Webrwanda Backend

Category: Uncategorized

  • Yagerageje ubuhanga bw’umwami Salomon babyara… – #rwanda #RwOT

    Umwamikazi wa Sheba [Queen of Sheba] ni umwe mu bamonaki bavugwa muri Bibiliya waje kwerekeza muri Yeruzalemu kugerageza ubuhanga bw'Umwami Salomon mu myaka ya 965-931 mbere y’ivuka rya Yesu Kristo.

    Uyu mwamikazi bwa mbere avugwa mu gitabo cy'Abami I (10:1-13), akongera kuvugwa mu Abakorinto II  (9:1-12) muri Bibiliya ndetse anavugwa muri Quran, kimwe na Aramic Targum Sheni no mu gitabo kivuga ku ruhererekane rw'ibikorwa by’abami barongoye Ethiopia kitwa 'Kebra Negast'.

    Uretse muri ibi bitabo tuvuze twanifashishije mu kubategurira iyi nkuru, hari n'ibindi byagiye bivugwa kuri uyu mwamikazi wa Sheba. INYARWANDA twagerageje kubashakira byinshi kuri Shebah nyuma yo kubona igikundiro cy’indirimbo ya Meddy yakoreye Mimi yiswe [Queen of Sheba]. Byatumye tuyinjiramo ngo tubagezeho bya nyabyo inkuru irambuye ku buzima bwe.

    Meddy washatse umunya Ethiopia, Mimi Mehfira yanitiriye indirimbo ye ‘Umwamikazi wa Sheba’

    Agace ka Sheba kavugwa muri Bibiliya kavugwa nk'Ubwami bwa Saba rimwe na rimwe bagakoresha Sheba, kakaba mu Majyepfo ya Arabia ariko na none no mu Burasirazuba bw'Amajyaruguru ya Africa mu gihugu cya Ethiopia.

    Uburyo Bibiliya ibara amateka y’uyu mwamikazi, yazaniye impano z'akataraboneka Umwami Salomon, amurata ubuhanga mbere y’uko Sheba asubira mu gihugu cye. Ikiganiro mpaka kivuga ku kuba uyu mwamikazi yaba yarakomokaga muri Ethiopia cyangwa muri Arabia kimaze ibinyejana n'ibinyejana kandi bidashidikanwaho ntabwo kizigera gihagarara.

    Abavuga ko yari uwo mu gihugu cya Ethiopia bavugaga ko yayoboye mu bwami bwa Axum umujyi wo mu Majyaruguru y'iki gihugu na none ariko mu ruhererekane rw'Ubwami bwa Salomon habe no mu gitabo cy'Abami cyanditswe hagati y'ikinyejana cya 7 n’icya 6 mbere y’ivuka rya Yesu Kristo ntaho bigaragara.

    Mimi Mehfira umugore wa Meddy bivugwa ko ava mu bwoko bwa Habesha bukomoka ku mwami Salomon n’Umwamikazi wa Sheba

    Uko Bibiliya yerekana Umwamikazi wa Sheba mu Abami ba Mbere no mu gitabo cy'Abakorinto ba II, inkuru yanditswemo ni iy'urugendo rw'Umwamikazi wa Sheba ari nayo n'izindi zose zagiye zishingiraho. 

    Bibiliya ivuga ko ubwo Salomon yabaga Umwami yasabye Imana ubuhanga mu miyoborere ye (1 Abami 3:6-9), Imana yishimiye ubusabe bwe cyane ibumuhana n'ubukire n'icyubahiro byatumye yamamara kurenza n'imbibi z'ubwami bwe.

    Umwamikazi wa Sheba yumvise Umwami Salomon n'ubuhanga bwe bw'agatangaza n'uburyo ubwami bwe bwahawe ikuzo, byatumye agirira urugendo mu murwa mukuru wa Isiraheli ari wo Yeruzalemu kubyirebera ubwe.

    Bibiliya ivuga ko uyu mumonaki yari Umwamikazi wa Sheba inshuro imwe mu 1 Abami 10:1 ariko ntabwo ivuga igihugu akomokamo. Intego y'uyu mwamikazi byari ukwemeza iby'ubuhanga bwa Salomon binyuze mu bibazo, maze amaze kumusubiza amuhunda impano z'agatangaza zirimo Zahabu nk’uko byanditswe mu gitabo cy'Abami ba Mbere ibice icumi, umurongo wa cumi (1 Abami 10:10).

    Zahabu uyu mwamikazi yahaye Salomon uzishyize mu madorali ni asaga Miliyari  3.6. Nyuma yo kumuha impano zanyuze Salomon, yahawe uburenganzira bwo gusaba icyo yifuza cyose mu bwami bwa Salomon anemererwa guhabwa abacakara bakomoka muri Sheba bari barafatiwe muri Isiraheli nk’uko byanditswe mu 1 Abami 10:13.

    Imyaka ibaye ibihumbi Umwamikazi Sheba avugwaho cyane kuko amateka ye agaragara mu bitabo bihambaye bivuga ku bintu byayeho ku isi

    Muri Targum Sheni ho inkuru isa n’iyagutse kuruta ibyanditse muri Bibiliya. Abadasobanukiwe neza ibya Targum Sheni, ni igitabo kigaruka ku mateka y'Umwamikazi Esther yanditswe muri Bibiliya mu buryo bwagutse. Ariko na none harimo igice kigaruka ku mwamikazi Sheba ariko mu buryo burimo amakabyankuru menshi. 

