Category: Uncategorized

Ishimwe Dieudonné wamamaye nka Prince Kid yatangiye kuburana mu bujurire aho yahakanye ibyaha byose aregwa ahubwo avuga ko ari akagambane yakorewe.

Nyuma yo kugenda urusubikwa, uyu munsi nibwo Urukiko Rukuru rwatangiye kuburanisha uru rubanza aho n’Ubushinjacyaha bwemeye ko rubera mu ruhame bitandukanye n’ibihe byabanje ngo hato abantu batazagira ngo Prince Kid araregwa ibihimbano, mu bitabiriye uru rubanza barimo na Miss Iradukunda Elsa, Nyampinga w’u Rwanda 2017 akaba n’umugore wa Prince Kid.

Prince Kid aregwa ibyaha byo gukoresha imibonano mpuzabitsina ku gahato no guhoza ku nkeke bifitanye isano n’imibonano mpuzabitsina yakoreye abakobwa bitabiriye Miss Rwanda mu bihe bitandukanye, yahakanye ibyaha aregwa kandi yizeye ubutabera buboneye.

Nyuma y’uko tariki 12 Ukuboza 2022, Urukiko Rwisumbuye rwa Nyarugenge rugize umwere Prince Kid agahita anafungurwa, Ubushinjacyaha bwahise bujurira aho bwatanze ingingo zigaragaza ko umucamanza wo ku rwego rwa mbere yitiranyije ibintu bigize icyaha cyo gukoresha undi imibonano mpuzabitsina ku gahato.

Yanavuze ko hari ibimenyetso byirengagijwe, nk’uko imvugo z’abatangabuhamya batandukanye barimo abahawe nimero za TBF, TGK, TFK, na VDF, zaragaje ko Prince Kid yagiraga imyitwarire iganisha ku guhohotera abakobwa, irimo kuba yarabajyanaga iwe.

VDF we yanavuze ko hari igihe cyageze ahagarika imishahara ya bo kubera ububasha abafiteho.

Ubushinjacyaha bwagaragaje ko ku cyaha cyo gukoresha undi imibonano mpuzabitsina n’icyaha cy’ishimishamubiri rishingiye ku gitsina, hari amajwi yafashwe umucamanza akayanenga ku kuba nta raporo iyaherekeza ndetse nta gishobora kugaragaza ko akomoka ku wo yitirirwa aho ubushinjacyaha bukabona ko ari intege nke z’urukiko.

Hari kandi ubutumwa bwagiye buhererekanwa hagati ya VBF na Ishimwe Dieudonné, n’ibindi bitandukanye. Ubushinjacyaha bwanenze uburyo urubanza mu rukiko rwa mbere rwaciwe, bugaragaza ko habayeho kubogamira ku uregwa.

Mu kwiregura, Prince Kid yavuze ko umutangabuhamya uvugwa nka VKF (code yahawe kugira ngo umwirondoro we utamenyekana) yikoreye inyandiko kwa noteri yemeza ko atahohotewe, ndetse no mu rukiko hari abatanze ubuhamya ko atabahohoteye.

Yagaragaje ko yagiranaga amasezerano y’imikoranire n’abitabiraga amarushanwa ya Miss Rwanda, bityo ko ntaho yari guhurira nabo ngo abakoresheho ububasha nk’uwateguraga irushanwa.

Ku majwi yacicikanye ku mbuga nkoranyambaga asaba icyiswe “happiness” avugana na Miss Muheto Divine yavuze ko ari aye, gusa ngo ntazi uwayafashe, ndetse ko hari ibyakuwemo, kuko icyo kiganiro kitari cyerekeye imibonano mpuzabitsina.

Ku mutangabuhamya VMF, Prince Kid yagaragaje ko uhereye mu rubanza rw’ifungwa n’ifungurwa ry’agateganyo, inkiko zagiye zifata icyemezo ko nta mpamvu zatuma akurikiranwaho kumuhoza ku nkeke, cyane ko ikimenyetso cyatanzwe ari inyandikomvugo gusa.

Izi nyandiko zashingiweho n’Ubushinjacyaha, Kid yavuze ko ibikorwa bikubiyemo ntabyabayeho.

Ati “Mbihakaniye imbere y’urukiko, ibyo bikorwa ntibyabayeho.”

Prince Kid yavuze ko ibyabaye byose ari akagambane yakorewe kugira ngo asigwe icyasha yamburwe ububasha bwo gutegura Miss Rwanda.

Me Nyembo Emelyne wunganira Prince Kid yavuze ko bo bizeye ubutabera bw’u Rwanda ko buzakora akazi ka bwo kandi neza ndetse ko ibyo Ubushinjacyaha bushingiraho buvuga ko byirengagijwe mu rukiko rwisumbuye ari uko Urukiko rwasanze nta shingiro bifite.

Urukiko Rukuru rukaba rwasubitse uru rubanza nyuma y’uko habonetse ibimenyetso bishya bizabanza gusesengurwa. Urubanza ruzakomeza tariki ya 28 Mata 2023.

Prince Kid yateye utwatsi ibyo aregwa

Umugore we Iradukunda Elsa yari yaje kumushyigikira mu rubanza

Source : http://isimbi.rw/imyidagaduro/article/aherekejwe-n-umugore-we-prince-kid-yateye-utwatsi-ibirego-by-ubushinjacyaha

Biravugwa ko Komisiyo ishinzwe amarashanwa muri FERWAFA yamaze gutera mpaga Rayon Sports mu mukino wo kwishyura wa 1/8 mu gikombe cy’Amahoro, ni nyuma y’uko yanze gutangaza ikibuga izakiriraho Intare FC ku gihe.

