Webrwanda Backend

Category: Uncategorized

  • Ikigo gihugura abayobozi b’amashuri no kuzamura umushahara: Impinduka ku mibereho y’abarimu – #rwanda #RwOT

    Ntabwo umusaruro wa mwarimu ushobora kuba mwiza atahawe ibimufasha kugira ngo yigishe neza; birimo ibikorwaremezo, imfashanyigisho n’izindi gahunda zizamura imibereho ye ikarushaho kuba myiza.

    Iterambere rya mwarimu, usanga rihangayikishije benshi kuko nko mu Rwanda, hashingiwe kuri gahunda zitandukanye zashyizweho na Leta, mwarimu ni we ushingirwaho.

    Kuri ubu mwarimu ari ku isonga mu gushyira mu bikorwa gahunda nyinshi za Leta zigamije gukemura ibyo bibazo byo kubaka uburezi buhamye.

    Guverinoma y’u Rwanda yashyize imbaraga mu kwita ku iterambere rya mwarimu, aho kuri ubu hashize imyaka itatu kuva mu 2019, abarimu b’amashuri abanza n’abo mu yisumbuye bongererwa 10% by’umushahara wabo wa buri kwezi.

    Ibi bikaba byakomeje no mu 2020 kandi no mu mwaka w’Ingengo y’Imari ya Leta wa 2021/2022 aya mafaranga 10% y’umushahara wa buri mwarimu akaba yarateganyijwe akazatangwa nubwo igihugu gihanganye n’ibihe bitoroshye byatewe n’icyorezo cya Covid-19.

    -  Hagiye gushyirwaho ikigo cyihariye gihugura abayobozi b’amashuri

    Mu Nama Mpuzamahanga ya 13 y’Ihuriro ry’Abarimu, iri kubera i Kigali hagati ya tariki 1-3 Ukuboza 2021, Minisitiri w’Uburezi, Dr Uwamariya Valentine, yavuze ko mu Rwanda hagiye kubakwa Ikigo Nyafurika cy’Icyitegererezo mu guhugura abayobozi b’amashuri.

    Ni ikigo cyitezweho kujya gihugura abayobozi b’amashuri kuva ku abanza kugera muri Kaminuza, hagamijwe kubaha ubumenyi butuma babasha kuyobora no gucunga neza amashuri.

    Minisitiri Dr Uwamariya yagize ati “Muri uwo murongo, ku bufatanye n’abafatanyabikorwa turateganya gushyiraho Ikigo Nyafurika cyigisha kuyobora amashuri, kizaba gifite intego yo gufasha guverinoma za Afurika kubaka ubusobozi mu guteza imbere imiyoborere y’amashuri.”

    Yakomeje agira ati “Ni ibintu bizatuma umusaruro wiyongera, haba ku ruhande rwabo nk’abayobora amashuri ndetse no ku ruhande rw’abarimu baba bashinzwe kureberera.”

    Minisitiri Dr Uwamariya yavuze ko kugeza ubu ibiganiro n’abafatanyabikorwa batandukanye bigeze kure ku buryo hari icyizere ko iki kigo cyatangira mu bihe bya vuba.

    Yakomeje avuga ko hari n’andi mahugurwa asanzwe ahabwa abarimu, byose bigafasha mu kugira mwarimu ushoboye kandi ujyana by’umwihariko n’ibihe bigezweho cyane cyane ikoreshwa ry’ikoranabuhanga.

    Ati “Nko muri ibi bihe bya Covid-19, abarimu bagombaga gukoresha ikoranabuhanga mu kwigisha, icyo gihe icyo twakoze ni ugushyiraho gahunda ya mudasobwa imwe kuri buri mwarimu, ibyo kandi bikajyana no kubahugura bigishwa uko bashobora gukoresha izo mudasobwa mu gutanga amasomo.”

    Bamwe mu bayobozi b’abarimu bavuga ko kugeza ubu bari bagifite imbogamizi mu guhanga udushya ari nayo mpamvu amahugurwa nk’aya ari ingenzi kuko abenshi bataramenya neza ibijyanye n’ikoranabuhanga.

    Umuyobozi w’Ishuri Nderabarezi rya Zaza [TTC Zaza], Padiri Mushimiyimana Jean Paul, yabwiye IGIHE ko “Ibijyanye n’ikoranabuhanga ntabwo benshi barabimenya neza, ariko dushimira Leta n’abandi bafatanyabikorwa bashyira imbaraga mu guhugura abarimu kugira ngo za nshingano zabo bazishyire mu bikorwa uko bikwiye.”

    Minisitiri w’Uburezi, Dr Uwamariya Valentine, yavuze ko u Rwanda rukomeje gushyiraho gahunda nyinshi zigamije guteza imbere imibereho ya mwarimu

    -  Haracyari icyuho cy’abarimu

    Imibare y’Ishami ry’Umuryango w’Abibumbye ryita ku Burezi, Ubumenyi n’Umuco (UNESCO), igaragaza ko nko mu bihugu byo Munsi y’Ubutayu bwa Sahara hari icyuho cy’abarimu barenga miliyoni 15.