    Nk’uko Bibiliya ibivuga, ubuhanga bw'umwami Salomon bwatumye abasha kumenya indimi zivugwa n'ibimera, inyamaswa n'inyoni zo mu kirere, 1 Abami (4:33). Aha niho igitabo cya Targum Sheni gihera kuri iyi nkuru kikagaragaza neza ukuntu Salomon yahawe ububasha bwo gutumira inyoni, inyamaswa n'ibindi binyabuzima byose, uretse Woodcock (ubwoko bw'ibiguruka) bwanze kumvira Salomon bivuga ko adahambaye nk'Umwamikazi wa Sheba, bityo ko adakwiye icyo cyubahiro no kugira ububasha bwo kuyobora hafi ibiriho byose.

    Byarangiye Salomon atumiye mu bwami bwe uyu mwamikazi ashaka kwereka ibi biguruka byamwibeshyeho. Mu gihe uyu mwamikazi, yari atangira kuzenguruka mu gice cy'inyubako y'agatangaza ya Salomon cyari cyubakishije ibirahure nyamara kikaba cyarasaga nk'amazi, ngo yatangiye kubaza ibibazo bikomeye Salomon byo kumugerageza kugira ngo amenye neza ubuhanga bwe aho bugarukira.

    WoodCock nazo byarangiye zemeye ko Salomon ari Umwami w'umuhanga kandi ari imana nyuma yo kwitwara neza mu misubirize y'ibibazo yabajijwe n'Umwamikazi wa Sheba.

    Umwami Salomon yabashije kugaragariza Umwamikazi wa Sheba ko ari imana ndetse atuma ahindukira aramuramya anemera kwinjira mu idini ry’aba Yuda

    Muri Quran, Umwamikazi Sheba yanditswe nka Bilqis naho Salomon yitwa Sulayman. Quran ikomeza ivuga ko inkuru y’aba bombi ihera ku bijyanye n'uburyo Salomon yatumiye ibiremwa birimo ibiguruka, inyamaswa n'ibiremwa bizwi nka Jinn akagirana nabyo ibiganiro ariko Hoopoe ntigaragare aho inama yabereye.

    Salomon yahise abaza ati:'Ni ibiki byambayeho ko ntabona Hoopoe? cyangwa iri mu batitabiriye? Ndaza kuyihana n'igihano gikomeye cyangwa nze kuyinyonga cyeretse igihe yaza kuba itanze impamvu nyayo yatumye ititabira.' (Sura 27:20). Ubwo Hoopoe yabonekaga, yabwiye Salomon ko ivuye ku butaka bwa Sheba, ikomeza ivuga ko yahabonye umugore uyoboye kandi ko afite ubwami bukomeye bufite buri kimwe.

    Ikomeza igaragaza ko abantu bo muri Sheba basenga izuba bataramya Salomon nk'imana kimwe na Allah ahubwo satani yabigaruriye ariko bafite ubwami buhambaye, maze umwami Salomon ababarira Hoopoe ahubwo ayituma gutumira umwamikazi wa Sheba.

    Umwamikazi Sheba yahaye Salomo impano z’ubutunzi butagira ingano zirimo Zahabu ibarirwa mu gaciro ka Miliyari 3.6 z’amadorali nk’uko bivugwa n’abahanga mu by’ubukungu ba none

    Muri Kebra Negast igitabo kivuga ku ruhererekane rw'amateka y'ubwami bwarongoye Ethiopia, inkuru y'umwamikazi wa Sheba naho iravugwa ariko akavugwamo nka Makeda (Umwamikazi wa Shebah) wabwiwe n'umushabitsi Tamrin ibijyanye n'ubuhangange n'ubuhanga bw'umwami Salomon.

    Tamrin yaje kwinjira muri iyi nkuru nk'umucuruzi w'ibikoresho by'ubwubatsi by'urusengero ruhambaye rwa Salomon maze abarira inkuru Umwamikazi wa Sheba y'ubunararibonye bukomeye bw'Umwami uhambaye mu isi kandi ko Yeruzalemu ari ahantu h’akataraboneka mu isi yose.

    Ibi byose byaje gutuma Makeda [Umwamikazi wa Sheba] yerecyeza muri uyu murwa mukuru. Nyuma y'ibiganiro, yaje kwemera Salomon nk'imana ndetse yemera kwinjira mu idini ry'abayuda.

    Salomon yateguye umusangiro ukomeye wo kwishimira Makeda mbere y’uko asubira mu bwami ndetse uyu mwamikazi arara mu ngoro y'umwami ijoro ryose. Umwami Salomon yasezeranyije uyu mwamikazi ko atari bumukoreho nawe ariko ntagire icyo yangiza. 

    Nyamara mu ijoro Makeda yaje kugira inyota, maze abona ikirahure cy'amazi Salomon yari yateretse rwagati mu cyumba bari barayemo bombi atangira kuyanywa. Ubwo Salomon yamubonaga yamwibukije ko atari yemerewe kugira icyo yiba none ari kumunywera amazi atamusabye uburenganzira. Makeda yasubije Salomon ko baryamana niba yishe isezerano bari bagiranye.

