Category: Uncategorized

Ni uturere twa Karongi, Ruhango, Kamonyi, Kayonza, Rusizi, Bugesera na Rulindo.

Ibishushanyo mbonera bisazweho byatezaga ingorane, aho hari nk'abaturage b'Akarere ka Karongi bamaze igihe binubira ko basabwa kubaka inzu zigeretse kandi badafite ubushobozi bwo kuzubaka.

Bavuga ko bishimiye kuba Akarere kabo karashyizwe mu turere turindwi tugiye gukorerwa igishushanyo mbonera.

Babitangaje ku wa 23 Gashyantare 2023, nyuma y'uko Ikigo cy'Igihugu Gishinzwe imikoreshereze y'ubutaka gisobanuye ibijyanye no gukora igishushanyo mbonera kivuguruye kizaba kireba akarere kose, mu gihe icyo basanganywe cyarebaga ubutaka bw'umujyi gusa.

Mu gihe cyo gukora ibishushanyo mbonera, inzobere zizaganira n'abaturage zimenye ahakwiye gushyirwa ibikorwa byateganyirijwe ako karere.

Mu mpinduka zizagaragara mu gishushanyo mbonera cy'akarere ka Karongi kivuguruye, harimo kuba kazaba gafite imijyi itanu, aho kuba umujyi umwe nk'uko byari bisanzwe.

Ku gishushanyo mbonera gisanzwe, Akarere ka Karongi kari karagenewe igice cy'umujyi ufata muri Bwishyura na Rubengera, ariko ku gishushanyo mbonera kivuguruye haziyongeraho umujyi wa Shyembe, uwa Birambo, uwa Mubuga n'uwa Mugonero.

Umuyobozi w'Ishami rishinzwe imitunganyirize y'imijyi n'icyaro mu Kigo cy'Igihugu Gishinzwe Ubutaka, Mpayimana Protais, yavuze ko buri karere muri utu tugiye kuvugururirwa igishushanyo mbonera, kahawe inzobere zizamara amezi icyenda zikora ibyo bishushanyo mbonera.

Bazamara igihe gihagije mu karere bakusanya amakuru akenewe, azashingirwaho mu ivugurura ry'igishushanyo mbonera.

Ati “Igishushanyo mbonera twari dufite cyibandaga ku bice by'umujyi gusa ntigifate akarere kose. Abaturage kubera kugitinya bagahunga bakajya kubaka mu nkengero”.

Biteganyijwe ko iki gishushanyo mbonera kizashyirwa mu bikorwa kugeza mu 2035, nyuma yaho kikazasuzumwa kugira ngo kizageze mu 2050.

Icyo gihe biteganyijwe ko u Rwanda ruzaba rutuwe na miliyoni 25.8, ariko hakomeza kunozwa ingamba zo kuboneza urubyaro bakaba ari miliyoni 22 z'abaturage.

Mpayimana avuga ko kugira ngo aba baturage bazabone ibibatunga, nibura icyo gihe 47% by'ubuso bw'ubutaka bw'u Rwanda buzaba bukorerwaho ubuhinzi.

Ati “Igishushanyo mbonera kivuguruye kizaha agaciro cyane ubutaka bw'ubuhinzi kubera ko abaturage bariyongera umunsi ku wundi, ari nako bakenera ubutaka bwo guhingaho ngo babone ibibatunga”.

Biteganyijwe ko mu 2050, akarere ka Karongi kazaba gatuwe n'abaturage ibihumbi 750, barimo ibihumbi 500 baza batuye mu mujyi wa Karongi (umwe mu mijyi yunganira umujyi wa Kigali) n'indi mijyi ine izaba iri mu karere.

Amavugurura aziye igihe

Abaturage n'abayobozi b'akarere ka Karongi bavuga ko aya mavugurura aje akenewe, kuko hari abakeneraga kubaka bagasanga aho bakeneye kubaka hagenewe amazu ageretse kandi badafite ubushobozi bwo kubaka amagorofa.

Umwe mu baturage bo mu karere ka Karongi wasabye icyangombwa cyo kubaka ntagihabwe kuko yari yakoze igishushanyo mbonera cy'inzu itari igorofa, yabwiye IGIHE ko aya mavugurura akwiye kuzirikana ab'aamikoro make.