    Umuyobozi ushinzwe Iterambere rya Mwarimu muri UNESCO, Carlos Vargas-Tamez, avuga ko icyo cyuho gishingiye ku mpamvu ebyiri zirimo umushahara muto ndetse n’imiterere y’akazi k’ubwarimu.

    Ati “Kuba ku Isi hose hari ikibazo cy’ubuke bw’abarimu, birakomeye kubyumva ariko impamvu zibitera zirimo kuba amafaranga bahembwa akiri make ariko na za gahunda zigamije kubafasha zikaba zigishyirwamo amafaranga make.”

    Carlos Vargas avuga ko kugeza ubu ingengo y’imari ishyirwa mu rwego rw’uburezi ikiri ikibazo cyane kuko nibura yagakwiye kuba iri hagati ya 15-20% aho kuba hagati ya 3-6% by’ingengo y’imari y’ibihugu byose.

    Ati “Amafaranga ibihugu bishyira mu rwego rw’uburezi iyo urebye usanga akiri ikibazo gikomeye, ni bimwe mu bituma n’abarimu bahembwa make, bigatera icyo kibazo cyo kuba hari benshi bahitamo kwiga ibindi aho kwiga uburezi.”

    Guverinoma y’u Rwanda yashyize imbaraga mu kuzamura urwego rw’imibereho ya mwarimu n’iterambere rye mu buryo bw’umwuga n’ubumenyi, aho umwarimu ubishaka kandi ubishoboye azafashwa kwiga akaminuza kugeza ku rwego rwa “Masters”.

    Binyuze muri iyi gahunda umwarimu yishyurirwa na Leta ikiguzi cyose cy’amasomo kugeza arangije kwiga kandi ntazishyuzwe ibyamutanzweho.

    Minisitiri Dr Uwamariya avuga ko iyi gahunda n’izindi zirimo kongera umushahara zitezweho gutuma hari benshi bakunda umwuga w’ubwarimu.

    Ibi bijyana kandi na gahunda ya Leta yo kongera umubare w’abarimu hagamijwe kugabanya umubare w’abanyeshuri umwarimu umwe aba agomba kwigisha.

    Nko mu mwaka ushize guverinoma yashyize mu myanya abarimu bashya bagera mu bihumbi 28 mu gihe muri uyu mwaka abashyizwe mu kazi ari ibihumbi 30.

    Mu Rwanda hateraniye inama yiga ku iterambere rya mwarimu by’umwihariko nyuma y’icyorezo cya Covid-19

    Abayobozi mu nzego zitandukanye by’umwihariko izifite aho zihuriye n’uburezi bari kuganira ku iterambere rya mwarimu muri Afurika no ku Isi hose

    Umuyobozi ushinzwe Iterambere rya Mwarimu muri UNESCO, Carlos Vargas Tamez na Minisitiri w’Uburezi, Dr Uwamariya Valentine baganiriye n’itangazamakuru nyuma y’inama yiga ku iterambere rya mwarimu

    Guverinoma y’u Rwanda ikomeje gushyiraho gahunda zitandukanye zigamije guteza imbere imibereho y’umwarimu

    source : https://ift.tt/3lwJUOZ

  • Gatsibo: Polisi yafashe ucyekwaho guhiga inyamanswa akazica #Rwanda #RwOT via @kigalitoday #rwanda #RwOT

    Yafatanywe ibiro 15 by’inyama z’imvubu bicyekwa ko yari avuye kuyica muri Pariki y’Akagera kuko yafashwe ariho aturutse.

    Umuvugizi wa Polisi mu Ntara y’Iburasirazuba, Chief Inspector of Police (CIP) Hamdun Twizeyimana yavuze ko Hakizisuka yafatanwe inyama zuzuye umufuka.

    Yagize ati” Yafashwe agana iwe mu rugo abapolisi basanze afite umufuka urimo ibiro 15 by’inyama z’imvubu. Yafashwe biturutse ku makuru yatanzwe n’abaturage, Polisi yamufashe aturuka muri Pariki yerekeza iwe mu Mudugudu wa Munini.”

    CIP Twizeyimana yaburiye abantu bakora ibikorwa by’ubuhigi abibutsa ko bitemewe n’amategeko bityo abazajya babifatirwamo bazajya babihanirwa. Yashimiye abaturage batanze amakuru asaba n’abandi gukomeza gutanga amakuru ku muntu wese babonye yangiza ibidukikije cyangwa ahiga inyamanswa.

    Hakizisuka yahise ashyikirizwa Urwego rushinzwe ubugenzacyaha we (RIB) rukorera muri sitasiyo ya Rwimbogo kugira ngo hakorwe iperereza.

