Category: Uncategorized

Icyemezo cy'Urukiko Mpuzamahanga Mpanabyaha cyo kureka kuburanisha umujenosideri Kabuga Felisiyani, ngo kubera ko ashaje cyane, cyatumye abasesenguzi banuganuga umugambi wo gukingira ikibaba abajenosideri, bakazapfa, cyangwa bagafatwa bashaje cyane, bikaba impamvu yo kutababuranisha. Icyo gihe baba babifitemo inyungu, kuko ubuzima bwabo ku isi bazaburangiza bakitwa 'abere', nta rukiko rwigeze rubahamya ibyaha. Imitungo yabo yaguma mu maboko y'imiryango yabo, kuko nta ndishyi bategekwa gutanga.

Ibi, abo basesenguzi barabishingira ku bandi bajenosideri bari mu nko Bufaransa, aho Kabuga yafatiwe, bikavugwa ko yari ahamaze imyaka myinshi, ndetse hari na bamwe mu bategetsi bari bazi ko ahari.

Abo bidegembya mu Bufaransa ni Agatha Kanziga wari shefu w'akazu kateguye kakanashyira mu bikorwa Jenoside yakorewe Abatutsi, Gen. Aloys Ntiwiragabo , Col.Laurent Serubuga, Wenceslas Munyeshaka, n'abandi bajejeta amaraso y'Abatutsi ku biganza.

Abo bakurikiranira hafi amateka ya Jenoside yakorewe Abatutsi rero bafite impungenge ko hatazategerezwa ko aba bantu bagera mu zabukuru, n'iyo bafatwa nk'uko byagenze kuri Kabuga Felisiyani, hagatangazwa ko badafite imbaraga z'ubwonko n'iz'umubiri zibemerera kuburanishwa.

Icyemezo cyo kutaburanisha Felisiyani Kabuga, umunyemari ufatwa nk'umuterankunga wa Jenoside yakorewe Abatutsi, kije gihumuriza n'abandi bakidegembya hirya no hino ku isi, bakaba biruhukije kuko iyo bumvise ko n'iyo bazafatwa bashaje, batazagezwa mu butabera.

Iki cyemezo kandi gihuriranye n'ijambo rikomeye Ambasaderi Busingye Johnson uhagarariye uRwanda mu Bwongereza, yagejeje ku bagize Inteko Ishinga Amategeko y'icyo gihugu, yibaza impamvu Ubwongereza bukomeje kuba indiri y'abajenosideri, kandi iki gihugu gifite ibimenyetso bidashidikanywaho, byerekana ko abo Banyarwanda 5 bakurikiranyweho uruhare rukomeye muri Jenoside yakorewe Abatutsi.

Abo ni Charles Munyaneza, Céléstin Ugirashebuja,Vincent Bajinya, Emmanuel Nteziryayo na Céléstin Mutabaruka, bari ba'Burugumesitiri' b'amakomini, aho batanze amabwiriza yo gutsemba ibihumbi byinshi by'Abatutsi.

Ambasaderi Busingye yibukije ko imyaka ibaye 17 abo bajenosideri bararezwe, ndetse Ubushinjacyaha bw'uRwanda bwaratanze ibimenyetso byose byatuma bafatwa, bakoherezwa mu Rwanda cyangwa bakaburanishirizwa mu Bwongereza, nyamara ntibyakozwe, ahubwo bahawe umwanya n'ubushobozi bwo kubiba urwango n'ingengabitekerezo ya jenoside, haba mu Bwongereza ndetse no ku isi yose.

Ambasaderi Busingye yibukije ko Ubwongereza ari kimwe mu bihugu bike byo mu Burasirazuba bw'isi bigicumbikiye abagome, kibizi neza ko ari abajenosideri, mu gihe ibindi bihugu nka Canada, Leta Zunze Ubumwe z'Amerika, Ububiligi, Ubudage, Suwede, Denmark, Ubufaransa, Norvège n'Ubuholandi, byaburanishije abakekwaho uruhare muri Jenoside yakorewe Abatutsi, abandi boherezwa kuburanira mu Rwanda.
Aba bajenosideri bari mu Bwongereza imyaka y'ubukure irabasatira, ndetse hari amakuru avuga ko hafi ya bose bafite uburwayi budakira kandi bukomeye, ku buryo amahirwe yo kuzababona mu rukiko azakomeza kuyoyoka niba Ubwongereza bukomeje kubafata nk'amata y'abashyitsi.
Ibihugu byose bifite inshingano yo gushyikiriza inkiko abakekwaho uruhare muti Jenoside, kuko atari icyaha cyakorewe igihugu kimwe, ko ahubwo ari icyaha ndengakamere cyakorewe inyonko-muntu.

Abayobozi b'Urukiko Mpuzamahanga Mpanabyaha Rwashyiriweho uRwanda, barimo abaperezida barwo uko bagiye basimburana, abashinjacyaha bakuru, bose bakomeje gutakambira ibihugu bimwe na bimwe, ngo bifashe urukiko gufata abakekwaho uruhare muri Jenoside yakorewe Abatutsi.

Nyamara ntibibuza ko bakibereyeho mu buzima busanzwe hirya no hino mu bihugu, birimio na bya bindi bitwigisha ubutabera n' uburenganzira bwa muntu.

Uretse no kuba Ubwongereza ari igihugu cy'inshuti y'uRwanda, nk'uko Ambasaderi Businjye yabyibukije, ntigikwiye kuba aricyo cyimika umuco wo kudahana, no kuba indiri y'abajenosideri, birirwa bahakana banapfobya Jenoside yakorewe Abatutsi.

The post Ese ntihaba hari umugambi wo gukingira ikibaba abajenosideri, ngo bazapfe cyangwa bazafatwe bashaje cyane, bityo bibe impamvu yo kutababuranisha? appeared first on RUSHYASHYA.

