Category: Uncategorized

Tshisekedi ari mu ruzinduko mu Bushinwa, aho ku mugoroba wo kuri uyu wa Kane yahuye n'Abanye-Congo bahakorera, abiga n'abandi baba mu Murwa Mukuru w'u Bushinwa, Beijing.

Mu byo yagarutseho harimo intambara igihugu cye kimaze iminsi gihanganyemo n'umutwe wa M23, aho uwo mutwe wagiye wigarurira uduce dutandukanye udukuye mu maboko y'ingabo za Leta.

Tshisekedi yavuze ko igihe kigeze ngo yirukane mu gisirikare ibisambo biri mu gisirikare ndetse n'abandi badafite umutima wo kurwanirira igihugu.

Ati 'Igihe kirageze ngo twitandukanye n'ibisambo biri mu ngabo zacu ndetse n'abadafite imyitozo ihagije ku buryo badashobora kurengera igihugu n'abaturage.'

Congo ni kimwe mu bihugu bya Afurika bifite umubare mwinshi w'abasirikare ariko bayobowe nabi, barangwa na ruswa n'ibindi bibazo birimo kudahemberwa igihe.

Tshisekedi ajya ku butegetsi yavuze ko imbaraga nyinshi azazishyira mu kuvugurura igisirikare ariko bisa n'aho nta musaruro ugaragara byatanze kuko ibibazo birimo umutekano muke mu Burasirazuba bw'igihugu byarushijeho kwiyongera, nubwo muri Kivu y'Amajyaruguru na Ituri hashize imyaka ibiri hashyizweho ibihe bidasanzwe n'abayobozi ba gisirikare.

Source : https://umuryango.rw/amakuru/mu-mahanga/umutekano/article/tshisekedi-yahize-kuvugurura-igisirikare-cye-kikaba-ikinyamwuga

Umunyamabanga Mukuru w'Umuryango w'Abibumbye, Antonio Guterres, yagaragaje ko yishimiye bikomeye ifatwa rya Fulgence Kayishema wari umaze imyaka irenga 20 ashakishwa kubera uruhare akekwaho kugira muri jenoside yakorewe Abatutsi mu 1994.

Umushinjacyaha Mukuru w'urwego IRMCT rwa UN rwasigariyeho urukiko mpuzamahanga mpanabyaha rwashyiriweho u Rwanda i Arusha (ICTR), Serge Brammertz, yatangaje ko Kayishema yafatiwe mu gace ka Paarl muri Afurika y'Epfo tariki ya 24 Gicurasi 2023.

Kayishema arashinjwa kugira uruhare rukomeye mu kwica Abatutsi barenga 2000 bari barahungiye muri Kiliziya ya Nyange mu yari Perefegitura ya Kibuye bayisenyeweho tariki ya 16 Mata 1994. Icyo gihe ari ashinzwe urwego rw'ubutabera rwa polisi (IPJ) muri komini Kavumu.

Guterres amaze kumva inkuru y'ifatwa rya Kayishema, yatangaje ko 'bitanga ubutumwa bukomeye ko abakekwaho gukora ibyaha bya jenoside n'ibyibasiye inyokomuntu batazacika ubutabera, kandi bazabiryozwa, n'ubwo byatwara igihe kirenga kimwe cya kane cy'ikinyejana.'

Umukuru wa UN kandi yashimiye ubufatanye bwabayeho hagati ya IRMCT n'ubuyobozi bwa Afurika y'Epfo kugira ngo Kayishema atabwe muri yombi.

Source : https://umuryango.rw/amakuru/mu-rwanda/article/antonio-guterres-yagaragaje-ko-yishimiye-itabwa-muriyombi-rya-kayishema

Kagame ari kumwe na minisitiri w'ububanyi n'amahanga Vincent Biruta bakiriye minisitiri Dmytro Kuleba n'abandi, baganira ku ntambara ya Ukraine n'uburyo bwo gufasha inzira z'amahoro zigamije kurangiza iyi ntambara, nk'uko ibiro bya perezida w'u Rwanda bibivuga.

