Category: Uncategorized

Kuri uyu wa Kane tariki 18 Gicurasi 2023 nibwo basuye Urwibutso rwa Jenoside rwa Kigali ruherereye ku Gisozi bunamira imibiri y'Abatutsi basaga ibihumbi 250 baharuhikiye bishwe muri Jenoside.

Ubwo basuraga uru rwibutso basobanuriwe amateka ya Jenoside uko yahemberewe n'ingengabitekerezo y'amacakubiri hagati mu baturage kugeza ishyizwe mu bikorwa abasaga miliyoni imwe bakahasiga ubuzima.

Nyuma yo gusobanurirwa ibyaranze aya mateka berekwa amwe mu mashusho yaranze ibi bihe by'icuraburindi, bunamiye Abatutsi baruhukiye ku Rwibutso rwa Gisozi.

Muri iki gikorwa habayeho gutanga ubuhamya kuri bamwe mu bakozi ba Serena Hotel barokotse Jenoside, urugendo rwabo mu bihe babayeho by'amacakubiri, ishyirwa mu bikorwa rya Jenoside yatwaye ababo bagasigara ari impfubyi, baboneraho n'umwanya wo gushima Inkotanyi zabagaruriye icyizere cy'ubuzima nyuma y'iminsi myinshi y'icuraburindi bari barimo.
Ubuyobozi bw'Akarere ka Nyarugenge bwasabye abakozi n'abayobozi ba Serena Hotel kugira uruhare mu kuvuga amateka nyakuri yaranze Jenoside yakorewe Abatutsi.

Umuyobozi uhagarariye Ibuka mu Karere ka Nyarugenge, Rukemampunzi Jean Claude ubwo yagiranaga ikiganiro n'abakozi ba Serena Hotel yongeye kubibutsa inshingano bafite zo gusangiza abandi amateka nyakuri kuri Jenoside nk'abantu bakora ibikorwa bituma bahura n'abantu b'ingeri zose baturutse hirya no hino ku Isi.

Yagize ati 'Nimwe mufite uruhare, ni mwe muri imbere mu kwerekana no gusesengura amateka y'igihugu cyacu muyabwira abatayazi, munabereka ingamba dufite kugira ngo dukomeze twubake igihugu cyacu.'

Rukemampunzi yaboneyeho umwanya wo gushima Leta y'Ubumwe bw'Abanyarwanda ikomeza kuba hafi y'abarokotse Jenoside yakorewe Abatutsi ndetse no guha agaciro umwanya wo kwibuka abazize uko bavutse.

Umuyobozi Mukuru wa Kigali Serena Hotel, Daniel Sambai yavuze ko igihe cyo kwibuka ari inshingano za buri wese mu bagize Serena Hotel ndetse ari n'igihe cyo kwifatanya na bamwe mu bakozi bayo babaye muri ibi bihe bibuka ababo baguye muri Jenoside.

Ati 'Buri mwaka tugira umwanya tuza hano mu gihe cyo kwibuka abaguye muri Jenoside yakorewe Abatutsi mu 1994. Ni ibihe biba bigoye byo kwibuka ubuzima bw'abantu baguye muri icyo gihe, ibihe banyuzemo n'icyo bazize, aba ari ibihe bikomeye kandi bitoroshye.'

'Kuri twe nka Serena Hotel dufite abakozi benshi bahuye n'ihungabana ry'ibi bihe bya Jenoside, aba ari inshingano zacu rero kuza kwifatanya na bo tukibuka turi kumwe kandi tuzahora twifatanya na bo igihe cyose.'

Yakomeje avuga ubuzima bugomba gukomeza ariko mu gihe bamwe muri bo badashoboye bagomba kubaba hafi no kubagenera ubufasha bukenewe.

Umuyobozi Nshingwabikorwa w'Akarere ka Nyarugenge, Ngabonziza Emmy yashimiye ubuyobozi bwa Serena Hotel mu kugira uruhare mu bikorwa byo kwibuka ndetse yongera gushimangira ko kwibuka ari inshingano za buri wese.

Ati 'Insanganyamatsiko uyu munsi dufite iratwibutsa ko dufite inshingano yo gukomeza kwibuka abazize Jenoside yakorewe Abatutsi ariko tuniyubaka. Icyo bivuze ni uko Kwibuka ari ihame kandi ni inshingano dufite nk'Abanyarwanda; tuzabikora igihe cyose tukiriho.'