Source : https://rushyashya.net/ese-ntihaba-hari-umugambi-wo-gukingira-ikibaba-abajenosideri-ngo-bazapfe-cyangwa-bazafatwe-bashaje-cyane-bityo-bibe-impamvu-yo-kutababuranisha/?utm_source=rss&utm_medium=rss&utm_campaign=ese-ntihaba-hari-umugambi-wo-gukingira-ikibaba-abajenosideri-ngo-bazapfe-cyangwa-bazafatwe-bashaje-cyane-bityo-bibe-impamvu-yo-kutababuranisha

Ni shampiyona yasozwaga nyuma yo gukinwa mu mezi hafi  6, ubariyemo n'ibiruhuko kuko iyi shampiyona ikinwa cyane n'amakipe y'amashuri makuru yisumbuye na kaminuza. Iyi shampiyona y'icyiciro cya kabiri kandi yakinwe mu byiciro 2, Abagabo n'abagore. Icyiciro cy'abagabo hitabiriye amakipe 14 arimo 2 ya Kaminuza ya UR-CAVM na UR -KIST, mu gihe  icyiciro cy'abagore hitabiriye amakipe 5 arimo imwe ya kaminuza ya UR- CAVM.

Ni imikino y'Intoki-Volleyball yakinwe mu minsi ibiri guhera ku wa Gatandatu tariki ya 3 no ku Cyumweru tariki 4 Kamena 2023, mu Ntara y'Amajyepfo mu Karere ka Muhanga, ikinirwa mu ishuri ry'Urwunge rw'Amashuri rwitiriwe Mutagatifu Yozefu i Kabgayi. Ryasojwe ikipe ya St Joseph itsinze imikino yayo yose. Yasoje itsinda ikipe ya Nyanza TSS amaseti 3-0, mu gihe mu bagore ikipe ya Institut Sainte Famille Nyamasheke  yatsinzwe na Gs Saint Aloys Rwamagana amaseti 3-1.

Uko imikino yagenze

Nkuko amategeko yirushanwa yabiteganyaga, amakipe 8 mu bagabo yagombaga gukina izitsinze 4 zikongera gukina imikino yo guhura aho nibura buri kipe yakinnye imikino 6 mu minsi 2 naho mu bagore bo barahuye kuko hari hitabiriye amakipe 4 gusa.

Mu bagabo ikipe ya Gs Saint Joseph yatsinze inikino yayo yose ikaba yarakurikiwe na Nyanza TSS, ku mwanya wa 3 haje ikipe ya Koleji ya Kristu Roi na Petit Seminaire Virgo Fidelis isoza ari iya 4 mu gihe ikipe za UR zakiniye imyanya naho ikipe ya Gisagara Volleyball Academy yo yakuwe mu irushanwa kubera amakosa.

Perezida wa Federasiyo ya Volleyball mu Rwanda, Raphael Ngarambe avuga ko iyi shampiyona yatangiye mu kwezi kwa Gashyantare 2023, ko kandi isojwe neza bigaragara ko abana bafite urwego rwiza cyane.

Ashimangira ko ejo heza h'umukino wa Volleyball mu Rwanda hahari kandi ko bifuza ko amakipe yaba menshi kurushaho, hagategurwa abana benshi bashoboka. Akomeza  asaba abitabira kurangwa n'imyitwarire myiza no kwirinda ibiyobyabwenge kuko nta mukinnyi uzongera kwinjira mu ikipe y'Igihugu adapimwe ibiyobyabwenge, aho basinyanye amasezerano na Polisi izajya ifasha kubapima.

Akomeza ashimira abayobozi b'ibigo by'amashuri bagize uruhare mu migendekere myiza ya shampiyona,' kuko mwabonye ko amakipe y'abahungu yari menshi ndetse turifuza ko n'ay'abakobwa na yo yaba menshi kandi twizeye ko tuzabigeraho vuba'.

Umuyobozi w'Urwunge rw'Amashuri rwaragijwe Mutagatifu Yozefu rw'I Kabgayi, Akimana Innocent avuga ko bishimiye urwego rw'ikipe bafite. Avuga ko yishimira ko nibura mu ikipe y'igihugu y'abato harimo abana biga muri iri shuri bakaba batuma n'abandi bakora, bakazamura urwego no gukaza ingamba zo kurangwa n'Imyitwarire myiza kuko udafite imyitwarire myiza no gutsinda ntabwo bishoboka.

Intumwa ya Minisitiri wa Siporo akaba umukozi w'Iyi Minisiteri ushinzwe amashyirahamwe y'imikino, Habyarimana Florent avuga ko iri rushanwa ryo mu itsinda rya B mu cyiciro cya kabiri rigaragaje ishusho nziza y'ikipe y'igihugu mu cyiciro cy'abato bashobora no kuzajya mu ikipe nkuru bagahesha igihugu icyubahiro mu mahanga.

Yagize Ati' Iyi shampiyona isojwe igaragaje ko dufite impano zigaragaza ko ejo hazaba hameze neza. Iki cyiciro cya kabiri mu byiciro byose bya Siporo nicyo gipimo cyiza cy'ikipe y'Igihugu, cyane ko aba ari abakinnyi bakiri bato, abana bafite urwego ruri hejuru cyane.

Akomeza avuga ko gahunda bafite nka Minisiteri ya Siporo ari uko bashyira imbaraga mu mashuri kuko ariho bakwerekeza amaso kuko biga baba hamwe bakitoreza hamwe kandi urebye uko batangiye umwaka w'imikino birimo gutanga umusaruro kandi bazakomeza gufasha no gusaba abakinnyi kugira imyitwarire myiza.

