Category: Uncategorized

Source : http://www.ukwezi.rw/Mu-mahanga/Amakuru-anyuranye/Ibyavuye-mu-Iperereza-ku-Barundi-24-bafungiye-muri-Uganda

Mugisha Emmy ukina umukino wa Tennis, wabonnye ‘Scholarship’ yo kujya kwiga muri Leta Zunze Ubumwe za Amerika muri Bethel University abikesha uyu mukino, ahamya ko ikintu cyamubabaje ari urupfu rwa se wa bo.

Ni umusore w’imyaka 21, yavukiye mu Mujyi wa Kigali mu Karere ka Kicukiro i Kanombe, ni imfura mu muryango w’abana 3. Ababyeyi be bose aracyabafite.

Yatangiye gukina umukino wa Tennis muri 2012 yishimisha, nyuma ni bwo yaje kubona ko afite impano ya yo.

Yakiniye IPRC Kigali Tennis Academy na Extreme Tennis Academy yo mu Mujyi wa Ismaila mu Misiri ari na ho yaboneye amahirwe yo kujya gukina muri Canada akinira iyi Kaminuza.

Uyu musore werekeje muri Canada ku wa Gatanu w’icyumweru gishize, yabwiye ISIMBI ko itandukaniro ryo gukina mu Rwanda no hanze ya rwo ari imitegurire.

Ati “Nasanze itandukaniro ryo mu Rwanda no hanze, akenshi bibanda kugutegura abana cyane kurusha ibindi bintu byose kuko baba bareba ejo hazaza, ikindi usanga bafite amafaranga, bafite abaterankunga benshi.”

Avuga ko akimara kumenya ko yabonye amahirwe yo kujya kwiga ‘Computer Science’ muri iyi Kaminuza anayikinira yishimye cyane kuko yumvaga ari ibintu bidashoboka kuri we, bikaba bizamufasha kuzamura urwego rwe.

Ati “Nkimara kumenya ko nabonye iyi Scholarship, nabyakiriye neza cyane, narishimye kuko ni zo nzozi nari mfite ubundi nkitangira gukina Tennis, nabonaga abantu ku mateleviziyo muri za Kaminuza bakina nkumva ni ibitangaza bidashobora kumbaho, mbonye aya mahirwe narishimye numva ko Tennis izangeza kure hashoboka. “

“Bizamfasha kuzamura urwego rwanjye kuko nzaba nkinana n’abakinnyi bakomeye, ikindi nkafasha ikipe yanjye gutwara igikombe.”

Agaruka ku buzima bwe bwite, yavuze ko ikintu cyamubabaje cyane ari urupfu rwa se wa bo, n’aho icyamushimishije ari ‘Scholarship’ aheruka kubona.

Ati “ikintu cyamubabaje cyane mu buzima ni igihe natakazaga ‘Uncle’ wanjye uvukana na papa, yari inshuti yanjye. Ikintu cyanshimishije cyane mu buzima ni ukubona aya mahirwe yo kujya gukinira iyi Kaminuza ibyari inzozi kuri njye bigahinduka impamo.”

Mu buto bwe ikintu ajya yibuka kikamusetsa cyane ni uburyo akiri umwana yatwawe kuri polisi nyuma yo kumena ikirahure cy’imodoka ya ‘Coaster’.

Ati “ikintu cya mbere kijya kinsetsa cyane, nk’iri umwana ni igihe nari ndimo kuva ku ishuri ndi kumwe na murumuna wanjye noneho nyura kuri coaster nkubitaho ibuye ikirahure cy’imbere kirameneka, bahise banjyana kuri sitasiyo ya polisi, nararize cyane numvaga bitaribuze kuvamo ikibazo.”

Mugisha Emmy ashimira umuryango we cyane wamufashije mu rugendo rwo gukina Tennis yaba mu nama no mu bushobozi, ashimira federasiyo y’uyu mukino ndetse n’umutoza wa IPRC Kigali.

