Category: Uncategorized

Mu kiganiro n'itangazamakuru ku mikoreshereze y'umuhanda kiri kubera ku biro bikuru bya Polisi y'u Rwanda, CP John Bosco Kabera yaburiye abatwara ibinyabiziga bakoresheje impushya bakuye i Mahanga batazikoreye ko hagiye gutangira igikorwa cyo kuzifata zigasuzumwa, uwo basanze atararukoreye akarwamburwa, ariko kandi akanaregwa ibindi byaha bishamikiye ku buryo yabonye urwo ruhushya.

CP John Bosco Kabera, umuvugizi wa Polisi y'u Rwanda avuga ko ku kigero cya 97% by'impushya zitangwa mu bihugu bitandukanye byo ku Isi hari ubushobozi bwo kumenya ukuri kwazo binyuze muri Laboratwari y'Igihugu y'ibimenyetso bya gihanga( Rwanda Forensic Laboratory-RFL).

Akomeza avuga ko bamwe mu batwara ibinyabiziga ku butaka bw'u Rwanda byagaragaye ko hari abakoresha impushya mvamahanga, usanga barabonye mu buryo utakwemeza ko bazikoreye. Yibutsa ko gutwara ikinyabiziga ku butaka bw'u Rwanda hakoreshwa gusa uruhushya rwo mu Rwanda, ko izindi zose urufite hari igihe ntarengwa amategeko ateganya aba agomba kurumarana, akaruhinduza.

Ku bijyanye n'ikigiye gukorerwa bamwe mu bafite izi mpushya mvamahanga bizagaragara ko batakoreye, CP Kabera ahamya ko uzafatwa uruhushya rwe ruzajyanwa rugasuzumwa muri RFL( Rwanda Forensic Laboratory), basanga atari umwimerere, urufatanwe akorerwe Dosiye ashyikirizwe amategeko, ahanwe.

Agira kandi ati' Abantu rero bafite impushya zo hanze, icyambere tubagira inama ni uko baza bakajya kuzihinduza aho bakwiye kuba babikorera kuko hari igihe amategeko ateganya'. Akomeza avuga ko urufite naza Polisi ikarukeka( ikarushidikanya ho), bazajya kurusuzumisha ni basanga atari urwo yakoreye afatwe ashyikirizwe amategeko nk'umunyabyaha wese.

CP John Bosco Kabera, asaba abafite impushya zo gutwara ibinyabiziga bakuye i Mahanga bazitanzeho amafaranga, bazi neza ko batazikoreye kumenya ko barimo gukora ibyaha kuko bazicurishije, baziguze. Akabo kagiye gushoboka nkuko CP Kabera abivuga.

Muri iki kiganiro( wabyita amahugurwa) n'abanyamakuru y' iminsi 2( tariki 18-19 Gicurasi 2023), hagarukwa ku mikoreshereze y'umuhanda, hagaragajwe ko abantu 1,350,000 ku Isi bahitanwa n'impanuka ku mwaka, ko kandi mu mibare y'u Rwanda kuva mu mwaka wa 2015 buri mwaka abantu batari hasi ya 500 bahitanwa n'impanuka zo mu muhanda zakabaye zirindwa. Havuzwe kandi ko mu gihe cya vuba, ijambo accident ( impanuka) rizashakirwa indi mvugo kuko bisa nk'aho abantu bazi cyangwa bishyizemo ko impanuka itirindwa kandi atari byo.

Ku kigero gisaga 90% by'impanuka byagaragajwe ko zishobora kwirindwa kuko kubaho kwazo biba byaturutse ku makosa aba ashobora kwirindwa. U Rwanda rushyirwa hejuru mu bihugu bifite impanuka nyinshi zihitana abantu mu muhanda. Hagaragajwe kandi ko imodoka igenda ku muvuduko wa 30Km/h hari amahirwe yo kubaho ku wo igonze angana na 90%. Ni mu gihe ku modoka ifite umuvuduko wa 40Km/h uwo yagonga kubaho kwe biri kuri 60%, naho ifite 50Km/h amahirwe yo kubaho kwe akaba 10%. 'Kwirinda impanuka zo mu muhanda birashoboka buri wese abigize ibye'.

Munyaneza Theogene

Source : https://www.intyoza.com/2023/05/18/abakoresha-impushya-zo-gutwara-ibinyabiziga-perimi-mpuzamahanga-batakoreye-akabo-kagiye-gushoboka-cp-kabera/

Urubanza rw'umubyinnyi Ishimwe Thierry wamamaye nka Tity Brown, rwagombaga kuburanishwa ku wa 18 Gicurasi 2023, rwongeye gusubikwa rwimurirwa ku wa 20 Nyakanga 2023.

Titi Brown akurikiranyweho icyaha cyo gusambanya umwana utaruzuza imyaka y'ubukure.

Umwanzuro wo gusubika uru rubanza wafashwe n'Urukiko Rwisumbuye rwa Nyarugenge.

Ababuranyi bakigera imbere y'Inteko iburanisha, uwunganira Tity Brown yasabye Urukiko ko umukiliya we yaba arekuwe mu gihe hagitegerejwe ibisubizo bya ADN.

Ni icyifuzo cyamaganiwe kure n'Ubushinjacyaha bwavugaga ko bitashoboka, ahubwo bakwiye kubitegereza cyane ko hari igihe uyu musore yagize uruhare mu gutinza ko ibizamini bifatwa avuga ko umwunganira mu mategeko atabonetse.

Umucamanza yabajije Ubushinjacyaha igihe ibisubizo byabonekera, buvuga ko byibuza bizabatwara nk'igihe cy'ukwezi.

Nyuma yo kumva impande zombi, Umucamanza yafashe icyemezo cyo kwimura urubanza rushyirwa ku wa 20 Nyakanga 2023.

Mu Ukuboza 2021 nibwo Tity Brown yakatiwe gufungwa iminsi 30 y'agateganyo n'Urukiko rw'Ibanze rwa Kicukiro.