    Itegeko N°48/2018 ryo ku ya 13/08/2018, mu ngingo yaryo ya 44 ivuga ko hagamijwe kurengera ibinyabuzima, ibikorwa bikurikira birabujijwe: gutwika amashyamba, pariki z’Igihugu n’ibyanya; gutwika ibishanga, inzuri, ibihuru, ibyatsi hagamijwe ubuhinzi cyangwa gutunganya inzuri z’amatungo ndetse n’ibindi bikorwa ibyo aribyo byose byangiza ibidukikije birabujijwe.

    Ingingo ya 58 y’iri tegeko ivuga ko Umuntu wese uhiga, ugurisha, ukomeretsa cyangwa wica inyamaswa yo mu bwoko bw’inyamaswa bukomye n’ibizikomokaho, aba akoze icyaha. Iyo abihamijwe n’urukiko, ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi ya miliyoni eshanu (5.000.000 FRW) ariko atarenze miliyoni zirindwi (7.000.000 FRW).

    source : https://ift.tt/3ddA53R

  • Rulindo: Bahangayikishijwe n'inyama barya batazi aho zibagirwa #rwanda #RwOT

    Abaturage bo mu karere ka Rulindo bahangayikishijwe n'inyama barya batazi aho zibagirwa zirimo n'izibagira mu rutoki no mu gacaca.

    Bavuga  ko bishimira ko hafunguwe ibagiro ariko bagahangayikishwa no kurya inyama zitujuje ubuziranenge zibagirwa hirya no hino ziba zabitswe mu buryo butizewe. Ni mu gihe rwiyemezamirimo watsindiye isoko ryo gucunga ibagiro ry'akarere ryuzuye mu murenge wa Base ataka igihombo gikabije.

    Hashize ukwezi kumwe ibagiro ry'akarere ka Rulindo riherereye mu Murenge wa Base ryongeye gufungura imiryango. Ni  nyuma y'amabwiririza agenwa na RAB n'urwego rwa RICA yasabaga akarere kurihuza n'igihe tugezemo rigatanga seivisi zujuje ubuziranenge.

    RBA dukesha iyi nkuru yatangaje ko ari ibintu  abaturage bishimiye ariko baza gukomwa mu nkokora nuko nta matungo ahazanwa ngo bihahire akaboga nk'uko bari bagashonje.

    Si abaturage  gusa kuko na rwiyemezamirimo witwa Humura Trading Ltd watsindiye isoko ryo gucunga ibagiro ry'akarere ataka igihombo cya miliyoni 141 yatewe no kuba abaturage babagira inyama ahantu hatazwi.

    Dr Ndagijimana Joseph ucunga iryo bagiro avuga rifite ubushobozi bwo kubaga Inka 100 ku munsi ariko rikaba ribaga 4 ku munsi w'isoko. Asaba ko ko akarere ka Rulindo kakemura icyo kibazo nkuko bikubiye mu masezerano bagiranye atarubahirijwe.

    Ubuyobozi bw'akarere ka Rulindo bushyirwa mu majwi ku kutubahirisha amasezerano bagiranye na rwiyemezamirimo kuko arimo ingingo ivuga ko imirenge 9 igomba kujya igana iryo bagiro ariko bikaba bidakorwa.Umuyobozi wako Uwanyirigira Judith yatangarije RBA ko icyo kibazo kizabonerwa igisubizo mu minsi ya vuba.

    Ubwo bucuruzi bw'inyama butujuje ubuziranenge bunemezwa n'abaguzi b'impu bazizanirwa n'abaturage baba babagiye amatungo yabo mu cyaro ndetse n'abaturanye n'aho izo mpu zicururizwa zikabanukira bikabije.

    Uburemere bw'iki kibazo bwareberwa mu buryo ababazi n'abayobozi mu nzego z'ibanze bacyihunza ntibashake kugitangaho amakuru. Ibyo bigashingirwa ku buryo n'umukozi ushinzwe ubworozi mu murenge wa Shyorongi Bosenibo Valens yahisemo guhunga abanyamakuru ba RBA ubwo bashakaga kumubaza ku nyama byavuzwe ko yapimye ariko ntashake kuvuga aho zabagiwe.

     

     

    The post Rulindo: Bahangayikishijwe n'inyama barya batazi aho zibagirwa appeared first on IRIBA NEWS.

    Source : https://iribanews.rw/2021/12/02/rulindo-bahangayikishijwe-ninyama-barya-batazi-aho-zibagirwa/

  • Umuhanzi Koffi araye i Rubavu ejo arasesekara i Kigali #rwanda #RwOT

    Amashusho yagaragaje uyu muhanzi umaze iminsi yarazamuye impaka mu Rwanda, yinjira muri Hoteli Serena i Rubavu.

    Muri aya mashusho, Koffi Olomide agaragara ari gutambuka ajya ku bwakiriro bw’iyi hoteli agiye kuraramo, yambaye imyambaro y’umakara n’umweru n’ingofero y’umukara ahetse n’igikapu mu mugondo.