Yakomeje avuga ko buri muntu wese yaba umuto cyangwa umukuru akwiye guharanira kwigisha uburere mbonera gihugu aho ari hose aharanira kurwanya ingengabitekerezo ya Jenoside kugira ngo ibyabaye bitazasubira ukundi.

Umuyobozi Mukuru wa Kigali Serena Hotel, Daniel Sambai ashyira indabo ku mva zashyinguwemo Abatutsi ku Rwibutso rwa Gisozi

Umuyobozi w'Ingabo mu Karere ka Nyarugenge, Gasabo na Kicukiro, Lt Col Aimable Rukundo yunamira abaruhukiye ku Rwibutso rwa Gisozi

Umuyobozi uhagarariye Ibuka mu Karere ka Nyarugenge, Rukemampunzi Jean Claude yunamira abazize Jenoside yakorewe Abatutsi

Abayobozi n'abakozi ba Serena Hotel bibutse ku nshuro ya 29 Jenoside yakorewe Abatutsi; iki gikorwa cyabereye ku Rwibutso rwa Jenoside rwa Kigali

Umuyobozi Nshingwabikorwa w’Akarere ka Nyarugenge, Ngabonziza Emmy

Umuyobozi Mukuru wa Kigali Serena Hotel, Daniel Sambai

Abayobozi batandukanye bitabiriye uyu muhango

Abayobozi b’Umujyi wa Kigali biftanyije n’abakozi ba Serena Hotel kwibuka ku nshuro ya 29 Jenoside yakorewe Abatutsi

Umuyobozi w'Urwibutso rwa Kigali, Nagiruwubuntu Dieudonné yashimiye ubuyobozzi bwa Serena Hotel mukuzirikana ibihe byo kwibuka

Umwe mu bakozi ba Serena Hotel warokotse Jenoside yakorewe Abtutsi atanga ubuhamya bw’uko yarakotse

Umuyobozi uhagarariye Ibuka mu Karere ka Nyarugenge, Rukemampunzi Jean Claude yibukije abakozi ba Serena Hotel ko bafite inshingano zo kwigisha amateka yaranze Jenoside yakorewe Abatutsi mu 1994

Ikipe ya APR y’abagore mu mukino wa Volleyball yageze muri ¼ cy’imikino nyafurika irimo kubera muri Tunisia.

APR WVC yagiye muri iki gihugu ihagarariye u Rwanda nyuma yo kwegukana shampiyona, yisanze mu itsinda 4 kumwe na Zamalek yo mu Misiri, Litto Team Volleyball yo muri Cameroun na Nigeria Customs Services yo muri Nigeria.

Muri rusange yari amakipe 16 yitabiriye yagabanyijwe mu matsinda 4, ariko mu matsinda baba bakina kugira ngo barebe uko bazahura bitewe n’uko bitwaye mu itsinda.

APR WVC yaje gusoza ku mwanya wa 2 inyuma ya Zamalek ya mbere, ni nyuma yo gutsinda Nigeria Customs Services amaseti 3-1 (19-25, 25-13, 25-11 na 25-8). Yatsinzwe na Zamalek 3-0 (18-25, 16-25 na 11-25) ni mu gihe yatsinze Litto amaseti 3-2 (21-25, 25-21, 25-8, 25-27 na 15-13.)

Ibi byari bivuze ko igomba guhura n’iya 3 mu itsinda B ari yo Asac Salitique (SAL) yo muri Senegal muri 1/8 ikaza kuyisezerera igera muri ¼ iyitsinze amaseti 3-0 (25-16, 25-19 na 25-13).

Uyu munsi saa 17h nibwo APR WVC iri bukine umukino wa ¼ aho iri buhere na CFC yo muri Tunisia iri bube iri imbere y’abafana bayo.

APR WVC yageze muri 1/4 cy’irushanwa Nyafurika

Bishobora kuba biterwa n'impamvu zinyuranye, buri wese yakora isesengura rye! Ariko ntuzatungurwe no kuba umuhanzi yakoranye indirimbo na mugenzi we akaba ariwe uhihibikanira mu kuyimenyekanisha, mugenzi we akaruca akarumuri nk'aho ntacyabaye.