Ni umukino uba warabaye ku wa Gatatu tariki ya 8 Werurwe 2023 ariko kubera ko Stade Muhanga yari kuwakira hari kubera umunsi w’abagore byatumye mbere y’amasaha 24 ibwira FERWAFA ko izakirira mu Bugesera, babikojeje Intare FC zirabyanga kubera ko nta masaha 48 yari arimo nk’uko amategeko abiteganya.

Nta kintu FERWAFA yabwiye Rayon Sports kugeza ku wa Gatatu irimo yitegura kujya ku mukino yandikiwe ibarawu iyibwira ko umukino usubitswe kuko ikibuga kiri bwakire uwo mukino hari bubere imikino 2 (n’uwa APR FC na Ivoire Olympique niho wabereye) kandi bikaba bishoboka bashobora kugera mu minota yinyongera na penaliti kandi kikaba nta matara gifite.

Bamenyesheje iyi kipe ko umukino wimuriwe ku wa Gatanu tariki ya 10 Werurwe 2023 ikaba ifite kugeza saa 12h yamaze gutanga ikibuga kizakira umukino. Rayon Sports yahise isezera mu irushanwa ngo kubera ko riteguranye akajagari.

Bukeye bwa ho ku wa Kane yahise yandika ivuga ko nyuma y’ibiganiro na FERWAFA yemeye kugaruka mu gikombe cy’Amahoro.

Tariki ya 25 Werurwe 2023, FERWAFA yatangaje ko uyu mukino uzaba ku wa Mbere tariki ya 27 Werurwe 2023 mu Bugesera saa 15h00′ z
inabimenyesha Intare FC na Rayon Sports.

Intare zikaba zarateye utwatsi iki cyemezo zafashe nk’agasuzuguro, zandikira FERWAFA ziyimenyesha ko mu gihe cyose zitamenyeshejwe impamvu uyu mukino utabaye itariki yari iteganyijwe, zititeguye kuwukina ahubwo FERWAFA yazaba ari yo ikina na Rayon Sports.

Iti “Twasanze iby’umukino uteganyijwe mu ibaruwa no137/FERWAFA/2023 twe bitatureba, kuko inama zose zijyanye na wo nta n’imwe twatumiwemo, impande zitabiriye zikaba ari zo zizawukina.”

FERWAFA yahise ikuraho uyu mukino ndetse ihita itumira mu nama perezida wa Rayon Sports, Uwayezu Jean Fidele na perezida wa Intare FC, Katibito ariko Katibito ntiyigeze aboneka muri iyi nama yari iteganyijwe ku wa Mbere w’iki cyumweru.

Amakuru avuga ko Komisiyo ishinzwe amarushanwa yaraye iteranye yiga kuri iki kibazo ikivuye imuzi maze isanga Rayon Sports yarasezeye mu irushanwa nubundi yamaze kuvamo kuko amasaha yasabwe yo gutanga ikibuga ntacyo yigeze itanga.

Bivugwa ko iyi Komisiyo yafashe umwanzuro wo kuyisezerera iyiteye mpaga 3-0, umukino ubanza yari yatsinze Intare FC 2-1. Intare FC izahura na Police FC muri 1/4.

Rayon Sports yatewe mpaga

Source : http://isimbi.rw/siporo/article/rayon-sports-yaba-yatewe-mpaga

Muri rusange, ruhago igira uburyo bwihariye ikinwamo ari na byo bituma ari wo mukino ukunzwe ku Isi. Gusa hari bamwe mu bakinnyi uburyo bukakaye bakinamo bituma benshi babita abanyamahane.

Bagiye barangwa no gukandagirana bikomeye, imiserebeko y’ibicamirundi, gutukana, kurwanya abasiruzi na bagenzi babo, kwica nkana amategeko agenga umukino n’ibindi bikorwa byose bifatwa nk’ubushotoranyi.

Dore bamwe mu bakinnyi b’abanyamahane babayeho mu mupira w’amaguru:

10. Zlatan Ibrahimovic

Uyu ni rutahizamu w’Umunya-Suede waranzwe n’ubwiyemezi no kwigirira icyizere bikabije. Zlatan ni umwe mu bakinnyi bakuze mu myaka bagikina nk’ababigize umwuga kuko ku myaka 42 ubu akinira AC Milan. 

Zlatan yahereye muri Barcelona yatozwaga na Guardiola arwana mu myitozo. Uyu kandi yakubitiye abakinnyi benshi mu kibuga barimo Oguchi Onyewu, Bari, Marco Rossi, umuzamu Sean Johnsonwhich n’abandi benshi.

Ubusanzwe Zlatan afite umukandara w’umukara mu mukino wa Taekwondo. Uyu mukinnyi yahawe amakarita 14 atukura mu mateka ye; ibituma aba umwe mu bakinnyi b’abashotoranyi babayeho.

9. Marco Materazzi

Abenshi bibukira uyu mugabo mu gikombe cy’Isi cyo muri 2006, ubwo u Butaliyani bwahuraga n’u Bufaransa maze Materazzi agatuka Zinedine Zidane anamubwira amagambo amuzamurira kamere bityo Zidane akamutera umutwe w’amateka watumye ahita anerekwa ikarita y’umutuku. 

