    Umunyamabanga Nshingwabikorwa w’Umurenge wa Kagarama, mu Karere ka Kicukiro, Uwamwiza Marie Chantal, yemeza ko bamaze iminsi bafata abantu barenga ku mabwiriza ku buryo buteye impungenge.

    Ati “Tujya tubafata cyane, kandi buri munsi tukabaca amande. Numva kugira ngo Covid-19 igabanuke, ari uko umuntu yakumva ko niba bavuze agapfukamunwa agomba kukambara aho agiye hose, ntibacungane n’inzego nk’aho bahanganye.”

    Umuyobozi Nshingwabikorwa w’Akarere ka Nyarugenge, Ngabonziza Emmy, yavuze ko ubuyobozi bw’Akarere ka Nyarugenge bubinyujije mu mirenge, bumaze iminsi mu bikorwa byo gusinya amasezerano y’abafite ibikorwa by’ubucuruzi agamije gutuma bakomeza kubahiriza amabwiriza yo kwirinda icyorezo cya Covid-19.

    Yagize ati “Nyuma y’uko bigaragaye ko hari abantu bakirenga ku mabwiriza yo kwirinda Covid-19, ubu twasinye amasezerano n’abafite ibikorwa byakomorewe, agena uko bakwiye kugira uruhare mu kuyubahiriza, kandi buri wese akaba ijisho rya mugenzi we ndetse bakanamenya ko igihe aho bakorera hafatiwe uwayarenzeho, bazajya babihanirwa.”

    Leta y’u Rwanda iherutse gukaza amabwiriza yo kwirinda ikwirakwira rya Covid-19, aho ibikorwa birimo amashuri n’ibindi bitandukanye byahagaritswe mu turere uturere umunani n’Umujyi wa Kigali, ndetse ingendo ziva mu karere zijya mu kandi zikaba ziherutse guhagarikwa.

    Kugera kuri uyu wa 30 Kamena, umubare w’abamaze guhitanwa na Covid-19 mu Rwanda ugera kuri 431 aho abamaze kwandura icyo cyorezo mu gihugu ari 38.198 mu gihe ibipimo byafashwe bimaze kugera kuri 1.631.415.

    Abarenga ku mabwiriza yo kwirinda Covid-19 banenzwe kuba intandaro y’ikwirakwira rya Covid-19

  • Nsengiyumva François “Igisupusupu” yatawe muri yombi – #rwanda #RwOT

    Urwego rw’Ubugenzacyaha, RIB, rwatangaje ko uyu mugabo yatawe muri yombi kuri uyu wa Gatatu, tariki ya 30 Kamena 2021.

    Umuvugizi wa RIB, Dr Murangira B. Thierry, yabwiye IGIHE ko ibyaha Nsengiyumva akuriranyweho yabikoreye mu Mudugudu wa Rubaya, Akagari ka Rubona, Umurenge wa Kiziguro mu Karere ka Gatsibo ku wa 18 Kamena 2021.

    Yakomeje ati “Amaze kumenya ko byamenyekanye yakomeje kugenda yihishahisha aza gufatirwa Kiramuruzi.’’

    RIB yibukije abaturarwanda ko itazihanganira uwo ariwe wese uzafatwa akora icyaha cyo gusambanya umwana no kumukoresha imirimo ivunanye.

    Dr Murangira yakanguriye abantu gukomeza kubyirinda kuko ari ibyaha bihanwa n’amategeko.

    Yakomeje ati “Turashimira abaturage ubufatanye bagaragaje batanga amakuru kugira ngo Nsengiyumva François afatwe.’’

    Nsengiyumva kuri ubu afungiye kuri Sitasiyo ya RIB ya Kiramuruzi mu gihe iperereza rikomeje kugira ngo hakorwe dosiye ishyikirizwe Ubushinjacyaha.

    Aramutse ahamijwe ibyaha akurikiranyweho yahanishwa ibihano bitandukanye birimo n’igifungo cya burundu. Itegeko riteganya ko gusambanya umwana bihanishwa ingingo ya 133 ivuga ko iyo gusambanya umwana bikorewe k’uri munsi y’imyaka 14 ahanishwa igifungo cya burundu kidashobora kugabanywa kubera impamvu nyoroshyacyaha.

