Category: Uncategorized

Impuzamashyirahamwe y’umupira w’amaguru muri Afurika, CAF yamaze gutanza abasifuzi 55 barimo umunyarwanda umwe rukumbi, Uwikunda Samuel bari mu cyiciro cya Elite A.

Ni icyiciro umuntu yafata nk’icyo ku rwego rwa mbere rwa CAF aho umusifuzi ukigezemo aba yemerewe gusifura imikino yo ku rwego rwo hejuru nk’igikombe cy’Afurika n’icy’Isi, imikino ya nyuma n’imikino Nyafurika ya CAF Champions League na Confederation Cup.

Aba basifuzi bageze muri iki cyiciro bakaba bafite amasomo azaba tariki ya 14 – 18 Mata 2023 abategurira kuzasifura 1/4 cya Champions League na Confederation Cup.

Muri rusange uru rutonde rw’abasifuzi 55 harimo 30 bo ku ruhande na 25 basifura hagati ari nabo barimo umunyarwanda Uwikunda Samuel. Uru rutonde kandi ruriho abasifuzi 5 ba VAR.

Uwikunda Samuel yazamuwe mu cyiciro gisumba ibindi mu basifuzi ba CAF

Source : http://isimbi.rw/siporo/article/umusifuzi-umwe-rukumbi-w-umunyarwanda-muri-55-bageze-mu-cyiciro-cya-elite-a

Nyuma y'uruzinduko rw'iminsi 2 Umunyamabanga wa Leta y'Ubwongereza , Madamu Suella Braverman yashoje mu Rwanda kuwa mbere tariki 20 werurwe 2023, yatangaje ko yiboneye ko u Rwanda ari nta makemwa mu kwakira no gufata neza abimukira b'abanyamahanga, yewe ndetse no kurusha uko bafatwa mu bihugu byinshi byo mu Burayi.Amasezerano hagati y'Ubwongereza n'uRwanda azabera ibindi bihugu urugero.

Madamu Braverman wagenzwaga no gushimangira amasezerano Ubwongereza bufitanye n'uRwanda, ateganya ko ruzakira abimukira bari mu Bwongereza mu buryo bunyuranyije n'amategeko, yashoboye kubonana n'abimukira bari mu Rwanda, barimo abavanywe mu bucakara muri Libiya, aho bari barageze bagerageza kwambuka ngo bajye gushakira imibereho ku mugabane w'uBurayi, abavuye muri Afghanistan bahunga ubutegetsi bw'intagondwa z'abatalibani, n'abandi benshi bahisemo gutura mu Rwanda, mu gihe mu bihugu byabo ibintu bitarasubira mu buryo, cyangwa mu gihe amadosiye asaba ubuhungiro mu bindi bihugu byo mu Burayi n'Amerika agisuzumwa.

Abo bose batangarije Madamu Suella Braverman ko bahamwe amacumbi ajyanye n'icyubahiro gikwiye umuntu, bamubwira ko biga uko bikwiye, bakavuzwa neza, bakidagadura, mbese ngo babaye abenegihugu mu bandi.Agisubira mu gihugu cye, Umunyamabanga wa Leta Suella Braverman yabwiye itangazamakuru ndetse n'izindi nzego bireba, ko nta gikwiye gukoma imbere umushinga wo kohereza abimukira mu Rwanda, ko ndetse aya masezerano azabera urugero n'ibindi bihugu bihangayikishijwe n'abimukira binjira muri ibyo bihugu rwihishwa, abenshi ndetse bakanapfira mu nzira batarahagera.

Ubuhamya bwa Suella Braverman bugamburuje abarwanya aya masezerano hagati y'u Rwanda n'Ubwongereza, bikaba byari bisanzwe bizwi ko abo ari abanga u Rwanda n'ubuyobozi bwarwo ku mpamvu zizwi nabo ubwabo gusa, kimwe n'ababonera amaronko ku bimukira, babeshya ngo barabafasha kurengera uburenganzira bwabo. Indege itwaye icyiciro cya mbere cy'abimukira bavuye mu Bwongereza, ishobora kugwa i Kanombe mu minsi mike iri imbere, kuko impande zombi zemeranyijwe kwihutisha gushyira mu bikorwa amasezerano. Kuki abimukira bari mu mudendezo mu Rwanda, nyamara hakaba Abanyarwanda bahisemo kuzapfira ishyanga?

