Webrwanda Backend

Category: Uncategorized

  • Chriss Eazy yasanze Kirikou mu Burundi bahako… – #rwanda #RwOT

    Chriss Eazy amaze iminsi ari muri iki gihugu mu rugendo rugamije kwagura urugendo rw’umuziki we aho yajyanye n’abo bahuriye mu itsinda rimufasha mu muziki, Giti Business Group.

    Mu Burundi ari kumwe n’umujyanama we Junior Giti, Kabaka usobanura filime, Samy Switch ukora amashusho y’indirimbo z’abahanzi n’abandi.

    Uyu muhanzi kandi yanitwaje Producer Kiizi wo muri Country Records ari nawe wakoze iyi ndirimbo. Junior Giti yabwiye InyaRwanda ko bari bamaze igihe bari mu biganiro na Kirikou byagejeje ku gukorana iyi indirimbo bise ‘Rala’.

    Ati “Ni indirimbo twashakaga cyane, kandi twakoze ibishoboka byose kugirango ikorwe biri mu mpamvu zatumye nitwaza abantu hafi ya bose bagize itsinda.”

    Yavuze ko amashusho y'iyi ndirimbo yakozwe n'abantu babiri, kandi hari n'andi mashusho y'iyi ndirimbo bazafatira mu Rwanda.

    Akomeza ati 'Urumva mu bijyanye na Video nari nitwaje na Sam Switch niwe ukora za ndirimbo zose za Chriss Eazy n’ababyinnyi bose, muri rusange video yakozwe na Sam Switch na John Elarts wo mu Burundi n’abandi bantu bacu. Abo dukorana bose nari nabamanukanye, abadozi n’abandi.'

    Kirikou Akili wakoranye indirimbo na Chriss Eazy, yari aherutse guhurira mu ndirimbo ‘Inzoga n’Ibebi’ na Bruce Melodie ndetse na Double Jay. 

    Uyu muhanzi ariko anazwi mu ndirimbo zirimo ‘Ibisusu’, ‘Binua’, ‘My Story’, ‘Soma Number’, ‘Nuwo’ n’izindi. Ari mu bahanzi bakunze kugaruka cyane mu bitaramo binyuranye bibera muri iki gihugu.

    Chriss Eazy uri mu Burundi muri iki gihe, ni umwe mu bahanzi bafite indirimbo kuri album 'Ni neza' ya Producer Bob yahuriyemo na Bruce Melodie. Ni ubwa mbere, aba bahanzi bombi bahuriye mu ndirimbo- Amateka mashya kuri Chriss Eazy utaramara imyaka itatu mu muziki.

    Chriss Eazy amaze amezi atatu asohoye amashusho y’indirimbo ye yise ‘Edeni’ imaze kurebwa n’abantu barenga miliyoni 2. 

    Uyu muhanzi ariko azwi mu ndirimbo zirimo nka ‘Inana’ yakomeje ubwamamare bwe, ‘Basi sorry’ yakoranye Pass Kizito (Kipa) n’izindi. 

    Chriss Eazy aganira na Kirikou Akili mbere y'ifatwa ry'amashusho y'indirimbo 'Lala' bahuriyemo 

    Producer Kiizi wo muri Country Records niwe wakoze iyi ndirimbo ayikorera mu Burundi

    Chriss Eazy avuga ko hari andi mashusho y'iyi ndirimbo azafatirwa mu Rwanda

    KANDA HANO UREBE AMASHUSHO Y'INDIRIMBO 'EDENI' YA CHRISS EAZY

    “>

    KANDA HANO UREBE AMASHUSHO Y’INDIRIMBO ‘INZOGA N’IBEBI’ YA KIRIKOU, BRUCE MELODIE NA DOUBLE JAY

    “>

    Source : https://inyarwanda.com/inkuru/129532/chriss-eazy-yasanze-kirikou-mu-burundi-bahakorera-indirimbo-amafoto-129532.html

  • Minisitiri w'Intebe Dr Ngirente yagiranye ibiganiro n'Umuyobozi ushinzwe Afurika mu Muryango 'ILO' – #rwanda #RwOT

    Yari kumwe n'Umuyobozi Mukuru Wungirije ushinzwe Ibiro by'Umuyobozi Mukuru wa ILO, André Bogui. Bombi bari mu Rwanda aho bitabiriye Inama Mpuzamahanga y'Umurimo ibera i Kigali kuva ku wa 15-19 Gicurasi uyu mwaka.