Ati “Igishushanyo mbonera kigiye gukorwa nikibanze kirebe rubanda rugufi, abantu ntabwo tunganya ubushobozi, icya kabiri niba umuntu agiye kubaka ari umusore, afite ikibanza, bimunaniza. Kugira ngo tugire umujyi usa neza nibabanze bite ku bisenge wenda bakubwire ngo uzubake agacurama aho kubaka bushuri”.

Mugenzi we yavuze ko yatekereje kuvugurura inzu akoreramo ubucuruzi, ariko acika intege bitewe n'uko azi bagenzi be basabye ibyangombwa byo kuvugurura ntibabihabwe, ahubwo bagasabwa kubaka inzu zigeretse.

Ati “Igishushanyo mbonera twari dufite cyatugoraga kuko badusaba kubaka ama-etage kandi dufite amikoro make. Mu gishushanyo kivuguruye bagomba kumenya ko mu baturage babo harimo abakennye”.

Umuyobozi w'Akarere ka Karongi, Mukarutesi Vestine, yagaragaje ko kuba iki gishushanyo mbonera kigiye kuvugururwa ntacyo bizabangamira ku batse ibyangombwa byo kubaka, imirimo yo kubaka ikaba irimbanyije.

Nawe yamaze impungenge abumva ko ubushobozi bwabo butakubaka inzu zigeretse.

Ati “Nk'uko mwabonye bagisobanura, mwabonye ko hariho ahantu hazajya hajya amazu adatwara ubuso bunini ariko atanageretse ntabwo ariko hose hazaba hari amazu ageretse”.

Mu turere turimo Rubavu, Musanze, Rwamagana, Ngoma, Kirehe, Gakenke na Nyaruguru imirimo yo kuvugurura igishushanyo mbonera kivuguruye cy'ubuso bwose bw'akarere iri kugana ku musozo.

Naho mu turere turimo Kicukiro, Gasabo, Nyarugenge, Nyagatare, Gicumbi, Gisagara, Huye na Muhanga imirimo yo kuvugurura igishushanyo mbonera cy'akarere kose yararangiye.

Utundi turere dusigaye natwo tuzakorerwa ibishushanyo mbonera mu mwaka utaha.

Akarere ka Karongi kari mu turere tugiye gukorerwa igishushanyo mbonera kivuguruye kireba ubutaka bwose

Rwari urugendo rw’igitangaza kuri Henok Mulueberhane wigeze kugira agahinda gakabije, ariko uyu mwaka wa 2023 izuba rikaba ritangiye kumurasira. Tariki 11 Ugushyingo 1999 nibwo Henok Mulueberhane yabonye izuba, avukira mu gace ka Asmara mu gihugu cya Eritrea.

Henok Mulueberhane yavukiye mu muryango udafite amikoro ahagije, gusa akaba umwana ukunda umukino w’igare. Ahagana mu 2015, nibwo Henok Mulueberhane yatangiye kugaragaza impano y’umukino w’amagare by'umwihariko imbere iwabo, aho yanyuze mu mashuri atandukanye yigisha umukino w’igare dore ko iki gihugu kiri mu bihugu bifite imitegurire myiza mu mukino w’amagare.

Henok ni umwe mu bakinnyi b’amagare batangiye neza umwaka wa 2023 muri Afrika 

Mu 2018, nibwo izuba twavuga ko ryari ritangiye kwakira Henok Mulueberhane dore ko yaje gusinyira ikipe y’abatarabigize umwuga, ya World Cycling Centre ayikinira umwaka umwe. Mu 2020 Henok yasinyiye ikipe ya NTT Continental Cycling Team, nayo ayikinira umwaka umwe.

Ubwo uyu musore yageraga muri NTT Continental Cycling Team, yasanzemo mwenewabo Tesfatsion Natnael ufite Tour du Rwanda y’umwaka ushize. Mu bakinnyi uyu musore yari kumwe nabo, harimo Pritzen Marc Oliver bari kumwe muri Tour du Rwanda aho we yakiniraga ikipe ya Education Nippo Development Team, ndetse n’umunya- Ethiopia Abreha Negasi ukinira Q36.5 Pro Cycling Team nayo yari mu Rwanda.

