Category: Uncategorized

Umushoferi wa Taxi itwara abagenzi ya Uber ufite umutima mwiza, yahaye impyiko umuntu atazi, yari atwaye amukuye mu bitaro yarabuze uwamutabarira ubuzima.

Tim Letts w'imyaka 33 yakoreraga kompanyi imwe ifite imodoka zitwara abagenzi yo mu ntara ya Cape May, muri Leta ya New Jersey muri Amerika muri 2021, ubwo yasabwaga kujya gutwara Bill Sumiel mu kigo gitanga dialysis ifasha impyiko mu bitaro bya Christiana.

Bwana Sumiel, ufite imyaka 73, yari amaze imyaka itatu ashaka cyane uwamuha impyiko nshya isimbura ize zarwaye,bitewe no kurwara diyabete mu myaka icumi ishize.

Mu nzira ajya iwe mu rugo i Salem, yabwiye uyu mugabo wahoze mu ngabo, Bwana Letts ikibazo cye – ariko ntiyatekerezaga ko uyu mushoferi wa Uber yamuha impyiko baramutse bahuje ibipimo.

Bwana Sumiel yabwiye ABC6 News ati: “Twamaze kimwe cya kabiri cy'urugendo nerekeza mu rugo twabaye inshuti nyuma yo kuvuga inzira yose, Tim arambwira ati” Ndatekereza ko Imana igomba kuba ariyo yagushyize mu modoka yanjye.

Yarambwiye ati : 'Nufata izina ryanjye na nimero yanjye, nzaguha impyiko.” Naratitiye cyane ku buryo ntashoboraga no kwandika izina rye na nimero ye. '

Kugira ngo umuntu ahe mugenzi we impyiko,habanza gufatwa ibipimo kugira ngo barebe ko bahuje ubwoko bw'amaraso n'ibindi bitandukanye.Ibipimo bya muganga nibyo bibyemeza.

Uyu mugabo yakomeje agira ati “Twishimye ko twahuje, kandi kubagwa mu bitaro bya Christiana byagenze neza.”

Ubu aba bombi babaye inshuti ubuzima bwabo bwose aho Bwana Sumiel avuga ko urugendo rwe muri iyi modoka ya Uber mu myaka ibiri ishize rwabaye igitangaza ndetse rwamuhaye ubuzima mu buryo bw'igitangaza.

Source : https://umuryango.rw/ubuzima-115/udushya/article/umugabo-wari-ugiye-gupfa-kubera-kubura-impyiko-yatabawe-by-igitangaza-n

Ibi yabigarutseho mu iburanisha ryo kuri uyu wa Gatanu, Prince Kid uregwa ibyaha byo gukoresha imibonano mpuzabitsina ku gahato no guhoza ku nkeke bifitanye isano n'imibonano mpuzabitsina, yavuze ko yizeye ubutabera buboneye, cyane ko n'Umucamanza mu Rukiko Rwisumbuye yatanze ubutabera akamugira umwere.

Yavuze ko umutangabuhamya uvugwa nka VKF yikoreye inyandiko kwa noteri yemeza ko atahohotewe, ndetse no mu rukiko hari abatanze ubuhamya koko ko atahohotewe.

Yagaragaje ko yagiranaga amasezerano y'imikoranire n'abitabiraga amarushanwa ya Miss Rwanda, bityo ko ntaho yari guhurira nabo ngo abakoresheho ububasha nk'uwateguraga irushanwa.

Yemeye ko amajwi yacicikanye ku mbuga nkoranyambaga asaba icyiswe “happiness” ari aye, ariko avuga ko atazi uwayafashe, ndetse ko hari ibyakuwemo, kuko icyo kiganiro kitari icyerekeye imibonano mpuzabitsina.

Yagaragaje ko aba bakobwa bitabiriye iri rushanwa bahura n'imbogamizi zitandukanye, nk'abaritegura bakabibafashamo.

Yatanze urugero rwa Miss Muheto Divine wigeze kubwirwa n'umwe mu bagize akanama nkemurampaka ngo “wa mukobwa we uri mwiza”, ko yagiriwe inama zimufasha kumenya uko yitwara ku gitutu byamuteye.