    Minisitiri w'Abakozi ba Leta n'Umurimo, Rwanyindo Kayirangwa Fanfan, na we yakurikiranye ibi biganiro.

    Cynthia Samuel-Olonjuwon yatangaje ko ibiganiro byabo byibanze ku ngingo zitandukanye zirimo imigendekere y'iyi nama u Rwanda rwakiriye aho yavuze ko rwesheje umuhigo hashingiwe ku mubare w'abakozi n'abaminisitiri ndetse n'ingingo zaganiriweho mu byo guhanga imirimo myinshi kandi myiza binyuze mu ishoramari haba mu Rwanda no ku mugabane wose.

    Izindi ngingo zagarutsweho ni ijyanye n'inkunga ILO iteganya gutanga muri gahunda y'igihugu yo kwihutisha Iterambere, NST1 n'ubutumire Umuyobozi Mukuru wa ILO yamuhaye ngo ashyikirize Perezida Kagame bwo kuzitabira Inama Mpuzamahanga yiga ku Murimo iteganyijwe i Genève muri Kamena izaba yiga ku guteza imbere ubukungu n'imibereho myiza y'abaturage.

    Ati 'Iyi nama ni ingenzi kuko tubona u Rwanda rwarafashe iya mbere mu kwimakaza imibereho myiza y'abaturage kandi twizeye ko Perezida azahura n'abandi bayobozi ku rwego rw'Isi akabagaragariza intambwe u Rwanda rwateye mu bijyanye no kuzamura ubukungu, kubungabunga ibidukikije no kuvana abaturage mu bukene.'

    Minisitiri w'Abakozi ba Leta n'Umurimo, Rwanyindo Kayirangwa Fanfan, yavuze ko nubwo politiki yo guhanga imirimo myinshi nk'uko byari biteganyijwe mu ngamba zo kwihutisha iterambere (kuva mu 2017-2024: NST1) yabangamiwe na Covid-19 hari izindi mbaraga zigenda ziboneka ku bufatanye n'izindi nzego.

    Ati 'NST1 isigaje umwaka umwe ikarangira aho intego kwari uguhanga imirimo miliyoni 1,5 buri mwaka. Kubera Covid-19 twasubiye inyuma gato ariko nyuma ya hari izindi mbaraga tugenda tubona dufatanyije n'abaterankunga kugira ngo tubashe kongera gusubira kuri iyo ntego. Dufite n'izindi gahunda aho tubona ko dushobora kwifashisha imishinga minini ishobora gutanga akazi ku bantu benshi.'

    Inama Mpuzamahanga y'Umurimo ku nshuro ya 19 yateguwe ku bufatanye bw'u Rwanda n'Umuryango Mpuzamahanga wita ku Murimo.

    Yitabiriwe n'abaminisitiri, abanyepolitiki, abahagarariye amashyirahamwe y'abakozi, imiryango mpuzamahanga, imiryango itegamiye kuri Leta, za kaminuza n'ibigo by'ubushakashatsi, sosiyete sivile n'abandi bayobozi mu nzego zitandukanye. Intumbero yayo ni ukungurana ibitekerezo no gusangira ubunararibonye hagamijwe kureba icyakorwa mu guteza imbere umurimo.

    Ibiganiro by’impande zombi byagarutse ku bikorwa bigamije guhanga imirimo myinshi kandi myiza

    Umuyobozi Wungirije wa ILO ushinzwe Afurika, Cynthia Samuel-Olonjuwon; Minisitiri w'Intebe, Dr Edouard Ngirente n'Umuyobozi Mukuru Wungirije ushinzwe Ibiro by'Umuyobozi Mukuru wa ILO, André Bogui

    Umuyobozi Mukuru Wungirije ushinzwe Ibiro by'Umuyobozi Mukuru wa ILO, André Bogui (Ibumoso); Umuyobozi Wungirije wa ILO ushinzwe Afurika, Cynthia Samuel-Olonjuwon; Minisitiri w'Intebe, Dr Edouard Ngirente na Minisitiri w'Abakozi ba Leta n'Umurimo, Rwanyindo Kayirangwa Fanfan

    Source : http://igihe.com/amakuru/u-rwanda/article/minisitiri-w-intebe-dr-ngirente-yagiranye-ibiganiro-n-umuyobozi-ushinzwe

  • Kashobotse akabakoresha permis 'z'indyogo' Police ivuga ko yahagurukiye – Umuryango.rw #rwanda #RwOT

    Ibi byatangajwe kuri uyu wa Kane tariki 18 Gicurasi 2023, mu gikorwa Polisi yarimo cyigamije kwigisha abantu kwitwararika mu muhanda, hagamijwe kunoza umutekano wo mu muhanda.