Kubera amakare mu kibuga yari yariswe akazina ka ‘Psycho’ cyangwa ‘Killer’ bivuze umwicanyi aho yaranzwe n’imiserebeko irindwa mubi n’amagambo akakaye; ibyatumye ahabwa amakarita 60 y’imihondo na 25 atukura mu buzima bwe nk’umukinnyi.

8. Gennaro Gattuso

Gattuso wamamaye mu makipe ya Sion na AC Milan usigaye atoza Valencia yo muri Espagne na we, aza kuri uru rutonde. 

Gattuso yakinaga mu kibuga hagati yugarira aho kumubona aseka mu kibuga byari ikizira. Ubuhanga ku mupira ntibwari bwinshi cyane ariko yakinanaga imbaraga ndetse akagira imiserebeko y’ibicamirundi. 

Gattuso wari indwanyi yuzuye yahisemo gukina umukino w’imbaraga dore ko mu mikino 500 yakinnye, Gennaro Gattuso yatsinze ibitego 13.

7. Luis Suarez

Suarez ni umwe muri ba rutahizamu beza b’igihe cye nubwo hari ubwo yakinaga umukino wanduye bikomeye, iyo bigeze ku bushotoranyi buri wese ahita yibuka igihe aruma myugariro w’Umutaliyani Giorgio Chiellini mu mikino y’igikombe cy’Isi cyo muri 2014 cyabereye muri Brazil, bituma ahabwa imikino 9 adakina imikino nkuzamahanga. 

Uyu si uwa mbere yari arumye kuko SUAREZ agikinira Ajax yanarumye uwari Umukinnyi wa PSV Otman Bakkal muri 2010, ageze muri Liverpool aruma Branislav Ivanović wa Chelsea muri 2013; ibyatumye yitwa ‘Cannibal’ bivuze umuntu urya bagenzi be. 

Suarez yagiye anashinjwa irondaruhu mu bihe bitandukanye; ibituma ashyirwa ku rutonde rw’abakinnyi b’abashotoranyi.

6. Mario Balotelli

Ubushotoranyi, imyitwarire ya cyana, ni byo bituma Balotelli aza kuri uru rutonde. Kuva muri 2006 Balotelli atangiye gukina nk’uwabigize umwuga yagiye avugwaho ko adashobotse, umutoza we José Mourinho mu ijambo rimwe yagize ati: “Ntashobotse”. Mario Balotelli yahawe amakarita atukura 13 mu makipe 7 atandukanye. 

5. Diego Costa

Kuri ubu akina muri Wolverhampton Wanderers yo mu Bwongereza. Diego Costa ni we mukinnyi wahaniwe imirwano cyane ndetse abitangira amande menshi cyane. 

Ibi byafashe intera ndende agikinira Atletico Madrid by’umwihariko intambara ye na Sergio Ramos mu mukino w’amateka uhuza amakipe y’i Madrid. Ageze no muri Chelsea yakubise uwitwa David Limbersky ndetse abihanirwa imikino ine. 

Uretse kuba yarigeze gutorwa n’ikinyamakuru cyo mu Bufaransa nk’umukinnyi wanzwe ku Isi, Diego Costa yahawe amakarita 141 y’umuhondo 12 atukura.

4. Roy Keane

Umunyabigwi wa Manchester United Roy Maurice Keane yari umukinnyi w’umunyembaraga nyinshi kandi ubika inzika cyane, uwo Abongereza bavuga ko ari urugero rw’iza rw’ishitani ritukura ‘Red devil’. 

Muri 2001 mu mukino w’ishiraniro wahuje amakipe y’i Manchester, Roy Keane yakandagiye se wa Erling Braut Haaland witwa Alf-Inge Håland amuvuna akaguru ndetse amukura mu kibuga byiteka. 

Roy Keane yiyemereye ko yamuvunnye ku bushake nk’igikorwa cyo kwihorera kandi ko yari yarabimusezeranyije; ibyatumye ahanwa imikino 5 n’amande y’ibihumbi 150 by’amapawundi. 

3. Pepe

Nubwo yacishije make muri iyi myaka kuva muri 2019 yajya muri FC Porto y’iwabo muri Portugal, ariko yakanyujijeho muri Real Madrid ari kumwe n’uwo bari barahuje Sergio Ramos.

Iyo bije ku bushotoranyi Pepe aza mu b’imbere. Ibihe bizwi cyane ni igihe yasunitse Casquero atuma yitura hasi, nk’aho ibyo bidahagije maze amusanga aho yari yaguye ahamuterera imigeri ibiri yanarakaye cyane. 

Pepe kandi yakandagiye ikiganza cya Lionel Messi amushinja kwigusha ku bwende. Uramutse uvuze abo Pepe yateye inkokora bo ntiwababara. 

2. Eric Cantona

Umufaransa Eric Cantona afatwa nk’umwe mu bakinnyi beza b’igihe cye kuko yagize uruhare rukomeye mu gushyira Manchester United ku gasongero k’ubuhangangange muri ruhago.

Cantona yamenyekanye nk’umukinnyi utagira ikinyabupfura, wirata, utihangana kandi urakara vuba. 

Ibihe by’ubushotiranyi bizwi cyane kuri Cantona ni ku tariki ya 25 Mutarama 1995 ubwo yasimbukiraga Richard Shaw wakiniraga Crystal Palace akamutera umugeri agahita asohorwa mu kibuga, mu gihe ari gusohoka umufana wa Crystal Palace witwaga Matthew Simmons amuvugiriza induru maze na we Cantona amutera undi mugeri wiswe uwa ‘Kung Fu’, ibyatumye ahanwa igihe kirekire. 