Kuri VMF, Prince Kid yagaragaje ko uhereye mu rubanza rw'ifungwa n'ifungurwa ry'agateganyo, inkiko zagiye zifata icyemezo ko nta mpamvu zatuma akurikiranwaho kumuhoza ku nkeke, cyane ko ikimenyetso cyatanzwe ari inyandikomvugo gusa.

Yagaragaje ko izo nyandikomvugo zivuguruzanya kandi ugasanga arizo ubushinjacyaha bushingiraho. Yashimangiye ko ibikorwa byose ubushinjacyaha buvuga ko bigize ibyaha, bitigeze bibaho.

Ati “Mbihakaniye imbere y'urukiko, ibyo bikorwa ntibyabayeho.”
Prince Kid yagaragaje ko ubutumwa bwanditswe bumubaza niba yaryamana n'umuntu bakorana bikavamo, butari mu kiganiro yagiranagaho n'uwo mukobwa wamureze.
Yagaragaje ko byari akagambane, kuko ubwo butumwa bwasanzwe gusa muri telefoni y'uwatanze ubuhamya ku bushinjacyaha, TGF.

Ati “Ni icyo bakoreshaga kugira ngo bantere icyasha. Ikigaragara cyo sibo bayafashe. None se mu bunararibonye bw'Ubugenzacyaha bwacu, ayo majwi yagiye hanze ate ko nari ntaranaburana?”
Me Nyembo Emelyne na we yunze mu ry'uwo yunganira ati “twe twizeye ubutabera”, asaba urukiko kuzita ku bimenyetso byafashwe mu buryo bwemewe.
Yagaragaje ko umukobwa washinje Prince Kid yamufatiranye n'ubukene muri Covid-19, atari byo, kuko muri icyo gihe Leta yatangaga ubufasha ku bantu b'amikoro make.

Me Kayijuka yagaragaje ko abatangabuhamya barimo VNF, TTF, bahurije ku gisubizo kimwe ubwo babazwaga icyakorwa ngo irushanwa rigende neza, bagahuriza ku gisubiza ko ryakamburwa usanzwe aritegura, rigahabwa abagore.
Zimwe mu ngingo z'ubujurire.

Ubushinjacyaha bwatanze ingingo esheshatu z'ubujurire zigaragaza ko umucamanza wo ku rwego rwa mbere yitiranyije ibintu bigize icyaha, cyo gukoresha undi imibonano mpuzabitsina ku gahato.

Yanavuze ko hari ibimenyetso byirengagijwe, nk'uko imvugo z'abatangabuhamya batandukanye barimo abahawe nimero za TBF, TGK, TFK, na VDF, zaragaje ko Prince Kid yagiraga imyitwarire iganisha ku guhohotera abakobwa, irimo kuba yarabajyanaga iwe.

VDF kandi yagaraje ko hari aho Prince Kid yageze agahagarika imishahara ya bamwe mu bitabiriye iri rushanwa mu gisa no kubatera ubwoba, bitewe n'ububasha yari abafiteho.

Ku cyaha cyo gukoresha undi imibonano mpuzabitsina n'icyaha cy'ishimishamubiri rishingiye ku gitsina, Ubushinjacyaha bwagaragaje ko hari amajwi yafashwe umucamanza akayanenga ku kuba nta raporo iyaherekeza, kandi nta gishobora kugaragaza ko akomoka ku wo yitirirwa, bityo ubushinjacyaha bukabona ko ari intege nke z'urukiko.

Hari kandi ubutumwa bwagiye buhererekanwa hagati ya VBF na Ishimwe Dieudonné, n'ibindi bitandukanye. Ubushinjacyaha bwanenze uburyo urubanza mu rukiko rwa mbere rwaciwe, bugaragaza ko habayeho kubogamira ku uregwa.

Me Nyembo yagagaragaje ko nubwo ubushinjacyaha buvuga ko hari ibimenyetso byateshejwe agaciro, byaturutse ku kuba nta shingiro bifite.
Ubushinjacyaha kandi buvuga ko hagiye habaho gushingira ku bimenyetso bidahuje kamere n'icyaha.