    Umuvugizi wa Polisi y'Igihugu, CP John Bosco Kabera yavuze ko mu rwego rwo kugira inama abantu gukoresha uruhushya rwo gutwara ibinyabiziga, Polisi igiye gukora umukwabo ku bantu bafite uruhushya mpimbano rwo mu muhanda.

    CP Kabera yagize ati 'Umuntu tuzajya dufata uruhushya rwe tuzajya turujyana hariya, ni dusanga atari umwimerere, akurikiranwe.'

    Yakomeje ati 'Abantu bafite impushya zo hanze. Icya mbere tubagira inama yo kuza bakazihinduza aho bakwiye kuba babikorera. Ariko nanaruzana, tukarukeka, tuzarujyana kurusuzumisha.

    Niturusuzumisha tugasanga yarari guhinduza uruhushya yacuze, tuzarufata nk'urudafite agaciro, azaregwa impapuro mpimbano, azabikurikiranwaho. Batanga amafaranga, batanga ibiki ntabwo byemewe.'

    Guhindurirwa uruhushya ugahabwa urwo mu Rwanda, Polisi ivuga ko wandikira umuyobozi w'ishami rya Polisi rishinzwe gukoresha ibizamini, ndetse no gutanga impushya usaba guhindurirwa uruhushya rwo gutwara binyabiziga.

    Ibaruwa yo gusaba guhindurirwa Perimi iherekezwa n'ibyerekana ko wabaye muri icyo gihugu, ukabyohereza kuri email.

    Ingingo ya 276 yo mu itegeko riteganya ibyaha n'ibihano muri rusange ivuga ko, Umuntu wese, ku bw'uburiganya, wandika, wandikisha ibintu bidahuye n'ukuri cyangwa ukora imenyekanisha ritari ryo afatwa nk'uwakoze icyaha cyo gukora ibihimbano.

    Iyo abihamijwe n'urukiko, ahanishwa igifungo kitari munsi y'imyaka 5 ariko kitarenze imyaka 7 n'ihazabu y'amafaranga y'u Rwanda atari munsi ya miliyoni 3 ariko atarenga miliyoni 5 cyangwa kimwe gusa muri ibyo bihano.

    Polisi igira inama abanyarwanda gukoresha impushya zemewe n'amategeko, n'abafite inyamahanga bakagirwa Inama yo kuzihinduza.

    Source : https://umuryango.rw/amakuru/mu-mahanga/umutekano/article/kashobotse-akabakoresha-permis-z-indyogo-police-ivuga-ko-yahagurukiye

  • Umukozi wo murugo ukekwaho kwica nyirabuja agatoroka yafashwe avuga (…) – Umuryango.rw #rwanda #RwOT

    Uyu witwa Dusabimana Emmanuel, akekwaho kwica Mukarugomwa Joséphine yakoreraga akazi ko mu Rugo wari utuye mu Mudugudu wa Rusebeya, Akagari ka Rwoga, Umurenge wa Kabagari, agahita atoroka.

    Ubu bwicanyi bwabaye tariki 07 Mata 2023, bwamenyekanye ubwo umusaza wabanaga na nyakwigendera yatahaga, yagera mu rugo agakomanga ariko akabura umukinguriria, agahita yiyambaza abaturanyi baje kakica urugi, bagasanga nyakwigendera yapfuye.

    Dusabimana Emmanuel ukekwaho kumwica, icyo gihe yabuze kuko yahise atoroka, ndetse inzego zishinzwe iperereza zikaba zarahise zitangira kumushakisha.