    Biteganyijwe ko Koffi Olomide arara i Rubavu ubundi ejo ku wa Gatanu tariki 03 Ukuboza 2021 akazerecyeza mu Mujyi wa Kigali aho buzacya ataramira abaturarwanda ku wa Gatandatu tariki 04 Ukuboza 2021.

    Igitaramo cy’uyu muhanzi cyagarutsweho cyane kuva mu cyumweru gishize ubwo bamwe mu bavuga ko bahirimbanira uburenganzira bw’abari n’abategarugori bahagurukaga ku mbuga nkoranyambaga bamagana ko aza gutaramira mu Rwanda kubera ibikorwa yakunze kugaragaza byo guhohotera ababyinnyikazi be ndetse n’urugomo yagiriye abantu banyuranye.

    Uko aba bitwa aba-Feminists bamaganaga ko uyu muhanzi aza gutaramira mu Rwanda, ni na ko ku ruhande rw’abamushyigikiye na bo bakomeje kugaragaza ko ntacyamubuza kuza gutaramira mu Rwanda kuko mu byo yahanishijwe bitamubuza gutaramira abantu mu bice binyuranye by’Isi.

    Source : http://www.ukwezi.rw/Imyidagaduro/article/Umuhanzi-Koffi-araye-i-Rubavu-ejo-arasesekara-i-Kigali

  • Umutangabuhamya yavuze ibitero byishe Abatutsi yahuriyemo na Claude Muhayimana #rwanda #RwOT

    Urukiko rw'i Paris mu Bufaransa ruburanisha ibyaha mpanabyaha rwumvise abatangabuhamya bagizwe ahanini n'abagize uruhare mu bitero byagabwe mu bice binyuranye byo muri komini Gitesi ku Kibuye, umwe muri bo avuga ibitero yajyanyemo na Claude Muhayimana.

    Abanyamakuru bakorana n'Umuryango w'Abanyamakuru baharanira amahoro Paxpress bari gukurikirana iby'uru rubanza i Paris mu Bufaransa batangaje ko kuri uyu wa Gatatu tariki 1/12/2021, abatanze ubuhamya ari abagabo babiri bafunzwe bakaba batanze ubuhamya bari mu Rwanda hifashishijwe  ikoranabuhanga. Abo ni Alexis Kabagema ufungiye i Muhanga wakatiwe imyaka 30 na Gaëtan Rutazihana ufungiye i Nyanza.

    Undi ni Musabyimana Louis uzwi nka Mido we warangije igihano cy'igifungo cy'imyaka 14. Kabagema Alexis yagarutse ku bitero yagiyemo byarimo Claude Muhayimana n'icyaguyemo umujandarume Mwafrika ku musozi wa Gitwa aho yateye grenade umusore wari mu bahungiye ku musozi akayifata akayimutera akaba ari we ihitana.

    Ngo hari umujandarume wahise abwira Muhayimana Claude ngo akatishe imodoka ya Daihatsu yari atwaye ngo batayitera amabuye.

    Uyu Kabagema ngo yanabonye iyi modoka iri hagati mu bari bagiye mu bitero byatumye basubirayo barisuganya bihuza n'abandi bicanyi bo mu bice binyuranye.

    Benda kugera ku musozi konseye Nambajimana François yabasabye kwambara mu ijosi amashara n'ibibabi by'ibiti ngo baticana ubwabo, ndetse bemeza uhura n'undi avuga ati Butare undi agasubiza ati Kibuye.

    Uyu mutangabuhamya yavuze ko Claude Muhayimana ari mu batangije ubwicanyi aho bari bari kuko yahabasanze ari kumwe n'abandi bakababaza niba bari babona ukuntu bica Abatutsi.

    Aha ngo ni ho abari kumwe na Muhayimana biciye umukecuru witwa Nyiramagondo, umukobwa we ndetse n'umwuzukuru bari bazanye mu modoka babapakiranye n'ihene bari basahuye.

    Uwitwa Gaëtan Rutazihana ufungiye muri gereza ya Nyanza we ibyo yavuze urukiko rwamugaragarije ko binyuranye n'ibyo yabwiye abajandarume b'Abafaransa bakoze iperereza kuri iyi dosiye.

    Avuga ko ibyo yavuze byinshi yabyumviye mu ikusanyamakuru muri gereza ya Gisovu, abivuga nk'aho yabibonye kandi yarabyumvise mu ikusanyamakuru.  Aha yagize Ati 'Hariya navuze ko nabonye Claude Muhayimana atwaye Daihatsu y'ubururu ndabasaba imbabazi nsaba n'Imana imbabazi kuko nabeshye.'

    Uyu mugabo wasobanuye ko yafunguwe amaze kwemera ibyaha hakagaragara ko hari abantu bajugunywe mu cyobo rusange ku bitaro bya Kibuye, ashinjwa kugira uruhare mu iyicwa ryabo akatirwa gufungwa burundu.