Ubutumwa bwa Zelensky yazaniye Kagame ntabwo bwatangajwe, gusa bizwi ko Ukraine irimo kugerageza guhangana n'ijambo rinini n'umubano Uburusiya bufitanye n'ibihugu bya Africa.

Mu 2019 u Rwanda rwasinye amasezerano n'ikigo ROSATOM cya leta y'Uburusiya gishinzwe iby'ingufu za nikleyeri agendanye no kubaka ikigo cy'ibijyanye n'izi ngufu mu Rwanda.

Kuleba yatangaje ko yishimiye 'ko u Rwanda rwifatanyije na Ukraine', kandi ko Ukraine ishaka gukorana n'u Rwanda mu bucuruzi, iby'isanzure, uburezi n'ibijyanye n'imiti. Yavuze kandi ko Ukraine izafungura ambassade mu Rwanda.

Kuva kuwa kabiri, Kuleba ari mu ruzinduko rwe rwa kabiri mu bihugu bya Africa, yaje mu Rwanda avuye muri Ethiopia na Maroc. Mu ruzinduko rwe agamije kandi kwizeza ibihugu bya Africa ko Ukraine izakomeza kohereza ibinyampeke mu bihugu bya Africa, nk'uko yabitangaje kuri Instagram 'page' ye.

Source : https://umuryango.rw/amakuru/mu-rwanda/politiki/article/perezida-kagame-yohererejwe-ubutumwa-na-mugenzi-we-zelensky-wa-ukraine

Inkuru y'itabwa muri yombi rya Kayishema Fulgence wafatwaga nka nimero ya mbere mu bashakishwa ku bw'uruhare rwabo muri Jenoside yakorewe Abatutsi, ni imwe mu ziri kuvugwa cyane ku Isi. Gusa icyibazwa na benshi ni uburyo uyu mugabo yamaze imyaka irenga 20 yihishe muri Afurika y'Epfo.

Kayishema yavukiye mu yari Segiteri ya Nyange, Komini Kivumu muri Perefegitura ya Kibuye. Bikekwa ko yavutse mu 1959 cyangwa 1961.

Yabanje kwitwa Fulgence Ukiliho, nyuma ararihindura yitwa Kayishema. Amaze gusoza amashuri yisumbuye, yabaye umwarimu ku Kibuye mu myaka ya 1980.

Mu 1990, yagizwe Umugenzacyaha wa Komini [Inspector de Police Judiciaire 'IPJ'], akazi yakoze kugeza ubwo Jenoside yakorewe Abatutsi mu 1994 yatangiraga.

Muri Kamena 2001, urwari Urukiko Mpuzamahanga Mpanabyaha rwashyiriweho u Rwanda (ICTR) rwasohoye inyandiko ikubiyemo ikirego, rushinja Kayishema gutegura, gushishikariza, gutegeka, guhagarikira no gukora ibyaha bya Jenoside kuri Paruwasi ya Nyange.

Yashinjwe ibyaha bya Jenoside birimo kuba umufatanyacyaha w'abakoze Jenoside, ubwumvikane bugamije gukora Jenoside n'ibyaha byibasiye inyokomuntu byakorewe muri Komine Kivumu, hagati y'itariki ya 6 n'iya 20 Mata 1994.

Inyandiko y'ikirego ya ICTR yerekana ko muri Mata 1994, Kayishema n'abandi bemeranyije ku buryo bwo kwica no kurimbura Abatutsi muri Kivumu. Hagati ya tariki 7 na tariki 10 Mata 1994, abayobozi b'ibanze na polisi ya komini bagabye ibitero ku batutsi bamwe baricwa, abandi bahungira kuri Paruwasi ya Nyange.