    Icyaha cyo gukoresha imirimo y’agahato, ubucakara cyangwa indi mirimo ifitanye isano na byo gihanwa n’ingingo ya 22 ivuga ko iyo icyaha gikorewe umwana, undi muntu wese udafite ubushobozi bwo kwirwanaho nk’umugore utwite cyangwa umuntu ufite ubumuga, ugihamijwe ahanishwa igifungo kitari munsi y’imyaka 10 ariko kitarenze 15 n’amafaranga y’u Rwanda atari munsi ya 10.000.000 Frw ariko atarenze 15.000.000 Frw.

    Nsengiyumva François yamamaye mu ndirimbo zitandukanye zirimo ‘Mariya Jeanne’ yamenyekanye nka ‘Igisupusupu’, ‘Icange Cange’ na ‘Rwagitima’’.

    Mu 2009 ni bwo yatangiye gucuranga umuduri nk’umwuga akajya azenguruka mu masoko no mu tubari dutandukanye mu Ntara y’Iburasirazuba. Avuka mu Murenge wa Kiramuruzi ho mu Karere ka Gatsibo.

    Nsengiyumva François “Igisupusupu” yatawe muri yombi akurikiranyweho ibyaha bibiri birimo gusambanya umwana w’umukobwa w’imyaka 13

  • Alpha Rwirangira yavuze umubare w'abana yifuza kubyarana n'umugore we – YEGOB #rwanda #RwOT

    Umuhanzi Alpha Rwirangira yahishuye umubare w'abana yifuza kubyarana n'umugore we. Ni nyuma yuko uyu muhanzi yari amaze kwifuriza umugore we isabukuru y'amavuko. Ibi Alpha yabitangaje abinyujije ku rukuta rwe rwa Instagram.

    Nkuko yabitangaje mu magambo ye bwite Alpha yavuze ko yifuza kubyarana n'umugore we abana barenga 100. Alpha kandi yaboneyeho umwanya wo kumwifuriza isabukuru nziza y'amavuko uko amwitaho buri munsi ndetse n'uko yita ku mwana wabo.

    Ibi

    Alpha Rwirangira n'umugore we

    Alpha Rwirangira n'umugore we kuri ubu bafitanye umwana umwe

    Source : https://yegob.rw/alpha-rwirangira-yavuze-umubare-wabana-yifuza-kubyarana-numugore-we/

  • Umunyamideli Kardashian yaciye ibintu i Vatican. – YEGOB #rwanda #RwOT

    Kim Kardashian, umenyerewe cyane mu kwerekana imideli muri Leta Zunze Ubumwe za Amerika, yagaragaye i Vatican kwa Papa ari kumwe n'inshuti ye magara Kate Moss, aho bagiye gusura uwo Mujyi ucumbikiye Papa Francis.

    Kuri uyu wa Kabiri nibwo hasakajwe amafoto y'aba bombi bari kumwe n'abandi bantu barimo Lila Grace, umukobwa wa Kate Moss, ndetse n'abakorana na Kim Kardashian barimo Tracy Romulus, Mario Dedivanovic umukorera makeup na Chris Appleton umutunganyiriza umusatsi.

    TMZ yatangaje ko nyuma y'ubukerarugendo, Kim na Moss bafite ibikorwa by'ubucuruzi byabazanye i Rome bazakomeza.

    Muri urwo rugendo, Kardashian n'itsinda bari kumwe basuye Chapel ya Sistine iri mu Ngoro ituwemo n'Umuyobozi Mukuru wa Kiliziya Gatolika, Papa Francis, biba ngombwa ko Kardashian yambara ikoti ry'umukara mbere yo kwinjiramo, mu rwego rwo kubahiriza amabwiriza agenga abashaka kwinjira muri iyi nyubako.

    Kim Kardashian yagiye Vatican nyuma yaho kuri uyu wa Mbere yari yatangaje ko imyambaro y'imbere ya 'Skims' igiye kwifashishwa n'ikipe izaserukira Leta Zunze Ubumwe za Amerika mu Mikino Olempike izabera i Tokyo mu mpeshyi ya 2021.

    Kim Kardashian yatangaje ko ariwe watanze imyambaro y'imbere y'abagore bazitabira imikino ya Olempike bahagarariye Amerika, yifashishije imbuga nkoranyambaga.