Ashobora no kumutumira mu gitaramo yateguye akamwishyura, akanamugaragaza mu bazitabira igitaramo cye, ariko bikagera ku munsi wa nyuma wa muhanzi atarabwira abakunzi be cyangwa se abamukurikira ko ari umwe mu bazaririmba muri icyo gitaramo! Ubanza biterwa n'amasezerano baba bagiranye, cyangwa se kutishimira iterambere rya mugenzi we, wikorere isesengura….

Mu ijoro ryo kuri uyu wa Kane tariki 18 Gicurasi 2023 mu gitaramo cya Gen- Z Comedy, umunyarwenya Mugisha yumvikanishije ko imyaka irenga 10 amaze mu ruganda rwa Cinema n'ibindi bikorwa bishamikiye ku buhanzi, byagize urufatiro rukomeye kugeza n'uyu munsi bitewe n'imbaraga yashyizemo no kuba ababyeyi be barabonye ko Tom Close nawe yahiriwe mu rugendo rw'ubuhanzi.

Clapton yavuze ko mu bihe bitandukanye iyo ahuye na Tom Close yongera kumwibutsa ishimwe afite ku mutima ku bw'imyitwarire myiza imuranga mu buhanzi, yatumye ababyeyi be babona ko 'bya bintu bishoboka' kandi 'bidaherekezwa no kuba mu biyobyabwenge'.

Ati 'Njyewe ngira ngo buri munsi iyo duhuye ndabikubwira y’uko wambereye icyitegererezo byatumye ababyeyi banjye banyemerera gukora akazi kanjye ku buhanzi. Nk’uko nabikubwiye buri gihe bambwiraga ko nimba umusitari nzaba ikirara nkajya mu biyobyabwenge bagahora bafite ubwo bwoba nkabaha urugero rwa Tom Close bigatuma bavuga ngo ubwo ukurikira [Ureberera] Tom Close genda ubikore. Ibyo nzahora mbikubwira ugihari.”

Tom Close yavuze ko asanzwe ari umufana w'ibihangano bya Clapton umunsi ku wundi, kandi ko akunda uburyo agaragaza itandukaniro na bagenzi be bahuriye muri uyu mwuga.

Uyu muhanzi wavuyemo umuganga, yavuze ko abantu batandukanye n'iyo mwaba muvukana, bityo buri wese afite umurongo w'ubuzima 'bwawe utandukanye n'undi uwo ari we wese ku Isi'.

Tom uherutse gusohora album 'Essence' avuga ko buri wese ari mu mwanya we, ntawe ubereye mu mwanya undi. Avuga ko kugira ngo ugere ku nzozi zawe 'mbere na mbere ni ukuzisobanukirwa'.

Akomeza ati 'Ikindi ukamenya ko ni wowe muntu wenyine ufite ubushobozi bwo kuba wowe kurusha abandi bose basigaye ku Isi.'

Tom avuga ko guharanira kugera ku nzozi zawe, bisaba kudaharanira kuba undi ahubwo 'ugomba gukora ibyo ugomba gukora'.

Uyu munyamuziki avuga ko urugendo rwo kwisobanukirwa ukamenya icyo ushaka gukora, uhera ku byo wowe wumva ko bikoreheye, abandi bakabona bikomeye.

Umunyarwenya Fally Merci utegura ibi bitaramo bya 'Gen-Z Comedy' agaragaza ko bimaze kugera ku rwego rwiza, ariko kandi agasaba gukomeza gushyigikirwa.

Ati 'Njyewe ndishimye bitewe n'aho igeze. Ni urubuga rw'abanyarwenya, akenshi mwabonye abantu mutazi, ni ukumurika abanyarwenya ku rwego rw'Igihugu. Twashatse gushyiraho urubuga ku bantu bashaka guseka nkawe uri hano. Tuzakomeza kugeza tutarushye…' 

Tom Close yatangaje ko imyaka 18 amaze mu muziki, yubakiye ku kwimenya uwo ari we byatumye hari aho ageze

 

Tom Close yavuze ko buri wese akwiye guharanira kugera ku nzozi ze kuko buri wese aremye mu ishusho ye

 

Tom Close yavuze ko ari umufana ukomeye w'ibihangano bya Clapton 

Clapton yavuze ko ababyeyi be bari bafite ubwoba bw'uko ashobora kuzavamo ikirara 

Mu rwego rwo kwagura ‘Gen- Z Comedy’, Fally Merci yongeyemo igice cyo kuganira n’abantu bazwi mu myidagaduro 

Clapton yabiteyemo urwenya avuga ko ishuri umwana wa Tom Close yigaho ari naryo uwe yigaho ariko ajya agorwa no kumusubirishamo amasomo

