Webrwanda Backend

Category: Uncategorized

  • Pasiteri w'Abadive yirukanye abari bambariye umugeni abashinja imyambarire idahwitse #rwanda #RwOT

    Ubukwe bwajemo kidobya ubwo umupasiteri mu Itorero ry'Abadivantiste b'Umunsi wa Karindwi ry'ahitwa Kisii muri Kenya yirukanaga abari bambariye umugeni abaziza ko atari abizera bo muri iri torero ndetse bambaye imyenda idakwiriye.

    Ubu bukwe bwabaye kuwa Gatanu tariki ya 30 Ukuboza 2022,bwajemo iyi kidobya ubwo pasiteri Jared Omwoyo yangaga ko abambariye umugeni binjira mu rusengero.

    Ibi byabereye ahitwa Uasin Gishu County mu gihugu cya Kenya.

    Mu mashusho yakwirakwijwe kuri Tik Tok,uyu mupasiteri yumvikanye agira ati “Mwumve,mwumve,ntabwo muraherekeza umugeni niba mutari Abadiventiste b'umunsi wa Karindwi.Ndabyanze.

    Imyambarire yanyu ntabwo ikwiriye.Muzabikore ahandi atari mu Badiventiste.Uyu n'umuhango wera,ntabwo itorero ryakwihanganira ibikorwa bitajyanye n'imyemerere yaryo.”

    Yahise ategeka abari bambariye umugeni gusohoka mu mbago z'urusengero kandi yemeza ko atari buze gusezeranya aba bantu igihe akibona abambaye gutyo.

    Pasiteri Omwoyo yavuze ko yirukanye aba bambari b'uyu mugeni kubera ko batakoze ibyo Imana ishaka.

    Muri ayo mashusho,aba bageni bumvikanye baterana amagambo na Pasiteri ariko yanze kubumva ategeka ko abo bakobwa bazanye basohoka bakajya kure.

    Ati “Barasohoka cyangwa natse imodoka yanjye nigendere.”Byarangiye asezeranyije aba bageni ariko ababambariye birukanwe nkuko Nairobi News dukesha aya makuru yabitangaje.

    Source : https://umuryango.rw/ubuzima-115/udushya/article/pasiteri-w-abadive-yirukanye-abari-bambariye-umugeni-abashinja-imyambarire

  • Kuvanga urukundo nakazi: Idindira ryiteramb… – #rwanda #RwOT

    Birababaza cyane gushora imbaraga zacu ngo twiteze imbere, tukigomwa ibyiza kubw'ahazaza hacu, tukibabaza twiyima bimwe by'ingenzi dukeneye kubwo kureba kure ngo dutegure ejo heza maze tukazasanga ibyo twubatse bivunanye, impamvu nyamukuru yo gusenyuka kwabyo ari twe twabigizemo uruhare, tukazitwa rya zina rya Barihima.

    Biragora gukora ibintu bitandukanye mu gihe kimwe. Bamwe barabikora bakabishobora ariko abandi bikabananira, bityo bigatera ibibazo bibangamira ibyo bikorwa byabo.

    Bamwe bavuga ko inkundo z'iyi minsi zigoranye kuzijyamo uri mu kazi cyane cyane mu bucuruzi, ngo kuko abantu b'iki gihe aho gukunda umuntu bakunda ibyo atunze! Nk'uko bisigaye bivugwa, ngo biragoye gukunda ukennye muri iyi minsi. 

    Bamwe mu bo twabonye cyangwa twumvise barahombye bava ku isoko, kubera igihombo batewe n'abakunzi babo. Aho amarangamutima yawe kuyagenzura uri kumwe n'umukunzi bikunanira ugatanga ibyawe kugira ushimishe uwo ukunda, nyamara ukirengagiza ko usubiza inyuma ibikorwa bya bizinesi yawe.

    Iyi ndwara byagaragaye ko yiganje mu rubyiruko muri ba bandi bakiri mu myaka mito bataragira inshingano nyinshi, ariko babaho nk'abadatekereza ku hazaza, bimwe bita ngo 'abaho nk'uzapfa ejo'. 