Iyo ushishoje, Abanyarwanda binangiye bakanga gutaha, si uko batazi ko mu Rwanda ari amahoro. Ahubwo biganjemo ababa mu mashyamba ya Kongo no mu bihugu bike by'Afrika, Uburayi n'Amerika, bibwira ko ngo bazataha barasa, baje gufata ubutegetsi mu Rwanda, bagasubizaho leta y'ibigarasha n'abajenosideri.

Abo ni abari mu mitwe y'iterabwoba nka FDLR, RNC, FLN n'indi itagira epfo na ruguru. N'abitwa ko bajijutse, bakiyita' abatavuga rumwe na Leta', bazi neza ko ibyo gufata ubutegetsi mu Rwanda ari inzozi zidashoboka, ariko bagahitamo gushuka ab'ubwenge buke, ngo babahe udufaranga tubasunika mu buzima bubi barimo, iyo rubanda inababere agakingirizo iyo mu mahanga, kuko batinya gutaha kubera ibyaha binyuranye basize bakoze mu Rwanda. Wakwiyita ute'impunzi' kandi uri mu mitwe yitwaje intwaro?

Tumaze iminsi tugaruka ku bukangurambaga bw'abajenosideri n'ibigarasha birimo Ingabire Victoire na FDU-Inkingi ye, Ntaganda Bernard, Faustin Twagiramungu, Anasthase Gasana, Gaspard Musabyimana, abaparimehutu bo Dominiko Mbonyumutwa, n'abandi bacuramye ubwonko, ngo batabariza 'impunzi z'Abanyarwanda ziri muri kongo'.

Ariko se mu by'ukuri, ninde wakwirengagiza ubunryo Leta y'uRwanda, ifatanyje n'Ishami ry'Umuryango w'Abibumbye rishinzwe Impunzi, UNHCR, yewe ndetse n'ibihugu byakiriye impunzi z'Abanyarwanda, nta gihe batabwiye abifuza gutaha ko amarembo afunguye, abashaka kuguma aho bari nabo bakaba bahaguma, ariko batitwa impunzi? Hari ibihumbi byinshi byahisemo gutera umugongo ubuhunzi, abandi batura mu bihugu bahungiyemo, ariko bafite uburenganzira bwo gusura igihugu cyabo, uRwanda. Abatashye ubu baratuye, baratuje, bari mu cyerekezo kizima kimwe n'abo basanze mu Rwanda.

Abinangiye nta mpamvu n'imwe yumvikana batanga, uretse gusa kuvuga ngo mu Rwanda 'nta bwisanzure buhari', ukagirango kubundabunda iw'abandi nibwo bwisanzure bubakwiye.

Bishoboka bite se ko umuntu yakwiyita impunzi atarabujijwe gutaha, agahitamo gufata intwaro no kuyoboka imitwe yica, igasahura,igasambanya abagore ku ngufu, mbese imitwe twagereranya n'iya satani?!Niba umunyamahanga akubwira ko mu Rwanda abayeho neza, kuki wowe wahitamo kubaho nabi mu mahanga kandi ufite iwanyu. Abatarafata icyemezo cyo gutaha murakererwa rwose, kuko abari mu gihugu barakomeza kubasiga muri rwa rugendo rw'iterambere turimo.

Uko imyaka ishira kandi niko musaza, ari nako igihe cyo gukora kibasiga.

N'iyo kandi waba utunze, burya nta shya ry'ishyanga. Bikarushaho kuba bibi iyo uwo mutungo uwukoresha mu kubangamira inyungu z'igihugu cyakubyaye.Amateka atwereka ko burya amahanga ahanda. Igihe kiragera akaguhinduka, cyane cyane iyo yamenye ko utavugwa neza ku ivuko. Witegereza kuzabura amajyo, kandi uRwanda rwawe ruhora rugutegeye yombi ngo rukwakirane ubwuzu.