Shampiyona y'icyiciro cya kabiri muri Volleyball izagaruka mu kwezi kwa Nzeli 2023. Amakipe yose yakinnye yahembwe ibikoresho birimo amafile yo gukinirwaho n'imipira naho ikipe zahize izindi zihabwa ibikombe.

Akimana Jean de Dieu

Source : https://www.intyoza.com/2023/06/07/hasojwe-imikino-cyicyiciro-cya-kabiri-saint-joseph-na-saint-aloys-rwamagana-bahabwa-ibikombe/

Visi Perezida w'umutwe 'Abadepite Edda Mukabagwiza arasaba abaturage bafite amakuru y'ahajugunywe imibiri y'Abatutsi bishwe muri Jenoside kuyatanga kugirango bashyingurwe mu cyubahiro bityo binafashe igihugu mu rugendo rwo kubaka Ubumwe bw'Abanyarwanda .

Ibi yabitangaje kuri uyu wa 6 Kamena 2023, ubwo yifatanyaga n'Abaturage bo mu murenge wa Rwezamenyo mu Karere ka Nyarugenge mu gikorwa cyo kwibuka ku nshuro ya 29 Jenoside Yakorewe Abatutsi.

Igikorwa cyo kwibuka ku nshuro ya 29 Jenoside yakorewe Abatutsi mu Murenge  wa Rwezamenyo, cyabanjirijwe no gushyingura mu cyubahiro imibiri 20 y'Abatutsi bishwe muri Jenoside yabonetse  mu mirenge itanu y'Akarere ka Nyarugenge, irimo Rwezamenyo ,Kimisagara, KANYINYA ,Mageregere na Nyarugenge.

Iyi mibiri 20 ikaba yashyinguwe mu rwibutso rwa Jenosido rwa Nyanza mu Karere Kicukiro.  

Umuyobozi Nshingwabikorwa w'Akarere Emmy Ngabonziza yasabye Abaturage bafite amakuru y'ahajugunywe imibiri y'Abatutsi bishwe mu gihe cya Jenoside gutanga amakuru kugirango ishyunguwe mu cyubahiro.

Ati ' Hari n'abibeshya ko ubumwe bw'Abanyarwanda buzubakwa hashingiwe ku kinyoma cyangwa se kudatanga amakuru akumva ko gutanga amakuru ubumwe bwe yarafitanye n'abandi baturanyi cyangwa se abandi bavandimwe baturanye aho ngaho nibimenyekana ko aribyo bizaba ikibazo gikomeye ariko ntabwo ariko kuri kuko intambwe tumaze gutera yose yashingiye ku kuri yashingiye ku kwihana yashingiye ku gusaba imbabazia yashingiye kugutanga imbabazi.'

Kuruhande rw'ubuyobozi bw'umurenge wa Rwezamenyo, bwo ngo bukomeje gushakisha Amakuru y'Abatutsi biciwe muri uwo murenge no gushakisha imibiri yabo kugirango ishyingurwe mu cyubahiro  Nkuko Nirera marie rose uyobora umurenge wa Rwezamenyo abisobanura.

Ati 'Munsi ya Brigade gatoya umwaka ushize twahakuye umubiri turayishyingura ariko ayo makuru yose tubanza gusesengura dufatanyije na Ibuka n'izindi nzego dufatanya nazo turacyakurikirana aho amakuru yose  yaboneka y'ahajugunywe imiribi y'Abatutsi bishwe muri Jenoside.'

Ubwo yifatanyaga n'Abaturage bo mu murenge wa Rwezamenyo mu gikorwa cyo kwibuka ku nshuro ya 29 Jenoside Yakorewe Abatutsi, Visi Perezida w'umutwe w'Abadepite Edda Mukabagwiza nawe yasabye abafite amakuru y'ahajugunywe imibiri y'Abatutsi bishwe muri Jenoside kuyatanga kugira ngo bashyingurwe mu cyubahiro, bityo binafashe igihugu mu rugendo rwo kubaka Ubumwe bw'Abanyarwanda

Ati 'Ese muri rwa rugendo turimo rwa rukundo ndi kugenda ndwubaka nongera kubugarura bwa bumwe abandi bavuga ndabufite muri njyewe, aho rero niho ngira ngo cyane cyane ababitse amakuru bicaranye badufashe kugira ngo nababandi biciwe ababo bumve baruhutse ku mutima.'

Kwibuka Jenoside yakorewe Abatutsi mu Murenge wa Rwezamenyo bikorwa buri mwaka tariki 6 Kamena.

The post Nyarugenge: Visi Perezida w'umutwe Abadepite yasabye abaturage gutanga amakuru y'ahajugunywe imibiri y'Abatutsi bishwe muri Jenoside appeared first on FLASH RADIO&TV.

Source : https://flash.rw/2023/06/07/nyarugenge-visi-perezida-wumutwe-abadepite-yasabye-abaturage-gutanga-amakuru-yahajugunywe-imibiri-yabatutsi-bishwe-muri-jenoside/?utm_source=rss&utm_medium=rss&utm_campaign=nyarugenge-visi-perezida-wumutwe-abadepite-yasabye-abaturage-gutanga-amakuru-yahajugunywe-imibiri-yabatutsi-bishwe-muri-jenoside

Ku gicamunsi cyo kuri uyu wa Gatatu taliki 7 Kamena, muri Village Urugwiro habereye umuhango wo kwakira indahiro z’abayobozi bashya. Uyu umuhango wayobowe na Perezida Paul Kagame.