Mu minsi yakurikiyeho, imitwe y'Interahamwe, Polisi ya Komini n'abajandarume bagoteye Abatutsi kuri Paruwasi ya Nyange no mu Kiliziya batangira kubagabaho ibitero bakoresheje intwaro gakondo na grenade. Icyo gihe Abatutsi benshi barishwe. Kayishema ashinjwa ko hamwe n'abandi, ari bahagarikiye banagenzura ibyo bitero.

Kuwa 15 Mata kandi, Kayishema bivugwa ko yajyanye lisansi kuri Paruwasi ya Nyange ikoreshwa n'Interahamwe mu gutwika Kiliziya yari irimo Abatutsi. Kayishema kandi ari mu batanze amabwiriza yo gusenyera Kiliziya ku batutsi bari bayirimo, hapfa abarenga 2000. Abatutsi barokotse icyo gihe nabo barishwe.

Kayishema ashinjwa ko ari mu bahagarikiye igikorwa cyo gutunda imirambo yari mu mbuga za Kiliziya ijyanwa mu cyobo kinini.

Ubwo Jenoside yahagarikwaga muri Nyakanga 1994, Kayishema ari kumwe n'umugore we, abana na muramu we bahungiye muri Repubulika Iharanira Demokarasi ya Congo (RDC).

Babaye mu nkambi amezi make, bajya muri Tanzania batura ahitwa i Kigoma. Mu ntangiriro za 1995, Kayishema n'umuryango we bagiye kuba mu nkambi ya Mtabila hafi ya Kasulu muri Tanzania, biyandikisha nk'impunzi z'Abarundi.

Kayishema yabaye mu nkambi ya Mtabila kugeza nko muri Mutarama 1998, ahava yerekeza muri Mozambique, we n'umuryango we batura ahitwa Lichinga amezi make, nyuma aza kwiyandikisha mu nkambi ya Bobole hafi ya Maputo.

Kayishema n'umuryango we bavuye muri Mozambique bajya muri Eswatini [iyari Swaziland], bahabwa ubuhungiro banandikwa nk'impunzi mu nkambi ya Malindza/Mpaka hafi ya Mbabane muri Gicurasi 1998.

Kuwa 19 Gicurasi 1998, yahawe ubuhungiro na Eswatini nk'Umurundi, akoresheje izina rya Fulgence Minani. Umugore we na we yahawe ubuhungiro yahinduye umwirondoro we. Muri Eswatini, Kayishema yatangiye gukoresha ibyangombwa bya Malawi yitwa Positani Chikuse, mu kwambuka ajya muri Afurika y'Epfo.

Afurika y'Epfo

Ku wa 21 Ukuboza 1999, nibwo Kayishema yerekeje muri Afurika y'Epfo ashaka ubuhungiro mu Mujyi wa Cape Town nk'Umurundi, icyo gihe yiyitaga amazina ya Fulgence Dende -Minani.

Kuva mu 1999 kugeza ubu, yabaga muri Afurika y'Epfo.

Mu ntangiriro za 2000, yahawe uruhushya rw'agateganyo rwo kuba muri Afurika y'Epfo. Kuva icyo gihe yakomeje kujya yambuka imipaka akoresheje izina rya Chikuse aho yabaga agiye gusura umuryango we muri Eswatini.

Mu ntangiriro za 2001, Kayishema yemerewe ubuhungiro muri Eswatini mu mazina ya Fulgence Minani ndetse ahabwa uruhushya rw'agateganyo rwo kuba muri icyo gihugu.

Amakuru agaragaza ko yahise atangira inzira zo gusaba ubuhungiro aranabubona yaba muri Eswatini no muri Afurika y'Epfo. Muri icyo gihe, Kayishema yakoraga i Cape Town aho yacungaga imodoka ku nzu ikorerwamo ubucuruzi yitwa Blue Route Mall.

Ku wa 20 Kamena 2002, akoresheje amazina ya Fulgence Dende Minani, yahawe ibyangombwa noneho bimwemera nk'impunzi muri Afurika y'Epfo mu gihe cy'imyaka ibiri.