    Mbere y’uko Makeda amaranye ijoro ryose na Salomon, mu gitondo mbere yo kugenda Salomon yabanje kumuha impeta ye kugira ngo azamwibuke mu nzira asubira iwe. Yaje kwibaruka umwana amwita Menilek bivuze umuhungu w'inararibonye [ubuhanga], (ingendo za cyera zafataga imyaka dore ko nta koranabuhanga ryariho uretse iry’amafarasi n'ubwato bw'ingashya).

    Umwamikazi wa Sheba yaryamanye na Salomon babyarana Umwami w’Abami Menelik I wanditse amateka ahambaye muri politike y’isi

    Mu gihe Menelik yakuraga akabaza se umubyara uwo ari we, Makeda yamuhaye impeta ya Salomon arangije amusaba kujya gushaka se. Menelik yaje kwakirwa na Salomon muri Yeruzelemu amara imyaka yigira muri uyu mujyi w'amateka. 

    Ubwo igihe cyageraga Menelik ngo asubire mu gihugu cye ndetse bisabwe n'Abiru b'i Bwami, Salomon yasabye mukuru wa Menelik kuri se [imfura ya Salomon] kumuherekeza.

    Ubwo Menelik yari agiye kugenda, umwe mu bahungu ba Salomon [umuvandimwe wa Menelik kuri se] yaje kwiba isanduku y'isezerano ayisimbuza itari yo maze ubwo Salomon yamenyaga iby’ubwo bujura atumaho abasirikare kujya guhiga Menelik.

    Nyamara bafashe ubusa, gusa Menelik bwari ubugambanyi yari yakorewe. Ubwo yabonaga isanduku y'isezerano, yashatse kuyisubizayo nyamara mbere yo kubikora aribwira ati ‘uku ni ugushaka kw'Imana isanduku y'isezerano igomba kugera muri Ethiopia’.

    Mu nzozi Salomon yabwiwe n'Imana ko n’ubwo isanduku ya nyayo yajyanwe ariko bagomba gufata ihari nk’aho ari iya nyayo, yaba abiru n'abaherezabitambo bose bakifata nk’aho ari iya nyayo ku buryo bidakwira muri rubanda ibyo kwibwa kwayo.

    Menelik yasubiye kwa nyina muri Ethiopia afite n'isanduku y'isezerano ijyanwa mu rusengero. Nk’uko kandi bivugwa n'ubu ngo iracyahari. Icyakora haje kuboneka izindi nyandiko zitavuga kimwe amateka y'Umwamikazi wa Sheba n'ibitabo twakoresheje tubakorera iyi nkuru.

    Abasesenguzi bagenda bavuga ibitandukanye kuri uyu mwamikazi bashingiye ku byanditswe byera n'ibindi byagiye bimuvugwaho, kugeza n'ubu inkuru y'Umwamikazi wa Sheba iracyavugwaho byinshi yaba mu kwemeza mu kuri igihugu nyacyo akomokamo dore ko agace ka Sheba kagaragara mu bihugu bibiri binyuranye Arabia na Ethiopia, gusa abanditsi benshi bamugarukaho berekeza ku kuba yaba aturuka kandi yarabayeho muri Ethiopia.

    Umwamikazi wa Sheba yaririmbweho indirimbo zinyuranye mu isi harimo n’iyo Meddy aheruka gukora, akinwaho filimi zinyuranye, mbega inkuru y’uyu mwamikazi iri mu zitangaje isi yigeze yaba none yewe no mu gihe cyashize.


    REBA HANO INDIRIMBO ‘QUEEN OF SHEBAH’ YA MEDDY



    Source : https://inyarwanda.com/inkuru/111519/yagerageje-ubuhanga-bwumwami-salomon-babyaranye-inkomoko-ye-ni-urujijo-ishiramatsiko-kuri–111519.html

  • Sida yaba iri gukendera, umuntu wa kabiri yamaze kuyikira. #rwanda #RwOT

    Nyuma y'uko mu mwaka ushize wa 2020 hagaragaye umurwayi wa mbere ukize Virusi y'agakoko gatera Sida, habonetse undi muntu wamaze gukira Sida.

    Nk'uko raporo y'itsinda ry'abaganga b'inzobere mu buvuzi bahagarariwe na Dr Xu Yu bagaragaje ibimenyetso by'uko uyu mugore y'abashije gukira Sida ntayindi miti ahawe.

    Abaganga bavuga ko akimara kumyenya ko afite ubwandu bwa Virusi itera Sida yafashe imiti amezi make gusa kuko ubundi yari atwite akaba yarayifashe mu rwego rwo kurinda ko umwana atwite yakwandura Sida.

    Nyuma y'igihe abaganga bakomeje kumufata ibizamini kugira ngo barebe, baza gusanga umubiri we warabashije kurwanya Virusi yari iwurimo.
    Ibi byose bikaba byaratangarijwe mu kinyamakuru kitwa Annals of Internal Medicine.

    Iyi raporo igaragaza ko uwo muntu wakize ari umugore w'imyaka 31, bikaba byaragaragaye ko afite Virusi muri 2013.