    Ariko si urubyiruko gusa kuko n'abakuze bibabaho, ugasanga umugore cyangwa umugabo ahirise buzinesi. Hari n'abagabo b'abacuruzi bahomba kubera baca inyuma abagore babo, bagaha abana b'abakobwa amafaranga kugira ngo baryamane.


    Umusore  witwa Sindikubwabo James utuye mu karere ka Rubavu mu murenge wa Rugerero, utarifuje ko hagaragazwa amashusho ye, yaduhaye ubuhamya bw'ukuntu yakennye kubera umukobwa bakundanaga, akamufasha kwaya umutungo we bikarangira bizinesi yari afite ya butiki ihombye akabura n'amafaranga yo kwishyura inzu yo kubamo.

    Yagize ati 'Nari nitunze kubera butiki yanjye ndetse nari ntunze umuryango wanjye, nshobora no kwiha icyo nshaka cyose. Nari mfite inzozi zo kuzashinga urugo mbiheshejwe na butiki yanjye. Nabonaga bishoboka kuko nabonaga inyungu nyinshi, kandi nakoreraga ahantu heza mfite abakiriya benshi kandi nari naratangije igishoro gifatika. Nari mfite buri kimwe gikenerwa muri butiki, nteganya no kuyagura cyangwa ikambyarira ibindi bikorwa.'

    Yatubwiye ukuntu umukobwa yihebeye ariwe wabaye intandaro yo guhomba kwe, ariko nyuma atubwira ko ahanini byatewe n'uburangare bwe no gukunda buhumyi.

    Yagize ati 'Uwo mukobwa nakunze yarikundaga, ndetse agakunda ubuzima buhenze kandi nta kazi agira. Bikaba ngombwa ko icyo akeneye cyose akinsaba, kubera ko namukundaga numvaga ntacyo namwima, maze nawe kuko yabonaga mukunda cyane bikamuha imbaraga zo kunyifuzaho icyo akeneye cyose. Kuko iyo namuhakaniraga ansabye amafaranga yararakaraga nanjye nkababara, ngahitamo kuyamuha ngo adakomeza kubabara cyangwa akanyanga.'

    Uyu musore yakomeje kujya ashimisha umukobwa akunda amuha amafaranga, rimwe na rimwe bakayasangira basohokanye. Iyo umukobwa yabaga yagize nk'isabukuru umusore yatakazaga amafaranga angana n'ayamuviramo igishoro, utibagiwe impano za hato na hato ku bakunzi.

    Ubwo yaganiraga n'InyaRwanda.com yifuje gutanga inama ku rubyiruko ndetse no muri rusange, kubijyanye no kumenya kujya mu rukundo uri mu kazi ndetse yavuze ko cyane abwira urubyiruko, kuko aribo bakora aya makosa yamuteje igihombo.

    Yagize ati 'Urukundo nicyo kintu nabonye cyangiriza ubuzima bw'umuntu, iyo atarutwaye neza. Gukunda ni byiza no gukora ni byiza, kandi byose birajyana kuko ntabwo wavuga ngo  ugiye gukora akazi nikarangira nibwo uzakunda, cyangwa ngo uvuge ngo ngiye gukunda nzakora nyuma, byose birajyana. 

    Reka twige gushishoza mu byo dukora, kandi amarangamutima ntaduteshe umuronko. Biba byiza uhisemo umukunzi cyangwa umwunganizi ureba kure kandi ukunda gukora, aho kuguhombya akagufasha kongera inyungu yawe.'

    Yasoje avuga ko yabonye isomo kandi atakongera gukora ayo makosa yakoze, ahubwo ko yize isomo ry'ubuzima. Abwira n’igitsinagore gukunda gukora bakigira, kuko kutibeshaho kwabo byatuma bisanga bajyanywe mu zindi ngeso nk’ubusambanyi, kubera ko babaha ibyo batakwishakira.

    Hari ingero nyinshi z'abantu bari kwicuza kubwo gufata imyanzuro idahwitse no kwitwara nabi, ndetse no kubaho ubuzima budafite intego. Niba umukunzi wawe atakugira inama nzima, bisobanuye ko n'umuryango mwagirana yawangiriza. Mureke kuko nta hazaza he ahubwo uhite mo umuntu muzima, muzafatanya urugendo rwo kwiyubaka.