Yahise akura umuryango we muri Eswatini awujyana muri Afurika y'Epfo kugira ngo nawo ube wabasha kuhasabira ubuhungiro.

Umugore we na we yakoreshaga ibyangombwa bihimbano. Muri icyo gihe, bivugwa ko yabaga i Cape Town hamwe n'umuryango we mu gace ka Belville ndetse yakomeje gukora nk'umurinzi w'imodoka.

Kugeza mu 2006, Kayishema yari afite ibyangombwa by'ubuhunzi aho yari muri Afurika y'Epfo mu mazina ya Fulgence Dende-Minani. Hagati ya 2007 n'impera za 2008, akoresheje amazina ya Positani Chikuse na Pasiporo yo muri Malawi y'impimbano iri muri ayo mazina, bikekwa ko yakoreraga ingendo muri Mozambique, Eswatini no muri Afurika y'Epfo.

Muri Werurwe 2009, yasabye kubona ibyangombwa bimwemerera gutura iteka muri Afurika y'Epfo nk'umunyamahanga. Ibyo byangombwa yabisabaga akoresheje amazina Positani Chikuse. Yasubiye muri Afurika y'Epfo abayo kugera ku wa 24 Gicurasi 2023.

Mu mpera za 2015, yasabye ko viza ye ya mukerarugendo muri Afurika y'Epfo ivugururwa, ariko bigakorwa mu mazina ya Positani Chikuse nk'umuturage wo muri Malawi.

Muri Mutarama 2017, yahawe ubuhungiro muri Afurika y'Epfo mu yandi mazina ya Donatien Nibasumba, yiyita ko ari umuturage w'u Burundi. Icyangombwa cye cy'ubuhunzi cyavuguruwe mu 2020 gihabwa kumara imyaka ine.

Ku gihe cye cyo gufatwa, yari mu gace Paarl mu nkengero z'Umujyi wa Cape Town.

Kuva yagera muri Afurika y'Epfo mu 1999, yafashijwe n'abantu be ba hafi kugira ngo hatagira umuvumbura.

Harimo umuryango we wa hafi by'umwihariko umugore we na muramu we uba muri Afurika y'Epfo kugeza ubu. Yakoranaga bya hafi kandi na bamwe mu bahoze ari abasirikare b'Ingabo za FAR n'abandi bo muri FDLR, biganjemo abakoresheje nabi sitati y'ubuhunzi bahawe na Afurika y'Epfo.

Bivugwa ko inshuro nyinshi abo bantu batangaga amakuru atari yo ku nzego z'umutekano muri Afurika y'Epfo hamwe no ku bakora iperereza. Abo bantu kandi bahaga Kayishema ubufasha mu by'amafaranga kugira ngo akomeze guhunga ubutabera.

Source : https://umuryango.rw/amakuru/mu-rwanda/article/hatahuwe-amayeri-kayishema-yakoresheje-mu-kwihisha-imyaka-20-ashakishwa

Umukobwa wo muri Kenya, yanyazwe miliyoni 102 z'amashilingi bitegetswe n'urukiko, ruvuga ko ari akavagari k'amamiliyoni yavuye mu iyezandonke.

Ibinyamakuru muri Kenya byanditse ko uyu mukobwa w'imyaka 23 wiga muri kaminuza aka kayabo, yari yaragahawe n'umugabo w'umubiligi bakundanaga.

Ikinyamakuru Daily Nation cyanditse ko leta ya Kenya yahawe uburenganzira bwo gutwara izi miliyoni 102 za madamazera Felista Nyamathira Njoroge, kuko atabashije kuvuga ahavuye aka kavagari yahawe n'uyu mugabo wamuteretega, urukiko rutegeka ko ajyanwa mu isanduku ya leta.