Mugisha Emmy ku myaka 21 yagiye gukina muri Canada

Source : http://isimbi.rw/siporo/mugisha-werekeje-gukina-muri-amerika-ntazibagirwa-umunsi-atwarwa-kuri-sitasiyo-ya-polisi-akiri-umwana

Ibi byabyaye ahagana saa tatu z'igitondo kuri uyu wa 2 Mutarama 2023, ubwo Fuso RAG 586E yamanukaga umuhanda uva i Jabana ahitwa mu Makawa igana Karuruma muri uyu Murenge wa Jabana mu karere ka Gasabo.

Umuvugizi wa Polisi y'u Rwanda ishami rishinzwe umutekano wo mu muhanda, SSP Rene Irere yahamirije UMUSEKE iby'iyi mpanuka avuga ko amakuru bahawe na Majyambere Valens wari uyitwaye, aruko yafashe feri bikanga agashaka uko yayihagarikamo.

Yagize ati 'Yagiye kugera mu gasanteri ka Karuruma igonga abantu bari bari ku muhanda hitaba Imana umuntu umwe abandi batanu barakomereka. Shoferi we aratubwira ko yafashe feri biranga, ashaka ubundi buryo yayihagarikamo birangira agonze motari warimo akoresha moto ye, umunyonzi warimo w'igendera n'umunyamaguru, ariko hanakomeretse nabo babiri bandi bari mur' iyo kamyo.'

Uwitabye Imana akaba ari umumotari warimo akoresha moto ye, ni mu gihe kandi umunyonzi we yakomeretse bikomeye ndetse n'umugenzi wigenderaga n'amaguru, abakomeretse bakaba bahise bajyanwa ku Bitaro bya Kaminuza bya Kigali (CHUK).

SSP Rene Irere akaba yongeye kwibutsa abatwara imodoka nini z'amakamyo kujya bahora bagenzura ubuzima bwazo.

Ati 'Ubutumwa twaha abantu cyane cyane abatwara ziriya modoka z'amakamyo kuko harimo n'izikuze ni ukujya bakurikirana hafi ubuzima bwazo, kuko niba ari ikibazo kiri mechanique yagize, buriya bishobora kuba hari ibibazo by'amavuta yari ifite yamenetse wenda shoferi cyangwa turn boy ntabikurikirane, bishobora kuba impanuka yatewe n'imikurikiranire mike y'iriya modoka.'

Ubwo iyi mpanuka yari ikimara kuba shoferi w'iyi modoka yabanje gutoroka, gusa baje kumugarura.

Source : https://umuryango.rw/ubuzima-115/article/gasabo-imodoka-ya-fuso-yakoze-impanuka-ihitana-umuntu-umwe-abandi-barakomereka

Kizigenza Cristiano Ronaldo aheruka kwerekeza mu ikipe ya Al Nassr yo muri Saudi Arabia ku masezerano azageza muri Kamena 2025.

Ikipe ya Al Nassr yiyemeje kuzajya ihemba Cristiano Ronaldo miliyoni 214 z'amadolari ku mwaka ahita arusha umushahara wa Messi,Mbappe na Neymar Jr uyiteranyije yose.

Al Nassr FC ibinyujije kuri Twitter,yanditse iti “Amateka yakozwe. Iri sinyisha ntabwo rizatuma ikipe yacu igera kuri byinshi gusa ahubwo bizatuma na shampiyona yacu irebwa, igihugu cyacu ndetse n'abakibyiruka abahungu n'abakobwa kuba beza.”

Uyu mugabo wari umaze imyaka ikabakaba 20 akina I Burayi,agiye gukorera amafaranga mu ikipe ya All Nassr, izajya imuhemba akayabo ka miliyoni 200 z'amayero ku mwaka,angana na miliyoi 214 z'amadolari n'arenga 173 z'amapawundi ku mwaka.

Ronaldo azajya ahembwa 4,000,000Frw ku munota cyangwa 240,000,000Frw ku isaha nkuko amakuru abivuga.

Ronaldo aragera I Riyadh muri Saudi Arabia aho azerekanwa kuri uyu wa kabiri nyuma yo gukora ikizamini cy'ubuzima.