    Source : https://yegob.rw/umunyamideli-kardashian-yaciye-ibintu-i-vatican/

  • Urubyiruko rwo muri Eswatini ruri mu myigaragambyo rushaka Demokarasi #Rwanda #RwOT via @kigalitoday #rwanda #RwOT

    Abigaragambya batwitse ibintu bitandukanye birimo n
    Abigaragambya batwitse ibintu bitandukanye birimo n’inyubako

    Abashinzwe gusubiza ibintu ku murongo aho muri Eswatini bahanganye n’urwo rubyiruko ruri mu myigaragambyo ku wa mbere tariki 28 Kamena 2021. Umwami Mswati III, ubu umaze imyaka 35 ku butegetsi, ngo yaba ari muri Afurika y’Epfo aho yahungiye nk’uko bivugwa n’abatavuga rumwe nawe. Iyo akaba ari yo mpamvu ngo bagomba gukomeza imyigaragambyo.

    Abo bigaragambya batwitse amapine, amamodoka, batwika amaduka ndetse barasahura. Ibyo kandi ngo birimo kuba mu mijyi itandukanye ya Eswatini, aharimo kubera imyigaragambyo hose, abigaragambya barakora ibikorwa nk’ibyo.

    Mu itangazo yasohoye ku munsi w’ejo tariki 29 Kamena 2021, mu masaha y’umugoroba, Minisitiri w’intebe wa Eswatini Themba Masuku yagize ati, « Twabonye imvururu zikomeye mu bice byinshi by’igihugu, imvururu ziterwa n’abantu bari mu myigaragambyo, ariko inzego zishinzwe umutekano ubu ziriyo, kugira ngo zisubize ibintu ku murongo, zikurikirane ko n’amategeko akomeza kubahirizwa ».

    Imyigaragambyo aho muri Eswatini yatangiye ku wa Gatandatu w’icyumweru gishize, ikagenda irushaho kugira ubukana uko iminsi igenda, abigaragambya bakaba bavuga ko bashaka demokarasi, n’impinduka zizuye, bakabona ubwigenge mu kuvuga ibyo bifuza kuvuga, bakamererwa gushinga amashyirahamwe ashingiye kuri politiki, kuko ibyo ngo babijijwe guhera mu myaka 35 ishize, ni ukuvuga kuva Umwami Mswati III yimye ingoma.

    Abasirikare n’Abapolisi ngo bashyizwe mu mijyi yose irimo kuberam imyigaragambyo kugira ngo bayihoshe, ndetse ibinyamakuru bimwe byo muri icyo gihugu byatangaje ko ku wa mbere w’iki cyumweru, izo nzego zishinzwe umutekano zarashe ku bigaragambya hapfa umuntu umwe mu gihe abandi barindwi bon go bakomeretse bikabije nk’uko byarangajwe n’Ikinyamakuru cyo mu Bufaransa kitwa ‘RFI’.

    Wandile Dludlu, Umunyamabanga mukuru w’Ishyaka riharanira demokarasi no guhuza Abaturage (PUDEMO), atangaza ko nibura abagera kuri 200 bamaze gukomerekera mu myigaragambyo, 15 muri bo bakaba barakomeretse bikabije.

    Mu gihe abatagura rumwe n’ubutegetsi bwa Mswati III, batangaje ko Umwami Mswati yahungiye muri Afurika y’Epfo kubera imyigaragambyo, Guverinoma ya Eswatini yo itangaza ko Umwami Mswati III ari mu Ngoro ye, akaba akomeje gukora imirimo asanzwe ahakorera.

  • Umuhanzi 'Igisupusupu' yatawe muri yombi na RIB #rwanda #RwOT

    Urwego rw'Igihugu rw'Ubugenzacyaha (RIB) rwataye muri yombi umuhanzi Nsengiyumva Francois wamamaye nka Igisupusupu ukekwaho ibyaha birimo icyo gusambanya umwana w'umukobwa.

    Uyu muhanzi wamamaye mu minsi ishize, yatawe muri yombi n'Urwego rw'Igihugu rw'Ubugenzacyaha RIB kuri uyu wa Gatatu tariki 30 Kamena 2021.

    Nsengiyumva alias Igisupusupu yatawe muri yombi akekwaho ibyaha bibiri birimo icyo gusambanya umwana w'umukobwa w'imyaka 13 n'icyaha cyo gukoresha umwana imirimo ivunanye.

    Bivugwa ko Umuhazi Nsengiyumva Francois AKA igisupusupu uwo mwana yamukoreshaga nk'umukozi wo mu rugo.

