Category: Uncategorized

Ikintu cyose ukoze ugashyiramo imbaraga, ubwenge kandi ntucike intege, akenshi kiraza kandi n’iyo bitabashije gukunda ni ho umuhanga w'umunyarwanda yahereye avuga ko utirenganya. Ati 'Uburiye umubyizi mu kwe ntako aba atagize.'

Kuri ubu ntawavuga ko ibintu byasubiye irudubi ariko na none binyuranye cyane n’uko byari bimeze mbere, by'umwihariko mu mezi ya mbere y'umwaka wa 2022 kuko aya mbere ya 2023 yerekana icyuho cy'umuziki nyarwanda.

Abibuka neza umwaka wa 2022 utangira, hari umurindi ukomeye w'ibihangano birimo Amashu ya Chriss Eazy, Puculi ya Okkama, Away ya Juno Kizigenza na Ariel Wayz nayo yari ikiri hejuru kandi inafite ibirungo by’izindi aba bahanzi bashyiraga hanze.

Bruce Melodie yari afite ibihangano yakoranye n'abahanzi nka Harmonize bakoranye Totally Crazy. Indirimbo za Meddy zirimo My Vow na Queen of Sheba zari zihagaze neza, The Ben na we afitanye indirimbo na Diamond yitwa 'Why'.

Ibintu byari biri hejuru! Ibyo byose byatumaga bigoranye kuba abahanzi b'amahanga babona aho bamenera yaba mu bitangazamakuru no ku mbuga zicururizwaho umuziki by'umwihariko urwa Youtube rukoreshwa na benshi mu Rwanda nubwo atari rwo rwinjiza menshi.

Nk’uko twabivuze haruguru, ubu ibintu byarahindutse abahanzi b'abanyamahanga bafashe ikibuga cyane ko abahanzi benshi b'abanyarwanda muri iyi minsi basa n’abacecetse.

Kuba ibihangano nyarwanda bisa nk’aho ari bicye muri aya mezi, bishobora kuza mu mpamvu za mbere zatumye amaso yerecyezwa hanze, kimwe nuko abakunzi b’umuziki bashobora kuba bari guhabwa ibidahuje n'ubushake bwabo byose birashoboka.

Hame n’ibyo byose, uyu munsi twifuje kubagezaho uko isoko rihagaze ry’abareba n’abumva ibihangano banyuze ku rubuga rwa Youtube baherereye ku butaka bw'u Rwanda aho uko iminsi igenda yicuma abanyamahanga ari bo bakomeje kwigarurira isoko.

Mu mezi 12 ashize uhereye none ni abahe bahanzi bakurikirwanwe cyane, ni izihe ndirimbo zarebwe zikanumvwa cyane kuri Youtube n’abahereye mu Rwanda [Abanyarwanda]?

Uko bimeze abahanzi bakurikiwe cyane n'umusaruro w'inshuro basuwe:

Papi Clever [Miliyoni 9.32], Bruce Melodie [Miliyoni 9.04], Diamond Platnumz [Miliyoni 7.93], Meddy [Miliyoni 6.79], Chriss Eazy [Miliyoni 6.62], Juno Kizigenza [Miliyoni 6.34], Ambassador of Christ [Miliyoni 5.85], Yvan Buravan [Miliyoni 5.63], Kizz Daniel [Miliyoni 5.38] na Ayra Starr [Miliyoni 4.29].

Nk’uko bigaragara, guhera none gusubira mu matariki ya 17 Gicurasi 2022, abahanzi bari imbere mu 10 bakurikirwa cyane kuri Youtube mu Rwanda ni batatu ari bo Diamond Platnumz, Kizz Daniel na Ayra Starr.