Uyu musore utaranyuzwe n'iki cyemezo yahise ajurira, mu gihe byari byitezwe ko Urukiko Rwisumbuye rwa Nyarugenge rwari kuburanisha ubu bujurire ku wa 30 Ugushyingo 2022 byanzuwe ko rusubikwa, rushyirwa ku wa 8 Gashyantare 2023.

Ku wa 8 Gashyantare 2023 nabwo uru rubanza rwongeye gusubikwa rushyirwa ku wa 22 Gashyantare 2023.

Iki gihe nabwo rwongeye gusubikwa rushyirwa ku wa 14 Werurwe 2023 aribwo rwaherukaga gusubikwa rwimurirwa ku wa 18 Gicurasi 2023, none nabwo rwongeye gusubikwa.

Uyu musore akurikiranyweho n'ubushinjacyaha icyaha cyo gusambanya umwana w'imyaka 17 bivugwa ko yakoze ku wa 14 Kanama 2021.

Umubyeyi w'umwana bivugwa ko Titi Brown yaba yarateye inda, avuga ko yohereje umwana gusura nyirarume mu biruhuko, atashye avuga ko yarwaye igifu.

Umwana yajyanywe ku bitaro bya Kibagabaga kuvuzwa, maze isuzuma ryakozwe n'abaganga rigaragaza ko atwite.

Umwana abajijwe uwamuteye inda, yavuze ko yagiye gusura Titi Brown mu Karere ka Kicukiro, Umurenge wa Kigarama bikarangira amusambanyije.

Ku busabe bw'umwana, iyi nda yakuwemo hafatwa ibizamini nyuma yo kuyikuramo bihuzwa n'ibya Tity Brown, Ubushinjacyaha bukaba bwaragaragarije Urukiko ko hari raporo ya muganga igaragaza ko basanze ari uyu mubyinnyi wamuteye inda.

Ubushinjacyaha kandi bweretse Urukiko icyemezo cy'amavuko cyemeza ko uwo mwana w'umukobwa yavutse tariki 1 Mutarama 2004 bityo yasambanyijwe afite imyaka 17.

Mu iburana, Titi Brown yahakanye iki cyaha icyakora yemera ko uyu mukobwa bahuye nubwo atigeze yinjira mu nzu iwe.

Uyu mubyinnyi yabwiye Urukiko ko umukobwa yamubwiye ko aje kumureba ndetse anagera iwe, ariko ahamya ko atigeze yinjira mu nzu.

Source : https://umuryango.rw/imyidagaduro/article/menya-impamvu-urubanza-rwa-tity-brown-rwongeye-gusubikwa-bwa-5

Uyu mukinnyi w'ikipe y'Igihugu Amavubi ni bwo yarakigaruka muri champiyona nyuma y'indi mvune ikomeye yari yagize mu ivi ikamumaza hafi umwaka adakina n'ubwo ikipe ye ivuga ko yari yatangiye kwitwara neza.

Mukunzi yitabiriye imyitozo yo kuri uyu wa kabiri,ari naho yaje kuva mu kibuga atayirangije kubera ububabare bw'ahagana mu itako yayigiriyemo nk'uko ikipe ye ibivuga.

Kuri uyu wa gatatu, uyu musore wimyaka 27, ntiyitabiriye umukino ikipe ye yanganyije mo na Taby igitego 1-1 ku munsi wa 8 wa shampiyona ya Ettan League, umukino mugenzi we Lague Byiringiro uherutse kwerekezayo yagaragaye ku rutonde rw'abasimbura n'ubwo atakininnye.

Mukunzi yashoboraga kongera gusubira mu kibuga ubwo ikipe ye izaba ihura na Pitea mu mukino wa champiyona uteganijwe kuya 4 z'ukwezi gutaha

Uyu mukinnyi wahoze akinira Rayon Sports akaba n'umukinnyi wo hagati wa APR , amaze gukinira ikipe ye ya Sandvikens imikino itandatu muri shampiyona , byanayishyize ku mwanya wa gatatu ku rutonde rwa champiyona ya Ettan Norra League kuri ubu.

Source : https://umuryango.rw/imyidagaduro/imikino/article/yannick-mukunzi-yongeye-kugira-imvune-izamumaza-ibyumweru-3-hanze-y-ikibuga

Akenshi uzasanga abenda gusezerana babazanya ibibazo bitandukanye harimo ibijyanye n'imyenda bazambara mu bukwe bwabo ndetse bumva bafitiye amatsiko umunsi w'ubukwe bwabo. Ni ngombwa ko mbere y'uko uhitamo umuntu muzabana akaramata ugomba kwitonda kuko ushobora kuzisanga ubaho utishimye mu rugo rwawe kuko utabanje kwitonda mbere y'uko wemeranya n'uwo muzabana.

Niyo mpamvu abahanga mu bijyanye n'imibanire hagati y'abantu batekereje kugaragaza ibibazo 10 ugomba kubaza uwo mwenda kurushinga kugirango umenye ko afite gahunda.

Abo bahanga mu bijyanye n'imibanire hagati y'abantu ari bo Olga Levancuka, Marisa Peer na Annabelle Knight ni bo bagaragaje ibi bibazo uko ari 10 umukobwa akwiriye kubaza uwo bateganya kurushinga kugirango abashe kwimenyera niba koko ari umukunzi wa nyawe.

1. Ni iki wumva uzajya ukunda gukora wishimisha nitumara kubana ?

Iki ni ikibazo abakobwa benshi bakunze kubaza abahungu mbere y'uko babana . Mu gihe ukibajije umuhungu ntuzatungurwe no kumva ibisubizo aguha bitandutakanye n'ibyo wowe wari witeze kwakira, icy'ingenzi hano ni ukumva icyo abivugaho. Akenshi abakobwa bizera ko bazashobora guhindura abagabo babo mu gihe bazaba bamaze kugera mu rugo ariko ibi siko biri kuko akenshi usanga hari ingeso umuntu atapfa guhindura.