    Umuvugizi w'Urwego rw'Igihugu rw'Ubugenzacyaha (RIB) Dr Murangira Thierry yavuze ko ibyaha bikekwa kuri Nsengiyumva byabikorewe mu Mudugudu wa Rubaya, Akagari ka Rubona, Umurenge wa Kiziguro mu Karere ka Gatsibo ku wa 18 Kamena 2021.

    Dr Murangira Thierry avuga ko ubwo Nsengiyumva yamenyaga ko ari gushakishwa yatangiye kwihishahisha akaza gufatirwa i Kiramuruzi.

    Nsengiyumva François aheruka gushyira hanze indirimbo mu mpera za 2020 ubwo yari yasohoye iyitwa Ngarura.

    Ni indirimbo ikubiyemo ubutumwa ku bagabo baharika abo bashakanye, agaragaza amaherezo yabyo mabi arimo no kwandagazwa n'inshoreke.

    Iyi ndirimbo yise Ngarura ni ya karindwi mu ndirimo zasohowe na Nsengiyumva François kuva yakwinjira mu mumuziki mu mpera z'umwaka wa 2018.

    Yahereye ku yo yise 'Mariya Jeanne' yanabaye imvano yo kwitwa 'Igisupusupu', akurikizaho iyitwa 'Icange' , 'Rwagitima' na'Uzaze Urebe Rwanda', 'Umutesi' ndetse na 'Isubireho'.

    Source : https://impanuro.rw/2021/06/30/umuhanzi-igisupusupu-yatawe-muri-yombi-na-rib/

  • Impamvu zirimo' Kurokora Abatutsi' zatumye Iyamuremye Jean Claude yoroherezwa ibihano #rwanda #RwOT

    Mu rukiko rukuru rw'u Rwanda, ahasomewe urubanza rw'Umunyarwanda Iyamuremye Jean Claude, ukurikiranyweho ibyaha bya Jenoside yakorewe Abatutsi, kuri uyu wa 30 Kamena 2021, urukiko rwamukatiye igifungo cy'imyaka 25, ruvuga ko bitewe n'impamvu nyoroshyacyaha, zirimo kuba hari Abatutsi yarokoye no kuba yari afite imyaka 19.

    Mu kumukatira iki gihano cy'igifungo cy'imyaka 25, umucamanza yavuze ko byatewe n'impamvu nyoroshyacyaha zirimo kuba yarakoze icyaha afite imyaka 19, kuba urukiko rwarasanze ko hari imwe mu miryango y'Abatutsi yarokoye.

    Mu byaha Iyamuremye yashinjwaga, harimo ibyo kugira uruhare mu bwicanyi bwakorewe Abatutsi mu kigo Nderabuzima cya Kicukiro, muri ETO Kicukiro, I Nyanza ya Kigali-Kicukiro n'ahandi yari atuye muri Kigali.

    Rushingiye ku bimenyetso n'Ubuhamya rwabonye, Urukiko rwavuze ko rusanga hari bamwe mu batangabuhamya bagiye bamushinja bavuguruzanya ku ruhare rw'ibyaha by'ubwicanyi bw'I Gahanga muri Kigali-Kicukiro.

    Urukiko, nkuko BBC dukesha iyi nkuru ibitangaza, rwavuze ko nta gihamya yerekana uruhare Iyamuremye yagize mu bwicanyi bwakorewe muri ETO-Kicukiro, ko bityo rutashingira ku buhamya ngo rumuhamye ibyaha byahakorewe.

    Mu kumuhamya ibyaha, Urukiko rwavuze ko rushingiye ku bimenyetso n'Ubuhamya' Bwuzuzanya kandi bufite Ireme', rusanga Iyamuremye yaragize uruhare mu bwicanyi bwakorewe Abatutsi mu Kigo Nderabuzima cya Kicukiro no ku musozi wa Nyanza ya Kicukiro muri Kigali. Rwasanze yari mu gatsiko k'Interahamwe zahigaga Abatutsi aho hantu kimwe n'ahandi mu ngo z'Abatutsi muri Kicukiro.

    Urukiko, rwavuze ko nubwo Iyamuremye ubwe yagize uruhare mu kurokora imwe mu miryango y'Abatutsi bahigwaga, ariko ko imyitwarire ye mu gihe cya Jenoside igize icyaha cya ' Jenoside'. Ni aho Umucamanza yahereye avuga ko impamvu nyoroshyacyaha zo kuba hari abo yarokoye no kuba kandi yari akiri muto kuko yari afite imyaka 19 y'ubukuru, arizo zatumye urukiko rumukatira igifungo cy'imyaka 25.