Abayobozi barahiye ni Minisitiri mushya w'Ingabo, Juvenal Marizamunda wagiye kuri uyu mwanya asimbuye Maj Gen Albert Murasira; Lt Gen Muganga wagizwe Umugaba Mukuru w'Ingabo z'u Rwanda asimbuye Gen Jean Bosco Kazura; 

Umugaba Mukuru w'Ingabo zirwanira ku Butaka, Maj Gen Vincent Nyakarundi wasimbuye Lt Gen Muganga ndetse na Komiseri Mukuru wa RCS, Brig Gen Evariste Murenzi wasimbuye Marizamunda wagizwe Minisitiri w’Ingabo.

Mu ijambo rya Perezida Kagame yasabye aba bayobozi kumva uburemere bw’Inshingano bahawe. Yagize ati: “Imirimo ni ukuyikora uko bishoboka, igakorwa neza, igakorwa twumva uburemere bw'izo nshingano bitewe n'uko hafi byose cyangwa ibyinshi tuba tubikorera igihugu n'Abanyarwanda.

N'ibindi binyura mu buryo bw'ubufatanye, abantu mu nzego zitandukanye bagomba gufatanya, bakuzuzanya kugira ngo igihugu kigezweho ibyo kiba giteze ku bayobozi”.

Lt Gen MUBARAKH Muganga yagizwe Umugaba Mukuru w’Ingabo z’u Rwanda

Minisitiri w’Ingabo mushya, Juvenal Marizamunda 

Source : https://inyarwanda.com/inkuru/130290/perezida-kagame-yakiriye-indahiro-zabayobozi-bashya-abasaba-kumva-uburemere-bwinshingano-b-130290.html

Ibinyamakuru bitandukanye muri Tanzania bikomeje kwandika inkuru zivuga ko Harmonize ashobora kuba yarateye inda Esma Platnumz, mushiki wa Diamond Platnumz wahoze ari umukoresha we muri Wasafi Records bakaza gutandukana bashwanye.

Simulizi Na Sauti ivuga ko Esma Platnumz wavuzwe mu rukundo n'Umuhanzi Harmonize usanzwe ari umwanzi karundura wa musaza we Diamond Platnumz akaba umuyobozi mukuru w'ikigo Wasafi Group gifite ibitangazamakuru, inzu ireberera inyungu z'abahanzi n'ikigo gitega ku mikino.

Iki kinyamakuru kivuga ko gishingira ku magambo Esma Platnumz yatangarije ku rubuga rwa Instagram  ko atwite umwana kandi ko azibaruka hagati y'ukwezi kwa Nzeri cyangwa Ukwakira 2023. Tariki 06 Gicurasi Esma yagize ati 'Ryoherwa n'iyi mvura uri kumwe n'umukunzi wawe. Mu mezi atatu cyangwa ane turibaruka umwana'

Icyatangaje abantu benshi nuko uyu mukobwa ukunzwe cyane ku mbuga nkoranyambaga muri Tanzania yarengejeho ko uwo mwana azibaruka ari uw'umugabo ukomoka mu gace ka Mtwara muri icyo gihugu kandi ariho uyu muhanzi Harmonize bavuzwe mu rukundo akomoka.

Asoza ubutumwa yatambukije kuri Instagram yagize ati 'Turibaruka umwana kuva i Mtwara' iyi mvugo niyo benshi bari gushingiraho bavuga ko uyu mukobwa yaba ariwe ntandaro yo gutandukana kwa Harmonize na Kajala Frida biteguraga kubana.

Bivugwa ko Kajala Frida akimara kumenya ibanga ry'uko Harmonize yari amaze kongera guha amahiwe ya kabiri banitegura kurushinga, yateye inda umukobwa uvukana na Diamond Platnumz yahise asesa umubano wabo ndetse atangaza ko bitari bikwiye kongera guha amahirwe uyu musore uharaye Yolo The Queen.

Ku rundi ruhande ariko Harmonize akimara gutandukana na Kajala yahise ashyira hanze indirimbo 'Single' ikomeje kumwambutsa imipaka, ikagira ubutumwa bugaragaza ko uyu mugore Frida ashobora kuba yaramucaga inyuma, kandi we yari amaze kumwiyegurira yifuza ko banashinga urugo bakubaka umuryango.

Reka inkuru ya Kajala na Harmonize nyicumbikire aha, ahubwo ngaruke ku mubano wa Konde Boy na Esma Platnumz

Esma Platnumz yatangaje ko agiye kwibaruka umwana w'umugabo i Mtwara, bikekwa ko ari Harmonize nyuma y'amezi asaga abiri ateye utwatsi iby'urukundo rwavugagwa hagati yabo. Tariki 30 Mata 2023 Esma abinyujije kuri Instagram yatangaje ko nta mubano wihariye afitanye na Harmonize kandi yumvikanisha ko nta mukunzi afite.

Ikinyamakuru Kubi Live kivuga ko icyo gihe yagize ati'Mugiye gutuma tudashyigikira abantu kugira ngo bitavugwa ko turi mu mubano. Mugiye gutuma tutumva indirimbo za bamwe kandi muzatuma abantu bavuga ko twikunda kandi ko tudashyigikira abandi'

Iki gihe Esma kandi yavuze ko yicuza icyatumye amenyekana kuko arambiwe kubona abantu babyuka bahimba ibintu bitari ukuri kugira ngo bacuruze. Ati 'Hari igihe najyaga nifuza kuba icyamamare cyane,  ariko ubu nonaha. Abantu babyuka barema ibintu kugira ngo babone ibo bavugaho.'

Esma Platnumz yakomeje avuga ko nta maharo agifite kuko asigaye abengwa n'abagabo kubera ibintu avugwaho buri munsi ku mbuga nkoranyambaga. Ati 'Kutuvugaho ibi binyoma bituma abantu bashakaga kudukunda bya nyabyo batifuza no kutwegera.'