Henok Mulueberhane yari agiye guhagarika umupira w’amaguru 

Mu 2021, Henok Mulueberhane yatandukanye na Continental Cycling Team aza gufatwa na Bike Aid, ariko ayigiriramo ibihe bigoye mu mwuga we. Uyu musore wari umwe mu bakinnyi bakomoka muri Eritrea bazamukaga neza, yageze muri Bike Aid imbaraga zo gukora ziranga, umusaruro uba muke, kugera ubwo iyi kipe imurekuye kubera kubura urwego. 

Henok ikipe ye iri mu makipe 3 yashoje Tour du Rwanda agifite abakinnyi buzuye 

Henok Mulueberhane wumvaga ubuzima bwe buzaba gukina igare yaje gutakaza ikizere yumva gukina igare yabihagarika, nk'uko yabidutangarizaga mu kiganiro yagiranye na InyaRwanda mbere y’agace kerekeza i Karongi. Yagize ati 'Ndibuka ubwo nakiniraga Bike Aid sinzi ibyambayeho, umusaruro mu kibuga urabura kugera aho ikipe ihisemo kundeka. Icyo gihe naratashye njya murugo, mfata umwanzuro wo kureka igare, ariko mu rugo barambuza ngo ningume ngerageze. Nari mfite imyaka mike ariko numvaga igare ndihuzwe, gusa ndashimira ubuyobozi bw’ikipe ya Green Project bwangiriye ikizere bukampa umwanya, ariyo mpamvu ngomba gukora cyane nkabitura.”

Asanzwe ari umukinnyi w’ikipe y’igihugu ya Eritrea 

Mu 2022, Henok Mulueberhane yaje gusinyira ikipe ya Bardiani -CSF, ahuriramo na Munuele Tarozzi wegukanye agace ka 7 ka Tour du Rwanda. Icyo gihe Henok Mulueberhane yaje kwitabira Tour du Rwanda aba uwa gatanu, gusa gukomezanya n’iyi kipe ntibyakunda birangira asinyiye Green Project ariyo ari kugiriramo ibihe byiza.

Mu 2023 Henok Mulueberhane akigera muri Green Project yaje kwegukana irushanwa rya African Road Championship, aba uwa kabiri mu gukoresha ibihe bike bakoresheje ikipe, ndetse aba uwa gatatu mu guhangana n’ibihe ku giti cye.

Tour du Rwanda ye ya kabiri, Henok Mulueberhane yaje kwegukana isiganwa abaye uwa mbere mu duce umunanani, aho yakoresheje amasaha 28, iminota 58 n’isogonda rimwe. Henok Mulueberhane yegukanye uduce tubiri twa Tour du Rwanda harimo agace ka Huye Musanze, n’agace ka nyuma ka Kigali Kigali.

Henok yaje muri Tour du Rwanda amaze kwegukana Africa championship yari atwaye kabiri yikurikiranya Henok ubu afite akamwenyu noneho ko gukina igare 

Ikipe ya Manchester United yegukanye igikombe itsinda Newcastle United ibitego 2-0, ni umukino wabaye uyu munsi saa kumi n'ebyiri n’igice kuri Wembley stadium.

Abakinnyi ba Manchester United 11 babanje mu kibuga: De Gea; Dalot, Varane, Martínez, Shaw; Casemiro, Fred; Antony, Fernandes, Rashford na Weghorst.

Umukino watangiye wihuta cyane kuko mu minota 2 gusa, buri kipe yari imaze kugera imbere y’izamu ry’indi. 

Abakinnyi 11 ba Newcastle United babanje mu kibuga Karius; Trippier, Schär, Botman, Burn; Longstaff, Guimaraes, Joelinton; Almirón, Wilson na Saint-Maximin.

Uruhande rw’ibumoso rwa Newcastle United nirwo rwatangiye umukino rukora cyane, ku munota wa 5 gusa Saint-Maximin yahinduye umupira mwiza mu rubuga rw’amahina ariko Guimaraes agerageje gushota Fred aramwitambika.

Manchester United yakomeje gukina yiga umukino ariko inanyuzamo igatungurana nk'aho Weghorst yahaye umupira Dalot nawe awuhindura imbere y’izamu, ariko myugariro wa Newcastle United aratabara awukuraho.

Umunya-Brazil Fred witwaye neza mu mukino

Ku munota wa 25 Trippier wa Newcastle United yahinduye umupira imbere y’izamu, bituma Schär Lisandro Martnez bagonganya imitwe abaganga baratabara.