Niba umusore akubwiye ko azajya areba umupira buri gihe mu minsi y'ikiruhuko n'inshuti ze, zirikana ko muri icyo gihe biba bigoranye ko azajya akubonera umwanya kuko azajya arangiza iminsi y'akazi ubundi mu gihe mwakabaye muri kumwe abe ahugiye mu mupira.

2. Wumva ari iki kigushimisha mu rukundo rwacu ?

Igisubizo uzahabwa hano kizakwereka uko urukundo rwanyu ruhagaze . Bizagufasha kumenya agaciro aguha imbere ye, niba akubona nk'umuntu umufatiye runini cyangwa niba akubona nk'umuntu watuma ahungabana mu buzima bwe igihe atagufite.

3. Ese ni iki gituma uzigama amafaranga ?

Aho kugirango umubaze ku bijyanye n'amafaranga nyirizina, ushobora kubinyuza muri ubu buryo umubaza impamvu imutera kuba yakwizigamira. Ibi bikazagufasha kumenya niba hari ikintu yitaho mu buzima bwe. Bizatuma kandi umenya icyo amafaranga azajya yinjira mu rugo azajya akoreshwamo. Niba gukemura ibibazo byo mu rugo ari cyo kintu ashyira imbere, bizagufasha kumva ko muzatera imbere umuryango wanyu ukabaho neza.

4. Mubaze ku kijyanye n'imyemerere yanyu ndetse n'iyobokamana.

N'ubwo mwaba musengera mu idini rimwe, mushobora kuba mudahuje imyumvire ku bijyanye n'idini musengeramo, ni byiza kubimubaza ukabimenya. Niba mudahuje ukwizera nabyo ni byiza kubimenya kugirango mumenye uburyo muzajya mwubahana n'ubwo mudahuje idini n'imyemerere.

5. Ni hehe wumva wakwizihiriza umunsi mukuru wa Noheli, Ubunani… ?

Bitari ukumenya aho yishimira kuba yakwizihiriza uwo munsi mukuru gusa ahubwo bizagufasha kumenya niba agufata nk'umwe mu bagize ubuzima bwe. Kandi na none uzamenya niba yishimira kwizihiza iminsi mikuru ari kumwe n'umuryango we. Iki ni ikibazo cy'ingenzi kuko hari byinshi uzahamenyera kuko hari ubwo usanga umugabo adakunda kujyana n'umugore we ahantu henshi mu ruhame rw'abantu. Rero ibi bizagufasha kumenya niba yishimira kuba yagira aho mujyana muri kumwe.

6. Ese wumva abana tuzabyara bazaba bafite uwuhe mumaro mu buzima bwawe ?

Uwo muzabana ni ngombwa ko umenya niba afite igitekerezo cyo kuzabyara abana. Ubu ni bumwe mu buryo buzagufasha kumenya niba mu nshingano ze hazaba harimo abana muzabyarana. Bizatuma kandi umenya niba kugira abana benshi biri muri gahunda afite cyangwa niba yifuza kubyara bake.

7. Ese imibonano mpuzabitsina uyifata ute mu buzima bwawe ?

Iyi ni imwe mu ngingo zikunze guteranya ndetse no gusenya ingo zitari nkeya kubera bamwe baba batarabiganiriyeho mbere y'uko babana. Ni ingenzi rero kubaza uwo muteganya kurushinga kugirango wumve icyo abivugaho. Ni ngombwa kumenya uko mubipanga kuko usanga ari igikorwa gikorwa habaye ukumvikana ndese no kuba mufite umwanya uhagije. Ibi bizabafasha kumvikana kandi birinde ko mutabyumva kimwe.

8. Iyo urakaye ni iki kigufasha kongera gutuza ?

Iki ni ikibazo kidakunze kubazwa cyane kandi gifite akamaro kanini kuko uba ugomba kumenya icyatuma uwo mubana agaruka mu byishimo igihe yaba yarakaye. Ashobora kukubwira ko uburakari bwe bushira ari uko agiye muri siporo. Ibingibi bikazagufasha kumenya uko uzajya umwitwara imbere igihe yarakaye.

9. Ubana ute na mama wawe ndetse na bashiki bawe ?

Kubaza uko abana na mama we ndetse na bashiki be bizagufasha kumenya uko ubusanzwe abana n'igitsina gore muri rusange. Iyo umaze kumva uko babana bituma umenya niba nawe azajya agufata neza cyangwa niba akenshi atazajya akwitaho. Ni ngombwa ko ubimubaza kuko uko yari abanye na bashiki be niko nawe muzabana n'ubwo hari bimwe bishobora guhinduka.

10. Ni gute tugiye kuzajya twuzuzanya ?

Ubwuzuzanye hagati y'abashakanye ni ingenzi cyane kuko ari imwe mu nkingi zifasha kugirango urugo rukomere kandi rutere imbere. Rero ufite inshingano zo kubaza uwo muteganya kubana ku bijyanye n'ubwuzuzanye bwanyu kuko bizagufasha kumenya niba hari ibyo muzajya mufatanya mu mibereho yanyu.

Niyo mpamvu abahanga mu bijyanye n'imibanire hagati y'abantu batekereje kugaragaza ibibazo 10 ugomba kubaza uwo mwenda kurushinga kugirango umenye ko afite gahunda.

Abo bahanga mu bijyanye n'imibanire hagati y'abantu ari bo Olga Levancuka, Marisa Peer na Annabelle Knight ni bo bagaragaje ibi bibazo uko ari 10 umukobwa akwiriye kubaza uwo bateganya kurushinga kugirango abashe kwimenyera niba koko ari umukunzi wa nyawe.

Source : https://umuryango.rw/ubuzima-115/udushya/article/ibi-nibyo-bibazo-10-ukwiye-kubaza-uwo-mugiye-kurushinga-kandi-bizakwereka-ari

Umugore wa Cristiano Ronaldo, Georgina Rodriguez yavuze ko ari amahirwe kuba bifitiye indege yabo yihariye “private jet” n'aho ubundi atari kwihanganira kugendana na Cristiano mu ndege rusange.