Bwagaragaje ko Urukiko rwagize ihame ibyo Ishmwe Dieudonné avuga ko atemera icyaha, bukabifata nko kuba rwarasinziriye aho gukora inshingano zarwo.

Umushinjacyaha yagaragaje ko Urukiko Rwisumbuye rwa Nyarugenge rwagombaga gushingira ku bimenyetso bigize kamere y'icyaha, aho gushingira ku mvugo z'abatangabuhamya zavuguruzanyaga.

Nyuma y'impaka z'urudaca iburanisha ryimuriwe ku wa 28 Mata 2023 kubera umwanya muto ababuranaga bagize, ndetse no kuba hari ibindi bimenyetso byabonetse bikeneye gusesengurwa. Urubanza ruzasubukurwa saa tatu za mu gitondo.

Tariki ya 12 Ukuboza 2022 nibwo Urukiko Rwisumbuye rwa Nyarugenge rwagize umwere Ishimwe Dieudonné, ahita anafungurwa nyuma y'amezi atandatu muri Gereza ya Nyarugenge.

Source : https://umuryango.rw/imyidagaduro/article/bwambere-prince-kid-yahamije-ko-amajwi-yasakajwe-aganiriza-miss-muheto-ari-aye

Umutesi Solange uherutse kubura ibisobanuro imbere y'Umukuru w'Igihugu yakuwe ku mwanya w'Umuyobozi Nshingwabikorwa wa Akarere ka Kicukiro asimbuzwa Antoine Mutsinzi.

Ibi byasohotse mu Itangazo ryavuye mu biro bya Minisitiri w'Intebe kuri uyu wa Gatanu tariki ya 31 Werurwe 2023.

Imbere ya Perezida Kagame, umunyamabanga nshingwabikorwa w'akarere ka Kicukiro Umutesi Solange yariye indimi nyuma yo kubazwa impamvu batakosoye umwanda muri ako karere beretswe na Perezida Paul Kagame inshuro zirenze imwe.

Ibi byabaye ku wa 28 werurwe 2023 ubwo yasozaga itorero ry'abayobozi b'utugari bahawe izina rya ba Rushingwangerero, aho yagaye aba bayobozi kutubahiriza ibyo yabasabye gukosora kuri iyo nyubako.

Perezida Kagame yavuze ko ubwo yari kumwe na Minisitiri w'Intebe n'abandi ba Minisitiri yabonye inzu ku muhanda imaze igihe yambitswe ibintu bisa n'iby'abasazi bambara maze asaba abayobozi kubikuraho, nabo baragenda baterera agati mu ryinyo.

Avuga ko yasabye abayobozi barimo Mayor Rubingisa Pudence na DEA wa Kicukiro kureba nyiri iyo nyubako akayuzuza ndetse byaba ngombwa agakuraho ibyo bintu byari biyitwikiriye by'umwanda.

Ati 'Uribuka ubwo nazaga muri Kicukiro ndikumwe na Minisitiri w'intebe n'abandi ba Minisitiri tukabona inzu ahantu ku muhanda iraho imaze igihe kinini bambitse ibintu bisa n'ibyo abantu b'abasazi bambara nkagusaba ko mwareba nyirayo akayuzuza ndetse byaba ngombwa agakuraho ibyo bintu byari biyitwikiriye by'umwanda ariko kugeza n'ubu bikaba bitarakorwa'.

Perezida Kagame yatangajwe no kongera gusubira muri aka karere nyuma y'amezi ane agasanga nta kintu na kimwe kigeze gikorwa kuri iyo nzu ndetse n'abayobozi bataragize icyo babikoraho.

Perezida Kagame yasabye ko bamusobanurira icyabaye kugira ngo iyo nzu imare ayo mezi yose ntacyakozweho maze umunyamabanga nshingwabikorwa w'akarere Umutesi Solange asaba imbabazi avuga ko habaye uburangare.

Umutesi Solange yisobanura kuri iki kibazo yagize ati 'Nyakubahwa Perezida wa Repuburika ndasaba imbabazi habayeho uburangare sinabikurikirana kuko twegereye nyiri iyo nzu dusanga icyangombwa cye cyo kubaka cyararangiye turabyihutisha abona ikindi ubu birimo gukorwa'.