    Source : https://impanuro.rw/2021/11/17/sida-yaba-iri-gukendera-umuntu-wa-kabiri-yamaze-kuyikira/

  • Ikipe y’igihugu ya Iran y’abagore irashinjwa… – #rwanda #RwOT

    Zohreh Koudaei w’imyaka 32 y’amavuko, yakuyemo Penariti zigera kuri ebyiri ubwo Iran yatsindaga Jordan Penariti 4 kuri 2 mu mukino wari wabaye  tariki 25 Nzeri 2021 urangira banganyije.

    Perezida w’ishyirahamwe ry’umupira w’amaguru muri Jordan, Prince Ali bin al-Hussain yandikiye ubuyobozi bw’ishyirahamwe ry’umupira w’amaguru muri Asia ko uyu muzamu yakorerwa ibizamini bakareba niba yaba ari umugore koko.

    Ubuyobozi bw’ikipe ya Iran bukomeje gutsimbarara kuri ubu busabe buvuga ko ikipe yabo n’ubundi yari ifite amahirwe yo gukomeza muri iyi mikino bumva ko nta rwitwazo ruhari.




    Source : https://inyarwanda.com/inkuru/111540/ikipe-yigihugu-ya-iran-yabagore-irashinzwa-gukinisha-umuzamu-wumugabo-111540.html

  • Abakobwa n’abagore babangamiwe n’izamuka ry’ibiciro bya cotex – #rwanda #RwOT

    Bamwe mu bakobwa baganiriye na IGIHE, bavuze ko bakigorwa no kubona amafaranga yo kugura ‘cotex’ bitewe n’uko ipaki imwe iri kugurishwa 1000 Frw cyangwa ari hejuru yayo.

    Bahamya ko mbere ipaki ya cotex bayiguraga 700 Frw ariko ubu bari kuyigura 1000 Frw mu gihe bizwi neza ko ibi bikoresho bitagisora.

    Uwamahoro Liliane wo mu Murenge wa Gtsata yagize ati “Nimudukorere ubuvugizi kuko kuva bavuga ngo cotex ntizisora, ibiciro biracyari bya bindi hari n’aho usanga zigura 1000 Frw cyangwa ari hejuru yayo kandi tuzi neza ko zasorewe imisoro.”

    Mukandori Immaculée ufite abana batanu barimo bane b’abakobwa, nawe yemeza ko agorwa cyane no kubonera abakobwa be Cotex.

    Ati “Wenda badufashije bakazishyira nko kuri 700 Frw cyangwa 800 Frw ariko ntibigere kuri 1000 Frw byadufasha. Uzi uburyo kugira ngo abana banjye bose nzibabonere bingora, nonese waba ufite abana batanu bakeneye kurya ukanababonera n’amafaranga ya cotex.”

    Uwera Clementine yavuze ko kuva Cotex zasonerwa gusora nta mpinduka babona. Ati “Njye mbona ntacyahindutse ahubwo hari n’aho bazamura ibiciro byazo, numva badufasha kuko zidasora tukajya tuzibonera no ku mafaranga 500 Frw kubera ko zinjira gihugu nta misoro zitanze.”

    Umucuruzi ukorera ku Mashyirahamwe Nyabugogo, utarifuje ko izina rye ritangazwa yabwiye IGIHE ko impamvu ibiciro bya cotex bitagabanuka biterwa n’abo baziranguraho.

    Ati “Natwe mudukoreye ubuvugizi byadufasha kuko ujya nka hariya mu Mujyi aho turangurira umucuruzi akakubwira igiciro cyazo ariko ntabe aricyo ashyira kuri fagitire, ahubwo agashyira ikiri hasi y’amafaranga mwemeranyije noneho nawe wagera aho ukorera ugashyiraho igiciro wifuza kugira ngo wunguke.”

    Yakomeje avuga ko aba bacuruzi iyo umuntu yanze kwemera ibyo bamubwiye banga kuzimuha, anaboneraho gusaba Leta kubakurikirana kuko aribo batuma ibiciriro by’ibikoresho bitandukanye birimo na cotex bikomeza guhenda.

    Aba bakobwa n’abagore bakomeje gusaba ko ibiciro vya cotex bigabanuka mu gihe hashize imyaka ibiri hafashwe umwanzuro w’uko bitazongera gusoreshwa.

    Abakobwa n’abagore babangamiwe n’izamuka ry’ibiciro bya cotex

    source : https://ift.tt/3Hwkzhn

  • Rulindo: RIB yafunze 5 muri dosiye y’umusore wishe umugore amutereye icyuma mu kabari – #rwanda #RwOT

    Ubu bwicanyi bwabaye tariki ya 11 Ugushyingo 2021 ahagana saa Tanu z’ijoro, biturutse ku makimbirane yabaye hagati y’abantu banyweraga mu kabari kari mu Mudugudu wa Gaseke, Akagari ka Kijabangwe, Umurenge wa Shyorongi muri Rulindo.

    Muri ako kabari habereyemo imirwano yaje kugwamo uwitwa Nyiramayira Epiphanie w’imyaka 36 wishwe atewe icyuma.