Tom Close yifashishije telefoni ye yafashe amashusho ubwo abakunzi be b'ibihangano bye baririmbaga indirimbo zirimo 'Si beza' yakunzwe mu buryo bukomeye

Fally Merci yateye urwenya ku kuntu umugeni yasohokeye mu ndirimbo yo kwamamaza serivisi ya 'Macye Macye' ya MTN bitewe n'uko hari habuze indirimbo ya gakondo 

Umunyarwenya Kadudu yagaragaje uburyo 'Urukundo rwo muri iki gihe rwabaye urupagani'

Benitha yagarutse ku kuntu yakuze ashaka kuba umunyamakuru none ubu akaba yaravuyemo umunyarwenya 

Rwagaju yavuze kuri Se wishwe na Covid-19. Uyu munyarwenya yagaragaje ko kubasha gutamira abitabiriye 'Gen- Z Comedy' ari ikintu gikomeye yagezeho

Promesse Kamanda usanzwe uzwi mu bafata amafoto yagaragaje ko ajya anyuzamo agatera urwenya 

Umunyarwenya ‘Kamaro’ ni umwe mu bari bitabiriye iki gitaramo cy’urwenya

Muri iki gitaramo, hifashishwa Dj uvanga umuziki igihe umunyarwenya atarazamuka ku rubyiniro 

Umunyarwenya uzwi nka ‘Uzagende kuri Moto’ ndetse na Rusine Patrick [Uri hagati] 

Fally Merci yateye urwenya ku bwiza bw’abakobwa akunze kubona i Kanombe

 

Rocky uzwi mu basobanura filime ni umwe mu bari bizihiwe muri iki gitaramo 

Patrick Rusine ukorera Kiss Fm byageze aho asanga Fally Merci ku rubyiniro 

Abarimo Dj Diddyman [Uwa kabiri uvuye ibumoso] bakozwe ku mutima n’abanyarwenya bigaragaje muri iki gitaramo 

Umunyarwenya Babo yateye urwenya ku ngingo zinyurnye z’ubuzima 

Muhinde ni umwe mu bishimirwa cyane- Akunze gutera urwenya cyane cyane ku kuntu ariwe mugufi mu muryango w’iwabo 

Yitwaje gitari kugirango abashe kumvikanisha neza ibyo yari yateguye

Umunyarwenya Rufendeke ukunze gutembagaza benshi muri ‘Gen-Z Comedy’

Umunyarwenya akaba n’umunyamakuru wa Isibo Tv, Zaba Missed Call

KANDA HANO WUMVE ALBUM 'ESSENCE' TOM CLOSE AHERUTSE GUSHYIRA HANZE
 “>

KANDA HANO UREBE IKIGANIRO TWAGIRANYE N’UMWE MU BANYARWENYA MUHINDE

“>

Kanda hano urebe amafoto yaranze igitaramo 'Gen-Z Comedy' cyo ku wa 18 Gicurasi 2023

AMAFOTO: Nathanael Ndayishimiye-INYARWANDA.COM

Ubwo bugenzuzi bwatangiye kuwa Kabiri tariki 16 Gicurasi 2023, ubwo Abakozi b’Inama y’Igihugu y’Abaforomo n’abaforomokazi n’Ababyaza (NCNM) bari kumwe n’itsinda ry’urugaga rw’abakora imyuga ishingiye ku buvuzi (RAHP) barinmo gusura abakorera mu karere ka Rusizi bakareba niba abakora iyo myuga bafite ibyangombwa bibemerera kuyikora ndetse bakanaganira nabo bakumva ibyifuzo byabo.

Kugeza kuwa Kane tariki ya 18 Gicurasi 2023, mu bigo nderabuzima byasuwe mu karere ka Rusizi byagaragaye ko hari ibibazo by’Abafomo n’abaforomokazi bake ariko by’umwihariko hari ikibazo  cy’ababyaza bize bigiye kubyaza kuko ahenshi hashyirwa umubyaza umwe gusa.

Abaforomo n’abaforomokazi n’Ababyaza baganiriye na InyaRwanda.com bagaragaje ibibazo bibangamira imitangire ya serivisi ndetse bagaragaza kuba ari bake batabona umwanya w’ikiruhuko nk’abandi bakozi ba Leta. 