Umutesi Solange yatakambye akomeza gusaba imbabazi Perezida Kagame maze amubaza icyo izo mbabazi zivuze kuri we amusubiza ko agiye gukosora amakosa agaragara mu nshingano ze.

Source : https://umuryango.rw/amakuru/mu-rwanda/politiki/article/umuyobozi-wa-kicukiro-yakuwe-ku-kazi-nyuma-yo-kunanirwa-gusubiza-perezida

Umugabo ufite abagore batandatu yavuze ko afite gahunda yi kubyarana nabo bose binyuze mu guhuza intanga [ surrogacy] kugira ngo hatagira ugire ishyari.

Bwana Arthur O Urso w'imyaka 37,ukomoka São Paulo muri Brazil, akunze guca ibintu mu binyamakuru kubera umwihariko we wo gushaka abagore benshi.

Uyu mugabo ukurikirwa n'abantu 198,000 yari afite abagore icyenda ariko yaje guhura n'uruva gusenya ubwo batatu muri bo bahitagamo kumusiga.

Ubu afite batandatu barimo Luana Kazaki w'imyaka 27, Emelly Souza w'imyaka 21, Valquíria Santos wa 24, Olinda Maria wa 51, Damiana wa 23,na Amanda Albuquerque wa 28.

Icyakora, Arthur yiyemeje kwagura umuryango aho buri mugore we wese agiye kubyarana nawe mwana kugira ngo hatagira n'umwe urakara cyangwa akagirira ishyari mugenzi we.

Ati “Sinshaka ko hagira umugore wanjye urakara yibaza uwo nzahitamo mbere ngo tubyarane,niyo mpamvu twahisemo guhuza intanga.

Arthur ufite umukobwa w'imyaka 10 yabyaranye nuwo bahoze bakundana yavuze ko atigeze ahura n'ibi bintu.

Ati “sinigeze nyura muri ibi bintu,n'ubwa mbere.Turahangayitse ariko twishimiye izi nzozi zo kugira umwana.”

Uyu ngo kubera ko afite umukobwa,arifuza kubyara umuhungu.

Nubwo ngo ashaka kubyarana na buri mugore wese ngo ariko azakoresha intanga z'umugore we wa mbere Luana bazibatere bose.

Iyi gahunda yo guhuza intanga bakazitera abagore be bose ngo izatwara akayabo k'amadolari 40,798.

Source : https://umuryango.rw/ubuzima-115/udushya/article/yiyemeje-kubyarana-n-abagore-be-batandatu-kubera-impamvu-ikomeye

Amakuru ari kuvugwa aremeza ko FERWAFA igiye gutera mpaga ikipe ya Rayon Sports mu gikombe cy'Amahoro, hakomeze Intare FC yanze ko bakina kubera ko yari yikuye mu irushanwa mbere.

Komisiyo y'amarushanwa muri Ferwafa niyo yateye mpaga Rayon Sports, nyuma yo kwikura mu Gikombe cy'Amahoro ndetse ngo umwanzuro wamaze gufatwa, amakipe yombi ategereje amabaruwa ayamenyesha.

Umunyamabanga wa Rayon Sports, Namenye Patrick, mu kiganiro na Radio Rwanda, yavuze ko biramutse bikurikije amategeko, ntacyo umwanzuro waba utwaye.

Yagize ati “Kugeza ubu twe twiteguye gukina umukino, kubera ko nta butumwa bwo kwitegura umukino turabona buturutse mu Ishyirahamwe. Simpamya ko bihari, keretse niba hari itegeko bishingiyeho, batubwira, ariko kugeza uyu munsi nibwira ko nta bihari.”

Ku rundi ruhande,umuvugizi wa Rayon Sports,Nkurunziza Jean Paul yanditse kuri Twitter ati “Gahunda y'umukino w'Igikombe cy'Amahoro tuzayimenyeshwa na Ferwafa.”

Intare FC izakina na Police FC muri 1/4.

Ubuyobozi bw' Intare FC bwatangaje ko butazigera bukina na Rayon Sports kuko yikuye mu irushanwa ahubwo bazakina na Police FC.