    IGIHE yamenye ko mbere y’iyi mirwano umusore umwe yasohokanye umukobwa mu kabari, bajya gusangira na bagenzi babo.

    Mu gihe bari kumwe haje undi musore azabiranwa n’uburakari avuga ko umukobwa basohokanye mu kabari ari umukunzi we.

    Ibi byatumye bakimbirana hanavuka imirwano; ubwo umwe mu bagore bari mu kabari yageragezaga gukiza abarwanaga ni bwo yatewe icyuma, bimuviramo urupfu.

    Umuvugizi wa RIB, Dr. Murangira B. Thierry, yabwiye IGIHE ko ukekwaho ubu bwicanyi yemeye ko ibyo yabikoze yabitewe n’ifuhe yagiriye mugenzi we yasanze yasohokanye n’uwo yita umukunzi we.

    Yagize ati “Aremera icyaha akavuga ko yabitewe no gufuha, nyuma yo gusanga umusore asangira n’abandi barimo umukobwa avuga ko bakundana.’’

    Iyi dosiye ikurikiranywemo abantu batanu bakekwaho ibyaha bitandukanye, barimo ucyekwa kuba yarateye nyakwigendera icyuma, batatu barwanye ndetse na nyir’akabari wahishiriye ibimenyetso.

    Nyir’akabari yafunzwe kuko nyuma yo kubona Nyiramayira atewe icyuma, yahise atangira guhanagura amaraso aho yagiye atarukira hose, ndetse ahisha na bimwe mu bimenyetso byatawe na nyakwigendera ubwo yahungaga.

    Dr Murangira ati “Ibi byose yabikoze agamije kuyobya uburari ko imirwano atari ho yabereye. Ni icyaha gihanwa n’amategeko ko umuntu yihutira gusibanganya ibimenyetso by’ahakorewe icyaha, kuko bibangamira itangwa ry’ubutabera ndetse bigatuma uwahohotewe adahabwa ubufasha bwihuse bigishoboka.”

    Yavuze ko icyihutirwa mu gihe habaye icyaha ari ugutabariza umuntu, abagikoze bagafatwa bakagezwa imbere y’ubutabera.

    Ati “RIB iributsa umuntu wese ko kwica umuntu ari icyaha cy’ubugome kandi ko ubikoze wese agomba gushyikirizwa ubutabera. Gukubita no gukomeretsa ku bushake no kuzimanganya ibimenyetso no kudatabara umuntu uri mu kaga bihanwa n’amategeko. RIB irasaba abantu kubyirinda kuko ari ibyaha bihanwa n’amategeko.’’

    Abafashwe bakurikiranyweho ibyaha bine ari byo ubwicanyi, gukubita cyangwa gukomeretsa ku bushake, kwirengagiza gutabara umuntu uri mu kaga no gusibanganya ibimenyetso.

    Aba bose bemera ibyaha bakoze, kuri ubu bafungiye kuri Sitasiyo ya RIB ya Bushoki mu gihe iperereza rikomeje kugira ngo hakorwe dosiye ishyikirizwe Ubushinjacyaha.

    RIB yakanguriye abaturarwanda kubungabunga no kudasibanganya ibimenyetso by’ahakorewe icyaha no kwirinda kubisibanganya kuko ari icyaha gihanwa n’amategeko. Yabasabye kwirinda kubangamira imigendekere myiza y’iperereza no kwihutira gutanga amakuru yose yafasha kugira ngo umunyacyaha afatwe agezwe imbere y’amategeko.

    Abantu batanu batawe muri yombi bakurikiranyweho urupfu rw’umugore wishwe aterewe icyuma mu kabari kamwe mu Karere ka Rulindo

    source : https://ift.tt/3FrvfvU

  • Abatalibani basabye Amerika kurekura amafaranga yabo yafatiriwe – #rwanda #RwOT

    Guhera muri Kanama uyu mwaka, ubwo Abatalibani bafataga ubutegetsi, Leta ya Amerika yahise ifatira amwe mu mafaranga yari ari kuri konti z’abaturage ba Afghanistan muri Amerika, harimo na miliyari 9 z’Amadolari ya Banki Nkuru ya Afghanistan.

    Kuri uyu wa Gatatu, Minisitiri w’Ububanyi n’amahanga wa Leta y’Abatalibani, Amir Khan Muttaqi yanditse ibaruwa ifunguye igenewe Inteko Ishinga Amategeko ya Amerika, ayisaba gutora umwanzuro wo kurekura ayo mafaranga.

    Yagize ati “Turasaba ko kugira ngo imiryango y’umubano wo mu gihe kiri imbere ifungurwe, imitungo ya Banki Nkuru ya Afghanistan yafatiriwe ikuweho ndetse n’ibihano banki zacu zafatiwe bikwiriye kuvaho.”

    Yavuze ko kutarekura ayo mafaranga bishobora kuba intandaro y’ibindi bibazo by’ubukungu, bishobora gutera gusuhuka abaturage b’abimukira bakaba benshi.

    Mu Ukwakira uyu mwaka, Visi Perezida wa Banki ya Amerika, Wally Adeyemo yabwiye Abasenateri ko nta mpinduka barabona muri Afghanistan zatuma barekura ayo mafaranga yafatiriwe.