Ikindi gikorwa cy’ubushotoranyi Cantona yagikoze akinira Nîmes ubwo akubita umusifuzi umupira bitewe n’uko yari afashe icyemezo Cantona atishimiye, ibi byatumye ahanwa ukwezi kose kwaje no kongerwa nyuma.

1. Sergio Ramos

Benshi bamushyira muri ba myugariro beza Isi yagize bijyanye n’ubuhanga n’imbaraga yagaragaje. Sergio Ramos ibikombe hafi ya byose yarabyegukanye yewe n’igikombe cy’Isi muri 2010 na Champions League nyinshi akinira Real Madrid.

Gusa ku rundi ruhande, Ramos ni we benshi bahurizaho ko ari umukinnyi ushotorana kurusha abandi bose kuko ni we mukinnyi ufite amakarita menshi muri La Liga, ikipe y’igihugu ya Espagne, UEFA Champions League ndetse ni na we mukinnyi rukumbi ufite amakarita 5 atukura muri ‘El Clasico’.

Muri rusange Sergio Ramos afite amakarita 232 y’umuhondo na 28 atukura, ibituma ashyirwa ku mwanya wa mbere mu bakinnyi b’abashotoranyi babayeho ku mu mateka nubwo budakuyeho ko ari umwe muri ba myugariro beza b’igihe cye.

Source : https://inyarwanda.com/inkuru/127640/harimo-nuwarumanaga-abakinnyi-10-isi-yagize-bagira-amahane-akabije-mu-mupira-wamaguru-127640.html

Muri iki gihe iterambere ryaje ryemerera abantu kwihinduza uko bashaka bibagishije kwa muganga bakabaha isura n’imiterere bashaka, ibyamamare ni byo byafashe iya mbere mu kugana iri terambere. Umunyamideli Khloe Kardashian ari mu bagore bibagishishe inshuro zirenga 6 kugira ngo agire ubwiza n’imiterere yifuzaga.

Khloe Kardashian ukunze kwibasirwa ku mbuga nkoranyambaga aho benshi bamugaya ko yakabije kwihindura isura ndetse ko nta n’aho ahuriye n’uko yasaga mbere, yasubije abibaza niba adakumbuye isura ye yavukanye mbere y’uko yibagisha ngo ayihindure.

Nyuma yaho yarashyize amashusho kuri konte ya instagram ye, yerekana ari iwe ari gukora siporo, hari uwahise amubaza ati: ”Ese ntukumbuye isura yawe ya kera?” Khloe nawe ntiyatindiganije yahise asubiza ati ”Oya”.

Abatanga ibitekerezo bakomeje banamunenga bavuga ko yakabije kwihindura isura kuburyo no guseka bisigaye bimunarira bitewe n’uko iminwa ye bayongereye ikaba ifite ”Fillers’ nyinshi ziyibuza kwinyeganyeza.

Uyu munyamideli ni umwe mubyamamarekazi bizwiho kuba byaribagishije (Plastic Surgery) bikihinduza imiterere. Khloe Kardashian kandi aherutse no kuvuga ko icyatumye akora ibi ari uko abantu bamugereranyaga n’abavandimwe be barimo Kim Kardashian bakavuga ko ari mubi maze agahitamo kwihinduza kugirango atere nkabo.

Umunyamideli Khloe Kardashian amaze kwihinduza isura inshura zigera kuri 6

Ku mbuga nkoranyambaga bakunze kumugarukaho cyane bitewe no kwihinduza isura kenshi

Yasubije abibaza niba adakumbuye isura ye ya kera

Khloe Kardashian mbere na nyuma yo kwihinduza isura

Source : https://inyarwanda.com/inkuru/127644/khloe-kardashian-yasubije-abibaza-niba-adakumbuye-isura-yavukanye-mbere-yuko-ayihindura-127644.html

Urukiko Rukuru rwaburanishije urubanza ku bujujrire bw'ubushinjacyaha bwarezemo Ishimwe Dieudonné uzwi nka Prince Kid wateguraga amarushanwa y'ubwiza ya Miss Rwanda.

Igihe cyanditse ko mu iburanisha ryo kuri uyu wa Gatanu tariki 31 Werurwe 203, mu Rukiko Rukuru, Ishimwe Dieudonné yunganiwe n'abanyamategeko batatu barimo Nyembo Emelyne wamwunganiye kuva yatangira gukurikiranwa.

Ubushinjacyaha bwatanze impamvu esheshatu z'ubujurire kuri uru rubanza, zirimo ibimenyetso bitahawe agaciro n'imvugo z'uwahohotewe nk'ikimenyetso cy'ingenzi.

Umushinjacyaha Ninahazwa Roselyne yagaragaje ko umucamanza mu rwego rwa mbere atasobanukiwe neza n'imiterere y'icyaha, byanatumye yirengagiza ibimenyetso bihuje kamere bijyanye n'icyaha, aho gushingira ku bimenyetso bishidikanywaho.

Yavuze ko umutangabuhamya yagaragaje ko yahohotewe na Ishimwe Dieudonné amufatiranyije n'ubukene mu gihe cya Covid-19.

Umushinjacyaha yasobanuye ko banzuye ko urubanza rubera mu ruhame mu rwego rwo kugaragaza ko ibirego Prince Kid akurikanyweho atari ibihimbano, na cyane ko urubanza rwe ruvugwa cyane mu itangazamakuru.