Umwe mu baganiriye na InyaRwanda.com yavuze ko abakora mu bigo nderabuzima biherereye kure y’umujyi wa Rusizi babangamiwe n’umubare muto w’Abaforomo n’abaforomokazi ariko igikomeye ni ukuba hari ikibazo cy’ababyaza.

Yagize ati: “Abaforomo n’abaforomokazi dukorera mu bigo nderabuzima biri kure, usanga gutanga serivisi bitatworohera kuko nko kuba umuntu atuye i Kamembe cyangwa i Gihundwe, ugakorera nko mu kigo nderabuzima kiri mu Murenge wa Bweyeye cyangwa Gikundamvura, ubwo ntabwo mvuze za Nyabitimbo;

Usanga abitabira kuhakorera kuko utekereza nko kujya Bweyeye ufite umuryango nka Kamembe cyangwa ukeneye kujya ujya kwiga I Nyamasheke  cyangwa i Kigali ugasanga imishahara baduha ishobora gushirira mu nzira kuko tuba dukeneye kwiga ngo twongere ubumenyi dufite mu mwuga.”

Undi muforomo avuga ko kubura kw’ababyaza bituma abaforomo bakora ibyagakozwe n’abize kubyaza ndetse ntibagire umwanya wo kuruhuka.

Yagize ati: “Mu kigo nderabuzima cyacu tumaze igihe nta mubyaza dufite ku buryo usanga aritwe tubyaza kandi ubumenyi dufite ntabwo wabugereranya n’abize kuvura. Kubyaza kandi nubwo tubikora ntabwo ari imirimo twakagombye gukora kuko n’inshingano dufite zo kuvura indwara naho turacyari bake kuko bisaba umuforomo gukorera nko muri serivisi eshatu ndetse kubona umwanya wo kuruhuka biragoye cyane.

Turasaba ababishinzwe kwiga uburyo abakora ku bigo nderabuzima biri kure ko bashyirirwaho uduhimbazamusyi dutuma abize ubuforomo n’ububyaza bitabira kuhakorera kuko nko Mirenge ya Butare na Bweyeye, biragoye kubona Abaforomo n’Ababyaza bemera no kuhakorera kubera uburyo gukora ingendo bihenze igihe ushaka gusura umuryango.”

Ikigo nderabuzima cya Mashesha mu Murenge wa Gitambi mu bugenzuzi bwakozwe n’Inama y’Igihugu y’Abaforomo n’Abaforomokazi n’Ababyaza, basanze iki kigo nderabuzima nta mubyaza kigira ndetse kimaze amezi arindwi umubyaza umwe cyari gifite asezeye akaba atarasimburwa.

Umuyobozi w’iki Kigo nderabuzima cya Mashesha, Ndagijimana Gervais, yabwiye InyaRwanda.com ko batanze raporo muri Minisiteri y’ubuzima ndetse bahabwa uburenganzira bwo gushaka umukozi kugeza ubu akaba ataraboneka.

Yagize ati: “Ubusanzwe twari dufite umubyaza umwe ariko hashize amezi 7 asezeye. Umubyaza aba akenewe ariko igihe adahari abaforomo n’abaforomokazi bacu bazi kubyaza nta muntu wavuga ko yashatse serivisi agiye kubyara ngo abure umubyaza. Buri munsi twakira ababyeyi kandi turababyaza abo binaniranye tukabajyana ku bitaro.”

Ndagijimana, yakomeje agira ati: “Umubyaza twari dufite amaze kugenda, twahise twandika ibaruwa tubimenyesha Minisiteri y’ubuzima badusaba ko dushaka undi ufite ibyangombwa bakamuduha ariko twaramubuze kandi ikibazo cy’abakozi baba bakenewe ariko bakanga gukorera mu byaro. 

Iki ni ikibazo dusangiye n’abacu bo mu bigo nderabuzima biri kure y’umujyi ariko twebwe twagize ingorane uwo twari dufite aragenda ariko turacyategereje uwakwemera kuza gukorera hano. 

Umwanditsi Mukuru w’Urugaga rw’abakora Imirimo ishingiye Buvuzi (RAHP), RTD Major Gasherebuka Jean Damascene, aganira na InyaRwanda.com nawe yavuze ko igenzura barimo basanze hari ibikwiye gukosorwa ariko bakishimira ko abatanga serivisi z’ubuzima mu karere ahenshi bubahiriza amategeko abagenga.