Ibi uyu mugore yabigarutseho mu kiganiro kigaruka ku buzima bwe yise “I'm Georgina” kinyura kuri Netflix.

Yavuze ko iyo biba ngomba ko ingendo bakora bakoresha indege rusange, atari kwihanganira kumarana amasaha 2 na Cristiano mu kibuga cy'indege, byaruta agahagarika kugenda, impamvu nta yindi ni akavuyo byajya biteza kubera ubwamamare bw'uyu mukinnyi.

Ati “Indege yihariye ituma urugendo rworoha. Iyo ngomba kuba ndi mu kibuga cy'indege amasaha 2 na Cristiano nanasara, byatuma nkabireka. “

Rodriguez kandi yahishuye ibintu agenderaho iyo bagiye kujya mu biruhuko, basaba hoteli izabakira kuba ifite ibyumba byinshi, pisine y'umwihariko, kuba babona mu buryo bworoshye ubwato buto bwo gutemberamo n'ibindi.

Source : https://umuryango.rw/imyidagaduro/article/umugore-wa-cristiano-yahishuye-impamvu-adashobora-kumarana-nawe-amasaha-arenze

Ku mugoroba wo ku wa Gatatu, Perezida Kagame yaganiriye n'Umuyobozi wa Komisiyo y'Umuryango wa Afurika Yunze Ubumwe, Moussa Faki Mahamat ku bibazo by'umutekano mu karere.

Mahamat ari mu Rwanda aho yitabiriye inama ku nshuro ya cumi yiga ku bibazo bibangamiye umutekano muri Afurika, yateguwe n'Ishuri rikuru rya gisirikare (RDFCSC) ku bufatanye na Kaminuza y'u Rwanda (UR).

Ni inama yatangiye kuri uyu wa Gatatu igamije yigirwamo ibibazo by'umutekano byugarije Afurika n'uburyo byashakirwa umuti.

Ubutumwa bwashyizwe kuri Twitter y'Ibiro by'Umukuru w'Igihugu, bwavuze ko Perezida Kagame na Mahamat baganiriye ku bibazo by'umutekano mu karere n'ahandi.

Ibibazo by'umutekano byugarije akarere u Rwanda ruherereyemo ku isonga harimo intambara mu Burasirazuba bwa Repubulika Iharanira Demokarasi ya Congo, ihanganishije ingabo za Leta (FARDC) n'inyeshyamba zirimo M23.

Afurika Yunze Ubumwe Mahamat ahagarariye yashyizeho Angola nk'umuhuza mu bibazo bya Congo, icyakora bisa nk'ibigenda gahoro kubera ubushake buke bwa Guverinoma ya Congo ishaka kurangiza ikibazo hakoreshejwe intambara kurusha inzira y'ibiganiro.

Moussa Faki Mahamat yari i Bujumbura mu byumweru bibiri bishize ubwo hateraniraga inama yiga ku mutekano muke mu Burasirazuba bwa Congo, aho hemejwe ko ingamba zisanzweho zo gukemura ibibazo zishyirwamo ingufu.

The post Perezida Kagame yakiriye perezida wa Komisiyo ya AU appeared first on FLASH RADIO&TV.

Source : https://flash.rw/2023/05/18/perezida-kagame-yakiriye-perezida-wa-komisiyo-ya-au/?utm_source=rss&utm_medium=rss&utm_campaign=perezida-kagame-yakiriye-perezida-wa-komisiyo-ya-au

Mu itangazo, Felix Koskei, umutegetsi wo mu biro bya Perezida William Ruto ukuriye imirimo ya leta, yavuze ko imifuka 20,000 y'isukari yatumijwe hanze mu 2018, ikamaganwa n'ikigo cy'ubuziranenge, “yasohowe iyobejwe mu buryo budahoraho kandi budakurikije ibisabwa”.

Icyo gihe ikigo cya Kenya kigenzura ubuziranenge (KBS) cyari cyatangaje ko iyo sukari itujuje ibisabwa kugira ngo abantu bayikoreshe.

Byari byitezwe ko yangizwa hakoreshejwe kuyihinduramo ikinyabutabire cya ethanol gikoreshwa mu nganda.

Uko kuyihindura kwari gukorwa n'inzego zitandukanye zikora mu bijyanye no kugenzura ubuziranenge.

Zari zitezwe ko zishaka igikoresho cyo kuyishyushyamo, ibyo bikanyura mu gutanga isoko ku mugaragaro rikitabirwa na buri muntu wese ubishaka kandi ubishoboye, ndetse hakarihwa imisoro yose ya ngombwa.

Koskei yagize ati: “Biragaragara ko bamwe mu bategetsi bo mu nzego bireba bikuyeho inshingano zabo, bashyira abaturage mu byago”.

Uku guhagarikwa ku kazi kubaye mu gihe Abanya-Kenya benshi bugarijwe na kumwe mu gutumbagira gukomeye kw'ibiciro by'isukari kubayeho muri iyi myaka ya vuba ishize, mu gihe hari ikibazo cy'isukari idahagije.

Source : https://umuryango.rw/amakuru/mu-mahanga/ubutabera/article/kenya-abategetsi-27-bahagaritswe-kukazi-kubera-gucuruza-isukari-yarengeje-igihe

Impamvu y'icyo gihombo ngo n'abantu bazanwa kuri ibyo bitaro bya Kabgayi barwaye cyangwa bapfuye, badafite imyirondoro bakavurwa abandi bagashyingurwa ba nyirabo ntibishyure.

Umuyobozi Mukuru w'ibitaro bya Kabgayi Dr Muvunyi Jean Baptiste yabwiye Umuseke ko iyo barangije guha serivisi abo bantu babura uwo baha inyemezabwishyu bitewe nuko hari bamwe bataba bafite imyirondoro y'aho batuye hazwi, mu gihe hari abandi muri bo baba bapfuye iwabo hatamenyekanye abandi bafite uburwayi bwo mu mutwe utashobora kugira icyo ubabaza ngo bagusobanurire usibye kubavura gusa.

