Category: Uncategorized

Akenshi iyo abantu b'ibyamamare bari mu rukundo, bagarukwaho cyane ku buryo ibyabo bihangwa amaso, bakavugwa mu bitangazamakuru no ku mbuga nkoranyambaga. Agace gakunze kudashimisha ibyamamare, ni uko iyi paji y'uburyohe bw'urukundo rw'ahahise itajya ipfa gusibangana, yaba mu itangazamakuru cyangwa no ku bafana babaga bazi iby'urwo rukundo. 

Aba ni bamwe mu byamamare nyarwanda byahoze mu rukundo rushyushye ariko bikarangira rushonze nk’isabune:

1. K8 Kavuyo na  Bahati Grace

K8 Kavuyo umwe mu bahanzi nyarwanda bakorera umuziki muri Amerika, unacishamo akaza mu biruhuko mu Rwanda, yamenyekanye cyane mu ndirimbo nka 'Gasopo', Alhamudulillah, Ivanjiri, Asa na bike, Hood Inyumve n'izindi.

 Urukundo rwe na Miss Bahati Grace wabaye Miss Rwanda 2009 rwatangiye kuvugwa mu ntangiriro za 2010, ndetse ubwo K8 yari avuye mu Rwanda agiye gukomereza amasomo ye muri Leta Zunze Ubumwe za Amerika, bombi bahamije ko intera hagati yabo ntacyo izabangamira urukundo rwabo. 

Urukundo rwa Bahati n’umuraperi Kavuyo  ruri mu  zavugishije benshi

Ibi ariko siko byaje kugenda kuko Bahati Grace akimara gutwara inda y'uyu musore ibyabo byatangiye kuzamo agatotsi kugeza ubwo batandukanye, ngo ubu bahuzwa n'umwana wabo gusa Ethan Muhire kuri ubu ufite imyaka 7. Nyuma , K8 Kavuyo yaje kubyara undi mwana ndetse kuri ubu Bahati Grace akaba yaramaze kurushinga na Murekezi Pacifique.

2. Safi  na Knowless

Niyibikora Safi ndetse na Ingabire Butera Jeanne d'Arc uzwi nka Knowless ni bamwe mu bamenyekanye cyane mu rukundo. Aba bahanzi bombi babaga bari kumwe agatoki ku kandi inshuro nyinshi ku buryo kugeza n'ubu benshi batarumva icyaba cyarakuruye ugutandukana kwabo.

Urukundo rwabo rwari rwarashinze imizi ku buryo mu ndirimbo ya Urban Boys Safi yahozemo, bise 'Umwanzuro' Knowless yarimo nk'umukunzi wa Safi bamuririmbira ko ari we mwanzuro nta wundi wamusimbura. Urukundo rwabo narwo rwaje kuba nka bombo rushonga rushira kugeza ubwo Knowless ashatse undi mugabo utari Safi, hadaciye kabiri na Safi nawe aba ashatse umugore.

Ubwo Knowless yashyiraga Safi mu mashusho y’indirimbo ye ‘Byarakomeye’ benshi bari biteze ko bazarushinga

Kuva Knowless yarushinga na Ishimwe Clement utunganya umuziki akaba ari nawe washinze inzu ya Kina Music ifasha abahanzi, usanga benshi ku mbuga nkoranyambaga bakunze kumwibasira bamubaza niba yibuka ko umugore we yahoze ari uwa Safi. Ni mugihe kandi Safi uherutse guhana gatanya na Judith akunzwe gusererezwa ko ntahandi azakura umukunzi mwiza nka Knowless yahoranye.

3. Riderman na  Assinah

Umuraperi Riderman na Assinah bari muri Couples zitazibagirana mu Rwanda

Nta wakwibagirwa urukundo rukomeye rwari hagati y'aba bombi, benshi babaga bategereje gusa itariki Riderman yazavugiraho ijambo nyamukuru, nta watekerezaga ko batandukana. Mu birori bitandukanye byiyubashye, Riderman yabaga ari kumwe n'uyu mukunzi we, ubona ibyabo bituje kandi biryoshye. Uretse ibyo kandi, Riderman yajyaga aririmba uyu mukobwa mu ndirimbo ze, gusa abanyarwanda benshi bakubiswe n'inkuba ubwo Riderman yashyiraga ubutumire hanze, hatanditseho Assinah ahubwo hariho Agasaro Nadiah wari nyampinga wa Mount Kenya. 

Nubwo nta wamenya icyatumye urukundo rwe na Assinah ruhagarara, nta wakwibagirwa imyaka bamaranye baha urugero benshi mu bakundana.

4. Sacha & Nizzo

Umuhanzi Nizzo n’umunyamideli Sacha bakanyujijeho mu rukundo

Nizzo n'umukunzi we Sacha bari mu mashusho y’indirimbo 'Umwanzuro' ibyabo bishyushye, muri icyo gihe Sacha nawe yari akiri umuhanzi. Nizzo wo muri Urban Boys yakundaga kuvuga ko kimwe mu bintu akundira Sacha cyane ari uburyo uyu mukobwa ari mwiza cyane. Kubera impamvu zitandukanye, aba nabo baje gutandukana ndetse kugeza ubu Sacha akaba amaze kubyara  abana 2 ku bandi bakunzi. Sacha wasezeye umuziki kuri ubu asigaye akora ubushabitsi mu bijyanye n'imideli.