    Iyamuremye Jean Claude, amaze imyaka itanu aburanira mu Rwanda kuko yoherejwe n'Igihugu cy'Ubuholandi muri 2016. Ntacyo yavuze ku myanzuro y'icyemezo cy'urukiko rukuru, gusa aracyafite iminsi yo kuba yajuririra iki cyemezo. Mu iburana rye, yaburanye ahakana ibyaha yaregwaga, ndetse mu kwiregura yavuze ko atari kwica Abatutsi kandi na Nyina yari we.

    Soma hano inkuru bijyanye: Urubanza rwa Jean Claude Iyamuremye rwapfundikiwe, avuga ko atari kwica Abatutsi kandi Nyina ariwe

    Munyaneza Theogene / intyoza.com

    Source : https://www.intyoza.com/impamvu-zirimo-kurokora-abatutsi-zatumye-iyamuremye-jean-claude-yoroherezwa-ibihano/

  • Goma/Rubavu: Dore uburyo umutekano wari wakajijwe ku butaka no mu mazi (Video) #Rwanda #RwOT via @kigalitoday #rwanda #RwOT

    Ku wa Gatanu tariki 25 Kamena 2021, Perezida w’u Rwanda Paul Kagame yakiriye mugenzi we wa DR Congo Félix Antoine Tshisekedi i Rubavu, hanyuma bukeye, Perezida Kagame na we agirira uruzinduko rw’akazi i Goma muri Repubulika Iharanira Demokarasi ya Congo.

    Kimwe mu byaranze uruzinduko rw’abakuru b’ibihugu byombi, ni uburyo umutekano wari wakajijwe i Rubavu no hakurya i Goma.

    Muri iyi video, murasangamo ya mashusho yakoze benshi ku mutima, aho umusirikare w’u Rwanda n’uwa Congo bagaragaye basuhuzanya. Ni ikimenyetso cyashimishije abantu benshi nyuma y’uko mu myaka yashize Ingabo z’ibihugu byombi wasangaga zirebana ay’ingwe.

    Amashusho yatunganyijwe na Richard Kwizera

  • Inkuru itugezeho aka kanya: Umuhanzi Nsengiyumva Igisupusu biravugwa ko yatawe muri yombi ||Ese yazize iki? – YEGOB #rwanda #RwOT

    Umuhanzi nyarwanda Nsengiyumva François wamenyekanye cyane nka Igisupusu biravugwa ko yaba yatawe muri yombi ,akekwaho gusambanya umwana.

    Nk'uko ikinyamakuru Bwiza cyabitangaje, ngo gifite amakuru cyakuye mu Murenge wa Kiramuruzi aho bivugwa ko Nsengiyumva François yatawe muri yombi na Polisi ikorera mu karere ka Gatsibo akekwaho gusambanya umwana.

    Babitangaje ngo umuturage wiboneye n'amaso ye bajyana Igisupusupu kuri sitasiyo ya Polisi yavuze ko yafashwe ahagana saa cyenda kuri uyu wa gatatu.

    Yagize ati: 'Umuhanzi Igisupusupu twabonye afashwe na Polisi bavuga ko yafashe umwana ufite imyaka 14. Bamufunze hano Kiramuruzi,twumvise bavuga ko yasambanyije umwana wo muri Murambi.'

    Umwe mu bayobozi bakorera ku biro bya Kiramuruzi yemeza ko Igisupusupu yatawe muri yombi. Na we yagize ati: 'Gisupusupu twamufashe arakekwaho gusambanya umwana ibindi mwabaza umuvugizi.'

    Twibutse ko Nsengiyumva François yazamuwe n'indirimbo yitwa 'Mariya Jeanne', yumvikanamo ijambo 'Igisupusupu' ubwo yari atangiye umuziki, agenda aririmba n'izindi nka Ngarira,Rwagitima,Isubireho n'izindi zatumye yamamara mu Rwanda.

