Webrwanda Backend

Category: Uncategorized

  • Rwanda na DRC bemeranijwe uburyo 5 buzifashishwa mu gucyura impunzi (…) – Umuryango.rw #rwanda #RwOT

    Nk'uko biboneka mu nyandiko basinye yatangajwe na Minisitiri Lutundula, we na Minisitiri Kayisire bahujwe na Grandi, mu byo bumvikanye harimo;

    Kubahiriza amasezerano yo muri 2010,Gutangira ibiganiro bigamije gufasha gucyura impunzi, Kwemera uburenganzira bwo gutaha ku bushake mu mutekano, Kwita ku mutekano w'abatahuka no guhanahana amakuru ku hantu bahungukiye.

    Ikindi ibihugu byombi byemeranijweho ni uguhurira i Nairobi mu kwezi gutaha mu nama tekinike yo gushyira mu bikorwa iyi myanzuro.

    Impunzi ziri mu bihugu byombi zifatwa na bamwe nk'irindi pfundo ry'amakimbirane hagati y'ibi bihugu, ikibazo cyazo cyongeye guhuza abategetsi ba DR Congo n'u Rwanda bagifataho imyanzuro.

    Ku butumire bwa Filippo Grandi, umukuru w'ishami rya ONU rishinzwe impunzi (UNHCR), Minisitiri w'ububanyi n'amahanga wa DRC Christophe Lutundula na Minisitiri Marie Solange Kayisire ufite impunzi mu nshingano mu Rwanda bahuriye i Genève mu Busuwisi kuwa mbere.

    Filippo Grandi yatangaje ko yatumiye aba bategetsi ngo 'baganire ku gucyura impunzi ku bushake' ziri kuri buri ruhande.

    Imibare ya UNHCR yo muri Werurwe (3) 2023 ivuga ko mu Rwanda hari impunzi 75,041 z'Abanyecongo naho muri DR Congo hari impunzi 208,297 z'Abanyarwanda.

    UNHCR ivuga ko impunzi nshya 6,608 z'Abanyecongo zageze mu Rwanda hagati y'Ugushyingo(11) 2022 na tariki 04 Gicurasi(5) 2023.

    U Rwanda, DR Congo na UNHCR, mu 2010 byasinye amasezerano yo gufatanya gucyura impunzi ku bushake yashyiriweho umukono i Goma n'i Kigali muri uwo mwaka.

    Ayo yari akubiyemo; ubushake bw'ibihugu byombi mu gushyiraho ibituma impunzi zitaha ku bushake no kuzakira nta mbogamizi.

    Yarimo kandi ko 'nta ugomba gucyurwa ku ngufu ajyanwa aho umutekano n'ubuzima bwe bishobora kujya mu kaga'.

    Source : https://umuryango.rw/amakuru/mu-mahanga/politiki/article/rwanda-na-drc-bemeranijwe-uburyo-5-buzifashishwa-mu-gucyura-impunzi-z

  • Wa mu pasiteri w'igishije ubuyobe bugahitana amagana hafatiriwe konti ze (…) – Umuryango.rw #rwanda #RwOT

    Nyuma yo kwigisha inyigisho z'ubuyobe abarega 100 bakahasiga ubuzima , Pasiteri Ezekiel Odero n'Itorero rye New Life Prayer Centre and Church urukiko Rukuru muri Mombasa rwemeje ko rukomeza gufatira konti ze za banki zigera kuri 15.

    Ibi byabereye ahitwa Shakahola muri Kilifi. Umucamanza Olga Sewe, kuri uyu wa Mbere yemeje ko icyemezo cyo gufatira izi konti kigumaho, atera utwatsi ibyasabwe na Pasiteri Ezekiel byose keretse kwemerera abayoboke be kujya mu rusengero ruri ahitwa Mavueni bagasenga.

    Umucamanza kandi yateye utwatsi ubusabe bwe bwo kongera gufungurirwa Televiziyo ya World Evangelism TV.

    Mu nyandiko ze, Pasiteri Ezekiel ukurikiranyweho ibyaha bitandukanye birimo na Jenoside, yanenze icyo yise itotezwa n'iyicarubozo yakorewe na Leta.