Yagaragaje ko ibyaha bijyanye n'ihohoterwa rishingiye ku mibonano mpuzabitsina bikunze kugorana kubonerwa ibimenyetso, kandi ko atari umwihariko w'u Rwanda, ahubwo bwatanze ingero z'ibihugu nk'u Bufaransa, u Bubiligi na Canada.

Ubushinjacyaha kandi bwagaragaje ko bwifashishije inyandiko z'abahanga zigaragaza ko hadakwiye kugarukira ku kuba uwahohotewe yaremeye ko imibonano mpuzabitsina ibaho, ahubwo ko hagomba kugaragazwa koko niba uko kwemera kwari kuzuye.

Prince Kid yatawe muri yombi muri Gicurasi 2022. Yagejejwe mu rukiko bwa mbere tariki ya 11 Gicurasi 2022 aburana ku ifungwa n'ifungurwa ry'agateganyo mu Rukiko rw'Ibanze rwa Kicukiro.

Urubanza rwe rwakomereje mu muhezo ndetse ku wa 16 Gicurasi 2022, urukiko rwemeza ko afungwa iminsi 30 y'agateganyo mu gihe iperereza ku byaha yari akurikiranyweho ryari rigikomeje.

Prince Kid yaje kujurira icyo cyemezo ariko ku 3 Kamena 2022 Urukiko Rwisumbuye rwa Nyarugenge rwemeje ko akomeza gufungwa iminsi 30 y'agateganyo.

Urubanza mu minsi rwatangiye muri Kanama 2022 rukomereza mu muhezo.

The post <strong>Urubanza rwa Prince Kid rwimuriwe mu ruhame</strong> appeared first on FLASH RADIO&TV.

Source : https://flash.rw/2023/03/31/urubanza-rwa-prince-kid-rwimuriwe-mu-ruhame/?utm_source=rss&utm_medium=rss&utm_campaign=urubanza-rwa-prince-kid-rwimuriwe-mu-ruhame

Hari abatuye mu karere ka Nyagatare, bakomeje gusaba leta kubaka ibiro by'aka karere bigezweho, kuko ibiriho biri kudindiza serivisi.

Ikibazo cy'inyubako z'ibiro by'akarere ka Nyagatare zishaje ndetse zitandukanye kigaragazwa nk'igikomeje kudindiza serivisi mu baturage.

Dore nk'ubu umuyobozi w'akarere akorera mu nyubako ye,Visi Meya ushinzwe imibereho myiza y'abaturage nawe akorera mu nyubako ye aho bita kuri PDRCIU ndetse na Visi Meya ushinzwe ubukungu nawe akorera mu nyubako  ye imeze nk'inzu y'abaturage.

Abaturage baravuga ko zibatera urujijo bigatuma serivisi zabo zidindira.

Umwe ati 'Hagiye hari inyubako zitandukanye, ntabwo bakorera mu nyubako imwe, ari meya, ari visi meya cyangwa se ushinzwe ubukungu.'

Undi ati 'Ugasanga uturere twarubatse, dufite akarere keza ariko nagera inaha nyuze hano hirya ku Karere Kacu nabaza amakuru bakavuga ngo akarere ka Nyagatare karakodesha aho gakorera, nkibaza nti ni ukubera iki kabaye aka mbere mu mihanda gusa, none mu bindi tugiye kuba aba nyuma? Aho bidindiriza serivisi akarere ni gato, iyo umuntu agiye aratinda cyane.'

Mugenzi we yagize ati 'Ni ibintu bidafite gahunda, kuko urumva umwe araha undi ari hariya, undi ari iriya. Mu buryo bwa serivisi rero aho meya akorera siho gitifu akorera siho ushinzwe ubukungu akorera, mbese ntabwo bimeze neza. Abantu iyo bakoreye mu nzu imwe kandi igendanye n'igihe nabyo ni uburyo bwiza bwo kugira ngo serivisi ibashe kuba yatangwa mu buryo bworoshye kandi bwiza.'

Abaturage barasaba ko hakubakwa inyubako imwe ihurije hamwe ibiro byabo byose, kugira ngo bihagarike isiragizwa rya buri munsi mu gihe bagiye bagiye gusaba serivisi.

Ikibazo cy'inyubako z'ibiro by'aka karere ka Nyagatare bitajyanye n'igihe, Hashize igihe abaturage bakigaragaza ko kibabangamiye ariko nta kirakorwa.

Perezida w'Inama Njyanama y'Akarere ka Nyagatare Bwana Kabagamba Wilson avuga ko nta gahunda ya vuba yo kubaka ibiro bishya bitewe n'ikibazo cy'ubukungu, icyakora ngo bagiye kuvugurura izi nyubako ziriho.

Ati 'Ibiro bishya ni umushinga munini, navuze y'uko twari twarashyize mu mihigo ariko bitewe n'ubukungu  uko bwifashe yaba ari ku Isi ndetse no mu Rwanda byatewe na Covid, uwo mushinga twarawuhagaritse. Ariko uyu munsi turashaka kugira ngo nibura aho dukorera hisanzure na serivisi dutanga , aho zitangirwa habe ari ahantu hisanzuye. Hari aho usanga aho abakozi bari n'amadosiye yabo ygasanga ni ibintu birundiranye, ibyo turashaka kubitunganya ku buryo hari ibyumba bimwe twakwagura.'