    Bamubajije impamvu yari yavuze ko Muhayimana yagize uruhare muri jenoside yibwira ko kuba yaratwaye Interahamwe mu modoka gusa nta ngaruka byamugiraho.

    Ikindi ngo abeshya yari ataratangira gusenga.

    Uwa 3 urukiko rwumvise ni Musabyimana Louis wakatiwe imyaka 14 kubera uruhare muri Jenoside yakorewe Abatutsi, ariko yarangije igihano.

    Uyu yakoranye na Muhayimana Claude muri Guest House kuko mu1994 yari ahamaze imyaka 5.

    Yagaragaje ko hari abantu biciwe aha bakoreraga harimo Munyankindi Anaclet bakoranaga ndetse n'uwari umucungamari wa Bralirwa Simon Masengesho wari uhacumbitse.

    Yagaragaje kandi ko Muhayimana yagiye atwara abantu mu bitero byagabwe mu bice binyuranye bya Kibuye harimo na Bisesero.

    Yavuze kandi ko imodoka Muhayimana Claude yatwaraga yari yarayisahuye ku mucuruzi bitaga Bongo Bongo banasahuye imifuka ya sima.

    Urukiko rwagaragarije uyu mutangabuhamya ko mu isakwa ryakozwe kwa Muhayimana basanze afite nomero ye muri telefone ndetse na mesaje bandikiranye, yemera ko nyuma yo kuvugana n'abajandarume bakoraga iperereza Muhayimana yamuhamagaye amusaba kuzamuhanaguraho ibyaha ndetse yohereza na avocat we ngo amubwira ko bazamufasha guhunga akaza mu Bufaransa.

    Tariki 22 Ugushyingo 2021 , mu Rukiko rwa Rubanda I Paris mu Bufaransa 'Cour d'assises' nibwo hatangiye urubanza rwa Claude Muhayimana, umunyarwanda ufite ubwenegihugu bw'u Bufaransa, ushinjwa ubufatanyacyaha muri Jenoside yakorewe Abatutsi muri Mata 1994.

    Emma-Marie Umurerwa

    [email protected]

    The post Umutangabuhamya yavuze ibitero byishe Abatutsi yahuriyemo na Claude Muhayimana appeared first on IRIBA NEWS.

    Source : https://iribanews.rw/2021/12/02/umutangabuhamya-yavuze-ibitero-byishe-abatutsi-yahuriyemo-na-claude-muhayimana/

  • Komisiyo y’imisifurire muri FERWAFA yahagaritse abasifuzi barindwi ku bera amakosa bakoze #rwanda #RwOT

    Itangazo ryashyizwe ku rubuga rwa FERWAFA rigira riti:

    Inama ya Komisiyo y’imisifurire ya FERWAFA yateranye kuri uyu wa kabiri tariki ya 30 Ugushyingo 2021 yiga ku myitwarire ya bamwe mu bayobozi b’imikino (abasifuzi n’abakomiseri) mu marushanwa atandukanye ategurwa na FERWAFA maze ifata imyanzuro ikurikira :

    1. SEBAHUTU Yussuf : Komisiyo yasanze SEBAHUTU Yussuf wari Komiseri w’umukino wa Shampiyona y’ikiciro cya kabiri mu bagore wahuje IPM WFC na GATSIBO WFC wabaye tariki ya 27 Ugushyingo 2021 yarakoze amakosa kuri uwo mukino bityo Komisiyo ifata umwanzuro wo kumuhagarika amezi atandatu (6) uhereye umunsi yamenyesherejweho uyu mwanzuro.

    2. MUNYANEZA Jean Paul : Komisiyo yasanze MUNYANEZA Jean Paul wari Komiseri w’umukino wa Shampiyona y’ikiciro cya kabiri mu bagore wahuje KAYONZA WFC na NASHO WFC wabaye tariki ya 27 Ugushyingo 2021 yarakoze amakosa kuri uwo mukino bityo Komisiyo ifata umwanzuro wo kumuhagarika amezi atandatu (6) uhereye umunsi yamenyesherejweho uyu mwanzuro.

