Category: Uncategorized

CHOGM itegerejwe kubera mu Rwanda ku wa 20-26 Kamena 2022. Mbere y'aya matariki ariko hari ibindi bikorwa biteganyijwe na byo bizitabirwa n'abanyacyubahiro batandukanye.

Biteganyijwe ko abasaga 5000 bazitabira iyi nama izabera mu bice bitandukanye by'Umujyi wa Kigali; barimo abakuru b'ibihugu na za Guverinoma barenga 45, Minisitiri w'Intebe w'u Bwongereza n'Igikomangoma cy'Ubwami bw'u Bwongereza, Charles n'umufasha we.

Umutekano w'abazitabira CHOGM ni wo bamwe bahereyeho bagaragaza impungenge ko mu gihe cy'inama, abatuye Umujyi wa Kigali bashobora kutazoroherwa no gukora ingendo zitandukanye.

Umuvugizi wa Polisi y'u Rwanda, CP John Bosco Kabera na Meya w'Umujyi wa Kigali, Rubingisa Pudence, babwiye RBA ko imyiteguro yo kwakira iyi nama iri kugana ku musozo kandi buri kimwe kiri ku murongo.

CP Kabera yahumurije abaturage bagize impungenge ko imihanda yo muri Kigali izafungwa mu gihe cya CHOGM.

Ati 'Inama yateganyirijwe aho izabera. Uko byagaragaye imihanda izakomeza ari nyabagendwa. Mu gihe abashyitsi bari kunyura mu mihanda, mu cyiciro cya mbere bakigera mu gihugu, hashobora gufungwa igihe gito ngo abashyitsi bahabwe inzira.''

Yavuze ko no mu gihe cy'inama hazajya hashyirwaho imihanda yagenewe abashyitsi kandi ibe izwi.

Yakomeje avuga ko mu gufasha abaturage kumenya imihanda bazakoresha, Polisi izamurika ikarita yerekana igomba kwifashishwa.

Ati 'Ejo hazatangwa ikarita y'uburyo ibikorwa bizakorwa ku wa 16 Kamena, n'imihanda izakoreshwa. Umunsi ku wundi tuzatanga gahunda y'uburyo imihanda izakoreshwa yaba izakoreshwa n'abashyitsi cyangwa abatuye mu Mujyi wa Kigali.''

'Ni ikarita ireba Umujyi wa Kigali, tuzatangaza imihanda umunsi umwe mbere kugira ngo abantu bategure gahunda zabo hakiri kare.''

CP Kabera yavuze ko bizera ko iyi gahunda izatanga umusaruro kandi abantu bose bazagezwaho amakuru binyuze ku mbuga nkoranyambaga no mu bitangazamakuru.

Mu kurushaho gufasha abaturage, hazanashyirwaho abapolisi bihariye bazajya babayobora mu gihe bibaye ngombwa.

Abaturage bagiriwe inama yo gukurikirana amatangazo atangwa, koroherana mu muhanda kuko byatuma hatabaho umuvundo ndetse no gutanga amakuru ku ho babona hari imbogamizi.

Meya Rubingisa na we yavuze ko imyiteguro irimbanyije muri gahunda yo kurushaho kurimbisha umujyi no gusoza ibikorwaremezo birimo imihanda biri kubakwa.

Ati 'Turagenda dutegura abaturage ngo bazakire abashyitsi na yombi. Ibikorwa birarimbanyije.''

Yavuze ko imihanda mishya yubatswe ari yo izafasha abaturage mu gihe indi yaba iri gukoreshwa n'abashyitsi.

Yakomeje Ati 'Tuzajya kugera igihe cyo kwakira abashyitsi imihanda yuzuye. Aho bikenewe ko hongerwa imbaraga bizongerwa.''

Yasabye abaturage kurangwa n'isuku, kwakira neza abashyitsi no kuba maso bakabyaza umusaruro amahirwe menshi ari muri CHOGM.