    Nyuma y'ukwezi kurengaho iminsi, uyu musore uri mu kigero cy'imyaka 20, yafatiwe mu Karere ka Kamonyi, umusibo ejo hashize tariki 16 Gicurasi 2023.

    Amakuru avuga ko akimara gufatwa, yavuze ko ari mu bagize uruhare muri ubwo bwicanyi, ariko ko hari abandi bafatanyije, ndetse ko n'ibihumbi 260 Frw bahise batwara nyakwigendera, we yatwayemo ibihumbi 60 Frw.

    Hari abandi bagabo babiri kandi bahise bafatwa nyuma yuko iperereza rigaragaje ko bashobora kuba baragize uruhare muri ubu bugizi bwa nabi.

    Gasasira François Regis uyobora Umurenge wa Kabagari, yemeje ko uyu musore yamaze gufatwa na RIB, ubu akaba acumbikiwe kuri Sitasiyo ya Kabagari.

    Source : https://umuryango.rw/amakuru/mu-mahanga/umutekano/article/umukozi-wo-murugo-ukekwaho-kwica-nyirabuja-agatoroka-yafashwe-avuga-n

  • Imyambarire idasanzwe y'umukunzi mushya wa Kanye West ikomeje kuvugisha (…) – Umuryango.rw #rwanda #RwOT

    Ni mu mafoto yashyizwe hanze n'umuhanzi w'imideli Mowalola Ogunlesi usanzwe akorana n'umuraperi Kanye West Ye mu guhanga imyambaro n'inkweto by'uruganda rwe Yeezy.

    Muri aya mafoto yavugishije benshi, Bianca Censori yari yambaye hafi ubusa uretse akenda gato gatwikiriye mu gituza he, ndetse n'inkweto zo mu bwoko bwa 'Boot Heels' zizamuye kumaguru zikanahisha amatako ye.

    PageSix yatangaje ko icyavugishije abantu ari uko inyuma he ntamwambora namba yari yambaye uretse akenda gakoze mu kimenyetso cy'umusaraba yambaye nk'umwenda w'imbere.

    Ibi byatumye benshi mu bakoresha imbuga nkoranyambaga bavuga ko imyambarire ya Bianca Censori isuzugura imyemerere ya gikirisitu kuko yakoresheje ikimenyetso cy'umusaraba mu buryo butemewe.

    Ni mu gihe abandi bibazaga impamvu Kanye West Ye yaba yaretse umugore we ngo yambare gutya kandi we yiyita umukirisitu dore ko akirukumwe na Kim Kardashian yigeze kumusaba kutongera kwambara imyenda igaragaza imiterere ye kuko yavugaga ko ataribyo Imana ikunda.

    Kugeza ubu amafoto ya Bianca Censori akomeje guhererekanywa ku mbuga nkoranyambaga ari nako atavugwaho rumwe cyane cyane mu bafite imyemerere ya gikirisutu bavuga ko ikimenyetso cy'umusaraba cyakoreshejwe ari agasuzuguro.

    Imyambarire y'umugore wa Kanye West ntiri kuvugwaho rumwe

    Source : https://umuryango.rw/imyidagaduro/article/imyambarire-idasanzwe-y-umukunzi-mushya-kanye-west-ikomeje-kuvugisha-benshi

  • SADC mu mugambi karundura wo gusimbura Ingabo za EAC muri RDC – Umuryango.rw #rwanda #RwOT

    Inama y'umutekano ya SADC byitezwe ko izabera i Windhoek muri Namibiya mu cyumweru cya nyuma cy'uku kwezi kwa Gicurasi.

    Ku murongo w'ibyigwa harimo kurebera hamwe uko Ingabo za EAC ziri muri Congo zavanwayo, ndetse na gahunda yo kugena ingengo y'imari Ingabo za SADC zizasimburayo zizakoresha.

    Ku wa Mbere tariki ya 08 Gicurasi ni bwo SADC yemeye ko izohereza Ingabo muri RDC, mu rwego rwo gufasha iki gihugu kwivuna imitwe yitwaje intwaro ikorera mu burasirazuba bwacyo.

    Ni umwanzuro wafatiwe mu nama y'abakuru b'ibihugu bigize SADC yabereye i Windhoek muri Namibie.