    Hashize iminsi ubukungu bwa Afghanistan bwaraguye mu mabanki nya mafaranga arimo, abakozi ntibishyurwa ndetse n’ibitumizwa mu mahanga nta mafaranga yo kubyishyura ahari.

    Amerika yafatiriye miliyari icyenda z’amadolari za Banki Nkuru ya Afghanistan

    source : https://ift.tt/3DuISKc

  • U Rwanda rugiye kwakira inama mpuzamahanga iziga ku guhanga udushya mu buvuzi – #rwanda #RwOT

    Iyi nama yiswe ‘Rwanda Global HealthCare summit’ izatangira ku wa 18 Ugushyingo 2021 izamara iminsi itatu yiga ku mitangire ya serivisi z’ubuvuzi, guhanga udushya n’ibindi bigamije iterambere mu buvuzi ku ruhando mpuzamahanga.

    Ni inama ngarukamwaka itegurwa na Kompanyi y’Abanya-Zimbabwe ariko ikorera mu Rwanda ya “Be still Investment (BSI)”.

    BSI ni sosiyete yemewe ikorera mu Rwanda, igahuza inzobere mu buvuzi, sosiyete zikora imiti zikanayigurisha ndetse n’abakora mu nzego z’ubuzima kugira ngo bashake ibisubizo by’ibibazo bikunda kugaragara muri Afurika mu bijyanye n’ubuzima birimo imiti mike, ndetse n’ibikoresho byo kwa muganga byiza kandi bihendutse.

    Rwanda HealthCare Summit kandi yibanda cyane ku ndwara zitandura n’indwara zandura.

    Ubusanzwe iyi nama yitabirwa n’abantu batandukanye barimo, Abaminisitiri, Abahagarariye za Guverinoma z’ibihugu bya Afurika, inzobere mu buvuzi n’abayobozi b’ibitaro.

    Zimwe mu ngingo zizibandwaho ni izifitanye isano no kurebera hamwe ibibazo biri mu buvuzi ku ruhando mpuzamahanga no gutekereza ibisubizo bishoboka kuri byo.

    Inzobere mu buvuzi akaba n’umwarimu muri Kaminuza y’u Rwanda, Dr Stefan Jansen yabwiye IGIHE ko kwakira inama nk’iyi ari amahirwe akomeye ku gihugu nk’u Rwanda kuko birufasha kumenya uko ruhagaze mu buvuzi ku ruhando mpuzamahanga.

    Ati “Iyi nama ni ingenzi cyane, kuko igiye guhuza inzego z’abikorera n’abarwiyemezamirimo kandi ibyo ni ibintu byiza kuko hari byinshi bashobora kwiga.”

    “Icyo bivuze ni uko u Rwanda rwifuza kubaka ubushobozi bw’urwego rw’ubuvuzi no guhanga udushya kandi ibyo kubigeraho, bisaba kugira urwego ruhamye mu mitangire ya serivisi. Hari nk’imiti dukoresha muri Afurika ariko tutabasha gukora kandi kugira ngo bikorwe bisaba gukomeza kungurana n’ibitekerezo by’abandi.”

    Yagaragaje kandi ko rushobora kubona amahirwe y’abashoramari bashya baturutse mu bazaba bitabiriye iyi nama kubera ko hari abashobora kubona inzira zo gushora imari mu Rwanda mu rwego rw’ubuvuzi.

    Ati “Ni isoko rigari kandi rifunguye, ni inama izahuza abantu benshi kandi bashobora gukururwa n’ishoramari. Birashoboka cyane ko abazitabira iyi nama bashobora guharanira kubyaza umusaruro amahirwe y’ishoramari mu Rwanda mu rwego rw’ubuvuzi.”

    Rwanda Global HealthCare summit igiye kuba ku nshuro ya Kabiri kuko yatangiye kubera mu Rwanda mu 2019, icyakora umwaka ukurikiyeho ntabwo yabaye bitewe n’uko icyorezo cya Covid-19 cyavuzaga ubuhuha.

    Ni inama kandi izaberamo imurikabikorwa ry’ibikoresho bikoreshwa mu buvuzi, rizafasha abakora imiti muri Afurika barimo Med Aditus na WaterAid kugaragaza ubushobozi bwabo n’ubuhanga bafite mu buvuzi.

    Intego nyamukuru y’iyi nama ni ukugira ubuzima bwiza binyuze mu kuzamura ubumenyi no gutanga amakuru ajyanye n’ubuzima mu nama zinyuranye, guhanga udushya no kuvumbura bikaba ku mutima w’ibigomba kwitabwaho mu bakora mu buvuzi.

    Hari kandi n’Imurikagurisha rizafasha abantu kubona ubumenye, gutanga umusanzu, gusangira ubunararibonye, guhuza abakora ibikoresho by’ubuvuzi, inganda z’imiti, ibigo bikora ibikoresho byifashishwa mu kubaga n’ababigura.

    Uzaba kandi ari umwanya mwiza wo guhuza umubano w’ubucuruzi n’ abafata ibyemezo ku Isi yose, utanga ibicuruzwa, ababikora n’ababigurisha.