Taha none, utandukane no kubaho nk'utagira gakondo.

The post Niba abimukira bishimiye uko babayeho mu Rwanda, kuki hari Abanyarwanda bahisemo guhera ishyanga? appeared first on RUSHYASHYA.

Source : https://rushyashya.net/niba-abimukira-bishimiye-uko-babayeho-mu-rwanda-kuki-hari-abanyarwanda-bahisemo-guhera-ishyanga/?utm_source=rss&utm_medium=rss&utm_campaign=niba-abimukira-bishimiye-uko-babayeho-mu-rwanda-kuki-hari-abanyarwanda-bahisemo-guhera-ishyanga

Umukuru w'Igihugu yageze i Doha mu gitondo cyo kuri uyu wa Kabiri. Qatar n'u Rwanda bisanzwe ari ibihugu by'inshuti, bifitanye imishinga itandukanye igamije iterambere.

Mu mishinga ikomeye ibihugu byombi bifitanye, harimo iyubakwa ry'Ikibuga cy'Indege cya Bugesera ndetse n'Ishoramari muri Sosiyete ya RwandAir.

Qatar Airways iri mu biganiro na RwandAir hagamijwe kugura 49% by'imigabane muri iyi sosiyete nyarwanda. Ibiganiro ntibiragana ku musozo ariko impande zombi zivuga ko bikomeje kugenda neza.

RwandAir yatwaye abagenzi 1.037.025 mu mwaka ushize ndetse irateganya gukomeza kuzamura ibikorwa byayo harimo kongera ibyerekezo ku buryo biva kuri 27 bihari hakiyongeraho bitatu bishya.

Iherutse kandi kwakira indege nshya yo mu bwoko bwa Airbus izajya yifashishwa mu ngendo ndende zirimo izo ku mugabane w'u Burayi. Ubu ifite indege 13 zitwara abagenzi n'imwe y'imizigo.

Usibye imigabane muri RwandAir, Qatar yanashoye imari mu mushinga w'iyubakwa ry'Ikibuga cy'Indege cya Bugesera, aho ubu imirimo yo kubaka icyiciro cya mbere igeze kuri 66%.

Muri uyu mushinga, Qatar Airways ifitemo imigabane ingana na 60%, wose hamwe ufite agaciro ka miliyari $1,3.

Iki kibuga kizahabwa ubushobozi bwo kwakira abagenzi bagera kuri miliyoni zirindwi ku mwaka mu cyiciro cya mbere, icyiciro cya kabiri kizaha iki kibuga ubushobozi bwo kwakira abagenzi miliyoni 14.

Ku rundi ruhande, Qatar ifite imishinga yo kubaka amahoteli mu Rwanda ku buryo rukomeza kugera ku ntumbero zarwo zo kuba igicumbi mu bukerarugendo.

Perezida Kagame yageze i Doha mu gitondo cyo kuri uyu wa Kabiri

Byitezwe ko Umukuru w’Igihugu aza kugirana ibiganiro na Emir wa Qatar, Sheikh Tamim bin Hamad Al Thani

---

Source : http://igihe.com/amakuru/u-rwanda/article/perezida-kagame-yagiye-i-doha-mu-ruzinduko-rushimangira-imikoranire-y-u-rwanda

Ikigo cy'Igihugu cy'Ubuzima, RBC, kivuga ko uyu munsi usanze u Rwanda ruhagaze nabi mu bijyanye no gusuzumisha amenyo kuko ubushakashatsi bugaragaza ko umuntu 1% ari we ujya kwisuzumisha amenyo atarwaye.

Ubushakashatsi bwa RBC bwa 2021 bugaragaza ko abantu bangana na 92.8% aribo bagiye kwa muganga kwivuza no gusuzumisha amenyo kuko bababaraga amenyo cyangwa ishinya, mu gihe umuntu 1% ariwe wagiye gusuzumisha amenyo atarwaye.