Uyu musaza w'umubiligi wateretaga uyu munyakenyakazi ngo yabajijwe ahantu avana amafranga yirirwa ateretesha abakobwa b'ikimero ku isi imihanda yose ananirwa kugaragaza aho ayavana, bituma ayahawe uyu munyakenya kazi leta iyafata. Biravuga ko yaba ari amafranga yavaga mubyo iwacu aha bita guslayinga, bitarabonerwa igisobanuro nk'uku nanjye mbivuze nk'uko bamwe babivuga.

The post Yahawe Miliyoni zirenga 100 n'umukunzi we none zashyizwe mu isanduku ya Leta appeared first on FLASH RADIO&TV.

Source : https://flash.rw/2023/05/26/yahawe-miliyoni-zirenga-100-numukunzi-we-none-zashyizwe-mu-isanduku-ya-leta/?utm_source=rss&utm_medium=rss&utm_campaign=yahawe-miliyoni-zirenga-100-numukunzi-we-none-zashyizwe-mu-isanduku-ya-leta

Umuyobozi ushinzwe kwandika amashyaka muri Kenya, madame Ann Nderitu, yavuze ko adatewe ubwoba n'igitutu ari gushyirwaho n'ihuriro Azimio la Umoja One Kenya rya Raila Odinga rimusaba kwegura kuri uyu mwanya.

Madame Ann Nderitu yavuze ko yiteguye guhangana n'abam,bari ba Raila Odinga kuko ntawe uzamuhagarara hejuru uko byagenda hose

Ikinyamakuru The Standards cyanditse ko ihuriro Azimio la Umoja rimushinja gufata uruhande mu bibazo biri mu ishyaka Jubilee rya Uhuru Kenyatta.

Raila Odinga n'abambari be bavuga ko madame Ann Nderitu akimara kwemera guhagarika David Murathe na Jeremiah Kioni mu buyobozi bw'ishyaka yagombaga guhita yegura kuko yahengamiye ku ihuriro Kenya Kwanza rya perezida William Ruto agakabya.

Mu butumwa bwa Azimio bugaragaza ko Ann Nderitu atigeze ahagarara hagati nk'ushinzwe amashyaka mu gihugu ahubwo yabogamiye kubyifuzo bya William Ruto, ngo akaba agomba gutanga imfunguzo z'ibiro yakoreragamo.

Madame Ann Nderitu avuga ko ibyo yakoze byo kwirukana aba bayobozi ba Jubilee yakurikije amategeko ntacyo umutima umushinga.

Uyu muyobozi yabwiye ikinyamakuru The Standards ko abanyapolitiki bakwiye kubaha inzego zashyizweho na leta, ndetse ngo yiteguye guhangana na Azimio la Umoja igihe bamujyana mu nkiko amagambo agashira ivuga.

Ati ubusanzwe ntidukorera ku gitutu cy'umuntu uwo ariwe wese dukorera ku mategeko.

Hagati aho ariko umukobwa wo muri Kenya yanyazwe miliyoni 102 z'amashilingi bitegetswe n'urukiko ruvuga ko ari akavagari k'amamiliyoni yavuye mu iyezandonke.

Ibinyamakuru muri Kenya byanditse ko uyu mukobwa w'imyaka 23 wiga  muri kaminuza aka kayabo yari yaragahawe n'umugabo w'umubiligi bakundanaga.

Ikinyamakuru Daily Nation cyanditse ko leta ya Kenya yahawe uburenganzira bwo gutwara izi miliyoni 102 za madamazera Felista Nyamathira Njoroge kuko atabashije kuvuga ahavuye aka kavagari yahawe n'uyu mugabo wamuteretega, urukiko rutegeka ko ajyanwa mu isanduku ya leta.