Dr Muvunyi yasabye ko inzego z'Akarere bafatanya zagombye guteganya mu ngengo y'Imali ya buri mwaka ayo mafaranga yo kwita kuri ibyo byiciro by'abaturage bazanwa mu bitaro.

Yavuze ko mu biganiro bagiye bakorana n'Ubuyobozi bw'Akarere ka Muhanga, mu myaka yashize nta gisubizo cyigeze kivamo gifasha ibitaro gusohoka muri iki gihombo.

ki gihombo cya miliyoni 15 ibitaro bya Kabgayi bidasubizwa gishobora kwiyongera kuko umubare w'abo bantu babahombya ugenda wiyongera uko umwaka utashye.

Kimwe no kubindi bitaro hirya no hino mu gihugu, hakunze kuvugwa igihombo nk'iki ariko kugira uwo kibazwa nabyo bikagorana. Gusa ingaruka ziba ku barwayi cyane bakoresha Mutuel de santé, aho usanga guhabwa ubuvuzi byoroshye batabanje kwerekana ibyangombwa byuzuye bigorana kugera ubwo bahura n'ingaruka z'ubuzima bataba biteze.

Source : https://umuryango.rw/amakuru/mu-rwanda/ubuzima/article/ni-iki-cyihishe-inyuma-y-igihombo-cya-miliyoni-15frw-ibitaro-bya-kabgayi-bivuga

Umugore, ni izingiro ry'ibyishimo, umugongo uhekera umuryango, umutima w'urugo, afasha Imana kurema, akunda abantu ntakunda ibintu, igikuru cyane yihebera bihebuje abana kurusha ibindi byose.

Ni umunyembaraga! By'umwihariko ingufu z'umugore mu Rwanda zigaragaza mu nguni zose z'igihugu. Umugore yafashe iya mbere mu mirimo isaba imbaraga, mu bwubatsi uzamusanga ku gikwa afashe umwiko n'inyundo, mu buhinzi ni nomero ya mbere, mu biro naho ntiyahatanzwe ndetse yihariye 63.7% by'abagize Inteko Ishinga Amategeko.

Ari maso! No mu nzego zicunga umutekano w'igihugu umugore araganje, uzamusanga mu ba mbere bafite ubumenyi bwagutse mu gucunga umutekano. No mu muryango kandi ni uko, kera iyo hagiraga igikoma ku rugi umugabo yaribwirizaga akajya kureba, ubu bombi bahagurukira icya rimwe.

Mu iterambere ry'umuryango n'igihugu muri rusange, hari ubufatanye mu nzego zose. Umugore n'umugabo nk'abitsamuye bahagurukiye icya rimwe, buri wese ashishikajwe n'icyazana iterambere buri wese kandi yabigize inshingano.

Igice cy'imyidagaduro mu Rwanda nacyo cyateye imbere ndetse abagore bari mu ba mbere bahagaze bwuma. Kibarizwamo amazina atabarika y'abagore n'abakobwa bamamaye, banabibyaza inyungu ifatika ku buryo ibyo bakoze byeze imbuto ku bandi.
Kuri ubu tugiye kugaruka kubagore bagize uruhare rukomye mu myidagaduro nyarwanda mu gihe cyashize kugezaa nubu bikaba bikiri ku Rwego rushimishije.

Muri aba bagore twakusanyije mu gice cy'imyidagaduro, harimo amazina ya bamwe amaze kwandikwa kenshi ku bwiganze buri ku rwego ruhanitse haba mu itangazamakuru, mu biganiro hagati y'abantu no ku byapa ku bw'ibikorwa bya buri wese.

1. Amelia Umuhire
Umuhire yavukiye mu Rwanda akurira mu Bubiligi, igihe kirekire akimara akoresha muri film ibitekerezo akomora ku mvo y'uwo ari we, amateka n'imico yanyuzemo. Yakoze film ndende yitwa 'Polyglot' yibanda ku mibereho y'abahanzi b'abirabura i Berlin.

Yayerekanye mu maserukiramuco atandukanye arimo Film Africa i Londres, Tribeca Film Festival, Premiers Plans D'Angers Festival no muri Geneva International Film Festival aho yakiriye igihembo Best International Web Series mu 2015.

Umuhire ari mu bagore bamaze kugira ibigwi muri sinema ikozwe ndetse ari mu bahirimbaniye kuyigeza ku rundi rwego. Afite indi yitwa 'Mugabo” (2016) ivuga ibyo yanyuzemo n'ukurokoka Jenoside. Yerekanwe muri Film Africa Festival i Londres mu 2016, yatwaye igihembo cya Best Experimental Film Award mu 2017 muri BlackStar Film Festival i Philadelphia.

2. Anita Pendo

Ni umunyamakuru akaba n'umushyushyarugamba mu bitaramo binini bibera mu Rwanda. Anita Pendo amaze imyaka irenga icumi ayobora ibirori, by'umwihariko ni umwe mu bagore bagaragaje umwihariko no kwihangana mu rugendo rw'iterambere ry'imyidagaduro mu gihugu.

Pendo akunda kwiyita 'Umukobwa wirwanyeho', ibi byaramuhamye ndetse iri zina rishimangirwa n'ibikorwa bikomeye yakoze mu myaka isaga icumi amaze akora akazi ko kuyobora ibirori akabifatanya n'itangazamakuru.

By'umwihariko, Anita Pendo ni umwe mu bagore ba mbere bagerageje kwinjira mu cyiciro cy'abagabo bavanga imiziki [Deejaying] ndetse yabikoze by'umwuga ahereye mu itsinda rikomeye rya Platnum Deejays rizwi cyane mu Rwanda. Nyuma ye hagiye havuka abandi nka Dj Ira ndetse bakaza bavuga ko ari mu batumye batinyuka kwinjira muri uyu mwuga.