Si ku nshuro ya mbere ikibazo cy'ibiro by'Akarere ka Nyagatare bitatanmye kivuzwe mu itangazamakuru, kuko  ku ngoma z'abayobozi uko bagiye basimburana kuyobora aka karere niko bizezaga kubaka ibiro bishya ariko, kugeza nubu nta kirakorwa.

Ntambara Garleon

The post Nyagatare: Barasaba inyubako y'ibiro by'akarere ijyanye n'igihe, ihari itinza serivisi bahabwa appeared first on FLASH RADIO&TV.

Source : https://flash.rw/2023/03/31/nyagatare-barasaba-inyubako-yibiro-byakarere-ijyanye-nigihe-ihari-itinza-serivisi-bahabwa/?utm_source=rss&utm_medium=rss&utm_campaign=nyagatare-barasaba-inyubako-yibiro-byakarere-ijyanye-nigihe-ihari-itinza-serivisi-bahabwa

Perezida Yoweri Museveni wa Uganda yasohoye itangazo rivuga ko ingabo za Uganda zigiye muri Rutshuru zitagiye 'kurwana na M23 ahubwo kuba ingabo zitabogamye mu gihe abanyecongo barimo gukemura ibibazo byabo bya politike'.

Perezida Museveni yasohoye iri tangazo agamije gusobanura impamvu ingabo z'igihugu cye zohereje izindi ngabo muri Congo nyuma y'izihamaze hafi imyaka ibiri zagiye kurwanya umutwe wa ADF.

Ku wa 29 Werurwe, Uganda yohereje izindi ngabo muri Congo ariko zigiye mu butumwa bw'Umuryango wa Afurika y'Iburasirazuba, zifite inshingano zo kugarura ituze mu bice bya Rutshuru na Goma, aho umutwe wa M23 umaze igihe uhanganiye na Guverinoma.

Museveni ati “Bitandukanye n'ibyo nabonye kuri Al Jazeera, Daily Vision no mu bindi binyamakuru, ntabwo tugiye kurwana cyangwa kurwanya M23. Guverinoma ya Congo n'umutwe wa M23 bemeranyije inzira y'amahoro ikubiyemo ibijyanye no guhagarika imirwano no kuba M23 igomba kuva mu bice yigaruriye ikajya mu bice byemeranyijwe.”

Museveni yavuze ko ibiganiro hagati ya M23 na Guverinoma biri kuba kandi bikwiriye gukomeza, ku buryo ikibazo kirangira mu buryo bwa politiki.

Ati “Inshingano zacu z'ibanze ni ukujya mu bice M23 yashyikirije Ingabo za EAC aho kugira ngo ingabo za Congo zihajye kuko M23 izifata nk'umwanzi.”

Yakomeje avuga ko Ingabo za Uganda zagiye i Bunagana na Rutshuru zitajyanywe no “kurwanya M23 ahubwo nk'ingabo zidafite uruhande zibogamiyeho, kugira ngo Abanye-Congo bakoreshe uwo mwanya mu gukemura ibibazo biri muri politiki yabo”.

Yavuze ko uretse Ingabo za Uganda nizigabwaho igitero, “naho ntabwo turiyo tujyanywe no kurwana”.

Ati “Ibyo kurwana bishobora kuza nyuma mu gihe umwe mu mitwe yitwaje intwato utemewe amahoro kandi ari ikintu twese tubona nk'impamvu yumvikana.”

Mu itangazo, Museveni yagize ati: 'Hagati aho, ibiganiro by'amahoro hagati ya M23 na leta ya Congo birimo kuba kandi bikwiye gukomeza kugira ngo ikibazo gikemurwe mu nzira ya politike'.

Gusa nta biganiro bizwi birimo kuba ku mugaragaro hagati ya M23 na Kinshasa. Leta ya Kinshasa yakomeje gutangaza ko izaganira na M23 ari uko gusa ivuye ahantu hose yafashe.

Source : https://umuryango.rw/amakuru/mu-mahanga/politiki/article/m23-irimo-kuganira-na-leta-perezida-museveni

Ishimwe Dieudonné uzwi nka Prince Kid wateguraga Irushanwa rya Miss Rwanda yamaze kugeza mu cyumba cy'iburanisha mu Rukiko Rukuru, ahagiye kuburanishirizwa urubanza ku bujurire bw'Ubushinjacyaha nyuma y'uko Urukiko Rwisumbuye rwa Nyarugenge rumugize umwere.

Ubushinjacyaha bwatanze impamvu esheshatu z'ubujurire kuri uru rubanza, zirimo ibimenyetso bitahawe agaciro n'imvugo z'uwahohotewe nk'ikimenyetso cy'ingenzi.

Umushinjacyaha Ninahazwa Roselyne yagaragaje ko umucamanza mu rwego rwa mbere atasobanukiwe neza n'imiterere y'icyaha, byanatumye yirengagiza ibimenyetso bihuje kamere bijyanye n'icyaha, aho gushingira ku bimenyetso bishidikanywaho.

Yavuze ko umutangabuhamya yagaragaje ko yahohotewe na Ishimwe Dieudonné amufatiranyije n'ubukene mu gihe cya Covid-19.

Umushinjacyaha yasobanuye ko banzuye ko urubanza rubera mu ruhame mu rwego rwo kugaragaza ko ibirego Prince Kid akurikanyweho atari ibihimbano, na cyane ko urubanza rwe ruvugwa cyane mu itangazamakuru.

Yagaragaje ko ibyaha bijyanye n'ihohoterwa rishingiye ku mibonano mpuzabitsina bikunze kugorana kubonerwa ibimenyetso, kandi ko atari umwihariko w'u Rwanda, ahubwo bwatanze ingero z'ibihugu nk'u Bufaransa, u Bubiligi na Canada.