Source : https://umuryango.rw/imyidagaduro/imikino/article/rayon-sports-yatewe-mpaga-mu-gikombe-cy-amahoro-hakomeza-intare-fc

Umutwe wa M23 watangiye kuva mu Mujyi wa Bunagana, ugomba gusigara mu maboko y'Ingabo za Uganda zimaze iminsi itatu zigeze muri aka gace.

Ku wa Kane nibwo ingabo za Uganda zinjiriye ku mupaka wa Bunagana zijya muri RDC.

Umuvugizi wa M23, Willy Ngoma, yatangaje ko kuri uyu wa Gatanu aribwo bashyikiriza ingabo za EAC by'umwihariko iza Uganda, uyu mujyi wa Bunagana.

Bivuze ko M23 ikomeje gushyira mu bikorwa ibiteganywa n'imyanzuro y'abakuru b'ibihugu bo mu karere, bategetse ko uyu mutwe uhagarika imirwano ukanava mu bice wari warigaruriye.

Bunagana ni ko gace ka mbere Ingabo za M23 zigaruriye mu mwaka ushize, ubwo imirwano yakazaga umurego.

M23 igomba kuva mu bindi bice birimo Rutshuru, Masisi na Nyiragongo.

Ubuyobozi bw'uyu mutwe bwagiye guha ikaze izi ngabo, aho abarwanyi bawo bari bayobowe n'Umuvugizi wa M23, Maj Willy Ngoma.

Amafoto yagiye hanze, agaragaza abarwanyi ba M23 bajya kwakira izi ngabo ndetse banamaze kuzakira, bahagararanye baseka.

Perezida Yoweri Museveni wa Uganda yasohoye itangazo rivuga ko ingabo za Uganda zigiye muri Rutshuru zitagiye 'kurwana na M23 ahubwo kuba ingabo zitabogamye mu gihe abanyecongo barimo gukemura ibibazo byabo bya politike'.

Perezida Museveni yasohoye iri tangazo agamije gusobanura impamvu ingabo z'igihugu cye zohereje izindi ngabo muri Congo nyuma y'izihamaze hafi imyaka ibiri zagiye kurwanya umutwe wa ADF.

Mu itangazo, Museveni yagize ati: 'Hagati aho, ibiganiro by'amahoro hagati ya M23 na leta ya Congo birimo kuba kandi bikwiye gukomeza kugira ngo ikibazo gikemurwe mu nzira ya politike'.

Kuri uyu wa 30 Werurwe 2023, nicyo gihe ntarengwa M23 yari yahawe cngo ibe yavuye mu birindiro byayo byose yafashe ariko ntabyakozwe ahubwo intambara irakomeje.

Source : https://umuryango.rw/amakuru/mu-mahanga/umutekano/article/m23-yavuye-bunagana-iri-muduce-yari-yarafashe

Antoine Mutsinzi yagizwe Umuyobozi Nshingwabikorwa w'Akarere ka Kicukiro asimbuye Umutesi Solange kuri uyu wa Gatanu tariki 31 Werurwe 2023 nk'uko itangazo ryaturutse mu biro bya Minisitiri w'Intebe ribivuga.

Iri tangazo kandi rigaragaza ko Ann Monique Huss, yagizwe Umuyobozi Nshingwabikorwa wungirije w'aka Karere.

Akarere ka Kicukiro gahinduriwe abayobozi nyuma y'iminsi micye Perezida Kagame, anenze Umutesi Solange wayoboraga aka Karere hamwe n'Umuyobozi w'Umujyi wa Kigali Pudence Rubingisa, kudakosora umwanda yabonye wari utwikirije inzu mu karere ka Kicukiro.

Ati 'Uribuka ubwo nazaga muri Kicukiro ndi kumwe na Minisitiri w'intebe n'abandi ba Minisitiri tukabona inzu ahantu ku muhanda iraho imaze igihe kinini, bambitse ibintu bisa n'ibyo abantu b'abasazi bambara, nkagusaba ko mwareba nyirayo akayuzuza ndetse byaba ngombwa agakuraho ibyo bintu byari biyitwikiriye by'umwanda, ariko kugeza n'ubu bikaba bitarakorwa'.

Umutesi Solange yabuze ibisobanuro avuga ko barangaye kuko basanze icyemezo cyo kubaka cye cyari cyararangiye, acyongerera igihe ariko ntiyasubukura kubaka.