Uretse gukora aka kazi kose afatanya n'itangazamakuru, Anita Pendo ari mu bagore bake babyaza amafaranga ijwi ryabo aho rikoreshwa mu kwamamaza; ibyo akora byose bigaragaza neza no kurusha bamwe mu bagabo aba ahanganye nabo ku isoko.

Amafaranga yasaruye muri uyu mwuga yayakoresheje mu kwiyishyurira ishuri, yafashije abo mu muryango we ndetse bivugwa ko yashinzemo ubucuruzi bumubyarira inyungu.

3. Butera Knowless

Ni we mugore mu bakora umuziki muri iyi myaka wegukanye irushanwa rya mbere mu gihugu rya Primus Guma Guma Super Star, ni na we kandi ufatwa nk'ufite ubukungu kurusha abandi nubwo aterura ngo agaragaze amafaranga yose amaze gusaruramo.

Butera Knowless abikesha umuziki, yabashije kwiyubakira inzu, yiyishyuriye amashuri ya kaminuza ndetse mu 2017 yahawe Impamyabumenyi mu Ishami rya Finance muri Kaminuza yigenga ya Kigali.

Uretse amafaranga n'amashimwe yahawe mu Rwanda, Knowless ari mu bagore bamaze iminsi bahatanira ibihembo mpuzamahanga mu muziki ndetse amaze yatangiye gucurangwa kuri Televiziyo zo hanze. Ubu icyerekezo afite ni ugukora umuziki mu buryo bugamije ubucuruzi.

4. Cecile Kayirebwa

Kayirebwa afatwa nk'umugore waboneye izuba benshi mu bakora umuziki muri iyi myaka kuko abimazemo isaga mirongo itatu kandi aririmba indirimbo z'umumaro, zuje ubutumwa ku muryango Nyarwanda n'abazumva bo mu bindi bihugu.

Yakoze indirimbo zitabarika zagiriye akamaro Abanyarwanda n'u Rwanda muri rusange, muri zo harimo izirata u Rwanda ariko hakanagaruka cyane izo yaririmbye zateraga akanyabugabo Abanyarwanda bifuzaga kubohora u Rwanda mu icuraburindi rwari rurimo. Hari izindi ndirimbo z'ubutumwa uyu mubyeyi yaririmbye harimo nka 'Iwacu', 'Inzozi' n'izindi.

Mu myaka itatu ishize yatoranyijwe mu bahanzi bubatse amateka bahataniye ibihembo bikomeye ku rwego rwa Afurika bya Kora Awards.

5. Dj Makeda

Makeda Mahadeo [Dj Makeda], umwe mu bakobwa bahanzwe amaso mu mwuga wo kuvanga imiziki mu Rwanda, yabitangiye mu 2010 ndetse ubu yabishyizemo umuhate n'imbaraga kugira ngo bizamugeze ku rwego ruhambaye.

Dj Makeda yahawe ubumenyi bw'ibanze n'umwe mu nshuti ze nyuma yihahira ubundi bumenyi muri uyu mwuga ari nabwo bwanamufashije kuzamuka no kumenyekana mu Rwanda.

Uyu mugore ni Umunyarwandakazi wavukiye muri Leta Zunze Ubumwe za Amerika mu 1987, akurira muri Jamaica.

Makeda kandi yamamaye nk'umunyamakuru w'umwuga kuri Contact FM mu kiganiro The Switch, yanakoze ikindi cyakunzwe kuri Televiziyo y'u Rwanda cya Rise and Shine Rwanda.

Uretse ibyo kuvanga imiziki n'itangazamakuru, Makeda yakinnye muri film 'Coming Back to Rwanda' yayobowe na Allan Karakire ndetse hejuru ya byose akunda imideli no kwifotoza bya gihanzi.

Ni umwe mu bagore bake bayobora ibirori biri ku rwego rukomeye mu gihugu, iyi myuga yose hamwe n'itangazamakuru nibyo bitunze Makeda ndetse aharanira kubizamura akagera ku rwego ruhanitse.

6. Dusabejambo Clementine

Dusabejambo ni umwe mu bageze ku ntambwe ikomeye mu bijyanye na 'cinema' mu Rwanda, yabitangiye mu 2008. Yakoze kuri film mbarankuru n'izindi z'uburyo butandukanye nk'iyitwa 'Lyiza', 'Behind the Word', ndetse n'iyitwa 'A Place for Myself.'

Yatangiriye kuri 'Lyiza' ivuga inkuru ku byabaye muri Jenoside yakorewe Abatutsi, kwibuka n'ubumwe n'ubwiyunge. Iyi yerekanywe mu maserukiramuco atandukanye akomeye hirya no hino ku Isi arimo Tribeca Film Festival inamuhesha igihembo muri Carthage Film Festival.

'A Place for Myself' yavugiyemo imibereho n'ubuzima bw'abafite ubumuga rw'uruhu rwera, yamuhesheje ibihembo birimo icyitiriwe Thomas Sankara muri Panafrican Film & Television Festival byatanzwe mu 2017, i Ouagadougou muri Burkina Faso.

Dusabejambo ni umwe bagore bafite ibikorwa biremereye kandi bimaze gucengera mu mahanga ya kure ndetse akabihererwa ibihembo nk'ikimenyetso gishimangira imbaraga n'ubuhanga akoresha.

7. Hope Azeda

Ni we moteri y'iserukiramuco 'Ubumuntu Arts Festival', yaritangije mu mwaka wa 2015. Ubu riri ku rwego mpuzamahanga ndetse uko umwaka utashye umubare w'ibihugu biryitabira ugenda utumbagira.

'Ubumuntu Arts Festival' itegurwa n'Itorero Mashirika [ryashinzwe na Hope Azeda], ryigisha abantu kugira ubumwe biciye mu mikino ya gihanzi yigisha abantu kubana neza mu rukundo n'ubworoherane, gufashanya no kwiga kwikemurira ibibazo.