Ibi bigaragaza ko hakiri icyuho mu bijyanye n'ubuzima bwo mu kanwa mu banyarwanda.

Dr Pascal Ndayizeye umuganga w'indwara zo mu kanwa n'amenyo, asanga hari igikwiye gukorwa n'abashinzwe ubuzima mu Rwanda, kuko kuba abenshi batazi kwita ku isuku yo mu kanwa bishobora no guteza impfu.

Yagize ati 'Abanyarwanda benshi bazi ko iryinyo ridashobora kwica umuntu kandi iryinyo riteye mu mubiri, uko warwara iryinyo niko warwara n'ijisho kandi byose bishobora kuganisha ku rupfu mu gihe utabyivuje.'

Tariki 20 Werurwe buri mwaka, Isi yizihiza umunsi wahariwe ubuzima bwo mu kanwa.

Uyu munsi mu Rwanda wizihirijwe mu ishuri ribanza rya Kacyiru.

Ubuyobozi bwa RBC buvuga bwahisemo kwizihiriza uyu munsi mu kigo cy'ishuri kuko abana iyo bigishijwe bafata vuba, kandi babasha no kwigisha n'ababyeyi babo bikaba byafasha mu kugabanya imibare y'abarwara indwara zo mu kanwa nk'uko bisobanurwa na Madamu Irene Bagahirwa, umukozi wa RBC mu ishami rishinzwe ubuzima bwo mu kanwa.

Ati 'Umwana wamaze gufata ubutumwa neza no mu rugo iyo agezeyo adufasha muri bwa bukangurambaga. Umubwiye kujya kuryama atoze mu kanwa ntabwo yakwemerera kuko azi neza ibyiza byo kujya kuryama abanje koza mu kanwa.'

Nyuma yo kwigishwa ingaruka zo kutita ku isuku yo mukanwa, bamwe mu banyeshuri bagaragaje ko basanzwe bazi gukora isuku yo mu kanwa, ariko batajyaga babyitaho kuko batari bazi ko byabagiraho ingaruka.

Umwe yagize ati 'Indwara zo mu kanwa sinari nzizi, ariko ndabashimiye kuko ndabimenye.'

Undi nawe ati 'Ikintu ntarinzi ni uko iyo utoze mu kanwa n'umuti w'amenyo ushobora kurwara amenyo.'

Ku rundi ruhande ariko hari n'abandi usanga badafite ubushobozi bwo kugura ibikoresho byifashishwa mu gusukura mu kanwa, kandi bishobora kubagiraho ingaruka z'uburwayi.

Icyakora ku ruhande rwa RBC basanga ari ikibazo cy'imyumvire y'ababyeyi igomba guhinduka, bakamenya ko nabyo bikenewe nk'uko bakenera ibiribwa n'ibindi nkenerwa mu rugo.

Madama Irene Bagahirwa niwe ukomeza.

 Ati 'Niba umuntu adashobora kurara atanyoye icupa yaba irisindisha cyangwa ridasindisha, kuki ataryigoma uyu munsi kugira ngo agure umuti w'amenyo?Kuko naryigomwa ntacyo byamutwara ariko nagura umuti urafasha umuryango icyumweru cyangwa bibiri. Ni imyumvire tugomba guhindura si ikibazo cy'ubushobozi.'

Ubushakashatsi bwa RBC bugaragaza ko mubabajijwe 86% aribo bakoresha umuti w'amenyo bivuze ko abandi 14% batazi akamaro ko kuwukoresha, naho 67% bakoza amenyo rimwe ku munsi mu gihe baba bagomba kuyoza nibura kabiri ku munsi.

CYUBAHIRO GASABIRA Gad

The post <strong>Umuntu 1% niwe wisuzumisha indwara zo mu kanwa atarwaye — RBC</strong> appeared first on FLASH RADIO&TV.