Indirimbo zari zakurikiwe cyane 

Zirimo Inana ya Chriss Eazzy [Miliyoni4.07], Kashe ya Element [Miliyoni 3.6] Buga ya Kizz Daniel na Tekno [Miliyoni 2.16M], Basi Sori ya Passy Kizito na Chriss Eazy [Milyoni 2.09], Rush ya Ayra Starr [Milyoni 2.04];

Hashtag ya Christopher [Milyoni 1.97], Cough ya Kizz Daniel na Empire [Milyoni 1.85], Calm Down ya Rema na Selena Gomez [Milyoni 1.81], Akinyuma ya Bruce Melodie [Milyoni 1.77] na Girfriend ya Ruger [Milyoni 1.71].

Umubare w'indirimbo zakurikiranwaga cyane, abahanzi bo mu Rwanda barimo ni batanu. Umubare w'abanyamahanga usa n’aho utari hejuru ariko na none si ko byari mu mezi nkaya ya 2022.

Mu minsi 90 ishize mu Rwanda abantu barushijeho gukurikira abahanzi b'abanyamahanga

Abahanzi bakurikiwe cyane

Papi Clever [Milyoni 2.72], Diamond Platnumz [Milyoni 2.15], Chriss Eazy [Milyoni 1.89], Ambassador of Christ [Milyoni 1.85], Bruce Melodie [Milyoni 1.83], Dany Nanone [Milyoni 1.56], Meddy [Milyoni 1.55], Ayra Starr [Milyoni 1.3], Israel Mbonyi [Milyoni 1.13] na Kizz Daniel [Milyoni 1.08].

Indirimbo zumviswe zikanarebwa cyane

Edeni ya Chrissy Eazy [Miliyoni 1.48], Nasara ya Danny Nanone [Miliyoni 1.24], Who Is Your Guy ya Spyro na Tiwa Savage [Ibihumbi 814], Yatapita ya Diamond [Ibihumbi 624], Selebura ya Bruce Melodie [Ibihumbi 621];

Rush ya Ayra Star [Ibihumbi 576], Cough ya Kizz Daniel na Empire [Ibihumbi 563], People ya Libianca [Ibihumbi 487], Soweto ya Victoe na Tempoe [Ibihumbi426], Basi Sori ya Passy Kizito na Chrissy Eazy [Ibihumbi 417]

Mu kwezi kumwe gushize uko byifashe

Abahanzi bakurikiwe cyane

Papi Clever [Ibihumbi 734], Diamond Platnumz [Ibihumbi 640], Ambassador of Christ [Ibihumbi 503], Meddy [Ibihumbi 500], Bruce Melodie [Ibihumbi 565], Harmonize [Ibihumbi 421], Tiwa Savage [Ibihumbi 377], Israel Mbonyi [Ibihumbi 363], Ayra Starr [Ibihumbi 358] na Dany Nanone [Ibihumbi 352].

Indirimbo zarebwe zikanumvwa cyane

Nasara ya Dany Nanone [319], Who Is Your Guy ya Spyro na Tiwa Savage [315], Edeni ya Chriss Eazy [235], Yatapita ya Diamond Platnumz [174], Rush ya Ayra Starr [160], People ya Libianca [154], Soweto ya Victony na Tempoe [144], Cough ya Kizz Daniel na Empire [139], Single Again ya Harmonize [129] na Selebura ya Bruce Melodie [127]. Ibibare iri muri […] ni ibihumbi.

Nk’uko bigaragara muri rusange, bitewe nuko hari umubare w'ibihangano runaka byakozwe n'abahanzi b'abanyarwanda bitandukanye, abakurikirwa cyane bakomeza kuba nk’aho ari bamwe. Papi Clever unafite umwihariko wo kugira ibihangano byinshi kuri Youtube ni we uza ku isonga.

Uyu mugabo ufatanya n'umugore we bagenda bongera umunsi ku wundi bimwe byo guhozaho, hakaza Chriss Eazy umaze igihe kitari kinini yamamaye ariko wamaze kwigwizaho igikundiro kidasanzwe.

Bruce Melodie na Meddy nabo bakomeza kuza imbere kuko ushobora gusanga mu bituma baza imbere harimo n’indirimbo zabo zitari iza vuba ahubwo n’izo mu yindi myaka.