Umuvugizi wa Polisi y’u Rwanda, CP John Bosco Kabera na Meya w'Umujyi wa Kigali, Rubingisa Pudence, bashimangiye ko imyiteguro yo kwakira Inama ya CHOGM iri kugana ku musozo kandi buri kimwe kiri ku murongo

Polisi y'Igihugu igiye kumurika ikarita y'imikoreshereze y'imihanda mu gihe cya CHOGM

Mutabazi yavuze ko ntacyo apfa na Bamporiki, ngo icyo ashaka ni uko abaturage bava mu rujijo, bakamenya niba miliyari aherutse kuvuga ko atunze, ari iyo yakoreye cyangwa yanyereje.

Mu kwezi gushize ni bwo RIB yatangaje ko iri gukora iperereza kuri Bamporiki Edouard, nyuma y'amasaha make ahagaritswe ku mirimo ye kubera ibyaha yari akurikiranyweho birimo kwakira 'indonke'.

Mu ibaruwa Mutabazi yandikiye Umunyamabanga Mukuru wa RIB yakiriwe ku wa 14 Kamena 2022, yavuze ko hari urujijo ku nkomoko ya miliyari y'amafaranga y'u Rwanda Bamporiki yavuze ko atunze.

Ati 'Nyakubahwa Muyobozi, ntacyo mpfa na Bamporiki Edouard pee!, ariko niba yarigambye ko amaze kuzuza Miliyari y'amafaranga y'u Rwanda kuri Radio Rwanda bamubaza aho yayakuye agasubizanya uburimanganya akavuga y'uko hari ishyamba yarazwe ryaturutse mu gisekuru cya cyenda.'

'Ubwo naganiraga n'umwe mu rubyiruko rwitabiriye Ndi Umunyarwanda, yambwiye y'uko yabahaye ubuhamya ko ibisekuru by'iwabo birindwi bari abatindi ndetse b'abahanya. '

Muri Nyakanga umwaka ushize ni bwo Bamporiki yatangarije kuri Radio Rwanda, ko mu mwaka wa 2000 ubwo yageraga i Kigali yari afite 300 Frw, nyamara kubera Politiki nziza ya FPR Inkotanyi idaheza, asigaye atunze agera kuri miliyari 1 Frw.

Mutabazi yasabye RIB gukorana n'izindi nzego zishinzwe ubutasi 'hagamijwe gukusanya amakuru y'imitungo afite yose, igaragara n'itagaragara n'aho yayikuye.'

Ati 'Muyobozi birakwiye ko mukura mu rujijo urubyiruko mukarutangariza ko imitungo ya Bamporiki mwasanze yarayikoreye binyuze mu mucyo cyangwa mugatangaza ayo azasubiza niba mutakwemeza y'uko atigeze anyereza umutungo w'igihugu mu nshingano zose yakoze harimo n'itorero ry'igihugu.'

IGIHE yabajije Mutabazi niba nta kindi kibazo cyihariye apfa na Bamporiki dore ko hari abamaze iminsi babimushinja ku mbuga nkoranyambaga.

Ati 'Nababwira ko ntacyo [dupfa] ariko n'iyo cyaba gihari si cyo cyatumye akora ibyo yakoze. Kandi ubutasi Rukurikiranafaranga bukozwe bukagaragaza ko ari iyo yakoreye byakuraho urujijo nta kindi.'

“Nababaza ngo ese ko mumufitiye ubwoba nk'aho muzi neza ko miliyari ayifite kandi yayikuye mu manyanga? Niba umuntu asigaye anyereza umutungo abandi bakamufasha kudakurikiranwa, kumusabira imbabazi, no guhungeta uzamuye ijwi mu nyungu z'umuturage wo hasi, twaba dufite ikibazo cy'uko twabaye inyangarwanda tutabizi kandi turi benshi.'

Mu butabera ukekwa afatwa nk'umwere kugeza ahamijwe icyaha. IGIHE yabajije Mutabazi niba ibyo arimo atari uguhamya icyaha ugifatwa nk'umwere. Ati 'Muhamya naba nzi n'ayanyerejwe. Navuga umubare nkavuga ko ayagarura nta yandi mananiza.'