    Nyuma y'umunsi umwe iyi nama ibaye Perezida Félix Antoine Tshisekedi yanenze umusaruro w'Ingabo za EAC mu gihugu cye, avuga ko mu gihe zaba zidahinduye imikorere zizirukanwa ku butaka bwa Congo bitarenze mu kwezi gutaha kwa Kamena.

    Umuryango wa SADC n'ubwo wemeye kohereza Ingabo muri RDC, amakuru avuga ko ibihugu bitavuga rumwe ku cyemezo cyo kuzohereza.

    Kugeza ubu Namibiya yonyine ni yo bivugwa ko ishyigikiye gahunda yo kohereza Ingabo muri Congo.

    Angola iri mu bihugu 16 bigize uyu muryango ku ruhande rwayo yo ivuga ko itazatanga Ingabo zayo muri Brigade y'iza SADC zizajya muri Congo; ko ahubwo yo yifuza gukomeza inshingano isanganywe zo kuba umuhuza mu bibazo bya Congo.

    Ibihugu bya Botswana na Zimbabwe ku rundi ruhande byo ngo byeruye ko bitazigera bigira Ingabo bitanga; mu gihe Tanzania, Afurika y'Epfo na Malawi byifuza kwifashisha Ingabo bisanganywe muri RDC (ziri muri MONUSCO) kuva muri 2013.

    Source : https://umuryango.rw/amakuru/mu-mahanga/umutekano/article/sadc-mu-mugambi-karundura-wo-gusimbura-ingabo-za-eac-muri-rdc

  • Itangazo: KAYIRANGA Hakim Omar yasabye guhindura amazina akitwa MASUDI (…) – Umuryango.rw #rwanda #RwOT

    Uwitwa KAYIRANGA Hakim Omar yasabye guhindura amazina mu buryo bwemewe n'amategeko MASUDI Hakimu Omar Prince mu bitabo by'irangamimerere.

    Impamvu atanga zituma asaba guhindura amazina akaba ari uko ari amazina yakoreshaga kuva yatangira kwiga.

    Source : https://umuryango.rw/amatangazo/article/itangazo-kayiranga-hakim-omar-yasabye-guhindura-amazina-akitwa-masudi-hakimu

  • ITANGAZO RYA CYAMUNARA Y'UMUTUNGO WIMUKANWA UGIZWE N'UBUKI BUHEREREYE (…) – Umuryango.rw #rwanda #RwOT

    UMUHESHA W'INKIKO W'UMWUGA, ARAMENYESHA ABANTU BOSE KO AZATEZA MURI CYAMUNARA UMUTUGO WIMUKANWA UGIZWE N'UBUKI AMAJEREKANI 624 , UHEREREYE BUGESERA-JABANA-KABUYE-MURAMA.

    IPIGANWA MU CYAMUNARA MU BURYO BW'IKORANABUHANGA RIZATANGIRA TARIKI YA 23/05/2023 SAA SABA Z'AMANYWA KUGEZA 30/05/2023 SAA SABA Z'AMANYWA.

    WIFUZA IBINDI BISOBANURO YASOMA ITANGAZO RIRI HANO HASI CYANGWA SE AGAHAMAGARA:+0788581602.

    Source : https://umuryango.rw/amatangazo/article/itangazo-rya-cyamunara-y-umutungo-wimukanwa-ugizwe-n-ubuki-buherereye-bugesera

  • Ibihugu bitandatu bya Afurika mu rugamba rwo kunga u Burusiya na (…) – Umuryango.rw #rwanda #RwOT

    Perezida wa Afurika y'Epfo, Cyril Ramaphosa, yatangaje ko Perezida w'u Burusiya Vladimir Putin na Perezida wa Ukraine Volodymyr Zelensky bemeye kwakira izo ntumwa za Afurika nizijyayo.

    Perezida Ramaphosa yavuze ko mu mpera z'icyumweru gishize yavuganye kuri telefone na Ramaphosa ndetse na Zelensky, akabagezaho uburyo ibihugu bitandatu bya Afurika byateguye bwakwifashishwa mu kurangiza intambara.

    Ibyo bihugu ni Afurika y'Epfo, Sénégal, Congo, Uganda, Misiri na Zambia.

    Umunyamabanga Mukuru wa Loni, Antonio Guterres ndetse n'Umuryango wa Afurika Yunze Ubumwe basobanuriwe kuri iyo gahunda ibyo bihugu bifite igamije guhosha intambara.