Ariko wareba mu ndirimbo zikunzwe cyane ugasanga umubare ugabanyuka kugera ubwo mu kwezi gushize abahanzi bafite indirimbo zumviswe zikanarebwa n'abaherereye mu Rwanda ari 3 mu icumi.

Ni mu gihe mu mezi atatu ashize, indirimbo 4 z'abanyarwanda ni zo ziza imbere naho mu mwaka ushize [2022/2023], indirimbo eshanu nizo ziri mu icumi. Ni ibintu urebye neza ubona ko bigaragaza ko muri iyi minsi abanyamahanga bakomeje kugira igikundiro cyo hejuru mu Rwanda.

Nubwo twarebeye kuri Youtube ariko no ku zindi mbuga zicururizwaho umuziki, mu binyamakuru by'amajwi n'amashusho, mu tubari, ibirori n'ibitaramo, umuziki uri kumvwa ukanabyinwa cyane nawo ni uw’abanyamahanga.

Gusa nk’uko benshi babyiteze wenda hari impinduka impeshyi ikomanga izazana dore ko bamwe mu bahanzi basa n’abahugiye mu gushyira hanze ibihangano bishya kandi biremeye. 

Chriss Eazy yaje imbere cyane mu bahanzi bakurikirwa kuri Youtube mu Rwanda ndetse indirimbo ze zikomeza kugira igikundiro kugera n’ubu Umusaruro wa Bruce Melodie kuri Youtube wabaye mwinshi hagati ya 2022/2023 aza imbere mu b’indirimbo zisanzweKizz Daniel akomeje kongera gushinga imizi mu Rwanda nyuma yo kongera kubura umutwe aho yaramaze igihe adakoraAyra Starr mu gihe gito cyane yamaze gushinga imizi mu Rwanda Diamond Platnumz imyaka ibaye myinshi atabura ku rutonde rw’abahanzi bafite 10 bakunzwe cyane binyuze kuri Youtube mu Rwanda bivuze ko n’ahandi ari mu b’imbere dore ko ari rwo rubuga rukoreshwa cyane kugeza ubu n’abanyarwanda bakunda umuziki

Bob Pro ugira uruhare mu gushyira akadomo ka nyuma ku ndirimbo z'abahanzi banyuranye, yabwiye InyaRwanda ko yari amaze igihe atekereza guhuriza abahanzi mu ndirimbo, yanzura kujya azikora hanyuma akazikubira kuri album.

Uyu munyamuziki avuga ko kugeza ubu yamaze kurangiza album y'indirimbo zirenga 18 kandi 'abahanzi bamaze kwakira neza icyifuzo cyanjye ku buryo indirimbo zizagenda ziyongera kuri buri album uko zizagenda zisohoka'.

Bob avuga ko 'abahanzi bose bakomeye mu Rwanda' bari kuri izi album ari gukora, ku buryo kuri uyu wa Kabiri tariki 16 Gicurasi 2023, aribwo abahanzi nka Bruce Melodie na Chriss Eazy baza gufata amajwi ya zimwe mu ndirimbo zizumvikana kuri izi album.

Mu rwego rwo kwagura ibihangano ari gukora, Bob avuga ko yakoranyeho na ba Producer batandukanye bo mu Rwanda, kugirango bose bashyire itafari kuri uru rugendo rushya yatangiye rwo guhuriza hamwe abahanzi mu ndirimbo akazishyira kuri album.

Bob avuga ko n'ubwo abantu bamuzi nka Producer, ariko mu ndirimbo zizasohoka hazumvikanaho ijwi rye aririmba.

Uyu munyamuziki akomeza avuga ko muri iki Cyumweru atangaza indirimbo zigize album ya mbere, nyuma agakomeza no gukora ku zindi ndirimbo zigize album ya kabiri uko zizagenda zikurikirana.

Ni album zihariye:

Bob yavuze ko asanzwe afitanye umubano mwiza n'abahanzi banyuranye, ari nayo mpamvu muri album zizakurikira iya mbere hazumvikanaho indirimbo yakoranye n'abarimo itsinda rya Sauti So, Satb n'abandi.