Iki gihe Esma wavugaga ko nta mukunzi afite ntiyigeze yifatanya n'umuryango we urimo nyina na Diamond Platnumz ubwo Zari Hassan n'abana ba musaza we bamusuraga muri Tanzania bagakora ibirori byo kubakira. Mu mafoto n'amashusho Diamond na Zari bashyize hanze Esma ntiyagaragayemo bikavugwa ko yanze kwitabira ku bushake.

Radio Classic FM ivugira ku murongo 105.1 muri Tanzania icyo gihe tariki 22 Mata 2023 yatangaje ko Diamond Platnumz n'inshuti ze bakusanyije imodoka zihenze zo kujya kwakira abana be na nyina wabo Zari Hassan ku kibuga cy'indege mbere yuko ibirori by'akatarabineka bibera iwe mu rugo.

Bivugwa ko Diamond yahise arakarira mushiki we, kubera ko kutitabira ibi birori by'umuryango kandi kiba rimwe mu mwaka birumvikana ko buri umwe muri bo agifata nk'ingenzi cyane ku buryo gucikwa bifatwa nk'agasuzuguro. Icyo gihe Harmonize yakomeje gukongeza urwikekwe hagati ya Esma Platnumz na musaza we Diamond.

Harmonize icyo gihe wari uwubanye na Yolo the Queen wo mu Rwanda yatangaje ko ashimira Esma Platnumz kubw'urukundo n'ubushuti bafitanye, anamushimira ku ruhare yagize ku ndirimbo 'Say Yes' ya Dj Seven Worldwide yafatanyije n'uyu muhanzi. Iki gihe Harmonize wasaga n'ukongeza umuriro yagize ati: 'Warakoze kubw'urukundo nyarwo n'ubushuti. Imana iguhe umugisha.'

Gutangaza ko nta mukunzi ufite ushaka kwikuraho umuntu muri rubanda, nyuma y'ukwezi kumwe ugatangaza ko utwite biri mu bituma abantu bakomeje gutekereza Esma yaba yarabeshya icya semuhanuka kandi awubanye n'umwanzi nimero ya mbere ya musaza we Diamond Platnumz.

Diamond ubusanzwe witwa Abdul Nasib Juma, avukana kuri nyina na Esma Platnumz umubyeyi w'abana babiri, naho Queen Dareen ubarizwa muri Wasafi Records byavugagwa ko bavukanaga kuri se Abdul Juma, nyina Mama Dangote mu 2021 yaje guhakana ko atari we babyaranye.

Ubutumwa Esma Platnumz yatambukije kuri Instagram avuga ko yiteguye kwibaruka umwana mu mezi atatu cyangwa ane ari imbere 

Esma Platnumz uvugwaho guterwa inda na Harmonize asanzwe ari umucuruzi ukomeye akaba n’umubyeyi w’abana babiri 

Harmonize amaze imyaka isaga ine atarebana neza na Diamond wahoze ari sebuja muri Wasafi Records

Bivugwa ko Diamond amaze igihe atarebana neza na mushiki we Esma Platnumz kubera Harmonize 

Source : https://inyarwanda.com/inkuru/130283/harmonize-yaba-yarateye-inda-mushiki-wumwanzi-we-diamond-130283.html

Iyo utazi ingano y'ifunguro ukwiye gufata, wisanga wariye byinshi, bikarangira bikuzaniye  ingaruka mbi ku buzima bwawe harimo umubyibuho ukabije, indwara zikomeye zirimo na diyabete n'ibindi.

Bumwe mu buryo bwagufasha gucika burundu kuri iyo ngeso ni ukubanza kumva ko bigira ingaruka mbi ku mubiri wawe.

Dore ingaruka 7 mbi ziterwa no kurya ibiryo byinshi dukesha urubuga healthline.com:

1. Bitera ibinure bikabije mu mubiri

Kugira ngo ikigero cya karori kiringanire, bigenwa n'umubare wa karori umubiri wawe winjije n'izo watwitse. Iyo urya ibirenze ibyo ukoresha, usanga hari karori zisaguka. Umubiri wawe, ushobora kubika karori z'inyongera nk'ibinure.

Kugira ngo wirinde kwiyongera kw’amavuta, gerageza kuzuza poroteyine n’imboga zidafite ibinyamisogwe mbere yo kurya karbike n’ibiribwa binini.

2. Bishobora guhungabanya amabwiriza yo gusonza

Imisemburo ibiri y’ingenzi igira ingaruka ku kugenzura inzara, ni ghrelin; itera ubushake bwo kurya, na leptine; igabanya ubushake bwo kurya.

Iyo umaze umwanya utarya, urwego rwa ghrelin rwiyongera. Noneho wamara kurya, urugero rwa leptin rubwira umubiri wawe ko wuzuye. Ariko kurya cyane bishobora guhungabanya iyi gahunda.

Ihungabana ry’iyi misemburo rishobora gutuma urya cyane. Warwanya izi ngaruka, ugaburira umubiri wawe ibiryo bimwe na bimwe biwufitiye akamaro kandi ukabiryaho gahoro gahoro kugira ngo umubiri wawe ube byuzuye.

3. Byongera ibyago byo kurwara indwara zikomeye

Nubwo kurya rimwe na rimwe bishobora kutagira ingaruka ku buzima bw'igihe kirekire, usanga kenshi gutera umubyibuho ukabije, bikongera ibyago byo kurwara. 

Uyu mubyibuho ukabije wongera ibyago byo kurwara indwara z'umutima, ubwonko, diyabete z'ubwoko bwose, ibibazo muri metabolic syndrome, n'izindi ndwara zitandukanye.

4. Bishobora kubangamira imikorere y'ubwonko

Igihe kinini, kurya cyane bishobora kwangiza imikorere y'ubwonko. Ubushakashatsi bwinshi buhuza kurya cyane, kubyibuha bikabije no kugabanuka mu mitekerereze ku bantu bakuze, ugereranije n'abarya bike.