    3. NSABIMANA Céléstin : Komisiyo yasanze NSABIMANA Céléstin wari umusifuzi wa kane ku mukino wa Shampiyona y’ikiciro cya mbere mu bagabo '’Primus National League” wahuje Rayon Sports FC na Etoile de l’Est FC wabaye tariki ya 27 Ugushyingo 2021 yarakoze amakosa kuri uwo mukino bityo Komisiyo ifata umwanzuro wo kumuhagarika ibyumweru bibiri (2) by’imikino bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    4. MUNEZA Vagne : Komisiyo yasanze MUNEZA Vagne wari umusifuzi wo hagati ku mukino wa Shampiyona y’ikiciro cya mbere mu bagabo '’Primus National League” wahuje Rayon Sports FC na Etoile de l’Est FC wabaye tariki ya 27 Ugushyingo 2021 yarakoze amakosa kuri uwo mukino bityo Komisiyo ifata umwanzuro wo kumuhagarika ibyumweru bitatu (3) bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    5. RUHUMURIZA Justin : Komisiyo yasanze RUHUMURIZA Justin wari umusifuzi wa kabiri wungirije ku mukino wa Shampiyona y’ikiciro cya mbere mu bagabo '’Primus National League” wahuje Police FC FC na Gorilla FC wabaye tariki ya 22 Ugushyingo 2021 yarakoze amakosa kuri uwo mukino bityo Komisiyo ifata umwanzuro wo kumuhagarika ibyumweru bine (4) by’imikino bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    6. NSABIMANA Claude : Komisiyo yasanze NSABIMANA Claude wari umusifuzi wo hagati ku mukino wa Shampiyona y’ikiciro cya mbere mu bagabo '’Primus National League” wahuje Police FC FC na Gorilla FC wabaye tariki ya 22 Ugushyingo 2021 yarakoze amakosa kuri uwo mukino bityo Komisiyo ifata umwanzuro wo kumuhagarika ibyumweru bibiri (2) by’imikino bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    7. MULINDANGABO Moïse : Inama ya Komisiyo y’imisifurire yateranye ku itariki ya 25 Ugushyingo 2021 yasanze MULINDANGABO Moïse wari umusifuzi wo hagati ku mukino wa Shampiyona y’ikiciro cya mbere mu bagabo '’Primus National League” wahuje Rayon Sports FC na Bugesera FC wabaye tariki ya 20 Ugushyingo 2021 yarakoze amakosa kuri uwo mukino bityo Komisiyo ifata umwanzuro wo kumuhagarika ibyumweru bitatu (3) by’imikino bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    Komisiyo y’imisifurire yafashe ibi byemezo igendeye ku itegeko rigenga imisifurire mu FERWAFA mu ngingo ya karindwi (7) igika cya makumyabiri na rimwe (21).

    FERWAFA iboneyeho kumenyesha abanyamuryango bayo ndetse n’abandi bafatanyabikorwa batandukanye b’umupira w’amaguru ko itazihanganira amakosa y’imisifurire ayo ari yo yose kandi ko izakomeza gushyira imbaraga mu kongerera ubumenyi n’ubushobozi abasifuzi mu byiciro byose mu Rwanda.

    Source : https://imirasire.com/?Komisiyo-y-imisifurire-muri-FERWAFA-yahagaritse-abasifuzi-barindwi-ku-bera

  • Umuco ntugacike : Min Bamporiki yagaragaye akina umukino wo Kunyabanwa #rwanda #RwOT

    Uwitwa Ibereryabigogwe [Ngabo Karegeya] kuri Twitter, yashyize amashusho kuri uru rubuga ubwo yahuraga na Bamporiki Edouard, bagakina umukino wo kunyabanwa wajyaga ufasha abagabo bo hambere kwitoza kujya mu ngamba ku buryo haramutse hari ubenderanyije bakwirwanaho.

    Ubutumwa buherekeje aya mashusho, Ibereryabigogwe [Ngabo Karegeya] yagize ati 'Inkoni yawe ntikavunike mubyeyi mwiza. Wakoze kunyigisha kurinda inka zacu n’inkiko z’URwatubaye.'

    Hon Edouard Bamporiki kuri uyu wa Gatatu yagiriye uruzinduko mu Karere ka Rubavu asura bimwe mu bikorwa biranga Umuco nyarwanda ndetse akanatanga ibiganiro bigamije kuwubungabunga.

    Bamporiki wahuye n’urubyiruko rwiga muri ULK Gisenyi, yarugejejeho ikiganiro cyari gifite insanganyamatsiko igira iti 'Umuco, indangagaciro n’amateka byacu : ishingiro ry’Ubunyarwanda n’iterambere duharanira.'

    Yagaragaje ko kandi yahuye n’umwe bazwi cyane ku rubuga rwa Twitter wiyita Ibereryabigogwe bakanagirana ikiganiro.

    Muri ubu butumwa Bamporiki yanyujije kuri Twitter, yagize ati 'Nahuye na Ngabo Karegeya [Ibireryabigogwe] ndamuramutsa, aritsa ati : 'Ikaze umu’. Nti : 'niko se sha, ugira inka ?’ Ati : 'Mutware Nta mwana ugira Inka Se akiriho’, ati : 'Ndi mu za Data. 'Mba ndoga Semugaza iyi ntekerezo nayitojwe n’umuto ndaremya. Murambe mu Nka, murame mu Ngabo, amata aduhame.'

    Source : http://www.ukwezi.rw/1-1/24/article/Umuco-ntugacike-Min-Bamporiki-yagaragaye-akina-umukino-wo-Kunyabanwa

  • Abasirikare bavuzweho urugomo muri Kangondo no gusambanya abagore bagabanyirijwe ibihano #rwanda #RwOT

    Ubwo abo basirikare bakatirwaga igifungo n’Urukiko rw’Ubujurire rwa Gisirikare mu kwezi k’Ukwakira 2020, baje kujuririra mu Rukiko Rukuru rwa Gisirikare mu kwezi kwakurikiyeho k’Ugushyingo 2020.