Muri 2003 ni bwo yatandukanye na Sporting CP y'iwabo muri Portugal yerekeza muri Manchester United yakiniye kugeza 2009 ubwo yahitaga asinyira Real Madrid, yayivuyemo 2018 yerekeza muri Juventus yakiniye kugeza 2021 agaruka muri Manchester United.

Reba abakinnyi bahembwa akayabo kurusha abandi

Source : https://umuryango.rw/imyidagaduro/imikino/article/cristiano-ronaldo-agiye-kujya-ahembwa-umushahara-uruta-uwa-mbappe-messi-na

Umunyezamu wa Argentina,Emiliano Martinez yatanze ibihumbi 20,000 by'amapawundi agura imbwa yo kumurindira umudari yegukanye mu gikombe cy'isi kugira ngo utibwa cyangwa ngo wangizwe .

Iyi mbwa yakoreshejwe n'igisirikare cya US Navy na SAS mu ntambara, ni kabuhariwe mu kurinda umutekano.

Uyu wari umunyezamu wa mbere wa Argentina,yafashije igihugu cye kwegukana iki gikombe cy'isi gutsinda Ubufaransa ku mukino wa nyuma banganyije ibitego 3-3 hanyuma agakuramo penaliti 4-2 batsinze.

Uyu yaje gutorwa nk'umunyezamu w'irushanwa ndetse atabara Argentina akuramo igitego cyo ku munota wa nyuma w'inyongera cyari kigiye gutsindwa na Randal Kolo Muani.

Imyitwarire ye nyuma yo kwegukana iki gikombe cy'isi no gutwara igipupe yashyizeho isura ya Mbappe byarakaje abafana baramwibasira ariko ntibyamubujije kugura iyi mbwa ngo irinde uyu mudali.

Iyi mbwa ikaze cyane,izajya irinda umuryango we ugizwe n'umugore we n'umwana hanyuma inarinde uyu mudali.

Iyi mbwa ifite ibiro 30 yayiguze na ba kabuhariwe mu kugurisha imbwa abakiriya bihariye.

Aba bagurishije imbwa abarimo Hugo Lloris wa Tottenham,myugariro wakiniye Chelsea na Arsenal ariwe Ashley Cole na Tyson Fury ukina iteramakofe.

Source : https://umuryango.rw/imyidagaduro/imikino/article/umukinnyi-wa-argentina-yaguze-imbwa-ihenze-cyane-ngo-irinde-umudali-we-w

Uwahoze ari umukinnyi wa Liverpool na Arsenal Jermaine Pennant yakennye nyuma yo kujya mu madeni menshi akarenga miliyoni y'amapawundi.

Uyu mugabo wamenyekanye muri Premier League w'imyaka 39,yafashe amadeni ahantu hatandukanye mu bantu,mu mabanki no muri kompanyi zitandukanye.

Uyu mugabo yafatiriwe imitungo ye yose n'urukiko rwa Birmingham.

Uwahaye amakuru The Sun,yagize ati “Arimo amadeni menshi cyane.Amadeni arimo agera mu mamiliyoni.Amadeni afitiye ibigo by'imisoro n'amabanki araremereye.”

Yananiwe kwishyura bishobora gutuma imitungo ye yose ifatirwa.”

Pennant yajyanwe mu nkiko n'abamuhaye ideni nyuma yo kunanirwa kubishyura.Uyu yatse inguzanyo ashaka kubaka ikigo cy'itangazamakuru cyitwa Jermaine Pennant Ltd ariko kirahomba.

Source : https://umuryango.rw/imyidagaduro/imikino/article/pennant-wakiniye-arsenal-na-liverpool-yananiwe-kwishyura-amadeni-yariye

Umubikira witwaga Mary Elizabeth yari abayeho nk'umuntu wiyeguriye Imana, utuje kandi ucecetse,mu cyumba cye cyo mu ngoro y'aba Carmelite mu majyaruguru y'Ubwongereza.

Ariko guhura rimwe n'uyu mufurere nawe wihaye Imana,byarangiye yakiriye ubutumwa butangaje bugira buti: “Warenga ku itegeko wahawe ukaza tukarushinga?”