    Aho guha umuntu amafaranga, mufashe kubona ibyo akora yishakire aye yakoreye.

    Amafaranga yo muri bizinesi ntabwo ari ayo kujya kubyinira mu rungano no kujyanira abatarayavunikiye, ahubwo akomeza kwifashishwa mu bindi bikorwa byunganira ubwo bucuruzi bwawe, kugeza ugeze ku rwego rufatika. 

    Kora bike byiza, aho kuvanga byinshi ukabura na kimwe. Ibyo dukora byose bigenda neza iyo tubikoranye ubwenge n'ubushishozi, kandi dufite ubushobozi bwo kwifatira imyanzuro ihamye.

    Source : https://inyarwanda.com/inkuru/124521/kuvanga-urukundo-nakazi-idindira-ryiterambere-rirambye-124521.html

  • Umugore yahitanwe n'ibishashi byamuturikiyeho yishimira kwinjira muri 2023 #rwanda #RwOT

    Umugore yahuye n'uruva gusenya mu ijoro ryo ku bunani ubwo ibishashi baturitsaga nijoro bishimira umwaka mushya byafashwe mu myenda ye biramuturikana arapfa.

    Madamu Elisangela Tinem wari ufite imyaka 38,yari kumwe n'umuryango we bishimira gutangira umwaka mushya ku mucanga w'ahitwa Praia Grand muri Brazil,ubwo yahuraga n'aka kaga.

    Uyu mubyeyi w'abana babiri yagiye hamwe n'abari bari kwishimira guturika kw'ibi bishashi hanyuma kimwe kigwa mu myenda ye kiramuturikana.

    Umuryango we n'abana be barebye aka kaga yahuye nako kuko iki gishashi cyaturikijwe ataragikura mu myenda.

    Abantu benshi bo muri kariya gace bari bagiye ku mucanga kwishima no kuhatangirira umwaka mushya

    Agakundi k'abantu kagaragaye kamanjiriwe ubwo igishahsi kimwe cyari gitangiye kwaka hanyuma abashoboye bakijijwe n'amaguru mu gihe uyu mugore cyamuturikanye.

    Uwitwa Luiza Ferreira w'imyaka 20,yabwiye ibinyamakuru ko hari ibishashi bitemewe byari byazanwe hano ku mucanga.

    Uyu yagize ati “Nabonye umurabyo munini urabije nijoro hanyuma mpobera mama nyuma numva buri wese ari kuvuza induru.

    Nabonye umugore aryamye hasi ari kuvirirana ngiye kureba mbona yari kumwe n'umuhungu hasi.Abandi bantu barimo kwiruka ngo bave muri ako gace.

    Madamu Elisangela yishwe n'ibikomere yagize mu gatuza ndetse yashyinguwe ejo mu mujyi avukamo wa Sao Paulo.

    Polisi iri gukora iperereza ngo irebe uwazanye iki gishashi kitemewe mu bantu akanirwe urumukwiye.

    Source : https://umuryango.rw/ubuzima-115/udushya/article/umugore-yahitanwe-n-ibishashi-byamuturikiyeho-yishimira-kwinjira-muri-2023

  • Umukinnyi Arsenal yifuza yemeje ko byanze bikunze agomba kuyikinira #rwanda #RwOT

    Rutahizamu wifuzwa n'ikipe ya Arsenal,Mykhailo Mudryk yabwiye abantu bari kumwe mu biruhuko I Dubai ko yiteguye kwerekeza kuri Emirates nyuma y'aho iyi kipe itanze amafaranga ya kabiri yo kumugura muri Shakhtar Donetsk/

    Ikipe ya Arsenal ishaka Mudryk w'imyaka 21 nubwo ikipe ye ya Shakhtar iri gusaba miliyoni 85 z'amapawundi.

    Mudryk yageze I Dubai hagati muri Nzeri umwaka ushize ndetse ikipe ya Mikel Arteta yahakiniye irushanwa rya Dubai Super Cup ryo kuyifasha kwitegura kugaruka muri Premier League.

    Mykhailo Mudryk yabwiye abantu be ko nta yindi gahunda afite uretse kwerekeza mu ikipe ya mbere mu Bwongereza kugeza ubu ariyo Arsenal.