Apôtre Mutabazi Kabarira Maurice aherutse kwandikira Inteko Ishinga Amategeko y'u Rwanda, imitwe yombi asaba kwiga ku mushinga w'itegeko ryo kunyaga uwariye ruswa n'uwanyereje umutungo w'igihugu, avuga ko ari ko byahoze mu muco wa Kinyarwanda ku mutware wabaga yagomeye ingoma.

Inkuru bijyanye: Apôtre Mutabazi yitabaje Inteko asabira uwariye ruswa 'kunyagwa' ibyo atunze byose

Mutabazi yavuze ko abamushinja kwanga Bamporiki ari abashyigikiye imungwa ry’umutungo w’igihugu

Iyi gahunda izaba itera inkunga imishinga igamije gukemura iki kibazo yaba iyo mu ngufu, ibidukikije n'indi yose ihangana n'ikibazo cy'imihindagurikire y'ibihe.

Kuri uyu wa Mbere, tariki ya 13 Kamena 2022, iyi banki yahurije hamwe abafatanyabikorwa bayo batandukanye n'abakiliya bayo kugira ngo bigire hamwe uburyo iyi gahunda yagerwaho.

Equity bank izatera inkunga imishinga itanga icyizere mu kurengera imihindagurikire y'ibihe nk'ikoresha amashanyarazi aturuka ku mirasire y'izuba, itanga ibisubizo byatuma abantu badacana inkwi n'ibindi.

Indi mishinga izibandwaho cyane ni ijyanye n'ubuhinzi n'iyo mu bwikorezi, aha ni ho bazatanga umusanzu muri gahunda u Rwanda rufite yo kuba mu 2030 ruzaba rwaragabanyije 38% by'imyuka ihumanya ikirere.

Umuyobozi ushinzwe Ishoramari n'Imibereho Myiza muri Equity Bank, Dianah Mukundwa, yavuze ko bakoze iyi gahunda kugira ngo bagire umusanzu batanga mu guhangana n'ikibazo cy'imihindagurikire y'ibihe cyugarije Isi.

Yagize ati 'Uyu munsi twahurije hamwe abafatanyabikorwa bacu kugira ngo twungurane ibitekerezo tubagezeho umushinga wo kurengera ibidukikije, ibi ni ukugira ngo twe nka banki tugire umusanzu dutanga mu guhangana n'imihindagurikire y'ibihe.'

Umuyobozi wa UNDP mu Rwanda, Maxwell Gomera, yavuze ko kugira ngo ikibazo cy'imihindagurikire y'ibihe gikemuke hakenewe amafaranga menshi, guverinoma zitabona zonyine hakenewe abandi bo kuyunganira.

Ati 'Aha twaganiriye ku bibazo by'imihindagurikire y'ibihe n'imbaraga zikwiye gushyirwamo kugira ngo duhangane n'imihindagurikire y'ibihe. Nk'urugero muri Afurika dukeneye asaga miliyari 700$ buri mwaka kugira ngo tubashe kubigeraho.'

'Ayo mafaranga ntabwo byoroshye ko guverinoma z'ibihugu bya Afurika zayabona, kandi ntabwo twayabona ku baterankunga. Aha ni ho amabanki nka Equity azamo n'abandi bikorera kugira ngo tuzamure iyo mishinga.'

Ku ruhande rw'Umuyobozi Mukuru wungirije w'Ikigo cy'Igihugu cy'Ibidukikije, REMA, Munyazikwiye Faustin, yashimye Equity Bank ku ntambwe yateye yo gushyigikira imishinga yo kurengera ibidukikije no guhangana n'imihindagurikire y'ibihe yemeza ko bizafasha na guverinoma kugera ku ntego yihaye.

Guverinoma y'u Rwanda mu cyerekezo 2050 yashyizeho ingingo zitandukanye zizafasha igihugu kubasha kurengera ibidukikije n'urusobe rw'ibinyabuzima mu guhangana n'imihindagurikire y'ibihe.