Nyuma y'imyaka 24 ari umubikira,uyu mugore yakozwe ku mutima n'uyu mufurere wari wariyemeje kutazigera ashaka na rimwe wabaga ahitwa Preston, Lancashire, bituma yiyemeza kuva mu byizerwa aramushaka.

Icyahuje uyu wahoze ari umubikira n'uyu mufurere witwa Robert,nuko uyu mugabo yabasuye mu ngoro y'aba Carmelite i Oxford,hanyuma uyu mugore ajya kumureba ngo amubaze niba ashaka ibyokurya.

Ku bw'amahirwe,umuyobozi wa Mary Elizabeth yarahamagawe bituma asiga aba bombi bonyine.

Mary Elizabeth yagize ati”Bwari ubwa mbere turi kumwe mu cyumba. Twicaye ku meza ari kurya, kandi umuyobozi ntiyagarutse bityo nagombaga kumurekura.”

Igihe Mary Elizabeth yaherekezaga Robert, yamukuruye akaboko hanyuma yumva atamurekura

Ati”Gusa numvise harimo rukuruzi, harimo ikintu, kandi nagize isoni gake. Naratekereje nti ese na we niko yiyumvise koko?. Kandi uko namuherekezaga hanze byari biteye isoni.”

Yibuka ko nyuma y'icyumweru kimwe yakiriye ubutumwa bwa Robert amubaza niba azagenda akamurongora.

Uyu mugore yagize ati “Naratunguwe gato.Nari nambaye ivara kandi ntiyigeze abona ibara ry'uruhu rwanjye.Nta kintu na kimwe yari anziho nuko nabayeho.Nta nubwo yari azi izina ryanjye bwite.

Uyu mugore mbere yo kwinjira mu ba Carmelite ku myaka 19 akitwa Mary Elizabeth mbere amazina ye bwite ni Lisa Tinkler,ukomoka ahitwa Middlesbrough mu Bwongereza.

Uyu mugore avuga ko nubwo ababyeyi be batari abanyedini,nyirasenge yamukundi shije ibyo kwiha Imana bituma akurana uwo muhamagaro.

Uyu mubikira ngo ntiyigeze ahita asubiza Robert kuko ngo yabuze icyo yakora ku busabe bwe.

Icyakora avuga ko nibura we yari azi bike kuri uyu mugabo kuko ngo hari igihe yigeze kuza gusomera misa hafi yaho batuye ayumva ari kumurebera mu idirishya.

Uyu ngo yavuze uko yakuriye muri Poland hafi y'umupaka n'Ubudage nuko akunda imisozi.Gusa ngo ntiyumvise impinduka muri we.

Uyu yaje kuvuga ati “Ntabwo nari nzi uko bimera gukunda kandi natekerezaga ko abandi babikira babibona mu maso yanjye.Numvise ndatekanye.Niyumvisemo impinduka bintera ubwoba.

Uyu ariko ngo yaje gushira ubwoba abwira umukuru wabo ko yakunze Robert ariko ngo igisubizo yahawe cyaramutunguye.

Umuyobozi we yaramubwiye ati “Ntabwo yumvise uko byagenze kuko yamaraga amasaha 24/7 ari kumwe natwe.Yambajije ukuntu bishoboka ko namukunda kandi twarabonanye rimwe.”

Uyu mugore yakomeje kwibaza uko ababyeyi be,padiri na kiliziya bazakira ko yadohotse ndetse ngo ahangayikishwa n'umubano we n'Imana.

Uyu mugore ngo yaje gufata umwanzuro asohoka hanze atwaye uburoso bw'amenyo n'imyenda y'imbere ahita asezera kwitwa umubikira Mary Elizabeth.

Uyu mugore ngo yari yakiriye ubutumwa bwa Robert ko araza gusura Preston uwo munsi ngo ahure n'inshuti ye amugire inama ku rukundo rwe na Lisa aho niho uyu mugore yerekeje.Uwo munsi wo muri Nyakanga 2015 ngo wamubereye mubi cyane.