    Uyu musore ntasiba kwereka abafana ba Arsenal ko yiteguye kubakinira kuko akunda gushyira hanze amafoto ari kureba imikino yayo.

    Mudryk yihagazeho ku isoko kuko Arsenal yamaze gutanga miliyoni 65 z'amapawundi ku nshuro ya kabiri nyuma yo gutanga miliyoni 55 Shakhtar Donetsk ikazitera utwatsi.

    Uyu musore muto yigeze gutangaza ko yifuza gukinira Arsenal kuko abafana bayo bamweretse ko bamukunda ndetse bamwandikira ubutitsa bamusaba kubakinira.

    Uyu niwe watowe nk'umukinnyi w'umwaka mu ikipe ya Shakhtar Donetsk ikomeye kurusha izindi muri Ukraine.

    Mudryk yamaze kumvikana na Arsenal ku mushahara n'ibindi byose imugomba hasigaye ko amakipe yombi yumvikana.Nta gihindutse muri iki Cyumweru ngo Arsenal iramwegukana.

    Source : https://umuryango.rw/imyidagaduro/imikino/article/umukinnyi-arsenal-yifuza-yemeje-ko-byanze-bikunze-agomba-kuyikinira

  • Karongi:Batatu baburiye ubuzima mu kirombe bari binjiyemo mu buryo butemewe #rwanda #RwOT

    Aba bagabo babuze ubuzima bwabo ku munsi w'ubunani bwa 2023, tariki 01 Mutarama ubwo bajyaga muri iki kirombe giherereye mu Mudugudu wa Kanyomvu mu Kagari ka Gisozi.

    Bari bagiye muri iki kirombe ari bane, nyuma yuko bahengereye bagasanga abashinzwe kukirinda bahugiye mu kwishimira gutangira umwaka mushya mu ijoro ryo ku ya 01 Mutarama, bagerayo hakinjiiramo batatu undi umwe agasigara hanze abacungiye.

    Amakuru avuga ko iki kirombe kitaranatangirwa gucukurwamo amabuye y'agaciro, kuko habanje gukorwa ubushakashatsi n'imwe muri kompanyi ibishinzwe ariko iza guhagarika imirimo y'ubu bushakashatsi.

    Uwatanze amakuru, yavuze ko uyu wari wasigaye hanze, yaje na we kwinjira muri iki kirombe agezemo asanga bagenzi be baheze umwuka kubera gaze irimo, ahita ajya kumenyesha abandi bantu ngo baze batabare, ariko basanga bamaze gushiramo umwuka.

    Gashanana Saiba uyobora Umurenge wa Twumva, yemeje aya makuru, avuga ko ibi byago byabaye mu gicukuru agana saa sita z'ijoro.

    Yavuze ko aba bagabo bahitanywe na Gaze iri muri iki kirombe, ku buryo kugira ngo imirambo yabo ikurwemo byasabye ko hacukurwa ku rundi ruhande rutarimo gaze.

    Yagize ati 'Twafatanyije n'inzego z'umutekano, dukuramo imirambo yabo ihita yoherezwa ku Bitaro bya Mugonero.'

    Uyu muyobozi wihanganishije imiryango y'abitabye Imana, yaboneyeho gusaba abaturage kwirinda ibikorwa nk'ibi bibujijwe kuko bishobora kuba intandaro yo kubura ubuzima nkuko byabaye kuri aba.

    Src:Radiotv10

    Source : https://umuryango.rw/amakuru/article/karongi-batatu-baburiye-ubuzima-mu-kirombe-bari-binjiyemo-mu-buryo-butemewe

  • M23 yanze kuva mu duce yasabwe kurekura ifata utundi tubiri #rwanda #RwOT

    Nyuma y'umunsi umwe gusa M23 isabwe n'Ubuyobozi bw'ingabo zihuriwe n'Ibihugu bigize Umuryango w'Afurika y'Iburasirazuba ziri mu Butumwa bwo kugarura amahoro n'Umutekano muri DRC, kuva muri Rumangabo na Kishishe, uyu mutwe warushijeho kwigarurira ibindi bice bitandukanye birimo Nyamilima na Gisharu muri Teritwari ya Rutshuru hafi y'umupaka wa Ishasha uhuza iki gihugu na Uganda.