5. Derek na Sandra Teta

Urukundo rwa Sandra Teta na Derek Sano ntiruzibagirana

Derek ni umwe mu basore baririmba mu itsinda rya Active, Sandra Teta akaba umwe mu bakobwa bamenyekanye cyane nyuma yo kuba igisonga cya nyampinga wa SFB ariko nyuma akajya no mu bushabitsi bwo gutegura ibitaramo. Aba bombi bakundanye byeruye igihe kitari gito ariko biza kurangira ubwo Derek yanditse kuri Instagram avuga ko yongeye kuba ingaragu nta mukunzi afite. Icyo gihe INYARWANDA yabajije Sandra iby'uko yaba yatandukanye na Derek kuri uwo munsi yanditse ibyo, Sandra asubiza ko nta kintu abiziho nawe ubwo butumwa yabubonye atyo. 

Kugeza ubu, Sandra aherereye mu gihugu cya Uganda aho akora ibikorwa bitandukanye byo gutegura ibitaramo mu tubari ari naho abana n’umukunzi we Weasel bamaze no kubyarana abana babiri ndetse urugo rwabo ruherutse guca ibintu mu itangazamakuru ubwo byavugwaga ko Weasel yakubise agakomeretsa Sandra Teta.

6. Olivis na Vanessa

Aba bombi batandukanye nabi banaterana amagambo ku mbuga nkoranyambaga

Olivisi nawe ni umwe mu bagize itsinda riririmba rya Active. Yakanyujijeho mu rukundo na Uwase Vanessa Raissa wabaye igisonga cya nyampinga w'u Rwanda muri 2015 gusa ibyabo nabo byaje kurangira nabi, cyane ko byarangiye impande zombi zisebanya ku mbuga nkoranyambaga. Vanessa kandi yavuzwe mu rukundo na Passy Kizito, umuhanzi wamenyekanye cyane mu itsinda TNP ryaje gusenyuka. Kugeza ubu ntabwo Olivis arongera gutangaza umukunzi we ndetse na Vanessa nubwo yakundanye n’abandi nyuma ya Olivis, kuri ubu bivugwa ko ntamukunzi afite.

Umukinnyi wa Kiyovu Sports, Niyonzima Olivier Seif yavuze ko nta bushobozi na buke afite bwatuma ikipe y’Urucaca itagura umukinnyi nka Manishimwe Djabel kandi imwifuza.

Ni nyuma y’uko bivuzwe ko Kiyovu Sports yashakaga kuzana Manishimwe Djabel ariko Seif akavuga ko naza we ahita ayisohokamo.

Guhera ku wa Kabiri w’iki cyumweru byavuzwe ko Manishimwe Djabel ashobora kwerekeza muri Kiyovu Sports nk’intizanyo ya APR FC mu gihe cy’umwaka umwe.

Byakurikiwe n’amakuru menshi aho byavuzwe ko umutoza n’umuyobozi wa Kiyovu Sports, Regis batazira General bamwifuza ariko umuyobozi wa Kiyovu Sports Company LTD, Mvukiyehe Juvenal ntamushake.

Nyuma haje andi makuru avuga ko umwe mu bakinnyi b’iyi kipe, Niyonzima Olivier Seif yavuze ko atifuza uyu mukinnyi, aramutse aje we agomba kugenda.

Bivugwa ko ubwo yari muri APR FC yaba ari umwe mu bagize uruhare kugira ngo atandukane nayo nabi, aho bivugwa ko umubano we n’abakinnyi atari mwiza.

Niyonzima Olivier Seif aganira n’ikinyamakuru ISIMBI, yabiteye utwatsi aho yavuze ko nta bushobozi afite bwo kubuza ikipe kugura umukinnyi yifuza.

Ati “njye ndi umukinnyi ntabwo ndi perezida singura kuko nanjye ndi umukinnyi, ntabwo nakwanga umukinnyi sinzi n’aho bikorerwa, njya gusinya nari njyenyine sinsinyisha, ibyo nta na kimwe mbiziho.”

Agaruka ku mubano we na we muri APR FC, yavuze ko ntacyo yapfuye na we kuko anavugana n’abayobozi ntiyari ahari.

Ati “ntacyo napfuye na we kuko mvugana n’abayobozi ntiyari ahari, ndakeka ibyo ari amagambo avugwa ku ruhande bidafite aho bihuriye nanjye.”

Kuba yaza muri Kiyovu Sports, ngo nta kibazo na kimwe we abibonamo kuko ni umukinnyi mwiza.

Ati “njyewe nta kibazo, ni umukinnyi, ari umukinnyi ufasha ikipe yaza njye nta kibazo na kimwe mfite. “

Kuba avugana na we, yagize ati “ntabwo tuvugana ariko ni umukinnyi mwiza aje yadufasha. Kuvugana n’umuntu si itegeko no kuba inshuti n’umuntu si itegeko, ubuzima burahinduka ukagira inshuti z’indi, gutyo niko tubaho.”

Niyonzima Olivier Seif na Manishimwe Djabel ni abakinnyi bakinanye mu makipe hafi ya yose bamaze gukinira yaba mu Isonga, Rayon Sports ndetse na APR FC.

Seif yateye utwatsi ibyo kwanga ko Djabel ajya muri Kiyovu Sports

Djabel bivugwa ko umubano we n’abakinnyi bagenzi muri APR FC utari mwiza