Icyo gihe ngo imvura yaraguye,atekereza ku mwanzuro yafashe bituma yumva yakwiyahura mu modoka ikamugonga.Uyu ngo yibazaga niba koko Robert azamugira umugore.

Uyu mugore yavuze ko amaze kugera aho Robert yari yavuze ko arasura yasanze hafunguye aramubona niko guhita yinjira.

Robert yavuze ko akibona Lisa yahise agagara atari ukubera ibyishimo ahubwo kubera ubwoba kuko ngo ntiyumvaga ko bombi biteguye kubana.

Uyu mufurere avuga ko yibazaga uko aratangira ubuzima n'umugore ku myaka 53 bikamugora ndetse ngo mu ntangiriro bose byarabagoye.

Aba bombi baje gushyingiranwa ndetse batuye ahitwa Hutton Rudby muri North Yorkshire aho Robert ari umupasiteri muri Church of England.

Aba bavuga ko bakiri mu bigo by'abihaye Imana babagaho mu bwigunge ariko ubu bishimiye kuba babana.

Source : https://umuryango.rw/ubuzima-115/imibereho/article/umubikira-yiyambuye-ivara-ashyingiranwa-n-umufurere-bahuye-rimwe-gusa

Ukraine iravuga ko yishe abasirikare 400 b'Uburusiya mu gitero cya misire mu ntara bwigaruriye ya Donetsk.

Iyo misile yoherejwe ku nyubako yo mu mujyi wa Makiivka, aho ingabo z'Uburusiya byari bizwi ko ariho zikambitse.

Uwo mubare ntabwo urahinyuzwa. Abategetsi biyumvamo Uburusiya bemeye ko hari abakomeretse n'abapfuye, ariko ntibemeza imibare ivugwa.

Muri Kyiv, urwamo rw'ibitero rwumvikanye mu ijoro ryo ku cyumweru, mu gihe ibindi bitero by'indege na misile byakomezaga.

Daniil Bezsonov, umutegetsi mukuru wiyumvamwo Uburusiya mu bice bya Donetsk byigaruriwe, yavuze ko misile yarashwe Makiivka iminota ibiri imbere ya saa sita z'ijoro ku munsi w'umwaka mushya.

Uwo mutegetsi avuga ko icyo gitero cyagabwe kw'ishuri ry'imyuga hakorehejwe misile yo mu bwoko bwa MLRS Himars y'Abanyamerika, aho yashakaga kuvuga ko hari misile zatanzwe na Leta Zunze Ubumwe za Amerika.

Bezsonov mu butumwa yacishije kuri Telegram yagize ati'Hari abapfuye n'abakomeretse, imibare nyayo ntiramenyekana.”

Bamwe mu bavuga n'abandika ku ntambara baremera icyo gitero -ariko bakavuga ko iyo mibare ari mike cyane kurusha iyavuzwe.

Vladimir Solovyov, uvuga amakuru kuri TV, yanditse kuri Telegram ko 'abahaguye ari benshi … ariko batageze kuri 400.

Igisirikare cya Ukraine cyavuze ko abantu 300 bakomerekeye muri icyo gitero nyuma y'aba 400 bishwe.

Ubutegetsi bwashyizweho n'Uburusiya bwavuze ko nibura roketi 25 zatewe iyo ntara nijoro bucya ari isi yinjira muri 2023.

Hashize amasaha make habaye igitero kuri Makiivka, Kyiv nayo yahise iterwa. Igitero cya misire na drone cyagabwe ku kigo gikomeye cy'ibikorwa-remezo, nk'uko umukuru w'intara y'umurwa mukuru Oleksiy Kuleba yabivuze.

Umuntu umwe i Kyiv yakomerekejwe n'ibimanyu bya drone y'Uburusiya, nk'uko umukuru w'umujyi yavuze.