Agira ati: “Twaje kureba ko abakora imirimo ishingiye ku buvuzi ko bujuje ibisabwa kugira ngo bahe abaturage serivisi z’ubuvuzi, abaturage bafite ubushobozi bwo kuzitanga. Abo twasanze batujuje ibisabwa twicaraga tukumva ibyifuzo byabo tukabereka inzira banyuramo bakabona ibyangombwa bisabwa.

Hari aho twasanganga nko mu isuzumiro hakora umuntu wize ubutabire n’Ibinyabuzima (Bio Chimie) abo twasabye ko bahagarara hagashyirwamo abize gusuzuma indwara. Nubwo hari bike bikenewe gukosorwa ariko icyo twashimye mu karere ka Rusizi ni uko ahenshi bubahiriza ibisabwa  bitewe n’uko ubona ubuyobozi bwa hano babyumva kandi bakurikiraho umunsi ku munsi.

Umwandutsi Mukuru w’inama y’Igihugu y’Abaforomo n’abaforomokazi n’Ababyaza, Kagabo Innocent yavuze ko ibibazo byose byagaragajwe n’abaforomokazi n’Ababyaza bizakorerwa ubivugizi.

Yagize ati: “Haracyagaragara umubare muto w’Abaforomo n’abaforomokazi n’Ababyaza ariko nk’abaforomo, Minisiteri y’ubuzima yatangiye kubongera, hari aho usanga bamaze kugera ku baforomo 10 kandi mu bihe byashize bari 5, hari aho biyongereye nubwo iyo mibare idahagije ubushobozi bubonetse dusanga byaba byiza biyongereye.” 

Kagabo yakomeje avuga ko baganiriye n’abaforomo, abaforomokazi n’Ababyaza babagezaho ibyifuzo byabo ndetse ahamya ko bazakora ibishoboka ibyo bifuje bikubahirizwa. 

Bimwe mu byifuzo baduhaye ni uko integanyigisho ibafasha kwihugura mu bijyanye n’umwuga wabo n’uko twakora integanyigisho no mu rurimi rw’Igifaransa bitewe n’uko hari abarwizemo kuko iyo basanzwe bakoresha yari mu cyongereza. Tugiye kureba uburyo abakoresha igifaransa twabakorera integanyigisho iri mu rurimi bizemo kuko babitugaragarije nk’imbogamizi.”

Kagabo yabwiye InyaRwanda ko kuba mu Rwanda umubare w’ababyaza ari muto bituma mu bigo nderabuzima byasuwe usanga bafite umubyaza umwe ku kigo nderabuzima. Yagize ati “Muri ubu bugenzuzi turimo gukora, ikibazo twabonye ahenshi ni ubuke bw’ababyaza kuko usanga bafite umubyaza umwe ku kigo nderabuzima.

Ababyaza handitse 2085  twanditse tukabaha ibyangombwa bibemerera gukora umwuga w’Ububyaza ni bake kuko harimo abari mu kazi badahagije, abandi barimo kwigisha mu mashuri dufite. Amashuri makuru na Kaminuza dufite tugomba kongera imbaraga mu kwigisha kugira umubare w’ababyaza wiyongere ndetse byaba ngombwa tugashaka abadufasha kwigisha baturuka mu bihugu by’Akarere u Rwanda ruherereyemo kugira ngo ababyaza bakenewe baboneke.

Inama y’Igihugu y’Abaforomo n’abaforomokazi n’Ababyaza yatangarije InyaRwanda ko ubwo bugenzuzi busozwa kuri uyu wa Gatanu tariki 19 Gicurasi 2023 bwagenze neza ndetse basanze abaforomo n’abaforomokazi n’Ababyaza bubahiriza amabwiriza n’amategeko ku buryo bushimishije ndetse ko ibibazo bagaragaje ubwo bazaba basoza iryo genzura, bazahura n’Ubuyobozi babugezeho ibibazo byagagajwe mu bigo nderabuzima byasuwe.

Itsinda ry’abakozi n’Inama y’Igihugu y’Abaforomo n’abaforomokazi n’Ababyaza ndetse n’iry’Urugaga rw’abakora Imirimo ishingiye Buvuzi bagomba gusura Ibigo nderabuzima 18, amavuriro yigenga n’ayatanga ubuvuzi bw’ibanze akorera mu karere ka Rusizi.