Source : https://flash.rw/2023/03/21/umuntu-1-niwe-wisuzumisha-indwara-zo-mu-kanwa-atarwaye-rbc/?utm_source=rss&utm_medium=rss&utm_campaign=umuntu-1-niwe-wisuzumisha-indwara-zo-mu-kanwa-atarwaye-rbc

Nyuma y’uko Johan Bakayoko avuze ko atazi igihugu azakinira ndetse ko n’u Rwanda arutekerezaho, yamaze guhamagarwa mu ikipe y’igihugu nkuru y’u Bubiligi.

Uyu musore usatira anyuze ku mpande mu ikipe ya PSV Eindhoven mu Buholandi wari warakiniye abato b’u Bubiligi, aheruka gutangaza ko atizeye kuzakinira ikipe nkuru y’u Bubiligi ndetse akaba atarafa umwanzuro w’igihugu azakinira ndetse ko no mu bihugu atekereza harimo n’u Rwanda akomoka.

Icyo gihe yagize ati 'nkubwije ukuri ntabwo nzi ubwenegihugu nzahitamo. Ntabwo ndabitekerezaho. Aho nkomoka nshobora gutoranya Côte d’Ivoire cyangwa u Rwanda. Bizaterwa n’ibintu byinshi.'

Uyu mukinnyi w’imyaka 19 akaba yahise ahamagarwa n’umutoza w’ikipe y’igihugu nkuru y’u Bubiligi, Domenico Tedesco mu kwitegura umukino wo gushaka itike y’igikombe cy’u Burayi uzabahuza na Suède ku wa Gatanu w’iki cyumweru.

Agiyeyo asimbuye rutahizamu w’imyaka 20 wa Rennes mu Bufaransa, Jérémy Doku wagize ikibazo cy’imvune.

Johan Bakayoko yahamgawe mu ikipe nkuru y’u Bubiligi

Source : http://isimbi.rw/siporo/article/rutahizamu-wari-wafunguriye-amarembo-amavubi-u-bubiligi-bwamutwaye

Yabitangaje mu kiganiro yagiranye na Sanny Ntayombya wa The New Times, cyagarutse ku bufatanye bw'u Rwanda n'u Bwongereza mu gushakira umuti ikibazo cy'abimukira.

Ubu bufatanye bushingiye ku masezerano ibihugu byombi byagiranye muri Mata 2022, agamije gushakira umuti ikibazo cy'abimukira bakomeje kwinjira mu Bwongereza mu buryo bunyuranyije n'amategeko, bigashyira ubuzima bwabo mu kaga dore ko babanza kunyura mu nzira zigoye.

Ku ikubitiro u Bwongereza buzatanga miliyoni 140 z'amapawundi, azafasha u Rwanda kwitegura no gufasha abimukira bazahagera mbere, ibihugu byombi bikazakomeza gukorana kugira ngo iyo gahunda igende neza.

Yolande Makolo yabajijwe niba muri iyo gahunda nta mafaranga azava mu isanduku ya Leta y'u Rwanda, mu gihe igihugu gifite ibindi bibazo bicyugarije cyakabaye gihanganye nabyo.

Mu gusubiza yagize ati “Ku bijyanye n'amafaranga avuye mu misoro y'abaturage, ni oya. Hari ishoramari rishya u Bwongereza buri gushyira muri iyi gahunda, rizafasha ahubwo amafaranga ava mu misoro y'abaturage gukora ibirenzeho mu gufasha izindi gahunda dusanganywe.”

U Bwongereza mu mwaka ushize bwatangaje ko nibura ku munsi bukoresha miliyoni 7 z'amapawundi yo kwita ku bimukira binjiye muri icyo gihugu binyuranyije n'amategeko. Ubaze ku mwaka, nibura u Bwongereza butakaza miliyari 2.5 z'amapawundi yo kwita kuri abo bantu.

Yolande Makolo yavuze ko u Bwongereza bwiteguye gufasha u Rwanda kubaka ubushobozi buzatuma abo bimukira babishaka baguma mu Rwanda, bakahabona amahirwe atuma bagera ku nzozi zabo.