Biranashoboka ko izi ndirimbo z'aba bahanzi zizumvikana kuri album ya mbere. Muri rusange, Bob avuga ko indirimbo yakoranye na Bien-Aime wo muri Sauti Sol yarangiye, iyo yakoranye na SatB n'ayo yarangiye, igisigaye ari uko azifatira amashusho.

Bob avuga ko gukorana indirimbo na Sauti Sol ndetse na SatB bizamufasha muri gahunda yo kumenyekanisha izi ndirimbo zizaba zigize izi album azasohora.

Izina Bob Pro ryumvikana hafi mu ndirimbo ya buri muhanzi isohoka. Ni we wakoze 'Mastering' ya album 'Essence' ya Tom Close, 'Inzora' ya Butera Knowless, indirimbo za Phil Peter, Marina, Meddy, The Ben, Andy Bumuntu n'abandi.

Uyu mugabo anagira uruhare mu guhugura bagenzi be akafasha kumenya ibijyanye na 'mastering' y'indirimbo binyuze muri studio ya The Sound yashinze.

Mu 2020, Bob Pro yabwiye InyaRwanda ko ubuhanga afite abukomora ku muhanga ukomoka mu Bubiligi ariko ukorera muri Canada.

Yvauze ko yakuriye iruhande rwa John amwerekera byinshi ndetse akajya amuha umwanya agakora zimwe mu ndirimbo z'amakolali ariko zikarangizwa nawe.

Bivuze Bob pro yahawe amasomo y'igihe gito (Short Courses) ariko we asobanura ko ayo masomo amurutira kujya mu ishuri akicara akiga.

Kubera ko Bob Pro afite umuryango utuye muri Belgique, yajyaga ajyayo kenshi noneho aza guhura na wa muhanga mu gutunganya indirimbo, ariko Bob iyo yabaga ari muri studio yacurangaga indirimbo kuko yari afite ubuhanga mu gucuranga Piano.

Ati 'Yaramfashije hari ishuri yigishagaho noneho aranyemerera niga amasomo yahatangaga ntanishyuye ndabimushimira cyane ni nawe kitegererezo cyanjye.'

Bob Pro yatangaje ko agiye gushyira hanze album ya mbere iriho indirimbo zirenga 18 

Bob avuga ko mu ndirimbo zizakurikira kuri album ya kabiri n’izindi hariho indirimbo yakoranyeho n’abarimo Sauti Sol, SatB n’abandi 

Bob avuga ko izi ndirimbo zatunganyijwe na ba Producer batandukanye bo mu Rwanda

Bien-Aime wo muri Sauti Sol [Uri iburyo] mu bahanzi bafite indirimbo zizumvikana kuri album za Bob Pro

 

Sat-B wo mu Burundi mu bahanzi baririmbye mu ndirimbo zigize album ya Bob Pro 

Ubuhinzi ni ingeri itunze benshi mu rwego rw'ubukungu kandi iyo bwifashe neza bituma n'ubundi buzima buhenduka.

Heifer International ibinyujije muri AYuTe Africa Challenge yashyizeho amarushanwa y'urubyiruko rwifashishije ikoranabuhanga rugashakira ibisubizo ibibazo abahinzi bato bahura na byo.

Umuyobozi Mukuru wungirije ushinzwe Porogaramu zireba Umugabane wa Afurika muri Heifer International, Adesuwa Ifedi, yavuze ko aya marushanwa afasha urubyiruko rwo mu Rwanda rwahanze udushya kubona amafaranga yo kongerera ingufu mu mishinga yabo.

Yagize ati 'Aya marushanwa aha amahirwe urubyiruko rwahanze udushya mu Rwanda, rukabona amafaranga kandi rukigaragaza kurushaho kugira ngo rwagure imishinga yarwo y'ikoranabuhanga mu buhinzi, bityo ibisubizo byarwo bikagera kuri miliyoni z'abahinzi muri Afurika hose.'