Kuba ubwonko bwawe bugizwe n’ibinure bigera kuri 60%, gufata amafunguro akungahaye ku mavuta nka avoka, amafi arimo amavuta, n’amavuta ya elayo bishobora kugufasha kwirinda imikorere mibi y'ubwonko.

5. Bishobora kugutera kugira isesemi

Kurya byinshi buri gihe bishobora gutera ibyiyumvo bibangamiye umubiri wawe kugira isesemi no kuba igogora ritagenda neza. Mu gihe warengeje urugero, isesemi ishobora no kugutera kuruka, bumwe mu buryo umubiri wawe ukoresha bwo kugabanya umuvuduko ukabije w'igifu.

Mugihe hari imiti myinshi ishobora kuvura ibi bibazo, uburyo bwiza bwabikuraho burundu, ni ukugenzura ingano y'ifunguro ryawe kandi ukarya buhoro kugirango wirinde izi ngaruka hakiri kare.

6. Bishobora guteza ikibazo cya gaze ikabije mu mubiri no kubyimba

Kurya ibiryo byinshi bishobora kunaniza sisitemu y'umubiri wawe, bigatera izamuka rya gaze mu mubiri no kubyimba.

Ibintu bitanga gaze abantu bakunda kurya cyane ni ibiryo birimo ibirungo bikoze mu mavuta, hamwe n'ibinyobwa bifite gaze karubonike nka soda. Ibishyimbo hamwe n'imboga zimwe na zimwe bishobora kubyara gaze ku kigero kidakabije cyane.

Byongeye kandi, no kurya wihuta nabyo bishobora kugutera kubyimba bikanazamura gaze mu mubiri wawe bitewe n'ibiryo byinshi byinjira mu gifu mu buryo bwihuse.

7. Bituma uhorana ibitotsi

Nyuma yo kurya ibiryo byinshi, abantu benshi bagira ubunebwe cyangwa bakananirwa cyane. Ibi biterwa n'icyitwa 'reactive hypoglycemia', aho isukari y'amaraso yawe igabanuka nyuma gato yo kurya ifunguro rinini. 

Isukari nke mu maraso ikunze guhuzwa n'ibimenyetso nko gusinzira buri kanya, ubunebwe, umuvuduko ukabije w'umutima, no kubabara umutwe.

Biroroshye kurya ibiryo byinshi niba utitaye kubyo ngano y'ibyo urya cyangwa ngo umenye niba wahaze. Mu by'ukuri, iyi ngeso itera ibibazo bitandukanye birimo no kurwara indwara zikomeye nk'umutima na diyabete. Niba ubishoboye, gisha inama umuganga w'imirire kugira ngo agufashe gukora gahunda wajya uriraho, kugira ngo ubuzima bwawe bugende neza.

Abahanga mu bijyanye n’ubuzima bavuga ko kurya ibiryo byinshi cyane atari byiza 

Source : https://inyarwanda.com/inkuru/130284/inda-nini-yishe-nyirayo-menya-ingaruka-mbi-zo-kurya-ibiryo-byinshi-130284.html

Nyuma y’ibiganiro bimaze iminsi biri mu nzira nziza hagati ya Onana usoje amasezerano muri Rayon Sports na Simba SC yo muri Tanzania, uru rugamba rwinjiyemo na Singida Big Stars ngo irebe ko yamwegukana.

Rayon Sports yifuje ko uyu mukinnyi yakongera amasezerano ariko arabyanga ni mu gihe ari mu biganiro n’amakipe yo hanze y’u Rwanda arimo na Simba SC.

Amakuru aturuka mu gihugu cya Tanzania yo avuga ko ibiganiro byarangiye ndetse igisagaye ari ukumwerekana muri iyi kipe ibarizwa mu gace ka Msimbazi.

Gusa amakuru yizewe avuga ko Onana atarasinya ariko ibiganiro bigeze kure kandi biri mu murongo mwiza, amahirwe menshi ari uko agomba kwerekeza muri iyi kipe.

Uretse iyi kipe kandi Onana n’umuhagarariye bari mu biganiro n’andi makipe ndetse arimo na Singida Big Stars ikinamo umunyarwanda Meddie Kagere izakina CAF Confederation Cup.

Iyi kipe ntabwo yumva uburyo Simba SC ishobora kubatwara uyu mukinnyi aho ndetse yanashyizeho amafaranga y’umurengera, yiyemeje gukuba kabiri amafaranga Simba SC irimo itanga kuri Onana yo yiteguye gukuba kabiri mu gihe yakwemera kujya muri iyi kipe.

Onana ararwanirwa n’amakipe arimo Simba SC na Singida Big Stars

Source : http://isimbi.rw/siporo/article/leandre-onana-yabaye-imari-ishyushye-muri-tanzania

Indwara yo guta umutwe mu ndimi z'amahanga ni Dementia/Demence, ni indwara ifata umuntu aho uyirwaye atakaza ubushobozi bwo kwibuka, gutekereza, n'ubushobozi bwo gukora ibikorwa bya buri munsi.

Ijambo Dementia rikomoka mu ijambo ry'ikilatini demens, bivuze gutakaza ibitekerezo.

Kuva mu kinyejana cya 13,nibwo indwara ya Dementia yamenyekanye bikozwe n'Abagereki. Nubwo Abagereki banditse inkomoko y'ubu bwonko, igitekerezo nticyagarukiye aho gusa kuko n'indwara zose zo mu mutwe no mu mitsi zitera ingaruka zo mu mutwe zose zakorewe ubushakashatsi. Mu kinyejana cya 19, abantu bafite ikibazo cyo guta umutwe bamenyekanye nk'abarwayi, bikozwe n'abavuzi  b'inzobere ku ndwara zo mu mutwe.