Yakomeje ati “Icyo u Bwongereza burimo gukora ni ukubaka ubushobozi bwacu kugira ngo tubashe kwita kuri aba bimukira, noneho hejuru y'iyo nkunga u Bwongereza buzanashora imari mu guteza imbere ubukungu bw'u Rwanda, kugira ngo tubashe gukora byinshi ku byo dukora haba mu bikorwa remezo, guteza imbere urwego rwa serivisi, guteza imbere uburezi, mu gutanga amahugurwa menshi haba ku banyarwanda ndetse n'abimukira.”

Makolo yabajijwe uburyo u Rwanda nk'igihugu gikennye cyakwemera gufasha u Bwongereza muri iki kibazo, aho kubureka ngo bukorane n'inzego bireba nk'ishami ryita ku mpunzi risanzwe ribifitemo ubunararibonye.

Yagize ati “U Rwanda rubikora kubera ko Abanyafurika ntabwo turi isoko y'ibibazo gusa dushobora no kuba isoko y'ibisubizo. Muzi ko u Rwanda rufite ubufatanye bwinshi mu nzego zitandukanye, tuzwi mu bikorwa byo kugarura amahoro mu bice bitandukanye by'isi, dufitanye amasezerano ajyanye n'umutekano n'ibihugu bitandukanye muri Afurika, tubasha kugira uruhare no gutanga umusanzu mu gukemura ibibazo zitandukanye bireba isi.”

“Ibyo turimo gukora ubu ku bimukira ni uko ari ikibazo gihangayikishije isi. Niba gikeneye igisubizo gihuriweho n'isi yose, twiteguye kugira uruhare mu gushaka uburyo bushya bwo gukemura ikibazo cy'abimukira, mu buryo budafasha isi mu kugikemura gusa, ahubwo bunadufasha natwe nk'abanyarwanda.”

Makolo yavuze ko ubufatanye bw'u Rwanda n'u Bwongereza mu guhangana n'ikibazo cy'abimukira ari bushya, bityo abantu bakwiriye kubuha amahirwe bakareba ko butanga umusaruro.

Ati “Abantu bakwiye kubuha amahirwe kandi butanze umusaruro bwagera no ku bihugu byinshi. Yego turimo gufasha u Bwongereza gukemura ikibazo bufite, ariko u Bwongereza nabwo burimo gushyira ubushobozi hano mu Rwanda, ku buryo dushobora kubwifashisha mu kubaka u Rwanda rwiza twifuriza Abanyarwanda.”

Inkunga u Bwongereza buzajya buha u Rwanda yagenewe ibikorwa birimo imyiteguro yo kwakira aba bimukira, hakaba n'igice cyagenewe gutera inkunga iterambere ry'ubukungu nko mu bikorwa remezo, imyubakire, uburezi n'ibindi.

Yolande Makolo yavuze ko u Bwongereza bwiteguye gutanga andi mafaranga bitewe n'abimukira buzajya bwohereza.

Ati “Nitumara kubona neza umubare w'abimukira bazaza n'igihe bazazira, hazatangwa ubushobozi bw'inyongera kugira ngo babashe kwakirwa neza mu baturage, bahabwe amahugurwa bakeneye bafashwe gutangira ubucuruzi, kubasha kubona ubutaka, bizaterwa n'umubare w'abimukira bazoherezwa hano n'igihe bazazira.”

Yongeyeho ati “Tuzakira aba bimukira mu ngo zitandukanye muri Kigali, si inkambi, gereza cyangwa ibigo bifungirwamo by'igihe gito, tuzabashakira aho kuba mu muri Kigali no mu Mijyi yunganira Kigali. Bazatuzwa mu baturage ku nkunga ya Guverinoma mu myaka runaka, twizera ko bazaba bamaze kumenyera ku buryo babasha gukomeza ubuzima bwabo.”

Muri icyo gihe ngo bazafashwa kwiga, bahabwe amahugurwa atandukanye yabafasha gutangira ubucuruzi, ndetse no kwiga indimi zikoreshwa mu Rwanda.