    Ntabwo Perezida Ramaphosa yatangaje igihe izo ntumwa za Afurika zizagerera muri Ukraine cyangwa u Burusiya.

    Bibaye nyuma y'iminsi Afurika y'Epfo iri gushyirwa mu majwi ku bufasha icyo gihugu giha u Burusiya, ndetse Leta Zunze Ubumwe za Amerika ziherutse gushinja icyo gihugu koherereza intwaro u Burusiya kandi buri mu bihano.

    Ibindi bihugu byagerageje ubuhuza hagati ya Ukraine n'u Burusiya ntabwo byatanze umusaruro.

    Source : https://umuryango.rw/amakuru/mu-mahanga/politiki/article/ibihugu-bitandatu-bya-afurika-mu-rugamba-rwo-kunga-u-burusiya-na-ukraine

  • U Burundi bwatatse ko Abanyarwanda bajya gucukurayo amabuye y'agaciro – #rwanda #RwOT

    Muremure ni umugezi ugabanya Intara y'Amajyepfo mu Karere ka Nyaruguru ndetse n'Intara ya Kayanza mu Burundi. Uruzinduko Col. Cishahayo yahagiriye rwari rugamije kugenzura uburyo amabuye y'agaciro acukurwa ndetse no 'kureba aho abantu bo mu Rwanda bacukuye amabuye mu minsi ishize'.

    Urwo rugendo yarukoze ari kumwe n'inzego z'umutekano zirimo Polisi n'Igisirikare, arangije agirana ikiganiro n'abaturage bo muri ako gace, ababwira ko bagomba kuba maso ntihagire umuntu ujyayo gucukura amabuye.

    Aho hantu bivugwa ko hari amabuye y'agaciro ya Coltan. Ku ruhande rw'u Rwanda aho, nta bucukuzi bwemewe n'amategeko buhakorerwa kuko n'umuntu wari warahawe uruhushya ngo acukure, rwarangiye mu 2019, kuva icyo gihe ibyo bikorwa byarahagaze.

    Ni ahantu hagati y'imisozi, ndetse mu nkengero zayo mu Burundi, haracyakorerwa ibikorwa by'ubucukuzi gusa si hafi y'u Rwanda, muri make si hafi y'aho havugwa.

    Aho havugwa ko Abanyarwanda bajya kwiba amabuye, Abarundi bahacukuraga amabuye mu buryo bwemewe n'amategeko, na bo bamaze amezi atandatu bahagaritse ibyo bikorwa.

    Umwe mu bantu bazi neza aka gace yabwiye IGIHE ati 'Ni ahantu hari akagezi gato wadahisha amazi ibasi, si umugezi ufatika, bivugwa ko mu mucanga waho habamo Coltan. Imisozi yo hakurya i Burundi ho baracukura.'

    Aha hantu bivugwa ko hari amabuye y'agaciro ya Coltan acukurwa mu Burundi

    Abajya gucukura aho hantu ni abajura

    Ubuyobozi bw'Intara y'Amajyepfo busobanura ko abantu bakora ubucukuzi bw'amabuye y'agaciro muri uwo mugezi, ari ababa bagiyeyo mu bikorwa binyuranyije n'amategeko.

    Guverineri Kayitesi Alice yabwiye IGIHE ko ku ruhande rw'u Rwanda, hari Inkeragutabara zishinzwe gukumira ko hari abantu bambuka bajya mu bikorwa by'ubucukuzi butemewe, ndetse ko no ku rubande rw'u Burundi haba hari abashinzwe umutekano.

    Ati 'Hajya habamo amabuye y'agaciro ariko ababikora ni ababikora mu buryo butemewe. Hari abaturage bamwe [babikora], nibuka ko kuva naba Guverineri, hari inshuro imwe byabayeho aho abaturage bagiyemo gucukura amabuye y'agaciro mu buryo butemewe, ariko ni igikorwa dufatanya cyane cyane na Musitanteri na Meya hakabamo kubica intege no kugaragaza ko bitemewe ku mpande zombi. Ni umugezi ntushobora kumenya ngo aha ni mu Rwanda, aha ni mu Burundi.'