    Source : https://yegob.rw/inkuru-itugezeho-aka-kanya-umuhanzi-nsengiyumva-igisupusu-biravugwa-ko-yatawe-muri-yombi-ese-yazize-iki/

  • Gusohoka mu mwiherero ntaruhushya byatumye Muhitira Felicien atazitabira imikino Olimpike, we avugako yasohotse agiye kunywa umuti umuvura amarozi #rwanda #RwOT

    Mu gitondo cyo kuri uyu wa gatatu tariki ya 30 Kamena 2021 nibwo komite Olimpiki y'u Rwanda yatangaje ko umukinnyi Muhitira Felicien uzwi nka Magare yakuwe ku rutonde rw'abakinnyi bazitabira imikino Olimpiki izabera mu gihugu cy'u Buyapani azira kuva mu mwiherero ntaruhushya ahawe.

    Nk'uko inyandiko igenewe itangazamakuru yanditswe ibigaragaza, ngo uyu mukinnyi yahagaritswe mu mwiherero kubera kwica amabwiriza yo kwirinda Korinavirusi, bagize bati 'Ku wa Kabiri, tariki ya 29 Kamena 2021, umukinnyi Muhitira Félicien (Magare), umwe mu bakinnyi bazahagararira u Rwanda mu mikino Olempike yafashe icyemezo cyo kwikura mu mwiherero w'ikipe Olempike atabiherewe uburenganzira n'umutoza we ndetse na Komite Olempike y'u Rwanda.'

    'Ku bw'izo mpamvu, Muhitira Félicien yahagaritswe mu mwiherero w'ikipe Olempike yitegura imikino Olempike, akaba atanazitabira imikino Olempike ya Tokyo 2020. Ibi bitewe n'uko yishe amategeko agenga umwiherero nkana agasohoka nta ruhushya ahawe ndetse bikaba bihabanye n'amabwiriza yo kwirinda COVID-19, agomba kubahirizwa n'abari mu mwiherero.'

    Mu kigainiro uyu mukinnyi yagiranye na Radio1, Muhitira yavuze ko ko yasohotse mu mwiherero agiye kunywa umuti umurutsa kuko yarozwe.

    Muhitira yagize ati 'Njyewe ndi umwana barandoze, bandoga uburozi umuntu arya ariko ukanwywa umuti ukaruka, iyo umaze kuruka urakora bikagenda bishibuka bikagenda bigaruka, ejo bundi rero nongeye kumva ndwaye ndangije ndeba umwe mu baganga b'ikipe y'igihugu nsaba umutoza ko natumizaho umuti wanjye, nawutumijeho barawunzanira bawuha ushinzwe umutekano arawubika, Ejo rero numva ntameze neza nsaba uwo muti ko bawumpa nkawunywa kuko numvaga nenda gupfa gusa barabyanze.'

    Akomeza avuga ko banze ko asohoka ngo ajye kunywa uwo muti, nyuma yo kubyanga we ku giti cye yahise afata umwanzuro wo kujya hanze akawunywa, ati 'Uyu muti nywunywa kabiri mu mwaka mbese ni karande ni ibintu nibanira nabyo, Ubwo ndangije gusohoka nahise mfata umuti.'

    Mu gusoza icyo kiganiro Muhitira Felicien usiganwa ku magare ku ntera y'ibilometero 42, avuga ko we yari yasabye ubuyobozi ko bareka akanywa uwo muti ubundi akazajyana na bagenzi be mu marushanwa ya Olimpiki amaze gukira.

    Uyu mukinnyi asezerewe mu mwiherero habura iminsi mike kugirango we na bagenzi be berekeze mu Buyapani aho bagomba gukinira imikino Olimpike, aha kandi uyu mukinnyi kandi uretse gukurwa mu bazitabira Imikino Olempike, Muhitira yahagaritswe kandi mu bikorwa byose by'ikipe Olempike kugeza igihe hatangiwe andi mabwiriza.

    The post Gusohoka mu mwiherero ntaruhushya byatumye Muhitira Felicien atazitabira imikino Olimpike, we avugako yasohotse agiye kunywa umuti umuvura amarozi appeared first on RUSHYASHYA.

    Source : https://rushyashya.net/gusohoka-mu-mwiherero-ntaruhushya-byatumye-muhitira-felicien-atazitabira-imikino-olimpike-we-avugako-yasohotse-agiye-kunywa-umuti-umuvura-amarozi/?utm_source=rss&utm_medium=rss&utm_campaign=gusohoka-mu-mwiherero-ntaruhushya-byatumye-muhitira-felicien-atazitabira-imikino-olimpike-we-avugako-yasohotse-agiye-kunywa-umuti-umuvura-amarozi