    Ejo kuwa 2 Mutarama 2023,Lt Col Ndjike Kaiko Umuvugizi wa FARDC muri Opresiyo Sokola 2, nawe yemeje aya makuru avuga ko guhera ku munsi wejo , agace ka Nyamilima na Gisharu muri Gurupoma ya Binza Teritwari ya Rutshuru, kamaze kugera mu Maboko ya M23 nyuma y'imirwano ikomeye.

    Mbere yaho gato kuwa 30 Ukuboza 2022, Umutwe wa M23 wari wamaze kwigaruri agace ka Bwiza muri Teritwari ya Rutshuru nyuma y'imirwano ikomeye yanagaragayemo abacancuro b'Abazungu harimo uwahasize ubuzima , barimo kurwana k'uruhande rwa FARDC.

    N'ubwo M23 isabwa kuva muri Rumangabo na Kishishe bitarenze kuwa 5 Mutarama 2023 nyuma yo kuva muri Kibumba,ubu uyu mutwe ukomeje gukataza aho imirwano yamaze kugera muri Teritwari ya Msisi .

    Ubu, imirwano ikomeye ihanaganishije Umutwe wa M23 na FARDC ifatanyije na FDLR , Mai Mai Nyatura n'abacancuro b'Ababazungu, iri kubera mu gace ka Kamatembe na Karenga muri Pariki ya Virunga ho muri Teritwari ya Masisi, k'uburyo isaha iyari yose utu duce natwo dushobora kugwa mu maboko ya M23.

    Umutwe wa M23, uheruka gutangaza ko ushobora kwigarurira Teritwari ya Misisi yose mu rwego rwo kwirwanaho , bitewe n'uko FARDC ,FDLR n'imitwe ya Mai Mai bakomeje kuyishotora bayigabaho ibitero.

    M23, ivuga ko yateye intambwe mu rwego rwo kubahiriza imyanzurio ya Luanda na Nairobi ubwo yavaga muri Kibumba k'ubushake , ariko Ubutegesti bwa Kinshasa, FDLR , Mai Mai n'indi mitwe irebwa niyo myanzuro ikaba nta gahunda ifite cyangwa se kugaragaza ubushake mu rwego rwo kubahiriza iyo myanzuro igamije kuzanira igihugu cya DRC amahoro.

    Kugeza ubu, haribazwa niba M23 izemera kuva muri Rumangabo na Kishishe bitarenze kuwa 5 Mutarama 2023 , mu gihe ikomeje gukataza yigarurira ibice bitandukanye muri Teritwari ya Rutshuru hafi kuyifata yose ndetse ikaba yamaze kwagura imirwano yerekeza muri Teritwari ya Masisi.

    IVOMO: RWANDA TRIBUNE

    Source : https://umuryango.rw/amakuru/mu-mahanga/umutekano/article/m23-yanze-kuva-mu-duce-yasabwe-kurekura-ifata-utundi-tubiri

  • Robertinho wanditse amateka muri Rayon Sports na Vipers, ageze muri Simba SC #rwanda #RwOT

    Simba SC yamaze gutangaza umutoza ukomoka muri Brazil umaze kwandika izina muri aka karere, Roberto Oliveira uzwi nka Robertinho nk’umutoza mukuru w’iyi kipe.

    Robertinho yatandukanye na Vipers FC yo muri Uganda mu cyumweru gishize, ni nyuma yo kuyifasha kugera mu matsinda y’imikino Nyafurika.

    Kuri uyu wa Kabiri tariki ya 3 Mutarama 2023 ni bwo uyu mutoza w’imyaka 62 yatangajwe nk’umutoza mukuru w’iyi kipe aho asimbuye Zoran Maki batandukanye muri Nzeri 2022, azungirizwa na Juma Mgunda wari usanzwe ari umutoza wungirije muri iyi kipe.

    Inkuru y’urugendo rw’ubutoza muri Afurika y’Iburasirazuba ya Robertinho yatangiriye muri Rayon Sports muri 2018 ubwo yayifashaga kwandika amateka agera muri 1/4 cy’imikino Nyafurika ya CAF Confederation Cup.