    Ibi bizateza imbere abatanga ibicuruzwa byo mu buvuzi biturutse ku mugabane wa Afurika kuko bazahuzwa n’isoko ryagutse ry’ababikora baturutse muri Afurika, Amerika, Aziya, u Burayi n’ahandi.

    u Rwanda rugiye kwakira inama mpuzamahanga yiga ku guhanga udushya mu buvuzi

    source : https://ift.tt/3wUdRNw

  • Nyarugenge: Hafashwe abagore batatu bakekwaho gukoza isoni abanyamahanga – #rwanda #RwOT

    Aba bagore bafashwe nyuma y’uko hari abanyamahanga babasanze mu iduka bakoreramo, aho kugira ngo babahe serivisi bifuzaga ahubwo batangira kubavuga no kubaseka ndetse no ku bakwena bibatera isoni.

    Umuvugizi wa Polisi CP John Bosco Kabera, yabwiye itangazamakuru ko bakurikiranyweho ibikorwa bikoza isoni undi umuntu ndetse ko hari n’uwo bakoze mu misatsi atabishaka.

    Ati “Hari abashyitsi bagiye aho bakoreraga mu iduka barimo kugura ibintu batangira kubavuga, barabaganira abantu bumva bakozwe n’isoni bagize ngo barabaza, barabaseka.”

    Yakomeje avuga ko hari n’undi munyamahanga muri abo bakoze mu musatsi atabishaka.

    Ati “Gukora ku muntu atabiguhereye uburenganzira ukamukoraho gusa ntabwo ari byo, gukwena umuntu cyangwa gukora igikorwa bigaragara ko cyateye umuntu isoni ntabwo ari byo ngira ngo abatura-Rwanda benshi ntabwo babizi.”

    Yongeyeho ko Abanyarwanda bakwiye kwirinda gukora ibikorwa nk’ibyo aba bagore bakekwaho kuko bihanwa n’amategeko.

    Aba bagore bakurikiranyweho icyaha cyo gukoza isoni undi muntu. Iki cyaha gihanwa n’ingingo ya 135 y’itegeko riteganya ibyaha nibihano aho ugihamijwe ahanishwa igifungo kiri hagati y’umwaka umwe ariko kitarenze ibiri n’ihazabu itari munsi y’ibihumbi 100 Frw ariko itarenze ibihumbi 300 Frw.

    Hafashwe abagore batatu bakekwaho gukoza isoni abanyamahanga

    source : https://ift.tt/3CoCyCU

  • Muhanga: Akarere karasabwa Miliyoni 21ngo gasubirane ahahoze sitade yitiriwe Mbonyumutwa #rwanda #RwOT

    Nyuma yuko mu mwaka wa 2009 ikigo cy'Igihugu cy'ubwishingi mu Rwanda(RSSB) gihawe ikibanza cy'ahahozemo sitade yitiriwe Mbonyumutwa wabaye Perezida w'u Rwanda, nyuma yuko habayeho ubukererwe bwo ku cyubaka, hakaba hanavugwa ko nta bushobozi, akarere karasabwa Miliyoni 21 ngo kahasubizwe.

    Umuyobozi w'Agateganyo w'Akarere ka Muhanga usanzwe ari umunyamabanga Nshingabikorwa, Kanyangira Ignace avuga ko ikigo cy'Igihugu cy'ubwishingizi-RSSB cyamaze kubabwira ko kitagishoboye kubaka iki kibanza, ko ahubwo basaba Akarere kubishyura imirimo bakoze mu kibanza bari barahawe cyahoze ari sitade yari ishyinguyemo Uwabaye Perezida wa mbere w'U Rwanda Mbonyumutwa Dominique.

    Kanyangira ati' Nibyo koko iki kigo cyatumenyesheje ko kitagishoboye kucyubaka, ndetse banatubwiye ko imirimo bateganyaga kuhakorera batakiyihakoreye bityo twagisubirana, none turimo kureba ibyakorwa kugirango gisubire mu maboko y'akarere kugirango abazabishobora bagifate bagikoreremo'.

    Akomeza avuga ko iki kigo cyamenyesheje akarere ko kuva bagihabwa bari bamaze gutanga asaga miliyoni 21 kuri iki kibanza, ko bityo akarere karimo kureba ibishoboka kugira ngo hagire igikorwa bityo cyongere gisubire mu maboko y'akarere.

    Yagize ati' Iki kigo cyatubwiye ko imirimo yose cyakoze muri iki kibanza kuva bagihabwa bari bamaze kugitangaho asaga miliyoni 21, ariko natwe turimo kureba icyakorwa ngo iki kibanza gisubire mu maboko y'akarere, mbese n'uwagishaka agihabwe kandi acyubakemo akurikije ibiri mu gishushanyo cy'imikoreshereze y'ubutaka n'imiturire muri uyu mujyi wa Muhanga'.

    Uko abayobozi b'aka karere basimburana ku ntebe kuva kuri Meya Mutakwasuku Yvonne ari nawe bivugwa ko hatanzwe ku buyobozi bwe ndetse na Meya Uwamariya Beatrice wamusimbuye, bakunze kumvikana mu mbwirwaruhame bavuga ko bazasaba iki kigo kuzahubaka inzu igendanye n'ibikenewe muri uyu mujyi birimo nk'icyumba mberabyombi cyajya cyakira abantu basaga ibihumbi 4000 bahujwe n'ikintu kimwe nk'ubukwe, imikino, ibitaramo cyangwa ibirori bitandukanye.