Uyu musaza w'umubiligi wateretaga uyu munyakenyakazi ngo yabajijwe ahantu avana amafranga yirirwa ateretesha abakobwa b'ikimero ku isi imihanda yose ananirwa kugaragaza aho ayavana, bituma ayahawe uyu munyakenya kazi leta iyafata. Biravuga ko yaba ari amafranga yavaga mubyo iwacu aha bita guslayinga, bitarabonerwa igisobanuro nk'uku nanjye mbivuze nk'uko bamwe babivuga.

The post Kenya: Ntabwo ntewe ubwoba n'igitutu cya Azimio cyinsaba kwegura-Nderitu appeared first on FLASH RADIO&TV.

Source : https://flash.rw/2023/05/26/kenya-ntabwo-ntewe-ubwoba-nigitutu-cya-azimio-cyinsaba-kwegura-nderitu/?utm_source=rss&utm_medium=rss&utm_campaign=kenya-ntabwo-ntewe-ubwoba-nigitutu-cya-azimio-cyinsaba-kwegura-nderitu

Ni amasezerano yasinwe kuri uyu wa Kane mu mujyi wa Kigali, mu kabuga ka Nyarutarama. Aya masezerano, agamije gufatanyiriza hamwe hagati y’ikigo cya Eco Art na FERWAFA mu gutegura imikino y’igikombe cy’Isi ariko kigamije kwita ku bidukikije, ari nayo ntego nyamukuru y’ikigo Eco Art.

Secoto mu magambo arambuye bivuze “Sustainable Environmental Conservation Tournaments”. Iri rushanwa n’ubundi rizitabirwa n’amakipe 32 yose yo mu Rwanda, aho amakipe 30 azaba azaba aje ku rwego rw’uturere, ubundi andi makipe abiri azaba ahagarariye Parike.

Ni irushanwa rizitabirwa n’abakinnyi bakiri bato, nibura bari hagati y’imyaka 14 na 23

Shumbusho Patience ukuriye Eco Art iri gutegura iyi mikino, avuga ko bahisemo kwifashisha umupira w’amaguru mu buryo bwo kwita ku bidukikije hamenyekana amakuru ahagije. 

Yagize ati “Uburyo bwo kwita ku bikudukikije ariko binyuze muri Siporo turavuga tuti ‘kuki tutakoresha ijwi rya siporo tubungabunga ibidukikije’, ni yo mpamvu twazanye umushinga wa SECOTO uzakorera mu bihugu 201 bisanzwe ari abanyamuryango b'Umuryango w'Abibumbye (UN).”

Umushinga wa SECOTO uzakorera mu bihugu 201 bisanzwe ari abanyamuryango b'Umunyarango w'Abibumbye

Umunyamabanga w'umusigire wa FERWAFA, Jules Karangwa yavuze ko iki gikorwa ECO Arts yateguye ari indashyikirwa ariyo mpamvu nabo babumvise vuba. Yagize ati” Iyo urebye bimwe mu bibazo byugarije Isi, ni imihindagurikire y'ikirere, rero iyo urebye abashobora gukemura iki kibazo ni abagiteza, ni twebwe bantu. 

Mu 2016, FIFA yagiranye ubufatanye n'Umuryango w'Abibumbye (UN) mu rwego rwo gukomeza ubukangurambaga mu bijyanye n’ibidukikije binyuze mu mupira w'amaguru. Ni muri uwo mujyo na FERWAFA turimo gufatanya na ECO Arts, tuzakomeza kubaha ubufasha bwose muri tikinike.”

Sitade ya Kigali Pele Stadium, Sitade Ubworoherane, Sitade mpuzamahanga y’Akarere ka Huye, na Sitade Umuganda, nizo zizakira iyi mikino aho buri sitade izakira amakipe 8, irushanwa rikazamara ibyumweru bibiri.

Nshumbusho Patience uhagarariye Eco Art yemeza ko uko iri rushanwa rizagenda ryaguka, bashobora kuzajya no mu yindi mikino 

Hazahembwa ikipe yabaye iya mbere, ndetse n’ikipe yitwaye neza mu bijyanye n’ubukangurambaga bwo kwita ku bidukikije, ariko buri kipe yose yitabiriye ikaba izahembwa. Ikipe ya mbere, izahabwa miliyoni 50 Frw, naho buri kipe yitabiriye, ikaba izahabwa miliyoni 10.