Muri Rusizi bahangayikishijwe no kutagira ababyaza bahagije

Uyu muraperi wari uherekejwe n'umuraperi Slum Drip uzwi cyane nka Gatonyanga banabana mu itsinda rya KinyaTrap, yabwiye inyaRwanda.com ko uru rugendo ari rwo runini akoze ariko rwuzuyemo umugisha.

Bushali yavuze ko kimwe mu bimujyanye ari ukurangiza imishinga imwe n'imwe yo kuri Album, “Full Moon”, yitegura gusohora, no kuhakorera ibitaramo bitandukanye ahafite.

Yagize ati'Yego nibyo nerekeje ku mugabane w'uburayi, aho nzakorera ibitaramo bitandukanye ndetse no kurangiza imwe mu mishinga y'indirimbo zanjye.'

Bushali yabwiye inyaRwanda.com ko na mbere uru rugendo yari arufite, bitewe na Album yagombaga kurangiriza kuri Uyu mugabane, gusa bamwe mu banyaRwanda bahatuye bakimara kumenya ko ari mu nzira zijyayo, bifuje ko abataramira.

Biteganyijwe ko mbere y'uko Bushali atangira ibitaramo, azabanza kwitabira Festival izabera i Lille mu Bufaransa nyuma y'aho akorere ibitaramo i Paris, u Bubiligi, Poland n'ahandi.

Bushali mbere yo guhaguruka yasezeye Slum Drip wari wamuherekeje

Bushali ni umwe mu baraperi bahagaze neza mu muziki w'u Rwanda yatangiye mu mpera za 2013.

Amaze gusohora Album eshatu zirimo ‘Nyiramubande’, 'Ku gasima, '!B!HE B!7' ndetse na Full Moon ari guteguza igiye kuba iya kane.

Bushali yari acigatiye imashini yuzuyemo Album ye

Bushali ubwo yari ageze ku kibuga cy'indege

Ubwo Bushali na Slum Drip bari bageze ku Kibuga cy'indege

AMAFOTO: RWIGEMA Freddy

Abakunzi benshi b’umupira w’amaguru mu Rwanda ntabwo bishimiye uburyo umukino wa nyuma w’igikombe cy’Amahoro 2023 washyizwe kuri Stade Mpuzamahanga ya Huye noneho ku masaha ya ni joro.

Kuva FERWAFA yatangaza ko uyu mukino uzabera i Huye, ntawo byakiriwe kimwe bitewe n’uko n’umukino wa shampiyona uheruka guhuza aya makipe i Huye bitagenze neza.

Noneho byaje kurushaho kuba bibi ubwo byavugwaga ko uyu mukino uzaba ni njoro saa 18h00′ ni mu gihe saa 15h hazaba habaye umukino w’umwanya wa gatatu uzahuza Kiyovu na Mukura VS.

Ikipe ya APR FC yabaye iya mbere mu kuvuga ko ititeguye gukina aya masaha bityo ko yo yumva umukino wabera amasaha basanzwe bakiniraho, bagakina saa 15h30′ n’aho umwanya wa 3 ugakinwa saa 12h30′.

Kuki FERWAFA yashyize uyu mukino i Huye?

Benshi bumvaga uyu mukino wagashyizwe kuri Kigali Plele Stadium cyane ko umukino uheruka guhuza ya makipe wabereye i Huye, bityo ko bakawuzanye i Kigali n’abanya-Kigali bakongera kuryoherwa n’uyu mukino.

Amakuru avuga ko nyuma y’uko Stade ya Huye ivuguruwe kugira ngo ijye yakira imikino mpuzamahanga nabwo CAF yayanze kuko amahoteli ahari atari yujuje ibisabwa.

Ibi byatumye hashyirwamo imbaraga kugira ngo abikorera bavugurure amahoteli ajye ku rwego CAF yifuza, ni mu gihe FERWAFA nayo yabahaye amasezerano ko izakora ibishoboka byose iyi stade ikazajya yakira amarushanwa menshi kugira ngo nabo babe batararuhiye ubusa.

Bivugwa ko FERWAFA yatwaye uyu mukino i Huye ndetse inawushyira ku masaha ya ni joro kugira ngo bafashe aba bikorera bakoresheje amafaranga menshi bavugurura kuko ni umukino uzarebwa n’abantu benshi kandi siko bose bazataha bazarara muri uyu mujyi bakiyongera no ku makipe n’amakipe yahakiniye.

FERWAFA gushyira umukino mu ijoro ntiyiga?