    Ahahoze iyi sitade, aho bitiriye Mbonyumutwa, ubu hazitijwe amabati. Tubibutse ko nubwo ariho hari umubiri w'uyu wabaye Perezida wa mbere wa Repuburika y'U Rwanda, ariwe Mbonyumutwa Dominique, umubiri we wimuriwe mu irimbi riri mu Gahondo ku irimbi ry'Abasilamu.

    Aya mafaranga RSSB yaka akarere ka Muhanga, bikwekwa ko yaba ari akomoka ku bikorwa bitandukanye birimo n'iyimurwa ry'umubiri wa Mbonyumutwa wari uhashyinguye ndetse no gusenya igice cya sitade cyari gisakaye hamwe no kugura amabati yubatse umuzenguruko w'iki kibanza bakizitira.

    Gusa kugeza ubu nubwo nta bikorwa bigaragara bihakorerwa, aha hantu hifashishwa na Kompanyi nyarwanda ikora imihanda ya Horizon nk'ububiko bw'ibikoresho ikoresha mukazi kabo ka buri munsi mu mihanda igize intara y'Amajyepfo n'Uburengerazuba.

    Akimana Jean de Dieu

    Source : https://www.intyoza.com/muhanga-akarere-karasabwa-miliyoni-21-ngo-gasubirane-ahahoze-sitade-yitiriwe-mbonyumutwa/

  • Kigali: Baracyekwaho ibyaha birimo gushungera no gukora umuntu mu misatsi #rwanda #RwOT

    Ku gicamunsi cyo kuri uyu wa Gatatu tariki 17 Ugushyingo 2021, Polisi ikorera mu Murenge wa Rwezamenyo mu Karere ka Nyarugenge, yerekanye abagore batatu bakekwaho ibyaha birimo gushungera umuntu, kumukora mu misatsi, kumuseka, ibyatumye uwabikorewe abona ko yabaye igishungero bikamukoza isoni mu bantu bari aho.

    Ni ibyaha bivugwa ko byakozwe ku wa Kabiri tariki 16 Ugushyingo 2021, ubwo hari abashyitsi ba b'abanyamahanga bagiye mu iduka ritatangajwe izina, ariko ribarizwa mu Mujyi wa Kigali maze basangayo abo bagore batatu aho kubakira batangira kubavuga, babajije igituma babavuga umwe muri abo bagore akora umunyamahanga mu misatsi, ni uko bagira isoni n'ipfunwe maze nyuma bahita batanga ikirego kuri Polisi.

    Umuvugizi wa Polisi y'u Rwanda, CP John Bosco Kabera, avuga ko gukora ku muntu atabiguhereye uburenganzira ari icyaha gihanwa.

    Ati 'Rimwe na rimwe abantu benshi ntibazi ko gukora ku muntu atabiguhereye uburenganzira bihanwa n'itegeko. Niba abashyitsi baje bakugana ni byiza ko murangwa n'umuco mukakira na yombi ababagana. Impamvu bishyizwe ku mugaragaro ni uko ari ubwa mbere twakiriye ikirego nk'icyo bigaragaza ko hari abantu bamwe basobanukiwe amategeko kurusha abandi, hakaba n'abandi batayazi'.

    Icyaha bakekwaho cyo gukora igikorwa gikoza isoni undi muntu, gihanwa n'ingingo ya 135, y'itegeko No 68/2018 ryo ku wa 30/08/2018 riteganya ibyaha n'ibihano muri rusange.

    Iyo ugikekwaho agihamijwe n'Urukiko ahanishwa igifungo kitari munsi y'umwaka (1) ariko kitarenze imyaka ibiri (2), n'ihazabu itari munsi y'Amafaranga y'u Rwanda ibihumbi ijana (100,000) ariko itarenze ibihumbi magana atatu (300,000).

    Ariko iyo cyakorewe mu ruhame, uwakoze icyaha ahanishwa igifugo kitari munsi y'imyaka ibiri ariko itarenze imyaka itatu n'ihazabu atari munsi y'amafaranga ibihumbi magana atanu (500,000 Frw) ariko itarenze miliyoni imwe (1,000,000Frw).

    Ibyo bihano bishobora kandi no kwikuba kabiri, urugero nk'iyo uwagikoze yagifashijwemo n'abandi (umwe cyangwa barenze) cyangwa uwagikoze yakoresheje agahato cyangwa ibikangisho n'ibindi.

    CP Kabera yongeraho ko iryo tegeko rireba abantu bose kandi aboneraho no gusaba abaturarwanda kurushaho kwihugura mu mategeko kugira ngo hatazagira ugongana n'itegeko yitwaza ko atarizi.

    SRC:KT

    The post Kigali: Baracyekwaho ibyaha birimo gushungera no gukora umuntu mu misatsi appeared first on IRIBA NEWS.

    Source : https://iribanews.rw/2021/11/17/kigali-baracyekwaho-ibyaha-birimo-gushungera-no-gukora-umuntu-mu-misatsi/