    Baburanaga bari kumwe n’abasivili babiri, ari bo Ntakaziraho Donat na Mukamulisa Diane(bakoraga irondo ry’umwuga), kuko Ubushinjacyaha buvuga ko igihe abasirikare bajyaga gukora ibyaha ngo babaga bari kumwe.

    Private Ndayishimiye Patrick wari wakatiwe igifungo cy’imyaka itatu, yakigabanyirijwe gisigara ari amezi atanu n’ihazabu y’Amafaranga y’u Rwanda ibihumbi 100, bisobanura ko yakirangije kuko amaze umwaka urenga afunzwe.

    Pte Nishimwe Fidèle na we wari wakatiwe igifungo cy’umwaka umwe, ubu yakatiwe igifungo cy’amezi atandatu n’ihazabu y’Amafaranga y’u Rwanda ibihumbi 500, akaba na we yarakirangije kubera ko yari amaze umwaka urenga afunzwe.

    Urukiko Rukuru rwa Gisirikare rwavuze ko impamvu rwahanaguyeho icyaha cyo gusambanya ku gahato aba basirikare ari uko nta bimenyetso bifatika bigaragaza ko cyakozwe.

    Ntakaziraho na Mukamulisa na bo bagabanyirijwe ibihano kuko hakatiwe igifungo cy’amezi atanu n’ihazabu ya 100 000 Frw icyakora kuri Mukamulisa we akaba azarangiza igihano yakatiwe nyuma kuko afite uruhinja.

    Source : http://www.ukwezi.rw/1-1/Amakuru-anyuranye/article/Abasirikare-bavuzweho-urugomo-muri-Kangondo-no-gusambanya-abagore-bagabanyirijwe-ibihano

  • Nkora ubukwe nanze Inkwano kandi nzakomeza kuyamagana- Nsanga #rwanda #RwOT

    Sylvie Nsanga wagarutsweho cyane muri ibi bihe aho akomeje kwamagana igitaramo cya Koffi Olomide giteganyijwe mu mpera z’iki Cyumweru, avuga ko iteka ahora aharanira ko abari n’abategarugori bahabwa agaciro bakwiye.

    Yagarutse ku bikorwa bimwe na bimwe bigize umuco wo duce tumwe na tumwe tw’u Rwanda nk’aho umusore usuye umukobwa bagomba kumutekera isake, aho umukobwa agira ibyo agurira umusore kugira ngo babane.

    Ati 'Noneho nkibaza nti ese ya matela na rya gare umukobwa yazanye, na byo babihaye agaciro mu mitungo y’inkwano na yo azanye.'

    Agakomeza agira ati 'Noneho nza kubona ko ibyo umugore yakoresheje bitajya bihabwa agaciro ariko ibyo umugabo yakoze byo bigahabwa agaciro, hari Inka n’andi mafaranga umusore atanga kugira ngo umukobwa azitegure.'

    Nsanga avuga ko ibi yaje kubibonamo ikibazo gikomeye kandi gisubiza inyuma ihame ry’uburinganire.

    Uyu mubyeyi kandi avuga ko hari n’inkambi yari irimo ibibazo nk’ibi by’abakobwa bangaga gushaka abasore badafite Inka.

    Ati 'Noneho nkavuga nti 'niba muri mu nkambi mukaba mudafite inka, mwibuke ko muri n’impunzi kandi nta nka mufite’, kuki umukobwa yumva ko agomba gutegeka ko umuhungu agira Inka, none se umuhungu yiyice,…'

    Sylvie Nsanga avuga ko yaje kuganiriza abo bakobwa bumvaga ko badashobora kuva mu rugo ngo bagendeye ubusa [batabakoye].

    Ati 'None se umugore ni igicuruzwa ?…Nubwo dufite politiki z’uburinganire ariko ntizagerwaho mu gihe tucyumva ko umugore agomba kujya hejuru no hasi kugira ngo abone inka yo gutanga ku mugore.'

    Avuga ko kandi ibi byanagiye biteza ingaruka z’ihohoterwa rishingiye ku gitsina kuko hari abagabo bakubita abagore babo babacyurira ko babakoye, akavuga ko ibi abibonamo ikibazo kandi ko kuri we yabyirinze.

    Ati 'Njyewe n’umuntu twagombaga gushakana naramubwiye nti 'njyewe nta nkwano muzatanga’ abo mu muryango wanjye bamwe barabyanga hari n’abataratashye ubukwe bwari bugiye no guhagarara.'