Zimwe mu ngamba harimo ko ikoreshwa ry'inkwi, amakara n'ibindi bicanwa bikomoka ku bimera nka bimwe mu byangiza ibidukikije bikanatanga umwuka wangiza ikirere, bizava ku kigero cya 79.9% byariho mu 2018 bikagera kuri 42% mu mwaka wa 2024.

Amafoto: Shumbusho Djasiri

Bose uko ari batanu bafatiwe mu mirenge itandukanye bakoreragamo ubu buvuzi ari yo Nzahaha, Bugarama na Muganza.

Gukura ibyinyo (tooth bud removal) no guca ibirimi (uvulectomy), mu bisanzwe bikorerwa ku mpinja, bikozwe n'abiyita abavuzi gakondo bakabikora mu buryo butubahirije isuku no kurinda mikorobe aho bifashisha ibikoresho gakondo bisongoye cyangwa bifite ubugi nk'imisumari, ibyuma, imikasi hamwe n'amafurusheti. Bizera ko ibi bikorwa bikaze ku bana bibavura umuriro, kuruka no gucibwamo.

Ubusanzwe ibirimi bikunze kuvugwa igihe umwana yahuye n'uburwayi bwo kubyimbagana akamironko bumutera kuryaryatwa no kocyerwa mu muhogo, aho ufite ubu burwayi ashobora kugira umuriro ndetse no kubabara igihe amize ikintu. Ni icyo gihe rero iyo hitabajwe abaganga ba magendu bakata cyangwa bagakuramo burundu akamironko aho kujyana umwana kwa muganga ngo ubwo burwayi bubashe kuvurwa.

Umuvugizi wa Polisi mu ntara y'Iburengerazuba, SP Bonaventure Twizere Karekezi, yavuze ko ibikorwa byo kubafata byakozwe nyuma y'uko bigaragaye ko byamaze gufata intera mu Karere ka Rusizi, cyane cyane mu mirenge ya Nzahaha, Bugarama, Muganza, Gikundamvura na Butare.

Yagize ati 'Twari dufite amakuru y'uko hari abavuzi ba magendu umunani bakora ibyo bikorwa mu Karere ka Rusizi. Batanu barafashwe mu gihe abandi batatu bagishakishwa.'

Yavuze ko abafashwe ari Gasigwa Emmanuel ufite imyaka 68 y'amavuko, Majyambere Joseph w'imyaka 39, Ngirinshuti Ignace w'imyaka 40, Tuyishime Elysée w'imyaka 31 n'Uwamahoro Rachel w'imyaka 44.

Ati 'Ku munsi wo ku Cyumweru, Polisi yasanze ababyeyi 14 mu rugo rwa Ngirinshuti, bari bazanye abana babo kugira ngo bakorerwe bimwe mu bikorwa byo gukurwa ibyinyo cyangwa gucibwa ibirimi. Ngirinshuti yafashishaga ibikoresho biteye inkeke nk'imakasi, ibyuma n'amafurusheti, nabyo byafashwe. Aba bakekwaho ibi byaha hamwe n'ibikoresho bifashishaga bashyikirijwe Urwego rushinzwe Ubugenzacyaha (RIB) kugira ngo bakurikiranwe. '

Abana bagera kuri 28 bahuye n'ibibazo byatewe n'ingaruka zo gukorerwa bimwe muri ibi bikorwa bajyanywe mu bitaro bya Mibirizi byo mu Karere ka Rusizi hagati ya Mutarama na Kamena uyu mwaka.

Muri bo, 22 baravuwe barasezererwa, batatu boherejwe kuvurirwa mu bitaro bikuru, naho abandi babiri bitaba Imana.

Ati 'Ibi ni ibikorwa bitemewe, byangiza ubuzima kandi bikorerwa ahantu hadafite isuku hifashishijwe ibikoresho bidafite ubuziranenge, bishobora no gutera cyangwa kwanduza izindi ndwara impinja. Turahamagarira abaturage guhora bajyana abana babo mu bigo nderabuzima no mu bitaro kugira ngo bahabwe serivisi nziza z'ubuvuzi aho gushyira ubuzima bw'abana babo mu kaga, babatererana mu maboko y'abavuzi gakondo ba magendu.'