BBC

Source : https://umuryango.rw/amakuru/mu-mahanga/umutekano/article/ukraine-yigambye-kwica-ingabo-z-abarusiya-400-mu-gitero-kimwe-gusa

Umutwe wa M23 wasabye Leta ya Congo gusobanura byimbitse impamvu yahaye akazi abacancuro bavuye mu Burayi mu rugamba bahanganyemo.

M23 ntiyumva ukuntu leta ya RDC ikomeje kuzana abantu bavuye hanze y'igihugu mu bibazo bafitanye ubwabo kandi bahaye umurongo w'uko byakemuka.

Mu itangazo ryasohowe na M23 ku wa 1 Mutarama 2023 rishyizweho umukono n'umuyobozi w'uyu mutwe, Bertrand Bisimwa, rikubiyemo ubutumwa bageneye leta ya Congo, imiryango mpuzamahanga, MONUSCO n'abaturage ba Repubulika ya Demokarasi ya Congo ubwo hasozwaga umwaka wa 2022 binjira mu mwaka mushya.

Mu butumwa bugenewe Umuryango Mpuzamahanga, M23 yasabye ko hagira igikorwa mu guhagarika ingengabitekerezo ya Jenoside n'imvugo zibiba urwango zikomeje kugaragara muri Repubulika ya Demokarasi ya Congo.

Basabye kubafasha kuganira na leta ku muzi nyakuri w'ikibazo cy'umutekano muke muri iki gihugu.

Aha niho bahereye basaba ibisobanuro byimbitse ku bacanshuro Leta ya Congo yahaye akazi bavuye mu Burayi, aho hari amakuru avuga ko abarwanyi b'Abarusiya bo mu itsinda rya Wagner bitabajwe mu mirwano ya FARDC na M23.

Bagize bati 'M23 irasaba ibisobanuro Leta ya Congo kuba ikibazo bafitanye izanamo abantu bavuye hanze, ndetse no guha akazi abacancuro b'abicanyi b'Abanyaburayi.'

Mu bindi bikubiye muri iri tangazo nuko M23 yanenze Perezida Felix Tshisekedi kuba yarananiwe gushyira mu bikorwa ibyo yijeje abanye-Congo ubwo yiyamamazaga mu 2018 harimo kubaka igihugu kigendera ku mategeko, kurandura ruswa yabaye karande no gushyira iherezo ku mutekano muke uri mu Burasirazuba bwa Congo.

M23 ikaba yatanze inama zatuma umutekano muke muri Congo ubonerwa umuti ndetse ibiganiro bya Nairobi na Angola bigatanga umusaruro harimo guhabwa umwanya mu biganiro bishaka igisubizo ku mahoro arambye, leta ya Congo ikareka gukorana n'imitwe ya FDLR, ACPLS, NYATURA, CODECO, Mai Mai n'abaicanyi bakomeje kugaba ibitero mu birindiro bya M23 nka Kamatembe, Bwiza n'ahandi.

Ibi bikajyana no guhagarika guhohotera no kwica abanye-Congo bo mu bwoko bw'Abatutsi bakomeje kwitwa abanyarwanda, ndetse M23 ikareka kwitwa abavamahanga na leta ya Congo.

M23 yashimangiye ko kuba FDLR igizwe n'abasize bakoze Jenoside yakorewe Abatutsi mu 1994 mu Rwanda ikomeje kwivanga mu kibazo biri gutiza umurindi ingengabitekerezo ya Jenoside, imvugo z'urwango no guhohoterwa kw'abanye-Congo.

M23 yasabye abanye-Congo guhitamo neza mu matora ari imbere bakita cyane ku bibazo bafite by'ubuyobozi bubi, ruswa, imvugo z'urwango, kandi ntibemerere abashaka gutinza no gusubika amatora y'umukuru w'igihugu ategerejwe muri uyu mwaka wa 2023.

M23 ikaba yashimiye byimazeyo umuhate w'abayobozi b'Umuryango wa Afurika y'Iburasirazuba, Akarere k'Ibiyaga Bigari (ICGLR) mu gushakira hamwe ibisubizo birambye ku bibazo by'umutekano muke mu Burasirazuba bwa Congo.