Newcastle United yakomeje kwatsa umuriro kuri Manchester United bituma nanone kuwa 30 Trippier yongera guhindura umupira imbere y’izamu, usanga Saint-Maximin yandagaza Dalot ariko arekuye ishoti De Gea awukuramo.

Ku munota wa 33 Manchester United yahise itanga ikosora ibona igitego gitsinzwe na Casemiro akoresheje umutwe, ni ku mupira yari ahawe na Luke Shaw kuri kufura yari ivuye ku ikosa ryari rikorewe Marcus Rashford.

Abakinnyi ba Newcastle United bakomeje gukina ariko abakinnyi ba Manchester United bo bagatsinda, ku munota wa 39 Marcus Rashford yatsinze igitego cya 2 ku mupira mwiza yari ahawe na Wout Weghorst. Igice cya mbere cyarangiye Manchester United iyoboye umukino n’ibitego 2-0.

Igitego Casemiro yatsinze akoresheje umutwe

Igice cya kabiri cyatangiye Manchester United ikora impinduka mu kibuga, ikuramo Dalot utari witwaye neza mu gice cya mbere binjizamo Wan-Bissaka. Newcastle United yakomeje urugendo rugoranye rwo gushaka ibitego 2, ariko abakinnyi bayo barimo Saint-Maximin bakagera imbere y’izamu bagapfusha imipira ubusa. 

Umukino warangiye Manchester United idatsinze ikindi gitego naho Newcastle United yabuze n’ikimpozamarira, bituma ikipe y’amashitani atukura yegukana igikombe cya Carabao Cup gutyo.

Iki ni igikombe cya mbere cya Erik Ten Hag muri Manchester United mu mikino 40 gusa, hari hashize imyaka 7 Manchester United itazi uko igikombe gisa.

Rashford na Antony ndetse na Luke Shaw bishimira igitego cya 2 cya Rashford

Weghorst atanga umupira wavuyemo igitego

Antony akandagirwa kubera gucenga cyane

Abakinnyi ba Manchester United bafite igikombe cya Carabao Cup

Urutonde rw'uko imitangire y'ubwisungane mu kwivuza mu mwaka wa 2022/2023 rwasohotse tariki 22 Gashyantare 2023, mu turere icumi twa mbere tubiri ni utwo muri Kigali.

Akarere ka Kicukiro kaje ku mwanya wa kane n'ubwitabire bwa 94.3 % mu gihe akarere ka Nyarugenge kaje ku mwanya wa cyenda n'ubwitabire bwa 92 %. Ni mu gihe akarere ka Gasabo kaje ku mwanya wa 18 n'ubwitabire bwa 87.4%.

Uturere dutanu twa mbere ni Gisagara ifite ubwitabire bwa 98%, Nyaruguru ifite 95.4%, Gakenke 95%, Kicukiro 94.3% na Nyamasheke 93.8%.

Mu rwego rw'Intara, iya mbere ni intara y'Amajyepfo, Umujyi wa Kigali, Amajyaruguru, Uburengerazuba n'Intara y'Iburasirazuba. Mu rwego rw'igihugu, ubwitabire buri kuri 89.2 %.

Ntabwo byari biherutse ko uturere tw'umujyi wa Kigali tuza imbere mu bwitabire bwa Mutuelle de santé nubwo aricyo gice gituyemo abantu bafite amikoro yisumbuye ugereranyije no mu bindi bice by'igihugu.

Guhera mu 2021, ubuyobozi bw'Umujyi wa Kigali bwashyize ingufu mu bukangurambaga bugamije gushishikariza abawutuye kwitabira gutanga Mituweli, dore ko hari abangaga kuyitanga kuko bumva ko bafite ubushobozi bwo kwivuza baramutse barwaye.

Icyo gihe kandi hagaragajwe imbogamizi kubera uburyo abatuye mu mujyi bakunze kwimuka bya hato na hato.

Ku rutonde rushya, uturere tuza mu myanya ya nyuma harimo Rwamagana, Huye, Musanze, Gatsibo na Nyagatare.

Biteganyijwe ko umwaka wa Mituweli uzarangirana na Kamena 2023, muri Nyakanga hatangira umwaka mushya, 2023/2024.