    Source : https://umuryango.rw/amakuru/mu-mahanga/ubuzima/article/wa-mu-pasiteri-w-igishije-ubuyobe-bugahitana-amagana-hafatiriwe-konti-ze-zigera

  • Uko washyirwa hasi kose, ntuzemere kuguma hasi- Perezida Kagame – #rwanda #RwOT

    Yabitangaje mu kiganiro yahaye abanyeshuri ba Harvard Business School, Ishami ry'ubucuruzi rya Kaminuza ya Harvard yo muri Leta Zunze Ubumwe za Amerika.

    Amashusho yashyizwe hanze binyuze kuri Twitter y'Ibiro by'Umukuru w'Igihugu, agaragaza Perezida Kagame aganira n'abo banyeshuri muri Village Urugwiro i Kigali kuri uyu wa Mbere tariki 15 Gicurasi 2023.

    Perezida Kagame yabwiye abo banyeshuri ko icyatumye u Rwanda rwongera kwiyubaka rukaba rugeze aho ruri uyu munsi nyuma ya Jenoside yakorewe Abatutsi, ari uko rwanze gukomeza kuba insina ngufi.

    Yagize ati 'Igihugu twasanze cyasenyutse burundu. Abantu barazaga bagatangara bati 'Ese ubu aba bantu bazongera kubyutsa umutwe?' Na bamwe muri twe ni ko bibazaga.'

    Yavuze ko no mu buzima busanzwe ariko bigenda, kuko hari aho bigera umuntu akisanga yasubiye hasi, gusa agaragaza ko nta mpamvu yo gucika intege uko byagenda kose.

    Ati 'Isomo rya mbere ni uko uko washyirwa hasi kose n'uwo ari we wese cyangwa icyo aricyo cyose, ntuzemere kuguma hasi, shaka uburyo wongera guhagarara.'

    Perezida Kagame yavuze ko kutemera guheranwa n'ibibazo ari ko kwihesha agaciro.

    Yavuze ko iyo umaze kwiyemeza kudaheranwa n'ibibazo cyangwa ngo ube insina ngufi, hakurikiraho gukora kugira ngo uve aho wari uri.

    Ati 'Icya kabiri ni ukwibaza ngo nabigeraho nte? Hari ibintu bikwiriye kuba bihari kugira ngo bigufashe kugera kuri izo ntego. Hari ubwo bwisanzure bugufashe kujya ku ishuri, kugira uburenganzira ku buzima, kubona ibyo kurya, uburenganzira bwo gutekereza ugatanga umusaruro.'

    By'umwihariko ku Rwanda, Perezida Kagame yavuze ko icyatumye hari byinshi bigerwaho nyuma ya Jenoside yakorewe Abatutsi, ari ugukorana n'abaturage bakagira uruhare mu bibakorerwa.

    Perezida Kagame ni umwe mu bayobozi bakunze gutanga imbwirwaruhame ku banyeshuri ba Harvard Business School, agaragaza urugendo rwo kongera kwiyubaka k'u Rwanda nyuma ya Jenoside yakorewe Abatutsi.

    Perezida Kagame yavuze ko icya mbere kugira ngo umuntu arenge ibibazo yahuye nabyo, ari ukwanga guheranwa nabyo

    Perezida Kagame yavuze ko Jenoside yakorewe Abatutsi imaze guhagarikwa, hari abibazaga niba u Rwanda ruzongera kubaho

    Abanyeshuri ba Harvard Business School bahawe umwanya babaza ibibazo

    Aba banyeshuri bari bafite ibibazo byinshi bigaruka ku iterambere ry’u Rwanda

    Perezida Kagame yasobanuriye aba banyeshuri ko icya mbere ari ukwihesha agaciro kugira ngo ugere kubyo wifuza byose

    Perezida Kagame akunze gutanga ibiganiro ku banyeshuri biga muri Harvard Business School

    Amafoto: Village Urugwiro

    Source : http://igihe.com/amakuru/u-rwanda/article/uko-washyirwa-hasi-kose-ntuzemere-kuguma-hasi-perezida-kagame

  • Ntibikwiye ko Ambasaderi wacu imodoka yamupfiraho agatega 'lift' – Abadepite batabarije Abadiplomate b'u Rwanda – #rwanda #RwOT

    Byagarutsweho mu biganiro iyi minisiteri yagiranye n'Abadepite ba Komisiyo y'Ingengo y'Imari n'Umutungo by'Igihugu ku ngengo y'imari izakoreshwa mu 2023/24.