'Mu buhinzi ku Mugabane wa Afurika harimo amahirwe menshi y'iterambere ry'ubukungu no gutanga akazi, ariko hakenewe mu buryo bwihuse ibitekerezo bishya n'ikoranabuhanga. Ni umwanya w'urubyiruko rujijukiwe n'ikoranabuhanga ngo ruhange udushya mu nzira yo guhindura iyi ngeri y'ubuhinzi.'

Abazatsinda muri aya marushanwa bazahembwa ibihumbi 20 by'amadorali ya Amerika, [ni ukuvuga asaga miliyoni 22 z'Amafaranga y'u Rwanda], n'amahugurwa afasha mu kunoza ibitekerezo n'ingufu urubyiruko rwashyize mu gushaka ibisubizo mu buhinzi ngo bitange umusanzu ufatika ku bahinzi bato no guteza imbere ubushabitsi bw'abatsindiye ibyo bihembo.

Ibigo bizahatana bigomba kuba ari iby'urubyiruko, bikorera mu Rwanda kuva mu myaka itatu ishize.

Umuyobozi wa Heifer International mu Rwanda, Betty Tushabe, yavuze ko aya marushanwa azashyigikira ibigo, abantu ku giti cyabo n'amatsinda afite udushya mu gushaka ibisubizo ku bibazo byugarije abahinzi bato, baba abakiri gutangira n'abamaze kufata icyerekezo mu bikorwa byabo.

Ati 'Binyuze muri aya marushanwa, twizeye kongerera ingufu imishinga y'ikoranabuhanga mu buhinzi yakozwe n'urubyiruko, tubaha amafaranga n'izindi serivisi zijyanye n'ubushabitsi. Dufite intego yo guhindura ibitekerezo n'umuhate by'urubyiruko bikavamo ibisubizo bifatika ku baturage dukorera mu Rwanda no hanze yarwo.'

Kwiyandikisha mu marushanwa byatangiye ku wa 3 Gicurasi 2023, bizasozwa ku wa 26 Gicurasi hahita hakomeza amarushanwa, azageza muri Nyakanga 2023.

Amarushanwa ya AYuTe Africa Challenge yatangijwe mu 2021, aho buri mwaka hahembwa amafaranga n'ubujyanama imishinga itanga icyizere mu gukemura ibibazo byugarije ubuhinzi.

Kuva mu 1944, Heifer International yakoranye n'imiryango miliyoni 40 ku Isi mu bikorwa byo guhangana n'inzara n'ubukene binyuze mu gushaka ibisubizo birambye.

Mu myaka 48 Heifer International imaze ikorera mu bice by'icyaro muri Afurika, ifasha abahinzi n'abatunganya ibikomoka ku buhinzi kubaka ubukungu butajegajega no gukora imirimo itanga inyungu.

Abatsinze bahabwa amafaranga abafasha guteza imbere imishinga yabo

Imishinga izahembwa igaragaza icyizere mu kubonera abahinzi bato ibisubizo by’ibibazo bafite

Urubyiruko rwahanze udushya mu mishinga y’ikoranabuhanga mu buhinzi ruhembwa amafaranga n’ubujyanama mu bushabitsi

Ni imurikabikorwa ryateguwe n'Inama Nkuru y'amashuri makuru na za Kaminuza mu Rwanda, HEC, ryahuje ibyo bigo, abanyeshuri, abikorera n'ibigo bya Leta, harebwa urwego uburezi bugezweho n'uko bwahabwa imbaraga kugira ngo bwungukire abaturage binyuze mu bushakashatsi.

Ryanagaragayemo n'amarushanwa mu bijyanye na siyansi, ikoranabuhanga, engineering n'imibare (STEM) aho imishinga itatu yo muri IPRC Kigali n'indi ibiri yo muri IPRC Kitabi na ICK yahawe ibihembo.