#RwoT
📢22.02.2023: Ubwitabire mu kwishyura #Mituweli2022_2023 ku rwego rw'Igihugu bugeze kuri 89,2%. pic.twitter.com/viOAmLLyZK

— Rwanda Social Security Board (@RSSB_Rwanda) February 26, 2023

Ni mu birori byabereye muri Konvine Hotel & Boutique iherereye muri ‘Centre’ ya Kicukiro ku mugoroba wahise wo kuwa Gatandatu, aho umuyobozi mukuru wa SKOL, Bwana Thibout Relecom yasangiye n’abakunzi b’ibinyobwa by’uru ruganda.

Umuyobozi ushinzwe kwamamaza ibikorwa by'uruganda rwa SKOL, Karim Tuyishime ‘Kenzman’ yatangiye yifuriza abatumiwe bose kuryoherwa no kurushaho kwishimira ibinyobwa by’uru ruganda rumaze imyaka isaga 58 rukorera muri Africa.

Kenzman yahaye ikaze abatumiwe abibutsa ko SKOL imaze imyaka 13 mu Rwanda

Hamuritswe icupa rishya rya SKOL Lager rya Mililitiro 330 (33CL) ryashyiriweho abakunzi b’ibinyobwa bya SKOL mu rwego rwo gukomeza kubanezeza. Iri cupa rifite amabara n’imitako bya Kinya-Africa riragura 500FRW, mu gihe SKOL Lager isanzwe ya 500ml yo igura 800FRW.

Umuyobozi wa SKOL Brewery LTD, Bwana Thibault Relecom yashimiye abakunzi b’ibinyobwa bya SKOL muri rusange, avuga ko uru ruganda rwagiranye igihango gikomeye na Africa kuva mu 1965, ubwo rwatangiraga gutunganyiriza inzoga kuri uyu mugabane.

Bwana Thibout yagendaga aganira n’abatumiwe muri ibi birori, basangira SKOL Lager yerekanywe mu isura nshya ndetse na ‘Cake’ y’umuhondo yari yashyiriweho kwizihiza imyaka 13 uri ruganda rumaze rukorera mu Rwanda.

Thibout Relecom, umuyobozi wa SKOL ku isi yafatanyije n’umuhungu we gukata ‘Cake’ y’isabukuru ya SKOL

Niwemufasha Marie Paule ushinzwe ibikorwa bya SKOL Lager (Brand Manager) yavuze ko uyu musangiro wiswe ‘Special SKOL Lager Evening’ wari unagamije gutangiza gahunda nshya yo kumenyekanisha iki kinyobwa gifite abakunzi benshi ku mugabane w’ Africa.

Yagize ati “Twakoze umugoroba udasanzwe wa SKOL Lager, twasohoye ‘Packages’ zindi za SKOL Lager mu macupa na Canette. Twatangije na ‘Campaign’ nshya yo kwamamaza iki kinyobwa kuri Televiziyo, Radio, Ku Byapa n’ahandi.”

“Kuri twe ni ingenzi kuvuga kuri ibi kuko SKOL Lager ni ‘Brand’ imaze igihe muri Africa kuva mu 1965, irakunzwe mu bihugu byinshi kandi ifite na ‘Quality’ nziza nk’uko abakiliya bagenda bayishimira.”

Yavuze ko “SKOL Lager nshya iri mu icupa rya 33Cl niyo ihendutse kurusha izindi mu Rwanda, iragurika kandi ifite uburyohe busanzwe. Twahinduye ibirango byayo dushyiraho amabara y’Africa kugira ngo ijyanye no kwishimira igihe tumaze dukorera muri Africa.”

Marie Paule Niwemufasha, ‘Brand Manager’ wa SKOL Lager yishimanye n’abakunzi ba SKOL

Niwemufasha yavuze ko SKOL Brewery LTD inezerewe kubera imyaka 13 imaze ikorera mu Rwanda, ati “Aho Tugeze dufite ishema ryinshi kandi dufite byinshi byo kwerekana ahazaza. Twishimira gukorera mu Rwanda kuko n’abanyarwanda bakunda SKOL.”

Uruganda rwa SKOL Brewery LTD rusanganywe ibinyobwa bisembuye ku isoko bya; Skol Pulse, Skol Malt, Skol 5, Virunga Mist, Virunga Gold, Skol Canette na Skol Select, SKOL Lager ndetse n’ikinyobwa kidasembuye cya SKOL Panache.

Cake ya SKOL yari mu mabara y’umuhondo n’umutuku aranga ibinyobwa by’uru ruganda

Bwana Thibout Relecom yateye indirimbo mu Kinyarwanda ati “Isabukuru nziza..”