Iri tangazo ry'amapaji atatu risoza risaba abanye-Congo bari mu nkambi z'impunzi hirya no hino ku isi gufatana urunana, ndetse bakihanganira kuba baratereranywe n'ubuyobozi burangajwe imbere na Perezida Tshisekedi.

Source : https://umuryango.rw/amakuru/mu-mahanga/umutekano/article/m23-yasabye-ibisobanuro-leta-ya-rdc-ku-byo-kuzana-abacancuro-b-abarusiya

Iki gitaramo cyitabiriwe n'abantu bari buzuwemo amashimwe, kandi banyotewe n'ijambo ry'Imana. Habayemo guhimbaza, kuramya, amasengesho, ibyifuzizo, ndetse no kwiha intego y'umwaka mushya utangiye izabageza ku kwegerana n'Imana biruseho, ndetse ubutumwa Apotre yageneye abitabiriye bwari bukubiye muri Matayo 14:20.

Apotre Mignonne Kabera ni umwe mu bashumba bafite itorero bayoboye. Niwe washinze iri torero rya Women Foundation Ministry riherereye KIBAGABAGA. 'Gushinga itorero kwe ntabwo ari ibintu byahuriranye cyangwa ngo agire igitekerezo cyabyo, ahubwo Imana yamuhamagaye binyuze mu iyerekwa, iryo yerekwa niryo ryabyaye iri torero'.

Kabera Mignonne yagize iyerekwa. Ati: 'Nabonye uje mu ishusho y'umuntu aramubwira ati 'Ndashaka ko ujya kumpera abagore amaboko'. Narirebye mbona nanjye ayo mfite ari ibice. Yarongeye arambwira ati 'singira iyo nkoni'. Ngerageje gusingira inkoni mbona amaboko yanjye y'ibice araje, noneho ndafata. Maze arambwira ati 'genda iyo nkoni uyikoze kuri buri mugore wese ubona'.'. 

Imana yamutumye ku bagore mu buryo butatu harimo uburyo bw'umwuka (kubigisha ijambo ry'Imana), uburyo bw'amarangamutima (komora ibikomere), no mu buryo bufatika.

Apotre Kabera Mignonne yavuze ko azakorera Imana kugeza avuye mu mubiri.

Kugeza ubu Women Foundation Ministry ni umuryango uhuza abagore batandukanye, ndetse hatagendewe ku idini basengeramo. Si ibyo gusa kuko iri torero hasengeramo n'igitsinagabo n'abandi.

Iki gitaramo cyari gishingiye ahanini ku mashimwe y'ibyagezweho no kwiragiza Imana, ndetse no kuyisaba gukomeza kuba hafi yabo. Hakiriwe Apotre mu gitaramo, ndetse atangira kwigisha no guhumriza imitima y'abantu.

Ubwo Apotre yahagurutse ngo abamanyurire ku mutsima w'ubugingo bamwakiranye ibyishimo byinshi, ndetse bigaragaza urukundo abizera ba Women Foundation Ministry bamufitiye,  bafatanije n'abandi batumirwa n'abashyitsi bari baje gusenga no kuramya Imana.

Apotre Kabera Mignonne ubwo yafataga umwanya yatangiye yifuriza umwaka mushya ku bitabiriye igitaramo muri Convention Center, ndetse n'abari bari gusenga bakoresheje murandasi (online). Yababwiye ko abakunda aho bari hose, ashimira n'ubufatanye bwabo mu murimo w'ivugabutumwa.

Mu ijambo yatangije yagize ati 'Mumfashe nshimire itorero Women Foundation Ministry yadutumiye tugahurira, aha n'ubwo arinjye muyobozi wabo.'

Yakomeje abwira abitabiriye igitaramo ko atari wa muntu wabaswe n'idini, aho waba usengera hose icyo akwifuriza ari ubwami bw'ijuru.

Ati 'Waba umu Adventist, Cathoric n'ahandi, ntacyo bimaze igifite icyo kimaze ni ukuba wemewe n'Imana. Reka duhuze imitima dusabirane, ndetse turarike Mwuka w'Imana kuba hafi yacu. Amen.'