Umuyobozi Mukuru wa UTAB, Padiri Dr Munana Gilbert, yavuze ko nubwo basanzwe bafite ikoranabuhanga mu masomo batanga, bagiye kongeramo imbaraga cyane. Yavuze ko banasabye Ikoranabuhanga nk'ishami ukwaryo.

Akomeza avuga ko Kaminuza zitera imbere haba mu bushakashatsi n'ibindi iyo zimenye ibyo zakwigira ku zindi, uko zaterana inkunga n'uko zakorana ubushakashatsi buhuriweho cyane ko bose baba bita ku baturage bamwe.

Ati 'Muba mugomba guhanahana ubunararibonye kuko hari kaminuza ziba zikuze n'izimaze igihe gito. Binabaha kumenya umwihariko wa buri kaminuza izindi zikigira kuri utwo dushya.'

Akomeza ati 'Twamenye ko Kaminuza igomba kureka ibintu byo guhunika ubumenyi mu bitabo ahubwo twerekwa ko tugomba kubushyira mu bikorwa, rya terambere rishingiye ku bumenyi n'ubuhanga leta yagize intego tukayifasha kurigeraho vuba.'

Muri iri murika, iyi kaminuza yamuritse umushinga ujyanye n'ifumbire y'imborera, ugamije guteza imbere ubuhinzi. Ntabwo wabashije guhembwa mu ihiga indi.

Ati 'Yego ubuhinzi twigisha buza muri STEM ariko ubu, nibwo turi kwimakaza ubushingiye ku ikoranabuhanga.”

Kugeza ubu abanyeshuri ba UTAB bamaze kuba intyoza mu kwita ku matungo aho bayabaga iyo yarwaye bakayasubiza ubuzima buzira umuze.

Padiri Dr Munana Gilbert yavuze ko ikoranabuhanga bagiye gutangiza nk'ishami rizongera ireme mu bumenyi batanga ndetse n'uburyo babushyira mu bikorwa burusheho kugira imbaraga.

Padiri Dr Munana akomeza agira ati “Turakomeza guteza imbere amasomo, ubushakashatsi n'imishinga biganisha ku Ikoranabuhanga no guhanga udushya dufite aho duhuriye n'ibyo abaturage b'igihugu bakeneye.”

Yashimiye HEC ku gikorwa gikomeye yateguye yerekana ko ari 'ibikorwa by'ingirakamaro ku babyeyi, abashaka abakozi ndetse na za kaminuza kuko ubwazo zihana ubunararibonye.'

Umwarimu akaba n'Umushakashatsi muri UTAB wakurikiranaga umunsi ku wundi iryo murikabikorwa, Dr Havugimana Alexis, yavuze ko babonye byinshi nk'abarezi ndetse babyigiraho amasomo atandukanye, asaba abikorera kwegera izo kaminuza kuko ifite abahanga ariko badafite aho gushyirira ibyo biga mu bikorwa hahagije.

Mugenzi we ushinzwe ishami ry'Ubuhinzi n'ubworozi no kubungabunga Ibidukikije n'ingufu zisubira, Dr Rugwiro Patrick, yavuze ko mu gufasha abahinzi baturiye Kaminuza kongera umusaruro, ubu bababonera imbuto y'ibirayi n'ingano byatuburiwe mu butaka bwa kaminuza.

Ubwo hasozwaga imurikabikorwa ry'ayo mashuri Makuru na za Kaminuza, Umuyobozi Mukuru wa HEC, Dr Rose Mukankomeje, yagize ati 'Uku kwari ugukangura amashuri no kubwira Abanyarwanda ko ibintu bihari. Igisigaye buri mashuri bitewe n'ibyo yigisha ubwayo yashobora kwihamagarira abantu bakaza. Nubwo atari ngombwa kubitegura buri mwaka ariko bizaterwa n'imishinga yari ihari.'

Yagaragaje ko ibigo binyotewe no kubona abanyeshuri bahanga imishinga isubiza ibibazo bifite, kandi ko nibabikora, 'ntakabuza bazabona ababafasha.'