Ntabwo bizarangirira aho, kuko ikipe yabaye iya mbere mu mpera z’umwaka, izerekeza muri Dubai aho izaba yitabiriye umuhango wo gutangiza imikino y’igikombe cy’Isi.

Jules Karangwa wari uhagarariye FERWAFA ubwo yitegerezaga amasezerano 

Abanyamakuru b’ibitangazamakuru byo mu Rwanda bari bitabiriye ari benshi ndetse bakurikirana uyu muhango wo gusinya amasezerano y’ubufatanye

Source : https://inyarwanda.com/inkuru/129798/ferwafa-yasinyanye-amasezerano-na-eco-art-yo-gutegura-igikombe-cyisi-cyita-ku-bidukikije-a-129798.html

Nk’uko umutoza w’ikipe y’igihugu y’u Rwanda ‘Amavubi’, Carlos Alós Ferrer aherutse kubitangaza ko hari abakinnyi yavuganye nabo badasanzwe mu Amavubi kugira ngo bajye kumufasha kongera imbaraga mu ikipe bityo no kubona itike y’igikombe cy’Afurika kizabera muri Cote d’Ivoire mu mwaka utaha bibe byashoboka.

Yavuze ko ari benshi ariko abo yagarutseho cyane ni Onana ukina muri Rayon Sports ndetse na Ndayishimiye Mike Tresol ukina mu ikipe yitwa Genk yo mu cyiciro cya mbere mu Bubiligi. Carlos Alós Ferrer yemeye ko ibiganiro bihari kandi bigeze kure. Kuri Tresol, yatangaje ko baganiriye bityo igisigaye akaba ari uko umukinnyi afata umwanzuro gusa.

Uyu mukinnyi afite se ukomoka mu Burundi ndetse wanakinnye umupira w’amaguru cyane akanagira nyina ukomoka mu Rwanda, gusa uyu mukinnyi yavukiye mu gihugu cy’u Bubiligi aba ari naho akurira kugeza ubu. Ubwo bivuze ko muri ibi bihugu uko ari 3 byose yemerewe kugira 1 ahitamo akaba ari cyo yakinira.

Amakuru InyaRwanda yamenye ni uko Ndayishimiye Mike Tresol yabaye abwiye umutoza w’Amavubi kuba aretse kumuhamagara mu ikipe azifashisha akina na Mozambique mu kwezi gutaha bitewe nuko ategereje ko yazahamagarwa n’ikipe y’igihugu y’u Bubiligi yavukiyemo, ubundi akaba ari yo kipe y’igihugu yakinira mu buzima bwe.

Abakurikiranira hafi Mike Tresol bakubwira ko ari umukinnyi w’umuhanga cyane bityo no kuba yahamagarwa mu ikipe y’igihugu y’u Bubiligi ikomeye bishoboka cyane. Ubwo mu gihe yaramuka ahamagawe mu kwezi gutaha mu ikipe izakina imikino ya UEFA Nations League, Amavubi yahita akuraho. 

Mike Tresol niwe mukinnyi umaze gutanga imipira myinshi yavuyemo ibitego mu mwaka w’imikino mu gihugu cy’ u Bubiligi kandi aherutse kwegukana igihembo cy’umukinnyi ukomoka muri Afurika witwaye neza kurusha abandi mu Bubiligi.

Mike Tresol wifuzwaga cyane n’Amavubi ashobora gukinira ikipe y’igihugu y’u Bubiligi

Mike Tresol ari kwitwara neza mu ikipe ye ya Genk 

Source : https://inyarwanda.com/inkuru/129795/u-bubiligi-bushobora-gutuma-ndayishimiye-mike-tresol-adakinira-amavubi-129795.html