    Muri rusange Minaffet izakoresha miliyari 23,2 Frw mu 2023/24 zivuye kuri miliyari 22,9 Frw yari yakoresheje mu 2022/23. Ni mu gihe za Ambasade zo zahawe ingengo y'imari ya miliyari 44,9 Frw.

    Minisitiri w'Ububanyi n'Amahanga, Dr Biruta Vincent, yagaragarije Abadepite n'izindi nzego by'umwihariko izishinzwe ingengo y'imari, ko mu bibazo bafite kandi bikeneye ingengo y'imari mu buryo bwihutirwa harimo imodoka za ba Ambasaderi zishaje.

    Za Ambasade zifite imodoka zishaje ku buryo zikeneye gusimbuzwa harimo iy'u Rwanda i Dar Es Salaam, Addis Ababa, Moscow, Cairo, Paris n'i Londres.

    Minisitiri Dr Biruta ati ''Twari twabaze dusanga nibura tubonye miliyoni 500 Frw. Ni ahantu baba bafite imodoka usanga zishaje zisigaye zitwara amafaranga aruta n'ayo wajya wishyura ku mwaka uramutse wikopesheje imodoka.'

    'Bikaba ari ibintu biba bigaragara ko ari amafaranga apfa ubusa kandi bikaba bishobora kugutera ipfunwe rimwe na rimwe. Ibaze nka Ambasaderi imodoka imupfiriyeho mu muhanda yagiye kuduhagararira […] ntabwo byaba ari byiza.'
    Ni ibintu Abadepite barimo Visi Perezida wa Komisiyo Ishinzwe kugenzura imikoreshereze y'umutungo wa Leta, Uwineza Beline, bavuze ko bikwiye guhabwa umwihariko.

    Ati ''Twaba duhisemo ikitari cyiza duhisemo gukomezanya imodoka zimeze gutyo […] Usibye ko bitatanga isura nziza ku gihugu kuba umuntu yakoresha imodoka ishaje, ariko no guhora usanisha imodoka bigaragara ko ari uguhendesha leta.''

    Depite Rwaka Pierre Claver yagize ati ''Ntabwo bikwiye ko Ambasaderi wacu yagera imbere imodoka ikamupfiraho bikaba ngombwa ko atega tagisi, niba ari 'lift' ntiyapfa kuyibona.'

    Umuyobozi Mukuru ushinzwe Ingengo y'Imari muri Minecofin, Rehema Namutebe, yavuze ko nabo babona izi modoka za ba Ambasaderi zihutirwa ari nayo mpamvu bizaganirwaho bigashakirwa umuti mu maguru mashya.

    Ati 'Ni ingenzi kubona abakozi bacu bari mu bihugu hirya no hino ariko bafite ibibazo nk'ibyo. Twarabiganiriye, turimo kubisuzuma kugira ngo turebe ni iki twakora.''

    Minaffet igaragaza ko izi modoka zibonetse zafasha mu koroshya akazi ka ba Ambasaderi ndetse bikaba byatanga isura nziza ku Rwanda mu bijyanye na Diplomasi.

    Minisitiri Dr Biruta Vincent yagejeje ku Badepite ibikubiye mu ngengo y’imari y’umwaka utaha ya Minisiteri ayobora

    Visi Perezida wa PAC, Uwineza Beline, yasabye ko gusimbuza imodoka zishaje za ba Ambasaderi bihabwa umwihariko

    Depite Rwaka Pierre Claver yasabye ko ba Ambasaderi bahabwa imodoka nzima

    Source : http://igihe.com/amakuru/u-rwanda/article/ntibikwiye-ko-ambasaderi-wacu-imodoka-yamupfiraho-agatega-lift-abadepite

  • Ni ryari imitungo y'abashakanye yandikwa ku bana kandi ababyeyi bakiriho? – #rwanda #RwOT

    Imitungo itimukanwa cyane cyane ubutaka, iri mu iza imbere mu guteza ibibazo hagati y'abashakanye, ku buryo bashobora kuyigiraho ukumvikana gucye cyangwa andi makenga.

    Mu butumwa aherutse gutangira mu kiganiro Umujyi wa Kigali wagiranye n'abanyamakuru, Umuyozozi w'Ishami Rishinzwe Imicungire y'Ubutaka mu Karere ka Nyarugenge, Cesar Dusabeyezu, yavuze ko mu mpamvu zitera ababyeyi gufata umwanzuro wo kwandikisha ubutaka n'indi mitungo ku bana babo, harimo kutumvikana ku gucunga imitungo ndetse no kutizerana.