Mu 2022 habarurwaga ko mu mashuri makuru na za kaminuza mu Rwanda hari abanyeshuri 88.448, barimo 51.271 biga mu mashuri makuru na za kaminuza byigenga.

UTAB ubu ifite abanyeshuri bagera ku bihumbi 11, bivuze ko ugereranyije n'uwo mubare w'ababarizwa muri ibyo bigo byigenga iyi kaminuza y'i Byumba ifitemo 21.45% umubare ishaka kubyaza umusaruro binyuze mu gushyira mu bikorwa ubumenyi babahwa.

Ifumbire itegurwa n’abo muri UTAB iherutse guhembwa nka NIRDA bijyanye n’uko idakungura ubutaka kandi iba igizwe n’ibimera

Isingizwe Yolande wiga muri UTAB yagaragaje ko imurikabikorwa ry’amashuri makuru na za kaminuza yarikuyemo ubumenyi agiye azifashisha mu gushyira mu bikorwa amasomo ahabwa na Kaminuza

Mu marushanwa ya HEC ajyanye n’imishinga ishingiye kuri siyansi yahize indi yarahembwe

Mu byo UTAB igiye kongeramo ingufu, ikoranabuhanga ni ryo riza ku isonga

Umuyobozi wa UTAB, Padiri Girbert Munana, yagaragaje ko ikoranabuhanga rigiye gutezwa imbere muri UTAB kuko hari na gahunda yo kuritangiza nk’ishami ryihariye

Tumukunde Marie Josée wiga muri UTAB yasabye iyi kaminuza kongera ahantu ho gukorera ubuhinzi bugezweho

Uretse gutubura ingano n’ibirayi, UTAB yeza n’ibindi bihingwa birimo inanasi

Urusenda ni rumwe mu musaruro Kaminuza ya UTAB yaserukanye mu imurikabikorwa ryateguwe na HEC

Abanyeshuri ba UTAB bagaragaza ko bagira uruhare mu kwigisha abaturage uko bakwimakaza ubuhinzi bugezweho

Bafashijwe n’abarimu babo abanyeshuri ba UTAB bamaze gukora umuti wica udukoko twangiriza imyaka, bifashishije ibimera

Umukino wa Kiyovu Sports na Sunrise FC uzaba ku Cyumweru watangiye gushyuha aho rutahizamu wa Babuwa Samson yahaye ikaze Serumogo bakinanye muri iyi kipe amubwira ko bitazamworohera.

Ni umukino uzabera kuri Golgotha Stadium ku Cyumweru tariki ya 21 Gicurasi 2023 saa 15h00′.

Ntabwo uzaba ari umukino woroshye ku mpande zombi aho Kiyovu Sports yifuza kutagira ikosa na rimwe ikora kuko byatuma iva ku gikombe cya shampiyona isabwa gutsinda imikino yayo yose isigaye.

Ku ruhande rwa Sunrise nayo iri mu murongo utukura kuko mu gihe habura imikino 2 gusa ngo shampiyona irangire itarizera kuguma mu cyiciro.

Uyu mukino urimo kuvugwaho byinshi bitandukanye kugeza ho na rutahizamu wa Sunrise FC, Babuwa Samson yahaye ubutumwa myugariro wa Serumogo Ali bakinanye muri Sunrise ndetse na Kiyovu Sports amubwira ko bitazaborohera.

Ati 'Ikaze kuri Golgotha … Uzumva ubushyuhe bwinshi ku Cyumweru … Nta byendagusetsa muvandimwe.'

Umukino ubanza wabereye kuri Kigali Pele Stadium, Sunrise FC yari yatsinze Kiyovu Sports 2-1, hitezwe kureba niba izabisubiramo i Golgotha.

Nyamara Golgotha haraba akantu, ni uko Babuwa ahaye ikaze Serumogo Ali ku Cyumweru

Kiyovu irabambirwa i Golgotha? pic.twitter.com/gmxhlI6QF7

— Canisius Kagabo (@Canisius1kagabo) May 15, 2023

Babuwa yahaye ikaze Serumogo Ali i Golgotha Stadium