Umuyobozi w'Umujyi wa Kigali, Pudence Rubingisa, yavuze ko basuye uyu mugabo Perezida Kagame abasubijeyo, yemera ko bagize intege nke mu gukurikirana.

The post Umutesi wayoboraga Akarere ka Kicukiro yirukanwe appeared first on FLASH RADIO&TV.

Source : https://flash.rw/2023/03/31/umutesi-wayoboraga-akarere-ka-kicukiro-yirukanwe/?utm_source=rss&utm_medium=rss&utm_campaign=umutesi-wayoboraga-akarere-ka-kicukiro-yirukanwe

Ikigega RNIT Iterambere Fund kivuga ko ugereranyije n'umwaka wa 2021, ubwizigame mu kigega bwiyongereyeho miliyari 10 Frw, ndetse urwunguko rw'abizigamiye ruva kuri 11.22% rugera kuri 11.42%.

Imibare yatangarijwe mu nama rusange y'abashoramari kuri uyu wa Gatanu tariki 31 Werurwe 2023, yerekana ko abasabye gusubizwa ubwizigame bwabo mu 2022 ari 2591, bavuye ku 2025 mu 2021 na 1560 mu 2020.

Ni mu gihe abagera ku 31.473 bizigamira banyuze mu bimina naho 12.372 bakizigamira ku giti cyabo.

Mu mezi umunani abizigamira biyongereyeho abasaga ibihumbi bitanu.

Ikinyaakuru igihe cyandika ko umuyobozi Mukuru w'iki kigega, Jonathan S. Gatera, yavuze ko umwaka ushize habonetse umubare munini w'abasabye gusubizwa ubwizigame bwabo, aho amafaranga yasubijwe beneyo agera kuri miliyari 4Frw.

Ati 'Hari umushoramari umwe wakuyemo miliyari 2.6 Frw ku mpamvu zumvikana ariko yatubwiye ko azagaruka azanye menshi kurushaho, kuko inyungu nta handi yayikura atari mu kigega.'

Inyungu yabonetse mu 2022 igera kuri miliyari 2.3 Frw ivuye kuri miliyari hafi 1.9 Frw yabonetse mu 2021.

Iyi nyungu ikomeje kuzamuka kuko mu 2016 yari miliyoni 146 Frw, mu 2020 iba miliyari 1.4 Frw.

Gatera yakomeje avuga ko mu rwego rwo kurushaho kunoza imitangire ya serivisi, hari gukorwa ivugururwa ry'ikoranabuhanga ubu rigeze ku musozo.

Umuyobozi w'inama y'abahagarariye abizigamiye mu kigega RNIT Iterambere Fund, Dr Nzabonikuza Joseph, yashimye ko urwunguko rw'ikigega rwiyongereye ugereranyije n'umwaka wa 2021, ariko ngo byari kurushaho iyo umubare w'abasabye gusubizwa ubwizigame bwabo utiyongera, ndetse n'amafaranga basubijwe ngo yiyongere.

Ati 'Nk'abahagarariye abizigamiye, biradushimisha iyo uwizigamiye ashoboye kwitabaza ikigega kikamugoboka aho kugira ngo afate imyenda.'

Yasobanuye ko kuba abasubijwe amafaranga bariyongereye n'ayo basubijwe akiyongera, ari igisubizo ndetse n'impamvu isobanutse y'uko ikigega RNIT Iterambere Fund cyari gikenewe.

Ati 'Ni ishoramari ridufasha kubona inyungu tudashobora kubona ahandi. Kubona inyungu ya 11.42% nta musoro, nta handi wabibona. Ni ahantu wakwizigamira ukaharaga umwana wawe, ukahatangamo ingwate, hakakugoboka igihe cyose.'

RNIT Iterambere Fund ni ikigega cya leta cyatangiye mu 2016.

Umuntu wese wifuza kwizigamira by'igihe kirekire yakigana ahereye ku mafaranga y'u Rwanda 2,000 Frw, akaba yabikora igihe cyose ayaboneye, nyuma y'umwaka akaba ashobora kujya kuyabikuza hiyongereyeho inyungu.