    Ati ''Ugasanga rimwe na rimwe hari igihe baba batizeranye bakavuga bati ejo umwe mu babyeyi yapfa cyangwa bombi bakitaba Imana''.

    Akomeza agira ati ''Baba banga wenda ko umwe azasigara asesagura ya mitungo, cyangwa se nanone kuba babona mu bwumvikane bwo gucunga ya mitungo bafite impungenge ko umwe ashobora kuyisesagura ayigurisha cyangwa ayitangaho ingwate amafaranga abonye akayasesagura''.

    Dusabeyezu yavuze ko hari n'izindi mpamvu zituma hari ababyeyi bahitamo kwandikisha imitungo yabo ku bana babo bataruzuza imyaka y'ubukure, harimo no kuba babyumvikanaho bagamije guteganyiriza abo bana.

    Hari n'igihe mu masezerano y'abashakanye haba harimo ko basezeranye ivangamutungo muhahano, nyuma bamara kubyarana umwe mu babyeyi akaba yafata umwanzuro ko umutungo yari afite batarashakana yawandika ku bana babyaranye.

    Mu zindi mpamvu harimo igihe umwe mu bashakanye yitabye Imana, uwasigaye yakongera gushaka undi mugabo cyangwa umugore, akabanza kwandikisha imitungo ye ku bana yasigiwe n'uwo bari barashakanye mbere, kuko uwo baba bagiye kubana nta burenganzira aba ayifiteho mu gihe batarashakana mu buryo bwemewe n'amategeko.

    Ibi biterwa n'uko uwo mubyeyi aba afite amacyenga ko uwo bagiye gushakana ku nshuro ya kabiri bashobora kutazumvikana ku micungire y'iyo mitungo agahitamo kuyandika ku bana yasigiwe na nyakwigendera, mu kubungabunga uburenganzira bw'abo bana.

    Hari n'ababyeyi bahitamo kurera abana batabyaye ariko bakabiyandikishaho bakitwa ababo mu buryo bwemewe n'amategeko, nyuma bagahitamo no kwandikisha imitungo yabo kuri abo bana.

    Bikorwa bite?

    Urugero nk'iyo ababyeyi biyemeje kwandika ubutaka ku bana babo, bagirana amasezerano yanditse akanasinywaho na noteri, iyo nyandiko bakayijyana ahatangirwa serivisi z'ubutaka kugira ngo bahinduze icyangombwa cy'ubwo butaka bwandikwe ku mwana.

    Iyo uwo mwana ataruzuza imyaka y'ubukure, ababyeyi be bumvikana umwe muri bo umuhagararira ku buryo ku cyangombwa kigaragaza ko uwo mwana ari we wanditsweho ubwo butaka hanandikwaho imwe mu myirongoro y'uwo mubyeyi wamuhagarariye.

    Ibyo bikorwa hashingiwe ku itegeko rigenga abantu n'umuryango, aho mu ngingo yaryo ya 117 ivuga ku guhagararira k'umwana, igaragaza ko usibye aho ashobora kugira icyo akora ubwe, umwana utarageza ku myaka y'ubukure ahagararirwa n'umufiteho ububasha bwa kibyeyi mu birebana no gukoresha uburenganzira bwe.

    Iyo ubwo butaka cyangwa indi mitungo imaze kwandikwa ku mwana, nta n'umwe mu babyeyi be uba ufite uburenganzira bwo kuyigurisha cyangwa ngo ayitangeho ingwate muri banki n'ahandi.

    Iyo bibaye ngombwa ko abo babyeyi bakenera kugurisha iyo mitungo, hongera kuba ubwumvikane hagati yabo hagakorwa n'inyandiko ikongera gusinywaho na noteri.

    Iyo umwe mu bashakanye apfuye usigaye agashaka kugurisha cyangwa gutanga ya mitungo ho ingwate, haterana inama y'umuryango irimo abo ku ruhande rw'umugabo ndetse n'urw'umugore, hakemerezwamo ko iyo mitungo yagurishwa cyangwa ikagwatirizwa, ndetse hagakorwa n'inyandiko ikongera gusinywaho na Noteri.