Kugeza ubu abantu barenga miliyoni 55 ku isi bafite ikibazo cyo guta umutwe, abarenga 60% muri bo baba mu bihugu bikennye kandi biciriritse. Buri mwaka, abantu bagera kuri miliyoni 10 nibo bandura iyi ndwara.

Dukurikije imibare ya OMS iheruka gusohoka mu 2020 Impfu za Alzheimers & Dementia mu Rwanda zageze ku bantu 657 , aho zihariye 1.13%  by'impfu zose. Igipimo cy'urupfu kubaduye iyi ndwara mu Rwanda ni 0.0001%.

Naho ku Isi yose mu mwaka wa 2019 abagera kuri miliyoni 1.8 bapfuye bazize iyi ndwara, mu Ubwongereza gusa mu mwaka ushize abagera ku bihumbi 66 nibo bahitanwe nayo.

Indwara yo guta umutwe ituruka ku ndwara zitandukanye no gukomeretsa bigira ingaruka ku bwonko. Indwara ya Alzheimer ni imwe muzitera guta umutwe aho abari hagati 60-70% byadura bitewe nayo.

Indwara yo guta umutwe ni yo mpamvu ya karindwi itera impfu kandi ni imwe mu mpamvu zikomeye zitera ubumuga ku bantu bakuze ku isi.

Muri 2019, guta umutwe byatwaye ubukungu ku isi yose miriyoni 1,3 z'amadolari y'Amerika. Abagore bibasiwe cyane no guta umutwe, haba mu buryo buziguye cyangwa butaziguye. Abagore bafite imyaka myinshi y'ubuzima bwahinduwe n'ubumuga n'impfu ziterwa no guta umutwe.

Indwara irushaho kwiyongera uko igihe kigenda. Byibanze cyane kubantu bakuze ariko ntabwo abantu bose bazabibona uko basaza.

Ibintu byongera ibyago byo kurwara umutwe harimo:

-Imyaka (bikunze kugaragara muri abo 65 cyangwa barenga)

-Umuvuduko ukabije w'amaraso

-Isukari nyinshi mu maraso (diyabete) Ibindi byago bishobora guteza akaga harimo kwiheba, kwigunga, kwiga amashuri make no guhumanya ikirere.

-Kubyibuha birenze urugero cyangwa kubyibuha.

Ibimenyetso bya mbere biranga iyi ndwara

Harimo kwibagirwa ibintu cyangwa ibyabaye vuba , kutabasha kwibuka ibyo warurimo, kuzimira mu gihe ugenda cyangwa utwaye, kwitiranya ahantu hamenyerewe ndetse no gutakaza umwanya.

Uko ivurwa

Nta muti wo guta umutwe, ariko hashobora gukorwa byinshi kugirango bunganire abantu babana n'uburwayi.

Byongeye kandi, imiti imwe n'imwe ikoreshwa havurwa uburwayi bwo mu mutwe ishobora gufasha umuntu wagarijwe n'iyi ndwara.

Uburyo bwo kwirinda iyi ndwara

Nubwo imyaka ari yo mpamvu ikomeye ishobora gutera indwara yo guta umutwe, nanone guta umutwe ntabwo byibasira gusa abantu bakuze kuko 9% aribo ifata bakuze.

 Ubushakashatsi bwerekana ko abantu bashobora kugabanya ibyago byo guta umutwe aho basabwa kutanywa itabi, kwirinda kunywa inzoga nabi, kugenzura ibiro ufite, kurya indyo yuzuye, no gukumira umuvuduko wamaraso, cholesterol hamwe n'isukari iri mu maraso.

Valens Nzabonimana

The post Sobanukirwa byinshi ku ndwara yo kwibagirwa izwi nka 'Dementia' appeared first on FLASH RADIO&TV.

Source : https://flash.rw/2023/06/07/sobanukirwa-byinshi-ku-ndwara-yo-kwibagirwa-izwi-nka-dementia/?utm_source=rss&utm_medium=rss&utm_campaign=sobanukirwa-byinshi-ku-ndwara-yo-kwibagirwa-izwi-nka-dementia

N'ikifuzo bahuriyeho na benshi basanzwe bakurikiranira hafi umupira w'amaguru mu Rwanda, nabo babona ko inzira inyurwamo hashyirwaho abayobozi b'uru rwego Ferwafa itaboneye!

Tariki 24 Kamena 2023, hateganyijwe amatora ya Komite Nyobozi ya Ferwafa izaza gusoza imyaka ibiri yari isigaye kuri manda ya Nizeyimana Mugabo Olivier uherutse gusezera

Gusa aya matora ntari kuvugwaho rumwe bitewe n'uburyo hatanzwe za kandidatire za bamwe mu bifuza kujya muri iyi myanya.

Abagabo batajya barya indimi mu gutanga ibitekerezo byakubaka Siporo y'u Rwanda, ni Sam Karenzi, Muramira Regis bombi bakora Itangazamakuru na Munyakazi Sadate wayoboye Rayon Sports mu myaka ishize.

Karenzi na Sadate badakunda guhuriza ku bitekerezo mu buryo bumwe cyangwa ubundi, kuri iyi nshuro bahurije ku kuba amatora ya Ferwafa akwiye gusubikwa hakabanza kugira ibindi binozwa.

Biciye mu kiganiro 'Urukiko rw'Ubujurire rw'Imikino' cya Fine-FM, Sam na Munyakazi basabye inzego bireba gusubika aya matora kuko ari gutegurwa mu gisa n'amanyanga.

Bombi bakomeje kugaragaza ko abiyamamarije imyanya muri Ferwafa, bamwe muri bo batazaba baje mu nyungu z'umupira muri rusange ahubwo bazaba baje ku bw'inyungu za bo bwite.