Muri 2017 ubwo icyo kigega cyari kimaze umwaka gishinzwe, ayo cyungukiraga uwabikije yari 9.77%, muri 2018 aba 10.72%, muri 2019 inyungu iba 10.71%, hanyuma muri 2020 inyungu irazamuka ingana na 11.02%, mu 2021 yari 11.22% naho mu 2022 igera kuri 11.42%.

Icyakora iyo umuntu wabikije mu kigega Iterambere Fund ataramara imyaka itatu abikijemo, ayo agiye kubikuza yose bamuca 1% ryayo. Ni ikigega umuntu wese yinjiramo akagisohokamo uko ashatse, yaba abikuza yose cyangwa akuraho make.

Ni ikigega kidahomba kandi cyizewe, kuko amafaranga yose abanyamigabane babitsamo ari yo agurwa impapuro mpeshwamwenda za Leta, agashorwa mu kubaka ibikorwaremezo bitandukanye.

Ubwizigame fatizo bwavuye kuri miliyari 14 Frw bugera kuri miliyari 22Frw.

Inyungu ku mari yashowe yazamutseho 25% agera kuri miliyari 2.6Frw, umutungo w'imari mu mpapuro mpeshamwenda wazamutseho 17% uva kuri miliyari 17.7Frw ugera kuri miliyari 21.5Frw.

Kugeza ubu ikigega RNIT Iterambere Fund, kirimo umutungo wa Miliyari zirenga 28.4Frw zivuye kuri miliyari 18Frw mu 2021, umutungo w'ikigega ukaba warazamutseho 26%.

The post <strong>Ubwizigame bw'ikigega RNIT byiyongereho miliyari 10 Frw</strong> appeared first on FLASH RADIO&TV.

Source : https://flash.rw/2023/03/31/ubwizigame-bwikigega-rnit-byiyongereho-miliyari-10-frw/?utm_source=rss&utm_medium=rss&utm_campaign=ubwizigame-bwikigega-rnit-byiyongereho-miliyari-10-frw

Miss Elsa Iradukunda wekukanye ikamba rya nyambinga w'u Rwanda 2017 , yaherekeje umukunzi we Ishimwe Dieudonné uzwi nka Prince Kid mu rukiko , ahagiye kuburanishirizwa urubanza ku bujurire bw'Ubushinjacyaha nyuma y'uko Urukiko Rwisumbuye rwa Nyarugenge rumugize umwere.

Mu rukiko, Prince Kid yagaragaje ko yizeye ubutabera buboneye mu Rukiko Rukuru cyane ko n'Umucamanza mu Rukiko Rwisumbuye yari yatanze ubutabera.

Yavuze ko umutangabuhamya wiswe VKF yikoreye inyandiko kwa noteri yemeza ko atahohotewe, ndetse no mu rukiko yatanze ubuhamya koko ko atahohotewe.

Tariki ya 12 Ukuboza 2022 nibwo Urukiko Rwisumbuye rwa Nyarugenge rwamugize umwere ku byaha yari akurikiranweho byo gukoresha undi imibonano mpuzabitsina ku gahato, gusaba cyangwa gukora ishimishamubiri rishingiye ku gitsina no guhoza undi ku nkeke bifitanye isano n'imibonano mpuzabitsina.

Icyo gihe rwategese ko ahita afungurwa, nyuma y'amezi atandatu ari muri Gereza ya Nyarugenge.

Mu iburanisha ryo kuri uyu wa Gatanu mu Rukiko Rukuru, Ishimwe Dieudonné yunganiwe n'abanyamategeko batatu barimo Nyembo Emelyne wamwunganiye kuva yatangira gukurikiranwa.

Ubushinjacyaha bwatanze impamvu esheshatu z'ubujurire kuri uru rubanza, zirimo ibimenyetso bitahawe agaciro n'imvugo z'uwahohotewe nk'ikimenyetso cy'ingenzi.

Umushinjacyaha Ninahazwa Roselyne yagaragaje ko umucamanza mu rwego rwa mbere atasobanukiwe neza n'imiterere y'icyaha, byanatumye yirengagiza ibimenyetso bihuje kamere bijyanye n'icyaha, aho gushingira ku bimenyetso bishidikanywaho.