    Ibi na none biri mu bigaragazwa na rya tegeko rigenga abantu n'umuryango, aho ingingo yaryo ya 138 ivuga ku bikorwa byo gutanga no kugurisha umutungo w'umwana, isobanura ko umwishingizi adashobora gukora ibikorwa bigamije gutanga, kugurisha no gutangaho ingwate umutungo w'umwana n'ibindi byose bishobora kuwugabanya atabiherewe uburenganzira n'Inama y'Ubwishingire.

    Ubutaka bukunda gutera ukutumvikana hagati y'abashakanye

    Source : http://igihe.com/amakuru/u-rwanda/article/ni-ryari-imitungo-y-abashakanye-yandikwa-ku-bana-kandi-ababyeyi-bakiriho

  • Menya icyatumye kaminuza y'u Rwanda itanze buruse nke ku banyeshuri uyu (…) – Umuryango.rw #rwanda #RwOT

    Mu gihe hashize iminsi 3 Kaminuza y'u Rwanda isohoye urutonde rw'abemerewe kuyigamo mu mwaka w'amashuri utaha, bamwe mu banyeshuri baravuga ko batunguwe no kudahabwa imyanya kandi bari bafite amanota menshi.

    Ku cyicaro gikuru cya Kaminuza y'u Rwanda, abakozi bayo barimo kwakira abanyeshuri baturutse mu bice bitandukanye by'igihugu batabashije kubona imyanya yo mu yagenewe abazatangira mu kwezi gutaha.

    Ubuyobozi bw'iyi kaminuza buvuga ko habayeho gusaranganya imyanya mike yabashije kuboneka hagamijwe kwirinda gufata umubare munini w'abanyeshuri utajyanye n'ubushobozi bw'abakozi n'ubw'ibikoresho bihari.

    Buvuga ko bwiteguye kwakira abanyeshuri bose bafite ibyo bashaka gusobanuza, ariko ngo abanyeshuri barasabwa kwihanganira umubyigano wagaragaye ku rubuga bareberaho amabaruwa yabo watumye hari bamwe batarayabona kandi baremerewe imyanya muri iyi kaminuza.

    Mu kwezi gutaha kwa 6 Kaminuza y'u Rwanda izakira abanyeshuri bashya ibihumbi 8, baziga mu mashami yayo ari hirya no hino.

    Source : https://umuryango.rw/amakuru/mu-rwanda/uburezi/article/menya-icyatumye-kaminuza-y-u-rwanda-itanze-buruse-nke-ku-banyeshuri-uyu-mwaka

  • ‘Uwububa abonwa n’uwuhagaze koko’ ibyo igisambo cyakoze kiziko batakibona cyaje gutamazwa na Camera (Videwo) – YEGOB #rwanda #RwOT

    'Uwububa abonwa n'uwuhagaze koko' ibyo igisambo cyakoze kiziko batakibona cyaje gutamazwa na Camera (Videwo)

    Muri aya mashusho agaragaza umusore uba ufite umufuka bikekwa ko ari wo agenda yibiramo.

    Yageze ku modoka arangije arakebaguzwa ahita ashikuzaho Icyo bita 'rotorovizeri' ikora akazi ko kureba ibiri inyuma.

    Uwo musore amaze kugishikuzaho kuko bari bamubonye bahise bamufata ndetse aryozwa ubujura bwe.

    Reba video hasi.. 👇🏽

    Iciza co gutunga camera de surveillance !
    Bamufashe pic.twitter.com/jqpYxq9kUG

    — Umuhinga yigenga (@yigenga) May 15, 2023

    Source : https://yegob.rw/uwububa-abonwa-nuwuhagaze-koko-ibyo-igisambo-cyakoze-kiziko-batakibona-cyaje-gutamazwa-na-camera-videwo/

  • Wari uhenze kurusha inzu! Umuneke wari ufite agaciro ka Miliyoni 120, waje kuribwa ku buntu kubera impamvu buri wese agira – YEGOB #rwanda #RwOT

    Wari uhenze kurusha inzu! Umuneke wari ufite agaciro ka Miliyoni 120, waje kuribwa ku buntu kubera impamvu buri wese agira.

    Muri Korean havuzwe inkuru y'umuneke wari ufite agaciro ka Miliyoni 120 ubwo wari uri mu imurikagurisha gusa waje kuribwa ku buntu.

    Uwo muneke wiswe Comedian muri iryo murikagurisha ryakorwaga n'uwo munyabugeni aho ari umuneke uba umanitse ku gikuta, ushatse akawugura iyo utaguzwe bivugwa ko uhindurwa nyuma ya buri minsi 3 ufite agaciro k'amadorali ibihumbi 120 [ni ukuvuga arenga miliyoni 120 Frw].