Ubushinjacyaha kandi bwagaragaje ko bwifashishije inyandiko z'abahanga zigaragaza ko hadakwiye kugarukira ku kuba uwahohotewe yaremeye ko imibonano mpuzabitsina ibaho, ahubwo ko hagomba kugaragazwa koko niba uko kwemera kwari kuzuye.

Umwaka ushize nibwo Urukiko Rwisumbuye rwa Nyarugenge rwari rwagize umwere Ishimwe Dieudonné wamenyekanye nka Prince Kid, ku byaha yarakurikiranweho byo gukoresha undi imibonano mpuzabitsina ku gahato, no guhoza undi ku nkeke bifitanye isano n'imibonano mpuzabitsina.

Icyo gihe Urukiko rwanzuye ko Prince Kid w'imyaka 34 agirwa umwere, kuko nta bimenyetso bikomeye byatanzwe bigaragaza ko ibyaha byakozwe.

Ibyaha bibiri bya mbere Prince Kid yabirezweho n'abakobwa babiri bavuzwe hifashishijwe 'codes' bahawe, icyaha cya gatatu akaba yarakirezweho abakobwa babiri, ariko umwe arabihakana.

Prince Kid yaburanye ahakana ibyaha, ahamya ko nta kimenyetso na kimwe gifatika kigaragaza ko yabikoze. Aha yagaragaje inyandiko za bamwe zasinyiwe imbere ya noteri, zigaragaza ko nta cyaha yakoze.

Ubushinjacyaha bwo bwasabye Urukiko ko izi nyandiko zidakwiye guhabwa agaciro, cyane ko zavuguruzanyaga n'ubuhamya bwatanzwe n'aba bakobwa.

Ibi byatumye Urukiko rutumaho abo batangabuhamya ngo rubiyumvire.
Iki gihe babiri mu bakobwa batatu bari batumweho, bavuze ko inyandiko ari izabo kandi bahamya ko yaba ibyo bavugiye mu iperereza cyangwa mu nyandiko basinyiye kwa noteri ari ukuri.

Uwa gatatu we yavuze ko ukuri kwe ari uko yavugiye imbere y'inzego zakoze iperereza yaba mu Bugenzacyaja ndetse n'Ubushinjacyaha.

Ishimwe Dieudonné yari afungiwe muri Gereza ya Nyarugenge iri i Mageragere kuva ku wa 16 Gicurasi 2022.

Ibyaha akurikiranyweho bivugwa ko yaba yarabikoze ubwo yayoboraga Rwanda Inspiration Back Up, yateguraga irushanwa ry'ubwiza rya Miss Rwanda.
Ibyaha bibiri bya mbere Prince Kid yabigizweho umwere kuko Urukiko rwasanze ibimenyetso byatanzwe bidahagije.

Icyaha cyo guhoza undi ku nkeke, hatanzwe ubutumwa Prince Kid yandikiye umukobwa umushinja, amusaba ko basambana ndetse n'amajwi yafashwe.
Urukiko rwasanze nta hantu na hamwe ubu butumwa bwatanzwe, cyane ko bwakuwe muri telefone y'undi muntu.

Aha, Urukiko rwakomeje gusesengura amajwi yatanzwe nk'ikimenyetso, ruburamo ijambo na rimwe risaba gukora imibonano mpuzabitsina, ahubwo rusangamo ijambo ry'umusore wasabaga urukundo ku mukobwa.

Ibi bigahuzwa n'inyandiko yakozwe n'uwamuregaga yavugaga ko nta hohoterwa yigeze akorerwa kandi ikaba yarasinyiwe kwa noteri.

Ikindi ni uko Urukiko rwasanze amajwi afite inenge kuko ataherekejwe na raporo y'umuhanga wagombaga kuyasobanura, bityo ruhamya ko ari ikiganiro hagati y'umusore n'inkurmi basabana urukundo.

Nyuma yo kumva ababuranyi bombi no gusesengura ibimenyetso byose Urukiko rwanzuye ko Ishimwe Dieudonne uzwi nka Prince Kid agizwe umwere, kuko ibyaha yashinjwaga bidafitiwe ibimenyetso.

Source : https://umuryango.rw/imyidagaduro/article/prince-kid-yasubiye-imbere-y-ubushinjacyaha

Hari impamvu nyinshi zishobora kuba zibitera ariko tugiye kurebera hamwe 5 muri zo:

1.Kwibwira ko uzi byose

Abantu benshi bakunda kwibeshya no kwihenda ko bazi iby'urukundo. Akicara akumva yagezeyo. Urukundo ni urusobe. Kwiga imiterere n'imihindagukirikire yarwo ni uguhozaho. Umubano cyangwa urukundo ni ishuri nk'ayandi yose. Uko wahoze siko uri ubu, uko umukunzi wawe yahoze siko ari kuri ubu, urukundo mwakundanaga siko rukiri. Rushobora kuba rwariyongereye cyangwa rwarakonje. Hari ibihinduka.