    Muri Kanama 2021 yerekeje muri Uganda afasha Vipers FC kwegukana igikombe cya shampiyona ndetse anayifasha kugera mu matsinda ya CAF Champions League ku nshuro ya mbere.

    Robertinho yagizwe umutoza wa Simba SC

    Source : http://isimbi.rw/siporo/article/robertinho-wanditse-amateka-muri-rayon-sports-na-vipers-ageze-muri-simba-sc

  • 2023: FERWACY izategura amasiganwa 17 harimo… – #rwanda #RwOT

    Umwaka wa 2023 mu magare, ugiye gutanga ibyishimo byunganira ibya 2022 aho abakunzi b’umukino wo gusiganwa ku magare begerejwe uyu mukino mu turere twabo. 

    Uyu mwaka w’imikino uzabanzirizwa n’isiganwa rya Heroes’ Cycling Race rizazenguruka mu turere twa Kicukiro na Gasabo. Nyuma yaho muri Gashyantare hazakinwa isiganwa rya Tour du Rwanda ari naryo rikuru muri aya 17.

    Nyuma ya Tour du Rwanda hazakurikiraho Kivu Belt Race rizabera mu Karere ka Rusizi, Karongi na Rubavu. Nyuma yaho kandi hazakinwa Africa Cycling Championship itaramenyekana aho izabera. Muri Mata hazakinwa isiganwa rya Race to Remember rizanyura mu muhanda Kigali-Gicumbi-Kigali.

    Abakunzi b’umukino w’amagare mu Rwanda bagiye kuryoherwa n’umwaka wa 2023 

    Muri Gicurasi 2023 hazakinwa isiganwa ry’Akagera Race rizabera i Gatsibo, muri Kamena hakinwe amasiganwa abiri arimo irya Education and Cultural race rizabera i Huye, nyuma yaho hakinwe National Cycling Championship izabera muri Kigali na Bugesera.

    Muri Nyakanga 2023, hazakinwa isiganwa rya Liberation Race rizabera mu muhanda Kigali-Nyagatare. Muri Kanama naho hazakinwa amasiganwa abiri, arimo Royal Nyanza Race rizahuzwa n’umunsi w’Umuganura, ribere i Nyanza, nyuma yaho hakinwe 2023 UCI World Championships rizabera muri Scotland.

    Mugisha Moise ni umukinnyi wo kwitega muri 2023 nyuma yaho mu mwaka ushize yatwaye amasiganwa atatu yikurikiranya harimo n’iryasoje umwaka ryabereye i Nyanza 

    Muri Nzeri hazakinwa amasiganwa abiri, arimo, Kibugabuga Race rizabera i Bugesera, ndetse n’isiganwa ryo Kwita Izina. Mu Ukwakira hazakinwa isiganwa rimwe rya Gisaka Race rizabera i Kirehe, naho mu Ugushyingo hakinwe Kibeho race rizabera mu Karere ka Nyaruguru. 

    Mu Ukuboza 2023, hazakinwa amasiganwa 2, arimo isiganwa rya Human Rights Race ndetse na Musanze Gorilla Race rizabera i Musanze rikazaba ari naryo siganwa rizasoza umwaka. 

    Ingengabihe y’umwaka w’imikino mu ishyirahamwe ry’umukino wo gusiganwa ku magare mu Rwanda ni uko iteye

    Source : https://inyarwanda.com/inkuru/124511/2023-ferwacy-izategura-amasiganwa-17-harimo-nirizabera-muri-gatsibo-124511.html

  • Kantore Sandra uzwi nka Do Mi yerekeje muri APR WBBC avuye muri REG BBC yahise yishumbusha abandi 4 ba The Hoops #rwanda #RwOT

    Ikipe ya APR Women Basketball Club yamaze guha amasezerano umukinnyi wahoze ayikinira Kantore Sandra uzwi ku izina rya Do Mi, uyu mukinnyi akaba agarutse mu ikipe yahozemo mbere yo kwerekeza muri REG WBBC.

    Nk'uko byagaragaye ku mafoto ikipe ya APR WBBC yashyize hanze, Kantore Sandra yagaragaye afashe umwambaro w'iyi kipe ye nshya yasinyiye amasezerano y'umwaka umwe akinira iyi kipe y'ingabo z'igihugu.