    Noh Huyn Soo, umunyeshuri muri kaminuza, yaje kurya uyu muneke nyuma yo kuva mu rugo iwe adafashe ku mafunguro.

    Akimara kurya uwo muneke yahise ahasiga igishishwa cyawo arigendera.

    Source : https://yegob.rw/wari-uhenze-kurusha-inzu-umuneke-wari-ufite-agaciro-ka-miliyoni-120-waje-kuribwa-ku-buntu-kubera-impamvu-buri-wese-agira/

  • Icyo gihe YAGO yigaga mu wa gatatu w’amashuri yisumbuye(S3), dore ifoto ya YAGO akiri umunyeshuri(ifoto) – YEGOB #rwanda #RwOT

    Icyo gihe YAGO yigaga mu wa gatatu w'amashuri yisumbuye(S3), dore ifoto ya YAGO akiri umunyeshuri(ifoto)

    Yago umaze kuba ikimenyabose yaba mu mwuga witangazamakuru ndetse no mu buhanzi hari ifoto yaharagayemo yo mu bihe bye bya mbere.

    Muri iyi foto bivugwa ko yafashwe mu mwaka wa 2011 icyo gihe YAGO yari mu wa gatatu w'amashuri yisumbuye S3 ndetse yari arimo guhana impano n'umukobwa Witwa Viviane bivugwa ko bari bahuriye mu gikorwa cyo guhana impano benshi bazi nka 'Kakawete' igikorwa gikunze kugaragara ku bigo by'amashuri.

    Ifoto ya YAGO yo muri 2011 yiga mu wa gatatu w'amashuri yisumbuye S3

    Source : https://yegob.rw/icyo-gihe-yago-yigaga-mu-wa-gatatu-wamashuri-yisumbuyes3-dore-ifoto-ya-yago-akiri-umunyeshuriifoto/

  • Amakuru mashya kuri wa mubyeyi wasanzwe mu nzu arebana n’umwana we w’umusore, bishwe n’uwo bari bahaye icumbi – YEGOB #rwanda #RwOT

    Amakuru mashya kuri wa mubyeyi wasanzwe mu nzu arebana n'umwana we w'umusore, bishwe n'uwo bari bahaye icumbi.

    Mu minsi yashize nibwo twabagejejeho inkuru y'inshamugongo ko Nyirabavakure Vestine w'imyaka 61 n'umuhungu we Tuyihorane Jean w'imyaka 28 basanzwe mu nzu bapfuye.

    Icyo gihe byacyetswe ko bishwe n'umusore wo mu muryango wari wabasuye.

    Ibyo byabereye mu Mudugudu wa Samudahe, Akagari ka Cyamukuza mu Murenge wa Ndora ho mu Karere ka Gisagara.

    Kuri ubu amakuru ahari ni uko uyu musore bicyekwa ko yaba yarahitanye abo muri uyu mu ryango, yamaze gutabwa muri yombi n'Urwego rw'Igihugu rw'Ubugenzacyaha RIB.

    RIB ibinyujije ku rukuta rwa Twitter, yagize iti: 'RIB yafashe Habimana Jean Felix wishe Nyirabavakure Vestine na Tuyihorane Jean bo mu Karere ka Gisagara Umurenge wa Ndora tariki 13/05/2023. Hafashwe kandi na Hagenimana Candida bikekwa ko ariwe wamutumye kubica kubera amakimbirane baribafitanye ashingiye ku mitungo.'

    ' Abafashwe bafungiye kuri Sitasiyo ya RIB ya Kicukiro niya Kacyiru, mu gihe dosiye yabo irimo gukorwa ngo ishyikirizwe Ubushinjacyaha.'

    ' RIB iributsa umuntu wese ko kuvutsa umuntu ubuzima ari icyaha cy'ubugome gihanwa bikomeye n'amategeko ahana mu Rwanda kandi ko nta wemerewe kwihanira ko mu gihe havutse amakimbirane hagati y'abantu, basabwa kwegera inzego z'ubutabera kugira ngo zibakiranure.'

    Source : https://yegob.rw/amakuru-mashya-kuri-wa-mubyeyi-wasanzwe-mu-nzu-arebana-numwana-we-wumusore-bishwe-nuwo-bari-bahaye-icumbi/