Kumukunda cyangwa gushaka ko agukunda nka kera ni ukwibeshya. Ushobora kuba waramukoreye amakosa akagenda agabanya urukundo agukunda, ushobora kuba waragabanyije umuvuduko mu rukundo akaba yarabonye abandi bakurusha kumwitaho, birashoboka ko yahindutse bitewe n'impamvu nyinshi, nawe rero ukicara ngo uri mu rukundo. Menya ko urukundo ukundana n'umukunzi wawe cyangwa umubano w'umugabo n'umugore ari ishuri ritajya rirangira, ukomeza wiga. Iyo uhisemo kwishuka ko ubizi uratsindwa, wakomeza umurava nabwo kandi bikakorohera. Ikuremo indwara yo kwigira nkaho uzi byose mu rukundo.

2.Kutiyizera

Kutiyizera ni umwanzi w'urukundo. Uko waba uri mwiza kose, uko waba ufite igikundiro kingana gute, iyo nta kizere wigirira , byakugora kureshya abasore cyangwa kwegera inkumi ngo uyiterete. Kutiyizera byangiza byinshi , ukiyumva nk'umuntu woroheje , usuzuguritse kandi mu rukundo iyo utangiye kumva wiheje, byose biba byagupfanye.

3.Kwikunda

Umubano n' urukundo rubaho kubera ko hari abantu barenze umwe basangiye cyangwa bagaragarizanya amarangamutima. Kwikunda, ukumva ibintu byose byiza ari wowe bigomba gukorerwa,ukumva ko wowe utashimisha mugenzi wawe, bizatuma uhora mu ikorosi ryo gutandukana n'abo mukundana.

Nutishyira imbere , ukumva ko na mugenzi wawe akeneye kwitabwaho, bizatuma agusubiza amarangamutima umugaragariza, ikivamo ni ibyishimo bya mwembi, urukundo rusagambe.

Wimubera umutwaro ngo wumve ko ari we ugomba gutuma wishima wowe wiyicariye. Ibyishimo wifuza, urukundo ushaka gukundwa, ntibyakunda nta ruhare ubigizemo. Gukurura wishyira ntacyo bimara mu rukundo.

4.Wishyizemo ko ntaho urukundo rwanyu ruzagera

Guhora iteka utekereza ko iherezo urukundo rwanyu ruzagera igihe rukarangira, bituma udatera imbere ntunakore ibyo usabwa. Mugenzi wawe agera aho akarambirwa akishakira abazi icyo urukundo aricyo. Ni byiza ko utabona urukundo urimo nk'urujya mu manga ahubwo ko ruri gutera imbere kandi nawe ugomba kubigiramo uruhare.

5.Amahitamo mabi

Guhitamo neza umuntu mukundana/uwo muzabana akaramata,niyo turufu yo kuryoherwa n'urukundo. Urukundo rukubera rwiza iyo ukundana n'umukunzi mwuzuzanya. Niyo hagize ibibazo bivuka,kubera ko muhuza,murabiganira bikarangira.

Gukundana n'umuntu ukumva, uguhora hafi,utifuza ko hari ikibi cyakugeraho, mwakomanya amahembe aka wa mugani mukabasha kwiyunga,..nibyo bizakubwira ko wahisemo neza. Iyo iteka uhitamo nabi umukunzi, utagendeye ku rukundo ,hari ikindi ukurikiye cyangwa agukurikiyeho ntubimenye, bishobora gutuma uzahorana intimba iteka ryose.

Kudahirwa na buri rukundo rwose winjiyemo bishobora kukwangiriza ubuzima n'intekerezo ukiheba kandi bitari ngombwa. Kosora aho ubona hagomba gukosorwa. Igira ku makosa yahahise yakubayeho. Wikwinjira mu rukundo buhumyi:Hitamo neza, wirinde kwikunda, wiyizere ibindi byose bizizana.

Source : https://umuryango.rw/ubuzima-115/udushya/article/sobanukirwa-impamvu-5-zituma-udakunda-guhirwa-mu-rukundo-70336

Umutoza wa Chelsea, Graham Potter yaje ku mwanya wa kane mu bahembwa neza ku isi, imbere ya Carlo Ancelotti wa Real Madrid.

Umutoza wa The Blues ntabwo amerewe neza nubwo yinjiza menshi kurusha uwamubanjirije Thomas Tuchel,wahawe akazi muri Bayern Munich.

Imibare yatanzwe n'ikinyamakuru L'Equipe cyo mu Bufaransa igaragaza ko abatoza batatu muri bane ba mbere bahembwa umushahara munini,bakora muri Premier League.

Potter ngo ahembwa 11,917.404 y'amapawundi ku mwaka.

Mu mibare,uyu mugabo ahembwa ibihumbi 993.117by'amapawundi buri kwezi, bingana na 229.180 y'amapawundi buri cyumweru.

Potter yagowe n'ubuzima bubi mu ikipe ya Chelsea kuko yatsinzwe cyane bigatuma ubu bari ku mwanya wa cumi muri shampiyona.

Mu mikino 30 yatoje iyi kipe, yatsinze 12, inganya umunani,atsindwa icumi.

Uretse umutoza wa Atletico Madrid, Diego Simeone, Pep Guardiola wa Manchester City na Jurgen Klopp wa Liverpool nibo bari hejuru ya Potter.

Simeone niwe uza ku isonga, ahembwa akayabo ka miliyoni 29.8 z'amapawundi ku mwaka.

Guardiola aza ku mwanya wa kabiri na miliyoni 19.7 z'amapawundi naho Klopp n'uwa gatatu, yinjiza miliyoni 15.7 z'amapawundi.

Urutonde rw'abahembwa akayabo

Source : https://umuryango.rw/imyidagaduro/imikino/article/umutoza-wa-chelsea-yaje-imbere-ya-ancelotti-mu-bahembwa-akayabo-urutonde