Hope Azeda amaze imyaka myinshi arwanirira iterambere ry'ubuhanzi bukorwa hakinwa [inkuru n'imico] bigamije kwigisha abantu kugira ubumuntu. Ni na we washinze Itorero Mashirika, yaritangirije muri Uganda mu 1999 nyuma aza kuryimura arizana mu Rwanda abifashijwemo na se umubyara.

Ibikorwa bya Hope Azeda birivugira. Ni we wateguye irushanwa ry'ubwiza rya Miss Rwanda mu 2012, icyo gihe hatowe Mutesi Aurore, umwe mu bakobwa bakunzwe cyane mu gihugu.

Ni we watoje abahanzi barimo Nkusi Arthur, Anita Pendo, Jolis Peace, Andy Bumuntu n'abandi bakuriye muri Mashirika.

8. Emma Claudine

Ntirenganya Emma-Claudine, ni umwe mu bagore bavugiye bwa mbere kuri Radio Salus igishingwa ndetse yayikoreye imyaka myinshi izina rye riranakundwa cyane mu gihugu.

Yamenyakanye mu biganiro byigishaga ibyerekeye kubaka umuryango n'imibanire hagati y'abashakanye, ikiganiro cye cyakunzwe cyane cyitwa 'Imenye nawe'. Iki yagikoraga nk'inzobere mu byerekeye imibanire y'abashakanye ndetse yumvikanaga cyane nk'impuguke mu byerekeye imyanya myibarukiro; nyamara nta masomo ahambaye yabyizemo ahubwo ni ubumenyi kamere yahuzaga no gusoma cyane bityo akabona icyo agaburira abakundaga ibiganiro bye.

Ni umwe mu nkingi za mwamba zatangije itangwa ry'ibihembo bya Salax Awards biciye muri Ikirezi Group, ni nawe kandi wayoboye umuhango wo gutanga ibya mbere mu 2009, icyo gihe yafatanyije na Tidjara Kabendera.

9. Kantarama Gahigiri

Gahigiri ni Umunyarwandakazi wavukiye akanakurira mu Busuwisi, mbere yo gutangira umwuga wo kuyobora film, yakoze imirimo itandukanye mu ikorwa ry'izakunzwe ku Isi nka 'Men in Black 3', 'Curb Your Enthusiasm', 'Suits' n'iyitwa 'Portlandia.'

Mu mishinga ikomeye yakoze ubwe mu minsi yashize harimo iyitwa 'Tapis Rouge', 'ME + U', 'Pinot in the Grass', 'The Elevator', 'Check', na 'Lost Angel Less.' Umushinga mushya afite ni uwa film izakorerwa muri Afurika y'Uburasirazuba yitezweho guhindura ishusho ihindanye umugabane uhabwa mu mahanga.

Ayobora ikorwa rya filime mu nyandiko, imikinire no gushoramo imari. Uyu Munyarwandakazi ukorera ibikorwa mu bihugu bitandukanye ni umwe mu bagite uruhare rukomeye mu mushinga wa Mashariki African Film Festival i Kigali. Mu bindi bikorwa bye harimo gufatikanya n'abanyempano bakizamuka no kubungura ubumenyi.

Gahigiri amaze kwegukana ibihembo mpuzamahanga bikomeye birimo Merit mu bya IndieFest Film Awards, byatangiwe mu Mujyi wa Los Angeles (2017); Best Animated Short Award; mu byatanzwe mu iserukiramuco rizwi nka Berlin Independent Film Festival (2017); Festival Award, mu bya Festival Effervescence mu Bufaransa (2016); Best Directing Award yaherewe i New York muri Chelsea Film Festival (2015).

10. Miss Bahati Grace

Kuva muri Mata 1994 kugeza mu mwaka wa 2009, mu Rwanda nta rushanwa ryo gutoranya Nyampinga ryari ryakaba ku rwego rw'igihugu. Ku itariki ya 18 Ukuboza 2009 nibwo hongeye gutangazwa umukobwa uhiga abandi mu bwiza, imico n'imyifatire. Bahati Grace ni we watowe.

Muri Nyakanga 2012, Bahati Grace yabyaranye umwana w'umuhungu n'umuraperi K8 Kavuyo. Iyi nkuru ikimenyekana benshi bavumiye ku gahera uyu Nyampinga bavuga ko yakoze amahano abandi bakamutega iminsi; ibi byose bigaherekezwa n'ibitutsi yahaswe ku mbuga nkoranyambaga.

Miss Bahati Grace ntiyacitse intege, yarwanye intambara ikomeye guhera ku munsi wa mbere agihura n'ibibazo kugeza ubwo K8 Kavuyo yamutaye akishakira undi mukobwa. Yabaye urugero rwiza nk'umukobwa wagaragaje kudacika intege no guhagarara yemye mu bibazo yanyuzemo.

11.Sherrie Silver

Uyu mubyinnyi w'umunyarwandakazi ni umwe mu bakobwa bakoze iyo bwabaga, mu kuzamura ibendera ry'u Rwanda ku ruhando mpuzamahanga. Mu 2018 yanegukanye igihembo cy'umubyinnyi muri MTV Video Music Awards.

Sherrie Silver ni na Ambasaderi w'Umuryango w'Abibumbye, biciye mu Kigega Mpuzamahanga cy'Iterambere ry'Ubuhinzi (IFAD).

Sherrie Silver w'imyaka 29, yavukiye mu Rwanda ariko akurira mu Bwongereza. Ni umubyinnyi wabigize umwuga, wakoranye n'abahanzi batandukanye bakomeye ku Isi.

Mu bo bakoranye harimo Tiwa Savage, RunTown, Sean Paul, Ice Prince, Wizkid n'abandi. Kwamamara mu buryo bukomeye byaje ubwo yagaragaraga mu ndirimbo ya Childish Gambino yitwa 'This is America'.

12.Kate Bashabe

Catherine Bashabe wamenyekanye nka Kate Bashabe ni umwe mu bakobwa bamamaye mu Rwanda kubera ibikorwa bitandukanye yagiye akora mu myidagaduro no hanze.