DJ Sonia, umwe mu bakobwa bari kwamamara mu kuvanga imiziki, ni we wacurangiraga abaje mu birori

Umuhanzi Juno Kizigenza (Ibumoso) ari mu bitabiriye SKOL Lager Special Evening

Itsinda rya Shauku Band rigizwe n’abahanga mu gucuranga no kuririmba ryasusurukije abakunzi ba SKOL

Umuraperi B-Threy wo muri Green Ferry Music yari ahari

Abitabiriye ibirori bahawe impano ya SKOL Lager n’imipira myiza

KANDA LINK UREBE ANDI MAFOTO MENSHI

AMAFOTO: NGABO M.Serge

Ku kibuga kigora benshi cya Stade Ubworoherane, Musanze FC yari ifite abafana benshi barimo abayo n’aba Rayon Sports, yananiwe kwifasha APR FC, itakaza umukino w’umunsi wa 21 wa Shampiyona.

Mugisha Gilbert yarekuye ishoti riremereye ku munota wa 36′ umupira uruhukura mu izamu rya Musanze FC ryarimo Ntaribi Steven utiriwe yigora ngo asimbuke kuko umupira wihutaga.

Gilbert utari muremure cyane, yongeye kungukira ku burangare bw’abugarizi ba APR FC, asimbuka neza mu bwenge bwinshi, yohereza umupira mu rushundura wa Musanze FC, Umunota wa 42 usiga APR FC yanditse ibitego bibiri.

Adel Abderahman utoza Musanze FC yasoje igice cya mbere akomerewe, ajya gutanga inama ku bakinnyi be batarimo Nshimiyimana Amran wahagaritswe, ariko no mu gicye cya kabiri ntibabonye ikibarokora APR FC ishaka igikombe hasi no hejuru.

Ku munota wa 60′ w’umukino, Bizimana Yannick bakunda kwita ‘Ifi n’inkoko’ kubera umushahara wa APR FC wamunejeje ubwo yayisinyiraga, yongeye kwiyereka abafana bayo, yinjiza igitego cya gatatu.

Mu minota 30 ya nyuma y’umukino, Musanze FC yageragezaga gukina imipira miremire no kubyaza umusaruro ikibuga cyayo kitorohera amakipe y’i Kigali, ariko abakinnyi ba APR FC bakomeza kurinda izamu ryabo.

Musanze FC yatsinzwe ibitego bitatu ku busa (3-0), abafana ba APR FC bataha bisekera abafana ba Rayon Sports bari baje gushyigikira ikipe yo munsi y’ibirunga bikarangira bose bababarijwe hamwe.

Abafana ba Rayon Sports bari bifatanyije n’aba Musanze FC batashye ntacyo babonye

Mu yindi mikino ya Shampiyona y’icyiciro cya mbere yabaye kuri iki Cyumweru, Marine FC yanyagiye Espoir FC ibitego 4-0, Police FC itsinda Sunrise FC ibitego 2-1 naho Mukura VS&L yari kuri Stade ya Huye itsinda Gasogi United ibitego 2-1.

Nyuma y’umunsi wa 21 wa Shampiyona, APR FC iyoboye urutonde n’amanota 43, igakurikirwa na Rayon Sports ifite 42, ndetse na SC Kiyovu ifite amanota 41 ku mwanya wa Gatatu. Espoir FC iri ku mwanya wa nyuma n’amanota 11, aho ikurikiye Marine FC ifite 16 na Rutsiro FC ifite 18.

Bamwe mu baganiriye na IGIHE, bavuga ko mu muhanda ujya ku Kimoteri cya Nduba ahitwa i Gasanze mu Karere ka Gasabo, hasigaye hari insoresore zitega imodoka zabo ziba zitwaye ibishingwe zikazurira zishakamo imari ku buryo iyo bazibibujije kurira kugira ngo zidateza impanuka zibahukamo zikabakubita.

Bavuga ko hari benshi muri bo izo nsoresore zimaze gukomeretsa bitewe n'uko zitwaza ibyuma ku buryo hari n'uwo zateye ibuye bimuviramo gupfa.

Aba bakozi ba koperative zitwara ibishingwe, bavuga ko inzego zibishinzwe zikwiye gufatira ingamba iki kibazo cy'izi nsoresore zizwi ku kazina k'abasyazi, zitegera imodoka baba barimo mu nzira.