    Guverineri Kayitesi yavuze ko abaturage bafatiwe muri ubwo bucukuzi butemewe bakurikiranwa, ndetse ko n'ubu hari abari imbere y'inzego z'ubutabera.

    Ati 'Turanateganya ko Musitanteri wabo na Meya wa Nyaruguru bongera bagahura n'abaturage aho bagaca intege ibyo bikorwa. Ababikora babikora mu buryo butemewe.'

    Amakuru IGIHE ifite ni uko hari ubushakashatsi bugamije kureba niba hari amabuye y'agaciro ari mu Karere ka Nyaruguru ku buryo yacukurwa mu buryo bwemewe n'amategeko.

    Umwe mu bavuka muri aka karere waganiriye na IGIHE yagize ati 'Amabuye twe turayafite. Twakuze batubwira ko n'izo za zahabu zihari. Twavutse twumva abantu ngo bagiye gucukura Zahabu.'

    Kuri uyu musozi hari umugezi ugabanya Intara y'Amajyepfo mu Karere ka Nyaruguru ndetse n'Intara ya Kayanza mu Burundi

    U Rwanda rwacuruje amabuye y'agaciro ya miliyari zirenga 247 Frw mu mezi atatu

    Ikigo gishinzwe Mine, Peteroli na Gaz mu Rwanda (RMB) cyatangaje ko mu mezi atatu ya mbere y'umwaka wa 2023, ubucukuzi bw'amabuye y'agaciro bwinjirije u Rwanda miliyoni 247.480.699,40$ (arenga miliyari 247 Frw).

    Kuva muri Mutarama-Werurwe 2023, u Rwanda rwacuruje amabuye yo mu bwoko bwa Gasegereti angana n'ibilo 316.093 muri Mutarama, yinjije 5.436.480$, muri Gashyantare hacuruzwa ibilo 320.555 yinjije 5.398.054$ naho muri Werurwe hacuruzwa ibilo 363.701 yinjiza 5.903.483$.

    Umusaruro wa Coltan u Rwanda rwohereje mu mahanga wariyongereye, aho muri Mutarama hacurujwe ibilo 124.514 byinjiza 5.911.646$, muri Gashyantare hacuruzwa ibilo 138.205 bya 6.985.467$ naho muri Werurwe hacuruzwa ibilo 213.065 bya 11.415.082$.

    Amabuye ya Wolfram yacurujwe muri Mutarama yanganaga n'ibilo 129.407 bya 1.723.665$, muri Gashyantare hacurujwe ibilo 211.449 bya 2.973.988$ naho muri Werurwe hacuruzwa ibilo 231.844 bya 3.261.757$.

    Amabuye ya Zahabu ni yo yinjirije u Rwanda cyane kuko muri Mutarama rwacuruje ibilo 850 byinjiza 53.234.196,20$; muri Gashyantare hacurujwe ibilo 745 bya 46.529.585,80$ naho muri Werurwe hacurujwe ibilo 1.465 bya 90.519.870$.

    Andi mabuye y'agaciro yacurujwe angana n'ibilo 2.545.274 bya 5.103.373,9$ muri Mutarama, ibilo 500.971 bya 872.301,6$ muri Gashyantare n'ibilo 827.041 bya 2.211.749$ muri Werurwe.

    Muri rusange, kuva muri Mutarama kugeza muri Werurwe 2023, u Rwanda rwohereje mu mahanga ibilo 5.925.199 bifite agaciro ka 247.480.699,40$.

    Mu 2022, amabuye y'agaciro yoherezwa mu mahanga yinjirije u Rwanda agera kuri Miliyoni 683 z'Amadolari (hafi Miliyari 740 Frw), ni ukuvuga ko yazamutseho 52,3 %, ugereranyije na Miliyoni 448 z'Amadolari (hafi Miliyari 486 Frw) rwari rwinjije mu mwaka wabanje.

    Guverineri w'Intara ya Kayanza mu Burundi, Col. Rémy Cishahayo, aherutse gusaba abaturage kuba maso, bakajya bacunga umuntu wese ujya kubiba amabuye y'agaciro

    Iyi nama yahuje ubuyobozi bw’Intara ya Kayanza n’abaturage

    Source : http://igihe.com/amakuru/u-rwanda/article/u-burundi-bwatatse-ko-abanyarwanda-bajya-gucukurayo-amabuye-y-agaciro