Dusubiye inyuma gato muri 2017 ubwo APR FC yari yahuye na Rayon Sports ku mukino w’igikombe kiruta ibindi mu gihugu (Super Cup) wabereye i Rubavu kuri Stade Umuganda.

Ni umukino wari washyizwe ku isaha ya saa 18h00′, gusa ntabwo waje kurangira kuko ubwo Rayon Sports yari imaze gutsinda ibitego 2-0, amatara yaje kuzima burundu bituma umukino usubikwa uza gusubukurirwa i Kigali.

Kongera gushyira uyu mukino ni joro byatumye benshi batekereza impamvu FERWAFA yongeye kwishyira mu ntambwe 18 kuko haribazwa icyaba mu gihe iki kibazo cyakongera kubaho kandi bari bafite amahirwe yo kubikumira umukino ukaba kare.

FERWAFA ntitewe impungenge n’umutekano muke

Ubwo umukino uheruka guhuza aya makipe wabereye i Huye tariki ya 12 Gashyantare 2023 maze Rayon Sports igatsinda 1-0, gutaha byaragoranye ku bantu banyuze mu muhanda wa Huye — Kigali.

Ubwo barimo bataha mu muhanda wari wuzuyemo abantu benshi, bateze imodoka bazitera amabuye, ibiti hari n’imodoka zamenwe ibirahure ndetse na bamwe mu bafana barakomereka.

Kuri iki kibazo umuyobozi wa FERWAFA w’inzibacyuho, Habyarimana Marcel Matiku yavuze ko ibyo bitabareba bo ikibareba ari ugutegura umukino ukagenda neza ibindi byo ntaho bahuriye nabyo ndetse ko n’iyo bategura umukino ibyo batabirebaho.

Umukino wa Rayon na APR FC washyizwe i Huye ntabwo bivugwaho rumwe

Shampiyona y’icyiciro cya mbere mu Rwanda 2022-23 irakomeza hakinwa umunsi wa 29 ari nawo ubanziriza uwa nyuma, mu gihe APR FC na Kiyovu Sports zihanganiye igikombe hari andi makipe umutima utari mu gitereko yibaza izaherekeza Espoir FC mu cyiciro cya kabiri.

Iyi mikino y’umunsi wa 29 izakinwa ku munsi w’ejo ku wa Gatandatu ahari imikino 2 ndetse no ku Cyumweru ubwo hazaba imikino 3.

Kuva ku ikipe ya 11 Sunrise FC ifite amanota 31 kugeza ku ya 15 ya Rutsiro FC ifte 27 zose ziracyafite amahirwe yo kumanuka mu cyiciro cya kabiri, zikaba nta kosa zigomba gukora mu mikino 2 isigaye.

Ku Cyumweru saa 15h00′, kuri Golgotha Stadium, Sunrise FC izakira Kiyovu Sports ya mbere ku rutonde nayo isabwa gutsinda kugira ngo yizere kugumya guhatanira igikombe.

Marines FC ya 12 ku rutonde n’amanota 31 izaba yasuye Rayon Sports ku Cyumweru. Bugesera FC ya 13 ku rutonde n’amanota 30 izaba yasuye Etincelles. Rwamagana ya 14 n’amanota 28 izaba yasuye APR FC ya kabiri ndetse ikaba inahabwa amahirwe yo kwegukana igikombe. Rutsiro ya 15 n’amanota 27 ari nayo ihabwa amahirwe yo kumanukana Espoir FC izaba yasuye Musanze FC.

Gahunda y’umunsi wa 29

Ku wa Gatandatu tariki ya 20 Gicurasi 2023

Gasogi United vs Police FC
Gorilla FC vs Mukura VS&L

Ku Cyumweru tariki ya 21 Gicurasi 2023

Rayon Sports vs Marines FC
Espoir FC vs Musanze FC
AS Kigali vs Rutsiro FC
APR FC vs Rwamagana City
Sunrise FC vs Kiyovu Sports
Etincelles vs Bugesera FC

Abakinnyi 8 batemerewe gukina umunsi wa 8

Adeaga Adeshola (Gorilla FC)
Kalisa Rashid (AS Kigali)
Elias Rucogoza (AS Kigali)
Cuzuzo Aime Gael (Gasogi United)
Bugingo Hakim (Gasogi United)
Ishimwe Kevin (Gasogi United)
Mbonyumwami Taiba (Marines)
Nduwayo Valeur (Musanze FC)