Ni umushabitsi mu myidagaduro kuko niwe watangije inzu y'imideli yise 'Kabash Fashion House', icuruza imyambaro itandukanye.

Uretse ibikorwa bijyanye n'imyidagaduro akunda kugaragara mu byo gufasha, urugero nko mu 2021 yasangiye Noheli n'abana 100 bo mu karere ka Bugesera batishoboye.

Mu 2022 nabwo yari mu Murenge wa Kanombe aho yakuriye. Yari yagiye gufasha abatishoboye bahatuye ku munsi w'Umuganura.

Yafashije imiryango 127 igizwe n'abantu 600 ayishyurira ubwisungane mu kwivuza 'Mutuelle de Santé' bufite agaciro ka miliyoni 1,8 Frw, anabaha ibikoresho by'isuku

13.Sonia Rolland

Sonia Rolland Uwitonze, yavukiye i Kigali ku wa 11 Gashyantare 1981. Yabaye Nyampinga w'u Bufaransa mu 2000 akaba ari Umu- métisse wa mbere w'Umunyafurika wageze kuri uwo mwanya wo kuba Nyampinga.

Sonia avuka kuri se Jacques Rolland w'Umufaransa [yitabye Imana ku wa 22 Mutarama 2014], na nyina Landrada w'Umunyarwandakazi.

Uretse kuba yarabaye Nyampinga w'u Bufaransa, Sonia ni umuhanga mu bya sinema akaba n'umukinnyi wa filime ariko wibanda ku zisekeje.

Anakora ibikorwa bitandukanye bigamije gufasha. Niwe washinze umuryango yise 'Maisha Africa', aheruka guhagarika umaze imyaka isaga 22 ushinzwe.

Uyu muryango wafashaga abana b'imfubyi za Jenoside batishoboye, ubaha amafaranga y'ishuri, ibikoresho byo mu rugo, wubakira abadafite inzu batahamo, wubakaga ibigo by'amashuri, ibitaro n'ibikorwa bigamije kuzamura umwana w'Umunyarwanda.

Sonia Rolland ni umwe mu banyarwandakazi bubatse izina muri sinema mu Bufaransa no ku isi yose.

14.Alliah Cool

Isimbi Alliance wamamaye nka Alliah Cool ni umwe mu bagore bakora filime bamaze kwamamara cyane, mu Rwanda no hanze yarwo.

Alliah muri Werurwe 2022 yamuritse magazine yise 'Alliah Mag', igamije gusakaza ibikorwa by'abagore.

Yayimuritse nyuma y'aho tariki 7 Werurwe 2022 yari yakoze igikorwa kigamije gufasha abagore gufunguka mu mutwe bakamenya uko babyaza umusaruro amahirwe babonye, bityo bakabaho neza kuko amahoro ya mbere ahera mu nda. Iki gikorwa yakoze cyari kirimo abagore n'abakobwa 59.

Muri Gashyantare 2022 Alliah Cool yatangajwe muri ba Ambasaderi b'Umuryango w'Abibumbye, bashinzwe kugarura amahoro ku Isi [UN eminent peace ambassador]. Ubu arebererwa inyungu n'Ikigo cy'Abanya-Nigeria cya One Percent International MGT.

Muri Nzeri 2021 yaherukaga gushyira hanze filime 'Alliah the movie', igaruka ku ihohoterwa rikorerwa abagore. Ari kwitegura gushyira hanze filime yise 'Accidental Vacation', iggaruka ku bantu benshi bahuriye mu biruhuko ku buryo butunguranye.

Uyu mugore ukunze kurangwa n'ubugiraneza muri uku kwezi yishyuriye ubwisungane mu kwivuza abagore 50 bo muri Gatsibo, batewe inda zitateguwe.

15.Salima Mukansanga

Salima Mukansanga n'umwe mu bagore bamaze kubaka izina mu rwego mpuzampahanga ndetse amaze kwakira ibihembo mpuzamahanga nk'umugure w'indashyikirwa muri Ruhago y'Isi yose.

Mu 2007 ni bwo Mukansanga yatangiye gusifura nk'umusifuzi wemewe na FERWAFA.

Mu 2012, Abanyarwandakazi babaye abasifuzi mpuzamahanga ba FIFA ari batanu, abo hagati babiri barimo na Mukansanga, abandi batatu ari abo ku mpande. Icyo gihe batangiye kubona imikino mpuzamahanga itandukanye.

Ku rwego mpuzamahanga, Mukansanga yatangiye afite inshingano z'umusifuzi wa kane ndetse byasabye gutegereza imyaka ibiri kugira ngo asifure hagati ubwo Zambia yakinaga naTanzania mu 2014 mu gushaka itike y'Igikombe cya Afurika, ari bwo yitwaye neza bikamufungurira amarembo ku ruhando mpuzamahanga.

Guhera icyo gihe, yatangiye gusifura amarushanwa atandukanye arimo All Africa Games ya 2015 i Brazzaville na CECAFA y'abagore ya 2015 yabereye i Jinja muri Uganda.

Kwitwara neza mu marushanwa atandukanye byatumye Mukansanga Salma agirirwa icyizere cyo kuba mu basifuzi bayoboye Igikombe cya Afurika cy'Abagore cyabereye muri Cameroun mu 2016.

Mu 2018 yasifuye mu Gikombe cy'Isi cy'Abangavu batarengeje imyaka 17 cyabereye muri Uruguay. Harimo n'umukino wa ¼ wahuje u Budage na Canada.

Igikombe cy'isi cy'umwaka washize 2022 cyabereye Qatar , Mukansanga yari mu bagore 3 batoranijwe ku Isi yose basifuye uyu mukino.

Source : https://umuryango.rw/imyidagaduro/article/aba-nibo-bagore-15-bakoze-ibidasanzwe-mu-myidagaduro-showbiz-nya-rwanda-amafoto