    IKIGANIRO CYOSE

    UKWEZI.RW

    Source : http://www.ukwezi.rw/1-1/Amakuru-anyuranye/article/Nkora-ubukwe-nanze-Inkwano-kandi-nzakomeza-kuyamagana-Nsanga

  • Nyuma y’Uko Min. Gatabazi asabye impinduka mu misifurire, FERWAFA yahagaritse abasifuzi bane #rwanda #RwOT

    Ibi byemezo byafashwe n’Inama ya Komisiyo y’imisifurire ya FERWAFA yateranye ku wa kabiri tariki ya 30 Ugushyingo 2021 yiga ku myitwarire ya bamwe mu bayobozi b’imikino (abasifuzi n’abakomiseri) mu marushanwa atandukanye ategurwa na FERWAFA.

    Imyanzuro yafashwe nyuma y’uko hamaze iminsi havugwa ikibazo cy’imisifurire mibi mu Rwanda.

    Nta minsi itanu irashira, Minisitiri w’Ubutegetsi bw’Igihugu, Gatabazi anenze imisifurire yagaragaye mu mukino wahuje Kiyovu Sports na Musanze FC, iyi kipe yo mu Majyaruguru ikaza kubona igitego umusifuzi akacyanga ariko akemaza icyo Kiyovu yatsinze benshi bemeza ko uwagitsinze yaraririye.

    Minisiti Gatabazi mu butumwa yanyujije kuri Twitter, yagize ati 'harya ubu igitego nk’iki na cyo bisaba ikoranabuhanga kugira ngo mubone ko uwagitsinze yari yarariye cyangwa ku makipe yo mu byaro amategeko yarahindutse. Mugerageze kuba abanyakuri nibitaba ibyo Football ntaho yaba igana.'

    Mu myanzur yafashwe na Komisiyo y’imisifurire muri FERWAFA yahagaritse SEBAHUTU Yussuf uyu yari Komiseri w’umukino wa Shampiyona y’icyiciro cya kabiri mu bagore wahuje IPM WFC na GATSIBO WFC wabaye tariki ya 27 Ugushyingo, 2021.

    Ivuga ko yakoze amakosa kuri uwo mukino bityo hakaba hafashwe umwanzuro wo kumuhagarika amezi atandatu (6) uhereye umunsi yamenyesherejweho umwanzuro.

    MUNYANEZA Jean Paul yari Komiseri w’umukino wa Shampiyona y’icyiciro cya kabiri mu bagore wahuje KAYONZA WFC na NASHO WFC wabaye tariki ya 27 Ugushyingo 2021.

    Na we Komisiyo ivuga ko yakoze amakosa kuri uwo mukino bityo hafatwa umwanzuro wo kumuhagarika amezi atandatu (6) uhereye umunsi yamenyesherejweho umwanzuro.

    Abasifuzi bane barimo NSABIMANA Céléstin, Komisiyo ivuga ko uyu Musifuzi wa kane ku mukino wa Shampiyona y’icyiciro cya mbere mu bagabo '’Primus National League” wahuje Rayon Sports FC na Etoile de l’Est FC tariki ya 27 Ugushyingo, 2021 yarakoze amakosa.

    Hafashwe umwanzuro wo kumuhagarika ibyumweru bibiri (2) by’imikino bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza, 2021.

    MUNEZA Vagne yari umusifuzi wo hagati ku mukino wa Shampiyona '’Primus National League” wahuje Rayon Sports FC na Etoile de l’Est FC wabaye tariki ya 27 Ugushyingo, 2021 na we ngo yakoze amakosa kuri uwo mukino.

    Komisiyo yafashe umwanzuro wo kumuhagarika ibyumweru bitatu (3) bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    RUHUMURIZA Justin yari umusifuzi wa kabiri ku mukino wa Shampiyona '’Primus National League” wahuje Police FC FC na Gorilla FC wabaye tariki ya 22 Ugushyingo, 2021 na we ngo yakoze amakosa kuri uwo mukino.

    Komisiyo yafashe umwanzuro wo kumuhagarika ibyumweru bine (4) by’imikino bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    Undi wahanwe ni NSABIMANA Claude wari umusifuzi wo hagati ku mukino wa Shampiyona '’Primus National League” wahuje Police FC FC na Gorilla FC wabaye tariki ya 22 Ugushyingo 2021 we yahagaritswe ibyumweru bibiri (2) by’imikino bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    MULINDANGABO Moïse na we w’umusifuzi, inama ya Komisiyo y’imisifurire yateranye ku itariki ya 25 Ugushyingo 2021 yasanze ku mukino wa Shampiyona y’ikiciro cya mbere mu bagabo '’Primus National League” wahuje Rayon Sports FC na Bugesera FC wabaye tariki ya 20 Ugushyingo, 2021 yarakoze amakosa.

    Komisiyo yafashe umwanzuro wo kumuhagarika ibyumweru bitatu (3) by’imikino bibarwa uhereye ku munsi wa karindwi wa Shampiyona uzakinwa ku itariki ya 4 Ukuboza 2021.

    Source : http://www.ukwezi.rw/11/article/Nyuma-y-Uko-Min-Gatabazi-asabye-impinduka-mu-misifurire-FERWAFA-yahagaritse-abasifuzi-bane