Yakiriye abantu batandukanye harimo n'umuryango we.

Yahereye ku mugabo we aravuga ati 'Nshima Iimana yampaye umugabo utagira ishyari cyangwa ngo ambangamire, kuko byari kunkomerera gukora umurimo w'Imana iyo tuba tudahuje ariko ubu turafatanya muri byose, ndetse ibyo birankomeza.'

Kabera Mignonne yakira umgabo we ndetse anamushimira.

Yakomeje amushimira aravuga ati 'Iyi sura nziza mubona mfite ni uko Imana yampaye umugabo mwiza, kandi kuba asa neza kuriya ni uko nanjye mwitaho. Buri umwe ni urugingo rw'undi.” Yasabye abizera guhoberana, ndetse bakifurizanya umwaka mushya.

Mignonne ahobera umugabo we Kabera.

Yakiriye ndetse anashimira umubyeyi we (Maman) witabiriye iki gitaramo cyo gushima, ndetse bakaba banasoje umwaka bari mu nzu y'Imana.

Yagize ati 'Nkunda mama wanjye, kuko yambyaye akantoza urukundo no gukunda gufasha. Amasomo yampaye niyo akimfasha mu buzima bwa buri munsi.'

Minani Julie akaba n’umubyeyi wa Apotre Mignonne Kabera.

Abandi bashimiwe harimo Muramukazi we utaba mu gihugu cy'u Rwanda, waje kwifatanya nabo gusoza umwaka bashima Imana.

Yagize ati 'Mubihe agaciro kuba mushiki w'umugabo wanjye yaza ku bwanjye, akava hanze y'igihugu akaza kwifatanya natwe! Imana y'amahoro imuhe umugisha.'

Abandi bashimiwe harimo abana ba Apotre bari bitabiriye. Yavuze ko habonetse imfura ndetse na bucura, abandi ko batabonetse. Yanashimiye umuryango wose muri rusange witabiriye n'ubwo bose atabavuga mu mazina, ariko yabasabiye umugisha ku Mana.

Yashimiye abayobozi bakorana umurimo umunsi ku munsi harimo abakuru b'itorero, abadiyakoni n'abandi. Iki gitaramo gisoza umwaka kandi, cyari kirimo Worship Team yasusurukije abantu mu majwi meza aryoheye amatwi, ndetse n’abacuranzi ba piano na gitari. Nibwo yahise abatangariza insanganyamatsiko y'uyu mwaka utangiye igira iti 'Ibitangaza byivugira.'

Gushima abantu yabisoreje mu gushima abizera n'abitabiriye muri rusange, ndetse abashishikariza ko gusenga bitarangirana n'impera z'umwaka cyangwa intangiriro z'uwundi, ahubwo ko bakwiye gusenga ubudahwema.

Apotse yapfukamye asabira umugisha abantu baje mu gitaramo, asabira abanyarwanda, igihugu ndetse n'isi yose muri rusange. Isengesho ryakurikiwe n'indirimbo zitandukanye hifashishijwe Worship Team, maze baramya Imana karahava. Abashoboye kubyina babyinnye abandi baramya Imana bisanzuye, ndetse mu majwi maremare.

Apotre Mignone yabasabye gusenga babikuye ku mutima, bakabwira Imana ibyabo byose bakayiha n'ibyifuzo byabo kuko ariyo imenya ibiri ahiherereye, ikamenya n'umutima ukeneye gukira.

Uyu mushumba mwiza ufite umubare munini ahetse ku mugongo yatanze ihumure ku bizera, maze aravuga ati 'Musenge, mwizere, mwihane ibyaha, musabe Imana ibyo mukeneye, mube abantu b'ingirakamaro mu buzima bwanyu kandi mujye muhora mwibuka ko Imana yabahamagaye ngo mukore umurimo wayo'.

Source : https://inyarwanda.com/inkuru/124497/ntikizibagirana-mu-mateka-igitaramo-cya-mignonne-gisoza-2022-cyitabiriwe-nabuzuye-amashimw-124497.html