Ikindi aba bagabo bagaragaje, ni uko amwe mu mazina yiyamamaje ndetse akemerwa, adasanzwe azwi muri ruhago mu Rwanda. Ibyo bo bavuga ko bazaba baje nk'abatumwe kuzuza inshingano runaka ku bw'inyungu z'ababazanye muri iyo myanya.

Sadate we yageze aho avuga ko bitewe no kuba umupira w'amaguru w'u Rwanda wubakiye kuri mafia, bigoye ko watera imbere kuko nta kuri kuwurimo.

Abakomeje kugarukwaho cyane, ni Komiseri Ushinzwe kumenyekanisha ibikorwa no gushaka inkunga, Rwakunda Quinta, Komiseri Ushinzwe Tekinike n'Iterambere by'Umupira w'Amaguru, Ndayiragije Bosco, Komiseri Ushinzwe ubuvuzi bwa Siporo, Gatsinzi Herbert na Visi Perezida wa Kabiri Ushinzwe Tekinike, Mugisha Richard.

Source : https://umuryango.rw/imyidagaduro/imikino/article/karenzi-na-sadate-batabarije-ferwafa-iri-kugana-ahabi-kubera-imiyoborere

Kuri uyu wa 7 Kamenya 2023 nibwo Perezida Kagame yazamuye mu ntera Abapolisi basaga 4000 muri Polisi y'u Rwanda, barimo Abofisiye bakuru, Abato n'Abapolisi basanzwe.

Abapolisi barindwi bari basanzwe bafite ipeti rya Chief Superindent of Police( CSP) bazamuwe mu ntera ku ipeti rya Assistant Commissioner of Police (ACP). Abo bapolisi barimo se wa Miss Rwanda 2022 Nshuti Muheto Divine ugiye kumarana ikamba imyaka ibiri.

Se wa Miss Rwanda 2022 Nshuti Divine Muheto, Muheto Francis ari mu bapolisi basaga ibihumbi 4000 bazamuwe mu ntera na Perezida Paul Kagame.

Nshuti Muheto Divine mu ijoro ryo ku wa Gatandatu rishyira ku Cyumweru tariki 20 Werurwe 2022 ni bwo yambitswe ikamba rihabwa umukobwa uhiga abandi mu buranga, ubwenge n'umuco.

Uyu mwari w'imyaka 19 y'amavuko dore ko yabonye izuba ku itariki 21 Ukuboza 2002, yavukiye mu mujyi wa Kigali ari naho yakuriye n'abana bane bavukana akaba uwa kabiri muri bo.

Yize mu Ishuri ry'Incuke rya Kigali City School, akomereza amashuri abanza mu Ishuri ribanza rya Kingdom Education Centre. Mu Cyiciro Rusange [Tronc Commun] yize mu Ishuri rya Mutagatifu Marie Adelaide mu Karere ka Kamonyi.

Amashuri yisumbuye yayize muri Fawe Girls School, ishami rya Gahini, aho yize ibijyanye n'imibare, ubukungu n'ubumenyi bw'Isi.

Ibirori byo gutegura Miss Rwanda 2023 ntabwo byabayeho kubera ko habanjwe gutegurwa amabwiriza agenga amarushanwa y'ubwiza.

Ubuyobozi bw'Inteko nyarwanda y'Umuco n'ururimi ni bwo bwasubitse itegurwa rya Miss Rwanda. Byahise biha amahirwe Miss Muheto yo kugumana ikamba kugeza igihe bizasubukurirwa.

Ubuyobozi bw'Inteko y'umuco bwamaze gufata icyemezo cyo gusubika iri rushanwa riherutse guhura n'ibibazo byatumye ryamburwa Rwanda Inspiration Back Up yari isanzwe iritegura.

Nyuma yo kuryambura Rwanda Inspiration Back Up, Minisiteri y'Urubyiruko n'Umuco yahise iha Inteko y'Umuco inshingano zo gutegura amabwiriza agenga amarushanwa y'ubwiza mu Rwanda kugeza ubu aya akaba atarasohoka.

Uretse gutegura aya mabwiriza, Inteko y'Umuco yanahawe inshingano zo gukurikirana ibihembo by'abakobwa batsindiye amakamba atandukanye no gukomeza ibiganiro n'abaterankunga b'iri rushanwa.

Ibi bikiyongeraho gufata inshingano zo gutegura uburyo iri rushanwa ryakongera gutegurwa mu gihe kizaza ariko noneho rikaba riteguye ku buryo buri ku murongo budateye impungenge uwo ari we wese

Ubuyobozi bw'Inteko y'umuco bwamaze gufata icyemezo cyo gusubika iri rushanwa riherutse guhura n'ibibazo byatumye ryamburwa Rwanda Inspiration Back Up yari isanzwe iritegura.

Nyuma yo kuryambura Rwanda Inspiration Back Up, Minisiteri y'Urubyiruko n'Umuco yahise iha Inteko y'Umuco inshingano zo gutegura amabwiriza agenga amarushanwa y'ubwiza mu Rwanda kugeza ubu aya akaba atarasohoka.

Uretse gutegura aya mabwiriza, Inteko y'Umuco yanahawe inshingano zo gukurikirana ibihembo by'abakobwa batsindiye amakamba atandukanye no gukomeza ibiganiro n'abaterankunga b'iri rushanwa.

Ibi bikiyongeraho gufata inshingano zo gutegura uburyo iri rushanwa ryakongera gutegurwa mu gihe kizaza ariko noneho rikaba riteguye ku buryo buri ku murongo budateye impungenge uwo ari we wese

Source : https://umuryango.rw/imyidagaduro/article/se-wa-miss-nshuti-divine-muheto-yaje-muba-polisi-7-bazamuwe-mu-ntera