    Kantore Sandra uzwi nka Do Mi ni umwe mubakinnyi b'umukino w'intoki bakomeye hano mu Rwanda bitewe n'ubuhanga yagiye agaragaza mu mikino itandukanye yakinnye hano muri shampiyona.

    Nyuma yo kuva muri iyi kipe ya REG WBBC, Amakuru ikinyamakuru RUSHYASHYA yamenye ni uko REG yaraye ihaye amasezerano abandi bakinnyi 4 bashya.

    Muri abo bakinnyi bahawe amasezerano ni Micomyiza Rosine uzwi nka Cissé, Rutagengwa Nadine, Mwizerwa Faustine na Munezero Ramula, aba bose bakaba bakiniraga ikipe ya The Hoops Rwanda.

    Amakipe atandukanye arimo kwiyubaka ategura umwaka mushya w'imikino wa 2023, nk'uko ubuyobozi bw'ishyirahamwe ry'umukino w'intoki mu Rwanda, FERWABA ryabitangaje, shampiyona izatangira tariki ya 21 Mutarama 2023.

    The post Kantore Sandra uzwi nka Do Mi yerekeje muri APR WBBC avuye muri REG BBC yahise yishumbusha abandi 4 ba The Hoops appeared first on RUSHYASHYA.

    Source : https://rushyashya.net/kantore-sandra-uzwi-nka-do-mi-yerekeje-muri-apr-wbbc-avuye-muri-reg-bbc-yahise-yishumbusha-abandi-4-ba-the-hoops/?utm_source=rss&utm_medium=rss&utm_campaign=kantore-sandra-uzwi-nka-do-mi-yerekeje-muri-apr-wbbc-avuye-muri-reg-bbc-yahise-yishumbusha-abandi-4-ba-the-hoops

  • Kora ibi bintu uwo mwanya ukimara kurumwa ni… – #rwanda #RwOT

    Mu rwego rwo kwirinda guhita uhura n'ibindi bibazo bitandukanye, hari ibintu ukwiriye gukora ugakomeza kugira ubuzima bwiza. Mu by'ukuri, muri iyi nkuru urakuramo igisubizo.

    Nk'ibisanzwe inzoka nikuruma bitunguranye cyangwa ukiyumva warumwe nayo, ikintu cya mbere uzakora uzajye kwa muganga babanze bakuvure. 

    Umuti kwa muganga bazaguha witwa 'Antivenoms' uhita urwanya ingaruka zitandukanye ziterwa no kurumwa n'inzoka, mu gihe yagusizemo ubumara bwayo. Uyu muti ni umwe mu miti yifashishwa cyane n'ikigo 'World Health Organization'.

    Mu gihe ikurumye uwo mwanya, hita uyikuraho. Tinyuka uyifate /uyisunike uhite uyikuraho kugira ngo ubuzima bwawe butaba mu kaga bitewe n'uko yagutinzeho. Ahantu inzoka yakurumye byashoboka ko hahise hahindura ibara hagasa umukara, habyimbye se ndetse n'amaraso akaba ari kuva cyane bivanze n'uburibwe. 

    Mu gihe nta bundi bufasha buri aho wamaze kuyikuraho, ugirwa inama yo guhita ujya kureba abaganga bakagufasha.

    Uzahite ukuramo imyenda, ugerageze kuhoza ndetse uhafunge n'igitambaro gisa neza cyane mbere y'uko habyimba, nta kindi kintu na kimwe ukoze. Bibaye byiza wagura umuti twagarutseho haruguru, ukajya uwugendana mu gikapu cyawe mu rwego rwo kwirinda ingaruka zabyo mu gihe waterwa utiteguye.

    Inzoka ikimara kukuruma, uzahite ufata ifoto yayo kugira ngo uzabashe kumenya ubwoko bw'inzoka yakurumye, ndetse binafashe uraguha ubufasha bw'ibanze. Iyi nkuru ikozwe mu rwego rwo gufasha abantu batandukanye bashobora kuzahura n'iki kibazo cyo kurumwa n'inzoka.

    Inkomoko: WHO  

    Source : https://inyarwanda.com/inkuru/124505/kora-ibi-bintu-uwo-mwanya-ukimara-kurumwa-ninzoka-124505.html