Yavuze ko umutangabuhamya yagaragaje ko yahohotewe na Ishimwe Dieudonné amufatiranyije n'ubukene mu gihe cya Covid-19.

Umushinjacyaha yasobanuye ko banzuye ko urubanza rubera mu ruhame mu rwego rwo kugaragaza ko ibirego Prince Kid akurikanyweho atari ibihimbano, na cyane ko urubanza rwe ruvugwa cyane mu itangazamakuru.

Yagaragaje ko ibyaha bijyanye n'ihohoterwa rishingiye ku mibonano mpuzabitsina bikunze kugorana kubonerwa ibimenyetso, kandi ko atari umwihariko w'u Rwanda, ahubwo bwatanze ingero z'ibihugu nk'u Bufaransa, u Bubiligi na Canada.

Ubushinjacyaha kandi bwagaragaje ko bwifashishije inyandiko z'abahanga zigaragaza ko hadakwiye kugarukira ku kuba uwahohotewe yaremeye ko imibonano mpuzabitsina ibaho, ahubwo ko hagomba kugaragazwa koko niba uko kwemera kwari kuzuye.

Miss Elsa uri mu myiteguro y'ubukwe yasezeranye mu murenge na Prince Kid, mu muhango wabereye mu Murenge wa Rusororo mu karere ka Gasabo ku wa 2 Werurwe 2023.

Urukundo rw'aba bombi rwavuzwe cyane mu ifungwa rya Prince Kid, ubwo Miss Iradukunda Elsa yagaragazaga inyandiko zafashwe nk'impimbano zishinjura Prince Kid ku byaha yari akurikiranyweho ndetse na we akaza kubifungirwa igihe gito akaza kurekurwa nyuma.

Source : https://umuryango.rw/imyidagaduro/article/miss-elsa-yaherekeje-umukunzi-we-mu-rukiko-amafoto

Ubwo Ingabo za Uganda zinjiraga muri Repubulika ya Demokarasi ya Congo mu butumwa bwo gushaka amahoro, zahawe ikaze n'ubuyobozi bw'umutwe wa M23.

Izi ngabo zinjiye muri Repubulika ya Demokarasi ya Congo muri iki cyumweru, aho zigiye mu butumwa bw'Umuryango wa Afurika y'Iburasirazuba mu itsinda rizwi nka EACRF.

Izi ngabo zinjiriye ku mupaka uhuza Uganda na RDC, uherereye i Bunagana mu gace kamaze igihe kinini kagenzurwa na M23.

Ubuyobozi bw'uyu mutwe bwagiye guha ikaze izi ngabo, aho abarwanyi bawo bari bayobowe n'Umuvugizi wa M23, Maj Willy Ngoma.

Amafoto yagiye hanze, agaragaza abarwanyi ba M23 bajya kwakira izi ngabo ndetse banamaze kuzakira, bahagararanye baseka.

Perezida Yoweri Museveni wa Uganda yasohoye itangazo rivuga ko ingabo za Uganda zigiye muri Rutshuru zitagiye 'kurwana na M23 ahubwo kuba ingabo zitabogamye mu gihe abanyecongo barimo gukemura ibibazo byabo bya politike'.

Perezida Museveni yasohoye iri tangazo agamije gusobanura impamvu ingabo z'igihugu cye zohereje izindi ngabo muri Congo nyuma y'izihamaze hafi imyaka ibiri zagiye kurwanya umutwe wa ADF.

Mu itangazo, Museveni yagize ati: 'Hagati aho, ibiganiro by'amahoro hagati ya M23 na leta ya Congo birimo kuba kandi bikwiye gukomeza kugira ngo ikibazo gikemurwe mu nzira ya politike'.

Kuri uyu wa 30 Werurwe 2023, nicyo gihe ntarengwa M23 yari yahawe cngo ibe yavuye mu birindiro byayo byose yafashe ariko ntabyakozwe ahubwo intambara irakomeje.

Source : https://umuryango.rw/amakuru/mu-mahanga/umutekano/article/m23-yagiye-kwakira-ingabo-za-uganda-zije-kuyisimbura-mu-bice-yari-yarafashe