Izo nsoresore ngo iyo zibuze muri iyo myanda ibyo zashakaga zahuka mu bayitwara zigatangira kubakubita no kubiba amafaranga na telefone zabo.

Uwitwa Nsekanabo Mustafa utuye i Kagugu mu Murenge wa Kinyinya, ukorera kompanyi itwara imyanda ya Agruni, yemeza ko aba basore bamuteye icyuma bitewe n'uko yari ababujije kurira imodoka yari arimo igiye kumena imyanda.

Yagize ati 'Iyi nkovu ubona ni biriya birara biba mu mihanda y'i Gasanze byayinteye, byari byaduteze noneho bagenzi banjye bamwe byarabavunaguye njye babasha kuntera ibyuma kandi wumve ko hari mugitondo imodoka igiye kumena.'

Uwitwa Hagenimana Fabien, ukorera kompanyi itwar imyanda ya Agruni, avuga ko izo nsoresore ziherutse kurira imodoka zimusangamo zitangira kumukubita zishaka kwiba telefone ye ngendanwa.

Ati 'Barampohoteye ndi kujya kumenesha imodoka, ni abarara bagenda mu muhanda w'i Gasanze, barankubise bantsindagira mu modoka bagenda bampondagura ngo kubera ko nari mbabujije kurira kugira ngo badateza impanuka none ubu bamvunnye umugongo.'

Umuyobozi wa koperative Ubumwe Cleaning services Ltd itwara imyanda mu ngo mu Karere ka Kicukiro, Bwate David, yavuze ko aba basore bategera imyanda mu nzira ari bo bateza umwanda mu mujyi wa Kigali.

Yagize ati 'Nibyo hari abantu bateza umwanda aho kugira ngo bawukize. Abo duhura nabo aho dukorera hose ni abantu batagira imirimo iyo turimo mu kazi kacu dukora buri munsi bagenda badukurikiye, bamena ibishingwe hasi bagashakamo ibyuma na za pulasitiki n'ibikarito ugasanga ahakorewe isuku hari umwanda aho kugira ngo habe isuku.'

Yongeyeho ko hari n'abana bo mu muhanda bamaze gukura bitwa abasyazi babategera mu nzira bakurira imodoka zabo ku buryo iyo bababujije bakubita abakozi baba bagiye kumena iyo mwanda.

Umuvugizi wa Agruni, Mitali Diogene, avuga ko abakora ibi ari abana bo mu muhanda bagaragara mu nzira imodoka zinyuramo zigiye kumena imyanda.

Yagize ati 'Usanga basagarira abakozi ku buryo bashobora no kuduteza impanuka. Ni ikibazo gikomeye kandi gikeneye ko inzego z'ubuyobozi n'iz'umutekano zidufasha kuko nta muturage uhana undi mu kwirinda ko abakozi bacu nabo bashobora kujya bashaka kwihorera igihe basagariwe.'

Yongeyeho ko aba basore ari bamwe mu bateza umwana mu mujyi kuko n'iyo abaturage basohoye ibishinjwe babishyize ku muhanda baza bakabihamena bari gushakishamo ibyuma bajya gucuruza.

Umunyamabanga Nshingwabikorwa w'Umurenge wa Nduba, Nibagwire Jeanne, yabwiye IGIHE ko iki kibazo batari bakizi.

Yagize ati ' Nibyo hari abo bazana bavuga ko babapakirira imyanda ariko iby'uko babakubita babamenera n'imodoka ibirahuri icyo kirego ntitwari twacyakira kuri polisi yacu ,gusa byigeze kubaho hakazwa ingamba mu buryo butandukanye ariko nta makuru ubu baduhaye.'

Gitifu Nibagwire yongeyeho ko iyo bafashe abo bana bakunze kurira imodoka bashaka ibyuma mu bishingwe ziba zitwaye, babajyana mu kigo ngororamuco bakaganirizwa.

Umwe mu batwara imyanda yerekana aho yatewe icyuma n’izo nsoresore

Hagenimana avuga ko yakubitiwe mu modoka yari itwaye ibishingwe

Umuyobozi wa kompanyi itwara ibishingwe mu karere ka Kicukiro, Bwate David yemeza ko ababategera mu nzira ari bo bateza umwanda mu mujyi