Ibikorwa bya mbere byo kwitegura abo bimukira byaratangiye aho kuri iki Cyumweru tariki 19 Werurwe Minisitiri w'Umutekano mu Bwongereza, Suella Braverman yashyize ibuye ry'ifatizo ahagiye kubakwa inzu zizatuzwamo abo bimukira mu karere ka Kicukiro.

Ni inyubako biteganyijwe ko zizatwara miliyari 60 Frw aho hagiye kubakwa inzu 528 zikazuzura mu gihe cy'amezi atandatu.

Abimukira ba mbere bagombaga kugera mu Rwanda mu mwaka ushize, icyakora byatindijwe n'ikirego cyatanzwe mu nkiko zo mu Bwongereza, bamwe bagaragaza ko kohereza abo bantu binyuranyije n'amategeko. Haracyategerejwe umwanzuro ku bujurire.

Umuvugizi wa Guverinoma y’u Rwanda, Yolande Makolo yavuze ko nta mafaranga azava mu isanduku ya Leta muri gahunda y’abimukira bazava mu Bwongereza

---

Source : http://igihe.com/amakuru/u-rwanda/article/si-amafaranga-yacu-guverinoma-yashyize-umucyo-ku-bizashorwa-ku-bimukira-bo-mu

Visi Perezida wa kabiri w'inteko ishinga amategeko wa Kongo Kinshasa, Vital Muhini, yavuze ko hakenewe kuganira ku gutsindwa kw'ingabo z'amahanga zananiwe kugarura amahoro mu ntara ka Kivu y'amajyaruguru.

Ikinyamakuru Media Congo cyanditse ko ubu amajwi menshi mu gihugu asaba ko ingabo za EAC ziva ku butaka bw'iki gihugu kuko nta kigaragara zahakoze.

Visi perezida  Vital Muhini Banywesize unavuka mu ntara ya Nord Kivu avuga ko kwirukana MONUSCO n'ingabo za EAC atari ikintu kizahuturwaho, hazabanza kuganira, ariko hari igihe kizagera Kongo Kinshasa ikivana mu muryango wa Afrika y'uburasirazuba,

Ubu mu ntara ya Nord Kivu haravugwa ubwicanyi buri gukorwa n'abarwanyi ba ADF bakomoka muri Uganda, aho mu mpera z'icyumweru utuvuyemo zishe abantu 10 muri teritwari ya Lubero. Izi nyeshyamba ubusanzwe zagabaga ibitero muri Beni no mu ntara ya Ituri ,abaturage bakaba bavuga ko nta mpamvu y'ingabo z'amahanga kuko bicwa zirebera.

The post <strong>RDC: Hakenewe ibiganiro ku gutsindwa kw'ingabo z'amahanga</strong> appeared first on FLASH RADIO&TV.

Source : https://flash.rw/2023/03/21/rdc-hakenewe-ibiganiro-ku-gutsindwa-kwingabo-zamahanga/?utm_source=rss&utm_medium=rss&utm_campaign=rdc-hakenewe-ibiganiro-ku-gutsindwa-kwingabo-zamahanga

Perezida Paul Kagame yageze i Doha muri Qatar mu ruzinduko rw'akazi, aho aza kubonana n'Umuyobozi w'Ikirenga w'iki gihugu, Amir Sheikh Tamim bin Hamad Al Thani, kuri uyu wa Kabiri tariki 21 Werurwe 2023.

Abayobozi bombi baraganira ku bufatanye buri hagati y'u Rwanda na Qatar.

Mu mishinga ikomeye ibihugu byombi bifitanye, harimo iyubakwa ry'ikibuga cy'Indege cya Bugesera ndetse n'Ishoramari muri Sosiyete ya RwandAir.

Qatar yashoye imari mu mishinga y'iyubakwa ry'Ikibuga cy'Indege cya Bugesera aho yaguze imigabane yacyo ingana na 60% naho Guverinoma y'u Rwanda ikagira 40%.