Abahanga mu by' ubuvuzi bavuga ko guca ibirimi impinja bitera ububabare bukabije ku mwana, bikaba byamuviramo ubumuga butandukanye ndetse no gutakaza amaraso bikamutera uburwayi bwo kugira amaraso make (Anemie). Uburyo budafite isuku bukoreshwa muri ibyo bikorwa nabwo bukaba bwamuviramo kwandura indwara nka Tetanusi, Virusi itera sida n'izindi zamuviramo kubura ubuzima.

Marcelo yasezeweho mu cyubahiro nk'umunyabigwi witangiye Real Madrid, akayikorera byose bishoboka mu myaka 15 i Santiago Bernabeu.

Ku wa Mbere tariki ya 13 Kamena 2022, i Madrid habaye ibirori byo gusezerera uwahoze ari umukinnyi wayo mu myaka 15 ishize, Marcelo Vieira da Silva Júnior w'imyaka 34, wavuze ko adasezeye umupira w'amaguru kuko yumva agifite byinshi byo gutanga nk'umukinnyi.

Marcelo yegukanye ibikombe 25 muri Real Madrid, harimo bitanu bya UEFA Champions League, 6 bya shampiyona ya Espagne La Liga ndetse n'ibikombe 4 by'Isi by'ama-club.

Marcelo wasezeye mu marira menshi, yavuze ko yishimiye ko Real Madrid hari ibyo yagezeho bari kumwe nk'umukinnyi kandi wakinaga, ati: 'Ndishimye cyane ku byo twagezeho mu myaka ishize. Madrid izahora iteka mu mutima wanjye ariko ikizahora gishengura umutima wanjye ni uko ntabonye amahirwe yo gukina na Chelsea na Reece James i Santiago Bernabeu mbere yo gusezera aha'.

Bamwe mu bakinanye na Marcelo mu myaka ishize, barimo Cristiano Ronaldo, Iker Casillas n'abandi, bamugeneye ubutumwa burimo amagambo asobanura neza uyu myugariro uwo ari we.

Cristiano Ronaldo yagize ati 'Birenze gukinana. Umuvandimwe nahawe n'umupira w'amaguru. Mu kibuga yari umwe mu byamamare nishimiye kubana nabyo mu rwambariro'.

Iker Casillas wahoze ari umunyezamu wa Real Madrid, yagaragaje ko uyu myugariro yaje ari umwana agakurana na bakuru be, ati 'Waje uri umwana. Ni kangahe natatse nti Marcelo garuka? Urakoze kuba warabaye mwiza. Nkwifurije ibyiza gusa kuri ejo hazaza'.

Uyu myugariro wari watoranyijwe na bagenzi be ngo ababere kapiteni, ntabwo yigeze abona imikino myinshi muri uyu mwaka w'imikino ariko yagiye afasha cyane umutoza, Carlo Anceloti mu rwambariro ndetse ku mukino wa nyuma wa Champions League 2022, Marcelo niwe wateruye igikombe yambaye igitambaro cya kapiteni nubwo atigeze akina umukino batsinzemo Liverpool.

Abajijwe ku kuba hari aho yakongera kuzahurira na Real Madrid bahanganye ari mu yindi kipe, Marcelo yavuze ko yumva nta kibazo kirimo n'ubwo yiyemerera ko ari umukunzi w'iyi kipe.

Ati 'Guhura na Real Madrid? Ndumva nta kibazo kirimo. Ndi umukunzi wa Real Madrid ariko ndi n'umunyamwuga'.

Amakipe arimo Fenerbahce yo muri Turikiya na Marseille yo mu Bufaransa zirifuza gusinyisha Marcelo watandukanye na Real Madrid.

Mu marira menshi Marcelo yasezeye muri Real Madrid nyuma y’imyaka 15

Marcelo avuye muri Real Madrid ayihesheje ibikombe 25