Biteganyijwe ko iki Kibuga cy'Indege gishya kizaba gifite ubushobozi bwo kwakira abagenzi bagera kuri miliyoni zirindwi ku mwaka mu cyiciro cya mbere, naho icyiciro cya kabiri kikazaha iki Kibuga ubushobozi bwo kwakira abagenzi miliyoni 14 ku mwaka, iki cyiciro kikazatangira mu 2032.

The post Perezida Kagame yagiriye uruzinduko rw'akazi muri Qatar appeared first on FLASH RADIO&TV.

Source : https://flash.rw/2023/03/21/perezida-kagame-yagiriye-uruzinduko-muri-qatar-2/?utm_source=rss&utm_medium=rss&utm_campaign=perezida-kagame-yagiriye-uruzinduko-muri-qatar-2

Mbere yo gutaramira mu Bufaransa, umuhanzi nyarwanda Muneza Christopher yirebeye umukino wa shampiyona wo Paris Saint Germain yatsindiwe Parc des Princes na Rennes.

Tariki ya 19 Weruwe 2023 Paris Saint Germain yari yakiriye Rennes mu mukino wa shampiyona.

Muneza Christopher umaze iminsi ari ku Mugabane w’u Burayi aho afite ibitaramo bitandukanye akaba yarakurikiranye uyu mukino.

Uyu mukino waje kuwurangira Rennes itsindiye Paris Saint Germain mu rugo ibitego bibiri ku busa.

Biteganyijwe ko tariki ya 24 Werurwe 2023 Muneza Christopher azataramira Lyon mu gitaramo azahuriramo na Bwiza na Riderman.

Muneza Christopher yarebye uyu mukino PSG itsindwa

Source : http://isimbi.rw/imyidagaduro/article/umuhanzi-christopher-ni-umuhamya-w-uburyo-psg-yandagarijwe-mu-rugo

Urwego rw'Igihugu rw'Ubugenzacyaha(RIB),rwataye muri yombi Evariste Tuyisenge wiyita NTAMA W'IMANA 2 kuri Twitter, nyuma y'uko atangaje ubutumwa bushishikariza abantu gukora icyaha cyo gusambanya abana.

RIB yatangaje ko mu iperereza ry'ibanze yakoze ryagaragaje ko Tuyisenge uzwi nka NTAMA W'IMANA 2 akoresha ikiyobyabwenge cyo mu bwoko bw'urumogi gishobora kuba ari kimwe mu ntandaro z'ibyo yandika.

Evariste Tuyisenge yatawe muri yombi mu gihe ku mugoroba wo kuri uyu wa Mbere tariki 20 Werurwe 2023, yifashishije urubuga rwa Twitter asaba imbabazi ku butumwa yari yatanze.

Ati 'Ndasaba IMBABAZI kuri tweet nakoze ikangurira abantu gusambanya abana batarageza imyaka yubukure. Ndicuza kandi nasaba abantu bose kubyirinda kuko ari ugukangurira abantu gukora icyaha cy'ubugome. Murakoze'

Uwatawe muri Yombi  afungiye kuri sitasiyo ya RIB ya Kacyiru mu gihe dosiye ye irimo gutunganywa kugirango yoherezwe mu Bushinjacyaha.

Urwego rw'Igihugu rw'Ubugenzacyaha(RIB),rurakangurira abakoresha imbuga nkoranyambaga kwirinda gukoresha amagambo agize ibyaha cyangwa gutanga ubutumwa bushishikariza abantu gukora ibyaha, bagamije kugwiza ababakurikira (followers,views), ibibutsa ko abazabirengaho bazahanwa nk'uko amategeko abiteganya.

The post <strong>RIB yataye muri yombi uwashishikarije abantu gusambanya abana kuri Twitter</strong> appeared first on FLASH RADIO&TV.

Source : https://flash.rw/2023/03/21/rib-yataye-muri-yombi-uwashishikarije-abantu-gusambanya-abana-kuri-twitter/?utm_source=rss&utm_medium=rss&utm_campaign=rib-yataye-muri-yombi-uwashishikarije-abantu-gusambanya-abana-kuri-twitter